Febraro

Geovà el vol che tuti i so servi i sìpia felici. Lu l’è darente de tuti noantri e el vede quando semo desanimadi. (Sal. 145:18, 19) Par esémpio, Geovà el ga mostrà che el se preocupea tanto col profeta Elia. Elia l’era un omo fedele che el ga vivesto nte una època tanto difìcile. Tanti i odiea a quei che i servia a Geovà e arquante persone de poder le volea tanto coparlo. (1 Rè 19:1, 2) Ma Elia l’è restà ancora pi desanimà parché el pensea che ghen’era sol lu come profeta de Geovà. (1 Rè 19:10) Alora, Geovà el ga suito mandà un àngelo par assarlo sicuro che no l’era lu sol e che ghen’era tanti altri israeliti fedeli. (1 Rè 19:5, 18) Con amor, Gesù li ga assà sicuri che i servi de Dio i saria la so fameia. (Mar. 10:29, 30) E Geovà, el nostro Pare, el ga prometesto che el ndarà giutar a quei che i vol servirlo. — Sal. 9:10. w21.06 p. 8, 9 §§ 3, 4

Tanti no i vol servir a Geovà parché mostremo nela Bìblia che le religion le insegna tante robe sbaliade. Par esémpio, tanti lìderi religiosi i insegna che Dio el manda le  persone rugne a un inferno de fogo. Ma come servi de Geovà, el Dio de amor, insegnemo ale persone che questa la ze una busia. I lìderi religiosi anca i insegna che la ànima no la more mia. Ma noantri insegnemo che questo l’è una busia, parché se la ànima no la more mia, no saria bisogno la ressuression. Tante religion le insegna che quel che sucede nela vita dele persone l’è belche tuto scrito. Ma noantri ghe insegnemo che tuti ghemo la libertà de scòlier se volemo servir a Dio o nò. Tante volte, i lìderi religiosi no i ghe piase de questo e i resta cativi. Noantri no volemo esser come Sàtana, che no’l ga seità fedele. Noantri no volemo mai far robe che no le sìpia de acordo con quel che credemo. (Gioani 8:44) Se amemo la verità, ghemo de creder e meter in pràtica quel che Geovà el ne insegna. (Gioani 8:45, 46) Geovà el vol che i so servi i òdie quel che l’è sbalià e i fae quel che l’è giusto, cossita come Gesù el ga fato. — Rom. 12:9; Ebr. 1:9. w21.05 p. 10 §§ 10, 11

Cossa ghemo de far se semo belche cascadi nele tràpole del orgòlio o de voler sempre de pi? Noantri ancora podemo ndar fora dela tràpola. El apòstolo Paolo el ga dito che quei che i era cascadi nela tràpola del Diaol i podaria far questo. (2 Tim. 2:26) Mai ghemo de desmentegarse che Geovà l’è pi forte che Sàtana. Alora, se acetemo che Geovà el ne giute, saremo boni de scampar via de qualche tràpola de Sàtana. L’è bon saver che podemo ndar fora dele tràpole del orgòlio e de voler sempre de pi. Ma l’è meio ancora se gnanca no caschemo in queste tràpole. Sol saremo boni de far questo col aiuto de Geovà. Alora, ghemo de domandar a Geovà tuti i giorni che el ne giute a capir se qualche roba che pensemo o femo mostra che ghemo orgòlio o che volemo sempre de pi. (Sal. 139:23, 24) Sfòrsate par mai cascar nele tràpole del orgòlio e de voler sempre de pi. Romai fà miliari de ani che Sàtana l’è drio meter tràpole par le persone come un cassador el fà. Ma, presto lu el sarà metesto in preson e el sarà destruto. (Apo. 20:1-3, 10) L’è sicuro che te sì pròpio premoso che questo suceda! Alora, stà atento par no cascar nele tràpole de Sàtana. Sfòrsate tanto par no deventar una persona orgoliosa o che la vol sempre de pi. Métete contra el Diaol, e lu el scamparà via de ti. w21.06 p. 19 §§ 15-17

