Mareferensiya ya Xibukwana xa Minhlanganu ya Mahanyelo ni Ntirho
6 KUYA KA 12 KA MAIO
XUMA XINGA KA RITO LA XIKWEMBU | 2 VAKORINTO 4-6
“Ahitshiki”
w04 15/8 tl. 25 mapar. 16-17
Ha Karhala Kambe ahi Tshiki
Kunene kuhlayisa wuxaka la hina na Yehovha i swa lisima ngopfu. Hambiloko wuxaka la hina na Yehovha Xikwembu lili likulu, hingaha karhala anyameni, kambe ahinge tshuki hi kharhala kumu gandzela. Yehovha hi yena lweyi ‘anyikaka matimba lweyi akarhaleke ni matimba ka lavapfumalaka matimba.’ (Esaya 40:28, 29) Mupostola Pawulo, lweyi a hanyeke ntiyiso wa marito lawa, a tsale a ku: “Ahitshiki, kambe, hambiloko munhu lweyi hinga yena handle ahlakala, hakunene munhu lweyi hinga yena ndzeni ayendliwa mumpsha siku ni siku.” — 2 Vakorinto 4:16.
Vona marito lamange “siku ni siku.” Leswi swi vula leswaku hi fanele hi tirhisa malunghiselelo ya Yehovha siku lin’wana ni lin’wana. Makwerhu mun’wana waxisati, lweyi anga murhumiwa, lweyi a tirheke hi kutshembeka kuringana 43 wa malembe, a langutane ni kukarhala anyameni ni kuhela mbilu. Kambe anga tshikanga. A li: “Ni tala kupfukela ni mixo leswaku ni sungula hi kukhongela ka Yehovha ni kulerha Rito la yena ningase yendla swin’wana. Kuyendla leswi siku ni siku swini pfunile kutiyisela kufika namuntlha.” Kunene, hinga nyimela kuseketeliwa hi matimba ya Yehovha loko minkama hinkwayu, ina, “siku ni siku” hi khongela ka yena naswona hi yanakanyisisa hi wumunhu la yena ni switshembiso swa yena.
it-1 matl. 724-725
Kutiyisela
Nakambe i swa lisima kuva hinga lahlekeliwi hi ntshembo lowu hina Vakreste hinga na wona wa kuhanya hilaha kunga heliki na hinga na xidjoho. Hambiloko vaxanisi vohi dlaya, leswo aswinge suvisi ntshembo wa hina. (Rhm 5:4, 5; 1Te 1:3; Nhl 2:10) Kuhlupheka ka swoswi kungati va nchumu loko ntshembo wa hina lowu hlamalisaka wu hetiseka. (Rhm 8:18-25) Loko hi pimisisa hi kuhanya hilaha kunga heliki, kuxaniseka ka swoswi, hambi ku vava ka njhani, ‘akutikanga ngopfu . . . i ka nkamanyana’. (2Ko 4:16-18) Kukhumbula leswaku miringo i ya nkama nyana ni kuhlayisa ntshembo wa hina swingahi pfuna leswaku hinga heli mbilu ni kuva hingavi lavanga tshembekiki ka Yehovha Xikwembu.
Lavetela Xuma xa Moya
w12 1/2 matl. 28-29
“Yendlani Xikwembu xi Tsaka”
Makwerhu David Splane, xirho xa Ntlawa Lowu Rhangelaka, a hlamusele nhlokomhaka leyi, leyi sekeliweke aBibeleni. (2 Vakorinto 4:7) Kasi xuma xa kona i yini? Xana i wutivi kumbe i wutlharhi? Muveki wa nkulumi a hlamule a ku: “Im him. Xuma lexi mupostola Pawulo a khulumaka hi xona i ‘ntirho wolowo’ wa ‘kuhumelelisa ntiyiso rivaleni’.” (2 Vakorinto 4:1, 2, 5) Makwerhu Splane a khumbulise vathwasi va Xikola xa Giliyadi leswaku leswi vangaswi djondza hi 5 wa tiwheti swiva lunghiselela leswaku va hetisisa xiyavelo xohlawuleka antirhweni wochumayela. Xiyavelo lexo i nchumu lexi ava fanele vaxi nyika lisima ngopfu.
