Яҳова Шоҳидларининг оилаларида улғаётган кўп ёшлар ҳар йили сувга чўмади. Сиз ҳам бу борада ўйлаяпсизми? Ундай бўлса, биринчидан бағишланиш ва сувга чўмиш нимани англатишини тушунишингиз лозим.

• Сувга чўмиш нимани англатади?

• Бағишланиш бу нима?

• Нега сувга чўмиш муҳим?

• Тенгдошларингизнинг фикри

• Уйдирма ва факт

Муқаддас Китобдан билиб олаётганимиздай, одам сувга чўмганда, шунчаки устига сув сачратиб қўйилмайди, балки сув ичига тўлиқ киради. Бу жараён жуда муҳим.

• Сувга чўмаётганингизда, энди фақат ўзингизга ёқадиган нарсалар қилиб яшамоқчи эмаслигингизни намоён этасиз.

• Сувга чўмиб чиқаётганингизда эса, бу ондан бошлаб янги ҳаётга қадам қўйганингизни ва энди Аллоҳга маъқул келадиган ишларни қилиш сиз учун биринчи навбатда эканини кўрсатасиз.

Сувга чўмиш билан ҳамманинг кўз олдида Яҳова сизга нима тўғри ва нима нотўғри эканини айтишга ҳаққи борлигини тан олаётганингизни кўрсатасиз. Қолаверса, Яҳовага барчанинг олдида — Унинг фикри истакларингиздан муҳимроқ экани борасида ваъда берганингизни тасдиқлайсиз.

Ўйлаб кўринг: нега Яҳовага итоатли бўлиб яшашга ваъда берганингизни ҳамманинг кўз олдида тасдиқлашингиз керак? (1 Юҳанно 4:19 ҳамда Ваҳий 4:11 га қаранг.)

Сувга чўмишдан аввал Яҳовага ўзингизни бағишлашингиз керак. Хўш, буни қандай қила оласиз?

Шахсан ўзингиз Яҳовага ибодат қилиб, Унга тоабад хизмат қилишингиз ва бошқалар қандай йўл тутишидан қатъи назар ҳар қандай вазиятда У хоҳлаганидай йўл тутишингиз ҳақида ваъда берасиз.

Сувга чўмганда эса ўзингизни Худога бағишлаганингизни намоён этасиз. Бу билан бошқаларга ҳаётингизни Яҳованинг қўлига топширганингизни ва энди Унга тегишли эканингизни кўрсатасиз. (Матто 16:24)

Ўйлаб кўринг: Яҳовага тегишли бўлсангиз нега ҳаётингиз янада кўпроқ яхшиланади? (Ишаё 48:17, 18 ҳамда Ибронийларга 11:6 га қаранг.)

Исо Масиҳ сувга чўмиш унинг шогирди бўлишни истаганлар учун талаб эканини айтган. (Матто 28:19, 20) Ҳозир ҳам сувга чўмиш барча масиҳийлар учун талабдир. Дарҳақиқат, Каломда ёзилганидай, бу омон қолишимиз учун ҳам зарур. (1 Бутрус 3:21)

Аммо сувга чўмиш ниятингиз Яҳовага бўлган севги ва миннатдорчиликдан иборат бўлиши даркор. Нуқтаи назарингиз қуйидаги сўзларни ёзган сано бастакориникига ўхшаши лозим: «Яҳованинг менга қилган яхшиликларини қандай қайтараман?... Яҳованинг исмини айтиб чақираман. Яҳовага ичган қасамларимни... бажараман». (Забур 116:12–14)

Ўйлаб кўринг: Яҳова сиз учун қандай яхшиликлар қилди ва бунинг учун Унга қай йўсин миннатдорчилик билдира оласиз? (Қонунлар 10:12, 13 ҳамда Римликларга 12:1 га қаранг.)

Муқаддас Китобдаги меъёрларга амал қилиб яшаётган ва Худо билан дўстона муносабатларни ривожлантираётган бўлсангиз, ҳойнаҳой, сувга чўмиш борасида ўйлаётгандирсиз. Қизиқ, бу қадамни қўйишга тайёр ёки тайёр эмаслигингизни қандай билишингиз мумкин?a

Бу мақолада

• Қанчалик кўп билимга эга бўлишим керак?

