Marso

“Le piégore” dela ilustrassion in Mateo 25:31-36 le ze quei che i serve a Dio nela època del fin e che i ga la speransa de viver nela Tera, o sia, le “altre piégore”. Lore le ze drio giutar i untadi che ancora i ze qua nela Tera. Par esémpio, lore le ze drio giutarli a predicar e a far dissìpoli (Mat. 24:14; 28:19, 20) Tuti i ani, le altre piégore le giuta i untadi a convidar le persone par ndar ala Selebrassion. Lore le fà questo in tuto el mondo nele stimane vanti dela Selebrassion. Le altre piégore le giuta a pareciar la Selebrassion. Le altre piégore le resta contente de giutar i so fradei untadi, parché le sa che le ze drio giutar anca a Cristo. — Mat. 25:37-40. w22.01 p. 22, 23 §§ 11, 12

Alora, quando femo compagno a Gesù, semo drio far compagno anca a Geovà. E quanto de pi femo compagno le qualità de Geovà, pi forte sarà la nostra amicìssia con lu. Noantri podemo far compagno le qualità de Gesù e tratar le persone come lu le tratea. Par esémpio, un leproso ghe ga fato pecà, lu el ga bio compassion de una dona che la era drio sofrir par causa de una malatia e anca de quei che i gavea perso qualchedun che i amea nela morte. (Mar. 1:40, 41; 5:25-34; Gioani 11:33-35) Se femo compagno a Gesù, saremo boni de seitar a far le robe pi importante. Poco vanti de morir, Gesù el ga dito: “Mi go vinsesto el mondo.” (Gioani 16:33) Parché? Gesù no’l ga mai assà che gnente che le persone le parlesse, le fesse o pensesse lo intrighesse de far quel che l’era pi importante. La roba pi importante par lu la era santificar el nome de Geovà. Cossa che imparemo? Ghen’è tante robe nel mondo che le pol intrigarne de far el nostro meio a Geovà. Par quela, ghemo de far compagno a Gesù e no assar che gnente ne intrighe de far la volontà de Geovà. Cossita, anca noantri podaremo dir che ghemo ‘vinsesto’ el mondo. — 1 Gio. 5:5. w21.04 p. 3, 4 §§ 7, 8

El apòstolo Paolo el credea nela promessa de Gesù che ‘tuti quei che i credesse in lu i gavaria vita eterna’. (Gioani 3:16; Rom. 6:23) Paolo l’era sicuro che Geovà el vol perdonar a tuti che i se ciama grami, anca quei che i gàpia fato bruti pecati. (Sal. 86:5) Paolo l’era sicuro che Geovà lo amea, parché el savea che Geovà el gavea dato Gesù par morir anca par lu. Parché che savemo che Paolo el pensea cossita? Par esémpio, nel fin de Gàlati 2:20, lu el ga dito: ‘El Fiol de Dio el me ga amà e el ga dato la so vita par mi.’ Alora, Paolo no’l pensea che Geovà el amea sol ai altri fradei e a lu nò. Paolo anca el ga dito ai romani: ‘Cristo l’è morto par noantri intanto che èrino pecadori.’ (Rom. 5:8) Alora, podemo esser sicuri che Geovà el ama a tuti i so servi! Paolo l’era sicuro che Geovà lo amea tanto. Lu el savea che Geovà el gavea mostrà passiensa coi israeliti e che la gavea mostrà anca a lu. w21.04 p. 22 §§ 8-10

Quando te sì drio insegnar el to studiante, te ghè de giutarlo a amar a Geovà. Come che podemo far questo? Ghemo sempre de parlarghe sora le bele qualità de Geovà. Ghemo de giutarghe a capir che Geovà l’è un Dio felice e che lu sempre el giuta a quei che i lo ama. (1 Tim. 1:11; Ebr. 11:6) Ghemo de giutar el studiante a capir che quel che la Bìblia la dise l’è el meio e che l’è una prova che Geovà lo ama. (Isa. 48:17, 18) De pi che el studiante el ama a Geovà, de pi voia el gavarà de cambiar quel che ghe ocore. Vanti de batesarse, un studiante el ga de far arquanti cambiamenti. Par esémpio, se un studiante el ga un laoro che ghe toca far qualcossa che disgusta a Geovà, fursi el gàpia de cambiar el so laoro. O pol esser che lu el gàpia amighi che no i ama a Geovà, alora el gavarà de fermarse de ndar insieme con lori. O anca fursi la so fameia no la parle pi con lu parché no la ghe piase dele Testimònie de Geovà. Ma Gesù el ga anca dito che la persona che la fesse questo mai la se ciamaria grama e la saria benedida con una fameia de fradei che la amaria tanto. — Mar. 10:29, 30. w21.06 p. 4 §§ 8, 9