Geovà el resta tanto contento quando una persona la impara sora lu e la insegna anca ai altri. (Pro. 23:15, 16) Par esémpio, anca cola pandemia, nel ano de 2020, 7.705.765 studi dela Bìblia i ze stati fati e 241.994 persone le se ga batesà. Questi dissìpoli i ndarà far anca altri dissìpoli. (Luc. 6:40) L’è sicuro che Geovà el resta tanto contento de veder che tuti noantri semo drio insegnar ai altri sora lu. No l’è fàcile giutar una persona a deventar un dissìpolo de Gesù. Ma col aiuto de Geovà, saremo boni de giutar le persone a amarlo. Cossa te pensi de sforsarte par scominsiar al manco un stùdio dela Bìblia? Proa scominsiar un stùdio dela Bìblia con tute le persone che te parli. w21.07 p. 6, 7 §§ 14-16

El rè Davi l’è stà un bel esémpio de generosità. Lu el ga dato una mùcia de soldi e robe de valor del so tesoro par giutar a far su el témpio. (1 Cró. 22:11-16) Fursi no ghemo pi la forsa par giutar a far su posti che se dopera nela organisassion de Geovà, ma podemo far donativi de acordo con quel che semo boni. Anca podemo giutar a quei pi gióveni quando ghe parlemo sora le robe che ghemo imparà. Anca el apòstolo Paolo l’è stà generoso. Par esémpio, el ga convidà el gióveno Timòteo par laorar con lu come missionàrio. Lu el ghe ga parlà come che el fea par predicar e insegnar. (Ati 16:1-3) Cossita, Timòteo l’è deventà un bon predicador e l’è stà bon de insegnar le bone notìssie ai altri. (1 Cor. 4:17) Dopo, el ga doperà quel che el ga imparà de Paolo par insegnar i altri a far questo laoro. w21.09 p. 12 §§ 14, 15

Cossa che podemo imparar col esémpio del dissìpolo Apolo e del apòstolo Paolo? Tuti due i insegnea tanto ben, i savea tanto dele Scriture, e tante persone li cognossea. Tuti due i ga anca giutà tante persone a deventar dissìpoli. Ma Apolo e Paolo no i vedea un al altro come nemighi. (Ati 18:24) Un tempo dopo che Apolo l’è ndato via de Corinto, Paolo el ga domandà che lu el tornesse a quel posto. (1 Cor. 16:12) E quando Àchila e Prissila i ghe ga giutà a capir meio le Scriture, la Bìblia no la dise che Apolo l’è restà disgustà. (Ati 18:24-28) Semo sicuri che Apolo l’era un omo ùmile, che el doperea le so bele qualità par parlar dele bone notìssie e par incoraiar ai fradei. El apòstolo Paolo el savea che Apolo el fea un bel laoro, ma no lo vedea come un nemigo. Paolo el gavea umiltà, sabedoria e el savea quel che l’era bon e quel che no l’era bon de far. — 1 Cor. 3:4-6. w21.07 p. 18 §§ 15-17

Adon e Eva i ga scoliesto desobedir a Dio. Ma cossa che ndaria suceder con tute le persone che le ndaria nasser dopo de Adon e Eva? Geovà el ga dato el so ùnico Fiol come sacrifìssio, e cossita 144.000 umani obedienti i podea far parte dela fameia de Dio. (Rom. 8:15-17; Apo. 14:1) Quel che Geovà el ga fato mostra che el ga un grando amor par le persone. (Gioani 3:16) I 144.000 che i ga la speransa de viver nel cielo, i ze drio far sforso par obedir a Dio. Ma ghen’è anca altri milioni de persone che i ze drio far questo, e i speta esser fioi de Dio dopo dela prova nel fin dei mila ani. (Sal. 25:14; Rom. 8:20, 21) Par quela che ancoi queste persone belche le ciama a Geovà, el so Creador, de “Pare”. (Mat. 6:9) Anca quei che i sarà ressussitadi i podarà far parte dela fameia de Geovà se i impara sora lu e i lo obedisse. w21.08 p. 5 §§ 10, 11

El apòstolo Paolo l’è stà scoliesto par predicar ale persone dele nassion. Questo laoro l’era la roba pi importante par lu. Par quela el predichea par la strada, nel comèrsio e anca de casa in casa. (Ati 20:20) E lu el se sforsea par predicar a tute le persone che el podea. Par esémpio, quando Paolo l’era drio spetar arquanti fradei in Atena, el ga predicà le bone notìssie a arquante persone importante e lore lo ga scoltà. (Ati 17:16, 17, 34) E Paolo el predichea anca quando l’era in preson. (Fil. 1:13, 14; Ati 28:16-24) Paolo el doperea dela meio maniera el so tempo. Lu el gavea caro de predicar insieme coi fradei par insegnarghe a esser bravi predicadori. Par esémpio, nel primo viaio che Paolo el ga fato par predicar e visitar le congregassion, el ga portà insieme Marco, e nel secondo el ga portà Timòteo. (Ati 12:25; 16:1-4) Paolo el doperea el tempo che el gavea con questi fradei par giutarli a saver come tender de una congregassion, dei fradei e come esser bravi de insegnar la Parola de Dio. — 1 Cor. 4:17. w22.03 p. 27 §§ 5, 6

