Mintirho Ya Vapostolo

10 A Khezariya, a ku ni wanuna mun’wani lweyi vito la yena a ku li Korneliyo, lweyi a a li murhangeli* wa ntlawa lowu vitaniwaka masonchwa ya le Italiya.* 2 A a gandzela Xikwembu a tlhela a xi hlonipha yena ni ndjangu wa yena hinkwawu; a a yendlela vanhu minchumu yayinene naswona nkama ni nkama a a khongela ka Xikwembu. 3 Siku lin’wani, kolomuyani ka ma 15,*+ a vone* ntsumi ya Xikwembu yi mu tela yi fika yi ku: “Korneliyo!” 4 Se a yi txuvuka na a chava a ku: “I mpsini Hosi?” Ntsumi yi ku: “Swikhongelo swa wena swi fikile ka Xikwembu; xi yi vonile ndlela leyi u pfunaka swisiwana hi yona, kutani xi ku khumbukile.+ 5 Rhumela vanhu aYopa swaku va ya vitana wanuna lweyi va nge i Simoni kambe a tlhelaka a vitaniwa Pedru. 6 Wanuna lweyi a le kaya ka Simoni lweyi a tirhaka hi* swikhumba, lweyi a tshamaka kusuhi ni lwandle.” 7 Loko ntsumi se yi sukile, Korneliyo a vitana vatirhi va yena vambirhi ni sonchwa leli chavaka Xikwembu leli a li tirha ni vatirhi va yena, 8 se a va byela hinkwaswu leswi nga humelela a gama a va rhuma Yopa.

9 Hi mundzuku ka kona, loko va ha famba naswona va li kusuhi ni ku fika ka doropa la Yopa, Pedru a ye henhla ka yindlo* hi ma 12* swaku a ya khongela. 10 Kambe a twa ndlala. Loko va ha lunghiselela swakudla, a vona minchumu ya ku hlamalisa ya ku ta hi ka Xikwembu,*+ 11 kutani a vona tilo li pfuleka; se ku xika nchumu lexi fanaka ni lensoli lalikulu na li yehlisiwa misaveni hi 4 wa tiponta ta lona; 12 ndzeni ka lona a ku ni mixaka hinkwayu ya swiharhi leswi nga ni 4 wa minenge, swinyanyani ni swiharhi leswi fambaka hi khwirhi. 13 Kutani a twa rito li ku ka yena: “Sekeleka u nyima Pedru, u dlaya u dla!” 14 Kambe Pedru a ku: “Hosi, a ni nge swi yendli leswo, hikusa a ni se tshama ni dla nchumu xa ku yila kumbe xa ku kala xi nga basanga.”+ 15 Rito li tlhela li khuluma na yena ka wumbirhi li ku: “Tshika ku vula swaku ya yila minchumu leyi Xikwembu xi nga yi basisa.” 16 A twe leswo kanharhu, kutani lensoli li tlheliseliwa tilweni hi ku hantlisa.

17 Na Pedru a ha hlamala leswi a nga swi vona* ni ku tivutisa swaku swi nga va swi vula yini, ku fika vanhu lava nga rhumiwa hi Korneliyo na va vutisa kaya ka Simoni, kutani va ya fika nyanghweni.+ 18 Va vitana va le kaya va va vutisa swaku Simoni lweyi a vitaniwaka Pedru a nga va a li kona kolanu ke. 19 Loko Pedru a ha pimisa* hi leswi a nga swi vona,* moya wa ku kwetsima+ wu ku: “Vona! Ku ni vavanuna vanharhu lava ku lavetelaka. 20 Xika u famba na vona, u nga kanakani hikusa va rhumiwe hi mina.” 21 Se Pedru a xika a va yela a fika a ku: “Munhu lweyi mi mu lavaka hi mina lweyi. Ni nga mi pfuna hi yini?” 22 Va ku: “Hi rhumiwe hi Korneliyo,+ murhangeli wa masonchwa, wanuna wa ku lulama, lweyi a chavaka Xikwembu ni lweyi tiko hinkwalu la Vayuda li vulavulaka kahle hi yena; a leletiwe marito ya Xikwembu hi ntsumi ya xona ya ku kwetsima swaku u ya kaya ka yena leswaku a ya yingisela leswi u nga ta mu byela swona.” 23 Se Pedru a va byela swaku va nghena va va vapfhumba va yena.

