Kulehisa Mbilu — Tiyisela hi Ntshembo

WUTOMI li tika hintamu swinene ‘amasikwini ya makumu’ lawa hi hanyaka ka wona. Hikolaho, kulehisa mbilu kulaveka hintamu swinene. (2 Timotiya 3:1-5) Vanhu vanyingi avaswi koti kulehisa mbilu. Ava na mhaka ni vanhu van’wana, va rhandza kuholova naswona ava tikhomi. Hi mhaka leyo, i swinene kutivutisa: ‘Xana na mina ni fana na vona, ni tsandzeka kulehisa mbilu? Kahlekahle, kulehisa mbilu swi vula yini? I yini lexingani pfunaka kuyendla kulehisa mbilu kuva xiphemu xa wumunhu la mina?’

Hikuya hi Bibele, “kulehisa mbilu” aswi vuli ntsena kutiyisela xiyimo xokarhi. Kambe swi vula kuxi tiyisela na u tshemba leswaku xita yampsa. Munhu lweyi a lehisaka mbilu a tiyisela hi ntshembo. Wa khatala hi ndlela leyi van’wana va titwaka ha yona. Hambiloko vamu kwatisa kumbe kumu khoma hi ndlela yobiha, wa tshemba leswaku wuxaka la vona lita yampsa. Bibele li kombisa leswaku lirhandzu hi lona li susumetelaka munhu kuva a lehisa mbilu. a (Vona nhlamuselo ya le hansi.) (1 Vakorinto 13:4) Naswona kulehisa mbilu i xiphemu xa ‘handzu wa moya’ lowo kwetsima. (Vagalatiya 5:22, 23) Kutani, i yini lexingatahi pfuna kulehisa mbilu?

Loko hi lava kuva vanhu lava lehisaka mbilu, hi fanele hi khongela hi kombela Yehovha leswaku ahi nyika moya wa yena wokwetsima, lowu awu nyikaka hinkwavo lavamu tshembaka. (Luka 11:13) Moya lowu wu ni matimba. Hambileswo, mahanyela ya hina ma fanele ma fambisana ni swikhongelo swa hina. (Tipisalema 86:10, 11) Leswi vulaka leswaku hi fanele hi lwela kulehisela van’wana mbilu siku ni siku ni kuyendla kulehisa mbilu kuva xiphemu xa wumunhu la hina. I yini lexingatahi pfuna kuyendla leswo, hambiloko minkama yin’wana hi pfa hi tsandzeka?

Hi fanele hi djondza ni kutekelela xikombiso lexi hetisekeke xa Yesu. Loko mupostola Pawulo a vulavula hi “mahanyela lamampsha”, lama patsaka kulehisa mbilu, a te: “Yendlani lesvaku kurhula ka Kriste kufuma timbilwini ta n’wina”. (Vakolosa 3:10, 12, 15) Leswaku hi yendla leswo, hi fanele hi tekelela xikombiso xa Yesu ni kutshemba hilaha kuheleleke leswaku Yehovha ata lulamisa swilo hi nkama lowu faneleke. Kutshemba koloko kuta yendla leswaku hinga heli mbilu, kunga khataliseki leswaku hi langutana na yini. — Yohane 14:27; 16:33.

I ntiyiso leswaku hinkwerhu hi lava leswaku misava leyimpsha yi fika hi xihantla. Kambe loko hi pimisa hi ndlela leyi Yehovha ahi lehiselaka mbilu ha yona, hitaswi kota kuhambeta hi lehisa mbilu. Bibele lahi tiyisekisa: “Hosi ayihlweli kuyendla leswi yingatshembisa svona hilaha van’wana vatwisisaka kuhlwela hakona, kambe yilehisa mbilu hikolaho ka n’wina; ayilavi lesvaku ni mun’we wa n’wina alahleka kumbe a lova, kambe yilava lesvaku hinkwavu vata kuhundzukeni.” (2 Petro 3:9) Kupimisa hi kulehisa mbilu ka Yehovha switahi pfuna kulehisela van’wana mbilu. (Varhoma 2:4) I swiyimo swihi leswi lavaka leswaku hi lehisa mbilu?

