Kuyowoya Vifukwa Vyakupulikikwa

PARA mwayowoya mazgu, ŵategherezgi ŵinu ŵakujifumba kuti: “Kasi ncifukwa wuli ivi nvyaunenesko? Pali usimikizgi wuli uwo ukurongora kuti ivyo muyowoyi wakuyowoya tikwenera kuvirondezga nadi?” Nga ni musambizgi, muli na ncito ya kuzgora mafumbo agha panji kovwira ŵategherezgi ŵinu kuti ŵasange mazgoro ghake. Usange mukuwona kuti ivyo mukuyowoya nvyakusuzga kuvigomezga, woneseskani kuti ŵategherezgi ŵinu mwaŵapa vifukwa vyankongono vyakuti ŵagomezgere. Ici cizamupangiska kuti nkani yinu yiŵe yakukopa.

Paulos wakakopanga ŵategherezgi ŵake. Mwakuyowoya fundo zakuwonekerathu kuti ni zaunenesko, na kuŵeya ŵategherezgi ŵake, iye wakasintanga maghanoghano ghawo. Iye wali kutipa ciyerezgero ciweme comene. (Mil. 18:4; 19:8) Mbunenesko kuti ŵantu ŵanyake awo ŵali na luso lwa kuyowoya makora, ŵakuyowoya mwakukopa mwakuti ŵapuruske ŵantu. (Mat. 27:20; Mil. 14:19; Kol. 2:4) Ŵangamba na kuyowoya vintu vyakusacizga waka, vyakufumira kumalo ghambura kumanyikwa, kuyowoya fundo zakurongora kuti ŵakumanya makora yayi, kuyowoya vintu ivyo vikususkana na maghanoghano ghawo, panji vyakukopa waka maghanoghano gha ŵantu kweni vyambura kumanyikwa usange nvyaunenesko panji yayi. Tikwenera kuŵa maso na kasambizgiro ka mtundu uwu.

Vyakuzikika Mwankongono pa Mazgu gha Ciuta. Ivyo tikusambizga vileke kufuma mu maghanoghano ghithu. Tiyezgeyezge kuphalirako ŵanji ivyo tasambira mu Baibolo. Mabuku ghakufuma kwa muzga wa magomezgeko na wa vinjeru ghakutovwira comene pa cigaŵa ici. Mabuku agha ghakutikhuŵirizga kuti tisandenge Malemba mwakupwererera. Pamanyuma pake ndipo tikasambizge ŵanji Baibolo, na cilato cakuti tikajirongore kuti tikuneneska cara, kweni na mtima wakujicepeska, kuti ŵantu ŵawone ŵekha ivyo Baibolo likuyowoya. Tikukorerana na Yesu Kristu, uyo mu lurombo lake la kuya ku Ŵawiske wakayowoya kuti: “Mazgu ghinu mbunenesko.” (Yoh. 17:17) Palije mazaza ghanyake kuruska ghakufuma kwa Yehova Ciuta, Mlengi wa kucanya na caru capasi. Kuti ivyo tikuyowoya vipulikikwe makora, vikwenera kujinta pa Mazgu ghake.

Nyengo zinyake, mungadumbiskana na ŵantu awo Baibolo ŵandalizgoŵere panji awo ŵakugomezga yayi kuti ilo ni Mazgu gha Ciuta. Mukwenera kumanya nyengo yakuyowoyera mavesi gha mu Baibolo na umo muyowoyerenge. Kweni mukwenera kuyezgayezga kuŵaŵazgira mwaluŵiro fundo zakufuma kwa muntu munyake wa mazaza panji ku lufura lunyake lwakugomezgeka.

Kasi mukwenera kumalizga mwa kuyowoya waka lemba ilo likukolerana na fundo izo, leneilo mukughanaghana kuti wangalisuska yayi? Comene viŵi yayi. Mungakhumbikwira kuŵazga ndime mwakuti murongore kuti lemba ilo likukhozgera nadi ivyo mukuyowoya. Usange mukuyowoya waka sambiro ilo tingasambira pa lemba ilo, kweni nkani yose yikupambana na mutu uwo mukudumbiskana, mungakhumbikwira kupereka ukaboni unandi. Mungakhumbikwira kugwiriskira ncito malemba ghanyake agho ghakukhozgera nkani iyo mwakuti mukhorweske ŵategherezgi ŵinu kuti ivyo mukuyowoya ni vyakufuma nadi mu Malemba.

Lekani kusazgirako ivyo malemba ghakuyowoya. Ŵazgani lemba mwakupwererera. Lemba lingaŵa kuti likuyowoya za nkani iyo mukudumbiskana. Kweni, kuti fundo zinu ziŵe zakukopa, ŵategherezgi ŵinu ŵakwenera kuwona kuti ni zaunenesko.

Kupereka Ukaboni Wakusazgikira. Padera pa Baibolo, nyengo yinyake cingaŵa ciweme kupereka ukaboni wakufuma ku malufura ghanyake ghakugomezgeka mwakuti movwire ŵantu kumanya mahara gha mu Baibolo.

