Mahungu Ya Ku Tsakisa Ya Ku Tsaliwa Hi Matewu
6 “Tivoneleni swaku mi nga yendli swa ku lulama hi ku lava ku voniwa hi vanhu+ hikusa Papayi wa n’wina wa le matilweni a nga ta mi katekisa. 2 Hi mhaka leyo, loko u nyika nchumu xisiwana,* u nga rhangi hi ku ba mhalamhala,* ku fana ni leswi vakanganyisi va yendlisaka xiswona ka masinagoga* ni lomu tindleleni, swaku va ta dzunisiwa hi vanhu. Ni mi byela ntiyiso: Xikwembu a xi nge va katekisi. 3 Kambe wena, loko u nyika xisiwana nchumu, voko la wena la ximatsi li nga swi tivi leswi yendliwaka hi la xinene, 4 leswaku ku nyika ka wena ku va xihundleni. Kutani Papayi wa wena lweyi a vonaka hinkwaswu a ta ku katekisa.+
5 “Naswona loko mi khongela, mi nga fani ni vakanganyisi+ lava rhandzaka ku khongela na va nyimile ka masinagoga ni lomu tindlela ta tikulu ti tlhanganaka kona leswaku va voniwa hi vanhu.+ Ni mi byela ntiyiso: Xikwembu a xi nge va katekisi. 6 Kambe loko wena u khongela, nghena ndlwini ka wena u pfala xipfalu, u gama u khongela ka Papayi wa wena lweyi a kalaka a nga voniwi.+ Kutani Papayi wa wena lweyi a vonaka hinkwaswu a ta ku katekisa. 7 Loko u khongela, u nga phindhaphindhi minchumu ya ku fana, ku fana ni leswi vanhu vamatiko va yendlisaka xiswona, hikusa va pimisa swaku va ta twiwa loko va vula marito ya manyingi. 8 Se mi nga fani na vona, hikusa Papayi wa n’wina wa swi tiva leswi mi swi pfumalaka+ na mi nge se swi kombela.
9 “Kutani mi fanele mi khongelisa leswi:+
“‘Papayi wa hina lweyi a nga matilweni, vito la wena+ a li kwetsimisiwe.*+ 10 Mfumu wa wena+ a wu te. Ku rhandza ka wena+ a ku yendleke amisaveni+ ku fana ni leswi ku yendlekisaka xiswona tilweni.* 11 Hi nyiki pawu* la siku la namuntlha;+ 12 naswona hi rivaleli swidjoho* swa hina, ku fana ni leswi na hina hi va rivalelaka lava hi djohelaka.+ 13 Hi pfuni leswaku hi nga hluliwi hi ndzingo;+ u hi vhikela ka Davulosi.’*+
14 “Hikusa loko mi rivalela vanhu swidjoho swa vona, na yena Papayi wa n’wina wa le tilweni a ta mi rivalela;+ 15 kasi loko mi nga va rivaleli, na yena Papayi wa n’wina a nga ta mi rivalela.+
16 “Loko mi titsona swakudla,+ tshikani ku boha swimombo ku fana ni vakanganyisi, hikusa a va hlambi matihlo kuva vanhu va ta swi vona swaku va titsona swakudla.+ Ni mi byela ntiyiso: Xikwembu a xi nge va katekisi. 17 Kambe loko mi titsona swakudla, tolani mafurha ka tinhloko ta n’wina, mi hlamba ni matihlo, 18 kuva vanhu va nga swi voni swaku mi titsona swakudla, kambe mi voniwa ntsena hi Papayi wa n’wina lweyi a vonaka swilo hinkwaswu. Se Papayi wa n’wina lweyi a mi vonaka hambi a nga voniwi, a ta mi katekisa.
19 “Tshikani ku tihlengeletela tshomba amisaveni,+ lomu li nga ta dliwa hi swipungwani li tlhela li kurha, ni lomu vayivi va nga tlhanyaka va yiva. 20 Kambe tihlengeleteleni tshomba atilweni,+ lomu swipungwani ni ku kurha swi kalaka swi nga li kona,+ ni lomu vayivi va kalaka va nga tlhanyi va yiva. 21 Hikusa lomu tshomba la wena li nga kona ni mbilu ya wena yi ta va kolanu.
22 “Livoni la muzimbha i tihlo.+ Kutani, loko tihlo la wena li txuvuke nchumu xin’we ntsena, muzimbha wa wena hinkwawu wu ta voninga. 23 Kambe loko tihlo la wena li nga lulamanga,*+ muzimbha wa wena hinkwawu wu ta va munyama. Se loko ku vonakala loku nga ka wena ku li munyama hikakunene, munyama wa kona wu ta va wukulu swinene!
24 “A ku na munhu lweyi a nga tirhelaka tihosi timbirhi; hikusa a ta nyenya yin’we a rhandza leyin’wani,+ kumbe a ta namarhela yin’we a yeyisa leyin’wani. A mi nge swi koti ku tirhela Xikwembu ni ku tirhela ku ganya* hi nkama wun’we.+
25 “Hi mhaka leyo na mi byela: Tshikani ku vilela+ hi wutomi la n’wina loko swi ta ka leswi mi nga ta swi dla kumbe leswi mi nga ta swi nwa, kumbe ku vilela hi muzimbha wa n’wina leswaku mi ta yambala yini.+ A wutomi a li swi tluli swakudla, ni muzimbha a wu yi tluli mpahla ke?+ 26 Txuvukisisani kahle swinyanyani:+ A swi byali mbewu, a swi tshoveli naswona a swi hlengeleti nchumu lomu ku hlayisiwaka kona swakudla; kambe Papayi wa n’wina wa le tilweni wa swi wundla. Se n’wina ke? A mi swi tluli hi lisima ke? 27 I mani ka n’wina lweyi hi ku vilela a nga yengetelaka hambi 1 minutu ka wutomi la yena?+ 28 Hambi mpahla, hi mhaka muni mi vilela hi yona? Djondzani ka leswi swiluva leswi vitaniwaka makhon’wa* swi kulisaka xiswona; a swi tirhi naswona a swi rhungi mpahla, 29 kambe na mi byela swaku hambi Solomoni+ lweyi a a ni minchumu ya yinyingi ya ku saseka, a nga zanga a yambala ku fana ni xin’we xa swona. 30 Se leswi Xikwembu xi yambexaka swinsinyani swa nhova hi ndlela leyi, leswi nga kona namuntlha kasi mundzuku swi hoxiwa ka ndzilu, ku nga va leswaku a xi nge mi yambexi ku swi tlula n’wina mi nga ni lipfumelo lalitsongo? 31 Kutani mi nga tshuki mi vilela+ mi ku: ‘Se hi ta dla yini?’ kumbe: ‘Se hi ta nwa yini?’ kumbe: ‘Se hi ta yambala yini?’+ 32 Hikusa hinkwaswu leswi, hi leswi vamatiko va waka va pfuka leswaku va swi kuma. Phela Papayi wa n’wina wa le tilweni wa swi tiva swaku ma swi lava swilo leswi hinkwaswu.
33 “Kutani, tamani mi lava Mfumu ni ku lulama ka Xikwembu ku sungula, se swilo leswin’wani hinkwaswu mi ta nyikiwa swona.+ 34 Mi nga tshuki mi vilela hi swa mundzuku,+ hikusa siku la mundzuku li ta va ni mivilelo ya lona. Siku lin’wani ni lin’wani li ni swikarhatu swa lona.