Siku ni siku hi kumana ni swiyimo swa swinyingi leswi lavaka leswaku hi lehisa mbilu. Hi xikombiso, swi lava hi lehisa mbilu leswaku hi kota kutikhoma, hinga kavanyeti van’wana hambiloko hi li ni rungula la lisima leli hi lavaka kuva byela lona. (Yakobo 1:19) Swi lava hi lehisa mbilu loko munhu wokarhi ahi byela kumbe kuyendla swilo leswihi nyenyetsaka. Matshan’wini ya kuhantlisela kumu hlamula, hi fanele hi pimisa hi ndlela leyi Yehovha na Yesu vaku tekaka ha yona kutsana ka hina. Matshan’wini ya kuveka tihlo ka swihoxo switsongo leswi hiswi yendlaka, va veka tihlo ka wumunhu lelinene leli hili kombisaka naswona vahi lehisela mbilu, na va tshemba leswaku hita yampsisa. — 1 Timotiya 1:16; 1 Petro 3:12.

Swi lava hi lehisa mbilu loko munhu wokarhi ahi byela leswaku ku ni leswi hingaswi vula kumbe kuswi yendla leswimu kwatiseke. Kusunguleni hingaha kwata hi tlhela hi tinyimelela. Kambe Bibele lihi khutaza kuhlamula hi ndlela leyi hambaneke. Li vula leswi: “Magamu ya mhaka mayampsa kutlula masungulo ya wona. Swayampsa kulehisa mbilu kuli ni kutitlakusa. Ungahantliseli kukwata, hikusa kukwata kutshama xifuveni xa swiphukuphuku.” (Eklesiasta 7:8, 9) Hambiloko leswi munhu yelweyo aswi vulaka swinga li ntiyiso, hi fanele hi lehisa mbilu, hi rhanga hi kupimisa hingasi vulavula. Yesu a yendle leswo loko vanhu vamu lumbeta hi swilo leswi a angaswiyendlanga. — Matewu 11:19.

Vapsali na vona va fanele va lehisa mbilu loko va pfuna vana leswaku va cinca ndlela leyi va vonaka swilo ha yona kumbe kupapalata mikhuva ya kubiha. Vona xikombiso xa Matias, lweyi a tirhaka Betele a Ewuropa. Loko aha li mufana, vakolega va xikole avamu hleka hi mhaka ya leswi a ali Mboni ya Yehovha. Akusunguleni, vapsali avangaswi tivi leswi aswimu humelela xikolweni. Kambe va tsumbule leswaku Matias se a asungula kukanakana leswi a aswi djondza Bibeleni. Gillis, B’ava wa Matias, a vula leswaku yena ni nsati wa yena va boheke kulehisa mbilu ka xiyimo lexi. Matias a ayendla swivutiso swa kufana na leswi: “Xikwembu i mani? Loko Bibele linga li Rito la Xikwembu ke? Hiswi tivisa kuyini leswaku hi kakunene i Xikwembu lexi lavaka leswaku hi yendla leswi ni leswiya?” Minkama yin’wana a avutisa B’ava wa yena a ku: “Hayini munhu a fanele ani yavanyisa hileswi ni titwaka hi ndlela leyi hambaneke na n’wina? Hayini munhu a fanele ani yavanyisa hileswi ninga kholwiki leswi miswi kholwaka?”