Mwaciyerezgero, mungayowoya za mtambo mwakuti mupereke usimikizgi wakuti Mlengi waliko. Mungayowoya za marango gha kawiro, nga ni dango lakuti para cintu caponyeka mucanya cikuwa pasi, na kupereka cifukwa ico marango gha nga ni agha ghakurongorera kuti kuli munyake Uyo wali kughaŵika. Fundo zinu ziwonekenge kuti ni zaunenesko usange nzakukolerana na ivyo vikuyowoyeka mu Mazgu gha Ciuta. (Job 38:31-33; Sal. 19:1; 104:24; Rom. 1:20) Ukaboni wa nga ni uwu ngwakovwira cifukwa ukurongora kuti ivyo Baibolo likuyowoya ni vyakukolerana na vintu ivyo tikuviwona.

Kasi mukuyezgayezga kovwira muntu munyake kuti wamanye kuti Baibolo ni Mazgu gha Ciuta nadi? Mungayowoya ivyo nkhwanta zinyake za masambiro zili kuyowoya vyakukhwaskana na Baibolo, kweni kasi ici cingaŵapangiska kuti ŵagomezge? Kuyowoya mazgu gha nkhwanta izi kungawovwira ŵantu awo ŵakuzicindika pera. Kasi mungagwiriskira ncito nkani za sayansi mwakuti mupereke ukaboni wakuti Baibolo likuneneska? Usange ivyo mukuyowoya vijintenge comene pa maghanoghano gha ŵasayansi, mbwenu viŵenge na malufura ghambura kukhora. Kweni usange mwamba na Mazgu gha Ciuta, na kuyowoya vintu vya sayansi ivyo vikukhozgera kuti Baibolo ndaunenesko, mbwenu fundo zinu ziŵenge na malufura ghakukhora.

Perekani ukaboni wakukwana wakuti ukhozgere cilicose ico mukuyowoya. Unandi wa maukaboni agho ghangakhumbikwa ukuthemba pa kumanya ŵategherezgi ŵinu. Mwaciyerezgero, para mukuyowoya za mazuŵa gha ku umaliro nga ni umo ghali kulembekera pa 2 Timote 3:1-5, mungayowoya cakucitika cakumanyikwa makora mwakuti mukhozgere kuti ŵantu ‘mbambura kutemwa ŵanyawo.’ Ciyerezgero ici cingaŵa cakukwana kuti mupereke ukaboni wakuti cimanyikwiro ici ca mazuŵa gha ku umaliro cikukwaniskika panyengo yasono.

Kuyowoya vintu vyakukozgana, na kuyaniska vintu viŵiri ivyo vili na vigaŵa vyakuyana kungaŵa kwakovwira. Kuyaniska vintu kuti ndiko kungapangiska kuti muntu wagomezge cara; kweni kuyaniska vintu ivi na ivyo Baibolo likuyowoya. Kweni vintu vyakukozgana nga ni ivi vingawovwira muntu kuti wawone kuti ivyo mukuyowoya nvyaunenesko. Mwaciyerezgero, mungayaniska vintu, para mukurongosora kuti Ufumu wa Ciuta ni boma. Mungayowoya kuti, nga ni maboma gha ŵantu, Ufumu wa Ciuta wuli na ŵawusi, awo ŵali pasi pa Ufumu uwu, marango, ntowa ya kawusiro, na ntowa ya kasambizgiro.

Mungayowoya za umoyo wa ŵantu ŵanyake mwakuti murongore uweme wa kugwiriskira ncito urongozgi wa mu Baibolo. Mungayowoyaso umo Baibolo lasintira umoyo winu. Mwaciyerezgero, para mukuphalira muntu uweme wa kuŵazga na kusambira Baibolo, mungarongosora umo kucita nteura kwasintira umoyo winu. Kuti wakhuŵirizge ŵabali ŵake, mpostole Petros wakayowoya za masintiro agho wakaghawona mu umoyo wa ŵanji. (2 Pet. 1:16-18) Paulos nayo wakayowoyaso za umoyo wake. (2 Kor. 1:8-10; 12:7-9) Mbunenesko kuti mukwenera cara kuyowoya comene za umoyo winu mwakuti ŵategherezgi ŵaleke kuwona kuti mukujiŵikamo.

Pakuti ŵantu ŵakupambana kakuliro na kaghanaghaniro kawo, ukaboni uwo ungakhorweska muntu munyake, ungakhorweska yayi munyakeso. Mwanteura, ghanaghanirani maghanoghano gha ŵategherezgi ŵinu para mukusanka fundo izo mwamuyowoya na umo mwamuyowoyera. Lemba la Zintharika 16:23 likuti: “Mtima wa wavinjeru ukusambizga mlomo [kuti] uyowoye makora, ndipo ukusazgako nkongono ku milomo yake.”