Bɔ Mmɔden Yɛ Nea Ehia Kan!

Ɛyɛ anwummere a wokɔ nhyiam, nanso wowɔ adwuma yɛ. Nea ɛwɔ he na wobɛyɛ kan?

WOYƐ okunu ne agya. Bere a woreyɛ apɔn adwumaden no, wokae asafo nhyiam a wɔbɛyɛ no da no anwummere no. Sɛ wufi adwuma mu hɔ ara pɛ a, wubenya bere a ɛfata de aguare, asesa wo ho, na woatumi adidi ntɛm ansa na woakɔ nhyiam no. Mpofirim ara w’adwumawura bɛka kyerɛ wo sɛ yɛ adwuma kakra ka ho bere a moapɔn no. Ɔhyɛ wo bɔ sɛ ɔbɛma wo akatua a ɛfata. Wuhia sika no.

Anaasɛ woyɛ ɔyere ne ɛna. Bere a worenoa anwummere aduan no, wuhu nneɛma pii a wɔntow so sɛ esum hɔ, a sɛ ade kye a wubehia emu bi. Wubisa wo ho sɛ, ‘Sɛ mekɔ nhyiam anwummere yi a, bere bɛn na mede bɛtow nneɛma yi?’ Esiane sɛ nnansa yi are na woafi ase de wo bere nyinaa reyɛ adwuma nti, worehu sɛnea ɛyɛ den sɛ wobɛyɛ fie nnwuma ne adwuma a wode bɛhwɛ wo ho.

Anaasɛ woyɛ sukuuni. Sukuu adwuma a wode ba fie bɛyɛ no aka abɔ so wɔ pon a esi wo dan mu no so. Wɔde emu pii maa wo bere bi a atwam, nanso woayɛ mmɔtohɔ, na mprempren ɛhwehwɛ sɛ woyɛ nnwuma pii wɔ bere koro mu. Wopɛ sɛ wosrɛ w’awofo kwan na wosan nhyiam no, na ama woawie sukuu adwuma a wode baa fie no.

Nea ɛwɔ he na wubedi kan ayɛ: honam fam adwuma no a wobɛyɛ bi aka ho, nneɛma a wobɛtow so, sukuu adwuma no, anaasɛ asafo nhyiam no? Wɔ honhom fam no, dɛn na nea ehia a wubedi kan ayɛ no kyerɛ? Dɛn ne Yehowa adwene wɔ ho?

Dɛn na Ɛsɛ sɛ Wudi Kan Yɛ?

Bere tiaa bi akyi a wɔde Mmara Du no maa Israelfo no, wohui sɛ ɔbarima bi repɛ nnyina Homeda. Na wɔabara eyi katee wɔ Mmara no mu. (Numeri 15:32-34; Deuteronomium 5:12-15) Anka wubebu asɛm no ho atɛn dɛn? So anka wubegye ɔbarima no ti na woaka sɛ anyɛ hwee koraa no, na ɔreyɛ adwuma a ɔde benya asetrade ama n’abusua na ɛnyɛ sɛ ɔde hwehwɛ asetra a anigye ne ahotɔ kɛse wom? So anka wobɛka sɛ bere wɔ afe no mu a wɔde bedi Homeda, na hokwan biako a ɔbarima no hweree esiane sɛ wantumi anyɛ nhyehyɛe anto hɔ nti wobetumi de akyɛ no?

Yehowa buu no aniberesɛm kɛse. Bible no ka sɛ: “Na [Yehowa, NW] ka kyerɛɛ Mose sɛ: Okum na wonkum ɔbarima no.” (Numeri 15:35) Adɛn nti na nea ɔbarima no yɛe no hawee Yehowa kɛse saa?

Na nkurɔfo no wɔ nnansia a wɔde bɛpɛ nnyina na wɔde ahwehwɛ aduan, ntade, ne dabere a wohia no. Na ɛsɛ sɛ wɔde da a ɛto so ason no di wɔn honhom fam ahiade ho dwuma. Ɛwom sɛ na ɛnyɛ mfomso sɛ wɔbɛpɛ nnyina de, nanso na enye sɛ wɔde bere a wɔayi asi hɔ de som Yehowa no yɛ saa. Ɛwom sɛ Kristofo nni Mose Mmara no ase de, nanso so asɛm yi nkyerɛ yɛn asuade bi wɔ sɛnea yɛbɛyɛ nea ehia kan nnɛ no mu?—Filipifo 1:10.

Bere a Israelfo no dii mfe 40 wɔ sare no so no, wosiesiee wɔn ho sɛ wɔrekɔhyɛn Bɔhyɛ Asase no so. Na mana a Onyankopɔn de maa wɔn no afono ebinom ma enti na akyinnye biara nni ho sɛ wɔrehwɛ aduan foforo kwan. Nea ɛbɛboa wɔn ma wɔakɔ so anya adwempa bere a wɔhyɛnee asase a “nufusu ne wo sen wɔ so” so no, Yehowa kaee wɔn sɛ: “Ɛnyɛ abodoo nko so na onipa nam bɛtra ase, na ade biara a efi [Yehowa, NW] anom so na onipa nam tra ase.”—Exodus 3:8; Deuteronomium 8:3.

