Awoda A Wodi​—Ɛyɛɛ Dɛn Na Efii Ase?

OBI A wagye din dii n’awoda a ɛto so 70 nnansa yi​—nanso wamfrɛ no saa. Ɔkae sɛ: “Ɛyɛ m’awoda a ɛto so 39 ho afahyɛ a ɛto so 31.”

Ɛnyɛ nnipa nyinaa na wɔte nka saa wo awoda ho. Abofra ketewaa Johnny de ahopere bɛhwɛ da no, ne keeki anaasɛ ɔfam, kyɛnerɛ ne akyɛde ahorow kwan. Ɛnã nso, wɔ akwan foforo so no, rempɛ sɛ wɔbɛkae no ne mfe a wadi.

Nnipa binom mpo pow sɛ wobedi wɔn awoda esiane ahonim nti. So ɛno yɛ nwonwa? Nokwarem, sɛ ná woka Kristofo asafo a edii kan no ho a, anka wobɛpow sɛ wubedi wo awoda.

“Ɛwom sɛ da a wɔde woo obi a wɔhyɛ ho fã yɛ nea na tetefo no taa yɛ de, nanso Kristofo no ani annye ho fi mfiase,” saa na William S. Walsh ka wɔ ne nhoma Curiosities of Popular Customs no mu. Abakɔsɛm kyerɛwfo Walsh kɔ so kyerɛ fi tete Kristofo nkyerɛwee no mu fa asɛm no ho, sɛ: “Enti Origen reka Leviticus 12:2 ho asɛm no, osii so dua kyerɛɛ n’atiefo no sɛ ‘ahotefo no biara nni hɔ a wobetumi ahu no sɛ ɔtow pon anaasɛ ɔhyɛɛ fã wɔ n’awoda ho, anaasɛ ogyee n’ani wɔ da a wɔwoo ne babarima anaa ne babea no ho. Nanso abɔnefo ani gye na wodi ahurusi wɔ saa nna no mu.’”

Ɛhe na na tete Kristofo no ani a ennye awoda ho no fi? Ebi fi Yudafo no. “Wɔ Bible mu no wanka awoda a wodi biara ho asɛm wɔ Yudafo no mu,” saa na M’Clintock and Strong Cyclopædia no da no adi, ɛde ka ho sɛ: “Nokwarem no, anyɛ yiye koraa no, akyiri yi Yudafo no buu awodadi sɛ ɛyɛ abosonsom fã.”

Awoda ne Nsoromma mu Hwɛ

Nanso, ná tete Kristofo no wɔ wɔn ankasa ntease ahorow nti a wɔanni awoda. Saa bere no na awoda ne abosonsom wɔ nkitahodi a emu yɛ den a wonhu no kɛse nnɛ. “Amanne a ɛne awoda a wɔhyɛ ho fã yɛ nea wɔde atõa . . . tete nyamesom mu nnyinasosɛm ahorow bi mu sɛnea ɛte no,” saa na Encyclopaedia of Religion and Ethics no da na adi. Nnyinasosɛm ahorow bɛn?

Ahonhonsɛmdi yɛ biako. “Ná Helafo no gye di sɛ obiara wɔ honhom anaasɛ daemon a ɛbɔ ne ho ban, a ɛboa ma wɔwo no na ɛhwɛ no so wɔ asetra mu. Ná honhom yi ne onyame a n’awoda na wɔwoo onipa ko no wɔ honhom mu nkitahodi. Romafo no nso gyee saa nsusuwii yi dii. Wɔfrɛɛ honhom no genius.” Wokuraa adwene a ɛnteɛ yi ma wɔ adesamma gyidi mu, na ɛda adi wɔ ahobammɔ bɔfo, ne ahonhom afoforo a wɔtete saa no mu.”​—The Lore of Birthdays, Ralph ne Adelin Linton.

Ade foforo nti a tete Kristofo no twee wɔn ho fii awodadi ho ne nsoromma mu hwɛ a na ɛbata ho no. Ralph ne Adelin Linton se: “Na awodadi ho kyerɛwtohɔ a wɔyɛ no ho hia titiriw wɔ tete bere no mu esiane sɛ na bere a wɔde woo obi no ho hia ma wɔde ahwɛ nsoromma mu.” Wɔ tete Kristofo no fam no na nsoromma mu hwɛ ne Apueifam nyamesom ahorow, Romafo Stoiksom ne Gnosfo adwene a akyinkyim no na ɛnam. Kristofo ampɛ sɛ wɔde wɔn ho bɛhyɛ ɛno mu!

