April

Gesù el ga mostrà che el ama a tuti quando el ga fato questo sacrifìssio de volentiera. (Gioani 15:13) Sicuro che mai saremo boni de amar a Geovà e a Gesù tanto cossita. Alora cossa podemo far? Podemo mostrar che semo grati par meso de quel che femo tuti i giorni. (Col. 3:15) I untadi i ga la speransa de viver nel cielo, i ga una amicìssia con Geovà e i deventa i so fioi par causa del sacrifìssio de Gesù. (Rom. 5:1; 8:15-17, 23) Le altre piégore le pol esser amighe de Geovà e passar con vita par la granda tribolassion par causa del sacrifìssio de Gesù. (Apo. 7:13-15) Alora, i untadi e le altre piégore i dà tanto valor al sacrifìssio de Gesù. (Mat. 20:28) Lori i mostra questo quando i va ala Selebrassion dela morte de Gesù tuti i ani. w22.01 p. 23 §§ 14, 15

La pedo roba par Gesù l’è stà esser condanà par una roba bruta che no’l gavea mia fato. Le persone le ga parlà che lu no’l gavea rispeto par Dio, gnanca par el so nome. (Mat. 26:64-66) Lu l’era drio sofrir tanto par causa de questo e el ga domandà al so Pare che no lo assesse infrontar quela roba. (Mat. 26:38, 39, 42) Gesù l’è stà picà su nte un pal par liberar i giudei dela maledission. (Gàl. 3:10) I giudei i ze stati maledidi parché lori i gavea prometesto obedir a Dio e no i ga mia obedio. Cossita, lori i ndaria morir parché i era fioi de Adon, e anca parché i ze stati maledidi. (Rom. 5:12) La lege de Geovà la disea che la persona che la fesse un bruto pecato che meritea la morte, la gavaria de esser copada. Dopo, el so corpo el podaria esser picà su nte un pal e la lege anca la disea che questa persona la era maledeta. (Deu. 21:22, 23; 27:26) Alora, l’era come se Gesù el fusse maledio nel posto del lori. Cossita el sacrifìssio de Gesù el podaria salvar anca ai giudei che i lo gavea abandonà. w21.04 p. 16 §§ 5, 6

Nela note che Gesù el saria morto, i soldadi romani i lo ga ciapà e i ghe ga dato bote. (Mat. 26:52-54; Gioani 18:3; 19:1) I soldadi i ga doperà una scùria che la sbrega la carne par darghe nela schena de Gesù. Dopo, i soldadi i ga mandà che Gesù el portesse un pal che el pesea tanto. Lu el ga scominsià a portarlo, ma i soldadi romani i ga mandà che nantro omo lo portesse. (Mat. 27:32) Quando Gesù l’è rivà nel posto che el saria morto, i soldadi i lo ga inciodà nel pal par le man e par i pié. Col tempo ghe fea pi mal le man e i pié par causa dei ciodi. Lu el ga anca visto che i so amighi e la so mare i era drio piander e che i giudei i era drio riderghe drio. (Luc. 23:32-38; Gioani 19:25) Lu l’era drio sofrir tanto. El so cuor e i so palmoni i era drio fermarse e ghe fea fadiga tirar el fià. Cola poca forsa che el gavea, lu el ga pregà a Geovà, dopo el ga sbassà la testa e l’è morto. (Mar. 15:37; Luc. 23:46; Gioani 10:18; 19:30) Gesù el ga sofrio tanto, l’è stà umilià e l’è morto pian pian. w21.04 p. 16 § 4

Gesù el ga parlà ai so 11 apòstoli fedeli sora el novo acordo e el acordo par un Regno. (Luc. 22: 20, 28-30) Par causa de questi acordi, i apòstoli e tanti altri i pol deventar rè e sasserdoti nel cielo. (Apo. 5:10; 14:1) Sol i untadi che i ze ancora qua nela Tera i pol magnar del pan e bever del vin nela Selebrassion parché i fà parte de questi acordi. Geovà el ghe ga dato la speransa de viver nel cielo, de mai pi morir, de laorar insieme con Gesù e con tuti i altri untadi e de esser boni de veder a Geovà. (1 Cor. 15:51-53; 1 Gio. 3:2) Ma i untadi i sa che i ga de esser fedeli a Geovà fin la so morte par viver nel cielo. — 2 Tim. 4:7, 8; Tito 2:13. w22.01 p. 20, 21 §§ 4, 5

