Hesekiele

38 Yehova a dovha a amba na nṋe a ri: 2 “Murwa muthu, amba na Gogo wa ngei shangoni ḽa Magogo+ murangaphanḓa muhulwane* wa Meseke na Thubali,+ u porofite nga hae.+ 3 U ambe uri, ‘Yehova Murena Muvhusahoṱhe u ri: “Iwe Gogo, ndi lwa na iwe murangaphanḓa muhulwane* wa Meseke na Thubali. 4 Ndi ḓo u humisa nda dzhenisa huka mulomoni wau,+ nda u kokodza na mmbi yau yoṱhe,+ bere na vhaṋameli vha bere, vhoṱhe vho ambara zwiambaro zwa u naka, gogo ḽihulu ḽi na zwiṱangu zwihulu na zwiṱangu zwiṱuku,* vhoṱhe vho fara mabanga; 5 vhe na Vhaperesia, Vhaetopia na Vhaphuti,+ vhoṱhe vhe na zwiṱangu zwiṱuku na magondolo; 6 Vhagomere na mmbi yavho yoṱhe, vha nnḓu ya Thogarama+ vha bvaho zwipiḓani zwa kule zwa devhula vhe na mmbi yavho yoṱhe, vhathu vhanzhi vhe na iwe.+

7 “‘“Ḓilugise, u lugise na mmbi yau ine wa vha nayo, u ḓo vha mulangammbi* wayo.

8 “‘“U ḓo vhidziwa nga murahu ha maḓuvha manzhi. Nga murahu ha miṅwaha minzhi u ḓo ṱhasela vhathu vhe vha ponyokiswa uri vha si fheliswe nga banga, vhe vha kuvhanganyelwa thavhani dza Isiraele vha tshi bva kha tshaka nnzhi, he ha vha hu shubi lwa tshifhinga tshilapfu. Vhadzulapo vha ḽeneḽi shango vho vhuiswa vha tshi bva kha dzitshaka, vhoṱhe vha dzula vho tsireledzea.+ 9 U ḓo ḓa khavho sa ḓumbu, wa tibedza shango sa makole, iwe na maswole au oṱhe na tshaka nnzhi dzine wa vha nadzo.”’

10 “Yehova Murena Muvhusahoṱhe u ri: ‘Nga ḽeneḽo ḓuvha u ḓo ḓelwa nga muhumbulo, wa vhamba maano mavhi. 11 U ḓo ri: “Ndi ḓo ṱhasela shango ḽi songo tsireledzwaho.+ Ndi ḓo ḓela vho tsireledzeaho vha sa ofhi tshithu, vhoṱhe vho dzulaho mahayani a si na mbondo kana khoro.” 12 Hu ḓo vha hu u itela u thuba na u dzhia, u ṱhasela fhethu he ha vha ho tshinyadzwa hune zwino ha vho dzuliwa+ na u ṱhasela vhathu vhe vha kuvhanganywa vha tshi bva kha dzitshaka,+ vhe vha kuvhanganya lupfumo,+ vhane vha dzula vhukati ha ḽifhasi.

13 “‘Vhasheba+ na Vhadedani,+ vhavhambadzi vha Tharasisi+ na vhahali vhavho vhoṱhe vha ḓo u vhudzisa vha ri: “Naa u khou ṱhasela uri u kone u wana zwithu zwinzhi? Naa wo kuvhanganya mmbi dzau uri u hwale siḽiva na musuku, uri u dzhie lupfumo na thundu, u dzhie zwithu zwinzhi?”’

14 “Iwe murwa muthu, porofita, u ambe na Gogo u ri, ‘Zwe Yehova Murena Muvhusahoṱhe a zwi amba ndi hezwi: “Nga ḽeneḽo ḓuvha, naa a u nga ḓo zwi ṱhogomela uri vhathu vhanga vha Isiraele vho dzula vho tsireledzea?+ 15 U ḓo ḓa u tshi bva fhethu hau, u tshi bva zwipiḓani zwa kule zwa devhula,+ u na vhathu vhanzhi, vhoṱhe vho ṋamela bere vhe mmbi khulu.+ 16 U ḓo ḓela vhathu vhanga vha Isiraele sa makole a tshi tiba shango. Maḓuvhani a vhufhelo ndi ḓo ita uri u lwe na shango ḽanga+ uri tshaka dzi kone u nḓivha musi ndi tshi ita uri ndi vhe mukhethwa nga zwine nda ḓo u ita zwone iwe Gogo.”’+

17 “Yehova Murena Muvhusahoṱhe u ri: ‘Naa a tho ngo amba nga ha iwe tshifhingani tsho fhiraho musi ndi tshi shumisa vhashumeli vhanga vha vhaporofita vha Isiraele, vhe vha porofita lwa miṅwaha minzhi uri u ḓo ḓa wa lwa navho?’

18 “‘Nga ḓuvha ḽine Gogo a ḓo ṱhasela shango ḽa Isiraele,’ u ralo Yehova Murena Muvhusahoṱhe, ‘zwi ḓo vhonala uri ndo sinyuwa.+ 19 Ndi ḓo amba ndo sinyuwa; nga ḽeneḽo ḓuvha hu ḓo vha na mudzinginyo muhulu shangoni ḽa Isiraele. 20 Nga nṱhani hanga khovhe dzoṱhe dza lwanzheni, zwiṋoni, zwivhanda na zwikokovhi zwoṱhe na vhathu vhoṱhe vha re kha ḽifhasi vha ḓo tetemela, thavha dzi ḓo wiselwa fhasi,+ luwa lwa wa, mbondo dzoṱhe dza wela fhasi.’

21 “‘Ndi ḓo mu vhidzela banga thavhani dzanga dzoṱhe,’ u ralo Yehova Murena Muvhusahoṱhe. ‘Muṅwe na muṅwe u ḓo lwa na wahawe.+ 22 Ndi ḓo mu haṱula nga u mu ḓisela malwadze+ na u shululwa ha malofha; ndi ḓo ḓisela ene, maswole awe na vhathu vhanzhi vha re nae mvula khulu, tshifhango,+ mulilo+ na tsevhela.+ 23 Ndi ḓo ḓihulisa nda ita uri ndi vhe mukhethwa na u ita uri ndi ḓivhiwe nga tshaka nnzhi; uri dzi kone u ḓivha uri ndi nṋe Yehova.’