Kasi Visopa Vyautesi Vikubinkhiska Wuli Zina la Chiuta?

Baibolo likuti Chiuta ntchitemwa, kweni chifukwa wuli visopa ivyo vikuti vikusopa Chiuta vikuchita vinthu viheni vinandi? Zgoro ndakuti visopa vinandi ni vyautesi, ndipo vikubinkhiska zina la Chiuta. Kasi vikubinkhiska wuli zina la Chiuta? Kasi Yehova wakujipulika wuli? Kasi wachitenge vichi?

1. Kasi ivyo visopa vyautesi vikusambizga vikubinkhiska wuli zina la Chiuta?

Visopa vyautesi ‘vikugomezga utesi m’malo mwa unenesko wa Chiuta.’ (Ŵaroma 1:25) Mwachiyelezgero, visopa vinandi vikusambizga yayi ŵalondezgi ŵawo zina la Chiuta. Ndipouli, Baibolo likuti tikwenera kuzunura zina la Chiuta. (Ŵaroma 10:13, 14) Ŵalongozgi ŵanyake ŵa visopa ŵakuti para viheni vyachitika ni khumbo la Chiuta. Kweni uwu mbutesi. Chiuta ndiyo wakuchitiska vinthu viheni yayi. (Ŵazgani Yakobe 1:13.) Ivyo ŵakusambizga, vyapangiska kuti ŵanthu ŵanandi ŵaleke kutemwa Chiuta.

2. Kasi ivyo visopa vyautesi vikuchita, vikubinkhiska wuli zina la Chiuta?

Visopa ivi vikuchita vinthu na ŵanthu nga umo Yehova wakuchitira yayi. Baibolo likuti “zakwananga [za visopa vyautesi] zalundikana m’paka kuchanya.” (Chivumbuzi 18:5) Kwa vyaka vinandi, visopa vikunjilirapo pa ndyali, kukhozgera nkhondo, kuzomerezga kweniso kupangiska kuti ŵanthu ŵanandi ŵafwe. Ŵalongozgi ŵanandi ŵa visopa vyautesi ŵakukhumba waka kusambazga, ndipo ŵakuphalira ŵalondezgi ŵawo kuti ŵaŵapenge ndalama. Ivi vikulongora kuti ŵakumumanya yayi Chiuta, ndipo ŵakubinkhiska waka zina lake.—Ŵazgani 1 Yohane 4:8.

3. Kasi Chiuta wakuchiwona wuli chisopa chautesi?

Usange imwe mukukwenyelera na ivyo visopa vyautesi vikuchita, kasi mukughanaghana kuti Chiuta wakujipulika wuli? Chiuta wakutemwa ŵanthu, nakuti wakukwenyelera chomene para ŵalongozgi ŵa visopa ŵakuchitira nkhaza ŵalondezgi ŵawo. Chiuta wakuti wazamuparanya visopa vyautesi ‘ndipo vizamuŵakoso yayi.’ (Chivumbuzi 18:21) Sonosono apa, Chiuta waparanyenge visopa vyose vyautesi.—Chivumbuzi 18:8.

MANYANI VINANDI

4. Kasi visopa vyose vikumukondweska Chiuta?

Ŵanthu ŵanandi ŵakughanaghana kuti visopa vili nga ni nthowa zakupambanapambana izo zikulongozgera kwa Chiuta. Kasi uwu mbunenesko? Ŵazgani Mateyu 7:13, 14, kufuma apo dumbiskanani fumbo ili:

• Kasi Baibolo likuti wuli pa nkhani ya nthowa iyo yikulongozgera ku umoyo?

Wonelerani VIDIYO, kufuma apo dumbiskanani fumbo ili.

VIDIYO: Kasi Visopa Vyose Vikumukondweska Chiuta?—Yakudumura (3:22)

• Kasi Baibolo likuti visopa vyose vikukondweska Chiuta?

5. Chisopa chautesi chikuyezga chitemwa cha Chiuta yayi

Visopa vyabinkhiska zina la Chiuta mu nthowa zinandi. Nthowa yakwamba njakuti vikunjilirapo pa nkhondo. Kuti musange ukaboni pa nkhani iyi, wonelerani VIDIYO. Kufuma apo dumbiskanani mafumbo agha.

