Mfumu Wa Xikwembu Se Wa Fuma!

 1. Impsini swi hi yentxaka hi kholwa swaku Mfumu wa Xikwembu se wa fuma?

LOKO u vona swilo swa ku biha leswi yentxekaka lani misaveni, swi nga yentxeka u nga kholwi swaku siku lin’wana swi nga txintxa. Vanhu a va ha rhandzani mindjangwini, vanhu va vanyingi a va ha li na mhaka ni vanhu van’wana, funtshi va rhandza ku holovisana ni ku lwa, naswona vanhu va ku tala swa va karhatela ku tshemba lava rhangelaka. Kambe minchumu leyi yentxekaka yi nga ku yentxa u kholwa swaku swilo swi ta txintxa. Hi mhaka muni? Hikusa leswi vanhu va swi yentxaka hi leswi Bibele se a li vulile swaku swi ta yentxeka ka “masiku ya wugamu”. (2 Tim. 3:1-5) Phela a ku na munhu lweyi a nga yalaka swaku wuprofeta lolelo la hetiseka. Funtshi leswi swi yentxekaka, swi kombisa swaku Mfumu wa Xikwembu se wa fuma. Kambe leli o va wuprofeta lin’we ka wuprofeta la linyingi leli li nga kona, leli vulavulaka hi Mfumu wa Xikwembu. Swi ta tiyisa lipfumelo la hina ku kambela wuprofeta leli se li nga hetiseka swoswinyana.

 2. Hi ta vona yini ka nhlokomhaka leyi, naswona hi mhaka muni?

² Ka nhlokomhaka leyi hi ta bula hi 1) wuprofeta leli hi pfunaka ku tiva swaku Mfumu wa Xikwembu wu sungule ku fuma siku muni, 2) wuprofeta leli hi pfunaka ku twisisa swaku Yesu se wa fuma tilweni ni 3) wuprofeta leli kombisaka leswi valala va Mfumu wa Xikwembu va nga ta dlayisiwa xiswona. Ku fana ni leswi murhungi a tlhanganisaka switarapu swaku a rhunga mpahla, na hina loko hi lerha wuprofeta la ku hambanahambana leli nga ka Bibele hi ta wu twisisa kahle nkama lowu hi hanyaka ka wona.

 3. Impsini leswi buku la Daniyele 7:13, 14 li swi vulaka hi Hosi ya Mfumu wa Xikwembu?

³ Wuprofeta li nga ka Daniyele 7:13, 14 li kombisa swaku Yesu Kreste a ta va Hosi ya yinene ya Mfumu wa Xikwembu. Vanhu va matiko hinkwawu “va ta mu tirhela” na va tsakile, naswona a ku na hosi yin’wani leyi nga ta mu pfaleta. Wuprofeta lin’wani li nga ka buku la Daniyele, li vule swaku Yesu a a ta sungula ku fuma loko se ku hele 7 wa minkama. Hi nga li tivisa ku yini lembe leli Yesu a nga sungula ku fuma hi lona?

 4. Buku la Daniyele 4:10-17 li hi pfunisa ku yini ku tiva lembe leli Yesu a nga sungula ku fuma hi lona? (Vona ntlhamuselo wa le hansi.)

⁴ Lerha Daniyele 4:10-17. A “7 wa minkama” yi nyimela 2.520 wa malembe. Minkama leyi, yi sungule ku kontiwa hi 607 A.E.C., loko Vababilona va suse hosi ya wugamu ya Jerusalema. Se minkama leyi, yi game ku kontiwa hi 1914, nkama Yehovha a nga veka Yesu swaku a va Hosi ya Mfumu wa Xikwembu.b—  Ezek. 21:25-27.

 5. Ku twisisa wuprofeta leli vulavulaka hi 7 wa minkama swi hi pfunisa ku yini?

⁵ Wuprofeta leli li nga hi pfunisa ku yini? Ku twisisa wuprofeta leli vulavulaka hi “7 wa minkama” swi hi tiyisekisa swaku Yehovha a hetisisa leswi a swi tshembisaka hi nkama wa kona. Yehovha se a a wu vekile nkama lowu Yesu a a ta sungula ku fuma hi wona. Leswo swi hi tiyisekisa swaku wuprofeta lelin’wana na lona li ta hetiseka hi nkama lowu a nga wu veka. Funtshi leswo ‘a swi nge te hlwela!’ —  Hab. 2:3.

