Nhoma Foforo Ma Ɔpepem Pii Ani Gye

“WƆN a Wɔpɛ Ahofadi” Ɔmantam Nhyiam horow a wofii ase wɔ June a etwaam no mu ade biako ne “Onipa a Ɔsen Biara a Watra Ase Pɛn” ɔkasa no. Emu ade titiriw ne nhoma a ekura saa asɛmti no ara a woyii no adi no. Nnipa ɔpepem asia ne akyi a wɔwɔ wiase nyinaa akɔ nhyiam horow yi dedaw, na wɔatie ɔkasa a wɔasakra mu kakra wɔ nsɛmma nhoma yi mu nsɛm abien a edi eyi anim no mu no.

Wɔatintim Onipa a Ɔsen Biara a Watra a Watra Ase Pɛn nhoma no ɔpepem 12 wɔ kasa horow bɛyɛ 60 mu. Ɛwɔ Europa Apuei Fam kasa horow a ɛne Albanian, Croatian, Hungarian, Macedonian, Polish, Russian, Serbian, ne Slovenian mu. Ne titiriw no, nnipa bɛboro 74,000 a wɔkɔɔ nhyiam no ason wɔ Rusia no ani gyei sɛ wonyaa bi wɔ Rusia kasa mu.

Nhoma no Fibea

Na nhoma no mu nsɛm adi kan aba atoatoa so wɔ Ɔwɛn-Aban 149 a ɛtoatoaa so bae fi April 1, 1985, de no so no mu. Akenkanfo pii kae sɛ wɔn werɛ howee bere a nsɛm no baa awiei wɔ June 1, 1991 de no mu no. Melissa, abofra bi a wadi mfe 12 a ɔwɔ Italy ani tɛɛtɛɛ nsu bere a ɔkenkan nea etwa to no wɔ Ɔwɛn-Aban no mu no. Ɔkae sɛ: “Bere a ade rebɛkye ma yɛakɔ yɛn nhyiam no, mebɔɔ Yehowa mpae ka kyerɛɛ no sɛ ɔmma wonyi Yesu asetra ho nhoma adi. Bere a woyii nhoma no adi no, mebɔɔ me nsam araa ma na mentumi mmɔ bio.”

Woyiyii Ɔwɛn-Aban no mu nsɛm a ɛba toatoaa so no bi fii mu, na wɔayɛ no nhoma fɛfɛ foforo a ekura nkratafa 448 ne atiri 133. Wɔbɔɔ mmɔden sɛ wɔde ɔkasa biara a Yesu mae ne asɛm biara a esii wɔ n’asase so asetra mu a wɔakyerɛw ato hɔ, a mfato ne anwonwade ahorow a ɔyɛe nyinaa ka ho, bɛba nhoma no mu. Wɔahyehyɛ biribiara nnidiso nnidiso sɛnea bere a esisii no te, sɛnea wobetumi. Wɔakyerɛw Bible kyerɛw nsɛm a ti no gyina so no wɔ ti no awiei.

Ebia obi redwen sɛ ‘Wiɛ, makenkan nhoma no dedaw efisɛ makenkan nea ɛbaa Ɔwɛn-Aban no mu toatoaa so’ no. Nanso Ɔwɛn-Aban no akenkanfo no nyaa Yesu asetra ho nsɛm no asinasin wɔ nsɛm a epuee adapɛn abien biara wɔ mfe asia ne akyi no mu. Ɛwom sɛ na wɔakyerɛkyerɛ nsɛm mu wɔ nsɛm a ɛtoatoaa so bae no mu de, nanso susuw anigye a wubenya bere a wokenkan kyerɛwtohɔ mũ no nyinaa bere tiaa bi, na wuhu onipa a ɔsen biara a watra ase pɛn no ho nsɛm nyinaa no ho!

Ɛhyɛ Gyidi Den

Ɔbea bi a ofi Washington, D.C. bɔ amanneɛ sɛ: “Mede adapɛn abien na ewiee nhoma no kenkan. Bere a mekenkan no, na nusu fi m’aniwam ba. Na migyae akenkan no bɔ mpae na misu. Ɛma metee nka sɛ me ne Yesu na ɛwɔ hɔ, na me ne no rehu amane. Bere a mekenkan nhoma no wiei akyi dapɛn biako no, na m’ani tɛɛtɛɛ nusu ara, bere a misusuw nea makenkan no ho no. Mete nka sɛ mabɛn Yehowa kɛse mpo, ne Ba a ɔde no mae no nti.”

Ɔbea bi a ofi Pittsburgh, Pennsylvania, U.S.A., kyerɛwee sɛ: “Miwiee Yesu ho nhoma no kenkan nnɛ. Na emu yɛ dɛ. Na m’ani tɛɛtɛɛ nusu bere a merekenkan atiri kakraa bi a etwa to no. Nhoma mũ no nyinaa a wobɛkenkan no prɛko no ye. Mentumi nka sɛnea metee nka wɔ ho no ankasa ​—nea mɛka ara ne sɛ m’ani gye ho yiye!”

