زبور

145 اَے میرے خدا!‏ اَے میرے بادشاہ!‏ مَیں تیری تعظیم کروں گا؛‏

مَیں ہمیشہ ہمیشہ تک تیرے نام کی تعریف کروں گا۔‏

 2 مَیں دن بھر تیری بڑائی کروں گا؛‏

مَیں ہمیشہ ہمیشہ تک تیرے نام کی تعریف کروں گا۔‏

 3 یہوواہ عظیم ہے اور سب سے زیادہ تعریف کے لائق ہے؛‏

اُس کی عظمت سمجھ سے باہر ہے۔‏*‏

 4 لوگ نسل‌درنسل تیرے کاموں کی تعریف کریں گے؛‏

وہ تیرے زبردست کاموں کو بیان کریں گے۔‏

 5 وہ تیری عظمت کی شان کے بارے میں بات کریں گے

اور مَیں تیرے حیران‌کُن کاموں پر سوچ بچار کروں گا۔‏

 6 وہ تیرے حیرت‌انگیز کاموں*‏ کا ذکر کریں گے

اور مَیں تیری عظمت کا اِعلان کروں گا۔‏

 7 وہ تیری بے‌اِنتہا اچھائی کا بڑے جوش سے چرچا کریں گے؛‏

وہ تیری نیکی کی وجہ سے خوشی سے للکاریں گے۔‏

 8 یہوواہ مہربان*‏ اور رحیم ہے؛‏

وہ جلدی غصہ نہیں کرتا اور اُس کی اٹوٹ محبت کی کوئی اِنتہا نہیں ہے۔‏

 9 یہوواہ سب کے ساتھ اچھائی کرتا ہے

اور اُس کے سب کاموں سے اُس کا رحم جھلکتا ہے۔‏

10 اَے یہوواہ!‏ تیرے سب کام تیری تعظیم کریں گے

اور تیرے وفادار بندے تیری بڑائی کریں گے۔‏

11 وہ تیری بادشاہت کی شان کا اِعلان کریں گے

اور تیری قدرت کو بیان کریں گے

ל ‏[‏لامد]‏

12 تاکہ لوگ تیرے زبردست کاموں

اور تیری بادشاہت کی شان‌وشوکت کے بارے میں جانیں۔‏

13 تیری بادشاہت ابدی بادشاہت ہے

اور تیری سلطنت نسل‌درنسل قائم رہتی ہے۔‏

14 یہوواہ گِرتے ہوئے لوگوں کو سنبھالتا ہے

اور بوجھ تلے دبے لوگوں کو اُٹھاتا ہے۔‏

15 سب کی آنکھیں اُمید سے تیری طرف لگی ہیں؛‏

تُو اُنہیں وقت پر کھانا دیتا ہے۔‏

16 تُو اپنی مُٹھی کھولتا ہے

اور ہر جان‌دار کی خواہش پوری کرتا ہے۔‏

17 یہوواہ کے ہر کام سے نیکی جھلکتی ہے؛‏

اُس کے ہر کام سے وفاداری کا ثبوت ملتا ہے۔‏

18 یہوواہ اُن سب کے قریب ہے جو اُسے پکارتے ہیں،‏

ہاں، اُن سب کے جو سچے دل*‏ سے اُسے پکارتے ہیں۔‏

19 وہ اُن لوگوں کی خواہش پوری کرتا ہے جو اُس کا خوف رکھتے ہیں؛‏

وہ مدد کے لیے اُن کی فریاد سنتا ہے اور اُنہیں بچاتا ہے۔‏

20 یہوواہ اُن سب کی حفاظت کرتا ہے جو اُس سے پیار کرتے ہیں

لیکن وہ سب بُرے لوگوں کو ہلاک کر دے گا۔‏

21 مَیں*‏ یہوواہ کی بڑائی کروں گا؛‏

ہر جان‌دار ہمیشہ ہمیشہ تک اُس کے پاک نام کی تعریف کرے۔‏