DJONDZO 42
Bibele Li Vula Yini Hi Ku Chada Ni Ku Kala Hi Nga Chadi?
Ka matiko man’wani vanhu va pimisa swaku munhu a ngo tsaka ntsena loko a chadile. Kambe a hi vanhu hinkwavu lava nga chada lava nga tsaka, naswona a hi vanhu hinkwavu lava kalaka va nga chadanga va tshamaka na va nga tsakanga. Ku vula ntiyiso, Bibele li kombisa swaku ku chada ni ku kala u nga chadanga i prezenti leli taka hi ka Yehovha.
1. Munhu a pfuneka hi yini loko a tshama na a nga chadanga?
A Bibele li li: “Lweyi a chadaka a yendla kahle, kambe lweyi a tshamaka na a nga chadanga, a yendla kahle hintamu.” (Lerha 1 Vakorinto 7:32, 33, 38.) Hi mhaka muni ku vuliwa swaku lava kalaka va nga chadanga va “yendla kahle hintamu”? Hikusa Vakreste lava kalaka va nga chadanga a va karhateki hi ku hlayisa nuna kumbe nsati wa vona. Leswo swi yendla swaku va va ni nkama wa wunyingi. Hi xikombiso, va nga tirhisa nkama wa vona swaku va yengesela ntirho wa vona wa ku chumayela kumbe va yendza va ya ka matiko man’wani va ya chumayela mahungu ya ku tsakisa naswona xa lisima hintamu, va ni nkama wa wunyingi swaku va kulisa wunghanu la vona na Yehovha.
2. Lava nga chada hi nawu va pfuneka hi yini?
Ku chada i swinene, ni ku kala u nga chadi na swona i swinene. Bibele li li: “Vambirhi va yampsa ku tlula mun’we”. (Ekleziyaxta 4:9) Leswo i ntiyiso, ngopfungopfu ka Vakreste lava hanyaka hi minawu ya Bibele ka muchadu wa vona. Loko wanuna ni wansati va tsalisa muchadu wa vona hi ku ya hi nawu, va tshembisana ku rhandzana, ku hloniphana ni ku tlhela va hlayisana. Loko wanuna ni wansati va tshama xikan’we na va chadile, swa va vhikela swi tlhela swi vhikela ni vana va vona. Kambe leswo a swi yendleki ka lava va tshamaka xikan’we na va nga chadanga.
3. Yehovha a wu vonisa ku yini muchadu?
Nkama Yehovha a nga chadisa vanhu va ku sungula a te: “Wanuna a ta siya papayi wa yena ni mamani wa yena, a namarhela nsati wa yena”. (Genesa 2:24) Yehovha a lava swaku wanuna ni wansati lava nga chada va rhandzana va tlhela va tshama xikan’we loko va ha hanya. Yehovha o pfumelela swaku lava nga chada va tima muchadu loko mun’we ka vona a mbuyeta.a (Matewu 19:9) Yehovha a pfumelela swaku wansati kumbe wanuna lweyi a nga djoheliwa a langa ku tima muchadu kumbe a nga wu timi. Naswona Yehovha a nga pfumeli swaku Vakreste va va ni nsati kumbe nuna wa ku tlula mun’we. — 1 Timotiya 3:2.
DJONDZA SWIN’WANI
Vona swaku lava nga chada ni lava kalaka va nga chadanga va nga yendla yini swaku va tsaka va tlhela va tsakisa Yehovha.
4. U nga tsaka hambiloko u nga chadanga
Yesu a a vona swaku ku kala munhu a nga chadi a ku li nchumu xa lisima. (Matewu 19:11, 12) Lerhani Matewu 4:23, mi gama mi bula hi xivutiso lexi landzelaka:
Leswi Yesu a a nga chadanga, a wu tirhisise ku yini nkama wa yena swaku a tirhela Yehovha a tlhela a pfuna van’wani?
Vakreste lava kalaka va nga chadanga na vona va nga yendla leswi Yesu a nga swi yendla. Sixtirani VHIDIYO, mi gama mi bula hi xivutiso lexi landzelaka.
Vakreste lava kalaka va nga chadanga va nga wu tirhisisa ku yini nkama wa vona swaku va tirhela Yehovha?
Indjhe a wu swi tiva?
Bibele a li vuli swaku munhu a fanele a chada na a ni malembe mangaki. Kambe li hi pfuna ku vona swaku swi kahle a nyima anze “ntanga [ya yena] se yi fanela,” ku nga nkama lowu munhu a kotaka ku yendla xiboho hi wutlharhi na a nga susumetiwi hi ku navela ku famba masangu. — 1 Vakorinto 7:36.
5. Mu langi kahle lweyi u nga ta chada na yena
Phela ku langa lweyi hi nga ta chada na yena i xin’we xa swiboho swa lisima hintamu lexi hi ngaxi yendlaka ka wutomi la hina. Lerhani Matewu 19:4-6, 9, mi gama mi bula hi xivutiso lexi landzelaka:
Hi mhaka muni Mukreste a nga fanelanga a tsutsumela ku chada na a nga se swi lunghekela?
