Gwirani Ntchito na Yehova Zuŵa Lililose

 1. Kasi ni nthowa wuli izo tingagwilira ntchito na Yehova?

MLENGI withu wakakhazganga kuti ŵanthu ŵakufikapo ŵakoleranenge nayo pakufiska khumbo lake. Nangauli pasono ŵanthu mbambura kufikapo, kweni ŵanthu ŵakugomezgeka ŵangagwira ntchito na Yehova zuŵa lililose. Mwachiyelezgero, tikuŵa “ŵantchito ŵanyake na Chiuta” para tikupharazga makani ghawemi gha Ufumu na kuzgora ŵanthu kuŵa ŵasambiri. (1 Kor. 3:5-9) Ghanaghanirani waka mwaŵi uwo tili nawo wakuti tapimika ŵakwenelera kugwira ntchito yakuzirwa chomene na Mlengi wa chilengiwa chose. Kweni padera pa mulimo wa kupharazga na kuzgora ŵanthu kuŵa ŵasambiri, paliso nthowa zinyake izo tikugwilira ntchito na Yehova. Mu nkhani iyi tiwonenge nthowa izi: Kovwira mbumba yithu na Ŵakhristu ŵanyithu, kupokelera ŵalendo, kujipeleka pa milimo mu gulu la Yehova, ndiposo kusazgirako uteŵeti withu.—Kol. 3:23.

 2. Chifukwa wuli chingaŵa chambura mahara kuyaniska ivyo imwe mungachitira Yehova na ivyo ŵanji ŵangamuchitira?

² Apo tikusambira nkhani iyi, kuyaniska yayi ivyo imwe mungachitira Yehova na ivyo ŵanji ŵangamuchitira. Kumbukani kuti taŵanthu tikupambana maluso, vyaka panji kuti msinkhu, umo vinthu viliri pa umoyo ndiposo umo tikujipulikira muthupi. Mpositole Paulosi wakati: “Waliyose wapime mulimo wake, apo ndipo waŵenge na chifukwa chakukondwera pa iyo yekha, kwambura kujiyaniska na munthu munyake.”—Gal. 6:4.

 3. Chifukwa wuli tingayowoya kuti waliyose uyo wakupwelelera mbumba yake ndikuti wakukolerana na Chiuta?

³ Yehova wakukhazga kuti ŵateŵeti ŵake ŵapwelelerenge mbumba zawo. Mwachiyelezgero, mukwenera kugwira ntchito kuti musange ndalama zakupwelelera ŵakutemweka ŵinu. Ŵamama ŵanandi ŵakukhala pa nyumba kuti ŵapwelelere ŵana ŵawo ŵachokoŵachoko. Ndipo ŵana ŵanyake ŵalara ŵakupwelelera ŵapapi ŵawo awo mbakunyotwa (ŵakusuzgikira muthupi). Milimo iyi njakuzirwa. Mazgu gha Chiuta ghakuti: “Usange munthu wakutondeka kupwelelera ŵabali ŵake, chomenechomene awo mbamunyumba yake, wakana chipulikano ndipo ni muheni chomene kuluska munthu wambura chipulikano.” (1 Tim. 5:8) Para muli na milimo iyi, panji mungaŵa na nyengo yinandi yayi yakuti muchitire milimo mu gulu la Yehova nga umo mukukhumbira. Kweni kudandawura yayi. Yehova wakukondwa para mukupwelelera mbumba yinu.—1 Kor. 10:31.