• Нима қилишим лозим?

• Тенгдошларингизнинг фикри

Сувга чўмишга тайёргарлик кўриш қандайдир маълумотларни ёдлаб олишни билдирмайди. Буни имтиҳон топширишга тайёргарлик деб айтиб бўлмайди. Аммо Муқаддас Китоб таълимотлари ҳақиқат эканига бўлган аминлигингизни кучайтириш учун ақлингизни ишга солишингиз керак бўлади. (Римликларга 12:1) Масалан:

• Худо мавжуд эканига ва топинишингизга лойиқ эканига аминмисиз?

  Муқаддас Китобда шундай дейилган: «Тангрига яқинлашаётган киши Унинг бор эканлигига ва Уни астойдил излаётганларни мукофотлашига ишониши лозим». (Ибронийларга 11:6)

  Ўзингиздан сўранг: «Нега Худога ишонаман?» (Ибронийларга 3:4) «Нега У топинишимга лойиқ?» (Ваҳий 4:11)

  Ёрдам керакми? «Яратилишми ёки эволюциями? 1-қисм. Нега Худога ишониш арзийди?» номли мақолага қаранг.

• Муқаддас Китоб Худодан эканига аминмисиз?

  Муқаддас Китобда шундай дейилган: «Муқаддас Ёзувларнинг ҳаммаси Худо томонидан илҳомлантирилган бўлиб, ўргатиш, танбеҳ бериш, тузатиш, адолат йўлида тарбиялаш учун фойдалидир». (2 Тимўтийга 3:16)

  Ўзингиздан сўранг: «Каломда инсонларнинг эмас, Худонинг фикрлари ёзилганига нега аминман?» (Ишаё 46:10; 1 Салоникаликларга 2:13)

  Ёрдам керакми? «Муқаддас Китобдан қандай фойда оламан? 1-қисм. Муқаддас Китобни тадқиқ қилиш» номли мақолага қаранг.

• Яҳова иродасини амалга ошириш учун масиҳийлар жамоатидан фойдаланаётганига аминмисиз?

  Муқаддас Китобда шундай дейилган: «[Худога] жамоат ва Исо Масиҳ орқали наслдан наслга, абадулабад шон-шараф бўлсин». (Эфесликларга 3:21)

  Ўзингиздан сўранг: «Йиғилишларда Каломдан билиб олаётганларим инсонларники эмас, Яҳованики деб ҳисоблаяпманми?» (Матто 24:45) «Ҳатто ота-онам қила олмаса ҳам (йиғилишга боришингизга рухсат беришаётган вазиятда) йиғилишларга боряпманми?» (Ибронийларга 10:24, 25)

  Ёрдам керакми? «Нега жамоат учрашувларига бориш керак?» номли мақолага қаранг.

Сувга чўмиш учун мукаммал бўлишингиз кутилмайди. Аммо ёмонликдан қочиб, яхшилик қилиш истагингиз борлигини кўрсатишингиз даркор. (Забур 34:14) Масалан:

• Яҳованинг меъёрларига яраша яшаяпсизми?

  Муқаддас Китобда шундай дейилган: «Виждонингизни тоза сақланглар». (1 Бутрус 3:16)

  Ўзингиздан сўранг: «Онгимни “яхшини ёмондан ажратишга ўрганган” инсон эканим нимадан кўриняпти?» (Ибронийларга 5:14) «Тенгдошларнинг босимига қарши тура олган муайян вазиятларни эслай оламанми? Мени тўғри йўл тутишга ундайдиган инсонлар билан дўстлашяпманми?» (Ҳикматлар 13:20)

  Ёрдам керакми? «Виждонимни қандай тарбияласам бўлади?» номли мақолага қаранг.

• Қилаётган ишларингиз учун Яҳова олдида жавобгар эканингизни тушуняпсизми?

