Yohane Mutsakamisi — Xikombiso Lexingahi Pfunaka Kutshama Nahi Tsakile

KUNGAVA leswaku kuni ntirho wokarhi lowu awu navela kuwu yendla a bandleni kambe swinga kotekiki kuwuyendla swoswi? Swingaha yendleka swoswi ntirho wa kona wu yendliwa hi makwerhu mun’wani kumbe na wena u tshame u tirha ka wona. Hambi leswo, swoswi kuni leswiku sivelaka, kungahava kuguga, mavabyi, swikarhatu swa timale kumbe wutihlamuleli la ndjangu. Kumbexana u boheke kutshika xiyavelo lexi u heteke malembe na uli ka xona, hileswi kuveke ni kucinca kokarhi ndzeni ka nhlengeletanu. Aswina mhaka leswaku kungava kuli xivangelo xihi, ungaha titwa u navela kuyendla leswi tlulaka leswi uswi yendlaka swoswi ka ntirho wa Xikwembu. Ndzeni ka xiyimu lexo, ungaha titwa unga tsakanga. Loko u titwisa xileswo, i mpsini leswingaku pfunaka leswaku unga tshami nawu kwatile, uni xiviti kumbe u hele ntamu? Unga tshamisa kuyini na wu tsakile?

Ka xikombiso xa Yohane Mutsakamisi kumbe Mukhuvuli hinga kuma djondzo ya lisima ya kutshama hi tsakile. Hambileswi Yohane a ani malunghelo ya kutala ka ntirho wa Yehovha, kambe a angaswi nyimelanga leswi aswi ta humelela a wuton’wini la yena. Yena angaswi tivi swaku a ata heta nkama wa kutala a djele kutlula lowu angawu heta na a chumayela. Hambileswo, a tame a tshama a tsakile wutomi la yena hinkwalu. I ncini lexingamu pfuna? Naswona hingaswi kotisa kuyini kutshama na hi tsakile hambi loko hi kumana ni swilo leswihi hetaka ntamu?

Loko malanga maya ma hela hi 29 E.C., Yohane a sungule kuyendla ntirho lowu a anyikiwe hi Yehovha wa kubyela vanhu hi kuta ka Mesiya a ku: “Hundzukani, hikuva Mfumu wa matilo wu le kusuhi.” (Mat. 3:2; Luk. 1:12-17) Vanhu votala va pfumelile. Kuvula ntiyiso, xitshungu xa xikulu xi fambe mpfuka wa kuleha leswaku xi tatwa rungula la yena naswona votala va hundzukile va tlhela va tsakamisiwa. Yohane hi xivindzi a byele varhangeli va wukhongeli lava avati vona nava lulamile leswaku loko vanga cinci avata yavanyisiwa. (Mat. 3:5-12) Ntirho wa lisima ngopfu lowu Yohane awu yendleke ka xiyavelo xa yena, kuve kutsakamisa Yesu a kuheleni ka wuxika hi 29 E.C.. Kusukela kolaho, Yohane a byele vanhu leswaku va landzela Yesu, Mesiya lweyi a tshembisiweke. — Yoh. 1:32-37.

Loko Yesu a pimisa hi ntirho wohlawuleka lowu awu yendliwa hi Yohane a te: “Xikarhi ka vanhu lavapsaliweke hi vavasati, akuhumelelanga lweyi atlulaka Yohani Mukhuvuli”. (Mat. 11:11) Hinga vula hi kutiyiseka leswaku Yohane a atsaka ngopfu hi minkateko leyi angayi kuma. Kufana na Yohane, namuntlha votala va kume minkateko yohlamalisa leyi taka hi ka Xikwembu. Vona xikombiso xa makwerhu wa xinuna lweyi a vitaniwaka Terry. Yena ni nsati wa yena va hete 50 wa malembe na vali ka ntirho wa nkama hinkwawu. A te: “Nive ni malunghelo yotala ya kutsakisa. Ni tirhe tani hi phayona, ni tirhele Betele, ni tirhe tani hi phayona lohlawuleka, mulanguteli wa muganga kumbe mudjikelezi, mulanguteli wa xifundza, naswona swoswi ni tirha tani hi phayona lohlawuleka.” Ha tsaka loko hi kuma swiyavelo antirhweni wa Yehovha. Kambe swi lava hi tihita leswaku hi tshama na hi tsakile loko swiyimu swa hina swi cinca, hi laha hingata djondza ha kona ka xikombiso xa Yohane.

