Bugu Ya U Thoma Ya Dzikhosi

16 Ipfi ḽa Yehova ḽo ḓela Yehu+ murwa wa Henani+ nga ha Baasha ḽa ri: 2 “Ndo u hulisa u si tshithu nda u ita murangaphanḓa wa vhathu vhanga vha Isiraele,+ fhedzi wa ita vhuvhi he ha itwa nga Yerobeamu, wa ita uri vhathu vhanga vha Isiraele vha ite tshivhi, vha ntsinyusa nga zwivhi zwavho.+ 3 Nga zwenezwo, ndi khou fhelisa Baasha na vha nnḓu yawe, vha nnḓu yawe ndi ḓo vha ita zwe nda ita vha nnḓu ya Yerobeamu+ murwa wa Nebatha. 4 Wa lushaka lwa Baasha ane a fela muḓini u ḓo ḽiwa nga dzimmbwa; ane a fela ḓakani, u ḓo ḽiwa nga zwiṋoni.”

5 Mafhungo oṱhe a Baasha na zwe a ita na mishumo yawe i sumbedzaho u vha na maanḓa, naa a zwo ngo ṅwaliwa buguni ya mafhungo a zwifhingani zwa kale zwa mahosi a Isiraele? 6 Mafheleloni Baasha a vhulungwa na vhomakhulukuku wawe ngei Thiritsa;+ murwa wawe Elaa a vha khosi vhudzuloni hawe. 7 Ipfi ḽa Yehova ḽa dovha ḽa ḓela muporofita Yehu murwa wa Henani nga ha Baasha na vha nnḓu yawe, nga nṱhani ha vhuvhi he a vhu ita phanḓa ha Yehova nga u mu sinyusa nga zwe a ita, u fana na zwe zwa itwa nga vha nnḓu ya Yerobeamu, na nga nṱhani ha uri o mu* vhulaya.+

8 Nga ṅwaha wa vhu 26 hu tshi khou vhusa Khosi Asa wa Yuda, Elaa murwa wa Baasha a vha khosi ya Isiraele e Thiritsa, o vhusa miṅwaha mivhili. 9 Mushumeli wawe Simiri, ane a langa hafu ya gariki dzawe, o mu itela tshimbevha musi e ngei Thiritsa o kambiwa e nḓuni ya Aritsa, we a vha a tshi langa muṱa u re ngei Thiritsa. 10 Simiri a dzhena a mu ṱhavha a mu vhulaya+ nga ṅwaha wa vhu 27 hu tshi khou vhusa Khosi Asa wa Yuda, a vha khosi vhudzuloni hawe. 11 Musi a tshi vha khosi, a tshi tou dzula kha khuluṋoni yawe, a vhulaya vhoṱhe vha nnḓu ya Baasha. Ho ngo sia munna na muthihi,* u katela na mashaka awe kana khonani dzawe. 12 Ngauralo, Simiri a fhelisa vha nnḓu yoṱhe ya Baasha, u tendelana na zwe Yehova a zwi amba nga ha Baasha a tshi shumisa muporofita Yehu.+ 13 Zwenezwo zwo itiswa nga zwivhi zwoṱhe zwe Baasha na murwa wawe Elaa vha zwi ita, vha ita uri Vhaisiraele vha ite tshivhi nga u sinyusa Yehova Mudzimu wa Isiraele nga midzimu yavho ya zwifanyiso i sa vhuyedzi tshithu.+ 14 Mafhungo oṱhe a Elaa na zwoṱhe zwe a ita, naa a zwo ngo ṅwaliwa buguni ya mafhungo a zwifhingani zwa kale zwa mahosi a Isiraele?

