¿Chapalatixbal yuʼun ya awichʼ jaʼ?

 1. ¿Bin nail ya skʼan ya spas jtul winik teme ya skʼan ya spas snae?

NOPA AWAʼIY te ay jtul winik te ya skʼan ya spas jwol sna sok snaʼoj ta lek te bitʼil ya skʼan ya spase. Pero ¿oranaxbal ya sman te material yuʼun ya spas te snae? Maʼuk. Nail ya skʼan ya snop ta lek te jayeb takʼin ya xtuun yuʼune. ¿Bin yuʼun? Melel ya skʼan ya snaʼ ta lek teme ya xlokʼ-a te stakʼine. Teme jich ya spase, yaniwan xjuʼ yuʼun sjuʼtesel te snae.

 2. Jich bitʼil ya yal Lucas 14:28-30, ¿bin nail ya skʼan ya anop ta lek te bitʼil mato awichʼoj jaʼe?

² Ta swenta te bayal skʼuxul awoʼtan ta stojol te Jehová sok te ya awal wokol ta stojole, ¿aybal anopoj te ya akʼan ya awichʼ jaʼe? Teme aye, jaʼ pajalat sok te winik te ya skʼan ya spas snae. ¿Bin yuʼun te jich ya kaltike? Nopbeya skʼoplal te bin la yal te Jesús liʼ ta Lucas 14:28-30 (kʼopona). Te Jesús la yal te bin smakojbey skʼoplal te ya x-ochotik ta jnopojel yuʼune, jaʼ te yakuk jnaʼtik te yananix jtatik jwokoltik-ae (Luc. 9:23-26; 12:51-53). Te kʼalal mato awichʼoj jaʼ-ae, nail ya skʼan ya anop ta lek te bin smakojbey skʼoplal te ya x-ochat ta jnopojel yuʼun te Jesuse. Jaʼme jich chapal ya xkʼoat yuʼun ya x-abatinatxan ta stojol Jehová te kʼalal awichʼojix jaʼ-ae.

 3. ¿Bin ya kilbeytik skʼoplal ta artikulo ini?

³ Bayal bin smakojbey skʼoplal te ichʼjaʼe. Jich yuʼun, ¿aybal bin ya xlokʼ awuʼun-a te ya awichʼ jaʼe? Bayal bin lek ya xlokʼ awuʼun-a, melel yame ata bayal bendision ta ora ini soknix ta pajel chaʼbej. Ta artikulo ini ya kilbeytik skʼoplal cheʼoxeb jojkʼoyeletik te kʼax mukʼ skʼoplalik ta swenta te ichʼjaʼe, jaʼme ya skoltayat ta snaʼel teme chapalatix yuʼun ya awichʼ jaʼe.

 4. 1) ¿Bin ya skʼan ya yal te ya kakʼ jbatik ta stojol te Diose? 2) ¿Bin ya skʼan ya yal te ya jlokʼes jba ta koʼtantike?

⁴ ¿Bin ya skʼan ya yal te ya kakʼ jbatik ta stojol te Diose? Jaʼ te bin nail ya skʼan pasel te kʼalal mato kichʼojtik jaʼ-ae. Ya awakʼ aba ta stojol Dios kʼalal ya apas jun orasion te banti ya awalbey te ya x-abatinat ta stojol ta spisil-orae. Te machʼa ya yakʼ sba ta stojol te Jehovae yame skʼan slokʼes sba ta yoʼtan. Te Jesús jich la yalbey te jnopojeletik yuʼune: «Teme ay machʼa ya skʼan ya stʼunon, akʼa slokʼes sba ta yoʼtan, akʼa skuch steʼ sok akʼa stʼunon ta spisil-ora» (Mateo 16:24, TNM). Kʼalal ya awakʼ aba ta stojol te Diose ya awalbey te jaʼ mukʼ skʼoplal ya xkʼot ta akuxlejal te ya x-abatinat ta stojol te ma jaʼuk ya apasix te bin ya skʼan awoʼtane. Te kʼalal la apasix-a te orasion-abi, jaʼme yuʼunatix Jehová ya xkʼoat (Rom. 14:8). Jich ya awakʼ akʼop ta stojol. Te Jehová maba ya sujotik ta spasel, pero te kʼalal la kakʼtikix jkʼoptik ta stojole jaʼ ya skʼan te ya jkʼotestik ta pasele (Sal. 116:12, 14).

