Nyima Na Yesu Murhangeli Wa Hina

 1. Impsini leswi Yehovha a swi lavaka?

YEHOVHA a lava swaku mahungu ya ku tsakisa ma chumayeliwa amisaveni hinkwayu. (Marku 13:10; 1 Tim. 2:3, 4) N’winyi wa ntirho lowu hi Yehovha, naswona leswi wu nga wa lisima hintamu, a lange N’wana wa yena Yesu swaku a wu rhangela. Leswi i nga Yesu a rhangelaka ntirho lowu, hi nga tiyiseka swaku wu ta yentxiwa hi ndlela leyi Yehovha a yi lavaka, na magamu ma nga se fika. —  Mat. 24:14.

 2. Hi ta vona yini ka djondzo leyi?

² Ka djondzo leyi, hi ta vona swaku Yesu a mu pfunisa ku yini “mutirhi wa ku tshembeka ni wa ku tlhariha” swaku a djondzisa vanhu va Xikwembu a tlhela a kongomisa ntirho wa ku chumayela. (Mat. 24:45) Hi ta tlhela hi vona leswi hi nga swi yentxaka swaku hi nyima na Yesu ni mutirhi wa ku tshembeka ni wa ku tlhariha.

 3. Hi wini ntirho lowu Yesu a nga nyikiwa wona?

³ Yesu hi yena a rhangelaka ntirho wa ku chumayela. Hi swi tivisa ku yini? Na a nga se tlhela a ya tilweni, Yesu a kumane ni valandzeli va yena ka nhava ya Galileya. A va byele leswi: “Ni nyikiwe matimba ya ku fuma atilweni ni lani misaveni.” Vona leswi a nga gama a va byela swaku va swi yentxa: “Fambani mi ya djondzisa vanhu va matiko hinkwawu leswaku va va vadjondzisiwa va mina”. (Mat. 28:18, 19) Impela, Yesu hi yena lweyi Yehovha a nga mu veka swaku a rhangela ntirho wa ku chumayela.

 4. Hi mhaka muni hi kholwa swaku Yesu wa ha tama a rhangela ntirho wa ku chumayela ni namuntlha?

⁴ Yesu a vule swaku ntirho wa ku chumayela ni wa ku djondzisa vanhu a wu ta yentxiwa ka “matiko hinkwawu”. A tlhele a byela valandzeli va yena swaku a a ta va na vona “masiku hinkwawu anze ku helisiwa misava.” (Mat. 28:20) Marito lawa, ma kombisa swaku ntirho wa ku chumayela a wu ta tama wu rhangeliwa hi Yesu anze namuntlha.

 5. Hi yentxa yini swaku hi hetisisa wuprofeta li nga ka Tipisalema 110:3?

⁵ Yesu a nga zanga a karhateka hi leswaku ku nga tshuka ku va ni vatirhi va vatsongo ka masiku ya wugamu. A a swi tiva swaku wuprofeta leli nge: “Vanhu va wena va ta tinyikela hi ku swi rhandza loko masonchwa ya wena ma ya nyimpini”, li ta hetiseka. (Pis. 110:3) Loko na wena u chumayela, u kombisa swaku u nyima na Yesu ni mutirhi wa ku tlhariha ni wa ku tshembeka, naswona u hetisisa wuprofeta lolelo. Hambileswi ntirho lowu wu yentxiwaka, ku ni swikarhatu leswi hi kumanaka na swona.

 6. Hi xini xikarhatu lexi vachumayeli va kumanaka na xona namuntlha?

⁶ Xikarhatu xin’wana lexi vachumayeli va kumanaka na xona i ku kanetiwa. Vanhu lava nga djikela Xikwembu, varhangeli va wukhongeli ni mimfumu va vulavula mavunhwa hi ntirho lowu hi wu yentxaka. Loko maxaka ya hina, vanhu lava hi va tivaka, lava hi tirhaka na vona va twa mavunhwa wolawo, va nga ha hi sindzisa swaku hi tshika ku tirhela Yehovha ni ku chumayela. Ka matiko man’wani, vanhu lava va hi nyenyaka hi mhaka ya ntirho wa hina va hi hlupha, va hi chavisela hambi ku hi peta madjele. Kambe leswo a swi hi hlamalisi hikusa Yesu a te: “Mi ta nyenyiwa hi matiko hinkwawu hi mhaka ya vito la mina.” (Mat. 24:9) Swikarhatu leswi hi kumanaka na swona, swi kombisa swaku Yehovha wa hi yamukela. (Mat. 5:11, 12) Sathana hi yena a yentxaka swaku vanhu va hi nyenya hi mhaka ya ntirho wa hina. Kambe Yesu a ni matimba ku mu tlula. Hi ku pfuniwa hi Yesu, mahungu ya ku tsakisa ma chumayeliwa amisaveni hinkwayu. A hi voneni swikombiso leswi tiyisaka mhaka leyi.