El apòstolo Paolo el ga dito che el laoro de far dissìpoli l’è come piantar. Lu el ga mostrà che no basta mia sol piantar le semense. Lu el ga dito ai fradei de Corinto: ‘Mi go piantà, Apolo el ga dato àqua . . . Valtri sì el campo che Dio l’è drio laorar.’ (1 Cor. 3:6-9) Noantri laoremo nel campo che l’è de Dio. Quando noantri predichemo l’è come se fùssino drio piantar semense. Quando ghe insegnemo, l’è come se fùssino drio darghe àqua ale semense. Ma noantri semo sicuri che l’è Dio che el fà le semense cresser. L’è un grando onor predicar e insegnar ai altri sora la Bìblia, e noantri restemo tanto contenti de far questo laoro. El apòstolo Paolo el ga giutà tanti in Tessalònica a deventar dissìpoli de Gesù e el ga dito sora lori: “Quala che la ze la nostra speransa, alegria o corona de orgòlio davanti del nostro Signor Gesù, ntela so presensa? No sì pròpio valtri? Sicuro che valtri sì la nostra glòria e alegria.” — 1 Tes. 2:19, 20; Ati 17:1-4. w21.07 p. 3 § 5; p. 7 § 17

Geovà el ga scoliesto a cada un de noantri par esser so amigo. (Gioani 6:44) Gheto belche pensà sora questo? Lu el ga vardà bilioni de persone in tuto el mondo e el ga visto che te gavei un cuor sinsiero e che te ndarissi amarlo. (1 Cró. 28:9) Alora, Geovà el te cognosse, el te capisse e el te ama. L’è tanto bon saver de questo. Geovà el se preocupa con ti, ma anca con tuti i fradei. La ilustrassion de Gesù sora un pastor ne giuta a capir meio questo. Cossa che el pastor, che el ga 100 piégore, el fà se una la se perde? Lu el ‘assa le 99 e e el va in serca de quela che la ze persa’. Quando la cata, lu no’l resta cativo cola piégora, ma el resta contento. Cossa che imparemo? Geovà l’è come el pastor e el ghe vol ben a tute le piégore. Gesù el ga dito: “La voia del me Pare, che l’è nel cielo, la ze che gnanca un de questi pìcoli i se perde.” — Mat. 18:12-14. w21.06 p. 20 §§ 1, 2

Quando pensemo sora el amor che Geovà el ga par noantri, lo amemo de pi e deventemo ancora de pi so amighi. (Rom. 8:38, 39) Ne giuta anca a gaver ancora de pi voia de far come Gesù. (1 Pie. 2:21) Vanti dela Selebrassion, ledemo nela Bìblia quel che ga sucedesto con Gesù nei giorni vanti de morir. El discorso dela Selebrassion el ne giuta a ricordarse del amor che Gesù el ga mostrà par noantri. (Efe. 5:2; 1 Gio. 3:16) Quando studiemo sora la vita de Gesù e pensemo sora, gavaremo ancora de pi voia de far compagno a lu. (1 Gio. 2:6) Ne giuta anca a voler esser amighi de Geovà par sempre. (Giuda 20, 21) Seitaremo a esser amighi de Geovà se lo obedimo, femo quel che lo assa contento e parlemo sora lu ai altri. (1 Gio. 5:3; Pro. 27:11; Mat. 6:9) Dopo de ndar ala Selebrassion, gavaremo voia de dir a Geovà: “Mi te amo tanto e vui servirte par sempre!” w22.01 p. 23 § 17; p. 25 §§ 18-19