Muveki wa nkulumi a hlamusele leswaku “xuma lexinga ka swibya swa vumba” i mimirhi ya hina ya nyama. A kombise kuhambana ka xibya xa vumba ni xa woru. Swibya swa woru aswi tali kutirhisiwa ngopfu. Kambe swa vumba swi yendleliwe kutirhisiwa. Loko aho veka xuma ka xibya xa woru, swinga yendleka matihlo ya hina amata nyikela yingiso ka xibya xa kona ni leswinga ndzeni ka xona. Hiloko makwerhu Splane a ku: “N’wina switudanti mingete lava kutikombekisa amahlweni ka vanhu. Tani hi va missionário mi lava kukongomisa vanhu ka Yehovha. Mi swibya swa vumba leswi tivekaka hansi.”
w09 15/11 tl. 21 par. 7
Tamani mi Kula aKurhandzaneni
Swi li yini hi hina? Hinga pfulisa kuyini timbilu ta hina amhakeni ya kukombisa lirhandzu ka vamakwerhu? Swa ntumbuluku kuva vanhu va ntanga yin’we kumbe va lixaka lin’we va kombisana lirhandzu hi kuvevuka. Naswona vanhu lava rhandzaka kuhungata hi swilo swa kufana va tala kuheta nkama va li xikan’we. Kambe loko swilo leswi hina ni vamakwerhu vokarhi hiswi rhandzaka swihi hambanisa kule ni van’wana, hi fanele hi ndlandlamuka hi kukombisa lirhandzu ka hinkwavu. Swi kombisa kutlhariha kutivutisa swivutiso leswinge: ‘Xana swa kala kuva ni huma nsimu kumbe kuhungata ni vamakwerhu la vokala ningava tovelanga? Xana loko ni li a Salão do Reino, naswi rhandza kutolovelana ni vanhu lavaha kusungulaka kuhlanganyela kumbe ni tibyela leswaku va fanele va rhanga hi kuni komba leswaku va faneliwa hi wunghanu la mina? Xana aBandleni nava xoweta lavampsha ni lava gugeke?’
13 KUYA KA 19 KA MAIO
XUMA XINGA KA RITO LA XIKWEMBU | 2 VAKORINTO 7-10
“Ntirho wa Hina wa Kupfuna Van’wana”
w98 1/11 tl. 25 par. 1
“Xikwembu Xirhandza Lweyi Anyikaka na Atsakile”
Kusungula, Pawulo a byele Vakorinto hi xikombiso lexinene xa Vamakedoniya xa kulamulela vamakwavu aYudiya. Pawulo a tsale a ku: ‘[Vamakedoniya] Varingiwile ngopfu hi maxangu, kambe xikarhi ka swona hinkwaswu, kutsaka ka vona kuyile kuyengeteleka. Kutani hambileswi avali avusiwaneni lebyikulu, vanyikelile lifuwo la vona hi kunyika loku kutlulisaka mpimo.’ Vamakedoniya avanga lavi kukhutaziwa leswaku va nyika. Kuhambana ni leswo, Pawulo a vule leswaku hi kutisungulela Vamakedoniya va kombelile leswaku va hlanganyela ka lunghelo leli la kunyika hi lirhandzu. Kunyika hi kutsaka ka Vamakedoniya kuvoneka ngopfu loko hi khumbula leswaku vona hi voxe ava li ‘avusiwaneni lebyikulu’. — 2 Vakorinto 8:2-4.
kr tl. 209 par. 1
Ntirho wa Hina wa Kupfuna Van’wana
Hi kolomuya ka lembe la 46 E.C., tiko la Yudiya ali hlakatiwa hi ndlala. Vakreste va Vayuda avanga na male ya kuxava swakudja hikuva aswi pfumaleka swi tlhela swi dura. Ava sokola hi ndlala la kakuva avata sika. Hambiswilitanu, ava li kusuhi ni kuvona nsirhelelo wa Yehovha lowu avangase tshama vawu vona ni siku ni lin’we. Xana i yini leswi aswita Yendleka?