 4. Kasi ŵapapi ŵangachita wuli kuti ŵaŵikenge vinthu vya Ufumu pakwamba, ndipo pakuŵa viwemi wuli para ŵakuchita nthena?

⁴ Ŵapapi awo Mbakhristu ŵakugwira ntchito na Yehova para ŵakovwira ŵana ŵawo kuti ŵaŵe na vilato vyauzimu. Ŵanandi awo ŵachita nthena, ŵana ŵawo ŵanyamata na ŵasungwana ŵali kwamba uteŵeti wanyengozose. Ndipo ŵanyake ŵakuteŵetera kutali na kwawo. Ŵanyake mbamishonale; ŵanyake ŵakuchita upayiniya ku malo uko ŵapharazgi mbachoko; ndipo ŵanyake ŵakuteŵetera pa Beteli. Pakuti ŵakuteŵetera kutali na mbumba zawo, ŵapapi ŵangachezga nawo viŵi yayi nga umo ŵakhumbiranga. Nangauli vili nthena, ŵapapi awo mbakujipata ŵakuchiska ŵana ŵawo kuti ŵalutilire kuteŵetera. Chifukwa wuli? Ŵakuŵa ŵakukondwa chomene ndiposo ŵakukhorwa kumanya kuti ŵana ŵawo ŵakuŵika vinthu vya Ufumu pakwamba. (3 Yoh. 4) Panji ŵanandi mwa ŵapapi aŵa ŵakujipulika nga ni Hana, uyo wakayowoya kuti ‘wakapeleka’ mwana wake Samuyeli kwa Yehova. Ŵapapi aŵa ŵakuwona kuti ichi ntchakuzirwa chomene. Ŵakuwona kuti palije chinthu chinyake chakuzirwa chomene kuluska ichi.—1 Sam. 1:28.

 5. Kasi mungachita wuli kuti movwire ŵanji mu mpingo? (Wonani chithuzi chakwamba.)

⁵ Para muli na milimo yinandi yayi ya mbumba, kasi mungawovwira Ŵakhristu ŵanyinu awo ŵakupwelelera ŵanji, ndiposo awo mbakunyotwa, ŵachekuru, panji awo ŵakusoŵerwa vinthu vinyake? Manyani awo ŵakukhumbikwira wovwiri mu mpingo winu. Panji mungachezgangako na mupapi muchekuru wa mudumbu uyo wakumupwelelera, apo mudumbu uyu wakuchita milimo yinyake. Panji mungawovwira ŵanji pakuluta nawo ku maungano gha mpingo, kukaŵagulira vinthu, panji kuluta nawo ku chipatala kukawona mulwari. Para muchitenge nthena, mulongorenge kuti mukugwira ntchito na Yehova. Ntheura mukovwira kuti lurombo lwawo luzgoreke.—Ŵerengani 1 Ŵakorinte 10:24.

 6. Kasi kupokelera ŵalendo chikung’anamurachi?

⁶ Ŵantchito ŵanyake na Chiuta ŵakumanyikwa kuti mbakupokelera ŵalendo. Mu Malemba Ghachikhristu Ghachigiriki, mazgu ghakuti “kupokelera ŵalendo” ghakung’anamura “kuchitira lusungu ŵalendo.” (Heb. 13:2; mazgu ghamusi) Mu Mazgu gha Chiuta muli nkhani zinyake izo zikutisambizga umo tingalongolera kuti tili ŵakupokelera ŵalendo. (Gen. 18:1-5) Tikwenera kovwira ŵanji nyengo zose, kwali “mbamoza na ise mu chipulikano” panji yayi.—Gal. 6:10.

 7. Chifukwa wuli mukwenera kupokelera ŵateŵeti ŵanyengozose?

⁷ Kasi mungagwira ntchito na Chiuta pakupokelera ŵateŵeti ŵanyengozose awo ŵiza pa mpingo winu? (Ŵerengani 3 Yohane 5, 8.) Kanandi pa nyengo nga ni izi tikuŵa na mwaŵi wa ‘kukhwimiskana.’ (Rom. 1:11, 12) Wonani ivyo vikachitikira Olaf. Wakukumbuka kuti vyaka vinandi ivyo vyajumpha, mu mpingo wakwawo mukaŵavya waliyose uyo wakajipeleka kupokelera mulaŵiliri wadera, uyo wakaŵa wambura kutora. Olaf uyo wakaŵa muwukirano wakapempha ŵapapi ŵake awo ŵakaŵa Ŵakaboni yayi usange ŵangazomerezga kuti mulaŵiliri wadera wafikire ku nyumba kwawo. Ŵakazomera kweni ŵakati Olaf wagonenge pa mpando. Olaf wakawona kuti suzgo palije. Iyo wakuti: “Yikaŵa sabata yakukondweska chomene. Ine na mulaŵiliri wadera zuŵa lililose tikawukanga mulenjilenji ndipo tikadumbiskananga nkhani zinandi zakukondweska panyengo ya chakurya cha mulenji. Fundo izo wakanikhozga nazo zikanovwira kuti nambe uteŵeti wanyengozose.” Kwa vyaka 40 ivyo vyajumpha, Olaf wateŵetera nga ni mishonale ku malo ghakupambanapambana.