 6. a) Impsini swi yentxekaka lani misaveni swi kombisaka swaku Kreste se wa fuma matilweni? b) Nhlawutelo 6:2-8 yi swi tiyisekisisa ku yini swaku Yesu se wa fuma hikakunene?

⁶ Loko se a hetile ntirho wa yena wa lani misaveni, Yesu a byele vadjondzisiwa va yena minchumu leyi a yi ta va pfuna ku twisisa swaku se a sungulile ku fuma tilweni. Minchumu yoleyo yi patsa tinyimpi, tindlala ni ku tsekatseka ka misava. A tlhele a vula swaku a ku ta va ni mintungu kumbe mavabyi “ka tindhawu ta ku hambanahambana”, naswona ntungu wa corona i xin’we xa swikombiso swa kona. Hinkwaswu leswi yentxekaka i “xikombiso” xa leswaku Yesu a sungule ku fuma. (Mat. 24:3, 7; Luk. 21:7, 10, 11) Loko se ku hundze 60 wa malembe na Yesu a file a tlhela a pfuxiwa swaku a ya tilweni, a tlhele a tiyisekisa mupostolo Yohani swaku swilo leswo a swi ta yentxeka hikakunene. (Lerha Nhlawutelo 6:2-8.) Swilo swoleswo swa yentxeka ku sukela nkama Yesu a nga sungula ku fuma hi 1914.

 7. Hi mhaka muni minchumu lani misaveni yi sungule ku biha hintamu nkama Yesu a nga sungula ku fuma?

⁷ Hi mhaka muni minchumu lani misaveni yi sungule ku biha hintamu nkama Yesu a nga sungula ku fuma? Nhlawutelo 6:2 yi hi pfuna ku twisisa swaku nchumu wa ku sungula lowu Yesu a nga wu yentxa nkama a nga sungula ku fuma, ku ve ku lwa na Sathana Davulosi ni madimoni ya yena. Buku la Nhlawutelo 12, li kombisa swaku Sathana a hluliwile, se yena ni madimoni ya yena, va txukumetiwile lani misaveni. Leswi Sathana a a kwatile a sungule ku hlupha vanhu lani misaveni, se leswo swi tise “khombo ka misava ni lwandle”. —  Nhla. 12:7-12.

 8. Hi pfunekisa ku yini loko hi vona swilo leswi kombisaka swaku Mfumu wa Xikwembu se wa fuma swi yentxeka?

⁸ Wuprofeta leli li hi pfunisa ku yini? Minchumu ya ku biha leyi vanhu va yi yentxaka, yi kombisa swaku Yesu se a sungule ku fuma. Se, a hi hlamali loko hi vona vanhu va nga na mhaka ni vanhu van’wana va tlhela va yentxa swa ku biha, hikusa ha swi tiva swaku Bibele a li hlayile swaku leswo a swi ta yentxeka naswona a swi ta kombisa swaku Mfumu wa Xikwembu se wa fuma! (Pis. 37:1) Naswona leswi Armajedoni yi nga kusuhi, minchumu ya ku biha yi to ya yi yengeteleka. (Marku 13:8; 2 Tim. 3:13) Hi mu khensa hintamu Papayi wa hina Yehovha hileswi a hi pfunaka ku tiva swaku hi mhaka muni ku yentxeka minchumu ya ku biha lani misaveni.

 9. a) Wuprofeta la Daniyele 2:28, 31-35, li vula yini hi mfumu wa wugamu wa misava? b) Mfumu lowu, wu sungule nkama muni ku fuma?

⁹ Lerha Daniyele 2:28, 31-35. Ku ni swin’wani leswi Bibele li nga swi hlaya, leswi yentxekaka namuntlha. Nebukadnetsara a lorhe swilo leswi a swi ta yentxeka “a ku heleni ka masiku ya wugamu” na Yesu se a sungule ku fuma. Valala va Yesu va lani misaveni va patsa mfumu wa wugamu wa misava lowu nyimelaka “minkondzo ya nsimbi ni ya madaka”. Phela mfumu wolowo se wa fuma. Wu sungule ku fuma hi nkama wa Nyimpi ya ku Sungula ya Misava, nkama Grã-Bretanha ni Estados Unidos va nga sungula ku tirhisana ku nga nkama lowu ku nga sungula Potência Anglo-Americana. Xifaniso lexi Nebukadnetsara a nga xi vona, xi kombise minchumu yimbirhi leyi a yi ta hambanisa mfumu lowu ni mimfumu leyin’wani.