15 Nga ṅwaha wa vhu 27 hu tshi khou vhusa Khosi Asa wa Yuda, Simiri a vha khosi maḓuvha a sumbe ngei Thiritsa, musi maswole o tanga muḓi wa Gibethoni+ we wa vha u wa Vhafilisita. 16 Nga murahu maswole e a vha o tanga a pfa hu tshi pfi: “Simiri o itela khosi tshimbevha, a i vhulaya.” Vhaisiraele vhoṱhe vha vhea Omiri+ mulangammbi uri a vhe khosi kha ḽa Isiraele nga ḽeneḽo ḓuvha henefho madenndeni. 17 Omiri na Vhaisiraele vha re nae vha takuwa Gibethoni vha ya vha tanga Thiritsa. 18 Musi Simiri a tshi vhona uri muḓi wo thubiwa, a shavhela mutsheṱoni wo khwaṱhaho wa nnḓu* ya khosi a fhisa yeneyo nnḓu, a fela ngomu.+ 19 Ndi nga nṱhani ha zwivhi zwawe, a tshi ita zwi sa takadzi Yehova, a tshimbila nḓilani ya Yerobeamu na u ita uri Isiraele ḽi ite tshivhi.+ 20 Mafhungo oṱhe a Simiri na tshimbevha tshawe, naa a zwo ngo ṅwaliwa buguni ya mafhungo a zwifhingani zwa kale zwa mahosi a Isiraele?

21 Nga tshenetsho tshifhinga, vhathu vha Isiraele vha fhandekana vha vha zwigwada zwivhili. Tshiṅwe tshigwada tsha tevhela Thibini murwa wa Ginatha, tshi tshi ṱoḓa u mu vhea uri a vhe khosi, tshiṅwe tshigwada tsha tevhela Omiri. 22 Fhedzi vhane vha tevhela Omiri vha kunda vhane vha tevhela Thibini murwa wa Ginatha. Thibini a fa, Omiri a vha khosi.

23 Nga ṅwaha wa vhu 31 hu tshi khou vhusa Khosi Asa wa Yuda, Omiri a vha khosi ya Isiraele, a vhusa miṅwaha ya 12. O vhusa miṅwaha ya rathi e Thiritsa. 24 Ndi ene we a renga thavha ya Samaria kha Shemere nga talente* mbili dza siḽiva, a fhaṱa muḓi thavhani yeneyo. Wonoyo muḓi we a u fhaṱa a ri u pfi Samaria,*+ o u ira nga dzina ḽa Shemere muṋe wa thavha yeneyo. 25 Fhedzi Omiri a ḓi bvela phanḓa a tshi ita zwi sa takadzi Yehova, a kaludza u fhira vhoṱhe vhe vha vha hone phanḓa hawe.+ 26 O tshimbila nḓilani dzoṱhe dza Yerobeamu murwa wa Nebatha, a ita uri Vhaisiraele vha ite tshivhi nga u sinyusa Yehova Mudzimu wa Isiraele nga midzimu yavho ya zwifanyiso i sa vhuyedzi tshithu.+ 27 Mafhungo oṱhe a Omiri na zwe a ita na mishumo yawe ya maanḓa, naa a zwo ngo ṅwaliwa buguni ya mafhungo a zwifhingani zwa kale zwa mahosi a Isiraele? 28 Mafheleloni Omiri a vhulungwa na vhomakhulukuku wawe ngei Samaria; murwa wawe Ahaba+ a vha khosi vhudzuloni hawe.

29 Ahaba murwa wa Omiri a vha khosi ya ḽa Isiraele nga ṅwaha wa vhu 38 hu tshi khou vhusa Khosi Asa wa Yuda, Ahaba murwa wa Omiri a vhusa Isiraele e ngei Samaria+ miṅwaha ya 22. 30 Ahaba murwa wa Omiri a ita zwi sa takadzi Yehova u fhira vhoṱhe vhe vha vha hone phanḓa hawe.+ 31 Samusi o zwi dzhia zwi si tshithu u tevhedza zwivhi zwa Yerobeamu+ murwa wa Nebatha, o dovha a vhinga Isabele+ ṅwananyana wa Ethibala khosi ya Vhasidoni,+ a thoma u shumela Baali+ na u mu gwadamela. 32 Zwiṅwe hafhu, o fhaṱela Baali aḽeṱare nḓuni* ya Baali+ ye a i fhaṱa ngei Samaria. 33 Ahaba o dovha a ita thanda khethwa.*+ Ahaba a sinyusa Yehova Mudzimu wa Isiraele a kaludza u fhira vhoṱhe vhe vha vha hone phanḓa hawe.

34 Misini ya Ahaba, Hiele wa Mubethele a fhaṱulula Yeriko. Musi a tshi thea mutheo a felwa nga Abiramu tanzhe ḽawe, musi a tshi kwea mavothi ayo a felwa nga Segubu lupedzi lwawe, u ya nga zwe Yehova a zwi amba a tshi shumisa Yoshua murwa wa Nunu.+