Jtʼuntik te bin la spas

1, 2. ¿Bin ejemplo ya skoltayotik yuʼun ya xkʼot ta koʼtantik te bin ya yal te 1 Pedro 2:21?

JNOP KAʼIYTIK te tsobol ya xbootik ta paxial ta jun wits te banti ay bayal ajchʼal. Pero te machʼa ya swolotik chikan ya xjil señail yok te banti ya xkʼaxe. Pero teme chʼay ta jsitik te ban bajte, ma xiwotik, melel jaʼ ya jtʼuntik bael te señail yoke.

² Te j-abatotik yuʼun te Dios jich kʼoem te yakotik ta beel ta balumilal ini, te kʼax chujkultik sbae. Pero te Jehová yakʼoj jtul jwolwanej, jaʼ te Jesucristo yuʼun jich ya jtʼunbeytik bael te ban ya xkʼaxe (1 Ped. 2:21). Ay jun libro te banti la yal te bitʼil te Pedro la spajaltaybey skʼoplal te Jesús jich bitʼil jtul jwolwanej. Jich bitʼil te machʼa ya xbajt ta paxial jaʼ ya stʼun te machʼa ya xwolot yuʼun jaʼnix jichotik jaʼ ya jtʼuntik te ban ya xbajt te Jesús. Jich yuʼun, ¿bin-a te ya jtʼuntike? ¿Bin yuʼun ya skʼan ya jtʼuntik? Sok ¿bin-utʼil ya jpastik?

 3. ¿Bin ya skʼan ya yal te ay machʼa ya jtʼuntik?

³ ¿Bin ya skʼan ya yal te ay machʼa ya jtʼuntik? Ta Biblia ya stuuntes te kʼopil beel sok okil jaʼ ya skʼan ya yal te ay machʼa ay bin ya spas ta skuxlejal (Gén. 6:9; Prov. 4:26). Te bin ya spas ta skuxlejal jtul ants winik jaʼ ya xjuʼ ya jpajtik sok te kʼalal ya xbeen sok te señail yok ya yijkitay. Jaʼ yuʼun te kʼalal ya kaltik te ay machʼa ya jtʼuntik jaʼ ya skʼan ya yal te ya jtʼuntik te bin ya spas sok te ya jkʼayinbeytik stalel.

 4. ¿Bin ya skʼan ya yal te ya jtʼuntik te Jesús?

⁴ ¿Bin ya skʼan ya yal te ya jtʼuntik te Jesús? Jaʼ te ya jtʼunbeytik te stalele. Te jpuk-kʼop Pedro la yal ta swenta te Jesús te la yakʼbotik jilel jun lekil ejemplo ta swenta te kujch yuʼun te swokol. Pero ay yantikxan te bin-utʼil ya xjuʼ ya jkʼayinbeytik te stalele (1 Ped. 2:18-25). Te bin la spas sok te bin la yal te Jesús jaʼ ejemplo kuʼuntik.

 5. Chola kaʼiytik bin yuʼun te ya xjuʼ ya jkʼayinbeytik stalel te Jesús manchukme jmulawilotik.

⁵ Pero ¿yabal xjuʼ ya jtʼuntik te Jesús te bitʼil jmulawilotike? Yak, te Pedro ma la yal te ya jtʼuntik te Jesús ta stojilal, te bin la yale jaʼ te junuk koʼtantik ya jtʼuntik. Teme ya jtʼuntik te bin la spas chikan ban kʼalal ya xjuʼ kuʼuntik yakotik ta spasel te bin la yal te jpuk-kʼop Juan te ya jpastik te bin la spas te Jesús (1 Juan 2:6).

6, 7. ¿Bin yuʼun ya xnoptsajotikxan ta stojol te Jehová te kʼalal ya jkʼayinbeytik stalel te Jesús?

⁶ Teme ya jtʼuntik te bin la spas te Jesús ya xnoptsajotik ta stojol te Jehová. ¿Binwan yuʼun? Ta sbabial, te Jesús la yijkitaybotik jun lekil ejemplo te bin-utʼil ya skʼan ya xkuxinotik te ya smulan te Dios (Juan 8:29). Ya x-akʼbot stseʼelil yoʼtan te Jehová teme ya jpastik te bin la spas te Jesús sok ya xnoptsaj ta stojol te machʼatik ya spasik tulan yuʼun ya yamigoinik (Sant. 4:8).