kr matl. 209-210 mapar. 4-6
Ntirho wa Hina wa Kupfuna Van’wana
Ka papila la yena la wumbirhi leli angali tsalela Vakorinto, Pawulo a hlamusele leswaku Vakreste va ni ntirho wa swiyenge swimbirhi. Hambileswi papila leli ali kongomisiwa ka Vakreste lava totiweke, namuntlha marito ya Pawulo ma tirha ni le ka “tinyempfu tin’wana” ta Kreste. (Yoh. 10:16) Xiyenge xin’wana xa ntirho wa hina i ‘ntirho woyendla leswaku vanhu vavuyelelana’ ni Xikwembu, kunga ntirho wa hina wochumayela ni kudjondzisa vanhu Bibele. (2 Kor. 5:18-20; 1 Tim. 2:3-6) Xiyenge xin’wana i ntirho lowu hiwu yendlelaka vapfumelikulorhi. Hi kukongoma, Pawulo a avulavula hi ‘ntirho lowu wa kupfuna kumbe wa kulamulela’. (2 Kor. 8:4) Loko swi ta mhakeni ya marito lamange ‘ntirho woyendla leswaku vanhu vavuyelelana’ ni Xikwembu ni lamange ‘ntirho lowu wa kupfuna kumbe wa kulamulela,’ rito lelinge ‘ntirho’ li hundzuluxeliwe li suka ka rito la Xigriki lelinge di·a·ko·niʹa. Hayini leswi swili ni ntikelo?
Hi kutirhisa rito lin’we la Xigriki kuva a hlamusela mintirho leyi ya yimbirhi, Pawulo a veke ntirho wa kupfuna ka ntlawa wun’we ni mintirho yin’wana leyi ayi yendliwa abandleni la Wukreste. Pawulo a tshame a vula leswi: ‘ku ni tindlela ta tinxakaxaka totirhela vanhu, kambe Hosi yakona i yin’we; Ku ni mintirho yo hambanahambana, . . . Kambe mintirho leyi hinkwayo yi endliwa hi moya wun’we.’ (1 Kor. 12:4-6, 11) Kunene, Pawulo a kombise leswaku mintirho yo hambanahambana ya bandla i ntirho ‘lowuhlawulekeke kumbe wokwetsima’. (Rhom. 12:1, 6-8) Aswi hlamalisi leswi a voneke swi fanelile kunyikela nkama wa yena leswaku a ‘tirhela vahlawuliwa kumbe vakwetsimi’! — Rhom. 15:25, 26.
Pawulo a pfune Vakorinto kutwisisa leswaku hayini ntirho wa kupfuna vamakwerhu awu yendla xiyenge xa ntirho ni wugandzeli la vona ka Yehovha. Xiya mapimisela ya Pawulo: Vakreste lava pfunaka kumbe va lamulelaka vamakwavu va yendla leswo hikuva va “titsongohatela mahungu yotsakisa mayelana na Kreste”. (2 Kor. 9:13) Hi ndlela leyi, hi kususumetiwa hi kunavela kuhanya hi tidjondzo ta Kreste, Vakreste va pfuna vapfumelikulorhi. Pawulo a vule leswaku swiyendlo swa lirhandzu leswi vaswi yendlelaka vamakwerhu, i swikombiso swa ‘vunene lebyohlamalisa lebyi Xikwembu xivayendlelaka byona’. (2 Kor. 9:14; 1 Pet. 4:10) Kutani, loko a vulavula hi kutirhela vamakwerhu va hina lava pfumalaka, leswi patsaka ntirho wa kulamulela vamakwerhu, Murindzi wa 1 ka Dezembro wa 1975 hi kukongoma a te: “Ahi fanelanga hi kanakana leswaku Yehovha Xikwembu ni N’wana wa yena Yesu Kreste vawu teka wu li wa lisima ntirho wa muxaka lowu.” Vhela, ntirho wa kupfuna kumbe wa kulamulela vamakwerhu i ntirho wokwetsima lowunga wa lisima ngopfu. — Rhom. 12:1, 7; 2 Kor. 8:7; Hev. 13:16.