 7. Impsini leswi ku kholwisaka swaku leswi nga ka Nhlawutelo 14:6, 7 swa yentxeka?

⁷ Xikarhatu xin’wana lexi vachumayeli va kumanaka na xona, hi leswaku va kumana ni vanhu lava va vulavulaka tirimi ta ku hambana ni ta vona. Ka mabulu lawa Yesu a nga va na wona ni mupostolo Yohani, Yesu a mu byele swaku ka masiku ya wugamu, mahungu ya ku tsakisa a ma ta chumayeliwa ka vanhu va tirimi hinkwatu. (Lerha Nhlawutelo 14:6, 7.) Swi yentxekisa ku yini leswo namuntlha? Hi yentxa hinkwaswu swaku hi chumayela vanhu va tirimi hinkwatu. Namuntlha ka site la jw.org vanhu va nga lerha mabuku lawa ma djondzisaka hi Bibele hi tirimi ta ku tlula 1.000. Ntlawa lowu Rhangelaka wu pfumelele swaku buku leli nge: Tikhorisi Hi Wutomi La Ku Kala Li Nga Heli, leli hi li tirhisaka swaku hi djondzisa vanhu Bibele, li hundzuluxeliwa hi tirimi ta ku tlula 700. Ku yentxiwe mavhidiyo lawa ma pfunaka vanhu lava kalaka va nga twi, ni mabuku lama pfunaka vanhu va ku kala va nga voni swaku va djondza hi Bibele. Hikakunene wuprofeta la Bibele la hetiseka naswona vanhu lava vulavulaka tirimi ta ku hambana va djondza “lirimi leli baseke”, ku nga ntiyiso lowu nga ka Bibele. (Zak. 8:23; Sof. 3:9) Hinkwaswu leswi, hi swi kota hi leswi hi rhangeliwaka hi Yesu Kreste.

 8. Impsini leswi kombisaka swaku ntirho wa ku chumayela wu rhangeliwa hi Yesu Kreste namuntlha?

⁸ Namuntlha, vanhu va ku tlula 8.000.000 va nga ka matiko ya ku tlula 240 va nghena ka nhlengeletanu ya Yehovha, naswona lembe ni lembe vanhu va vanyingi va tsakamisiwa. Xa lisima hintamu, hi leswaku vanhu lava va sungule ku hanya hi minawu ya Bibele naswona va lwela ku yambala “wumunhu la nyuwani”. (Kol. 3:8-10) Vanyingi va tshike ku yentxa nsila ya swa masangu, ku rhuketela, wugevenga ni xikheto. Hikakunene, wuprofeta li nga ka Esaya 2:4 la hetiseka, hikusa a va ha “djondzi nyimpi”. Loko hi yentxa hinkwaswu hi nga swi kotaka swaku hi va ni wumunhu la linene, hi ta pfuna vanhu va vanyingi swaku va djondza hi Yehovha, funtshi hi ta kombisa swaku hi nyima na Yesu Kreste murhangeli wa hina. (Yoh. 13:35; 1 Ped. 2:12) Kambe leswo swi koteka ntsena hileswi Yesu a hi pfunaka.

 9. Hi ku ya hi Matewu 24:45-47, Yesu a vule swaku a a ta yentxa yini ka masiku ya wugamu?

⁹ Lerha Matewu 24:45-47. Yesu a vule swaku ka masiku ya wugamu, a a ta veka “mutirhi wa ku tshembeka ni wa ku tlhariha” swaku a djondzisa Rito la Xikwembu. Hi mhaka leyo, a hi kanakani swaku mutirhi lweyi a ni ntirho wa wunyingi swaku a wu yentxa namuntlha. Yesu a tirhisa ntlawa wa wutsongo wa Vakreste lava nga totiwa swaku wu djondzisa vanhu va Xikwembu Bibele. Vavanuna lava, a va tivoni na va li varhangeli funtshi a va fumi lipfumelo la van’wana. (2 Kor. 1:24) Kambe va swi tiva swaku Yesu Kreste hi yena a rhangelaka vanhu va yena. —  Esa. 55:4.

