DJONDZO 12
I Yini Swi Nga Ku Pfunaka Ku Tama U Djondza Bibele?
Ku djondza Bibele swa pfuna. Kambe minkama yin’wana swi nga hi karhatela. Minkama yin’wana, u nga ha tivutisa swaku indje u ta swi kota ku tama u djondza Bibele. Hi mhaka muni swi pfuna ku tikarhata swaku hi tama hi djondza Bibele? I mpsini swi nga ku pfunaka hambi loko u kumana ni swikarhatu?
1. Hi mhaka muni swi li swa lisima ku djondza Bibele?
“Hikusa rito la Xikwembu la hanya naswona li ni ntamu.” (Vaheberu 4:12) Bibele i la lisima hikusa li ni mimpimiso ya Xikwembu ni leswi xi titwisaka xiswona hi wena. A li hi pfuni ku va ni wutivi ntsena kambe li tlhela li hi nyika wutlharhi ni ntshembo. Naswona xa lisima hintamu hi leswi li hi pfunaka ku va vanghanu va Yehovha. Leswi hi swi djondzaka ka Bibele swi hi pfuna ku txintxa wutomi la hina.
2. Hi mhaka muni hi fanele hi wu nyika lisima ntiyiso wa Bibele?
A ntiyiso lowu nga ka Bibele i wa lisima hintamu. Hi mhaka leyo Bibele li hi byela li ku “xava ntiyiso naswona u nga tshuki u wu xavisa.” (Swivuriso 23:23) Loko hi tama hi twisisa lisima la ntiyiso wa Bibele hi ta yentxa hinkwaswu leswaku hi nga tshiki ku djondza, hambiloko swi karhata. — Lerha Swivuriso 2:4, 5.
3. Yehovha a nga ku pfunisa ku yini swaku u tama u djondza?
Leswi i nga Yehovha a nga ku yentxa naswona a nga Munghanu wa wena a lava ku ku pfuna swaku u djondza hi yena. Xikwembu xi ta ku “nyika ntamu wa ku navela hinkwaswu leswi xi swi lavaka.” (Lerha Vafilipiya 2:13.) Loko minkama yin’wana swi ku karhatela ku djondza kumbe ku tirhisa leswi u nga swi djondza Xikwembu xi ta ku pfuna. Loko u lava matimba ya ku hlula swikarhatu kumbe ku kanetiwa, xona xi ta ku pfuna ku swi hlula. Nkama ni nkama khongela ka Yehovha swaku a ku pfuna u tama u djondza. — 1 Vatesalonika 5:17.
DJONDZA SWIN’WANA
Vona swaku u nga yentxa yini leswaku u tama u djondza hambiloko u ni mintirho ya yinyingi kumbe ku ni lava va kalaka va nga swi tsakeli loko u djondza. Tlhela u vona swaku Yehovha a nga ku pfunisa ku yini swaku u tama u djondza.
4. Yentxa swaku djondzo ya Bibele yi va ya ku sungula ka wutomi la wena
Minkama yin’wana hi ni mintirho ya yinyingi ya ku yi yentxa lakakuva swi hi karhatela ku kuma nkama wa ku djondza Bibele. I mpsini swi nga hi pfunaka? Lerhani Vafilipiya 1:10, mi gama mi bula hi swivutiso leswi landzelaka:
Hi yini minchumu ya “lisima hintamu” ka wutomi la wena?
U nga yentxa yini swaku djondzo ya wena ya Bibele yi va nchumu wa ku sungula ka wutomi la wena?
Loko u tata xibakidani hi misava swi nga ku karhatela ku kuma ndhawu ya ku peta maribye ya manyingi
Kambe loko u rhanga hi ku peta maribye, u nga yi kuma ndhawu ya ku chela misava ya yinyingi. Hi ku fanana loko u rhanga hi ku yentxa minchumu ya lisima hintamu ka wutomi la wena u nga swi kota ku kuma nkama wa ku yentxa minchumu leyin’wana
Ku djondza Bibele swi ta ku yentxa u tsaka hikusa u ta tiva Xikwembu ni ku tlhela u xi tirhela. Lerhani Matewu 5:3, mi gama mi bula hi xivutiso lexi landzelaka:
Loko hi tikarhata swaku djondzo ya hina ya Bibele yi va nchumu wa ku sungula ka wutomi la hina swi nga hi pfunisa ku yini?