Yohane Mutsakamisi kumbe Mukhuvuli a atshama na a tsakile hi leswi a akhensa malunghelo lawa a ali na wona. Ahi vonene leswinga humelela. Ndzhaku ka loko Yesu a tsakamisiwile, a numeri ya valandzeli va Yohane yi sungule kuxika, kutani ya valandzeli va Yesu yi khwela. Leswo aswiva khomanga kahle valandzeli va Yohane. Kutani vamu yelile va ku: “Munhu lweyi . . . wakhuvula na yena, kutani hinkwavu vakhirimana vaya ka yena.” (Yoh. 3:26) Yohane ava hlamule a ku: ‘Lweyi anga ni mutekiwa i muteki; kambe munghanu wa muteki, hi lweyi ayimaka amuyingisa, atsaka hi kutsaka lokukulu, loko atwa rito ra muteki. Xileswo, kutsaka ka mina loku hi loku kuhetisekeke.’ (Yoh. 3:29) Yohane a anga palisane na Yesu naswona a anga voni ntirho wa yena ingi ahiwa nchumu hi leswi Yesu a ayendla ntirho wa lisima kutlula wa yena. Handle ka leswo, Yohane a atshama na a tsakile hi leswi a awu nyika lisima ntirho wa yena tani hi “munghanu wa muteki”.

Langutelo leli Yohane a ali na lona limu pfunile leswaku a tshama a tsakile hambi leswi ntirho wa yena awunga vevuki. Hi xikombiso, Yohane a ali Munaziri kusukela loko a psaliwile naswona a atsimbisiwa kuphuza byala. (Luk. 1:15) Hi mhaka leyo, loko Yesu a vulavula hi wutomi la Yohane a te: ‘Yohani atile aangadji, anganwi’. Kambe Yesu ni vadjondziwa va yena avangali vanaziri, kutani ava hanya wutomi la kufana ni la vanhu van’wana. (Mat. 11:18, 19) Hambi leswi Yohane a anga yendli masingita, kambe a aswi tiva leswaku vadjondzisiwa va Yesu kupatsa ni van’wana lava khale avali vadjondzisiwa va yena, ava nyikiwe ntamu wa kuyendla masingita. (Mat. 10:1; Yoh. 10:41) Handle ka kukarhateka hi mhaka kuhambana loku a kuli kona xikarhi ka valandzeli va yena ni valandzeli va Yesu, Yohane a atshama na a khomekile hi ntirho wa yena.

Na hina loko hiwu nyika lisima ntirho lowu hiwu yendlelaka Yehovha, hita tshama hi tsakile. Makwerhu Terry lweyi hi buleke ha yena kusunguleni a te: “A ni xi tekela nhlokweni xiyavelo xin’wani ni xin’wani lexi ani nyikiwaka xona.” Loko a pimisa hi nkama lowu angawu heta ka ntirho wa nkama hinkwawu a li: “A ni tisoli nikatsongo, kambe aningeswi khohlwi swilo swohlamalisa leswingani humelela.”

Leswingahi tiselaka ntsaku wa wukulu i kupimisa hi leswi yendlaka xiyavelo xa hina xiva xa lisima ngopfu ka hina. Phela i lunghelo kuva ‘vatirhikulobye ni Xikwembu’. (1 Kor. 3:9) Leswaku xibya xokarhi xi tshama na xisasekile, swilava hixi hlayisa, hi kufanana na hina leswaku hi tshama na hi tsakile, hi fanele hi tshamela kupimisa hi lunghelo leli hingana lona la kutirha na Yehovha. Hina a hi fanelanga hi tiringanisa ni vanhu van’wani kumbe kuwu tekela hansi ntirho wa hina hi kupimisa swaku van’wani va yendla ntirho wa lisima kutlula wa hina. — Gal. 6:4.