Geovà el ne ga dato la libertà de scòlier. Alora, podemo scòlier quel che volemo far dela nostra vita. Questa libertà pol giutarne a far tante bone dessision. Par esémpio, podemo scòlier servir a Geovà e quando scoliemo far questo, lo assemo tanto contento. (Sal. 84:11; Pro. 27:11) Gesù e i so apòstoli i era tanto strachi e i ze ndati fin un posto par riposar un pochetin. Alora, tante persone le ze ndate drio a lori parché le volea scoltar quel che Gesù el insegnea. Ma, Gesù no’l se ga mia inrabià con lore parché quele persone le ghe fea pecà. Par quela, lu el ga scominsià a insegnarghe tante robe. (Mar. 6:30-34) Come che podemo far come Gesù? Podemo scòlier far quel che l’è meio ai altri, invesse de pensar in noantri. Par esémpio, podemo doperar el nostro tempo e la nostra forsa par giutar ai altri. — Mat. 5:14-16. w21.08 p. 3 §§ 7, 8

Geovà el ghe piase che le robe le sìpia difarente una del’altra. Noantri savemo de questo parché ghen’è difarenti tipi de piante, bèstie e persone. Alora podemo esser sicuri che Geovà mai el fà comparassion intrà noantri e i altri. Invesse, lu el cognosse el nostro cuor, el sa quel che semo boni e quel che no semo mia boni de far e come semo stati slevadi su. (1 Sam. 16:7) Alora, Geovà no’l ne domanda de far una roba che no semo boni de far. E noantri ghemo de pensar come Geovà el pensa sora noantri stessi. Cossita, no ndaremo pensar che semo meio o pedo che altri. (Rom. 12:3) Noantri podemo imparar tanto col bel esémpio dei altri. (Ebr. 13:7) Par esémpio, fursi te cognossi un fradel che l’è bravo nela predicassion, e te pol imparar tanto con lu. (Fil. 3:17) Ma ghen’è una granda difarensa intrà far compagno e far comparassion con una persona. w21.07 p. 20 §§ 1, 2

Noantri ghemo de seitar a vardar e a imparar de pi sora le bèstie, le piante e le stele. (Sal. 19:1) Cossita, saremo pi sicuri che Geovà el ga creà tute le robe. Noantri podemo anca leder le publicassion dela organisassion de Geovà che parla sora le robe che lu el ga creà. Fursi, pensemo che l’è fadiga capir arquanti artìcoli, ma no ghemo mia de desister de lederli. Ghemo de sforsarse par capir tuto quel che podemo. E no ghemo de desmentegarse de veder nantra volta i vìdei che ghen’è nel site jw.org sora la creassion che ghemo bio nei ùltimi congressi. Quando vardemo la creassion, ghemo de pensar cossa che la ne insegna sora Geovà. (Rom. 1:20) Par esémpio, del Sol vien el caldo che ghemo de bisogno par viver qua nela Tera. Ma anca vien fora una forsa che la ze tanto pericolosa par noantri. Alora, cossa che ne dà protession? Intorno dela Tera, ghen’è el gàs osònio, che no’l assa mia questa forsa far mal ale persone. Se el Sol el fà vegner fora de pi de quela forsa pericolosa, questa protession anca la resta pi forte. No te sì de acordo che ghen’è un Creador che el ga fato questa roba e che el te vol tanto ben e el ga tanto saver? w21.08 p. 17 §§ 9, 10

Ma come che podemo seitar a mostrar amor par lori quando i deventa nostri fradei? (1 Gio. 4:20) Par esémpio, quando un fradel el fà qualcossa che ne assa disgustadi, no ndaremo pensar che el ga fato aposta. Invesse, ghemo de darghe onor e pensar che lu l’è pi importante che noantri. (Rom. 12:10; Fil. 2:3) Alora, noantri ghemo de esser misericordioso e bondoso con tute le persone. Se volemo ciamar Geovà de nostro Pare, ghemo de meter in pràtica tuto quel che la Bìblia la dise. Par esémpio, Gesù el ga dito che ghemo de esser misericordiosi e bondosi con tute le persone, fin coi nostri nemighi. (Luc. 6:32-36) Ma se l’è fadiga far questo, ghemo de imparar a pensar e a far le robe compagno a Gesù. Alora, quando se sforsemo par obedir a Geovà e far come Gesù, mostremo a Geovà che volemo far parte dela so fameia par sempre. w21.08 p. 6 §§ 14, 15