kr tl. 196 par. 10
Ndlela Leyi Mintirho ya Mfumu yi Seketeliwaka hi Yona hi Timale
Xosungula, hi humesa minyikelo ya kutirhandzela hikuva hi rhandza Xikwembu naswona hi lava ‘kuyendla leswi switsakisaka mahlweni ka xona.’ (1 Yoh. 3:22) Kunene Yehovha a tsakisiwa hi mugandzeli lweyi a nyikaka na swi suka mbilwini. Ahi kambisiseni marito ya mupostola Pawulo mayelana ni minyikelo ya Vakreste. (Lerha 2 Vakorinto 9:7.) Mukreste wa ntiyiso anga humesi minyikelo hileswaku ata ku yini kumbe hi kusindzisiwa. Kambe a nyikela “hilaha ativekiseleke hakona mbilwini ya yena”. Leswi vulaka leswaku a rhange hi kutshama hansi a gayela hi xilaveko xa kona ni ndlela leyi anga nyikelaka hi yona. Munyiki wa muxaka lowo wa rhandzeka ka Yehovha, hikuva “Xikwembu xirhandza lweyi anyikaka na atsakile.” Wuhundzuluxeli lin’wana li yandlala mhaka leyi hi ndlela leyi: “Xikwembu xi rhandza vanhu lava rhandzaka kunyika.”
Lavetela Xuma xa Moya
w16.01 tl. 12 par. 2
Mi Susumetiwa hi Nyiko ya Xikwembu “Leyi Kupfumalekaka Marito ya Kuyihlamusela”
Pawulo aaswi tiva leswaku switshembiso hinkwaswu swa Xikwembu swa kuhlamalisa swita hetiseka hi kakunene hi mhaka ya gandzelo la kuhetiseka la Yesu. (Lerha 2 Vakorinto 1:20.) Leswi swi vula leswaku ‘nyiko leyi kupfumalekaka marito ya kuyihlamusela’ yi patsa hinkwaswu swa swinene ni lirhandzu la kutshembeka leli Yehovha ahi kombisaka lona hi kutirhisa Yesu. Impela, nyiko leyi yi hlamalisa ngopfu la kakuva ahingeswi koti kuyi hlamusela hi kuhelela. Xana nyiko leyi yohlawuleka yi fanele yihi yendla hi titwisa kuyini? Naswona yingahi susumetela kuyendla yini loko hi li karhi hi tilunghiselela kuva kona aXitsundzuxweni hi Quarta-feira, 23 ka Março wa 2016?
g99 8/7 matl. 20-21
Xana Swi hoxile kutinyungubyisa?
Ka Matsalwa ya Wukreste ya Xigriki, rito lelinge kau·khaʹo·mai li hundzuluxeliwe va ku “kutinyungubyisa, kutsaka ngopfu, kutibyela”. Li tirhisiwa kukombisa nsusumeto wa wunene kumbe wobiha. Hi xikombiso, Pawulo a vula leswaku hinga ‘tsaka ngopfu, hi kutshemba leswaku hitavani kuvangama ka Xikwembu.’ A tlhela a kuca a ku: “Lweyi atibumaka, aatibume ka Yehovha.” (Varhoma 5:2; 2 Vakorinto 10:17) Leswi swi vula kutinyungubyisa hileswi Yehovha anga Xikwembu xa hina, kunga nsusumeto lowungahi yendlaka hi tsaka ngopfu hi vito ni ndhuma ya yena leyinene.
20 KUYA KA 26 KA MAIO
XUMA XINGA KA RITO LA XIKWEMBU | 2 VAKORINTO 11-13
“Pawulo ni ‘Muntwa aNyameni’ ya Yena”
w08 15/6 matl. 3-4
Kuva ni Matimba Hambiloko U Tsanile
Nandza mun’wana wotshembeka a kombele Yehovha leswaku a susa “muntwa anyameni” ya yena, lowu awu li xikarhato xokala xinga heli. Mupostola Pawulo a kombele Xikwembu kanharhu leswaku ximu susela xikarhato lexi. Xikarhato xa kona ahixi tivi kambe mhaka hileswaku axita va xi yendle Pawulo anga tikhorisi antirhweni wa Yehovha, kufana ni loko a tlhaviwe hi muntwa wa kutshamela kumu karhata. Pawulo a fanise muntwa lowu ni kutshamela kubiwa. Yehovha amu hlamule a ku: “Timpsalu ta mina ka wena tiringene; hikuva matimba ya mina mahetiseka laha kunga ni kutsana kona.” Yehovha angawu susanga muntwa wolowo anyameni. Pawulo a afanele a lwisana na wona, kambe a te: “Loko nitsanile, hi kona ninga ni matimba.” (2 Kor. 12:7-10) Xana a alava kuvula yini hi marito lawa?