Arquanti no i crede in Dio parché i dise che i crede sol in quel che i vede. Ma come che i fà creder in tante robe che no i vede, come par esémpio, el vento? Parché i ga prove che ghen’è el vento. E la fede che la Bìblia la parla la ze compagna. Noantri credemo che ‘una roba la ze vera, anca se no la vedemo, par causa dele prove che ghen’è’. (Ebr. 11:1) Ma ghe vol tempo e sforso par studiar le prove che ghen’è. E tanti no i vol farlo e cossita i pol pensar che no ghen’è Dio. Tanti studiosi fursi no i credea che Dio el ga creà tuto parché no i lo ga imparà nela università. Ma arquanti de lori i ga studià le prove che Dio el ga creà la Tera, e i ga scominsià a cognosser a Geovà e a amarlo. No vol dir se ghemo poco o tanto stùdio, ghemo de far pi forte la nostra fede in Geovà. w21.08 p. 14 §§ 1; p. 15, 16 §§ 6, 7

Gesù el ga contà la ilustrassion del fiol che l’è ndato via de casa par insegnarne che Geovà el ama esser misericordioso. El fiol dela ilustrassion el ga magnà fora tuto quel che el gavea e el ga fato bruti pecati. (Luc. 15:13) Dopo de un tempo, lu el se ga ciamà gramo, el se ga umilià e l’è tornà casa. Ma cossa che so pare el ga fato? Gesù el ga dito: ‘Quando lu no l’era gnancora rivà, so pare lo ga visto e el ghe ga fato pecà. Lu l’è ndato de carera e el ghe ga dato un strucon e lo ga basà con tanto amor.’ Invesse de dirghe su, el pare l’è stà misericordioso, el ga perdonà el so fiol e l’è restà tanto contento de gaverlo casa. El fiol el gavea fato bruti pecati, ma el se ga ciamà gramo, e so pare lo ga perdonà. Geovà el fà compagno a questo pare. Par meso de questa ilustrassion, Gesù el ga mostrà che Geovà el vol tanto perdonar quei che i se ciama grami. — Luc. 15:17-24. w21.10 p. 8 § 4; p. 9 § 6

I lìderi religiosi no i vol che le persone le cognossa el nome de Dio. Par esémpio, lori i ga tirà via el nome de Dio dele Bìblie e i ga anca proibio de doperarlo nele ciese. Ma le Testimònie de Geovà le ze el pòpolo che l’è drio darghe glòria al nome de Dio. Varda le prove. Noantri semo la religion che la ze drio insegnar el nome de Dio ale persone de pi che tute le altre religion. Noantri ghemo belche stampà de pi de 240 milioni dela Tradução do Novo Mundo da Bíblia Sagrada, che ghen’è el nome de Dio nei posti che i lo ga tirà via nele altre Bìblie. E noantri femo publicassion che le ga el nome de Dio in de pi de 1.000 léngue. Noantri semo drio far pròprio quel che Geovà el vol dele so testimònie! — Isa. 43:10-12. w21.10 p. 20, 21 §§ 9, 10

Noantri adoremo a Geovà quando giutemo i nostri fradei. Geovà el ga prometesto ai israeliti che el ndaria benedir quei che giutesse ai poareti. (Deu. 15:10) La Bìblia anca la dise che quando giutemo un fradel o una sorela che ghe ocore l’è come se fùssino drio darghe un presente a Geovà. (Pro. 19:17) Par esémpio, varda quel che ga sucedesto quando el apòstolo Paolo l’era in preson. I fradei de Filipo i ga mandà qualcossa par giutarlo e Paolo el ga dito che quel l’era un sacrifìssio che ghe piasea a Dio. (Fil. 4:18) Cossa che anca noantri podemo far? Pensar nei fradei e sorele dela nostra congregassion che ghe ocore de aiuto. Geovà el resta tanto contento quando doperemo del nostro tempo, dela nostra forsa, quel che savemo e i nostri soldi par giutar a quei che i ga de bisogno. Par Geovà, giutar i nostri fradei l’è una maniera de adorarlo. (Tia. 1:27) Ghemo de sforsarse e tor del nostro tempo par adorar a Geovà, ma no l’è mia fadiga de farlo. (1 Gio. 5:3) Parché nò? Parché lo femo par amor a Geovà e ai nostri fradei. w22.03 p. 24 §§ 14, 15

