Mesia No Ba A Waba Ne Ne Nniso

“Yesu yi ara a wɔafa no mo nkyɛn kɔ ɔsoro yi, ɔbɛba saa ara, sɛnea muhu no sɛ ɔrekɔ ɔsoro yi.”​—ASOMAFO NO NNWUMA 1:11.

 1, 2. (a) Ɔkwan bɛn so na abɔfo abien kyekyee Yesu asomafo no werɛ bere a ɔforo kɔɔ soro no? (b) Nsemmisa bɛn na Kristo sanba ho anidaso no ma ɛsɔre?

MMARIMA dubiako gyinaa Ngo Bepɔw no asianee a ɛwɔ apuei fam no so hwɛɛ soro hãã. Ná ɛnkyɛe biara na Yesu Kristo fii wɔn ntam fii ase kɔɔ soro ma ne nipadua no yerae nkakrankakra kosii sɛ omununkum bi kataa ho. Wɔ mfe a mmarima yi de ne no nantewee no mu no, na wɔahu sɛ Yesu de adanse a ɛdɔɔso pii ama sɛ ɔne Mesia no; wɔanya ne wu mu awerɛhodi ne ne wusɔre mu anigye kɛse no mpo mu osuahu. Afei de na ɔkɔ.

² Abɔfo baanu kopuee hɔ mpofirim na wɔkaa awerɛkyekyesɛm yi sɛ: “Galilea mmarima, adɛn na mugyina ha rehwɛ ɔsoro yi? Yesu yi ara a wɔafa no mo nkyɛn kɔ ɔsoro yi, ɔbɛba saa ara, sɛnea muhu no sɛ ɔrekɔ ɔsoro yi.” (Asomafo no Nnwuma 1:11) Hwɛ sɛnea eyi ma awerɛhyem​—ná Yesu sorokɔ no nkyerɛ sɛ asase ne adesamma ho nhia no bio! Nea ɛne eyi bɔ abira koraa no, na Yesu bɛsan aba. Akyinnye biara nni ho sɛ nsɛm yi maa asomafo no nyaa anidaso. Nnipa ɔpepem pii a wɔwɔ hɔ nnɛ nso bu Kristo sanba ho bɔhyɛ no sɛ ɛho hia yiye. Ebinom ka ho asɛm sɛ “Ne Mmae a Ɛto so Abien” anaa “Ne Mmae.” Nanso, ɛte sɛ nea pii adwenem ayɛ wɔ basaa wɔ nea Kristo sanba no kyerɛ ankasa ho. Kristo san ba wɔ ɔkwan bɛn so? Bere bɛn? Na ɔkwan bɛn so na eyi ka yɛn asetra nnɛ?

Sɛnea Kristo San Ba

 3. Dɛn na nnipa pii gye di wɔ Kristo sanba no ho?

³ Sɛnea nhoma An Evangelical Christology kyerɛ no, “Kristo mmae a ɛto so abien anaa ne sanba (parousia) no ma awiei koraa no, wɔde Onyankopɔn Ahenni no si hɔ, da no adi pefee, afebɔɔ.” Nnipa pii gye di sɛ Kristo sanba no bɛyɛ nea wohu pefee, nea obiara a ɔwɔ okyinsoroma no so behu ankasa. Nnipa pii twe adwene kɔ Adiyisɛm 1:7 so de gyina saa adwene yi akyi, nea ɛkenkan sɛ: “Hwɛ, ɔnam amununkum mu reba, na aniwa nyinaa behu no, ɛne wɔn a wɔwɔɔ no no.” Nanso so ɛsɛ sɛ yɛte nkyekyem yi ase sɛnea ɛte no ara?

 4, 5. (a) Yɛyɛ dɛn hu sɛ ɛnsɛ sɛ yɛfa asɛm a ɛwɔ Adiyisɛm 1:7 no paara? (b) Ɔkwan bɛn so Yesu ankasa nsɛm a ɔkae kyerɛ sɛ ntease yi yɛ nokware?