Quando Gesù l’era picà su nel pal, ghen’era due criminosi insieme. (Luc. 23:40, 41) Un de lori el ga dito a Gesù: “Ricòrdate de mi quando te vè rento el to Regno.” (Luc. 23:42) Gesù el podea dar quela speransa al criminoso parché lu el savea che Geovà el ga tanta misericòrdia. (Sal. 103:8; Ebr. 1:3) Geovà el vol tanto perdonar e mostrar misericòrdia par cada un de noantri. Ma lu el ndarà far questo sol se noantri se ciamemo grami de quel che ghemo fato de sbalià e se mostremo che credemo nel sacrifìssio del so Fiol. (1 Gio. 1:7) Fursi arquanti no i ze boni de creder che Geovà el pol perdonarli. Ma se te te senti cossita, pensa sora quel che ga sucedesto col criminoso. Gesù el ga mostrà misericòrdia a un criminoso che l’era drio scominsiar a creder in lu. Alora, te pol esser pròpio sicuro che Geovà el va mostrar te misericòrdia. — Sal. 51:1; 1 Gio. 2:1, 2. w21.04 p. 9 §§ 5, 6

Par meso dela so lealtà, Gesù l’è stà bon de far arquante robe. Prima, lu el ga provà che Sàtana l’è un busier. Lu el ga mostrà che un umano el pol seitar fedele fin la morte, no importa quel che Sàtana el fae. Seconda, Gesù el ga dato la so vita come sacrifìssio. Cossita, tuti noantri podemo esser amighi de Dio e gaver la speransa de viver par sempre. E tersa, Gesù el ga dato onor al nome de Dio e el ga provà che Geovà l’è el meio governante. Noantri volemo doperar tute le oportunità par mostrar che semo fedeli a Geovà. Cossita, anca se ne tochesse morir, podarìano dir: “Geovà, mi go fato tuto quel che podea par seitar fedele a ti, par provar che Sàtana l’è un busier, par parlar del to nome ale persone e par provar che te sì el meio governante!.” w21.04 p. 12 §§ 13, 14

Gesù l’è stà condanà par una roba che lu no’l gavea fato. Dopo, le persone le ghe ga dito su, le ghe ga dato bote e lo ga picà su nte un pal de tortura. Gesù l’era inciodà par le man e par i pié, alora, l’era fadiga parlar e ghe fea mal tirar el fià. Ancora che l’era fadiga, Gesù el ga parlà, parché el gavea robe importante par dir. Noantri ghemo visto che quel che Gesù el ga parlà vanti de morir el ne insegna tanto. Ghemo imparà che ghemo de perdonar ai altri e fidarse che Geovà anca el ndarà perdonarne. Restemo contenti de gaver fradei e sorele che i vol sempre giutarne. Ma, ghemo de domandarghe aiuto quando ghemo de bisogno. Anca Geovà el ndarà giutarne a infrontar tute le dificoltà. Ghemo de viver tuti i giorni come se i fusse la ùltima oportunità par mostrar che semo fedeli a Geovà. Ghemo anca de fidarse che Geovà el ndarà ressussitarne se morimo. w21.04 p. 8 § 1; p. 13 § 17

Se noantri femo compagno a Gesù, riceveremo la vita eterna. Quando un gióveno che l’era sior el ga domandà a Gesù cossa che el gavea de far par viver par sempre el ghe ga rispondesto: “Vien e sìpia me dissìpolo.” (Mat. 19:16-21) Quando Gesù l’era drio parlar coi giudei che no i credea che lu l’era el Cristo, lu el ga dito: ‘Le me piégore le me vien drio. Mi ghe dao vita eterna.’ (Gioani 10:24-29) Ma, come che mostremo che credemo in Gesù? Noantri ghemo de meter in pràtica quel che lu el ne ga insegnà e far compagno a lu. Se femo queste robe, ndaremo seitar fedeli a Geovà e podaremo viver par sempre. (Mat. 7:14) Noantri sol saremo boni de far compagno a Gesù se lo cognossemo ben. Noantri ghemo de seitar a cognosser le so qualità, cossa che el pensa e i so prinsipi. Alora, anca se fà tanti ani che servimo a Geovà, ghemo de seitar a sforsarse par cognosser meio a Geovà e a Gesù. w21.04 p. 4 §§ 9, 10

