Hesekiele

39 “Iwe murwa muthu, porofita nga ha Gogo,+ u mu vhudze uri, ‘Yehova Murena Muvhusahoṱhe u ri: “Iwe Gogo, ndi lwa na iwe murangaphanḓa muhulwane* wa Meseke na Thubali.+ 2 Ndi ḓo u humisa nda u ranga phanḓa, nda ita uri u bve kha zwipiḓa zwa kule zwa devhula+ nda u isa thavhani dza Isiraele. 3 Ndi ḓo rwa vhura hau vhu re kha tshanḓa tshau tsha monde nda ita uri misevhe yau i re kha tshanḓa tshau tsha u ḽa i we. 4 Iwe na maswole au na vhathu vhane vha vha na iwe, ni ḓo fela thavhani dza Isiraele.+ Ndi ḓo ita uri ni vhe zwiḽiwa zwa zwiṋoni* zwa mifuda yoṱhe na zwa zwivhanda.”’+

5 “‘U ḓo fela ḓakani,+ ngauri ho amba nṋe,’ u ralo Yehova Murena Muvhusahoṱhe.

6 “‘Ndi ḓo fhisa shango ḽa Magogo nga mulilo na vhane vha dzula vho tsireledzea kha zwiṱangadzime,+ ndi hone vha tshi ḓo ḓivha uri ndi nṋe Yehova. 7 Ndi ḓo ita uri dzina ḽanga ḽikhethwa ḽi ḓivhiwe vhukati ha vhathu vhanga vha Isiraele, thi nga tendi dzina ḽanga ḽikhethwa ḽi tshi dovha ḽa nyadziwa; uri tshaka dzi ḓivhe uri ndi nṋe Yehova+ Mukhethwa wa Isiraele.’+

8 “‘Zwi ḓo itea,’ u ralo Yehova Murena Muvhusahoṱhe. ‘Heḽi ndi ḓuvha ḽe nda amba nga haḽo. 9 Vhadzulapo vha miḓi ya Isiraele vha ḓo bva vha vhasa mulilo nga zwiṱangu zwiṱuku* na zwihulwane, nga vhura na misevhe, nga dzithonga na mapfumo. Vha ḓo vhasa ngazwo mulilo+ lwa miṅwaha ya sumbe. 10 Vha nga si tsha reḓa khuni ḓakani uri vha vhase ngadzo mulilo, vha ḓo shumisa zwiṱhavhane.’

“‘Vha ḓo thuba vhe vha vha thuba na u dzhia thundu dzavho kha vhe vha vha dzhiela,’ u ralo Yehova Murena Muvhusahoṱhe.

11 “‘Nga ḽeneḽo ḓuvha ndi ḓo ita uri mavhiḓa a Gogo+ a vhe henefho Isiraele govhani ḽa vhane vha tshimbila vhubvaḓuvha ha lwanzhe, a ḓo thivha nḓila ya vhane vha fhira nga henefho. Ndi henefho hune vha ḓo vhulungela Gogo na mmbi yawe yoṱhe, vha ḓo ri hu pfi Hamoni-Gogo.*+ 12 Vha nnḓu ya Isiraele vha ḓo fhedza miṅwedzi ya sumbe vha tshi khou vha vhulunga u itela u kunakisa shango.+ 13 Vhathu vhoṱhe vha ḽeneḽo shango vha ḓo vhulunga vhenevho vhathu, zwenezwo zwi ḓo u ita uri vha vhe na bvumo musi ndi tshi ḓihulisa,’+ u ralo Yehova Murena Muvhusahoṱhe.