⁴ Kae sɛ, wɔde Adiyisɛm nhoma no mu nsɛm mae “wɔ sɛnkyerɛnne kwan so.” (Adiyisɛm 1:1, New World Translation) Ɛnde, ɛsɛ sɛ asɛm yi kyerɛ biribi wɔ sɛnkyerɛnne kwan so; efisɛ ɛbɛyɛ dɛn na “wɔn a wɔwɔɔ no no” ahu Kristo sɛ ɔresan aba? Wɔawu bɛyɛ nea ɛreyɛ adu mfehaha 20 ni! Bio nso, abɔfo no kae sɛ sɛnea Kristo kɔe no, “ɔbɛba saa ara.” Wiɛ, ɔkwan bɛn so na ɔkɔe? So ɔrekɔ no na nnipa ɔpepem pii rehwɛ? Dabi, anokwafo kakraa bi pɛ na wohui. Na bere a abɔfo no ne wɔn kasae no, so na asomafo no rehwɛ sɛnea Kristo rekɔ no ankasa kosii sɛ okoduu ɔsoro? Dabi, na omununkum bi akata Yesu ho ma enti wonhu no. Ɛno akyi bere bi no, ɛbɛyɛ sɛ ɔhyɛn ɔsoro atrae hɔ sɛ honhom abɔde, a onipa aniwa ntumi nhu no. (1 Korintofo 15:50) Enti, asomafo no anhu nea ɛtra Yesu sorokɔ no mfiase; wɔantumi anhwɛ sɛnea ekowiei, sɛnea ɔsan kɔɔ n’Agya Yehowa anim wɔ soro no. Ná wɔde wɔn gyidi ani nkutoo na ebetumi ahu eyi.​—Yohane 20:17.

⁵ Bible no kyerɛkyerɛ sɛ Yesu san ba wɔ ɔkwan a ɛte saa ara so. Yesu ankasa kae bere tiaa bi ansa na ɔrewu sɛ: “Aka kakraa na wiase nhu me bio.” (Yohane 14:19) Ɔkae nso sɛ “Onyankopɔn ahenni mma sɛ ani tuae.” (Luka 17:20) Ɛnde, ntease bɛn mu na ‘aniwa nyinaa behu no’? Nea ɛbɛyɛ na yɛabua ɛno no, ehia sɛ yedi kan nya asɛmfua a Yesu ne n’akyidifo no de dii dwuma de kaa ne sanba ho asɛm no ho ntease a emu da hɔ.

 6. (a) Dɛn nti na nsɛm te sɛ “sanba,” “du a wabedu,” “ne ba,” ne “ba a ɔreba” no nyɛ ɔkwan pa a wɔfa so kyerɛ Hela asɛmfua pa·rou·siʹa ase? (b) Dɛn na ɛkyerɛ sɛ pa·rou·siʹa anaa “ba a waba” no kyɛ sen biribi a esi wɔ bere tiaa bi mu ara kwa no?

⁶ Nokwasɛm no ne sɛ, Kristo yɛ nea ɛsen “ba a ɔsan ba” ara kwa koraa. Saa asɛm no, te sɛ “sanba,” “du a wabedu,” anaa “ne ba” no, kyerɛ biribi a esi wɔ bere tiaa bi mu. Nanso Hela asɛmfua a Yesu ne n’akyidifo no de dii dwuma no kyerɛ pii sen saa. Asɛmfua no ne pa·rou·siʹa, a nea ɛkyerɛ ankasa ne “sɛ ɔwɔ hɔ” anaa “ba a waba.” Nhomanimfo pii gye tom sɛ saa asɛm yi mfa du a obi abedu ho nko na mmom ɛfa ne ba a waba nso ho​—te sɛ nea ɔdehye bi kɔ Ɔman bi mu nsrahwɛ no. Saa wɔ a ɔwɔ hɔ no nyɛ bere tiaa mu adeyɛ; ɛyɛ bere titiriw bi, bere bi a wɔahyɛ no agyirae. Yesu kae wɔ Mateo 24:37-39, NW, sɛ “onipa Ba no ba a waba [pa·rou·siʹa]” no bɛyɛ sɛ “Noa nna no” a ekowiee Nsuyiri no mu no. Noa pam adaka na ɔbɔɔ abɔnefo kɔkɔ mfe dudu pii ansa na Nsuyiri no ba bɛsɛee saa wiase nhyehyɛe a na aporɔw no fii hɔ. Ɛnde, saa ara na Kristo ba a waba a aniwa nhu no bɛkɔ so mfe dudu bi ansa na ɛno nso akowie ɔsɛe kɛse bi mu.