Vanti de imparar la verità, Paolo el ndea drio i seghidori de Cristo par coparli o meterli in preson. (Ati 26:10, 11) Par quela, Paolo el se ciamea gramo par le robe che el gavea fato. Lu el ga anca dito che l’era el pedo dei pecadori. (1 Tim. 1:15) Lu el sofria tanto par causa de questo. Par esémpio, l’è sicuro che Paolo el ndaria restar pròpio disgustà se el catesse un gióveno che l’è restà òrfano par causa de lu. Ma Paolo el savea che no’l podea cambiar quel che gavea belche sucedesto. Alora, lu el ga dessidio acetar che Gesù l’era morto anca par lu. Lu el ga dito: “Mi son quel che mi son par causa dela bontà imèrita de Dio.” (1 Cor. 15:3, 10) Cossa che te pol imparar de questo? Te ghè de acetar che Gesù l’è morto anca par ti e cossita te pol esser amigo de Geovà. (Ati 3:19) Fursi te resti disgustà par causa de una roba che te ghè fato. Ma no stà sofrir par causa dele robe che le ga belche sucedesto. Pitosto, ricòrdate che Geovà el vede quel che te sì drio far e quel che te ndarè far de qua avanti, e nò i sbali che te ghè belche fato. — Isa. 1:18. w21.04 p. 23 § 11

Tanti giudei del tempo de Gesù no i pensea che el Messia el gavaria de morir. Ma la Bìblia la gavea belche dito che Gesù el ndaria dar la so vita, che el vegnaria par el perdon dei pecati, ndaria morir par i pecadori e che el saria morto intrà i pecadori. (Isa. 53:12) Alora, la maniera che Gesù l’è stà morto la gavea de assar i giudei sicuri che Gesù l’era el Messia. Ghemo de ndar in serca par saver se una roba la ze vera o nò. Quando Gesù l’era nel Monte dei Oliveri, el ga dito ale persone che tanti i ndaria contar busie contra i so dissìpoli. (Mat. 5:11) L’è Sàtana che el fà questo. Lu el dopera quei che i òdia i servi de Geovà par contar busie sora lori. (Apo. 12:9, 10) Noantri mai ghemo de scoltar queste busie e gnanca assar che le fae la nostra fede restar pi fiaca o che ne fae gaver paura. w21.05 p. 12 §§ 14, 16

Giuta el to studiante dela Bìblia a fidarse in Geovà. Gesù el ga assà i so dissìpoli sicuri che Geovà li amea e che sempre li giutaria. (Mat. 10:19, 20, 29, 30) Anca noantri ghemo de giutar el nostro studiante a esser sicuro che Geovà el ndarà giutarlo. Par esémpio, podemo pregar insieme con lu sora quel che el ga dessidio far par Geovà. Franciszek, dela Polònia, el ga dito: “El me istrutor sempre el parlea nele orassion sora quel che mi gavea dessidio far par Geovà. E quando go visto che Geovà l’era drio giutarme, anca mi go scominsià a pregar a lu. Geovà el me ga giutà quando go cambià de laoro e go bio de parlar col me paron sora i giorni par ndar al congresso e ale riunion.” Geovà el ghe vol tanto ben ai nostri studianti dela Bìblia. Geovà anca el ama tanto i istrutori parché el sa che lori i laora tanto par giutar i altri a capir la verità sora Dio. (Isa. 52:7) Se no te ghè un stùdio dela Bìblia, te pol ndar insieme coi fradei che i ga. Cossita anca ti te pol giutar questi studianti a batesarse. w21.06 p. 7 §§ 17, 18

Noantri mostremo che demo valor ala Bìblia quando la ledemo sempre. Mai ghemo de pensar: “Vao studiar la Bìblia quando go tempo.” Invesse, ghemo de torse el tempo par leder e studiar la Bìblia e seitar a farlo. Cossita, gavaremo sempre una forte fede. Tanti studiosi no i ga fede nela Parola de Dio. Ma noantri ghemo fede nela Bìblia. (Mat. 11:25, 26) La Bìblia la ne giuta a capir parché che ghen’è tanti problemi e a saver cossa che Geovà el ndarà far par risolverli. Alora, fà pi forte la to fede e giuta i altri a creder che ghen’è un Creador. (1 Tim. 2:3, 4) Seita a spetar el giorno che le parole de Apocalisse 4:11 le ndarà realisarse: “Degno te sì, Geovà, nostro Dio, de ricever la glòria . . . parché te ghè creà tute le robe.” w21.08 p. 19 §§ 18-20