w06 15/12 tl. 24 mapar. 17-18
Yehovha A Nyika ‘Moya Lowokwetsima ka Lavakombelaka ka Yena”
Loko Xikwembu xi hlamula swikhongelo swa Pawulo ximu byele leswi: “Timpsalu ta mina ka wena tiringene; hikuva matimba ya mina mahetiseka laha kunga ni kutsana kona.” Pawulo a te: ‘Hikolaho nitatsaka ngopfu [hi] kutidzunisa kumbe kutinyungubyisa hi ta kutsana ka mina, leswaku matimba ya Kriste matayaka ka mina.’ (2 Vakorinto 12:9; Tipisalema 147:5) Hi ndlela leyi, Pawulo aswi vonile hi lawa ya yena leswaku hi kutirhisa Kreste, matimba lama sirhelelaka ya Xikwembu ama tshame henhla ka yena kufana ni tende. Namuntlha, Yehovha a hlamula swikhongelo swa hina hi ndlela leyi fanaka. A veka nsirhelelo wa yena henhla ka malandza ya yena kufana ni loko a gwimba tende leswaku malandza ya yena ma kuma kutumbela.
I ntiyiso leswaku a tende ali nyimisi mpfula leswaku yinga ni kumbe kunyimisa xidzedze leswaku xinga hungi, kambe li nyikela nsirhelelo wokarhi ka mpfula ni xidzedze. Hi kufanana, a wutumbelo leli kumiwaka hi “matimba ya Kriste” ali yendli leswaku miringo kumbe swikarhato swinga hi weli. Kambe lahi sirhelela hi tlhelo la moya ka swiyimo leswinga ni khombo swa misava leyi, swin’we ni minhlaselo ya mufumi wa yona Sathana. (Nhlavutelo 7:9, 15, 16) Kutani, hambiloko u langutane ni ndzingo wokala wunga ‘suki ka wena,’ unga tiyiseka leswaku Yehovha wa kuvona kutikarhata ka wena ni leswaku waxi hlamula “xirilo xa wena”. (Esaya 30:19; 2 Vakorinto 1:3, 4) Pawulo a tsale leswi: ‘Xikwembu xatshembeka, xingakala xingapfumeli leswaku mihlangana ni ndzingo lowu wumihlulaka; loko wutshuka wumitela, xona xitaminyika matimba ya kutiyisela, mikondza mihuma ka wona.’ — 1 Vakorinto 10:13; Vafilipiya 4:6, 7.
w18.01 tl. 9 mapar. 8-9
“Anyika Matimba Lweyi Akarhaleke”
Lerha Esaya 40:30. Hambiloko hili ni wuswikoti la kugama kwihi, kuni leswi hingata kala hingaswi koti kuswi yendla hi matimba ya hina. Yoleyo i djondzo leyi hinkwerhu hi faneleke hiyi khumbuka. Hambileswi mupostola Pawulo a ali ni wuswikoti lotala kambe kuni leswi a angaswi koti kuswi yendla. Loko ata va a vule hinkwatu ta le mbilwini ka Xikwembu, xona ximu byele leswi: “Matimba ya mina mahetiseka laha kunga ni kutsana kona.” Pawulo aswi twisisile leswo. Kutani a gimete mhaka hi kuvula a ku: “Loko nitsanile, hi kona ninga ni matimba.” (2 Kor. 12:7-10) Xana a alava kuvula yini hi marito wolawo?
Pawulo a twisise leswaku kuni swilo leswi yena yexe a angataswi kota kuswi yendla. Kambe Moya lowokwetsima awutamu nyika ntamu lowu a awu lava. Kutlula leswo, moya wokwetsima awuta pfuna Pawulo leswaku a yendla mintirho leyi a angata tshuka ayi kotile kuyi yendla hi matimba ya yena n’winyi. Swi tanu ni le ka hina namuntlha. Loko matimba ya hina ma ta hi ka Yehovha, kunene hita hlula!
Lavetela Xuma xa Moya
w18.12 tl. 8 mapar. 10-12
Swivutiso swa Valerhi
“Tilweni ra vunharhu” leli phatiweke ka 2 Vakorinto 12:2, kumbexana i Mfumu wa Mesiya lowunga mavokweni ya Yesu Kreste ni lava 144.000. Mfumu lowu wu tlhela wu vitaniwa “matilo lamampsha.” — 2 Pet. 3:13.