Bibele li nga ku pfuna ku vona swaku i yini leswi u faneleke u swi kambela ka lweyi u lavaka ku chada na yena. Kambe xa lisima ka hinkwaswu hi leswaku a fanele a mu rhandza hintamu Yehovha.b Lerhani 1 Vakorinto 7:39 ni 2 Vakorinto 6:14. Mi gama mi bula hi swivutiso leswi landzelaka:
Hi mhaka muni hi fanele hi chada ni munhu lweyi a rhandzaka Yehovha?
Yehovha a nga titwisa ku yini loko hi chada ni munhu lweyi a kalaka a nga mu tirheli?
Loko ku patsiwa swiharhi swimbirhi swa ku kala swi nga fani swaku swi rima xikan’we swi ta hlupheka. Hi ku fana, loko Mukreste a chada ni munhu lweyi a kalaka a nga li Mukreste a ta hlupheka
6. Vona muchadu ku fana ni leswi Yehovha a wu vonisaka xiswona
A khale, vavanuna van’wani lava a va tirhela Xikwembu a va hambana ni vasati va vona hi swivangelo swa ku kala swi nga twali. Lerhani Malakiya 2:13, 14, 16, mi gama mi bula hi xivutiso lexi landzelaka:
Hi mhaka muni Yehovha a swi nyenya ku tima muchadu hi swivangelo leswi kalaka swi nga fambisani ni Bibele?
Ku mbuyeta ni ku tima muchadu swi vavisa nuna kumbe nsati lweyi a nga djoheliwa ku patsa ni vana
Sixtirani VHIDIYO, mi gama mi bula hi xivutiso lexi landzelaka.
Loko u chade ni munhu lweyi a kalaka a nga mu tirheli Yehovha, u nga yendla yini swaku u tshama na wu tsakile ka muchadu wa wena?
7. Tirhisa leswi Yehovha a swi vulaka hi muchadu
Minkama yin’wani munhu lweyi a nga chada swi nga yendleka swi lava a tikarhata swaku a hanya hi minawu ya Yehovha ka muchadu wa yena.c Kambe Yehovha wa va katekisa lava hanyaka hi minawu ya yena. Sixtirani VHIDIYO.
Lerhani Vaheberu 13:4, mi gama mi bula hi xivutiso lexi landzelaka:
U vona swaku swa koteka ku tirhisa leswi Yehovha a swi vulaka hi muchadu? Hi mhaka muni u vula leswo?
Ka matiko man’wani, a mfumu wu lava swaku loko vanhu va chada va tsalisa muchadu wa vona hi ku ya hi nawu. Naswona loko va lava ku tima muchadu, va swi yendla hi ku ya hi nawu wa tiko. Yehovha a lava swaku Vakreste va yi yingisa minawu yoleyo. Lerhani Tito 3:1, mi gama mi bula hi xivutiso lexi landzelaka:
Loko u tekile kumbe u tekiwile, wa tiyiseka swaku wukati la wena u li tsalisile hi ku ya hi nawu?
VAN’WANI VA NGA HA KU VUTISA VA KU: “Hi mhaka muni ni fanele ni chada? Indjhe swi bihile ku tshama xikan’we na hi nga chadanga?”
A wu ta hlamulisa ku yini?
LESWI HI NGA SWI DJONDZA
Ku chada ni ku kala u nga chadanga i prezenti leli taka hi ka Yehovha. Lava kalaka va nga chadanga ni lava va nga chada va nga tsaka loko va hanya hi minawu ya Yehovha.
Ku kambela leswi hi nga swi djondza
Lweyi a kalaka a nga chadanga a nga li tirhisisa ku yini wutomi la yena hi ndlela yayinene?
Hi mhaka muni Bibele li vula swaku hi fanele hi chada ntsena ni munhu lweyi a tirhelaka Yehovha?
Hi xini xivangelo xin’we ntsena xi nga ka Bibele xa ku tima muchadu?
LOKO U LAVA KU TIVA SWIN’WANI
Swi vula yini ku chada “aHosini ntsena?”
Sixtira mavhidiyo mambirhi lawa ma nga ta ku pfuna ku yendla xiboho xaxinene loko u lava ku namorara kumbe ku chada.
Vona swaku hi mhaka muni makwerhu wa xinuna a vula swaku Yehovha a mu nyike nchumu wa ku yampsa ku tlula lowu a a li na wona khale.
Loko munhu a pimisa hi ku tima muchadu kumbe a lava ku hambana ni lweyi a nga chada na yena, i mpsini leswi a faneleke a pimisa hi swona?
“Hlonipha ‘Leswi Xikwembu Xiswihlanganiseke’” (Murindzi wa Dezembro wa 2018)
a Vona Ntlhamuselo 4 lowu vulavulaka hi ku va nuna na nsati va hambana loko va nga mbuyetanga.
b Ka tindhawu tin’wani, vapsali hi vona va langaka swaku i mani lweyi a nga ta chada ni n’wana wa vona. Ka tindhawu toleto, vapsali lava nga ni lirhandzu a va rhangi hi ku pimisa hi swaku munhu lweyi a nga ta chada ni n’wana wa vona a ni male kumbe a ni ndhuma. Kambe va lava ku tiyiseka swaku wa mu rhandza Yehovha.
c Loko i li swaku u tshama ni munhu lweyi u kalaka u nga chadanga na yena hi ku ya hi nawu, u fanele u yendla xiboho xa ku chada na yena kumbe u mu tshika.