Sol saremo boni de mostrar compassion par i nostri fradei se pensemo nele dificoltà che lori i infronta. Par esémpio, pol esser che una sorela la gàpia una bruta malatia. Fursi la gàpia bisogno de aiuto, ma la parla poco dele so dificoltà. Alora, podemo domandarse: ‘Sarà che la ghe piaseria ricever aiuto par far de magnar o par netar la casa?’ O fursi un fradel no’l gàpia pi el so laoro. Sarà che te pol giutarlo in quel che el ga de bisogno fin che el cate nantro laoro? Fursi te pol giutarghe con un pochetin de soldi, ma lu no ghe ocore saver che te sì stà ti dàrghelo. Lu el fà el sol vegner su tuti i giorni sensa che nissun lo domande. El caldo del sol el giuta le persone bone e rugne a viver. Geovà l’è tanto bondoso e generoso parché el ne dà tuto quel che ghemo de bisogno. Noantri lo amemo tanto par causa de questo. Alora, podemo far come Geovà? Ghemo de star atenti a quel che i nostri fradei i ga de bisogno e ndar giutarli. w21.09 p. 22, 23 §§ 12, 13

Geovà el perdona parché el ga tanto amor leal. Par esémpio, Geovà el perdona una persona che la se ga ciamà grama e la se ga fermà de far quel che l’è sbalià. Davi el ga dito sora Geovà: “Lu no’l ne trata de acordo coi nostri pecati, gnanca el fà a noantri quel che meritemo par causa dei nostri sbali.” (Sal. 103:8-11) Davi el savea che l’è tanto bruto sentir colpa. Ma lu anca el savea che Geovà el vol tanto perdonar. Davi el ga dito nel testo de ancoi che Geovà el vol tanto far questo parché el ga tanto amor leal a quei che i domanda el so perdon. Se ghemo fato un pecato, l’è importante restar disgustadi. Cossita, sarà pi fàcile ciamarse grami e cambiar quel che ne ocore. w21.11 p. 5 §§ 11, 12

Geovà el ama el so nome e el vol che tuti i lo rispete. (Isa. 42:8) Fà sei mila ani che el so nome l’è disonorà. (Sal. 74:10, 18, 23) Questo el ga scominsià a suceder quando el Diaol (che vol dir “Caluniador”) el ga dito che Dio no’l volea dar a Adon e Eva quel che i gavea de bisogno. (Gén. 3:1-5) E anca ancoi tanti i ze drio dir questa busia contra Dio. Gesù l’è restà tanto preocupà par causa de questo. El Diaol el ga proà imbroiar àngeli e anca umani par farli pensar che Dio no’l ga el dirito de governar. Ma sol Geovà el ga el dirito de governar i cieli e la Tera, e sol lu el sa la meio maniera de farlo. (Apo. 4:11) Ma de qua un poco tuti i saverà che sol el Regno de Dio ne darà la vera pace par viver nela Tera. w21.07 p. 9 §§ 5, 6

Quei che i ze paroni de fameia i se preocupa tanto de dar ala so fameia quel che la ga de bisogno. Sicuro che restemo tanto preocupadi se no ghemo i soldi che ne ocore par viver. Questo l’è drio suceder con ti? Alora, dopera el to tempo par far pi forte la to fede. Come che te pol farlo? Prega a Geovà e pensa sora le parole de Mateo 6:25-34. Pensa anca in come Geovà l’è drio tender dei so servi fedeli ancoi. (1 Cor. 15:58) Cossita, te sarè sicuro che Geovà el sa de quel che te ghè de bisogno e che el ndarà tender anca de ti. Sentir el aiuto de Geovà ndarà giutarte a gaver una fede pi forte e a infrontar le dificoltà che vegnarà pi avanti. w21.11 p. 20 § 3; p. 21 § 6