5. U nga tshiki ku djondza hambiloko vanhu van’wana va nga swi tsakeli
Minkama yin’wana vanhu va nga ha zama ku ku tshikisa ku djondza. Vona xikombiso xa Francesco. Sixtirani VHIDIYO, mi gama mi bula hi swivutiso leswi landzelaka.
Ka vhidiyo, vanghanu ni maxaka ya Francesco va yentxe yini loko a va byele hi leswi a a swi djondza?
Ku tama a djondza swi mu pfunise ku yini?
Lerhani 2 Timotiyu 2:24, 25, mi gama mi bula hi swivutiso leswi landzelaka:
Maxaka ya wena ni vanghanu va li yini hi leswi u swi djondzaka?
Hi kuya hi tindzimana leti, u nga hlamulisa ku yini loko vanhu va nga tsaki hi ku ku vona na u djondza Bibele? Hi mhaka muni?
6. Tshemba swaku Yehovha a ta ku pfuna
Loko hi ya hi mu tiva Yehovha hi ta navela ku mu tsakisa. Kambe swi nga hi karhatela ku txintxa minchumu yin’wana ka wutomi la hina swaku hi mu tsakisa. Loko swi ku karhatela u nga godoli. Yehovha a ta ku pfuna. Sixtirani VHIDIYO, mi gama mi bula hi swivutiso leswi landzelaka.
Ka vhidiyo, i mpsini leswi Jim a nga swi txintxa ka wutomi la yena swaku a tsakisa Yehovha?
I mpsini swi nga ku tsakisa ka xikombiso xa Jim?
Lerhani Vaheberu 11:6, mi gama mi bula hi swivutiso leswi landzelaka:
Yehovha a ta va yentxela yini vanhu lava mu “lavaka hi mbilu hinkwayu”, lava tikarhatelaka swaku va mu tiva ni ku mu tsakisa?
Leswo swi ku djondzisa yini hi ndlela leyi Yehovha a titwaka hi yona loko a ku vona u yentxa minzamu ya ku djondza Bibele?
VANHU VAN’WANA VA NGA HA KU VUTISA VA KU: “Hi mhaka muni u djondza Bibele?”
U ta hlamulisa ku yini?
LESWI HI NGA SWI DJONDZA
Minkama yin’wana swi nga ku karhatela ku djondza Bibele kambe loko u tama u djondza swi ta ku pfuna swaku u tikhorisa hi wutomi la ku kala li nga heli. Tama u tshemba Yehovha, yena a ta ku pfuna.
Ku kambela leswi hi nga swi djondza
Hi mhaka muni ntiyiso lowu nga ka Bibele wu li wa lisima ka wena?
U nga yentxa yini swaku u rhangisa leswi nga swa “lisima hintamu” ka wutomi la wena?
Hi mhaka muni swi li swa lisima ku kombela Yehovha swaku a ku pfuna ku tama u djondza Bibele?
LOKO U LAVA KU TIVA SWIN’WANA
Vona 4 wa minchumu leyi nga pfuna vanhu van’wana swaku va wu tirhisa kahle nkama wa vona.
“Tirhisa Nkarhi Wa Wena Hi Vutlhari” (Khindlimuka! wa Fevereiro wa 2014 hi Xitsonga)
Vona swaku Yehovha a mu pfunise ku yini wansati lweyi nuna wa yena a a nga swi lavi swaku a tsakisa Xikwembu.
Yehovha Ahi Nyika Ntamu Wa Kutiyisela Swiyimu Hinkwaswu (5:05)
Vona swaku wanuna mun’wana a pfunekise ku yini hi leswi nsati wa yena a nga tama a djondza.
Minkama yin’wana vanhu va vula swaku Timboni ta Yehovha ti wonhetela mindjangu. Kambe i ntiyiso leswo?