Gillis wa hlamusela: “Minkama yin’wana, Matias a ahivutisa leswi na a kwatile swinene. Haswi tiva leswaku aanga kwatelanga hina vapsali va yena, kambe a akwata hileswi a apimisa leswaku ntiyiso awu tikisa wutomi la yena.” Xana Gillis amu pfunise kuyini n’wana wa yena? “Mina ni n’wana wa mina ahi heta mahora ya manyingi hili karhi hi bula.” Makhambi manyingi, Gillis owomu yingisela ntsena ni kumu yendla swivutiso leswaku a twisisa mavonelo ni matitwela ya yena. Minkama yin’wana, loko Gillis a hlamusela nchumu xokarhi, a akhutaza n’wana leswaku a pimisa hi xona ka siku lolelo kumbe kufika siku lin’wana leli avata tlhela va bula hi lona. Minkama yin’wanyana, a akombela n’wana leswaku amu nyika masiku yokarhi leswaku a pimisa hi mhaka leyi amu byeleke yona. Mabulo lawa va veke na wona ma pfune Matias leswaku kutsongokutsongo a twisisa lisima la nkutsulo ni leswaku i Yehovha ntsena anga ni nfanelo ya kuhi fuma ni leswaku wahi rhandza. Gillis a vula leswi: “Swi teke nkama naswona minkama yin’wana aswi karhata. Kambe kutsongokutsongo, lirhandzu leli Matias a ali na lona hi Yehovha li sungule kukula mbilwini ya yena. Mina ni nsati wa mina hi tsaka swinene hi kuvona leswaku ntirho lowu hiwu yendleke leswaku hi pfuna n’wana wa hina loko aha li mufana wu khumbe mbilu ya yena naswona wuve ni mahetelelo lama tsakisaka.”

Gillis ni nsati wa yena va lehisele n’wana wa vona mbilu, na va tshemba leswaku Yehovha atava pfuna. Gillis a vula leswi: “Makhambi manyingi ahi byela Matias leswaku ndlela leyi ahimu rhandza ha yona ayihi susumetela kukhongela hintamu swinene, hi kombela leswaku Yehovha amu pfuna kutwisisa.” Kunene, hikolaho ka leswi va tiyiseleke va tlhela va lehisa mbilu, vapsali lava va kume ntsako wa ntiyiso.

Swi lava hi lehisa mbilu loko hi khatalela xirho xa ndjangu kumbe munghanu lweyi se anga ni malembe manyingi na a vabya. Vona xikombiso xa Elenab (vona nhlamuselo ya le hansi), lweyi na yena a tshamaka Ewuropa.

Ka 8 wa malembe lama hundzeke, nuna wa Elena a khomiwe hi mavabyi lamamu khumbeke wuqopo. Hi mhaka ya wona, angahaswi koti kukombisa mintlhaveko yofana ni kutsaka kumbe kukwata. Xiyimo lexi ximu tikela swinene Elena. A vula leswi: “Swi lave ni lehisa mbilu ni tlhela ni khongela hintamu swinene.” A yengetele a ku: “Ndzimana ya Bibele leyi niyi rhandzaka hintamu i Vafilipiya 4:13, leyinge: ‘Ningayendla hinkwasvu hi matimba ya lweyi anitiyisaka.’” Hi kupfuniwa hi Yehovha, Elena waswi kota kulehisa mbilu ka xiyimo lexi a langutanaka na xona. — Tipisalema 62:5, 6.

Yehovha i xikombiso lexikulu xa kulehisa mbilu. (2 Petro 3:15) Bibele li vulavula hintamu hi kulehisa mbilu ka Yehovha. (Nehemiya 9:30; Esaya 30:18) Wa khumbuka ndlela leyi Yehovha a lehiseleke Abrahama ha yona mbilu, loko amu yendla swivutiso swa swinyingi hi xiboho xa yena xa kulovisa tiko la Sodoma? Yehovha angamu kavanyetanga loko a vutisa. Hi kulehisa mbilu, a yingise swivutiso hinkwaswo leswi aswi yendleke ni kurhateka ka yena. Ndzhaku amu tiyisekise leswaku hambiloko akova ni 10 wa vanhu ntsena lava yendlaka leswi lulameke, a angatali lovisa tiko la Sodoma. (Genesa 18:22-33) Minkama hinkwayo, Yehovha wa lehisa mbilu a yingisa naswona anga tshuki a hantlisela kuhlamula.

Kulehisa mbilu i xiphemu xa lisima xa wumunhu la Wukreste lexi Vakreste hinkwavo va faneleke vaxi kombisa. Loko hi yendla minzamu ya kulehisa mbilu, hita vangamisa Yehovha, Xikwembu lexihi rhandzaka xi tlhela xihi lehisela mbilu naswona hita va xikarhi ka lava “kumaka leswi vatshembisiweke svona, hi mhaka ya kupfumela ka vona hi kulehisa mbilu.” — Vaheveru 6:10-12.