Faaitoitoraa taa ê te tahi i te tahi
1 Aita e mahana e mairi e eita te faaroo o te mau tavini a Iehova e tamatahia. No te mea e maa taime poto to ˈna e toe ra, te rave ra te Diabolo i ta ˈna aroraa hopea no te ofati i to ratou haapao maitai ia Iehova. (Apo. 12:12) Mea faufaa roa ‘ia itoito noa tatou i te Fatu, e i to ˈna ra puai rahi’ ia ‘tia hoi ia tatou ia patoi atu i te enemi, e tia roa aˈera ïa, ia mau â.’—Eph. 6:10, 13.
2 Te putuputuraa e to tatou mau taeae i roto i te faaroo, e faanahoraa ïa no ǒ mai ia Iehova ra no te tauturu mai ia itoito tatou. Ua taa i te aposetolo Paulo te faufaaraa o te reira. E hinaaro rahi to ˈna e amuimui e to ˈna mau hoa ia ‘mahanahana hoi ratou paatoa’ e ia “itoito.” (Roma 1:11, 12) No te faaitoito ia tatou ia faatupu i te hinaaro o te Atua, ua rave te Tino aratai i te tahi mau faanahoraa î i te here ia faufaahia ˈi tatou i te faaitoitoraa te tahi i te tahi i te tairururaa mataeinaa e haere maira, “Feia poro itoito rahi i te Basileia.”
3 Ia tae mai outou ia faufaahia outou: A faariro ei fa na outou te taeraa mai i na mahana e toru. E ‘maitaihia’ tatou ia tae atu tatou na mua ˈˈe i te himene matamua e ia faaea ˈtu e tae roa i te taime e parau ai tatou “amene” ma te haavare ore i te pure faaotiraa. (Isa. 48:17, 18) No reira, e tia i te rahiraa o tatou ia faanaho oioi roa i ta ratou ohipa ia vata ratou. Parau mau, e ere paha i te mea ohie ia ani i te tahi mahana faaearaa ohipa i ta outou paoti ohipa, tera râ, te haapapu maira Iehova e e tauturu mai oia ia rave tatou i to ˈna hinaaro. (Ioa. 1, 5:14, 15) Mai te peu e aitâ outou i haamata, teie ïa te taime no te faanaho maitai i te parau o te faurao e te nohoraa, eiaha e vaiiho noa mai tera. Ia papu ia tatou e e haamaitai Iehova i ta tatou mau tutavaraa ia tae tatou i tera na mahana tairururaa e toru.—Mas. 10:22.
4 Ia oaoa outou i te mau faaitoitoraa e horoahia mai: Aita anei outou i faarue aˈenei i te hoê tairururaa mataeinaa ma te parau e: “Tera te tairururaa maitai roa ˈˈe ta ˈu i fanaˈo!” No te aha teie manaˈo? No te mea ei taata tia ore, e rohirohi riirii tatou e e hinaaro tatou i te mau faaitoitoraa pae varua. (Isa. 40:30) Teie ta te hoê tuahine i faataa: “E haaparuparu teie faanahoraa ia ˈu, e e tauturu mai te mau tairururaa ia faatano faahou vau i to ˈu manaˈo i te mau mea pae varua ma te horoa mai i te turu ta ˈu e hinaaro ra. Mai te huru ra e e tae mai te faaitoitoraa i te taime iho â e hinaaro roa ˈi au i te reira.” Eita e ore e ua ite atoa outou i tera tupuraa.
5 E faaitoitohia tatou eiaha noa na roto i te mau oreroraa parau e te mau uiuiraa manaˈo, na roto atoa râ i te tahi atu mau tuhaa maitatai o ta tatou mau tairururaa. Teie ta te hoê taeae i parau: “O te faaohiparaa maramarama e te tauturu o te mau faaueraa tumu bibilia ta ˈu e au maitai. Parau mau, mea faufaa roa te mau darama no te faaite mai eaha te mau haapiiraa e huti mai na roto i te mau hiˈoraa maitatai e te mau hiˈoraa ino atoa no tahito ra. E tiai ru noa vau i te mau papai apî, ta ˈu e au noa i te taio e maoro i muri aˈe i te hoˈiraa i te fare.”
6 E faanahoraa faufaa roa te mau tairururaa no ǒ mai ia Iehova ra i teie anotau “ati rahi faaruru atâ.” (Tim. 2, 3:1, MN) E tauturu mai te reira ia haapao tatou i teie aˈoraa faauruahia: “E ara; ia mau papu i te faaroo, e faataata paari outou, e faaitoito.” (Kor. 1, 16:13) No reira, e faaoti papu anaˈe e haere i te mau rururaa atoa e e faaitoito te tahi i te tahi i ta tatou tairururaa mataeinaa “Feia poro itoito rahi i te Basileia”!
[Tumu parau tarenihia i te api 3]
A faanaho ia outou ia tae mai i na mahana e toru
■ A ani i te tahi mahana faaearaa ohipa i ta outou paoti ohipa.
■ A faataa i te tahi nohoraa i te vahi e tupu ai te tairururaa.
■ A faanaho i te faurao no te haere i te tairururaa.