 7. (a) Dɛn na ɛkyerɛ sɛ pa·rou·siʹa no nyɛ nea nnipa de wɔn ani hu? (b) Ɔkwan bɛn so na bere bɛn na kyerɛwnsɛm a ɛka Kristo sanba ho asɛm sɛ “aniwa nyinaa” behu no no bɛbam?

⁷ Akyinnye biara nni ho sɛ, pa·rou·siʹa no nyɛ nea nnipa de wɔn ani ankasa hu. Sɛ ɛte saa a, dɛn nti na anka Yesu begye bere pii, sɛnea yebehu no, de ama n’akyidifo no sɛnkyerɛnne a ɛbɛboa wɔn ma wɔahu saa ba a waba no?”a Nanso, sɛ Kristo ba bɛsɛe Satan wiase nhyehyɛe no a, nokwasɛm a ɛne ne ba a waba no bɛda adi koraa ma obiara ahu. Ɛno na afei “aniwa nyinaa behu no.” Yesu atamfo mpo betumi ahu ma ayɛ wɔn ahodwiriw sɛ Kristo redi tumi ampa.​—Hwɛ Mateo 24:30; 2 Tesalonikafo 2:8; Adiyisɛm 1:5, 6.

Bere Bɛn na Efi Ase?

 8. Asɛm a esii bɛn na ɛhyɛ Kristo ba a waba no mfiase agyirae, na ɛhe na eyi sii?

⁸ Asɛm bi a ɛma Mesia ho nkɔmhyɛ ahorow mu asɛmti bi a ɛkɔ so pue bam no na efi Mesia no ba a waba no ase. Wosi no Ɔhene wɔ soro. (2 Samuel 7:12-16; Yesaia 9:6, 7; Hesekiel 21:26, 27) Yesu ankasa kyerɛe sɛ ne ba a waba no ne n’ahenni bɛyɛ ade koro. Wɔ mfatoho ahorow pii mu no, ɔde ne ho totoo owura bi a ogyaw ne fie ne ne nkoa hɔ tu kwan bere tenten kɔ “asase so akyirikyiri,” faako a okogye ‘ahenni tumi’ no ho. Ɔde mfatoho a ɛte sɛɛ yi biako mae sɛ n’asomafo no asemmisa a ɛfa bere a ne pa.rou.si’a no befi ase no ho mmuae no fã; ɔde foforo nso mae efisɛ “wosusuwii sɛ Onyankopɔn ahenni rebeyi ne ho adi amonom hɔ ara.” (Luka 19:11, 12, 15; Mateo 24:3; 25:14, 19) Enti, bere a na ɔwɔ asase so sɛ onipa no, na bere a wobesi no ɔhene no nnya nnui koraa ɛ, na ɛbɛba wɔ “asase so akyirikyiri” wɔ soro. Ná bere bɛn na ɛbɛba?

9, 10. Adanse bɛn na ɛwɔ hɔ a ɛkyerɛ sɛ mprempren yi Kristo redi tumi wɔ soro, na bere bɛn na ofii ne tumidi no ase?

⁹ Bere a Yesu asuafo no bisaa no sɛ: ‘Dɛn na ɛbɛyɛ wo ba a waba ne nneɛma nhyehyɛe no awiei ho sɛnkyerɛnne?’ no, Yesu buae denam sɛnea saa daakye mmere no bɛyɛ ho nkyerɛkyerɛmu pefee a ɔde mae no so. (Mateo, ti 24; Marko, ti 13; Luka, ti 21; hwɛ 2 Timoteo 3:1-5; Adiyisɛm, ti 6 nso.) Saa sɛnkyerɛnne no te sɛ ɔhaw bere bi mu nsɛm nyinaa ho mfonini a wɔayɛ. Ɛyɛ amanaman ntam akodi, nsɛmmɔnedi a ɛrekɔ anim, abusua asetra a ɛsɛe, ɔyaredɔm, ɔkɔm, ne asasewosow bere​—ɛnyɛ ɔhaw ahorow a ɛba wɔ mmeae bi nkutoo na mmom nsɛnnennen a ɛba asase so nyinaa. So eyi te sɛ nea wunim anaa? Da biara a etwam no si so dua sɛ afeha a ɛto so 20 yi fata Yesu nkyerɛkyerɛmu no pɛpɛɛpɛ.