Wu tlhela wu vitaniwa “tilweni ra vunharhu” hikuva i Mfumu wa xiyimo xa le henhla ngopfu, akuna wa kufana na wona.
“Paradiseni” laha Pawulo “atlakuliweke ayisiwa” kona axivonweni yinga vula (1) Paradeyisi ya xiviri leyingatava kona laha misaveni, (2) paradeyisi ya moya, kunga xiyimo xa kurhula lexingatava kona laha misaveni ankameni lowu taka, lexi tlulaka lexinga kona swoswi ni (3) “paradiseni ya Xikwembu” atilweni leyingatava kona hi nkama wun’we ni misava leyimpsha.
it-2 tl. 177
Kun’quntana
“Kun’quntana Kokwetsima”. Axikarhi ka Vakreste vosungula akuli ni “kun’quntana kokwetsima” (Rhm 16:16; 1Ko 16:20; 2Ko 13:12; 1Te 5:26) kumbe “kun’quntana hi rirhandzu ra vukwavu” (1Pe 5:14), loku kumbexana vanhu va rhambu leli fanaka ava xewetana hi kona. Swingaha yendleka maxewetela lawa axikarhi ka Vakreste vosungula ama yelana ni mukhuva wa xikhale wa Vaheveru wa kuva vanhu va xewetana hi kun’quntana. Hambileswi Matsalwa mangahi nyikiki wuxokoxoko, kambe ‘kun’qutana loku kokwetsima’ kumbe ‘kun’quntana loku hi rirhandzu ra vukwavu’ a kukombisa lirhandzu ni kutwanana leswi aswi li tshamela maxelo abandleni la Wukreste. — Yh 13:34, 35.
27 KA MAIO KUYA KA 2 KA JUNHO
XUMA XINGA KA RITO LA XIKWEMBU | VAGALATIYA 1-3
“Nimukongomile”
w17.04 tl. 27 par. 16
Xana U ni Vonela Leli Fanaka ni la Yehovha Mayelana ni Wululami?
Lerha Vagalatiya 2:11-14. Petro a phasiwe hi ntlhamu wa kuchava vanhu. (Swi. 29:25) Petro a aswi tiva kahle leswaku ka Yehovha aswinga bihanga kutihlanganisa ni Vakreste vokala vanga yimbanga. Kambe a chave vamakwavu va bandla la Yerusalema lava ava li Vayuda lava ava yimbile. Mupostola Pawulo lweyi na yena a veke kona ka nhlanganu wa Ntlawa Lowu Rhangelaka aYerusalema hi 49 E.C., a kongome Petro ivi a paluxa wukanganyisi la yena. (Mint. 15:12; Gal. 2:13) Xana Vakreste va Matiko lava khumbiweke hi xihoxo xa Petro avata yangulisa kuyini? Xana avata khunguvanyeka? Xana Petro a ata lahlekeliwa hi malunghelo ya lisima hi mhaka ya xihoxo lexi?
w13 15/3 tl. 5 par. 12
‘Akuna lexingapharihetaka’ Lava Rhandzaka Yehovha
Petro a kombise kuchava vanhu, minkama yin’wana kuchava loku kumu yendle a yendla swihoxo; kambe a tshame na a tshembekile ka Yesu na Yehovha. Hi xikombiso, a landzule Yesu, Hosi ya yena, aphambeni ka vanhu, kunga li kan’we kambe kanharhu. (Luka 22:54-62) Ndzhaku nyana ka leswo, Petro a tsandzekile kuyendla swilo hi ndlela ya Wukreste. A khome vapfumelikuloni va Matiko lava avanga yimbanga onge hiloko avanga li vanene ngopfu kufana ni Vakreste va Vayuda lava yimbeke. Hambiswilitanu, mupostola Pawulo a avona kahle minchumu: abandleni akunga fanelanga kuva ni mintlawa ntlawa hi mhaka ya xihlawuhlawu. Mapimisela ya Petro ama hoxile. Na xihoxo xa Petro xingase khunguvanyisa vamakwavu, Pawulo amu kongomile amu tshinya. (Gal. 2:11-14) Xana Petro a khunguvanyekile hi mhaka ya ndzayo leyi ivi a tshika kutsutsuma ka mpalisanu wa wutomi? Im him! A yanakanyisise ngopfu hi ndzayo ya Pawulo, ayi tirhisa ivi a ya mahlweni ni mpalisanu.