  Муқаддас Китобда шундай дейилган: «Ҳар биримиз ўзимиз учун Худога ҳисобот берамиз». (Римликларга 14:12)

  Ўзингиздан сўранг: «Ҳалолманми ёки ўзим ва бошқалар билан ростгўйманми?» (Ибронийларга 13:18) «Ўз хатоларимни тан оляпманми ёки уларни яшириб, бошқаларни айблаяпманми?» (Ҳикматлар 28:13)

  Ёрдам керакми? «Хатоларимга қандай қарашим керак?» мақоласига қаранг.

• Яҳова билан муносабатларингизни ривожлантиряпсизми?

  Муқаддас Китобда шундай дейилган: «Аллоҳга яқинлашинглар, шунда У ҳам сизларга яқинлашади». (Ёқуб 4:8)

  Ўзингиздан сўранг: «Яҳовага яқинлашиш учун нималар қиляпман?» Масалан: «Муқаддас Китобни қанчалик тез-тез ўқийман?» (Забур 1:1, 2) «Қанчалик тез-тез ибодат қиляпман?» (1 Салоникаликларга 5:17) «Ибодатларим қанчалик аниқ? Дўстларим Яҳовага хизмат қиляптими?» (Забур 15:1, 4)

  Ёрдам керакми? «Муқаддас Китобдан қандай фойда оламан? 2-қисм. Қай йўсин Муқаддас Китобни мароқ билан ўқий оламан?» ва «Нега ибодат қилишим керак?» номли мақолаларга қаранг.

МАСЛАҲАТ. Сувга чўмишга тайёргарлик кўришингизга «Ёшларнинг саволлари. Амалий маслаҳатлар» китобининг 2-жилдидаги 37-боби ёрдам бериши мумкин. Айниқса, 308- ва 309-саҳифаларидаги схемаларга диққат қаратинг.

Ўзингизни Яҳовага бағишлаш ва сувга чўмиш фикри сизни қўрқитяптими? Ундай бўлса, бу мақола қўрқувларингизни енгишга қўл келади.

Бу мақолада

• Сувга чўмганимдан кейин жиддий хато қилиб қўйсам-чи?

• Сувга чўмиш билан боғлиқ масъулиятдан қўрқаётган бўлсам-чи?

• Яҳовага хизмат қилиш учун арзимайман деб ўйлаётган бўлсам-чи?

• Тенгдошларингизнинг фикри

Хавотирланишнинг сабаби. Эҳтимол, жиддий гуноҳга қўл урган ва жамоатдан четлатилган кишини биларсиз. (1 Коринфликларга 5:11–13) Бу сиз билан ҳам юз беришидан хавотирланишингиз ҳеч гап эмас.

«Илк бор сувга чўмиш ҳақида ўйлаганимда, аввало “Гуноҳ қилиб қўйсам-чи? Ота-онам роса сиқилар” деган фикр келди». (Ребека)

Очқич оят: «Ёвуз киши ўз йўлидан... қайтсин. Унга раҳм-шафқат кўрсатадиган Яҳовага юз бурсин. Аллоҳимизга қайтсин, зеро уни сидқидилдан кечиради». (Ишаё 55:7)

Ўйлаб кўринг: гарчи тавба қилмайдиган кишилар жамоатдан четлатилса ҳам Яҳова сидқидилдан тавба қиладиганларга ва ўзгаришга интилаётганларга раҳм-шафқат кўрсатади. (Забур 103:13, 14; 2 Коринфликларга 7:11)

Қуйидаги фактни қабул қилинг: номукаммал бўлсангиз ҳам, Худонинг кўмаги билан васвасага қарши туришингиз мумкин. (1 Коринфликларга 10:13) Ахир, қандай йўл тутишингиз борасида охири ким қарор чиқаради? Сизми ёки бошқа инсонми?

«Сувга чўмгач, жиддий хато қилиб қўйишдан қўрқардим. Бироқ кейинчалик сувга чўмишни ортга суриш хато эканини англадим. Эртага нима юз беришидан қўрқиш бугун қарор чиқаришга халақит беришига йўл қўймаслик кераклигини тушундим». (Карин)

Хулоса. Яҳованинг аксарият хизматчилари сингари жиддий гуноҳлардан қочишингиз мумкин. Барчаси ўз қўлингизда. (Филиппиликларга 2:12)

Кўпроқ ёрдам керакми? «Қандай қилиб васвасага берилмаслигим мумкин?» номли мақолага қаранг.