¹⁰ Abakɔsɛm akyerɛwfo gye tom sɛ na 1914 yɛ adesamma abakɔsɛm mu bere titiriw, afe titiriw bi a ɛno akyi no, ɔhaw ahorow yi mu pii fii ase yɛɛ nea wontumi nni ho dwuma, na emu trɛw kɔɔ asase so nyinaa. Yiw, nsɛm a esisi ankasa wɔ wiase a ɛma Bible nkɔmhyɛ nya mmamu no nyinaa twe adwene kɔ 1914 so sɛ afe a Yesu fii ase dii tumi sɛ Ɔhene wɔ soro. Bio nso, nkɔmhyɛ bi a ɛwɔ Daniel ti 4 no de mmerebu mu adanse bi a ɛde yɛn kɔ afe koro no ara​—1914​—so sɛ bere a Yehowa Hene a wapaw no no befi ne nniso ase no ma.b

Dɛn Nti Na Ɛyɛ Ɔhaw Bere?

11, 12. (a) Dɛn nti na ɛyɛ den ma ebinom sɛ wobegye adi sɛ Kristo redi tumi wɔ soro mprempren yi? (b) Ɔkwan bɛn so na yebetumi ayɛ nea esii bere a wosii Yesu Ɔhene wɔ soro akyi no ho mfatoho?

¹¹ Nanso, ebinom bisa sɛ, ‘Sɛ Mesia no redi tumi wɔ soro a, dɛn nti na ɔhaw wɔ wiase no mu pii saa? So ne tumidi no tɔ sin?’ Mfatoho bi betumi aboa. Ɔmampanyin bɔne bi di ɔman bi so. Wahyehyɛ nhyehyɛe porɔwee bi a ɛwɔ nkɛntɛnso wɔ ɔman no mu nyinaa. Nanso wɔtow aba; onipa pa bi di nkunim. Afei dɛn na ebesi? Sɛnea ɛte wɔ aman bi a demokrase amammui wɔ hɔ mu no, asram kakraa bi a wɔde yɛ ahosiesie twam ansa na ɔmampanyin foforo no afi tumidi ase. Ɔkwan bɛn so na nnipa baanu yi bɛyɛ wɔn ade wɔ saa bere yi mu? So onipa pa no befi ase ayi nnebɔne a ɔmampanyin a odi kan no ayɛ no afi ɔman no mu nyinaa amonom hɔ ara? So ɔremfa n’adwene nsi ahenkurow no so kan mmom, mpaw aban asoafo afoforo, na watwa ɔne ɔmampanyin a odi kan no nnamfo ne aboafo a wɔaporɔw no dwumadi mu? Saa kwan no so no, sɛ wɔde ne tumi no nyinaa hyɛ ne nsa a, obetumi afi ahenkurow a emu tew na emu nneɛma kɔ so pɛpɛɛpɛ mu adi tumi. Na ɔmampanyin bɔne no nso, so ɔremfa bere tiaa bi a ɔwɔ no nni dwuma mfa nyi nneɛma a ɔnam ɔkwammɔne so nyae no dodow a obetumi nyinaa mfi ɔman no mu ansa na tumi nyinaa afi ne nsa?

¹² Saa pɛpɛɛpɛ na Kristo pa·rou·siʹa no te. Adiyisɛm 12:7-12 kyerɛ sɛ bere a wosii Kristo Ɔhene wɔ soro no, odii kan tuu Satan ne n’adaemone no fii soro, de tew faako a Ne nniso no wɔ no. Bere a wadi nkogu a wɔde bere tenten ahwɛ kwan yi akyi no, ɔkwan bɛn so na Satan yɛ n’ade wɔ ‘bere tiaa a aka’ ansa na Kristo afi ase adi tumi koraa wɔ asase so no mu? Te sɛ saa ɔmampanyin bɔne no, ɔbɔ mmɔden sɛ obenya nea obetumi nyinaa afi nhyehyɛe dedaw yi mu. Ɛnyɛ sika na ɔhwehwɛ; ɔhwehwɛ nnipa. Ɔpɛ sɛ ɔma nnipa dodow biara a obetumi anya wɔn twe wɔn ho fi Yehowa ne Ne Hene a ɔredi tumi no ho.