 5. ¿Bin yuʼun maba pajal te ya kakʼ jbatik ta stojol te Dios sok te ya kichʼtik jaʼe?

⁵ ¿Bin yuʼun maba pajal te ya kakʼ jbatik ta stojol te Dios sok te ya kichʼtik jaʼe? Te kʼalal ya kakʼ jbatik ta stojol te Diose ta jtukeltik ya jkʼopontik. Yan stukel te ichʼjaʼe ya yichʼ pasel ta komonsitil, jteb ma spisil-ora ta jun mukʼul tsoblej. Kʼalal ya awichʼ jaʼ ya awakʼ ta ilel ta stojol yantik te la awakʼix aba ta stojol te Jehovae.b Jich ya awakʼ ta ilel te kʼux ya awaʼiy ta spisil awoʼtan, akuxlejal, apensar sok awip soknix te ataojix ta nopel te ya x-abatinat ta stojol ta spisil-orae (Mar. 12:30).

6, 7. Jich bitʼil ya yal 1 Pedro 3:18-22, ¿bin yuʼun mukʼ skʼoplal te ya kichʼtik jaʼe?

⁶ ¿Yuʼun-nixbal mukʼ skʼoplal-a te ya kichʼtik jaʼe? Nopa awaʼiy te bin ya yal te 1 Pedro 3:18-22 (kʼopona). Jich bitʼil chiknaj te ay schʼuunel yoʼtan te Noé kʼalal la spas te arkae, jaʼnix jich te kʼalal ya awichʼ jaʼe ya awakʼ ta ilel te la awakʼix aba ta stojol te Jehovae. Pero ¿mukʼbal skʼoplal te jich ya apase? Mukʼ skʼoplal. Te Pedro la yal te bin yuʼune. Ta sbabial jich la yal: «Ya xcolotic yuʼun». Te ichʼjaʼ ya xjuʼ ya yakʼ jkoleltik teme ya kakʼtik ilel te ay schʼuunel koʼtantik ta stojol te Jesús sok teme ya jchʼuuntik te la yakʼ skuxlejal ta jtojoltik, te chaʼkuxaj, te mo bael ta chʼulchan sok te «ayix ta swaʼel-cʼab te Diose».

⁷ Schebal, te yichʼel jaʼ ya yakʼ te «mayuc bin ya yalbotic te coʼtantique». Te kʼalal ya kakʼ jbatik ta stojol te Dios sok te ya kichʼtik jaʼe yame xkaj kamigointikxan ta lek te Jehovae. Ta skaj te la jsujtesix koʼtantik sok te ayix schʼuunel koʼtantik ta swenta te laj ta jtojoltik te Jesuse ya spasbotik perdon jmultik te Diose. Jichme maʼyuk bin chopol ya yalbotik te koʼtantike.

 8. ¿Bin ya skʼan ya stijbat awoʼtan ta yichʼel jaʼ?

⁸ ¿Bin ya skʼan ya stijbat awoʼtan ta yichʼel jaʼ? Ta swenta te bintik anopojix ta Bibliae, bayal bin anaʼojix ta swenta te Jehová jich bitʼil te bin yilel stalel sok te bintik ya spase. Jaʼ yuʼun kʼax kʼux ya awaʼiy ta awoʼtan. Te bin ya skʼan ya stijbat awoʼtan yuʼun ya awichʼ jaʼe jaʼ te skʼuxul awoʼtan ta stojol te Jehovae.

 9. ¿Bin ya skʼan ya yal te ya kichʼtik jaʼ ta swenta te Tatil, te Nichʼanil sok te chʼul espiritu jich bitʼil ya yal te Mateo 28:19, 20?

⁹ Te bitʼil la ataix ta nopel te ya awichʼ jaʼe jaʼnix la stijbat awoʼtan te bintik anopoj ta Biblia sok te achʼuunejixe. Nopbeya skʼoplal te bin la yal ta mantal te Jesús ta swenta te yotsesel jnopojeletike (kʼopona Mateo 28:19, 20). Te Jesús la yal te machʼatik ya skʼan ya yichʼik jaʼe ya skʼan ya spasik «ta scuenta te Tatil, te Nichʼanil soc te Chʼul Espíritu». Jaʼ-abi ya skʼan ya yal te yakuk schʼuun koʼtantik te bin ya yal te Biblia ta swenta te Jehová, te sNichʼan sok te chʼul espiritue. Bayal yip ya x-aʼtej te bintik ya yal te Biblia ta swenta-abi sok ya xjuʼ ya xkʼub ta koʼtantik (Heb. 4:12). Kiltik cheʼoxebuk ejemplo.