Lavetela Xuma xa Moya
w14 15/9 tl. 16 mapar. 20-21
Tirhela Xikwembu hi Kutshembeka Hambiloko U Hlangavetana ni “Maxangu Lamanyingi”
Kuvuliwa yini hi minhlaselo ya kutumbela? Hi xikombiso, hinga lwisana njhani ni kutitwa hi hele matimba? Ndlela yin’wana ya matimba yolwa ni matwitwela lawo i kuyanakanyisisa hi nkutsulu. Leswo hi leswi mupostola Pawulo aswi yendleke. Minkama yin’wana a atitwa anga li wa nchumu. Kambe a aswi tiva leswaku Kreste anga felanga vanhu lava hetisekeke, a fele vadjohi. Naswona Pawulo a ali mun’wana wa vadjohi volavo. Kunene, a tsale a ku: “Nihanya hi kupfumela, kunga kupfumela ka N’wana wa Xikwembu lweyi anirhandzeke, ava atinyiketa hikolaho ka mina.” (Gal. 2:20) Kunene, Pawulo awu yamukelile nkutsulu. A apfumela leswaku nkutsulu wa tirha ka yena n’winyi.
Hilaha kufanaka, kutibyela leswaku nkutsulu i nyiko ya wena hi ntshima leyi unga nyikiwa hi Yehovha swinga kupfuna ngopfu. Leswo aswi vuli swona leswaku kutitwa u hele matimba kuta suketana kunyamalala. Phela van’wana va hina swingaha boha hi lwisana ni nhlaselo lowu wa kutumbela anze hi nghena amisaveni leyimpsha. Kambe tsundzuka: Hakelo ya kona hitayi kuma ntsena loko hi khoma swi tiya. Hi le kusuhi ngopfu ni siku leli vangamaka leli Mfumu wa Xikwembu wungata tisa kurhula wu tlhela wu yendla leswaku vanhu hinkwavu lava tshembekeke va hetiseka. Tiyimisele kunghena ka Mfumu wolowo — hambiloko u hlangavetana ni maxangu lamanyingi.
it-1 tl. 880
Vagalatiya, Papila Leli Yaka ka
Marito ya Pawulo lama kombisaka mintlhaveko lamange ‘Yo! Vagalatiya, swiphukuphuku ndzin’wina!’ ama kombisi swona leswaku a avulavula hi lixaka lin’we ntsena, kunga vanhu lava tumbulukeke ka lixaka la Vafrança lava ava tshama an’walungwini wa Galatiya. (Ga 3:1) Kuhambana ni leswo, Pawulo a akawuka Vakreste vokarhi amabandleni lava ava pfumela kuhlohloteliwa hi van’wana lava ava hisekela ndhavuku wa Xiyuda, kunga Vayuda lava ava ringeta kusimeka la vona wululami hi kulandza Nawu wa Moxe amatshan’wini ya ‘wululami hi kupfumela’ hi kulandza ntwananu lowumpsha. (Ga 2:15–3:14; 4:9, 10) Loko swi ta mhakeni ya lixaka, mabandla ya Galatiya (Ga 1:2) ama vumbiwa hi Vayuda ni lavanga liki Vayuda. Ka lava avanga li Vayuda akuni lava yamukeleke wukhongeli la Xiyuda ni vamatiko lava avanga yimbanga ni van’wana lava handle kokanakana ava li va lixaka la Vacelta, kunga lixaka la vanhu vokarhi va Europa. (Min 13:14, 43; 16:1; Ga 5:2) Hinkwavu lava ava vitaniwa Vakreste va Vagalatiya hikuva tiko leli ava tshama ka lona ali vitaniwa Galatiya. Mhaka hileswaku Pawulo a atsalela vanhu lava yena a ava tiva kahle, lava ava tshama adzongeni ka xifundzankulu lexi xa Roma. A anga tsaleli vanhu lava angava tiviki, lava ava tshama an’walungwini ka Galatiya, lava swi tikombaka leswaku anga zanga ava yendzela ni siku lin’we.