13. Ɔkwan bɛn so na Kyerɛwnsɛm no kyerɛ sɛ Kristo nniso mfiase no bɛyɛ ɔhaw bere wɔ asase so ha?

¹³ Ɛnde, ɛnyɛ nwonwa sɛ Mesia no nniso mfiase yɛ bere a wɔma ‘asase due.’ (Adiyisɛm 12:12) Saara na Dwom 110:1, 2, 6 kyerɛ sɛ Mesia no fi ne nniso ase ‘wɔ n’atamfo mfinimfini.’ Akyiri yi nkutoo ansa na ɔbɛdwerɛw “amanaman” no, a Satan nhyehyɛe bɔne no fã biara ka ho, afi hɔ korakora!

Bere a Mesia Di Asase so Tumi

14. Dɛn na Mesia no betumi ayɛ bere a wasɛe Satan nneɛma nhyehyɛe bɔne no akyi?

¹⁴ Bere a wasɛe Satan nhyehyɛe no ne wɔn a wogyina akyi nyinaa akyi no, awiei koraa no, Ɔhene Mesia, Yesu Kristo, betumi ama Bible nkɔmhyɛ ahorow a ɛyɛ nwonwa a ɛkyerɛ sɛnea ne Mfirihyia Apem Ahenni no bɛyɛ no abam. Yesaia 11:1-10 boa yɛn ma yehu sodifo ko a Mesia no bɛyɛ. Nkyekyem 2 kyerɛ yɛn sɛ obenya “[Yehowa] honhom . . ., nyansa ne nhumu honhom, afotu ne mmaninyɛ honhom.”

15. Dɛn na “mmaninyɛ honhom” no bɛkyerɛ wɔ Mesia nniso ase?

¹⁵ Susuw nea “mmaninyɛ honhom” bɛkyerɛ wɔ Yesu nniso mu no ho. Bere a ɔwɔ asase so no, Yehowa maa no mmaninyɛ tumi bi a otumi de yɛɛ anwonwade ahorow. Na ɔkyerɛe sɛ ofi ne komam pɛ sɛ ɔboa nkurɔfo, bere a ɔkae sɛ, “Mepɛ” no. (Mateo 8:3) Nanso anwonwade ahorow a ɔyɛɛ saa mmere no yɛ nea ɔbɛyɛ bere a ofi soro redi tumi no ho mfonini ara kɛkɛ. Yesu bɛyɛ anwonwade ahorow wɔ asase so nyinaa! Ɔbɛsa ayarefo, anifuraefo, asotifo, wɔn a wɔadi dɛm, ne apakye nyinaa yare afebɔɔ. (Yesaia 35:5, 6) Aduan a abu so, a wɔbɛkyekyɛ no yiye no beyi ɔkɔm afi hɔ akosi daa. (Dwom 72:16) Na nnipa ɔpepem huhaa a wɔwowɔ adamoa mu a ɛyɛ Onyankopɔn pɛ sɛ ɔkae wɔn no nso ɛ? Nea ɛka Yesu “mmaninyɛ” ho ne tumi a ɔde bɛma wɔanya owusɔre, na wama wɔn mu biara anya hokwan sɛ ɔbɛtra ase daa wɔ Paradise! (Yohane 5:28, 29) Nanso, wɔ mmaninyɛ yi nyinaa akyi no, Ɔhene Mesia no bɛbrɛ ne ho ase koraa. Onya “anigye . . . wɔ Yehowa suro mu.”​—Yesaia 11:3, NW.

16. Ɔtemmufo bɛn na Ɔhene Mesia no bɛyɛ, na ɔkwan bɛn so na ɛno ne nea nnipa atemmufo ayɛ no bɛbɔ abira?