Impara a fidarte in Geovà. Se noantri se fidemo in Geovà e femo el meio che podemo par servirlo, lu el ndarà benedirne. Nela Bìblia, ghen’è tanti esempi de persone che le se ga sforsà par far el so meio a Geovà. Tanti i ga bio de far qualcossa vanti de Geovà benedirli. Par esémpio, Abraon l’è ndato via de casa sensa saver ndove l’era drio ndar, e sol dopo Geovà lo ga benedio. (Ebr. 11:8) Giacò el ga bio una granda benedission, ma sol dopo de lotar con un àngelo. (Gén. 32:24-30) Quando el pòpolo de Israel l’era drio ndar ala Tera Prometesta, lori i gavea de ndar de quel’altra banda del rio Giordon. Lori i ze stati boni de ndar sol dopo che i sasserdoti i ga metesto i pié nela àqua. (Giosuè 3:14-16) Ancoi tanti fradei i se fida in Geovà e i se sforsa par far el so meio nel laoro de predicassion. w21.08 p. 29, 30 §§ 12-14

I fradei pi veci i ga visto che le robe le càmbia e che anca lori i ga de cambiar. Anca i fradei pi veci che i se ga batesà fà poco, i pol giutar tanto ai altri. Quei pi gióveni i restarà tanto contenti de scoltar le so stòrie e de quel che i ga imparà. Sicuro che i fradei pi veci i sarà tanto benedidi par Geovà, parché i ze generosi e i parla ai altri sora le so bele stòrie. (Luc. 6:38) Se i gióveni e i fradei pi veci i ze amighi, lori i pol giutarse un al altro. (Rom. 1:12) I pi veci i ga la sabedoria e la speriensa e i pi gióveni i ga la forsa e tanta voia de laorar. Quando i laora insieme come amighi, lori i loda a Geovà e i ze una benedission par la congregassion. w21.09 p. 8 § 3; p. 13 §§ 17, 18

Gesù l’è stà morto nte un pal de tortura. Alora, tanti giudei no i ga volesto creder in Gesù parché ghe parea che lu el fusse un criminoso e un pecador, e nò el Messia. (Deu. 21:22, 23) Tanti giudei no i ga volesto creder in arquante robe sora Gesù. Par esémpio, che Gesù no’l gavea fato gnente de sbalià, che le persone le ga dito busie sora lu e che lu no l’è stà tratà con giustìssia. La Bìblia la dise che i giuisi i ga giulgà a Gesù de colpo e che no i ga obedio ale lege sora giulgamenti. (Luc. 22:54; Gioani 18:24) Se quei giuisi i fusse giusti, lori i ndaria proar saver se quel che le persone le gavea dito sora Gesù l’era la verità, o nò. Invesse de far questo, i ze ndati in serca de persone che le disesse busie contra Gesù par coparlo. (Mat. 26:59; Mar. 14:55-64) Dopo che Gesù l’è stà ressussità, quei giuisi i ga dato arquante monede de argento ai soldadi che i era drio tender del sepolcro de Gesù. Lori i volea che questi soldadi i contesse busie sora cossa che gavea sucedesto col corpo de Gesù. — Mat. 28:11-15. w21.05 p. 11 §§ 12, 13

Geovà el podaria finir fora con tute queste robe rugne nela ora che el volesse. Questo l’è tanto bon par noantri. Tuti noantri semo imperfeti. Anca cossita, Geovà el tende de noantri con tanto amor e el promete finir fora con tute le robe rugne che ghen’è ancoi. (1 Gio. 4:19) Geovà el pol finir fora col sofrimento, e el ga belche scoliesto la ora de far questo. Veder che Geovà el ne ama tanto cossita ne dà forsa par perseverar. Geovà l’è el meio esémpio de perseveransa. Gesù el ga fato compagno a so Pare. Lu el ga perseverà anca se le persone le ghe ga dito su, lo ga umilià e lo ga picà su nte un pal de tortura. (Ebr. 12:2, 3) L’è sicuro che el esémpio de perseveransa de Geovà el ga dato forsa par Gesù perseverar. Anca noantri podemo gaver questa forsa. w21.07 p. 12, 13 §§ 15-17