Tanti de quei che i ndea drio a Gesù i ga bio una fede pi forte dopo che i ga imparà sora el so sacrifìssio. Lori i ga infrontà tante dificoltà, ma i ga seità a predicar anca che i fusse veci e che le persone le volesse fermarli. Un de questi esempi l’è stà del apòstolo Gioani. Lu el ga predicà sora Cristo e sora el so sacrifìssio intorno de 60 ani. Alora, quando el gavea quasi 100 ani, le autorità de Roma le pensea che lu l’era un perìcolo e lo ga metesto in preson nela ìsola de Patmo. Parché che i ga fato questo? Parché lu el ga predicà sora Dio e sora Cristo. (Apo. 1:9) L’è sicuro che Gioani l’è un bel esémpio parché el gavea una forte fede e el seitea a perseverar! I libri che Gioani el ga scrito i mostra che lu el amea tanto a Gesù e l’era tanto grato par el so sacrifìssio. Nei libri che el ga scrito, lu el ga parlà de pi de 100 volte sora el sacrifìssio de Gesù e come questo l’è importante par noantri. (1 Gio. 2:2) L’è sicuro che Gioani el ghe dea tanto valor al sacrifìssio de Gesù. w21.04 p. 17 §§ 9, 10

Geovà el vol che mostremo bontà a quei che i ga problemi fìsichi. Par esémpio, i israeliti no i podea dirghe su a una persona che no la scoltea, parché no la saria bona de risponder. Sicuro che far questo con una persona che no la scoltea, saria una roba tanto bruta. Levìtico 19:14 anca el dise che i israeliti no i podea meter gnente davanti de un orbo par farlo strabucarse. Cossita, lori i ga capio che i gavea de esser bondosi con quei che i gavea problemi fìsichi. Un libro che el parla sora come le persone le tratea quei che i gavea problemi fìsichi in quela època, el ga dito: “Lori i era imbroiadi e tratadi tanto mal.” Par esémpio, pol esser che arquanti i metesse qualcossa aposta davanti dei orbi sol par farli cascar. Che roba bruta! w21.12 p. 8, 9 §§ 3, 4

Giacò l’è restà tanto preocupà parché el pensea che el so fradel, Esaù, lo odiea. Par quela, lu el ga pregà a Geovà e el ghe ga parlà tuto quel che l’era drio suceder intrà lu e so fradel. Seconda, lu el ga mandà tanti presenti al so fradel. (Gén. 32:9-15) Tersa, quando Giacò l’è ndato catar Esaù, lu lo ga tratà tanto ben e el se ga fin indenocià sete volte davanti de lu. Sicuro che Giacò l’è stà bon de far la pace col so fradel parché l’è stà ùmile e el ghe ga mostrà rispeto. (Gén. 33:3, 4) Cossa podemo imparar col esémpio de Giacò? Lu l’è stà ùmile e el ga domandà el aiuto de Geovà. Dopo, el ga fato el meio che el podea par far la pace col so fradel. Savemo che questo l’era la roba pi importante par lu parché no’l ga proà mostrar chi che gavea sbalià. Come che te pol far compagno a Giacò? — Mat. 5:23, 24. w21.12 p. 25 §§ 11, 12

Quando te pensi che Gesù l’è morto par i to pecati, fursi te disi: ‘Mi no mèrito questo.’ Ma cossa che pol farne pensar cossita? El nostro cuor. Lu el pol farne pensar che no ghemo mia valor e che no meritemo ricever el amor dei altri. (1 Gio. 3:19) Cossa che podemo far quando scominsiemo a pensar cossita? Ghemo de ricordarse che Geovà el ne ama tanto e el vol perdonarne. El amor e el perdon de Geovà i ze tanto pi forte che qualche bruto sentimento che ghemo. Ghemo de imparar a acetar che Geovà el ne ama. Noantri sol saremo sicuri de questo se studiemo sempre la so Parola, preghemo sempre a lu e acetemo el aiuto dei nostri fradei. Parché che ghemo de far queste robe? Ti te vè imparar sora le bele qualità de Geovà e esser sicuro che lu el te ama tanto. Studiar la Bìblia tuti i giorni ndarà giutarte a cambiar quel che ocore in quel che te pensi e quel che te senti. — 2 Tim. 3:16. w21.04 p. 23, 24 §§ 12, 13