10, 11. ¿Bintik anopoj ta Biblia sok achʼuunej ta swenta te Tatile?

¹⁰ ¿Yabal xjul ta awoʼtan te kʼalal la anaʼ te Jehová sbiil te jTatike, te jaʼ te Machʼa kʼax toyol ay sok te jaʼnax smelelil Diose? (Sal. 83:18; Is. 37:16). Jaʼ Jpaswanej kuʼuntik sok jaʼ te machʼa ya yakʼ te kolele (Sal. 3:8; 36:9). Jaʼnix jich ay bin spasoj yuʼun ya skoltayotik ta swenta te mulil, te lajel sok ya yakʼ jmaliytik jun kuxlejalil ta sbajtelkʼinal (Juan 17:3). Te kʼalal ya awakʼ aba ta stojol te Jehová sok ya awichʼ jaʼe, yame xkʼoat ta testigo yuʼun Jehová (Is. 43:10-12). Ya x-ochat ta jun familia te jun-nax ya yichʼik ta mukʼ te Jehová, yichʼojbeyik te sbiil sok ya yakʼik ta nopel (Sal. 86:12).

¹¹ Jaʼ jun mukʼul majtanil snaʼel te bintik ya yal te Biblia ta swenta te Tatile. Kʼalal ya achʼuun te bintik smelelil ya yakʼ ta nopel te Bibliae, jaʼme ya stijbat awoʼtan yuʼun ya akʼan ya awakʼ aba ta stojol Jehová sok te ya awichʼ jaʼe.

12, 13. ¿Bintik smelelil la anop ta swenta te Jesús sok te achʼuunejixe?

¹² ¿Bin-utʼil la awaʼiy aba te kʼalal la anop te bin smelelil ta swenta te Nichʼanile? Te Jesuse jaʼ te schebal machʼa kʼax mukʼ skʼoplal ta chʼulchan sok ta Balumilal. La stoj jmultik kʼalal la yakʼ skuxlejal ta jwentatik. Kʼalal ya kakʼtik ta ilel schʼuunel koʼtantik ta swenta te la stoj jmultike, yame jtatik perdon, ya kamigoin jbatik sok te Diose sok ya jta jkuxlejaltik sbajtelkʼinal (Juan 3:16). Jaʼnix jich jaʼ Mukʼul Saserdote kuʼuntik te Jesuse, melel ya skʼan ya skoltayotik yuʼun ya jta jlekiltik yuʼun te la stoj jmultike sok te yakuk kamigoin jbatik sok te Jehovae (Heb. 4:15; 7:24, 25). Te bitʼil jaʼ Ajwalil yuʼun te Wentainel yuʼun te Diose, ya xtuuntesot yuʼun te Jehová ta schʼultesel te sbiile, ya slajin te bin chopol sok ya yakʼbotik bayal bendision ta sbajtelkʼinal ta Nichimal Kʼinal (Mat. 6:9, 10; Apoc. 11:15). Jaʼnix jich jaʼ ejemplo kuʼuntik te Jesuse (1 Ped. 2:21). Te bitʼil la yakʼ skuxlejal ta spasbeyel skʼanojel yoʼtan te Diose, jich la yakʼbotik kiltik te ejemplo te ya skʼan ya jnoptik spasele (Juan 4:34).

¹³ Kʼalal ya schʼuun awoʼtan te bin smelelil la anop ta Biblia ta swenta te Jesuse, kʼuxme ya awaʼiy ta awoʼtan te sNichʼan te Jehová. Te skʼuxul awoʼtan ta stojole jaʼme ya stijbat awoʼtan ta stuuntesel te akuxlejal ta spasel te skʼanojel yoʼtan te Dios jich bitʼil la spas te Jesuse. Kʼalal jich ya awaʼiy abae yame akʼan ya awakʼ aba ta stojol Jehová sok ya awichʼ jaʼ.

14, 15. ¿Bintik smelelil anopoj sok achʼuunej ta swenta te chʼul espiritue?