I ansiani i ga de dar consili ai fradei quando ghe ocore. Lori i ga de sforsarse de dar boni consili ai altri. Cossita, i fradei i gavarà voia de meterli in pràtica e i restarà contenti. (Pro. 27:9) I ansiani i dà consili ai so fradei parché li ama. Par quela che quando i vede che un fradel el va far qualcossa sbaliada, lori i ghe dà consili. (Gàl. 6:1) Vanti de farlo, lori i pol pensar sora le parole de 1 Corinti 13:4, 7. In questo testo, el apòstolo Paolo el ga dito: “El amor l’è passiente e bon. . . . El soporta tute le robe, el crede in tute le robe, el ga speransa in tute le robe, el persevera in tute le robe.” Quando el ansiano che el va dar un consìlio el pensa sora quel che dise questo testo, el sarà bon de dar el consìlio con amor e mostrar ala persona che ghe vol ben. Cossita, sarà pi fàcile che la persona la scolte el consìlio. w22.02 p. 14 § 3; p. 15 § 5

Geovà el ga creà i àngeli e le persone perfete. Ma, un dei so àngeli no’l ga volesto pi obedirghe e l’è deventà Sàtana, che vol dir “Opositor”. Dopo, Adon, Eva, altri àngeli e altre persone i ze ndati drio a Sàtana e anca no i ga volesto pi obedir a Dio. (Giuda 6) L’è sicuro che Geovà l’è restà tanto disgustà de esser tradio. Anca cossita, Geovà l’è drio infrontar questo con perseveransa fin quando el ndarà finir fora coi rugni. L’è sicuro che tuti quei che i ze drio perseverar come Geovà i ze premosi par veder questo! Sàtana el ga dito che Giò e tuti i servi de Geovà sol i ndaria far quel che l’è giusto parché i volaria qualcossa indrio. (Giò 1:8-11; 2:3-5) Ancoi, Sàtana el seita a dir che le persone sol le serve a Dio parché le vol qualcossa indrio. (Apo. 12:10) Cossa che podemo far par provar che Sàtana l’è un busier? Provemo che lu l’è un busier quando infrontemo le dificoltà con perseveransa, seitemo leai e mostremo che amemo tanto a Geovà. w21.07 p. 9 § 7, 8

El apòstolo Paolo el ga mostrà che l’è tanto importante cambiar quel che ne ocore quando el ga dito che ghemo de picar su nel pal la vècia personalità. (Rom. 6:6) Questo vol dir che ghemo de far compagno a Gesù. Lu el ga volesto dar la so vita come sacrifìssio par contentar a Geovà. Anca noantri volemo sforsarse par fermarse de far le robe che Geovà el òdia. Cossita, lo assaremo contento, no se sentiremo pi in colpa e gavaremo la vita eterna. (Gioani 17:3; 1 Pie. 3:21) Geovà no’l ndarà cambiar quel che l’è giusto o sbalià par contentarne. Invesse, noantri che ghemo de cambiar quel che ne ocore par contentarlo. (Isa. 1:17,18; 55:9) Fursi anca dopo del batésimo, te gavarè voia de far quel che l’è sbalià. Par quela, domanda el aiuto de Geovà e fìdate nel so spìrito santo, e nò in ti. (Gàl. 5:22; Fil. 4:6) Sol saremo boni de cavar via la vècia personalità se femo arquante robe. w22.03 p. 5, 6 §§ 15-17

Geovà el promete che se lo obedimo e lo metemo in primo posto nela nostra vita el ndarà darne de magnar, de vestir e un posto de star. (Mat. 6:33) Noantri savemo che se obedimo a Geovà, podemo sentir la vera pace che vien de lu. (Fil. 4:6, 7) Alora, no ghemo de pensar che i soldi o le altre robe i pol assarne tranquili o farne felici. Par quela che anca se ghemo i soldi par comprar tante robe, ghemo de pensar se ghemo el tempo e la forsa par doperarle. Ricòrdate che Geovà el ne ga dato un laoro par far e no volemo che gnente ne intrighe de farlo. Ghemo anca de domandarse: ‘Sarà che mi ghe dao massa valor ale robe che go?’. Noantri no volemo mai esser come el omo che no’l ga volesto servir a Geovà e esser so fiol parché el dea massa valor ale poche robe che el gavea. — Mar. 10:17-22. w21.08 p. 6 § 17