Na ɛsɛ sɛ Israelfo no yɛ adwuma denneenen na ama wɔanya wɔn “nufusu ne wo” no. Na ɛsɛ sɛ wodi asraafo so nkonim, sisi adan, na wɔdɔ mfuw. Ɛno koraa mpo no, Yehowa hyɛɛ nkurɔfo no sɛ wonyi bere da biara mfa nsusuw honhom fam nneɛma ho. Na ɛsɛ sɛ wogye bere nso kyerɛkyerɛ wɔn mma Onyankopɔn akwan. Yehowa kae sɛ: “Na momfa [me mmara] nkyerɛkyerɛ mo mma, na kasa ho w’afitra mu ne wo kwan so nantew mu, ne wo nna mu ne wo sɔre mu.”—Deuteronomium 11:19.

Wɔhyɛɛ Israelni barima ne ɔbarima biara a wabɛyɛ Israelni sɛ ɔnkɔyi ne ho adi Yehowa anim mprɛnsa afe biara. Bere a mmusua ti pii hui sɛ abusua mũ no betumi anya bere a ɛte saa so mfaso no, wɔyɛɛ nhyehyɛe ma wɔne wɔn yerenom ne wɔn mma kɔe. Nanso hena na na ɔbɛbɔ wɔn afie ne wɔn mfuw ho ban afi atamfo ntua mu bere a na abusua no nni hɔ no? Yehowa hyɛɛ bɔ sɛ: “Na woreforo akopue [Yehowa, NW] wo Nyankopɔn anim afirihyia mu mpɛn abiɛsa no a, obiara ani remmere w’asase.” (Exodus 34:24) Na egye gyidi na Israelfo no atumi agye atom sɛ sɛ wɔde honhom fam nneɛma di kan a, wɔrenhia hwee wɔ honam fam. So Yehowa dii n’asɛm so? Odii so ankasa!

Kɔ so Hwehwɛ Ahenni no Kan

Yesu kyerɛkyerɛɛ n’akyidifo sɛ wɔmfa honhom fam nneɛma nni biribiara kan. Otuu n’atiefo fo wɔ Bepɔw so Asɛnka no mu sɛ: “Enti munnnwinnwen sɛ: Dɛn na yebedi anaasɛ dɛn na yɛbɛnom anaasɛ dɛn na yebefura? Na monhwehwɛ . . . ahenni ne ne trenee kan; na wɔde eyinom [honam fam nneɛma a ehia] nyinaa bɛka mo ho.” (Mateo 6:31, 33) Wɔ Yesu wu akyi pɛɛ no, Kristofo a afei na na wɔabɔ wɔn asu no tiee afotu yi. Na wɔn mu pii yɛ Yudafo anaa wɔn a wɔadan Yudafo a wɔbaa Yerusalem sɛ wɔrebedi Pentekoste afahyɛ no wɔ afe 33 Y.B. mu. Biribi a na ɛyɛ nwonwa sii bere a na wɔwɔ hɔ no. Wotiei na wogyee Yesu Kristo ho asɛmpa no. Esiane sɛ na wɔpɛ sɛ wosua wɔn gyidi foforo no ho ade pii nti, wɔtraa Yerusalem. Ehiaa wɔn honam fam, nanso na ɛnyɛ ɛno ne nea ɛho hia wɔn kɛse. Na wɔahu Mesia no! Wɔn nuanom Kristofo ne wɔn kyɛɛ honam fam nneɛma biara a na wɔwɔ sɛnea ɛbɛyɛ a ‘wobekura asomafo no kyerɛ ne mpaebɔ mu ara.’—Asomafo no Nnwuma 2:42.

Wɔ bere bi akyi no, Kristofo binom buu wɔn ani guu hia a fekubɔ a wobenya daa wɔ nhyiam ase hia no so. (Hebrifo 10:23-25) Ebia wɔbɛyɛɛ wɔn a wɔpɛ honam fam nneɛma pii, na wobuu wɔn ani guu honhom fam nneɛma so bere a wɔbɔɔ mmɔden sɛ wɔne wɔn mmusua bedi yiye sika fam no. Bere a ɔsomafo Paulo tuu ne nuanom fo sɛ wonnnyae nhyiamkɔ akyi no, ɔkyerɛwee sɛ: “Mommma sikanibere mmma mo abrabɔ mu, na mompene nea mowɔ; efisɛ ɔno ankasa aka sɛ: Merennyaw wo, nanso merempa wo da.”—Hebrifo 13:5.