Par gaver una forte fede, no basta sol gaver cognossensa. Ghemo de pensarghe sora quel che imparemo sora Geovà. Varda quel che ga sucedesto col scritor del Salmo 77. Lu l’è restà tanto preocupà parché el pensea che Geovà no’l volea pi che i israeliti i fusse el so pòpolo. Par causa de questo, no l’era gnanca bon de dormir. (Versìcoli 2-8) L’è vera che el savea cossa Geovà el gavea belche fato par el so pòpolo, ma anca cossita, lu el ga dito: ‘Te te ghè desmentegà de giutarne o sarà che te te sì fermà de mostrar misericòrdia parché te sì restà cativo?’. (Versìcolo 9) Cossa che el ga fato dopo de questo? Lu el ga dito che el ndaria pensarghe sora tuto quel che Geovà el gavea belche fato. (Versìcolo 12) Alora, lu el ga pensà sora questo e sora la misericòrdia che Geovà el gavea belche mostrà al so pòpolo. (Versìcolo 11) Come questo lo ga giutà? Pensarghe sora lo ga assà sicuro che Geovà mai el ndaria abandonar el so pòpolo. (Versìcolo 15) w22.01 p. 30 §§ 17, 18

Come che Geovà el se sente par causa dei so amighi che i ze morti? Lu l’è tanto premoso de vederli nantra volta! (Giò 14:15) L’è sicuro che Geovà el vol tanto veder el so servo Abraon nantra volta. (Tia. 2:23) E anca a Moisè, che i se parlea “fàcia a fàcia”. (Éso. 33:11) E anca de scoltar Davi e altri scritori dei Salmi cantar bei càntichi par lodarlo! (Sal. 104:33) Tuti questi servi leai i ze belche morti, ma Geovà no’l se ga mia desmentegà de lori. (Isa. 49:15) Geovà l’è premoso par ressussitar queste persone, scoltar le so orassion e vederle adorarlo. Se l’è morto qualchedun che te ami, pensar in quel che Geovà el sente pol consolarte tanto. Nel giardin del Èden, Geovà belche el savea che, vanti de finir fora col sofrimento, le robe le ndaria restar pedo. Ma Geovà el òdia veder che ghen’è tante robe rugne e tanta violensa. w21.07 p. 10 § 11; p. 12 § 12

Noantri mostremo che ghe demo valor al sacrifìssio de Gesù quando mostremo amor ai nostri fradei. Come cossita? Gesù el ga dato la so vita par ti e anca par i to fradei. Se lu l’è morto par lori, anca lori i ze pressiosi. (1 Gio. 3:16-18) Come che podemo mostrar che amemo i nostri fradei? Par esémpio, quando li tratemo con bontà. (Efe. 4:29, 31–5:2) Noantri podemo giutar i nostri fradei quando lori i ze maladi o quando i ze drio infrontar una dificoltà come qualche desgràssia. Ma cossa che podemo far quando restemo disgustadi par causa de qualcossa che un fradel el ga fato o el ga dito par noantri? Te pensi che no te sì mia bon de perdonar? (Lev. 19:18) Se questo te ga belche sucedesto, mete in pràtica el consìlio: “Seité soportarve un al altro e a perdonarve del tuto un al altro, anca se qualchedun el ga rason par brontolar contra nantra persona. Cossita come Geovà el ve ga perdonà del tuto, valtri gavé de far compagno.” (Col. 3:13) Quando te perdoni el fradel, te mostri a Geovà che te dè valor al sacrifìssio del so Fiol. w21.04 p. 17, 18 §§ 12, 13

Cossa che imparemo del esémpio de Paolo e Apolo? Podemo far tanto nel laoro a Geovà e giutar tanti a batesarse. Ma savemo ben che l’è par causa dela benedission de Geovà che semo boni de far questo. El esémpio de lori anca el ne insegna che, quando ghemo tanti laori de far nela congregassion, noantri ghemo anca bele oportunità par mostrar che volemo viver in pace. Semo tanto grati de gaver ansiani e servi ministeriai che i ne giuta a viver in pace e union. Lori i fà questo quando i dopera la Bìblia par dar consili, quando no i vol esser pi importanti che i altri e quando i giuta i fradei a obedir a Gesù e a ndar drio al so esémpio. (1 Cor. 4:6, 7) Tuti noantri ghemo ricevesto abilità de Dio. Ma fursi te pensi che no te fè tante robe. Se te pensi cossita, proa ricordarte che quel che te fè l’è come i punti che se fà par cosir una roba. Par causa de questi pìcoli punti, diverse parte de una roba le resta unide. Alora, sfòrsate tanto par no voler esser meio che i altri, e fà el meio che te pol par viver in pace coi fradei nela congregassion. — Efe. 4:3. w21.07 p. 19 §§ 18, 19