Quando te studi la Bìblia, te ndarè cognosser ancora de pi a Geovà e ale so qualità che te ghè belche visto nela creassion. Imparar sora le qualità de Geovà ndarà giutarte a esser pròpio sicuro che ghen’è un Creador che el ga fato tuto. (Éso. 34:6, 7; Sal. 145:8, 9) Cossita, la to fede e el to amor par Dio i restarà ancora pi forti e te deventarè ancora pi amigo de lu. Giuta i altri a capir parché te credi in Dio. Metemo dir che una persona la te fà una domanda sora Dio che no te sè risponder. Alora, te pol catar la risposta nele nostre publicassion o domandar el aiuto de un bravo predicador. Dopo, parla cola persona che la te ga fato la domanda. (1 Pie. 3:15) E se ela no la crede in quel che ghe spieghemo? Anca cossita, podemo restar contenti parché quel che ghemo studià ga fato pi forte la nostra fede. w21.08 p. 18 §§ 14, 15

No ghemo de assar de banda tuto quel che ne piase par contentar a Geovà. (Ecl. 5:19, 20) Ma se ghemo paura de far questo, podemo far el medèsimo sbàlio che el omo dela ilustrassion de Gesù. Quel omo el ga assà Dio de banda parché el se preocupea sol in gaver una vita bona. (Luc. 12:16-21) Se ghen’è qualcossa che l’è drio intrigarte, domanda el aiuto de Geovà e pensa come che te pol darghene fora cole dificoltà. (Pro. 3:21) Geovà el ne benedisse tanto, e volemo esser grati a tuto quel che el fà par noantri. Mostremo che semo grati quando femo el meio che podemo par lodar el so nome. (Ebr. 13:15) Par esémpio, podemo sforsarse par far ancora de pi nel so laoro. Alora saremo ancora pi benedidi. Par quela, tuti i giorni, proa e vede come Geovà l’è bon. (Sal. 34:8) Cossita, te vè far compagno a Gesù che el ga dito: “El me alimento l’è far la volontà de quel che el me ga mandà e finir la so òpera.” — Gioani 4:34. w21.08 p. 30, 31 §§ 16-19

Sàtana el vol che deventemo orgoliosi parché, se questo sucede, saremo come lu e no ndaremo viver par sempre. L’è par quela che el apòstolo Paolo el ga dito che ghen’è el perìcolo de restar massa orgoliosi e ricever el medèsimo giulgamento che Sàtana. (1 Tim. 3:6, 7) Questo pol suceder con tute le persone, no importa se fà poco o tanto che le serve a Geovà. Le persone che le ze orgoliose le pensa sol in lore stesse. Sàtana el vol che pensemo sol in noantri stessi. Par esémpio, quando infrontemo un problema, lu el vol che pensemo in noantri invesse de pensar in Geovà. Qualchedun el ga belche dito che te ghè fato una roba che no te gavei fato? O qualchedun el te ga belche tratà de maniera ingiusta? Sàtana el vol tanto che te dae la colpa a Geovà o ai to fradei. Lu el vol che te pensi che far le robe dela to maniera l’è meio che ndar drio ai consili che ghen’è nela Bìblia. — Ecl. 7:16, 20. w21.06 p. 15 §§ 4, 5

Fursi Ageo l’era intrà i giudei che i ze ndati via de Babilònia e i ze tornadi a Gerusalen in 537 vanti de Cristo. Poco tempo dopo, questi servi fedeli de Dio i ga scominsià a far su el témpio. (Esdra 3:8, 10) Ma ga sucedesto una roba tanto bruta. Arquanti nemighi li ga desanimà, e lori i se ga fermà de far su el témpio. (Esdra 4:4; Ageo 1:1, 2) Alora, in 520 vanti de Cristo, Geovà el ga mandà che Ageo el fesse un laoro tanto importante. Ageo el gavea de incoraiar i giudei a tornar a far su el témpio. (Esdra 6:14, 15) Quel che Ageo el ga dito a quel pòpolo desanimà ga fato pi forte la fede de lori in Geovà. Podemo dir che Ageo li ga incoraià quando el ga dito “Geovà dei esèrsiti”. Questo vol dir che Geovà el ga un grando esèrsito de àngeli poderosi che i ghe obedisse. Alora, se i giudei i se fidesse in Geovà, i saria boni de far su el témpio. w21.09 p. 15 §§ 4, 5

