Bugu Ya U Thoma Ya Dzikhosi

17 Elia*+ wa Mutisibe, mudzulapo wa Giḽiada,+ a amba na Ahaba a ri: “Ndi ana nga Yehova Mudzimu wa Isiraele a tshilaho, ane nda mu shumela,* kha yeneyi miṅwaha a hu nga vhi na ṅwando kana mvula, ndi sa athu u amba uri zwi vhe hone!”+

2 Yehova a amba nae a ri: 3 “Ṱuwa fhano, u livhe thungo ya vhubvaḓuvha, u dzumbame Govhani ḽa Kiriti, vhubvaḓuvha ha Yorodane. 4 U nwe maḓi a mulambwanani, ndi ḓo ruma mafunguvhu uri a u ṋee zwiḽiwa henefho.”+ 5 A ṱavhanya a ṱuwa a ita zwe Yehova a mu vhudza; a ya a dzula Govhani ḽa Kiriti, vhubvaḓuvha ha Yorodane. 6 Mafunguvhu o vha a tshi mu ḓisela vhurotho na ṋama nga matsheloni na nga madekwana, a tshi nwa maḓi a mulambwanani.+ 7 Fhedzi ho no fhela maḓuvha, mulambwana wa xa,+ nga⁠uri mvula yo vha i sa khou na shangoni.

8 Yehova a amba nae a ri: 9 “Takuwa u ye Tsarepata, une wa vha wa Sidoni, u dzule henefho. Ndi ḓo laedza tshilikadzi uri i u ṋee zwiḽiwa henefho.”+ 10 A takuwa a ya Tsarepata. Musi a tshi swika khoroni ya muḓi, a vhona tshilikadzi i tshi khou reḓa khuni. A i vhidzelela a ri: “Ndi khou humbela uri u nḓisele maḓinyana nga tshinwelo ndi nwe.”+ 11 Musi a tshi khou ya u ka maḓi, Elia a mu vhidzelela a ri: “Ndi khou humbela uri u ḓe wo mpfarela vhurothonyana.” 12 Tshilikadzi ya fhindula ya ri: “Ndi ana nga Yehova Mudzimu wau a tshilaho, a thi na vhurotho, ndi tou vha na fuḽauru ine ya ḓadza tshanḓa kha mvuvhelo khulwane na mapfuranyana kha mvuvhelo ṱhukhu.+ Ndi khou reḓa khuninyana uri ndi ye u lugiselela nṋe na murwa wanga zwa u ḽa. Musi ro no ḽa, ri kone u fa.”

13 Elia a amba nae a ri: “U songo ofha. Dzhena u ite zwe wa amba. Fhedzi thoma u mbakele khekhe ṱhukhu nga zwine wa vha nazwo, u nḓisele. Nga murahu u kone u lugiselela iwe na murwa wau zwiḽiwa. 14 Ngauri Yehova Mudzimu wa Isiraele o ri: ‘Fuḽauru i re kha mvuvhelo khulwane a i nga fheli, na mapfura a re kha mvuvhelo ṱhukhu ha nga fheli u swika ḓuvha ḽine Yehova a ḓo ita uri mvula i ne shangoni.’”+ 15 A ya a ita zwe Elia a amba, ene na Elia na muṱa wawe vha ḽa maḓuvha manzhi.+ 16 Fuḽauru ye ya vha i kha mvuvhelo khulwane i si fhele na mapfura e a vha e kha mvuvhelo ṱhukhu a si fhele, sa zwe Yehova a amba a tshi shumisa Elia.

17 Nga murahu ha zwenezwi zwithu zwoṱhe, murwa wa onoyo mufumakadzi ane a vha muṋe wa nnḓu, a lwala, vhulwadze hawe ha ṋaṋa, a fa.+ 18 Onoyo mufumakadzi a amba na Elia a ri: “Iwe mushumeli wa Mudzimu wa ngoho ndo u tshinya mini?* Naa wo ḓa u nkhumbudza vhutshinyi hanga na u vhulaya murwa wanga?”+ 19 Fhedzi a amba nae a ri: “Nṋekedze murwa wau.” A mu dzhia zwanḓani zwa mme awe a gonya nae kamarani ya nṱha, he a vha a tshi dzula hone, a mu ladza kha mmbete wawe.+ 20 A vhidzelela Yehova a ri: “Iwe Yehova Mudzimu wanga,+ naa u khou pfisa vhuṱungu na iyi tshilikadzi ine nda khou dzula nayo nga u tendela murwa wayo a tshi fa?” 21 A shuvhama luraru nṱha ha onoyo ṅwana a vhidzelela Yehova a ri: “Iwe Yehova Mudzimu wanga, ndi khou humbela uri uyu ṅwana a dovhe a tshile.” 22 Yehova a pfa zwe Elia a zwi humbela,+ vhutshilo ha uyo ṅwana ha vhuyelela khae, a dovha a tshila.+ 23 Elia a dzhia ṅwana a tsela nae nḓuni a tshi bva kamarani yawe ya nṱha, a mu ṋekedza mme awe. Elia a ri: “Vhona, murwa wau u khou tshila.”+ 24 Mufumakadzi a amba na Elia a ri: “Zwino ndi a tenda uri u mushumeli wa Mudzimu+ zwa vhukuma ngauri zwine Yehova a zwi amba a tshi shumisa iwe ndi ngoho.”