⁷ Ta schebal, te Jesús la skʼayinbey ta lek stalel te sTat, jaʼ yuʼun jich la yal: «Te machʼa yilojonix, ha nix yilojix te Tatile» (Juan 14:9). Te kʼalal ya jkʼayinbeytik stalel te Jehová, jaʼ yakotik ta skʼayinbeyel stalel te Jesús te la yakʼ ta ilel slekil yoʼtan te kʼalal la slekubtes te machʼa ay skʼaʼel chamel, te la yakʼbey yil yutsil yoʼtan te ants te ay ta tulan chamel sok te la snaʼbey yoʼbolil sba te machʼatik ay machʼa laj yuʼunike (Mar. 1:40, 41; 5:25-34; Juan 11:33-35). Teme ya jpastik tulan yuʼun ya jkʼayinbeytik stalel te Jehová jich nopolxan ya kaʼiy jbatik ta stojol.

 8. Chola kaʼiytik te bin yuʼun te kʼalal ya jtʼuntik te bin la spas te Jesús ya skoltayotik ta stsalel te balumilal.

⁸ Teme ya jtʼuntik te Jesús maba ya schʼaytesbotik koʼtantik te chopol balumilal ini. Te kʼalal junxanix ajkʼabal ay ta Balumilal-a te Jesús jich la yal: «La jtsalix te bahlumilale» (Juan 16:33). Te bin la skʼan la yal jaʼ te ma jaʼuk bajt ta yoʼtan spasel te bin ya skʼan te balumilal ma la yakʼ te ya xjelbot te bin snopoj ya spas, te spensar sok te bin yilel te stalele. Ma chʼay ta yoʼtan bin yuʼun tal ta Balumilal jaʼ tal yakʼ ta chʼultesbeyel sbiil te Jehová. ¿Bin ya jpastik te joʼotike? Ay bayal te bin ya xjuʼ ya schʼaytesbotik koʼtantik, pero teme jaʼ ya xbajt ta koʼtantik spasbeyel te skʼanojel yoʼtan te Jehová jich bitʼil la spas te Jesús, jaʼnix jich te joʼotik ya xjuʼ ya jtsaltik te balumilal (1 Juan 5:5).

 9. ¿Bin ya skʼan ya jpastik yuʼun ya jtatik te kuxlejalil ta sbajtelkʼinal?

⁹ Teme ya jtʼuntik te bin la spas te Jesús yame jtatik kuxlejalil ta sbajtelkʼinal. Jtul jkʼulej kerem la sjojkʼoybey te Jesús te bin ya skʼan ya spas yuʼun ya sta te kuxlejalil ta sbajtelkʼinal, te Jesús jich la yal: «Laʼ, tʼunawon» (Mat. 19:16-21). Te Jesús la yalbey te judioetik te ma schʼuunik-a te jaʼ te Cristo, jich la yal: «Te tuminchijetic cuʼun [...] ya stʼunonic; soc hoʼon ya caʼbe scuxlejalic sbahtel qʼuinal» (Juan 10:24-29). Te Jesús la yalbey te Nicodemo te ay yaʼtel ta Sanedrín teme ya yakʼ schʼuunel yoʼtanik ta stojol ya staik kuxlejalil ta sbajtelkʼinal (Juan 3:16). Ya kakʼtik ta ilel te ay schʼuunel koʼtantik ta stojol te Jesús teme ya jpas ta jkuxlejaltik te bin la yal sok te bin la spase, teme jich ya jpastik yame jtatik te kuxlejalil ta sbajtelkʼinal (Mat. 7:14).

10. Jich bitʼil ya yal te Juan 17:3, ¿bin ya skʼan ya jpastik yuʼun ya jnaʼbeytikxan sba ta lek te Jesús?

¹⁰ Te bin nail ya skʼan ya jpastik jaʼ te ya jnaʼbeytik sba ta lek te Jesuse (kʼopona Juan 17:3). Ma orauknax te ya jnaʼbeytik sba ta lek te Jesús. Ya skʼan ya jnopbeytik te taleliletik yuʼun, te spensar sok te mantaliletik yuʼune. Chikan jayebix tiempo te ayotik ta skʼop Dios ya skʼan ya jpastik tulan yuʼun ya jnaʼbeytikxan sba te Jehová sok te sNichʼane.

11. ¿Bin ya jtatik ta chaneb Ebanjelioetik?

¹¹ Kʼax kʼuxotik ta yoʼtan te Jehová te la yakʼ ta tsʼibayel te chaneb Ebanjelioetik yuʼun ya jnaʼbeytikxan sba te sNichʼane. Tey ya yal-a te bin la spas ta skuxlejal te Jesús te kʼalal la schol skʼop Dios, soknix ya yalbotik te bin la yal, te bin la spas sok te bin yaʼiyel la yaʼiy sba. Te chaneb libroetik ini ya skoltayotik yuʼun ya jnopilantik ta swenta te ejemplo yuʼune (Heb. 12:3). Teme ya jkʼopontik te Ebanjelioetik jich ya xjuʼ ya jnaʼbeytikxan sba ta lek sok ya jkʼayinbeytik te bin la spase.