Tuti giorni sentimo la misericòrdia del nostro Pare Geovà. (Sal. 103:10-14) Gesù el ga fato come so Pare parché el ga sempre mostrà misericòrdia e el ga perdonà i so dissìpoli, anca che i fusse imperfeti. Gesù anca el ga dato la so vita par perdonar i so pecati. (1 Gio. 2:1, 2) Quando perdonemo de volentiera, la fameia de Geovà la resta pi unida. (Efe. 4:32) Ma pol esser fadiga perdonar, par quela ghemo de sforsarse par farlo. Una roba che ga giutà una sorela la ze stata el artìcolo dela Sentinela che el parlea sora come perdonar de volentiera. Ela la ga scrito: “El artìcolo me ga giutà a capir che, quando mi perdono, no vol dir che son de acordo con quel che la persona la ga fato o che no son restada disgustada. Go capio che perdonar vol dir no seitar disgustada con quel che ga sucedesto e sentir nantra volta la pace.” Cossita, quando perdonemo i nostri fradei de volentiera, mostremo che ghe volemo ben e anca che semo drio far compagno a Geovà, el nostro Pare. w21.09 p. 23, 24 §§ 15, 16

Gesù el amea la verità sora Dio e sora quel che lu el vol far. Gesù el ga vivesto de acordo con quel che el savea sora Geovà, e el ga parlà sora questo ai altri. (Gioani 18:37) Anca i dissìpoli de Gesù i amea tanto la verità sora Geovà. (Gioani 4:23) Par esémpio, el apòstolo Piero el ga dito che la religion che la va drio a Cristo la ze ‘la strada dela verità’. (2 Pie. 2:2) Par quela che i dissìpoli no i credea in quel che le altre religion le disea, no i ndea drio a tradission, a culture e a tuto quel che altri i parlea che no l’era de acordo cola verità sora Geovà. (Col. 2:8) I dissìpoli de Gesù ancoi i fà la medèsima roba. Lori i se sforsa de seitar a caminar nela “strada dela verità”. Come che i fà questo? Lori i crede e i vive de acordo con quel che l’è nela Parola de Geovà. (3 Gio. 3, 4) Noantri amemo tanto la verità sora la Bìblia e sora Geovà. Ma noantri no pensemo che savemo pròpio tuto. Par quela che, dele volte, le Testimònie de Geovà le spiega un testo de maniera sbaliada o ghe toca cambiar la maniera de far le robe nela congregassion. w21.10 p. 21, 22 §§ 11, 12

Nel passà, ghen’era muri intorno dele cità par protegerle dei nemighi. El amor leal de Geovà l’è come questi muri parché el protege la nostra amicìssia con lu. E l’è stà par causa del so amor leal che Geovà el ne ga fato cognosserlo. (Ger. 31:3) El salmista Davi anca el ga scrito sora la protession che Geovà el dà ai so servi: ‘Dio l’è la me protession, el Dio che el mostra amor leal.’ Davi el ga anca dito: ‘Geovà el me trata con amor leal, lu l’è la me tore forte, la me protession, el me scudo ndove son bon de catar un posto par protegerme.’ (Sal. 59:17; 144:2) Alora, Geovà el ndarà proteger la nostra amicìssia con lu, no importa ndove semo de star. w21.11 p. 6 §§ 14, 15

Gesù e i so dissìpoli i era drio far un viaio de barco, e de colpo, ga scominsià una tempesta. La tempesta la restea cada volta pi bruta e vegnea tanta àqua rento el barco, ma Gesù el seitea a dormir. I dissìpoli i ze restadi tanto spauradi e i ga desmissià Gesù par domandarghe che li giutesse. Alora, Gesù el ga doperà quel lì par mostrarghe che i gavea bisogno de pi fede. (Mat. 8:23-26) Con amor, Gesù el ghe ga domandà: “Parché che valtri gavé tanta paura e parché che ve manca fede?” Fursi te sì ansioso parché ga sucedesto una desgràssia nel posto che te sì de star, o fursi te sì desanimà par causa de una bruta malatia. Ma seita a fidarte cada volta de pi in Geovà. Come che te pol far questo? Prega a lu e ricordarte dele volte che el te ga belche giutà. (Sal. 77:11) Sìpia sempre sicuro che Geovà no’l va mai abandonarte. w21.11 p. 22 §§ 7, 10