Te pol esser sicuro che quei che te ami i sarà ressussitadi. Parché? Parché quando Gesù el ga piandesto insieme cola fameia de Làsaro lu el ga anca mostrà che el vol tanto ressussitar quei che i ze morti. (Gioani 11:35) Te pol giutar quei che i ze drio sofrir par causa dela morte de qualchedun. Gesù el ga piandesto con Marta e Maria, ma lu le ga anca scoltà e consolà. (Gioani 11:25-27) Noantri podemo far come Gesù. Varda cossa che Dan, che l’è un ansiano dela Austràlia, el ga dito: “Dopo che la me dona la ze morta, go bio bisogno de tanto aiuto. Arquante fameie le me ga dito che mi podea dirghe quel che me ocorea. Quando mi ero insieme con lori, mi podea parlarghe tuto quel che ero drio sentir e piander. Lori anca i preghea con mi. Nei giorni che no ero bon de far gnente, lori i netea el me auto, i fea compre e i me fea de magnar. Lori i ga mostrà che i era veri amighi e che i volea giurtarme in questo bruto colpo.” — Pro. 17:17. w22.01 p. 16 §§ 8, 9

Geovà el vol che sempre vae tuto ben nela nostra vita. (Pro. 4:20-22) Lu el mostra che el ne ama quando el ne dà consili. Par esémpio, lu el pol darne un consìlio par meso dela Bìblia, dele publicassion o de un bravo fradel. (Ebr. 12:9, 10) Pensa nel consìlio, e nò nela maniera che la persona lo ga dato. L’è vera che la persona che la ne dà un consìlio la ga de farlo con bontà. (Gàl. 6:1) Ma cossa ghemo de far se no ne ga piasesto la maniera che la ne ga dato el consìlio? Ghemo de pensar nel consìlio e cossa che podemo imparar con lu. Podarìssino pensar cossita: ‘Anca che no me ga piasesto la maniera che la me ga parlà, posso imparar qualcossa e meterla in pràtica? Sarà che son bon de fermarme de pensar nei sbali che la persona la fà e imparar con quel che la ga dito?’ Quando se sforsemo de imparar qualcossa dei consili che ricevemo, mostremo sabedoria. w22.02 p. 12, 13 §§ 13, 14

Geovà el sa che ghe vol tempo fin che se fermemo de pensar e far robe sbaliade. (Sal. 103:13, 14) Ma lu el dopera la Bìblia, el so spìrito santo e la so organisassion par giutarne a gaver la forsa e la sabedoria par farlo. Alora, te pol doperar la Bìblia par saver quel che te ghè de cambiar. La Bìblia la ze come un spècio che ne giuta a veder se quel che parlemo, femo o pensemo l’è sbalià. (Tia. 1:22-25) E Geovà el pol giutarte a saver le qualità che belche te ghè e quel che te toca ancora cambiar. Lu el pol anca mostrarte come studiar le publicassion che le ndarà giutarte a farlo. Ricòrdate che Geovà el te cognosse tanto ben e che el ga caro de giutarte. (Pro. 14:10; 15:11) Par quela, sfòrsate par pregar a Geovà e studiar la Bìblia tuti i giorni. E sìpia sicuro che tuto quel che Geovà el te domanda de far l’è el meio par ti. Quei che obedisse a Dio i ze contenti de far quel che l’è giusto, i sa cossa far nela so vita e i ze pròpio felici. — Sal. 19:8-11. w22.03 p. 4 §§ 8-10

Noantri adoremo a Geovà quando giutemo a far su e a tender dei nostri posti de adorassion. La Bìblia la mostra che l’era un laoro sacro giutar a far su el tabernàcolo e tute le robe che ghen’era rento. (Éso. 36:1, 4) Ancoi, giutar a far su Saloni del Regno e altri posti dela organisassion anca l’è un laoro sacro par Geovà. Noantri demo valor ai fradei e ale sorele che i dopera tanto del so tempo par farli. Lori anca i laora nela predicassion e fursi arquanti i gavaria caro de esser pionieri. I ansiani i mostra che i giuta el laoro de costrussion quando i aprova come pionieri questi bravi fradei e sorele. Cossa podemo far se no semo bravi de giutar a far su questi posti? Podemo giutar a tenderli e a netarli. w22.03 p. 22 §§ 11, 12