12. ¿Bin ya skʼan ya jpastik yuʼun ya xkʼotxan ta koʼtantik te bin ya yal te Ebanjelioetik?

¹² Ma tikʼuknax-a te ya jkʼopontik te Ebanjelioetik, ya skʼan ya jlokʼestik tiempo yuʼun ya jnopilan ta koʼtantik te bin ya jkʼopontike (paja sok Josué 1:8). Kiltik bin chaʼchajp ya skoltayotik yuʼun ya jnopilan ta koʼtantik sok te yakuk jpas ta jkuxlejaltik.

13. ¿Bin ya skoltayotik yuʼun ya xkʼotxan ta koʼtantik te bin ya yal te Ebanjelioetik?

¹³ Sbabial, ayukotik ta yilel koem te bin ya jkʼopontik ta Ebanjelioetik. Jnop kaʼiytik te yakotik ta yilel sok ta yaʼiyel te bin yak ta kʼoel ta pasele. Ya xjuʼ ya jletik informasion ta publikasionetik te yakʼojbotik te organisasion yuʼun Jehová sok akʼa kiltik ta lek te bintik smakojbey skʼoplal te bin yakotik ta snopele. Akʼa jlebeytik skʼoplal te ants winiketik, te lugaretik, te bin kʼot ta pasel ta nail sok ta patil. Teme yakotik ta skʼoponel jun relato te ay ta yan Ebanjelio akʼa jpajbeytik skʼoplal yuʼun jich ya kiltik-a teme ay bin la yotses o ma la yotses te machʼa la stsʼibaye.

14, 15. ¿Bin ya skʼan ya jpastik te kʼalal ya jkʼopontik te Ebanjelioetik?

¹⁴ Schebal, jpas ta jkuxlejaltik te bin ya yal ta Ebanjelioetik. (Juan 13:17). Te kʼalal lajix jkʼoponbeltik jun relato ta Ebanjelio, akʼa jojkʼoybey jbatik: «¿Bin ya yakʼ jnop te bin la jkʼopon? ¿Bin-utʼil ya xjuʼ ya jtuuntes yuʼun ya jkoltay-a te yantik?». Akʼa jnoptik kaʼiytik te machʼa ya xtuun yuʼun te bin la jkʼopontik, teme yorailix ya kiltik-ae akʼa kalbeytik sok yutsil koʼtantik te bin la jnoptik.

¹⁵ Kiltik jun ejemplo ta swenta te bin-utʼil ya skʼan ya jpastik te bin chaʼchajp la kilbeytik skʼoplale. Ya jnopbeytik skʼoplal te meʼba ants te ilot ta templo yuʼun te Jesús.

16. Cholbeya skʼoplal te bin ya yal te Marcos 12:41.

¹⁶ Ayukotik ta yilel kʼoem te relato (kʼopona Marcos 12:41). Kiltik te bin yak ta kʼoel ta pasel. Jaʼ 11 yuʼun nisan ta jaʼbil 33 te junxanix semana ya skʼan ya xlaj-a te Jesús te baem ta yoʼtan nojpteswanej ta templo. Te jwolwanejetik yuʼun te relijion yakik ta spasel ta prueba te Jesús, ya yalbeyik te machʼa akʼbot yaʼtel ta ajwalil sok ya spasbeyik jojkʼoyeletik yuʼun ya skʼan ya smilik (Mar. 11:27-33; 12:13-34). Te Jesús bajt snajkan sba te banti ya yil te bitʼil ya yichʼ akʼel te majtan takʼin sok jajch yil te bin-utʼil ya yakʼ smajtan takʼinik te ants winiketik. Ay jkʼulejetik te ya yakʼ bayal stakʼinik sok yaniwan yaʼiy stojol te Jesús te bin-utʼil ya xko ta yawil te takʼine.

17. ¿Bin la spas te meʼba ants te ya yichʼ alel ta Marcos 12:42?

¹⁷ (Kʼopona Marcos 12:42). Ta patil te Jesús la yil «jtuhl pobre meʼbaʼ ants» (Luc. 21:2). Wokolniwan yak ta kuxinel melel maʼyuk stakʼin. Manchukme jich-abi la yakʼ chaʼsejp majtan takʼin te maniwan chikan kʼot ta yawil. Pero te Jesús la snaʼ stukel te la yakʼ chaʼsejp leptonetik te jaʼ jun takʼin te maʼyuk bin ya xjuʼ ta manel-a. Te takʼin-abi ma xjuʼ ta manel jkojt chʼin mut-a te kʼax pekʼel stojol te ya stuuntesik yuʼun ya yichʼ weʼel.

