Yɛasi Yɛn Bo Sɛ Yɛbɛboa Mmofra No

NNƐRA, mmofra a wonnii mfe anum 40,000 wuwui wɔ aman a afei na wɔrenya nkɔso mu. Ɛnnɛ, afoforo 40,000 bewuwu. Ɔkyena 40,000 afoforo bewuwu. Wobetumi asiw owu yi mu pii ano.

Wɔafrɛ tebea yi “ɔhaw a ɛho adwuma gye ntɛmpɛ a wɔnte ho asɛm” anaa “amanehunu a wɔnte ho hwee” mfe pii, a nea ɛkyerɛ ne sɛ wiase mufo pii ntee ho asɛm. Peter Teeley, U.S kasamafo wɔ Amanaman Nkabom Wiase Akannifo Mmofra ho Nhyiam a wɔyɛe wɔ U.N adwumayɛbea ti a ɛwɔ New York wɔ 1990 mu no, kae sɛ, “Sɛ mpatu a wɔn ho asisi ntrama 40,000 wuwu da biara a, anka ɛbɛyɛ aniberesɛm. Nanso mmofra 40,000 rewuwu, nso wonhu koraa.”

Ebinom te nka sɛ ebia nhyiam no bɛsakra eyinom nyinaa. Mpanyimfo atitiriw, a Amampanyin 71 ka ho, fi aman 159 mu kɔɔ bi. Sɛ wɔka wɔn nyinaa bom a, na wogyina wiase nnipa nyinaa ɔha mu nkyem 99 ananmu. Mikhail Gorbachev bɔɔ sɛnea na wɔte nka no mua sɛ: “Adesamma ntumi nnyina nokwasɛm a ɛne sɛ mmofra ɔpepem pii wuwu afe biara no ano bio.”

Nna a edi nhyiam no anim no, wiase no mufo kyerɛe sɛ wɔtaa wɔn akyi. Ɔman mu ne amankuw nhyiam horow a wɔyɛe nyinaa twee adwene sii ɔhaw a mmofra rehyia no so. Nnipa bɛboro ɔpepem biako a wɔwɔ aman 80 mu sosɔɔ kyɛnere de yɛɛ anidaso a wɔwɔ sɛ, wɔ ɔhaw ne asiane ahorow a ɛda yɛn anim nyinaa akyi no, wobetumi ama wiase no mu ayɛ yiye no ho sɛnkyerɛnne.

UNICEF (Amanaman Nkabom Mmofra Yiyedi Foto) kaa nhyiam no da a etwa to no ho asɛm sɛ “ebia ɛno yɛ da titiriw a ɛsen biara ma mmofra a wɔwɔ wiase nyinaa a aba pɛn.” Dɛn nti na na wɔwɔ ho anigye a ɛte saa? Efisɛ ná wiase akannifo ayɛ “Dwumadi Nhyehyɛe” pɔtee bi a wɔnam so bɛma mmofra a wɔwɔ wiase nyinaa amanehunu ne wɔn wu so atew.

Ɛyɛ ampa sɛ, nhyiam ahorow ho abakɔsɛm kyerɛ sɛ bɔhyɛ ahorow a wonni so ayɛ mu ma. Nanso esiane sɛ na Ɔko Nwininwini no aba awiei nti, nnipa pii tee nokwaredi ne biakoyɛ honhom foforo bi nka. UNICEF panyin James Grant de anigye kae sɛ: “Aman ne Aban mpanyimfo yɛɛ ade a edi kan ankasa wɔ nnipa nyinaa​—‘mmofra a wɔanyinyin’ ne mmofra nso​—yiyedi a wɔbɛma aba ho sɛ atirimpɔw titiriw ma nkɔso wɔ wiase nhyehyeɛ foforo bi mu.”

Nokwarem no, nhyiam no akyi afe a edi hɔ mu no, na aman pii ayɛ ɔman nhyehyɛe a wɔde bedi nhyiam no ase tirimbɔ ahorow ho dwuma dedaw. Eyi maa Ɔpanyin Grant kae sɛ: “Afei de yehu anidaso ankasa a ɛwɔ hɔ sɛ ebedu afe 2,000 mu no na mmofra nyinaa anya akwahosan pa.

Nanso dɛn koraa ne ɔhaw a mmofra hyia, wiase abusua no ahintasɛm a ɛyɛ aniwu, a amanaman ntam atesɛm amanneɛbɔ ama ada adi no? Afei wɔ Ɔko Nwininwini no akyi amanaman ntam biakoyɛ bere yi mu no, so ntease pa bi wɔ hɔ a yebegyina so agye adi sɛ Amanaman Nkabom no bedi anim de wiase nhyehyɛe foforo bi a ɛyɛ nwonwa aba? So yebetumi anya anidaso ankasa sɛ daakye a eye bi bɛba ama yɛn mmofra? Nsɛm abien a edidi so no bɛka nsɛmmisa yi ho asɛm.