VIDIYO: Ivyo Matchalitchi Ghakachita pa Nkhondo Yachiŵiri ya pa Charu Chose (2:22)

• Kasi matchalitchi ghanandi ghakachita vichi pa Nkhondo Yachiŵiri ya pa Charu Chose?

• Kasi mukujipulika wuli na ivyo ghakachita?

Ŵazgani Yohane 13:34, 35 na 17:16. Kufuma apo dumbiskanani mafumbo agha:

• Kasi mukughanaghana kuti Yehova wakujipulika wuli para visopa vikunjilirapo pa nkhondo?

• Visopa vyautesi ndivyo vikupangiska vinthu vinandi viheni. Kasi ni vinthu wuli ivyo vikulongora kuti visopa vyautesi vikutondeka kuyezga Chiuta pa nkhani ya chitemwa?

6. Chiuta wakukhumba kuti ŵanthu ŵafumemo mu chisopa chautesi

Ŵazgani Chivumbuzi 18:4,a kufuma apo dumbiskanani fumbo ili:

• Kasi mukujipulika wuli kumanya kuti Chiuta wakukhumba kuti ŵanthu ŵafumemo mu chisopa chautesi?

7. Lutilirani kusambira vya Chiuta waunenesko

Kasi vinthu viheni ivyo chisopa chautesi chikuchita, vikumupangiskani kuti mumuwonenge wuli Chiuta? Tiyelezgere kuti mwana wakana kulondezga ulongozgi wavinjeru uwo adada ŵake ŵamupa. Wakufumapo pa nyumba na kwamba kuchita vinthu viheni. Kweni adada ŵake ŵakukondwa yayi na vinthu viheni ivyo mwana wawo wakuchita. Chifukwa wuli chingaŵa chambura mahara kuyowoya kuti adada ŵake ndiwo ŵapangiska kuti mwana wachitenge vinthu viheni?

• Kasi chingaŵa chamahara kuyowoya kuti Yehova ndiyo wakupangiska vinthu viheni, na kuleka kusambira vya iyo chifukwa cha vinthu viheni ivyo visopa vikuchita?

MWAKUDUMURA

Visopa vyautesi vyabinkhiska zina la Chiuta chifukwa vikusambizga vyautesi kweniso vikuchita nkharo zawakawaka. Chiuta waviparanyenge sonosono apa.

Kuweleramo

• Kasi mukujipulika wuli na ivyo visopa vyautesi vikusambizga na kuchita?

• Kasi Yehova wakujipulika wuli na ivyo visopa vyautesi vikuchita?

• Kasi Yehova wachitenge navyo wuli visopa vyautesi?

SANGANI FUNDO ZAKUSAZGIKIRA

Wonani vinthu viŵiri ivyo matchalitchi ghanandi ghakuchita ivyo vikukwiyiska Chiuta.

“Kasi Visopa Vyose Vikuyana Waka? Kasi Vyose Vikulongozgera kwa Chiuta?” (Nkhani ya pa Intaneti)

Chifukwa wuli Yehova wakukhumba kuti ise pamoza na ŵanyithu tisopenge iyo pera?

“Kasi Ntchakuzirwa Kuŵa mu Gulu la Chisopa?” (Nkhani ya pa Intaneti)

Wasembe munyake wakakayikiranga ivyo tchalitchi lake likasambizganga. Kweni wakaleka yayi kusambira unenesko wakukhwaskana na Chiuta.

“Chifukwa Icho Wasembe Wakalekera Tchalitchi Lake” (Wukani!, Febuluwale 2015)

Matchalitchi ghamuyowoyera mautesi Chiuta kwa vyaka vinandi, ndipo ghakupangiska kuti ŵanthu ŵamuwonenge kuti ngwankhaza. Wonani mautesi ghanyake ghatatu.

“Mautesi Agho Ghakutondeska Ŵanthu Kutemwa Chiuta?” (Gongwe la Mulinda, Novembala 1, 2013)