Na Paulo afotu no yɛ ne bere mu de ankasa. Bere a Paulo kyerɛw ne krataa a ɔde kɔmaa Hebrifo no wɔ bɛyɛ mfe anum akyi no, Roma asraafo a Cestius Gallus di wɔn anim betwaa Yerusalem ho hyiae. Kristofo anokwafo no kaee Yesu kɔkɔbɔ no: “Na sɛ muhu [eyi] a . . . , nea ɔwɔ ɔdan atifi no nnsian mmma fam, nanso ɔnnhyɛn mu mmmɛfa biribi ne fi. Na nea ɔwɔ afuw mu no nnsan n’akyi mmmɛfa ne ntama.” (Marko 13:14-16) Na wonim sɛ nkwa a wobenya no nnyina nnwuma pa ne honam fam nneɛma a wɔwɔ so, na mmom tie a na wobetie Yesu ahyɛde ahorow no so. Akyinnye biara nni ho sɛ ɛyɛɛ mmerɛw maa wɔn a wotiee Paulo afotu no na wɔde honhom fam nneɛma dii kan no sɛ wobegyaw afie, nnwuma, ntade, ne honam fam nneɛma a na wɔn ani gye ho biara hɔ aguan akɔ mmepɔw so sen wɔn a na wɔn ani da so bere sika no.

Sɛnea Ebinom De Nea Ehia Di Kan Nnɛ

Kristofo anokwafo a wɔwɔ hɔ nnɛ ani gye fekuw a wɔne wɔn nuanom bɛbɔ daa ho, na wɔn mu pii de nneɛma bɔ afɔre na ama wɔatumi akɔ nhyiam. Wɔ mmeae bi no, nnwuma a ɛwɔ hɔ yɛ nea afoforo kɔsesa wɔn a wɔapɔn no nkutoo. Onua biako ka sɛ obesi ne mfɛfo adwumayɛfo ananmu ayɛ wɔn adwuma ama wɔn Memeneda anadwo a mpɔtam hɔ nnipa dodow no ara de gye wɔn ani no, sɛ wɔn nso bɛyɛ ne de ama no anwummere a ɔkɔ asafo nhyiam no a. Anuanom foforo a wɔyɛ adwuma a wɔpɔn a afoforo bɛsesa wɔn no kɔ asafo bi a ɛbɛn wɔn nhyiam sɛ wɔn adwuma mma wontumi nkɔ wɔn de a. Saa kwan yi so no, ɛkame ayɛ sɛ wɔnto nhyiamkɔ mu. Onigyeni bi a ɔwɔ Canada huu hia a Teokrase Ɔsom Sukuu ne Ɔsom Nhyiam hia ntɛm, nanso na n’adwuma bere nhyehyɛe mma onnya kwan nkɔ. Enti, ɔmaa ne yɔnko dwumayɛni bi sika ma ɔkɔyɛɛ ne de maa no sɛnea ɛbɛyɛ a obetumi akɔ nhyiam ahorow a ehia yi.

Anuanom pii a wɔwɔ yare a enni sabea no ntaa mma nhyiam mpa wɔn ti so. Wotie nhyiam dwumadi no wɔ telefon so anaa wɔkyere gu kasɛt so tie bere a wɔantumi ankɔ Ahenni Asa so no. Wɔda anisɔ kɛse adi wɔ Yehowa honhom mu nsiesiei a “akoa nokwafo ne ɔbadwemma” no de ma no ho! (Mateo 24:45) Kristofo a wɔhwɛ wɔn awofo a wɔanyinyin no da anisɔ ankasa adi sɛ onua anaa onuawa bi hwɛ ɔwofo no na otumi kɔ asafo nhyiam a.

Yɛ Nhyehyɛe To Hɔ!

Awofo a wɔn ani gye wɔn ankasa honhom fam nneɛma ho no boa wɔn mma ma wonya anisɔ ma Kristofo nhyiam. Mpɛn pii no, wɔhwɛ kwan sɛ wɔn mma bɛyɛ wɔn sukuu nnwuma a wɔde ama wɔn no ntɛm sen sɛ wɔbɛma aboaboa ano agu hɔ. Anwummere a wɔkɔ nhyiam no, wɔn mma no yɛ wɔn sukuu nnwuma bere a wofi sukuu ba pɛ no ara. Wɔmma kwan mma wɔmfa anigyede ne nnwuma foforo ntwitware asafo nhyiam mu.

Sɛ okunu ne agya no, so woma nhyiamkɔ hia wo kɛse? Sɛ ɔyere ne ɛna no, so woyɛ wo dwumadi ho nhyehyɛe to hɔ na ama woatumi akɔ nhyiam horow no? Sɛ abofra a wasi so no, so woma nhyiamkɔ ho hia wo sen sukuu mu dwumadi?

Asafo nhyiam yɛ nsiesiei a Yehowa fi ɔdɔ mu de ama. Ɛsɛ sɛ wobɔ mmɔden biara na wunya saa nhyehyɛe no mu kyɛfã. Yehowa behyira wo kɛse sɛ woyɛ nea ehia kan a!