Nsakrae wɔ Asɔre Su Mu

Awiei koraa no asɔre a din no da wɔn so kwa no adwene wɔ awodadi ho no sakrae. Adɛn? Ɛnyɛ nwonwa, efisɛ asɔre no su wɔ Roma wiase no ho nyinaa sakrae, bere a ɔtaa gyaee wɔ Ɔhempɔn Konstantino ase no. Kristosom a na edin no ara kwa na ɛda so a na afi asomafo no de no ho no bɛyɛɛ ɔman som. Afei dɛn na ɛbaa n’ani a na kan ennye biribiara a ɛyɛ abosonsomfo de ho no so?

Henry J. Vandyke a na ɔyɛ ɔsɔfo wɔ afeha a ɛto so 19 no mu kyerɛwee sɛ, bere a asɔre no “fii ɔtaa no mu benyaa ɔhene no domno, efii adwene a ɛba fam a ɛne asɔre a wogye no fi wiase no mu no so baa adwene a ɛkorɔn a ɛne wiase a ɛsɛ sɛ wogye no denam asɔre no som adwuma so no so.”

Dɛn na efii nsusuwii a ɛte sɛɛ a ennyina kyerɛwsɛm so no mu bae? “Afei ɛne sɛ, obuee ne komam maa ɔsom a ɛyɛ ɔdesani de, afei ofii ase twe bɛn nea ɛbɛma wɔahu Yesu sɛ ɔdesani na wɔde anigye ne ahopere hwehwɛɛ da a wɔde woo No, na ama wɔayɛ no kronkron.” Sɛ wobetumi adi Yesu awoda a, ɛnde awoda afoforo a aka no nso ɛ? William Walsh kyerɛ mu sɛ: “Kristo Awoda a wodii na ɛsan de nnipa afoforo a aka awodadi bae.”

So Ɛfa Ho Nnɛ?

Eyinom nyinaa sisii mfehaha pii a atwam ni. Dɛn nti na ɛsɛ sɛ ɛkã awoda a wodi nnɛ? Wiɛ, sɛ afeha a edi kan Kristofo no anni wɔn ankasa anaasɛ Yesu awoda a, dɛn nti na ɛnsɛ sɛ nokware Kristofo a wɔwɔ hɔ nnɛ di wɔn nhwɛso no akyi?

Ebia ebinom bebisa sɛ ‘Nanso so ɛno nyɛ adeyɛ a ɛtra so, a ɛyɛ katee mpo? Na bɔne bɛn koraa mpo na ɛwɔ awodadi apontow ho? Ahonhonsɛmdi anaa nsoromma mu hwɛ ‘biara nni mu nnɛ.’

Nea ɛyɛ anigye no, nneɛma pii a wommu no hwee wɔ awodadi mu nnɛ no kura tete nyamesom amanne ahorow mu ara. Ralph ne Adelin Linton se: “Amanne a ɛne kyɛnerɛ a wɔsɔ wɔ keeki anaa ɔfam so no fii ase wɔ Helafo no so.” “Philochorus [tete Helani abakɔsɛm kyerɛwfo] kyerɛw sɛ da a ɛto so asia wɔ ɔsram biara mu, a ɛyɛ Artemis, ɔsram ne ahayɔ nyamewaa no awoda no, wɔde ɛwo keeki nkuruwankuruwa te sɛ ɔsram ne kyɛnerɛ a wɔasɔ kosi onyamewaa yi asɔrefi afɔremuka no so.”

Dɛn na kyɛnerɛ no kyerɛ? Asɛm koro no ara kyerɛ sɛ: “Awoda kyɛnerɛ, wɔ tete gyidi mu no yɛ nea wɔde suman titiriw bi ka ho a wɔde frɛ yiye . . . Kyɛnerɛ a wɔasɔ ne ogya ahorow a wɔde bɔ afɔre ayɛ nea ɛkyerɛ biribi titiriw wɔ honhom mu fi bere a onipa dii kan sii afɔremuka maa n’anyame. Enti, awoda kyɛnerɛ yɛ nidi ne nkamfo ma nea ɔredi awoda no na ɛde siade ba.”

Na nkyia a wɔde kyia obi a ɔredi n’awoda sɛ “Afirihyia Pa” no nso ɛ? The Lore of Birthdays no se: “Awoda nkyia ahorow ne anigye a wɔsrɛ ma no yɛ afahyɛ no fã titiriw. . . . mfitiase no wonyaa adwene no fii ntafoayi mu. Kabere ahorow a wɔde yɛ papa ne bɔne ne ade titirirw a abayifo de di dwuma. Onipa no wɔ saa tumi no nkɛntɛnso ase da a ɔredi n’awoda no, bere a onipa no honhom no wɔ hɔ saa bere no. Awoda nkyia ahorow no wɔ papa anaa bɔne tumi efisɛ onipa no bɛn honhom wiase no saa da yi.”​—Kratafa 20.