Sarà che ciavar una persona vol dir sol ciapar una roba che la ze soa? Nò! Par esémpio, se un israelita el fusse drio vender qualcossa e el doperesse i pesi e le mesure sbaliade, lu l’era drio ciavar. Levìtico 19:13 dise par no imbroiar i altri quando i fesse negossi. Alora, lori i capia che se i imbroiesse una persona quando i fesse negossi, i saria anca drio ciavarla. Cossita, lori i era boni de meter in pràtica de maniera giusta el comandamento de no ciavar i altri. Anca noantri ghemo de capir cossa Geovà el pensa sora ciavar i altri. E ghemo de domandarse: “Sarà che mi go de cambiar qualcossa nel me laoro o nela maniera che mi fao i negossi?” w21.12 p. 9, 10 §§ 6-8

Quando te preghi a Geovà, parla dei sbali che te ghè fato in quel giorno e domanda che el te perdone. Se te ghè fato un bruto pecato, te ghè de domandar aiuto anca ai ansiani. Lori i ndarà scoltarte e darte boni consili dela Parola de Dio. Lori i ndarà pregar con ti e domandar che Geovà el te perdone par meso del sacrifìssio de Gesù. Cossita, te podarè esser amigo de Geovà nantra volta. (Tia. 5:14-16) Fursi ti te sofri quando te pensi che el Fiol de Dio el ga sofrio tanto. Ma se te seiti a pensar nel sacrifìssio, te ndarè amar cada volta de pi a Gesù e a Geovà. Noantri demo ancora de pi valor al sacrifìssio de Gesù quando noantri ndemo ala Selebrassion dela morte de Cristo tuti ani. Mostremo che demo valor al sacrifìssio anca quando convidemo tute le persone che semo boni par ndar ala Selebrassion. Noantri restemo tanto contenti de insegnar ai altri sora Gesù! w21.04 p. 18, 19 §§ 13-16

Vedemo un esémpio. Una mùcia de gente la ze ndata catar Gesù nte un monte. Ma Gesù l’era straco parché el gavea pregà tuta la note. Ma come quele persone le ghe ga fato pecà, lu el ga guario tute quele che le era malade e el ga anca fato el pi bel e el pi importante discorso che le persone le ga belche scoltà. (Luc. 6:12-20) Gesù el giutea le persone anca quando el volea restar lu sol. Vedemo un esémpio. Sicuro che Gesù el ga sofrio tanto quando el ga savesto che Gioani Batista l’era morto. La Bìblia la dise: “Quando Gesù el ga scoltà questo [sora la morte de Gioani], l’è ndato via de lì nte un barco, fin un posto pi tranquilo, par restar lu sol.” (Mat. 14:10-13) Gesù no’l ga podesto restar sol parché una mùcia de gente la ga savesto ndove lu l’era drio ndar e le ze rivade prima che lu. (Mar. 6:31-33) Lu el ga visto che quele persone le era distante de Geovà e che le gavea bisogno de aiuto. — Luc. 9:10, 11. w22.02 p. 21 §§ 4, 6

Cossa ghemo de far se ghemo disgustà a qualchedun? Ghemo de pregar a Geovà e domandarghe che el ne giute a far la pace col nostro fradel. Cossa pol giutarne a scoltar la voce de Gesù e far la pace col nostro fradel? Ghemo de farse queste domande: ‘Sarà che son ùmile par dirghe che go sbalià e domandarghe scusa? Mi vao far la pace col me fradel de volentiera par assar Geovà e Gesù contenti?’ Noantri ghemo de esser ùmili quando ndemo domandar scusa al nostro fradel. (Efe. 4:2, 3) Ghemo de ndar parlar con lu e far tuto quel che podemo par far la pace con lu e par tornar a esser so amigo. Ricòrdate che far la pace l’è pi importante che saver chi che ga sbalià. — 1 Cor. 6:7. w21.12 p. 25, 26 §§ 13-16