18. Jich bitʼil la yal ta Marcos 12:43, 44, ¿bin la yal te Jesús ta swenta te majtan takʼin la yakʼ te meʼba antse?

¹⁸ (Kʼopona Marcos 12:43, 44). Te Jesús chamnax yoʼtan yuʼun te bin la spas te meʼba antse, jaʼ yuʼun la yikʼ tal te jnopojeletik, jich la yaltiklanbey: «Te pobre meʼbaʼ ants ini cʼax hich la yacʼ a te bin utʼil la yaqʼuic spisil te yantique» sok jich la yalxan: «Como spisilic la yaqʼuic te sobra yuʼunique, yan te ants ini, aunque pobre, la yacʼ spisil te bin ya xcuxaj ahe». Te kʼalal jich la spas te meʼba ants la yakʼ ta ilel te ay smukʼul yoʼtan ta stojol te Jehová (Sal. 26:3).

19. ¿Bin ya yakʼ jnoptik te bin la yal te Jesús ta swenta te meʼba antse?

¹⁹ Akʼa jpas ta jkuxlejaltik. Jojkʼoybey jbatik: «¿Bin ya xjuʼ ya jnop ta swenta te meʼba ants te la yalbey skʼoplal te Jesús?». Laniwan smulan te lajuk yakʼbeyxan te Jehová, pero la yakʼ spisil te bin ay yuʼun-ae, jaʼ yuʼun te Jesús snaʼoj te mukʼ skʼoplal ta yoʼtan te sTate. Ta spisil ini ya yakʼbotik jnoptik te ya smulan te bin lek ya kakʼbeytik te Jehová, te yakuk x-abatinotik ta stojol sok spisil koʼtantik sok jkuxlejaltik (Mat. 22:37; Col. 3:23). Ya x-akʼbot stseʼelil yoʼtan te kʼalal ya jpastik te ban kʼalal ya xjuʼ kuʼuntik jich bitʼil te ya jlokʼes jtiempotik, kiptik ta scholel skʼop Dios sok te ya xbootik ta tsoblejetik.

20. ¿Bin-utʼil ya jpas ta jkuxlejaltik te bin la jnoptik ta swenta te meʼba ants? Akʼa jun ejemplo.

²⁰ ¿Bin-utʼil ya jpas ta jkuxlejaltik te bin la jnoptik ta swenta te meʼba ants? Ay ermanoetik te lek ya yaʼiy sbaik yuʼun te kʼalal ya kalbeytik te tseʼel yoʼtan te Jehová ta swenta te bin ya spasike. ¿Yabal anaʼbey sba jtul ermana te ayix yaʼbilal te maʼyuk skʼoplal ya yaʼiy sba sok te ma xlokʼix ta scholel skʼop Dios ta skaj te ay ta chamel? ¿Yabal jnaʼbeytik sba jtul ermano te ay ta chamel te maʼyukix spoxil sok te chebajem yoʼtan yuʼun te ma xbajtix ta tsoblejetik? Ya xjuʼ ya kakʼbeytik smukʼul yoʼtanik (Efes. 4:29). Akʼa jcholbeytik yaʼiyik te bin la jnoptik ta swenta te meʼba ants. Chikan biluk ya kalbeytik te ermanoetik, ya xjul ta yoʼtanik te tseʼel yoʼtan yuʼun te Jehová ta spisil te bin ya jpastik (Prov. 15:23; 1 Tes. 5:11). Kʼalal ya kutsilkʼoptaytik te yantik yuʼun te yakik ta spasbeyel yaʼtel te Jehová manchukme maʼyuk skʼoplal ya yilik stukelik, yakotik ta stʼunel te bin la spas te Jesús.

21. ¿Bin ya anop ya apas?

²¹ Tseʼel koʼtantik yuʼun te ya jtatik ta Ebanjelioetik te bin-utʼil kuxin te Jesús sok jich ya jtʼuntik te bin la spase. Lek te yakuk xjajch jnoptik te Ebanjelioetik ta familia o ta jtukeltik. Yuʼun ya xkʼot ta koʼtantik te bin ya jnoptik ya skʼan te tey ayukotik kʼoem-a sok te yakuk jpas ta jkuxlejaltik. Ma tikʼuknax-a te ya jkʼayintik te bin la spas te Jesús, jaʼnix jich mukʼ skʼoplal te yakuk kaʼiytik te bin la yale. Ta yan artikulo ya kiltik te bin ya xjuʼ ya jnoptik ta swenta te bin la yal te Jesús te kʼalal jipil ta teʼ-ae.