Hi mundzuku ka kona, a famba na vona, xikan’we ni vamakwavu van’wani Hosini va le Yopa. 24 Hi siku leli nga landzela, Pedru a ye Khezariya. Phela Korneliyo se a a va nyimelile naswona a a rhambe maxaka ni vanghanu va yena vavakulu. 25 Loko Pedru a nghena, Korneliyo a mu tlhangaveta, a fika a khizama phambheni ka yena. 26 Kambe Pedru a mu sekelekisa a ku: “Sekeleka u nyima; na mina no va munhu ntsena.”+ 27 Pedru a nghena na a khuluma na Korneliyo, kutani a kuma vanhu va vanyingi na va tlhanganile. 28 Se a ku ka vona: “Mi swi tiva kahle swaku swa yila kuva Muyuda a tipatsa ni munhu wa tiko lin’wani+ kumbe ku mu tshinelela, kambe Xikwembu xi ni kombile swaku ni nga tshuki ni vula swaku munhu wa yila kumbe a nga basanga.+ 29 Hi mhaka leyo, loko ni rhumiwile, ni tile na ni nga kanakani. Se ni kombela mi ni byela swaku mi ni vitanela yini.”

30 Kutani Korneliyo a ku: “Se ku hundza 4 wa masiku na ni khongelile kaya ka mina hi nkama wa ku fana ni lowu, hi ma 15;* se ku humelela wanuna lweyi a nga yambala mpahla ya ku phatima phambheni ka mina 31 a ku: ‘Korneliyo, xikhongelo xa wena xi fikile ka Xikwembu. Xi yi vonile ndlela leyi u pfunaka swisiwana hi yona, kutani xi ku khumbukile. 32 Se rhumela vanhu aYopa swaku va ya vitana Simoni, lweyi va nge i Pedru. A yendzele Simoni lweyi a a tirha hi* swikhumba, lweyi a tshamaka kusuhi ni lwandle.’+ 33 Hiloko ni rhuma vanhu swaku va ku landza naswona u yendle kahle hi ku ta lani. Kutani swoswi hi tlhanganile phambheni ka Xikwembu swaku hi ta twa minchumu hinkwayu leyi Yehovha* a nga ku rhuma leswaku u ta hi byela yona.”

34 Loko Pedru a twa leswo a ku: “Se na swi twisisa swaku Xikwembu a xi na xikheto,+ 35 kambe ka tiko lin’wani ni lin’wani, munhu lweyi a xi chavaka a tlhela a yendla swaswinene, wa yamukeleka ka xona.+ 36 Xi rhumele rito la xona ka Vayisrayele swaku xi va byela mahungu ya ku tsakisa ya ku rhula+ hi ku tirhisa Yesu Kreste, lweyi a nga Hosi ya vanhu hinkwavu.+ 37 Ma swi tiva swaku loko Yohani se a chumayelile hi ta ku tsakamisiwa, mhaka leyi ku nga vulavuliwa hi yona ku sukela aGalileya+ ku ya fika ka tiko hinkwalu la Yudiya hi leyi: 38 Ta Yesu lweyi a a huma Nazareta, ta leswi Xikwembu xi nga mu totisa xiswona hi moya wa ku kwetsima+ xi tlhela xi mu nyika matimba ni leswaku a fambe ka tiko hinkwalu a yendla mintirho yayinene ni ku hanyisa hinkwavu lava a va hluphiwa hi Davulosi,+ hikusa Xikwembu a xi li na yena.+ 39 Hina hi timboni ta minchumu hinkwayu leyi a nga yi yendla ka tiko la Vayuda ni le Yerusalema; kambe va mu dlayile hi ku mu hayeka mhandzini.* 40 Xikwembu xi mu pfuxile hi siku la wunharhu+ leswaku a ta voniwa, 41 ku nga li hi vanhu hinkwavu, kambe hi timboni leti nga langiwa khale hi Xikwembu, ku nga hina lava nga dla ni ku nwa na yena loko se a pfuxiwile ku feni.+ 42 A tlhele a hi rhuma swaku hi chumayela vanhu ni ku nyikela wufakazi hi ku helela+ la leswaku hi yena lweyi Xikwembu xi nga mu langa swaku a va muyavanyisi wa lava hanyaka ni lava nga fa.+ 43 Vaprofeta hinkwavu va yi tiyisekisile+ mhaka ya leswaku lweyi a pfumelaka ka Yesu a ta rivaleliwa swidjoho hi vito la yena.”+

44 Loko Pedru a ha khuluma hi timhaka leti, moya wa ku kwetsima wu xika henhla ka hinkwavu lava a va twa leswi a a swi vula.+ 45 Se vapfumeli* lava nga tsemiwa nsuvu,* lava nga ta na Pedru, va hlamala hikusa nyiko ya mahala ya moya wa ku kwetsima se a yi nyikiwa ni vanhu vamatiko. 46 Hikusa a va va twa na va vulavula hi tirimi va dzunisa Xikwembu.+ Se Pedru a ku: 47 “Vanhu lava, va yamukele moya wa ku kwetsima ku fana na hina; se i mani lweyi a nga yalaka swaku va tsakamisiwa hi mati?”+ 48 Se Pedru a va rhuma swaku va ya tsakamisiwa hi vito la Yesu Kreste.+ Kutani va kombela Pedru swaku a tshama na vona masikunyana.