Ancoi, le Testimònie de Geovà le ze difarente de tute le altre religion, parché le ga el vero amor intrà de lore. Anca se semo de diversi posti e culture, semo come una bela fameia. Vedemo el amor che ghen’è intrà de noantri nele riunion, nele assemblee e nei congressi. Questo ne assa ancora pi sicuri che semo drio adorar a Geovà dela maniera che lu el vol. (Gioani 13:34) La Bìblia la dise che ghemo de amar tanto un al altro. (1 Pie. 4:8) Come che mostremo che amemo tanto i nostri fradei? Una maniera la ze perdonarli e amarli anca quando i fà sbali. Nantra maniera la ze esser generosi e ricever ben a tuti, anca quei che i ne ga disgustà. (Col. 3:12-14) Quando amemo tanto i nostri fradei, mostremo che semo veri dissìpoli de Gesù. w21.10 p. 22 §§ 13, 14

Questo pol giutar la persona che la ga fato el sbàlio a ciamarse grama e a fermarse de farlo. Tanti che i ga fato un bruto sbàlio i ga dito che la dissiplina dei ansiani l’era pròpio quel che i gavea de bisogno par cambiar e tornar a Geovà. (Ebr. 12:5, 6) Quando una persona no la pol pi esser Testimònia de Geovà, questo anca prova la misericòrdia de Geovà par la congregassion. Come cossita? Pensemo nte una ilustrassion. Un pastor el vede che una dele so piégore la ze malada. Par causa de questa malatia, lu el gavarà de tirarla via de in meso le altre. Ma come savemo, le piégore no le ghe piase star lore sole. Alora, sarà che un pastor l’è rugno se el tira via questa piégora de in meso le altre? Nò! Parché el sa che, se la piégora malada la resta insieme cole altre, tute le restarà malade. Cossita, lu l’è drio proteger tute le piégore. w21.10 p. 10 §§ 9, 10

Semo tanto contenti de far parte de una fameia che se vol tanto ben. Noantri no volemo che nissun parle mal de Geovà e del so pòpolo. Pitosto, volemo che tante altre persone anca le fae parte de questa fameia e le sirva a Geovà con noantri. Alora, volemo esser un bel esémpio e giutar le persone a acetar le bone notìssie. Assé slusar la vostra luce davanti dei òmini. Cossita, lori i podarà veder le vostre òpere bone e dar glòria al vostro Pare che l’è nei cieli. Dele volte, le persone le ne dise su o le ne vien contra parché obedimo al nostro Pare, Geovà. Gheto paura de parlar ai altri sora quel che te credi par causa de queste robe? Alora, te pol esser sicuro che Geovà e el so Fiol i ndarà giutarte. Gesù el ga dito che i so dissìpoli no i gavea de preocuparse con cossa i gavea de parlar e come che i gavea de parlar. Parché nò? Lu el ga dito: “Nela ora giusta ndaré saver quel che gavé de parlar. Parché no saré sol valtri che ndaré parlar, ma el spìrito santo del vostro Pare che el ndarà parlar par meso de valtri.” — Mat. 10:19, 20. w21.09 p. 24 §§ 17, 18

Anca Moisè el ga dito che Geovà el pol protegerne. (Sal. 90:1) Vanti de morir, Moisè el ga dito che Dio l’è un posto sicuro par catar protession e che i so brassi sempre i sarà soto de noantri par protegerne. (Deu. 33:27) L’è tanto bel saver che i brassi de Geovà sempre i ze soto de noantri. Cossa che questo ne insegna sora Geovà? Anca se femo de Geovà la nostra protession, podemo sentirse desanimadi. Come che Geovà el ne giuta? (Sal. 136:23) Lu el mete i so brassi soto de noantri e el ne giuta a restar in pié nantra volta. (Sal. 28:9; 94:18) Se sentimo protegesti no importa ndove semo de star. E restemo anca contenti de saver che Geovà el ghe vol ben a cada un de noantri. w21.11 p. 6 §§ 15, 16