14 “‘Vhathu vha ḓo ṋewa mushumo wa u tshimbila vha tshi vhulunga zwitumbu zwo salaho shangoni uri vha kunakise ḽifhasi. Vha ḓo bvela phanḓa vha tshi zwi ṱoḓa lwa miṅwedzi ya sumbe. 15 Arali vhane vha khou tshimbila vha vhona rambo ḽa muthu, vha ḓo ita luswayo tsini naḽo. Vhe vha ṋewa mushumo wa u vhulunga vha ḓo ḽi vhulunga Govhani ḽa Hamoni-Gogo.+ 16 Henefho hu ḓo vha hu na muḓi une wa pfi Hamona.* Vha ḓo kunakisa shango.’+

17 “Iwe murwa muthu, Yehova Murena Muvhusahoṱhe u ri: ‘Amba na zwiṋoni zwa mifuda yoṱhe na zwivhanda zwoṱhe u ri, “Kuvhanganani ni ḓe. Kuvhanganelani tshiṱhavhelo tshanga tshine nda khou ni lugiselela tshone, tshiṱhavhelo tshihulu thavhani dza Isiraele.+ Ni ḓo ḽa ṋama na nwa malofha.+ 18 Ni ḓo ḽa ṋama ya vhahali na u nwa malofha a vharangaphanḓa vha ḽifhasi na ḽa ṋama ya thutha, ya ngwana, ya mbudzi, ya kholomo na ya zwipuka zwoṱhe zwo nonaho zwa ngei Bashani. 19 Ni ḓo ḽa ṋama ya mapfura na nwa na malofha u swika ni tshi kambiwa nga tshiṱhavhelo tshe nda ni lugiselela tshone.”’

20 “‘Ṱafulani ḽanga ni ḓo ḽa ṋama ya bere, na ya vhatshimbidzi vha gariki, na ya vhahali vhoṱhe,’+ u ralo Yehova Murena Muvhusahoṱhe.

21 “‘Ndi ḓo sumbedza vhugala hanga vhukati ha dzitshaka, tshaka dzoṱhe dzi ḓo vhona musi ndi tshi haṱula na u vhona maanḓa e nda a sumbedza vhukati hadzo.+ 22 U bva nga ḽeneḽo ḓuvha vha nnḓu ya Isiraele vha ḓo ḓivha uri nṋe Yehova ndi Mudzimu wavho. 23 Tshaka dzi ḓo ḓivha uri vha nnḓu ya Isiraele vho vha vho ya vhuthubwani nga nṱhani ha vhukhakhi havho, ngauri a vho ngo fhulufhedzea kha nṋe.+ Ngauralo, nda vha dzumbela tshifhaṱuwo tshanga+ na u vha kumedzela kha maswina avho,+ uri vhoṱhe vha vhulawe nga banga. 24 Ndo vha ita zwo teaho u sa kuna havho na vhukhakhi havho, nda vha dzumbela tshifhaṱuwo tshanga.’

25 “Yehova Murena Muvhusahoṱhe u ri: ‘Ndi ḓo vhuisa mathubwa a Yakobo+ na u khathutshela vha nnḓu yoṱhe ya Isiraele;+ ndi ḓo imelela dzina ḽanga ḽikhethwa nga u fhisea.+ 26 Musi vho no shoniswa nga u sa fhulufhedzea havho kha nṋe,+ vha ḓo dzula shangoni ḽavho vho tsireledzea, a hu na ane a ḓo vha tshuwisa.+ 27 Musi ndi tshi vha vhuisa vha tshi bva kha dzitshaka na u vha kuvhanganya vha tshi bva mashangoni a maswina avho,+ ndi ḓo ita uri ndi vhe mukhethwa vhukati havho tshaka nnzhi dzi tshi zwi vhona.’+

28 “‘Ndi hone vha tshi ḓo ḓivha uri ndi nṋe Yehova Mudzimu wavho musi ndi tshi vha isa vhuthubwani vhukati ha dzitshaka, nda dovha nda vha humisela shangoni ḽavho, hu si sale na muthihi.+ 29 A thi tsha ḓo vha dzumbela tshifhaṱuwo tshanga,+ ndi ḓo shululela muya wanga kha vha nnḓu ya Isiraele,’+ u ralo Yehova Murena Muvhusahoṱhe.”