¹⁶ Ɔhene yi bɛyɛ Ɔtemmufo a ɔyɛ pɛ nso. “Ɛnyɛ nea n’ani hu so na obebu atɛn, na ɛnyɛ nea n’aso te so na obedi asɛm.” Ɔdesani ɔtemmufo a watra ase pɛn anaasɛ ɔwɔ hɔ mprempren bɛn na wobetumi aka ne ho asɛm saa? Sɛ onipa a ɔyɛ ɔbadwemma yiye de nyansa anaa nhumu biara a ebia ɔwɔ di dwuma mpo a, nea ohu na ɔte nkutoo so na obetumi agyina abu ntɛn. Enti, wobetumi de atosɛm a ne hu yɛ den, asennii ase nneyɛe bi, anaa adanse ahorow a ɛbɔ wɔn ho abira adaadaa nhyehyɛe dedaw yi mu atemmufo ne asenni baguafo anaasɛ wɔde atu wɔn adwene afra. Mpɛn pii no, adefo ne wɔn a wɔwɔ tumi nkutoo na wotumi ma sika a ɛbɛma wɔakasa ama wɔn yiye, kyerɛ sɛ wɔtɔ atɛntrenee ankasa. Ɛnte saa wɔ Mesia Ɔtemmufo no nniso ase! Ohu nea ɛwɔ komam. Wontumi mfa biribiara nhintaw no. Atɛntrenee a ɔdɔ ne mmɔborɔhunu ka ho renyɛ nea wɔtɔn. Ɛbɛtra hɔ bere nyinaa.​—Yesaia 11:3-5.

Sɛnea Ne Nniso Ka Wo

17, 18. (a) Adesamma daakye ho mfonini a ɛyɛ anigye bɛn na wɔayɛ wɔ Yesaia 11:6-9? (b) Henanom na nkɔmhyɛ yi fa wɔn ho titiriw, na dɛn ntia? (d) Ɔkwan bɛn so na nkɔmhyɛ yi benya mmamu a ɛyɛ paara?

¹⁷ Ɔkwan a ntease wom so no, Mesia no nniso nya ne nkoa so nkɛntɛnso kɛse. Ɛsakra nnipa. Yesaia 11:6-9 kyerɛ sɛnea nsakrae ahorow yi kɔ akyiri fa. Nkɔmhyɛ yi kyerɛ sɛnea mmoa a wɔn ho yɛ hu na wɔyɛ keka​—asisi, ahabɔdɔm, asebɔ, agyata, awɔ​—ne mmoa a wɔnyɛ keka ne mmofra mpo bɛtra. Nanso mmoa a wɔyɛ keka no ho nyɛ hu! Dɛn ntia? Nkyekyem 9 bua sɛ: “Wɔrenyɛ bɔne na wɔrensɛe ade bio me bepɔw kronkron no nyinaa so, na [Yehowa ho nimdeɛ] bɛyɛ asase ma, sɛ nsu kata po so no.”

¹⁸ Nokwarem no, ‘Yehowa ho nimdeɛ’ rentumi nnya mmoa ankasa so nkɛntɛnso biara; enti nkyekyem yi bɛfa nnipa ho titiriw. Mesia nniso no ma wɔyɛ asase so nyinaa ɔkyerɛkyerɛ adwuma bi a wɔde kyerɛkyerɛ nkurɔfo Yehowa ne n’akwan ho nsɛm, na wɔkyerɛkyerɛ obiara sɛnea ɔne ne yɔnko nnipa bedi no ɔdɔ, obu, ne nidi mu. Mesia no de adesamma bɛkɔ honam ne abrabɔ fam pɛyɛ mu anwonwa kwan so wɔ Paradise a ɛreba no mu. Su horow a ɛyɛ keka te sɛ mmoa de a ɛsɛe nipasu a ɛnyɛ pɛ no befi hɔ. Asomdwoe bɛba adesamma ne mmoa ntam ankasa nso​—afei!​—Fa toto Genesis 1:28 ho.

19. Ɔkwan bɛn so na Mesia no nniso nya nnipa asetra so nkɛntɛnso wɔ nna a edi akyiri yi mu?