Nhoma no mu mfonini fɛfɛ no boa ma ɛka obi adwenem, sɛnea ɔkenkanfo bi a ɔwɔ ho anisɔ kae no: “Ɛma mete nka te sɛ nea mete sɛ wɔresu abofra bi a wawu (ti 47) anaasɛ yenim nea Yesu redwen bere a ɔbea a mogya tu no no soo no mu, na ne ho tɔɔ no no (ti 46). Sɛnea wɔayɛ wɔn anim no yɛ paara ma ɛma wudi yaw. . . . Sɛ anka akenkan no bɛyɛ den no, nhoma yi ma ɛyɛ te sɛ anigyede kɛse ma me anwummere. Ɛnyɛ sɛ su ne nkate ho a wosusuwii ansa na wɔrekyerɛw nhoma no ka nea Yesu yɛe no ho asɛm nko, na mmom ɛma yehu nea odwen ho ne sɛnea ɔtee nka no ho biribi.”

Dwuma a Wɔde Bedi wɔ Akwan Horow So

Nnipa pii afi ase de nhoma no redi dwuma wɔ wɔn abusua Bible adesua mu. Awofo bi a wofi Silverton, Oregon, U.S.A., kyerɛw sɛ: “Yɛwɔ mmofra nkumaa baasa, na nhoma yi ne nea eye pɛpɛɛpɛ ma yɛn ‘abusua adesua a yɛyɛ no anadwofa biara no.’ Nokwarem no, hwɛ sɛnea ɛfata sɛ yesua yɛn Hene Yesu Kristo a ɔwɔ ɔdɔ no asetra ho ade yiye.”

Japanni abeawa bi kyerɛkyerɛ mu sɛ: “Me papa kenkan kyerɛ yɛn bere a yɛregye yɛn ahome wɔ yɛn anwummere adidi akyi. Na yɛkenkan fi mfiase sɛ abusua, nanso mebɔɔ me tirim sɛ anadwo biara mɛkenkan afi ti a etwa to no so de asan m’akyi ansa na mada. Nanso, nhoma no mu yɛ dɛ yiye ma enti ɛtaa bɔ anɔpa dɔnkoro ansa na mahu dɔn a abɔ.”

Pii ho dwiriw wɔn wɔ kyerɛwtohɔ no mu nkyerɛkyerɛmu pii no ho. Ɔdansefo bi kyerɛwee sɛ: “Misuaa nneɛma pii a na minnim.” Krataa bi a efi California, U.S.A., sɛ: “Me ne me yere atra nokware no mu mfe 35 ne akyi, na yebetumi aka no pefee sɛ yennyaa nhoma bi a emu yɛ dɛ yiye sɛ eyi da.”

Ɛsɛ sɛ nhoma no bɔ atoro a ese Yehowa Adansefo nnye Yesu nni no gu. Ɔkenkanfo bi a ɔwɔ anisɔ kae sɛ: “Mantumi amfa anto hɔ, efisɛ ɛno na ɛbɔ nsɛm a wɔn a wɔka sɛ Yehowa nkurɔfo nnye Yesu Kristo nni anaa wonni no ni ka no gu sen biara. Nea ehia sɛ yɛyɛ ara ne sɛ yɛde wɔn nsɛm a ɛnyɛ nokware no mmuae yi bɛma wɔn.”

Akyinnye biara nni ho sɛ nhoma yi benya ɔfã titiriw wɔ Yehowa Adansefo ɔsom adwuma no mu. Ɔdansefo biako kyerɛwee sɛ: “Mede biako maa ɔbea bi a me ne no sua Bible no, na nkɛntɛnso a enyaa wɔ no so no te sɛ anwonwade bi. Na wasua ade bɛyɛ afe, na na ɛyɛ den ma me sɛ mɛma waba nhyiam horow.” Bere a osuani no kenkan nhoma foforo no atiri 45 wiei no, Ɔdansefo no kyerɛkyerɛɛ mu sɛ “ɔka kyerɛɛ me sɛ ɔbɛba nhyiam Kwasida, efisɛ bere aso sɛ osi gyinae.”

Emu Nneɛma a Ɛsom Bo

Nokwarem no, Onipa a Ɔsen Biara a Watra Ase Pɛn no de Nsɛmpa no ho nkyerɛkyerɛmu ma. Wɔde nsɛm pii a Yesu kae na ɔkyerɛkyerɛe no mu nkyerɛkyerɛmu ama, na ama wɔatumi de nhoma no adi dwuma sɛ nhwehwɛmu adwinnade a ɛsom bo, efisɛ ɛka Bible mu kyerɛwtohɔ ahorow no ho asɛm yiye.

Ade titiriw bi a ɛwom ne sɛ wɔahyehyɛ biribiara nnidiso nnidiso sɛnea bere a esisii no te. Emu a wobuebue kɛkɛ bere a eyi wɔ w’adwenem no betumi aboa ankasa ama woahu bere a nsɛm bi sisii wɔ Yesu ɔsom adwuma no mu. Wɔn a wɔkenkan Nsɛmpa no taa hyia nsɛm a ɛte sɛ nea abirabɔ wom. Bere a nhoma foforo no ntwe adwene nsi eyinom so wɔ ɔkwan a enhia so no, ɛma biakoyɛ bam wɔ nsɛm a ɛka no mu.

Sɛ Kristofo no, akyinnye biara nni ho sɛ yɛrempɛ sɛ yebebu yɛn ani agu yɛn Nhwɛsofo nokwafo, Yesu Kristo, ho adesua a yɛde boasetɔ bɛyɛ no so. Enti, momma yɛmfa nhoma foforo a ɛne Onipa a Ɔsen Biara a Watra Ase Pɛn no so nsusuw Asɛmpa no mu kyerɛwtohɔ ahorow no ho yiye.