Bet-El—Kurow a Egyee Din Pa ne Dimmɔne

NEA ɛma nkurow bi gye din kɛse—anaa enya dimmɔne—ne nsɛm a esisi wɔ hɔ. Nanso Bet-El de, ɛyɛ soronko efisɛ egyee din pa ne dimmɔne nyinaa bi. Tete agya Yakob na ɔtoo kurow no din Bet-El, a ɛkyerɛ ‘Onyankopɔn Fie.’ Nanso mfirihyia apem akyi no, odiyifo Hosea frɛɛ kurow no “Abusude Fie.” Ɛyɛɛ dɛn na kurow pa yi bɛyɛɛ kurow bɔne? Na dɛn na yebetumi asua afi n’abakɔsɛm mu?

Onyankopɔn nkurɔfo fii ase dii dwuma wɔ Bet-El wɔ 1943 A.Y.B. mu, bere a na Abraham da so te ase no. Saa bere no, na din a ɛda kurow no so ne Lus, edin a Kanaanfo dii kan de too hɔ no. Na ɛwɔ ɔman a ɛda bepɔw so no mu, wɔ Yerusalem atifi fam bɛyɛ kilomita 17. Yɛ Abraham ne ne wɔfase Lot a wogyina mmepɔw atenten a atwa Bet-El ho ahyia no atifi baabi a wotumi hu ade kɔ akyirikyiri a wɔrehwɛ asasetaw frɔmfrɔm a ɛwɔ Yordan Bon mu no ho mfonini wɔ w’adwenem hwɛ. Abraham fa anifere kwan so twe Lot adwene si sɛnea ɛyɛ den sɛ wobenya adidibea ama wɔn mmoa a wɔdɔɔso no so sɛ: “Mesrɛ wo, mma akasakasa mmma me ne wo ntam, ne me mmoahwɛfo ne wo mmoahwɛfo ntam, na yɛyɛ anuanom. Ɛnyɛ asase no nyinaa na ɛda w’anim yi? Mesrɛ wo, twe wo ho fi me ho, sɛ wofa benkum a, mɛfa nifa, na sɛ wofa nifa a, mɛfa benkum.”—Genesis 13:3-11.

Abraham anka sɛ kyinkyin ara a, ɔno na ɛsɛ sɛ odi kan yi nea ɔpɛ. Mmom no, ɔmaa okumaa no faa baabi a eye no. Yebetumi asuasua su pa a Abraham yii no adi no. Yebetumi asiw nsɛm a ebetumi akɔfa ɔham aba ano bere a yedi kan kɔ onii no hɔ ne no kɔkasa bɔkɔɔ, na yɛkwati pɛsɛmenkominya no.—Romafo 12:18.

Mfe bi akyi, bere a Abraham banana Yakob soɛɛ Lus no, ɔsoo dae soronko bi. Ohuu “antweri bi si fam a atifi pem soro, na hwɛ, Onyankopɔn abɔfo di so aforosian. Na hwɛ, [Yehowa, NW] gyina atifi.” (Genesis 28:11-19; fa toto Yohane 1:51 ho.) Ná dae no da biribi a ɛho hia adi. Ná abɔfo a Yakob huu wɔn no bɛsom no ama Onyankopɔn bɔ a ɔhyɛɛ no a ɛfa n’aseni ho no anya mmamu. Antweri no atifi a na Yehowa wɔ no kyerɛe sɛ ɔno na ɔbɛkyerɛ abɔfo no kwan wɔ saa adwuma yi mu.

Awerɛhyem a Yakob nyae sɛ Onyankopɔn bɛboa no yi kaa ne koma kɛse. Bere a n’ani so tetew no fii dae no mu no, ɔfrɛɛ hɔ Bet-El, a ɛkyerɛ ‘Onyankopɔn Fie,’ na ɔkaa Yehowa ntam sɛ: “Nea wobɛma me nyinaa, mɛma wo so ntotoso du du.”a (Genesis 28:20-22) Esiane sɛ ogye toom sɛ biribiara a ɔwɔ no fi Nyankopɔn hɔ nti, onyaa ɔpɛ sɛ ɔbɛsan de fã bi a ɛdɔɔso ama de akyerɛ ho anisɔ.

Ɛnnɛ nso, abɔfo resom Kristofo. (Dwom 91:11; Hebrifo 1:14) Wɔn nso betumi akyerɛ nhyira a wɔanya no nyinaa ho anisɔ denam “ase a wɔda Onyankopɔn bebree no so.”—2 Korintofo 9:11, 12.

Bere kɔɔ so no, Yakob asefo bɛyɛɛ ɔman. Wɔn kannifo Yosua dii Bet-El hene bosonsomni no so nkonim ntɛm, bere a wɔreko afa Kanaan nsase no. (Yosua 12:16) Wɔ Atemmufo no bere so no, na odiyifobea Debora te bɛn Bet-El, na ofi hɔ kaa Yehowa asɛm kyerɛɛ nkurɔfo no. Bere a Samuel nso yɛ Israel man no temmufo no, na ɔtaa kɔsra Bet-El.—Atemmufo 4:4, 5; 1 Samuel 7:15, 16.