10 a) Leswi Daniyele a nga swi vula hi mfumu wa América ni Inglaterra swi yentxekisa ku yini namuntlha? b) Hi yini nghozi leyi hi faneleke hi tivonela ka yona? (Vona kwadru leli nge: “Tivoneli Ka Madaka!”)

¹⁰ Xa ku sungula, ku hambana ni mimfumu leyin’wana, leyi ku vulavuliwaka hi yona ka wuprofeta la Daniyele, mfumu wa América ni Inglaterra ku nga Potência Anglo-Americana, a wu nyimeliwi hi woru kumbe prata, kambe wu nyimeliwa hi minchumu ya ku kala yi nga tiyanga ku nga madaka ni nsimbi. (Dan. 2:43) Namuntlha swa tikomba swaku switereka, minzamu leyi vanhu va yi yentxaka swaku va fuma, makampanya ya ku kombela mavhoto, minzamu ya ku lwela timfanelo ta vanhu, swi yentxa swaku swi wu karhatela mfumu lowu wa misava hinkwayu, kuva wu yentxa leswi wu swi lavaka.

11. Mfumu wa América ni Inglaterra hi wona mfumu wa misava namuntlha. Se, hi mhaka muni leswo swi hi tiyisa swi tlhela swi hi yentxa hi kholwa swaku hi hanya ka masiku ya wugamu?

¹¹ Xa wumbirhi, Bibele li profete swaku a mfumu wa América ni Inglaterra lowu fanekiseliwaka hi minenge ya xifaniso xa xikulu, i mfumu wa misava wa wugamu. A ku nga ha ta va ni mfumu wun’wana wa misava. Phela mfumu lowu ni mimfumu leyin’wana ya vanhu, yi ta helisiwa hi Mfumu wa Xikwembu ka nyimpi ya Armajedoni.c —  Nhla. 16:13, 14, 16; 19:19, 20.

12. Hi mhaka muni wuprofeta la Daniyele li hi tiyisa li tlhela li hi nyika ntshembo?

¹² Wuprofeta leli li hi pfunisa ku yini? Wuprofeta la Daniyele li hi byela swin’wana leswi hi yentxaka hi kholwa swaku hi hanya ka masiku ya wugamu. Ka 2.500 wa malembe lawa ma nga hundza, Daniyele a profete swaku mfumu wa Babilona a wu ta landzeliwa hi 4 wa mimfumu leyi a yi ta nghenela ka mintirho ya vanhu va Xikwembu. A tlhele a hlaya swaku mfumu wa Inglaterra ni América, ku nga Potência Anglo-Americana a wu ta va wa wugamu. Leswo swa hi tiyisa hikusa ha swi tiva swaku Mfumu wa Xikwembu wu ta helisa mimfumu hinkwayu lani misaveni, wu gama wu sungula ku fuma funtshi leswo a swi nga ta hlwela. —  Dan. 2:44.

13. A “hosi ya wu 8” ni “10 wa tihosi” leswi ku vulavuliwaka hi swona ka Nhlawutelo 17:9-12 swi fanekisela yini naswona swi hetisekisa ku yini namuntlha?

¹³ Lerha Nhlawutelo 17:9-12. Leswi nga yentxeka ka Nyimpi ya ku Sungula ya Misava, swi yentxe swaku ku hetiseka wuprofeta lin’wani li nga ka Bibele, leli vulavulaka hi masiku ya wugamu. Tihosi ta misava a ti lava swaku ku va ni ku rhula lani misaveni. Hi mhaka leyo, hi Janeiro wa 1920, ti veke Liga Das Nações lweyi hi ku famba ka nkama a nga gama a txintxiwa a va Nações Unidas hi Outubro wa 1945. Nhlengeletanu leyi ya Nações Unidas, yi nyimela “hosi ya wu 8”, kambe yona a hi mfumu wa misava, yo va ni matimba hi mhaka leswi tihosi ta misava ti yi seketelaka. Tihosi ta misava leti ti seketelaka Nações Unidas, Bibele li ti vitana “10 wa tihosi”.

14-15. a) Impsini leswi buku la Nhlawutelo 17:3-5 li swi vulaka hi Babilona wa Mukulu? b) Ku yentxeka yini hi vanhu va nga ka wukhongeli la mavunhwa?