Хавотирланишнинг сабаби. Яҳова учун кўпроқ қилиш ниятида оиласи ва дўстларидан узоққа кетган ёшларни танирсиз. Бошқалар сиз ҳам шундай қилишингизни кутади деб хавотирланишингиз ҳеч гап эмас.

«Сувга чўмиш хизматда кенг эшикларни очади. Аммо баъзилар бу эшикдан киришга тайёр эмасдир ёки шароитлари бунга йўл қўймаётгандир». (Мари)

Очқич оят: «Ҳар ким ўз ишини текширсин, шунда ўзини бошқалар билан солиштирмай ўзига қарасагина, суюнишга сабаб топади». (Галатияликларга 6:4)

Ўйлаб кўринг: ўзингизни бошқалар билан солиштиришнинг ўрнига, Марк 12:30 даги «Тангрингиз Яҳовани бутун қалбингиз... билан севинг» деган сўзларга диққат қаратинг.

Эътибор берган бўлсангиз, бу ерда Яҳовага бутун қалбингиз билан хизмат қилиш ҳақида айтилган. Шу боис бу борада кимдир эмас, сиз қандай йўл тутаётганингиз муҳим аҳамиятга эга. Уни чиндан ҳам яхши кўрсангиз, сизда бор энг яхшисини бериб Унга хизмат қилиш йўлларини топасиз.

«Сувга чўмиш жиддий қадам, лекин у ҳаётингизни мураккаблаштирмайди. Сизни яхши ишларга ундайдиган инсонлар билан мулоқот қилинг. Улар бу йўлда қолишингизга ёрдам беришади. Аста-секин кўпроқ масъулият олишни бошласангиз, бахтлироқ бўласиз. Сувга чўмишни ортга сурсангиз эса, ўзингизга зиён келтирасиз». (Жулия)

Хулоса. Яҳова сизга кўрсатаётган севгиси учун миннатдорчилигингизни оширинг. Бу энг яхшисини Унга беришга сизни ундайди. (1 Юҳанно 4:19)

Кўпроқ ёрдам керакми? «Қанчалик ишончлиман?» номли мақолага қаранг.

Хавотирланишнинг сабаби. Яҳова коинотдаги Олий Ҳукмдор ва инсонлар Унинг олдида заррачадир. Яҳова сиз мавжуд эканингиздан хабардорми деб ўйлаётгандирсиз.

«Ота-онам Яҳованинг Шоҳиди. Худо мени Ўзига жалб қилганидан шубҳаланадиган бўлдим ва У билан муносабатлар менга ота-онамдан “мерос” бўлиб ўтган деб ўйладим». (Наташа)

Очқич оят: «Агар мени юборган Отам бировни жалб қилмаса, ҳеч ким олдимга кела олмайди». (Юҳанно 6:44)

Ўйлаб кўринг: сувга чўмиш ҳақида ўйлаётганингизнинг ўзи, ҳойнаҳой, Яҳова сиз У билан янада яқинроқ дўст бўлишингизни хоҳлаётганини кўрсатяпти. Унинг бу таклифини қабул қилишни истайсизми?

Шуни унутмангки, сиз ёки бошқа кимдир эмас, Яҳова У билан дўст бўлиш учун нима кераклигини ҳал қилади. Каломида айтилганидай, Худога яқинлашсангиз, У ҳам сизга яқинлашади. (Ёқуб 4:8)

«Яҳовани ва У сизни Ўзига жалб қилганини биласиз экан, демак У сизни яхши кўради. Шунинг учун қалбингиз Унга хизмат қилишга лойиқ эмаслигингизни билдираётган бўлса, ишонманг, Худо бошқача фикрда. У эса ҳамиша ҳақ». (Селина)

Хулоса. Сувга чўмиш борасида Муқаддас Китобдаги талабларга мос келаётган бўлсангиз, демак Яҳовага хизмат қила оласиз. Унутманг, У топинишингизга лойиқ. (Ваҳий 4:11)

Кўпроқ ёрдам керакми? «Нега ибодат қилишим керак?» номли мақолага қаранг.