 8. Chifukwa wuli tikwenera kuŵa ŵalusungu nanga ni para ŵanji ŵakuwoneka kuti ŵakuwonga yayi? Yowoyani chiyelezgero.

⁸ Mungalongora chitemwa ku ŵanthu awo mukuŵamanya yayi mu nthowa zakupambanapambana, nanga ni para pakwamba ŵakawonga yayi. Wonani chiyelezgero ichi. Apo mupharazgi munyake ku Spain wakasambizganga Baibolo Yesica, wa ku Ecuador, wakawona kuti wakaliranga waka kwambura kuleka. Mupharazgi wakamufumba chifukwa icho wakaliliranga. Yesica wakati pambere wandize ku charu ichi kuzakagwira ntchito wakaŵa mukavu chomene mwakuti zuŵa linyake wakaŵavyirathu chakurya. Mwana wake wakamupanga maji pera. Yesica wakamususutizganga mwana wake kuti wagone uku wakulomba wovwiri. Nyengo yichoko waka yikati yajumphapo, Ŵakaboni ŵaŵiri ŵakiza pa nyumba yake, kweni Yesica wakaŵapokelera yayi ndipo wakakelura magazini agho ŵadumbu ŵakamupa. Wakafumba kuti: “Kasi ichi ndicho ntchakurya icho nipenge mwana wane?” Ŵadumbu ŵakayezga kumupembuzga, kweni ŵakaphurako kanthu yayi. Pamanyuma, ŵakaleka basiketi ya chakurya pa mulyango wa nyumba yake. Yesica wakakhwaskika chomene na lusungu ulo ŵadumbu ŵakamulongora ndipo wakajiyimba mulandu apo wakakumbuka kuti wakaŵikako mahara yayi apo Chiuta wakazgoranga lurombo lwake. Kweni sono wakaŵikapo mtima kuteŵetera Yehova. Ivi vikachitika chifukwa cha mtima wakupa uwo ŵadumbu aŵa ŵakalongora—Muph. 11:1, 6.

9, 10. (a) Kasi mpha vyakuchitika wuli mu nyengo yakale apo ŵanthu ŵa Chiuta ŵakakhumbikwiranga kujipeleka? (b) Kasi ni milimo wuli yinyake iyo ŵanalume ŵakujipeleka ŵakuchita mu mpingo mazuŵa ghano?

⁹ Pa vyakuchitika vinandi mu nyengo ya Ŵaisrayeli, ŵanthu ŵakakhumbikwiranga kujipeleka. (Eks. 36:2; 1 Mid. 29:5; Neh. 11:2) Mazuŵa ghano napo tili na mipata yinandi yakupelekera nyengo yithu, katundu withu, ndiposo maluso ghithu kuti tovwire ŵabali na ŵadumbu. Muŵenge ŵakukondwa chomene na kutumbikika para mujipelekenge.

¹⁰ Mazgu gha Chiuta ghakuchiska ŵanalume mu mpingo kuti ŵaŵe ŵateŵeti ŵakovwira na ŵalara. Para ŵachita nthena ndikuti ŵakugwira ntchito na Yehova. (1 Tim. 3:1, 8, 9; 1 Pet. 5:2, 3) Awo ŵakuchita nthena ndikuti ŵakukhumba kovwira ŵanji mwakuthupi ndiposo mwauzimu. (Mil. 6:1-4) Kasi ŵalara ŵali kumupemphanipo usange mungajipeleka kuchita mulimo wa kupokelera ŵalendo pa maungano panji kupwelelera mabuku, vigaŵa vya mpingo, kupwelelera Nyumba ya Ufumu, panji milimo yinyake? Awo ŵakuchita milimo iyi ŵamuphaliraninge kuti ntchakukondweska chomene kovwira ŵanji.

11. Kasi mudumbu munyake wasanga chandulo wuli chifukwa cha kupanga mabwezi pa nyengo iyo wakachitanga mulimo wa kuzenga Nyumba za Ufumu?