¹⁴ Lerha Nhlawutelo 17:3-5. Yehovha a yentxe swaku Yohani a vona “Babilona wa Mukulu” ku nga wukhongeli hinkwalu la mavunhwa. Leswi Yohani a nga swi vona, swi hetisekisa ku yini? Ku sukela khale wukhongeli la mavunhwa li tirhisana ni mimfumu li tlhela li yi pfuna ka minchumu leyi yi yi yentxaka. Ku nga li khale, Yehovha a ta yentxa swaku mimfumu yoleyo yi yentxa ‘ku rhandza ka yena’. Se ku ta yentxeka yini? Mimfumu yoleyo yi ta djikela wukhongeli hinkwalu la mavunhwa yi li helisa. — Nhla. 17:1, 2, 16, 17.

¹⁵ Hi swi tivisa ku yini swaku a ka ha choti kule swaku Babilona wa Mukulu a helisiwa? Swaku hi hlamula xivutiso lexi, a hi khumbukeni swaku a munti wa Babilona wa khale, a wu vhikeliwe hi Nambu wa Ewufrata. Buku la Nhlawutelo, li fananisa vanhu hinkwavu lava nyimaka ni Babilona wa Mukulu ni “mati”. (Nhla. 17:15) Kambe li tlhela li vula swaku mati wolawo a ma ta ‘psha’, leswi vulaka swaku, vanhu va vanyingi lava nga ka wukhongeli la mavunhwa a va ta huma ka lona. (Nhla. 16:12) Namuntlha wuprofeta lolelo la hetiseka, hikusa vanhu va vanyingi va tshike wukhongeli la mavunhwa naswona va lavetela tinhlamulu ta swivutiso swa vona ka tindhawu tin’wana.

16. Ku twisisa wuprofeta la ku va kona ka Nações Unidas ni ku helisiwa ka Babilona wa Mukulu swi hi pfunisa ku yini?

¹⁶ Wuprofeta leli li hi pfunisa ku yini? Ku va kona ka Nações Unidas ni ku va vanhu va vanyingi va tshika wukhongeli la mavunhwa swi kombisa swaku hi hanya ka masiku ya wugamu. Babilona wa Mukulu a nga ta helisiwa hi leswi vanhu va vanyingi va tshikaka ku nyima na yena. Kambe hi lani se hi nga swi vona hi kona, Yehovha a ta yentxa swaku “10 wa tihosi” ku nga mimfumu hinkwayu leyi seketelaka Nações Unidas, ti yentxa ku rhandza ka yena. Mimfumu yoleyo yi ta helisa Babilona wa Mukulu swa kola na kola.d (Nhla. 18:8-10) Ku helisiwa ka Babilona wa Mukulu swi ta hlamalisa misava hinkwayu naswona swi nga ha tisa swikarhatu. Kambe vanhu va Yehovha va ta tsaka hikusa wukhongeli la mavunhwa leli ku sukela khale li kwatisaka Yehovha, a li nga ha ta va kona. Naswona misava ya nyuwani yi ta va se yi li kusuhi hintamu. — Luk. 21:28.

17-18. a) Hi nga yentxa yini swaku hi tiyisa lipfumelo la hina? b) Hi ta bula hi yini ka djondzo leyi landzelaka?

¹⁷ Daniyele a profete leswaku “wutivi la ntiyiso li ta tala ngopfu”. Phela leswo swa yentxeka namuntlha. Se ha li twisisa wuprofeta leli vulavulaka hi minkama ya hina. (Dan. 12:4, 9, 10) Ku hetiseka ka wuprofeta leli hinkwalu, swi hi yentxa hi mu tshemba Yehovha ni Rito la yena, ku nga Bibele. (Esa. 46:10; 55:11) Se, tama u tiyisa lipfumelo la wena hi ku djondza Bibele, ni ku pfuna van’wani swaku va va vanghanu va Yehovha. Yehovha a ta vhikela lava va mu tshembaka, ni ku yentxa swaku va hanya hi ku rhula hi masiku ni masiku. — Esa. 26:3.

¹⁸ Ka djondzo leyi landzelaka hi ta bula hi wuprofeta leli vulavulaka hi leswi bandla la Wukreste a li ta tshamisa xiswona ka masiku ya wugamu. Hilani hi nga ta djondza hi kona, wuprofeta leli, na lona li kombisa swaku hi hanya ka masiku ya wugamu. Hi ta tlhela hi vona swaku Yesu Hosi ya Mfumu wa Xikwembu hi yena a rhangelaka valandzeli va yena va ku tshembeka.