So ɛno kyerɛ sɛ Kristofo ntumi mfa wɔn ho nhyɛ amanne biara a ebia efi atoro nyamesom nneyɛe ahorow mu mu? Dabi. Ebia nneɛma ahorow pii a wɔtaa yɛ no fi mmeae a ɛtete saa. Na sɛ amanne a wɔyɛ, sɛnea wɔde aba nnɛyi de mu no, ne Bible nnyinasosɛm bɔ abira a, ɛnde na ɛsɛ sɛ nokware Kristofo fi ahonim mu pow sɛ wɔde wɔn ho bɛhyɛ mu.

Anuonyam a Obi Hye Ne Ho

Ralph ne Adelin Linton kyerɛ sɛ awodadi nte sɛ nnapɔnna afoforo no, efisɛ ɛyɛ bere a “akyɛde ahorow ne papa a wɔsrɛ no nyinaa yɛ obiakofo de. Awoda keeki anaa ɔfam, a wɔde nneɛma a ɛyɛ dɛ afa ho ne kyɛnerɛ a ɛhyerɛn no yɛ nea wɔde hyɛ obi anuonyam. Nnapɔnna afoforo no kanyan koma no, nanso awoda ma onipa no ma ne ho so.”

So ɛyɛ adwempa ma Kristofo sɛ wɔde wɔn ho bɛhyɛ afahyɛ a ‘ɛma onipa no ma ne ho so’ mu? Ɔrekasa akyerɛ Farisifo ahantanfo no, Yesu bɔɔ kɔkɔ sɛ “obiara a ɔbɛma ne ho so no, wɔbɛbrɛ no ase; na obiara ɔbɛbrɛ ne ho ase no, wɔbɛma no so.” (Mateo 23:12) Obi ho so a ɔbɛma pii no betumi akowie animguase mu wɔ Onyankopɔn nsam. Ɔsomafo Paulo de afotu no mae sɛ: “Mommma yɛmmpɛ anuonyanhunu.”​—Galatifo 5:26.

Ebia ebinom bɛka sɛ, ‘Nanso dɛn nti na yɛde yɛn ani asi ade ketewaa te sɛ awodadi so saa? Efisɛ Kristofo gye di sɛ Bible nnyinasosɛm “nea odi ade ketewaa mu nokware no di pii mu nokware” no di dwuma wɔ ha.​—Luka 16:10.

Afei nso, bere a ebia awodadi apontow bɛyɛ “ade ketewaa” no, nnyinasosɛm kɛse bi ho asɛm wom. Afeha a ɛto so anan asɔre no fii ase gyee awodadi toom bere a wayɛ nsakrae kɛse bi wɔ ne nsusuwii mu akyi ansa. Sɛnea yehui wɔ kratafa 20 no, ɔsɔfo Vandyke kaa Kyerɛwsɛm mu nnyinasosɛm sɛ Kristofo asɔre no ‘nyɛ wiase no fã’ no ho asɛm sɛ “adwene a ɛba fam.” Nanso Kristofo a wɔn gyidi gyina Bible no so ntumi nnye adwene a ɛte sɛɛ ntom!

Baabiara nni hɔ a Kyerɛwnsɛm no ma asɔre no kwan sɛ ɛmpow Yesu asɛm sɛ “monyɛ wiase no fã, na mmom mapaw mo mafi wiase” no. (Yohane 15:19, NW) Ɛhe na asɔre no nyaa tumi de pow Yesu asɛm no sɛ “adwene a ɛba fam” kodii nea wɔkyerɛ sɛ ɛyɛ “adwene a ɛkorɔn” a ɛne sɛ ɛsɛ sɛ asɔre no bɛyɛ wiase no fã, na mmom mapaw mo mafi wiase”

Yakobo nhoma a ɛwɔ Bible mu no ka no anibere so sɛ: “Awaresɛefo, munnim sɛ wiase adamfofa ne ɔtan a wɔtan Onyankopɔn? Enti obiara a ɔpɛ sɛ ɔyɛ wiase adamfo no gyina hɔ sɛ Onyankopɔn tamfo.” (Yakobo 4:4) So ɛte sɛnea ebia asɔre no betumi agye wiase no denam ne fã a ɛbɛba abɛyɛ na ɛde ne ho ahyɛ n’amanne ahorow mu so anaa?

Biribi a Eye

Ɛwom sɛ wɔwo abofra a ɛyɛ bere a ɛyɛ anigye de, nanso Bible no kyerɛkyerɛ mu wɔ asɛm a ɛyɛ anigye yi mu: “Din pa ye sen ngo pa, na owuda ye sen awoda.” (Ɔsɛnkafo 7:1) Ɛbɛyɛ dɛn na atumi aba saa?