Gesù el ga piandesto parché el savea che quasi tute le persone in Gerusalen no le ndaria scoltarlo. Alora, Gesù el ga dito che Gerusalen la saria destruta e che arquanti giudei i saria menadi come schiavi. (Luc. 21:20-24) E questo el ga pròpio sucedesto parché lori no i lo ga scoltà. Fursi nel posto che te sì de star, le persone anca no le vol scoltar le bone notìssie. Geovà el se preocupa cole persone. Capimo questo parché Gesù el ga piandesto quando le persone in Gerusalen no le ga volesto scoltarlo. Par quela che la Bìblia la dise: ‘Geovà no’l vol che gnanca un el sìpia destruto, ma el vol che tuti i se ciame grami.’ (2 Pie. 3:9) Anca noantri mostremo che se preocupemo e che amemo le persone quando le giutemo a imparar sora le bone notìssie. — Mat. 22:39. w22.01 p. 16 §§ 10-12

Se pensemo sora quel che Geovà el ga belche fato par el so pòpolo e par noantri, ndaremo far pi forte la nostra fede. Ma el pi importante l’è che ndaremo amar cada volta de pi a Geovà. Cossita, voleremo obedirghe, seitar a far quel che l’è giusto e far quel che ghe piase anca quando no l’è fàcile. (Mat. 22:37-39; 1 Cor. 13:4, 7; 1 Gio. 5:3) El nostro amor par Geovà e la nostra amicìssia con lu le ze le robe pi importante par noantri. (Sal. 63:1-7) Ricòrdate che quando te preghi, te studi e te pensi sora, te sì drio adorar a Geovà. Alora, fà come Gesù e proa catar un posto tranquilo par far queste robe. Intanto che te le fè, sfòrsate de star pròpio atento e domàndaghe a Geovà che el te giute a far questo. Se te doperi el to tempo dela meio maniera che ghen’è, Geovà el te darà la vita eterna in Paradiso. — Mar. 4:24. w22.01 p. 30, 31 §§ 18-20

Noantri femo quel che pensemo. Par quela che Gesù el ga dito che no ghemo de pensar in robe che le pol farne sbaliar. (Mat. 5:21, 22, 28, 29) Ma cossa che ghemo de far se scominsiemo a pensar nte una roba sbaliada? Ghemo de fermarse suito de farlo se volemo assar Geovà contento. Gesù el ga dito che parlemo quel che ghemo nel nostro cuor. (Mat. 15:18) Le robe che parlemo le mostra quel che semo. Alora, domàndate: ‘Parlo sempre quel che l’è vero, anca quando no l’è el meio par mi? Mi rispeto el me sposo o la me sposa, e trato i altri òmini o le altre done dela maniera giusta? Mi son drio sforsarme par no parlar robe sporche? Sarà che mi son bon de restar tranquilo anca quando i altri i me dise su?’ Pensar sora queste domande ndarà giutarne a saver quel che ghemo de cambiar. Sarà pi fàcile che cavemo via la vècia personalità se noantri se fermemo de dirghe su ai altri, dir busie e parlar robe sporche. w22.03 p. 5 §§ 12-14

Quei che i domanda consili i fà meio dessision e i deventa pi bravi servi de Geovà che quei che no i lo fà. Alora, ghemo de sforsarse par domandar consili ai altri. Quando che fursi podarìssino domandar consili ai altri? Varda arquanti esempi: (1) Una sorela la domanda a una brava predicadora che la vae insieme con ela nte un stùdio. Dopo, la ghe domanda come che la podaria insegnar meio. (2) Una sorela gióvena la domanda a nantra pi vècia che robe de meter su saria meio che la compresse. (3) Un fradel el ndarà far el so primo discorso. Alora, lu el domanda a un fradel che el fà bei discorsi che lo scolte e che ghe dae consili. Ma anca i fradei che belche i fà bei discorsi i ga de domandar consili ai altri. Cossita, lori i sarà boni de insegnar cada volta meio. — Pro. 19:20. w22.02 p. 13 §§ 15-17