¹⁹ Nanso, kae sɛ Mesia no redi tumi mpremprem. Mprempren mpo, n’ahenni no nkoa resua sɛnea wɔbɛbom atra ase wɔ asomdwoe mu, na ɛma Yesaia 11:6-9 bam wɔ ntease biako mu. Bio nso, Yesu ama Yesaia 11:10 renya mmamu wɔ nea ɛreyɛ adu mfe 80 ni: “Na da no, Yisai ntini mu duforo a esi hɔ sɛ ɔfrankaa ma aman no, n’akyi kwan na amanaman bɛhwehwɛ, na ne trabea bɛyɛ anuonyam trabea.” Nnipa a wofi ɔman biara mu rehwehwɛ Mesia no akyi kwan. Dɛn ntia? Efisɛ efi bere a ofii ase dii tumi no, wagyina hɔ “sɛ ɔfrankaa.” Ɔnam ɔkyerɛkyerɛ adwuma kɛse a wɔaka ho asɛm wɔ atifi hɔ no so ama wɔahu ne ba a waba no wɔ wiase nyinaa. Nokwarem no, Yesu ka siei sɛ asase so nyinaa asɛnka adwuma bi bɛyɛ ne ba a waba no ho sɛnkyerɛnne a ɛda nsow ansa na nhyehyɛe dedaw yi awiei aba.​—Mateo 24:14.

20. Su bɛn na ɛsɛ sɛ Mesia no nniso nkoa nyinaa kwati, na dɛn ntia?

²⁰ Enti Kristo ba a waba wɔ Ahenni tumi mu no nyɛ asɛm bi a wɔbɔ tirim ka anaa nhoma mu asɛm bi a nyamekyerɛfo gye ho akyinnye ara kɛkɛ. Ne nniso no nya nkurɔfo so nkɛntɛnso na ɛsakra wɔn asetra wɔ asase so ha, sɛnea Yesaia hyɛɛ nkɔm sɛ ɛbɛyɛ no ara pɛ. Yesu ayi n’Ahenni no nkoa ɔpepem pii afi wiase nhyehyɛe a aporɔw yi mu. So woyɛ akoa a ɔte sɛɛ? Ɛnde fa ahosɛpɛw ne anigye nyinaa a ɛfata yɛn Sodifo no som! Ɛwom, ɛnyɛ den sɛ wobɛbrɛ, na woaka wiase no akyinnyegyesɛm a ɛka sɛ: “Ne ba a wɔhyɛɛ ho bɔ no wɔ he?” no bi. (2 Petro 3:4, NW) Nanso sɛnea Yesu ankasa kae no, “nea obegyina akodu awiei no, ɔno na wobegye no.”​—Mateo 24:13.

21. Ɔkwan bɛn so na yɛn nyinaa betumi ama anisɔ a yɛwɔ ma Mesia anidaso no ayɛ kɛse?

²¹ Da biara a etwam no ma yɛbɛn da kɛse a Yehowa bɛhyɛ Ne Ba no sɛ ɔmma wiase nyinaa nhu ba a waba no kakra. Ɛmma saa da no mu anidaso a wowɔ no ano mmrɛ ase da. Susuw Mesia a Yesu yɛ ne ne su horow sɛ Ɔhene a ɔredi tumi no ho. Susuw Yehowa Nyankopɔn, nea ɔde Mesia ho anidaso kɛse a ɛwɔ Bible no mu mae na ɔyɛɛ ho nhyehyɛe no nso ho kɔ akyiri. Bere a woyɛ saa no, akyinnye biara nni ho sɛ wobɛkɔ so ate nka sɛnea ɔsomafo Paulo yɛe bere a ɔkyerɛw eyi no: “O Onyankopɔn ahonya ne nyansa ne nimdeɛ bun a emu dɔ!”​—Romafo 11:33.

[Ase hɔ asɛm]

Wubebua Dɛn?

◻ Ɔkwan bɛn so na Kristo san ba?

◻ Yɛyɛ dɛn hu sɛ Kristo pa·rou·siʹa no nyɛ nea aniwa hu na ɛbɛkɔ so bere tenten bi?

◻ Bere bɛn na Kristo ba a waba no fi ase, na yɛyɛ dɛn hu eyi?

◻ Ɔsoro Sodifo bɛn na Mesia no yɛ?

◻ Akwan bɛn so na Kristo nniso no nya ne nkoa asetra so nkɛntɛnso?

[Mfonini wɔ kratafa 15]

Ná anidaso a ɛne sɛ Yesu bɛsan aba no kyerɛ pii ma n’asomafo anokwafo no

[Mfonini wɔ kratafa 17]

Yesu a obefi soro adi tumi no bɛyɛ anwonwade ahorow wɔ asase so nyinaa

[Mfonini Fibea]

Asase: Egyina NASA mfonini so