Swinga yendleka Yohane a aswi tiva swaku ntirho wa yena awungata heta nkama wa kuleha, kambe leswi a anga switivi hileswaku awuta hela kuvava. (Yoh. 3:30) Hi 30 E.C. na kuhundze 6 wa tihweti na Yesu akhuvuliwile, Hosi Heroda a pfalele Yohane a djele. Hambi leswo, Yohane a tame a chumayela. (Marka 6:17-20) I mpsini leswingamu pfuna kutshama na a tsakile ka swiyimu swoleswo? I kuveka mimpimiso ya yena ka swilo leswinga swa lisima ka Yehovha.

A nkama Yohane a ali djele a atwa hi ndhuma swaku ntirho wa Yesu wuya wu kula. (Mat. 11:2; Luk. 7:18) Leswo swimu yendle a kholwa swaku Yesu a ali Mesiya lweyi a tshembisiweke, kambe swingaha yendleka a ati vutise leswaku ‘indje Yesu ataswi kota kuhetisisa swilo hinkwaswu leswi Matsalwa mangete swita hetisisiwa hi Mesiya? Leswi Yesu a ata nyikiwa Mfumu, kungava leswaku a ata sungula kufuma hi nkama wolowuyani ivi amu humesa djele?’ Leswi Yohane a alava kutwisisa swotala hi ntirho wa Yesu, a rhumele vadjondzisiwa va yena leswaku vayamu vutisa va ku: “Xana hi wena lweyi vange wata, kumbe hahalangutela mun’wana ke?” (Luk. 7:19) Loko va vuya Yohane ava yingisele kahle loko vamu hlamusela leswi Yesu a ava dahisa xiswona vanhu hi singita. Naswona Yesu a byele vavanuna volavo leswaku vamu byela leswi Yohane: ‘Swifamahlo swa vona, swilima swafamba, va nhlokonho vabasisiwa, lava vafeke tindleve vatwa, vafi vapfuka, swisiwana swirunguleliwa Evhangeli kumbe Mahungu Yotsakisa.’ — Luk. 7:20-22.

Leswi vadjondzisiwa va Yohane vanga vuya vatamu byela swona swimu tiyisile. Se a atiyiseka hi kuhelela leswaku Yesu a ata hetisisa wuprofeta leli vulavulaka hi Mesiya. Hambileswi Yesu a kalaka angamu humesanga adjele, Yohane a aswi tiva leswaku ntirho wakwe i wa lisima. Ka swiyimu hinkwaswu leswi a akumana na swona, yena a atshama na a tsakile.

Kufana na Yohane, loko hi tshamela kupimisa hi ntirho lowu hiwu yendlelaka Yehovha hitaswi kota kutiyisela nahi tsakile ni hi kulehisa mbilu. (Kol. 1:9-11) Kudjondza Bibele ni kuyanakanyisisa hi lona switahi pfuna kutwisisa swaku hinkwaswu leswi hi swiyendlelaka Yehovha i swa lisima. (1 Kor. 15:58) Makwerhu mun’wani lweyi a vitaniwaka Sandra a te: “Kudjondza ndzima yin’we ya Bibele hi siku swini pfuna kutshama ni li kusuhi na Yehovha. Swini pfuna kunga tshameli kupimisa hi mina kambe minkama hinkwayu ni pimisa hi yena.” Pimisa hi ntirho lowu vamakwerhu amisaveni hinkwayu vawu yendlelaka Yehovha, leswo switaku pfuna kuvona leswi Yehovha aswi hetisisaka naswona switaku pfuna akuva unga tshameli kupisa hi wena ntsena. Sandra a tlhele a ku: “Kuhlalela JW Broadcasting^® hweti ni hweti, swihi yendla hi titwa hili kusuhi ni nhlengeletanu naswona swihi pfuna kutshama nahi tsakile ka swiyavelo swa hina.”

Ka nkamanyana lowu Yohane angawu heta na a chumayela, a ani “moya ni matimba ya Eliya”, naswona kufana na “Eliya aali munhu kufana na hina”. (Luk. 1:17; Yak. 5:17) Loko hi tekelela xikombiso xa yena hi kukombisa kukhensa ni kutshamela kupimisa hi ntirho lowu hiwu yendlelaka Yehovha, na hina hingaswi kota kutshama na hi tsakile ka ntirho wa hina hambiloko koba lexi dumaka.