¹⁴ ¿Bin yaʼiyel la awaʼiy aba te kʼalal la anop te bin smelelil ta swenta te chʼul espiritue? Anopojix te maba jaʼ jtul diose, te jaʼ te yip yuʼel te Diose. Te Jehová la stuuntes yuʼun la stojobtes te winiketik ta stsʼibayel te Bibliae, jaʼnix jich ya stuuntes ta jtojoltik ta ora ini swenta ya skoltayotik ta snaʼel sok spasel ta jkuxlejaltik te bin ya jkʼopontik ta Bibliae (Juan 14:26; 2 Ped. 1:21). Ta swenta te chʼul espiritue te Jehová ya yakʼ kiptik yuʼun ay bin ya xjuʼ kuʼuntik spasel (2 Cor. 4:7). Jaʼnix jich ya yakʼ yip koʼtantik ta scholel te lek yachʼil kʼop, ta spʼajel te tsajel, ta stsʼikel te mel-oʼtan yuʼun ma xchebaj koʼtantik sok ta sitintayel te pruebaetike. Jaʼnix jich ya skoltayotik yuʼun ya kakʼtik ta ilel te taleliletik te jaʼ «te sit ya yacʼ te Espíritu» (Gál. 5:22). Te Dios ya yakʼbey schʼul espiritu te machʼatik ya xkʼanbot yuʼune sok te ay smukʼul yoʼtanik ta stojole (Luc. 11:13).

¹⁵ Te machʼatik ya yichʼik ta mukʼ te Jehovae ay smukʼul yoʼtanik te ya xkoltayotik yuʼun te chʼul espiritu swenta ya yichʼikxan ta mukʼ. Kʼalal ya achʼuun te bin smelelil anopojix ta swenta te chʼul espiritue, ya stijbat awoʼtan yuʼun ya awakʼ aba ta stojol Dios sok te ya awichʼ jaʼe.

16. ¿Bin la kilbeytikix skʼoplal ta ora ini?

¹⁶ Stael ta nopel te ya awakʼ aba ta stojol te Dios sok te ya awichʼ jaʼe kʼax mukʼ skʼoplal. Jich bitʼil la kiltikixe, yame skʼan ya anaʼ ta lek te bin smakojbey skʼoplale. Manchukme ya ata awokol o ay bin ya awijkitay jilel jaʼme bayalxan te bin lek ya ata yuʼune. Te ichʼjaʼ ya yakʼbat akolel sok ya yakʼ te lek te bin ya yalbat te awoʼtane. Kʼalal ya ata ta nopel te ya awichʼ jaʼe jaʼme ya skʼan ya stijbat awoʼtan te skʼuxul awoʼtan ta stojol te Jehovae. Jaʼnix jich ya skʼan te mero ya schʼuun awoʼtan te bin ya yal te Biblia ta swenta te Tatil, te Nichʼanil sok te chʼul espiritue. Ta swenta te bintik la jnopbeytikix skʼoplal ta ora ini, ¿bin ya anop yuʼun? ¿Chapalatixbal yuʼun ya awichʼ jaʼ?

17. ¿Bintik ya skʼan ya apas yuʼun awichʼ jaʼ?

¹⁷ Teme jich ya awaʼiy te chapalat yuʼun ya awichʼ jaʼ, jnaʼojtik te yuʼun ay bintik la apas yuʼun ya awamigoin aba sok te Jehovae.c Ta swenta te spisil-ora ya anop te Bibliae bayal bin anaʼojix ta swenta te Jehová sok te Jesuse, sok ay schʼuunel awoʼtan (Heb. 11:6). Ya schʼuun awoʼtan te bintik jamal yaloj te ya spas te Jehová sok te ya xjuʼ ya skoltayat yuʼun te lajel sok te mulil ta swenta te laj ta atojol te Jesuse. Jaʼnix jich la asujtesix awoʼtan, jaʼ-abi ya skʼan ya yal te mero ya amel awoʼtan yuʼun te amule sok te akʼanojbeyix perdon te Jehovae. La apʼajix te bin chopol la apas ta akuxlejal sok jaʼ ya akʼan ya apas te bin ya smulan te Jehovae (Hech. 3:19). Mero ya amulan yalbeyel yantik te bintik anopoj ta Bibliae. Jaʼnix jich bayal bin apasojix yuʼun ya xjuʼ ya x-ochat ta publikador sok yakatix ta scholel skʼop Dios sok te kongregasione (Mat. 24:14). Ta swenta te bintik apasojixe ay bayal stseʼelil yoʼtan ta atojol te Jehovae (Prov. 27:11).

18. ¿Binxan ya skʼan ya apas te bitʼil mato awichʼoj jaʼe?