¹¹ Awo ŵakujipeleka kuchita milimo mu gulu la Yehova kanandi ŵakusanga ŵabwezi ŵaphya. Wonani ivyo vikachitikira Margie, mudumbu uyo wachita mulimo wa kuzenga Nyumba za Ufumu vyaka 18. Kwa vyaka vyose ivi, wasambizga ŵadumbu ŵanandi ŵachiwukirano. Wawona kuti mulimo uwu ukupeleka mwaŵi wa kukhozgana na ŵanji mwauzimu. (Rom. 1:12) Panyengo zose izo wakakumana na masuzgo, Margie wakakhozgekanga na ŵabwezi awo wakasanga pa nyengo iyo wakachitanga mulimo wa kuzenga. Kasi namwe muli kujipelekapo pa mulimo wa kuzenga Nyumba za Ufumu? Kwali muli ŵaluso panji yayi, kasi mungajipeleka?

12. Kasi mungawovwirapo wuli para kwachitika masoka ghachilengiwa?

¹² Para kwachitika masoka ghachilengiwa, ŵanthu ŵa Chiuta ŵakuŵa na mipata ya kugwira ntchito na Chiuta pakovwira ŵabali ŵawo. Mwachiyelezgero, ŵakupeleka ndalama kuti zovwire awo ŵakhwaskika na masoka. (Yoh. 13:34, 35; Mil. 11:27-30) Nthowa yinyake njakuti tingawovwirapo pa mulimo wa kutozga panji kunozga nyumba izo zanangika. Gabriela, mudumbu wa ku Poland uyo nyumba yake yikanangikirathu na maji ghakututuka, wakakondwa chomene apo ŵabali ŵa mpingo wapafupi ŵakiza kuzakamovwira. Iyo wakuti: “Nkhukhumba yayi kuyowoya za vinthu ivyo nili kutaya, ivi ni vinthu vyakuthupi waka. Kweni nkhukhumba kumuphalirani chandulo icho nasanga. Chakuchitika ichi chikanisimikizgira kuti kuŵa mu mpingo Wachikhristu ni mwaŵi wapadera chomene kweniso ndimo wamunthu ukusanga chimwemwe chanadi.” Ŵanandi awo ŵali kovwirikapo pa nyengo ya soka la chilengiwa nawo ŵakujipulika nthena. Ndipo awo ŵakugwira ntchito na Yehova pakovwira awo masoka ghaŵawira ŵakuŵa ŵakukhorwa kweniso ŵakukondwa chomene.—Ŵerengani Milimo 20:35; 2 Ŵakorinte 9:6, 7.

13. Kasi kujipeleka kungakhozga wuli ubwezi withu na Yehova? Yowoyani chiyelezgero.

¹³ Stephanie na ŵapharazgi ŵanyake ŵakaŵa ŵachimwemwe kugwira ntchito na Chiuta pakovwira Ŵakaboni awo ŵakachimbira kwawo na kwiza ku United States. Ŵakaŵawovwira ŵanthu aŵa kusanga nyumba zakukhalamo na kuzinozga. Stephanie wakuti: “Tikakondwa chomene kuwona umo ŵakaŵira na chimwemwe ndiposo umo ŵakawongeranga kuwona kuti ŵabali pa charu chose ŵakutemwana zanadi.” Wakusazgirapo kuti: “Mbumba izi zikughanaghana kuti tili kuzovwira, kweni kuyowoya unenesko, ise ndise tawovwirika chomene. Tawona kuti ŵabali ŵakutemwana chomene, ŵakukolerana, ŵali na chipulikano, ndiposo ŵakuthemba chomene Yehova, ndipo ivi vyatikhozga kuti titemwenge chomene Yehova. Kweniso vyatovwira kuti tiwongenge chomene chilichose icho tikupokera mu gulu la Yehova.”

14, 15. (a) Kasi ntchimi Yesaya yikalongora mzimu wuli? (b) Kasi ŵapharazgi ŵa Ufumu ŵangamuyezga wuli Yesaya?