Bet-El Bɛyɛɛ Awaefo Atrae Titiriw

Nanso bere a Ahenni no mu kyɛe wɔ 997 A.Y.B. mu no, ɔsom kronn a na ɛkɔ so wɔ Bet-El no gyaee. Ɔhene Yeroboam maa Bet-El yɛɛ baabi a nantwi ba som kɔ so, a na wɔkyerɛ sɛ nantwi ba no gyina hɔ ma Yehowa. (1 Ahene 12:25-29) Ɛno nti na bere a Hosea rehyɛ Bet-El sɛe ho nkɔm no, ɔfrɛɛ no “Bet-Awen” a ɛkyerɛ “Abusude Fie” no.—Hosea 10:5, 8.

Ɛwom sɛ na Bet-El abɛyɛ baabi a honhom fam abusude kɔ so wɔ hɔ de, nanso nsɛm a esisii wɔ hɔ no kɔɔ so yɛɛ asuade a ɛho hia. (Romafo 15:4) Yenya asuade a ɛte saa no biako fi odiyifo bi a wɔammɔ ne din a wɔsomaa no fii Yuda kɔɔ Bet-El sɛ ɔnkɔhyɛ ɛhɔ afɔremuka ne asɔfo no sɛe ho nkɔm no mu. Yehowa ka kyerɛɛ no nso sɛ ɔnsan nkɔ Yuda—a ɛyɛ kilomita kakraa bi wɔ anafo fam no—bere a onnidi anaa ɔnnom. Odiyifo yi de akokoduru hyɛɛ nkɔm wɔ Israel hene Yerobeam anim, kaa mmusu guu Bet-El afɔremuka no so. Nanso ɔyɛɛ asoɔden tiaa Nyankopɔn bere a odidii wɔ odiyifo akwakoraa bi fie no. Dɛn nti na ɔyɛɛ saa? Odiyifo akwakoraa no dii atoro kae sɛ Yehowa bɔfo aka akyerɛ no sɛ ɔnsom ne yɔnko diyifo no hɔho. Asoɔden a odiyifo a ofi Yuda no yɛe no kowiee ɔpatuwu mu.—1 Ahene 13:1-25.

Sɛ yɛn yɔnko gyidini bi ka sɛ yɛnyɛ biribi a yehu sɛ asɛm wɔ ho a, dɛn na ɛsɛ sɛ yɛyɛ? Kae sɛ sɛ afotu bi nye a, ɛmfa ho sɛ wofi adwempa mu na ɛde ma no, asiane wom. (Fa toto Mateo 16:21-23 ho.) Sɛ yɛnam mpaebɔ so hwehwɛ Yehowa akwankyerɛ, na yesua N’asɛm a, yɛbɛkwati mfomso a anibere wom a odiyifo a wɔammɔ ne din no yɛe no.—Mmebusɛm 19:21; 1 Yohane 4:1.

Bɛyɛ mfirihyia 150 akyi no, odiyifo Amos nso tuu kwan kɔɔ atifi fam kɔhyɛɛ nkɔm tiaa Bet-El. Amos kaa atemmusɛm a emu yɛ den tiaa n’atiefo asɔretiafo no, na na ɔsɔfo Amasia a ofi ahantan mu ka kyerɛɛ Amos sɛ ‘ɔmmɔ ne ho aguaa nkɔ Yuda asase so’ no ka ho. Nanso Amos de akokoduru kaa amanehunu a na ɛbɛba ɔsɔfo Amasia ankasa fie so no kyerɛɛ no. (Amos 5:4-6; 7:10-17) Ne nhwɛso no kae yɛn sɛ Yehowa betumi ama n’asomfo ahobrɛasefo akokoduru.—1 Korintofo 1:26, 27.

Bere kɔɔ so no, Yudani nokwafo Ɔhene Yosia dwiriw ‘afɔremuka a na ɛwɔ Bet-El no gui, na ɔhyew sorɔnsorɔmmea no yam no pasaa sɛ mfutuma, na ɔhyew Asera nnua no.’ (2 Ahene 23:15, 16) Wɔn a wɔyɛ mpanyimfo nnɛ no betumi asuasua ne nhwɛso fɛfɛ no, adi Onyankopɔn ahyɛde so awie, na wɔadi anim ahwɛ ama asafo no ho atew.

Nsɛm a esisii wɔ Bet-El abakɔsɛm mu yi kyerɛ nea efi adetreneeyɛ ne amumɔyɛ mu ba, nea efi osetie a wɔyɛ ma Yehowa ne asoɔden a wɔyɛ tia no mu ba no mu fefeefe. Mfe bi a etwaam no, na Mose de nneɛma abien yi asi Israel man no anim sɛ wonyi biako: “Mede nkwa ne papa ɛne owu ne bɔne masi w’anim.” (Deuteronomium 30:15, 16) Bet-El abakɔsɛm a yebedwennwen ho no bɛhyɛ yɛn nkuran ma yɛayɛ yɛn ade sɛ wɔn a wɔwɔ ‘Onyankopɔn Fie,’ baabi a nokware som kɔ so, sen sɛ yɛbɛyɛ sɛ wɔn a wɔwɔ “Abusude Fie.”

[Ase hɔ asɛm]

[Kratafa 23 mfonini]

Baabi a na Bet-El wɔ no amamfõ so, baabi a Yerobeam yɛ maa nantwi ba som kɔɔ so no