¹⁸ Kʼalal mato awichʼoj jaʼ-ae ayto bin ya skʼan ya apasxan. Jich bitʼil la kiltikixe, ta nail ya skʼan ya awalbey te Dios ta jun orasion te ya awakʼ aba ta stojol sok te ya atuuntes te akuxlejal ta spasbeyel te skʼanojel yoʼtane (1 Ped. 4:2). Ta patil, albeya te koordinador yuʼun ansianoetik ta kongregasion te ya akʼan ya awichʼ jaʼe. Jaʼme ya yalbey yantik ansianoetik yuʼun ya awilbeyik skʼoplal te bintik smelelil anopojix ta Bibliae. Pero mame xiwat, melel te ermanoetik-abi ya snaʼbat aba ta lek sok kʼuxat ta yoʼtanik, jaʼnaxme ya yilik teme kʼoem lek ta awoʼtan te bintik ya yal te Biblia sok te mukʼ skʼoplal ta awoʼtan te ya awakʼ aba ta stojol te Dios sok te ya awichʼ jaʼe. Teme ya yilik te chapalatixe, ya yalbatik te ya xjuʼ ya awichʼ jaʼ ta mukʼul tsoblej te nopol ya yichʼ pasele.

19, 20. ¿Bin ya skʼan ya apas te kʼalal awichʼojix jaʼ-ae sok bin ya skoltayat?

¹⁹ ¿Bin ya skʼan ya apas te kʼalal awichʼojix jaʼ-ae?d Julukme ta awoʼtan te la awakʼ akʼop te kʼalal la awakʼ aba ta stojol te Jehová sok ya smaliy te yakuk akʼotes ta pasel te bin la awalbeye. Jich yuʼun te kʼalal awichʼojix jaʼ-ae yame skʼan ya apas ta akuxlejal te bin la awalbey te Jehová te kʼalal la awakʼ aba ta stojole. ¿Bin ya skoltayat?

²⁰ Yame skʼan te jun ayat sok te kongregasione, melel te kʼalal ya awichʼ jaʼe jaʼme awermanotak ya xkʼot ta spisil te ermanoetike (1 Ped. 2:17). Jaʼme afamilia ya xkʼot te ermanoetik ta kongregasione. Jich yuʼun teme maba ya akom aba ta tsoblejetike kʼax lek ya awilxan aba sok te ermanoetike. Kʼopona te Biblia ta jujun kʼajkʼal sok lokʼesa tiempo yuʼun ya anopilan ta awoʼtan te bin ya yale (Sal. 1:1, 2). Jaʼ-abi ya skʼan ya yal te kʼalal ay bin ya akʼopon ta Bibliae ya skʼan ya akejchan jtsʼinuk yuʼun ya anop ta awoʼtan te bin la akʼopone. Jaʼme jich ya xkʼot ta awoʼtan te bin yakat ta skʼoponele. Jaʼnix jich ya skʼan ya apas te bin la yal te Jesús kʼalal jich la yal: «Cʼoponahic Dios» (Mat. 26:41). Kʼalal sok spisil awoʼtan ya akʼopon te Jehovae yame xnoptsajatxan ta stojol. Sok jaʼme nail xa ale te Wentainel yuʼun te Diose (Mat. 6:33). ¿Bin-utʼil ya apas? Jaʼ te jaʼ mukʼ skʼoplal ta akuxlejal ya xkʼot te scholel skʼop Diose. Teme ya achol skʼop Dios ta spisil-ora, yame stsakxan yip te schʼuunel awoʼtan sok ayniwan machʼa ya xjuʼ ya akoltay yuʼun ya stʼun te be yuʼun ya sta skuxlejal sbajtelkʼinal (1 Tim. 4:16).

21. ¿Bin ya ata te kʼalal ya awichʼ jaʼe?

²¹ Te ya awakʼ aba ta stojol Dios sok te ya awichʼ jaʼe, jaʼme te bin kʼax mukʼ skʼoplal ya ata ta nopel ta akuxlejale. Melelnix-a te ay bintik ya skʼan ya apase, pero ayme bayal bintik lekilal ya ata yuʼun. Te wokolil ya ata ta balumilal ini «jteb nax» sok «jcʼaxel nax ay» (2 Cor. 4:17). Pero te yichʼel jaʼ yame yakʼbat stseʼelil awoʼtan ta ora ini sok yame ata te smelelil kuxlejal ta pajel chaʼbeje (1 Tim. 6:19). Jich yuʼun nopa ta lek, kʼopona te Jehová sok nopa ta awoʼtan ini: «¿Chapalonixbal yuʼun ya kichʼ jaʼ?».