10. Ka mabuku lama nga kombisiwa ka mafoto, hi lini leli nga ku pfuna ku djondza hi Yehovha u tlhela u mu rhandza?

¹⁰ Ku sukela hi 1919, mutirhi wa ku tshembeka ni wa ku tlhariha a yentxa mabuku lama pfunaka vanhu va vanyingi swaku va djondza hi Yehovha. Hi 1921, mutirhi lweyi a humese buku leli nge: A Harpa de Deus swaku li pfuna vanhu ku djondza mintiyiso leyi nga ka Bibele. Hi ku famba ka nkama mutirhi lweyi a tlhele a humesa mabuku man’wana lawa a ma ta pfuna vanhu ku djondza Bibele. Hi lini buku leli nga ku pfuna ku tiva Yehovha u tlhela u mu rhandza? Swi nga yentxeka ku ve leli nge: “Seja Deus Verdadeiro,” A Verdade Que Conduz à Vida Eterna, U Nga Hanya Hi Masiku aParadeyisini eMisaveni, Vutivi Lebyi Yisaka eVuton’wini Lebyi Nga Heriki, Xana Bibele Yi Dyondzisa Yini Hakunene? Hinga Djondza Yini ka Bibele?, kumbe buku la nyuwani leli nge: Tikhorisi Hi Wutomi La Ku Kala Li Nga Heli. Mabuku lawa ma yentxeliwe ku pfuna vanhu swaku va djondza hi Yehovha naswona lin’wana ni lin’wana li yentxiwe hi nkama wa wunene.

11. Hi mhaka muni swi li swa lisima ku djondza Bibele ni mabuku lawa mutirhi wa ku tshembeka ni wa ku tlhariha a ma humesaka?

¹¹ A ku na mhaka swaku wa ha li ku sungula ku djondza Bibele kumbe i khale na u tirhela Yehovha, hinkwerhu hi fanele hi tama hi yengesela wutivi leli hi nga na lona hi Yena. Mupostolo Pawulo a te: “Swakudla swa ku tiya i swa vanhu va ku wupfa”. A tlhele a hlaya swaku loko hi hanya hi leswi hi swi djondzaka, hi ta swi kota ku “hambanisa swa ku lulama ni swa ku biha.” (Heb. 5:14) Leswi vanhu va vanyingi va nga ni mahanyelo ya ku biha, swi nga ha karhata ku hanya hi minawu ya Yehovha. Kambe Yesu a hi nyika hinkwaswu leswi hi swi lavaka swaku hi tiyisa lipfumelo la hina. A yentxa leswo hi ku tirhisa Rito la Xikwembu ku nga Bibele ni mabuku lawa hi nyikiwaka wona hi mutirhi wa ku tshembeka ni wa ku tlhariha.

12. Ku fana na Yesu, hi li dzunisisa ku yini vito la Xikwembu?

¹² Ku fana na Yesu hi yentxa swaku vito la Xikwembu li dzunisiwa. (Yoh. 17:6, 26) Hi xikombiso, hi 1931 hi sungule ku tirhisa vito leli nge Timboni ta Yehovha. Hi ku yentxa leswo, hi kombisa swaku vito la Xikwembu i la lisima hintamu ka hina. Funtshi hi lava swaku vanhu hinkwavu va hi tiva hi lona. (Esa. 43:10-12) Naswona ku sukela hi Outubro wa lembe lolelo, vito la Xikwembu la kumeka ka pajina la ku sungula la Murindzi. Naswona Bibele la Wuhundzuluxeli La Misava Ya Nyuwani li tlhelisele vito la Xikwembu ka tindhawu leti a li li ka tona ka Mabibele ya ku sungula, ku hambana ni wukhongeli la mavunhwa leli nga suselela vito la Xikwembu ka Mabibele hinkwawu lawa li nga ma hundzuluxela.