Wɔ awo mu no, yɛn nyinaa anya sintɔ ne bɔne afi yɛn nana Adam ne Hawa hɔ. Wɔwo yɛn a yenni Onyankopɔn dom a nea ɛda yɛn anim ne nkwa tiaa a ɔhaw ahyɛ no ma ne afei owu.​—Hiob 14:1-4; Romafo 5:12.

Ɛwom sɛ, sɛ yɛbɛka a, wɔawo yɛn nyinaa wɔ Onyankopɔn abufuw ase de, nanso tebea no nyɛ nea anidaso nni mu. Bible ɔkyerɛwfo Yohane kaa no sɛɛ se: “Nea ogye ɔba no di no wɔ daa nkwa; na nea ontie ɔba no renhu nkwa, na Onyankopɔn abufuw da no so.”​—Yohane 3:36.

Enti nkwa a ɛnyɛ pɛ a yenya fi awo mu no nyɛ nkwa ankasa koraa wɔ Onyankopɔn anim. Ɛno nti na “din” pa a yebenya wɔ Onyankopɔn anim no ho hia saa no! Sɛ obi de n’asetra ahwehwɛ “din” a ɛte sɛɛ a, ɛnde bere a asetra pa a ɛte sɛɛ aba awiei no, wobetumi aka ampa sɛ “owuda ye sen awoda.” Onipa a ɔte sɛɛ wɔ anidaso a ɛyɛ nokware sɛ ɔbɛsɔre abɛtra ase bio. (Yesaia 26:19) So ɛrenyɛ papa sɛ wobɛhwehwɛ Onyankopɔn, na wo ne no anya abusuabɔ pa mu anigye sen awoda a wubedi? Afei koraa mpo, yɛyɛ “huruhurow” wɔ n’ani so, a “eyi ne ho kakra na afei ɛyera.”​—Yakobo 4:14.

“Wonni . . . ”

Bere a Yehowa Adansefo no mu biako kasa kyerɛɛ abusua bi nnansa yi no, wɔbɔɔ no amanneɛ sɛ Adansefo afoforo te bɛn wɔn. Ɛyɛɛ dɛn na abusua no hui sɛ wɔyɛ Adansefo? Abofra biako kae sɛ, “Wonni!”

Ɔdansefo no gye toom sɛ: “Ɛyɛ ampa sɛ Yehowa Adansefo nni awoda anaa nnapɔnna nanso so ná wunim sɛ yehyiam mmere horow gye yɛn ani?”

Abofra no haahaa n’ani bisae sɛ, “Moyɛ saa?”

Yehowa Adansefo nhyɛ ntade atuntum ne nea wɔde nhwi na ayɛ. Pow a wɔpow sɛ wobedi awoda no fi ɔpɛ pa a wɔwɔ sɛ wɔbɛsɔ Onyankopɔn ani mu. Nea wobetumi ayɛ ara ne sɛ wɔbɛhyɛ no nsow, sɛnea Kristofo ahyɛ no nsow fi Origen bere so no, sɛ, awodadi abien a wɔbɔɔ din wɔ Bible mu no fa Misraim hene bi ne Herode Antipa, Roma hene bi, a na wɔn mu biara nyɛ Onyankopɔn somfo ho. Ɛyɛ nea ɛkyerɛ biribi nso, sɛ wɔ afahyɛ abien no biara ase no wokum onipa.​—Genesis 40:20-22; Mateo 14:6-11.

Nanso Yehowa Adansefo gye wɔn ani. Wɔn ani gye sɛ wɔne wɔn ho wɔn ho bɛbom agye wɔn ani wɔ bere a ɛfata mu. Wɔbom hwɛ daa nkwa a ɛba wɔ Onyankopɔn ahenni ase no kwan. (Mateo 6:9, 10; Adiyisɛm 21:3, 4) Wogye di sɛ ɛbere no reba a wɔrenwo mmofra mma wiase bi a ɔhaw ne awerɛhow ahyɛ mu ma mu bio. Saa bere no, obiara a wɔwo no no betumi de ahotoso ahwɛ nkwa a ɛware kwan ma sɛ́ obebu bere a wɔde woo no ho akontaa bɛyɛ nea mfaso nni so. Ansa na ɛno bɛba no, Adansefo no dɔ a wɔdɔ nkwa ankasa, ne afei nso Onyankopɔn a wɔdɔ no no, ma ɛyɛ wɔn pɛ sɛ wɔbɛsɔ n’ani wɔ “ade ketewa” te sɛ wɔn su wɔ afahyɛ ahorow a ɛda so ara kura atoro som nneyɛe ahorow mu no mpo mu.