¹⁴ Kasi mungatemwa kugwira ntchito na Yehova mwakukwana? Kasi mungajipeleka kusamira ku malo uko kukukhumbikwira ŵantchito ŵanandi mu gulu lake? Mbunenesko kuti ŵateŵeti ŵa Chiuta ŵakukhumbikwira kuti ŵasamire kutali na nyumba zawo yayi kuti ŵalongore kuti mbakupa. Kweni ŵabali na ŵadumbu ŵanyake mikhaliro yikuŵazomerezga kusamira kutali na kwawo. Mtima wawo ukuyana waka na wa ntchimi Yesaya. Pakuzgora fumbo la Yehova lakuti “Kasi nitume njani, ni njani uyo watilutirenge ise?” ntchimi iyi yikati: “Ndine pano. Nitumani!” (Yes. 6:8) Kasi muli na khumbo ndipo mikhaliro yikumuzomerezgani kuti muchiteko milimo mu gulu la Yehova? Kasi pali milimo wuli?

¹⁵ Pakuyowoya za mulimo wa kupharazga na kuzgora ŵanthu kuŵa ŵasambiri, Yesu wakati: “Nadi, vuna njinandi chomene, kweni ŵantchito mbachoko. Ntheura lombani Mwenecho wa vuna kuti watume ŵantchito ku vuna yake.” (Mat. 9:37, 38) Kasi mungateŵetera ku chigaŵa icho ŵapharazgi mbachoko, panji nga ni mupayiniya? Panji kasi mungawovwira munyake kuti wachiteko uteŵeti uwu? Ŵabali na ŵadumbu ŵanandi ŵawona kuti nthowa yiwemi yakulongolera kuti tikutemwa Chiuta na ŵazengezgani nkhuchita upayiniya ku malo panji chigaŵa icho ŵapharazgi mbachoko. Kasi pali nthowa zinyake izo mungasazgirako uteŵeti winu? Muŵenge ŵakukondwa chomene para muchitenge nthena.

16, 17. Kasi pali mipata wuli yakuti musazgireko uteŵeti winu mu gulu la Yehova?

¹⁶ Kasi mungajipeleka kuteŵetera pa Beteli panji kovwira pa mulimo wa kuzenga, kwali nkhwa kanyengo waka panji kwendera? Pakukhumbikwa ŵanthu ŵanandi awo ŵangateŵetera Yehova kulikose uko ŵangatumika na kuchita mulimo uliwose uwo ŵangapika. Ŵangachita mulimo uwo ukukhumbikwa chomene kuti uchitike, nangauli ŵangaŵa kuti ŵakumanya ntchito yinyake. Kweni Yehova wakuwonga mzimu wa kujipata uwo ŵakulongora wose awo ŵakujipeleka kuteŵetera uko kukhumbikwira wovwiri.—Sal. 110:3.

¹⁷ Kasi mukukhumba masambiro ghanyake kuti ghamovwirani kuti mulutilire kuchita makora uteŵeti winu wakupatulika? Usange ni nthena, munganjira Sukulu ya Ŵapharazgi ŵa Ufumu. Sukulu iyi yikusambizga ŵanalume na ŵanakazi ŵakukhwima mwauzimu, awo ŵali mu uteŵeti wanyengozose mwakuti ŵasazgireko uteŵeti wawo. Awo ŵakufumbira sukulu iyi ŵakwenera kuŵa ŵakunozgeka kuzomera mulimo uliwose uwo ŵangapika paumaliro wa sukulu. Kasi mungatemwa kunjira sukulu iyi mwakuti musazgireko uteŵeti winu?—1 Kor. 9:23.

18. Kasi musangenge vyandulo wuli para mugwirenge ntchito na Yehova zuŵa lililose?

¹⁸ Pakuti tili ŵanthu ŵa Yehova, tikwenera kuŵa ŵakupa. Para tikuchita nthena ndikuti tikulongora vipambi vya mzimu nga ntchitemwa, lusungu, na uwemi. Ndipo tiŵenge ŵachimwemwe, ŵamtende, ndiposo ŵakukondwa. (Gal. 5:22, 23) Kwali vinthu vili wuli pa umoyo winu, mungaŵa ŵachimwemwe para mungayezga Yehova pa nkhani ya kupa ndiposo para muŵenge ŵantchito ŵanyake na iyo.—Zinth. 3:9, 10.