13. Impsini swi ku kholwisaka swaku mutirhi wa ku tshembeka ni wa ku tlhariha a kongomisiwa hi Yesu? (Yohani 6:68)

¹³ Yesu a tirhise “mutirhi wa ku tshembeka ni wa ku tlhariha” swaku a veka nhlengeletanu leyi gandzelaka Yehovha hi ndlela ya yinene lani misaveni. U titwisa ku yini hi nhlengeletanu leyi? Swi nga yentxeka u titwa ku fana na mupostolo Pedru lweyi a nga byela Yesu a ku: “Hi ta ya ka mani? Hi wena lweyi a nga ni marito lama nga ni wutomi la ku kala li nga heli.” (Yoh. 6:68) A hi ta va kwini namuntlha loko Yehovha a a nga hi kokelanga ka nhlengeletanu ya yena? Hi ku tirhisa nhlengeletanu leyi, Yesu a hi nyika leswi hi swi lavaka swaku hi tama hi tshembeka ka Yehovha, a tlhela a hi djondzisa ku wu yentxa kahle ntirho wa ku chumayela. Naswona a hi pfuna swaku hi va ni mahanyelo ya manene lama tsakisaka Yehovha. —  Efe. 4:24.

14. Ku va ka nhlengeletanu ya Yehovha swi ku pfunise ku yini hi nkama wa mavabyi ya corona?

¹⁴ Yesu wa hi kongomisa hambileswi hi nga ka minkama ya ku karhata. Hi swi vonile leswo nkama ku nga sungula mavabyi ya corona. Nkama corona li nga sungula, vanhu va vanyingi a va nga xi tivi xa ku xi yentxa. Kambe Yesu a tame a hi nyika nkongomiso wa ku tivhikela. Hi byeliwe swaku hi yambala maxkara hi tlhela hi nga tshami kusuhi ni vanhu van’wani. Madoda ma byeliwe swaku ma tshamela ku kamba vamakwerhu, swaku ma tiyiseka swaku va na swona swa ku tivhikela hi swona, swakudla ni swaku wunghanu la vona na Yehovha la ha tiyile. (Esa. 32:1, 2) Naswona hi kume nkongomiso hi tlhela hi tiyisiwa hi mahungu ya Ntlawa lowu Rhangelaka.

15. Hi wini nkongomiso lowu hi nga wu kuma swaku hi tama hi va ni mintlhanganu hi tlhela hi chumayela hi nkama wa corona, naswona hi pfunekise ku yini?

¹⁵ Hi nkama wa corona, hi yamukele nkongomiso wa leswi a hi fanele hi swi yentxa swaku hi tama hi va ni mintlhanganu hi tlhela hi chumayela. Hi ku kahlula, hi sungule ku va ni masembleya, makongresu ni mintlhanganu hi ku tirhisa telefoni, komputadori, radiyu kumbe televhizori. Hi tlhele hi sungula ku chumayela hi ku tirhisa makarta ni telefoni. Yehovha a yi katekisile minzamu ya hina. Ka tindhawu ta tinyingi vachumayeli va yengeselekile. Hi ni swiperiyensiya swa swinyingi leswi hi nga swi kuma ka nkama lowu wa corona. —  Vona kwadru leli nge: “Yehovha A Katekisa Ntirho Wa Ku Chumayela.”

16. Impsini leswi hi nga tiyisekaka hi swona?

¹⁶ Nkama corona li nga sungula, swi nga yentxeka van’wana va pimise swaku nhlengeletanu yi karhatisa swilo. Kambe hi ku famba ka nkama, hi swi vonile swaku nkongomiso lowu a hi nyikiwa wona, a wu laveka. (Mat. 11:19) Ku pimisa hi ndlela ya lirhandzu leyi Yesu a rhangelaka vanhu va yena hi yona, swi hi yentxa hi tiyiseka swaku ku nga na mhaka swaku hi ta kumana ni yini ka nkama lowu taka, Yehovha ni N’wana wa yena va ta hi pfuna. —  Lerha Vaheberu 13:5, 6.

17. U titwisa ku yini hileswi u rhangeliwaka hi Yesu?

¹⁷ I nkateko wa wukulu hintamu ku kongomisiwa hi Yesu! Phela hi lumba nhlengeletanu leyi nga ni vanhu va tindhawu hinkwatu, tirimi hinkwatu naswona yi kalaka yi nga na xikheto. Hi djondzisiwa Rito la Xikwembu ni ndlela leyi hi nga wu yentxaka hi yona ntirho wa ku chumayela. Mun’wana ni mun’wana wa hina a djondzisiwa ku va ni mahanyelo ya manene a tlhela a rhandza van’wana. Hi tsaka hintamu leswi hi rhangeliwaka hi Yesu.