Geovà el ghe volea tanto ben a Gesù e lo ga sempre giutà. Geovà el fà la medèsima roba anca con cada un de noantri. (Gioani 5:20) Geovà el ga giutà Gesù a seitar a gaver una forte fede, lo ga incoraià quando l’era preocupà e el ga tendesto de quel che el gavea de bisogno. Geovà el ga anca assà el so Fiol sicuro che lo amea e che l’era contento con lu. (Mat. 3:16, 17) Gesù mai el se ga sentio sol parché el so Pare l’era sempre drio giutarlo. Come Gesù, noantri ghemo visto tante volte che Geovà el ne ama. Par esémpio, Geovà el ne assa esser so amighi e el tende de noantri par meso dei nostri fradei. I nostri fradei i ne giuta e i ne incoraia quando semo desanimadi. (Gioani 6:44) Geovà anca el ne dà quel che ghemo de bisogno par seitar a gaver una forte fede. Lu anca el ne giuta a gaver quel che ghemo de bisogno par viver. (Mat. 6:31, 32) Quando pensemo nel amor che Geovà el ga par noantri, anca el nostro amor par lu el resta pi forte. w21.09 p. 22 §§ 8, 9

Come la era la to vita vanti de studiar la Bìblia cole Testimònie de Geovà? Tanti no ghe piase gnanca ricordarse. Lori i pensea e i fea le robe come le persone del mondo, no i gavea speransa e no i cognossea a Dio. (Efe. 2:12) Ma dopo che te ghè scominsià a studiar la Bìblia, te ghè capio che Geovà l’è come un Pare che el te ama tanto. Te ghè anca capio che te gavarissi de cambiar arquante robe nela to vita e nela to maniera de pensar par contentar a Geovà e far parte dela so fameia. Cossita, el to stùdio dela Bìblia el te ga giutà a capir che te gavarissi de far quel che Geovà el dise che l’è giusto e fermarte de far quel che el dise che l’è sbalià. (Efe. 5:3-5) Geovà el pol dirne quel che ghemo e quel che no ghemo de far parché lu l’è el nostro Pare e el ne ga creà. Par esémpio, lu el dise che vanti che se batesemo, ghemo de cavar via la vècia personalità e fermarse de far le robe sbaliade. w22.03 p. 2 §§ 1-3

Le altre piégore le resta tanto contente de ndar ala Selebrassion. Lore le ghe piase de ndar ala Selebrassion anca parché el discorso le giuta a pensar nela bela speransa che le ga. Questo discorso el parla sora quel che Gesù e i 144 mila i ndarà far nei Mila Ani del Governo de Cristo. Par esémpio, lori i farà dela Tera un paradiso e i giutarà le persone a deventar perfete. Sicuro che tuti i resta maraveiadi de pensar come sarà viver qua nela Tera quando sucederà quel che l’è scrito nele professie de Isaia 35:5, 6, 65:21-23 e Apocalisse 21:3, 4. Pensar sora come sarà bel viver nel Paradiso cola nostra fameia e amighi fà pi forte la nostra speransa e la nostra voia de servir a Geovà par sempre. — Mat. 24:13; Gàl. 6:9. w22.01 p. 21 §§ 5-7

Gesù el ga dato la so vita par comprar indrio quel che Adon el gavea perso. (1 Cor. 15:22) Parché che l’era Gesù che el gavea de dar la so vita? Parché Geovà l’è giusto e la lege che lu el gavea dato ai israeliti la disea che se gavaria de dar vita par vita. (Éso. 21:23, 24) Adon el gavea perso la so vita umana perfeta. Alora, par causa dela giustìssia de Geovà, Gesù el gavaria de dar la so vita umana perfeta par comprar indrio quel che Adon el gavea perso. (Rom. 5:17) Cossita, lu l’è deventà el “Pare Eterno” de tuti quei che i ga fede nel so sacrifìssio. (Isa. 9:6; Rom. 3:23, 24) Parché che Gesù l’è restà fedele e el ga volesto dar la so vita umana perfeta? Parché lu el ama tanto al so Pare e a noantri. (Gioani 14:31; 15:13) El amor de Gesù lo ga giutà a seitar fedele e a far la volontà del so Pare. Cossita quel che Geovà el volea par le persone e par la Tera ndaria suceder. w21.04 p. 14, 16 §§ 2, 3