Gesù el savea che i so dissìpoli i gavaria bisogno de una forte fede quando qualchedun no li tratesse con giustìssia. Par giutarli a infrontar questo, Gesù el ghe ga contà la ilustrassion de una védova. Questa védova la seitea domandar al giuis che ghe fesse giustìssia. Ela la era sicura che lu el ndaria scoltarla se la fesse questo. Dopo de un tempo, el giuis el ga fato quel che la ghe gavea domandà. Se anca quel giuis el ga scoltà, imagina Geovà! Gesù el ga dito: “Sarà che Dio no’l farà giustìssia con quei che el ga scoliesto? Lori i lo ciama di e note e lu l’è passiente con lori.” (Luc. 18:1-8) E Gesù el ga anca dito: “Ma, quando rivarà el Fiol del Omo sarà che el catarà persone sora la tera con questa fede?” Cossa che imparemo de questo? Quando qualchedun no’l ne trata con giustìssia, ne toca gaver la medèsima fede che la védova. Noantri mostremo una fede cossita quando se fidemo che Geovà el ndarà far giustìssia e seitemo a far quel che l’è giusto. Ghemo anca de esser sicuri che Geovà sempre el ne scolta quando preghemo a lu. w21.11 p. 23 § 12; p. 24 § 14

Se te sì gióveno, te pensi che l’è massa fadiga far quel che Geovà el dise e che saria meio esser nela strada larga par far quel che te vol ti? L’è Sàtana che el vol che te pensi cossita. Lu anca el vol che te pensi che servir a Geovà l’è drio intrigarte de goder la vita. Lu el dopera altri gióveni nela scola e la internet par farte pensar cossita. Ma ricòrdate che Sàtana no’l vol che te sàpia ndove la strada larga la mena. (Mat. 7:13, 14) Ma Geovà el te dise che te gavarè una bela vita se te seiti a caminar nela strada streta. — Sal. 37:29; Isa. 35:5, 6; 65:21-23. w21.12 p. 23 §§ 6, 7

Noantri savemo che perdonar la ze la roba giusta de far. Anca cossita pol esser difìcile far questo. El apòstolo Piero fursi el se ga sentio cossita. (Mat. 18:21, 22) Se te te senti cossita, cossa che pol giutarte? Prima, pensa in quante volte Geovà el te ga belche perdonà. (Mat. 18:32, 33) Geovà l’è sempre pronto par perdonarne, anca che no meritemo. (Sal. 103:8-10) Ghemo anca de ricordarse che ghemo de amar un al altro. Alora, par far questo ghemo de perdonar. (1 Gio. 4:11) Seconda, pensa in quel che sucede quando te perdoni ai altri. Quando te perdoni, te giuti la persona che la ga sbalià, te giuti che ghen sìpia union nela congregassion, la to amicìssia con Geovà la resta pi forte, e te resti pi tranquilo. (2 Cor. 2:7; Col. 3:14) Tersa, domanda che Geovà el te giute. L’è lu che el ne domanda de perdonar e el vol giutarne a far questo. No stà assar che Sàtana el finissa cola pace che ghen’è intrà i fradei. (Efe. 4:26, 27) Alora, col aiuto de Geovà, no te ndarè cascar in questa tràpola del Diaol. w21.06 p. 22 § 11; p. 23 § 14

Davi l’era drio scampar via de Saul. Saul, el rè de Israel, el volea copar Davi. Nela cità de Nobe, Davi el ga domandà che el sasserdote Aimeleche el ghe desse sinque pan a lu. Cossita, lu e i so òmini i gavaria qualcossa de magnar. (1 Sam. 21:1, 3) Davi e i so òmini anca i ga bio de sconderse rento una caverna. (1 Sam. 22:1) Parché che Davi l’era drio infrontar quela dificoltà? Saul el gavea tanta invìdia parché Davi el gavea vinsesto arquante guere e parché le persone le ghe volea tanto ben. Saul anca el savea che, come el gavea desobedio a Geovà, Geovà no lo ga pi acetà come rè de Israel, e par quela Geovà el gavea scoliesto Davi par esser el pròssimo rè. (1 Sam. 23:16, 17) Parché Davi el gavea de scampar via? Parché Saul el gavea un grando esèrsito e el aiuto de tante persone. Ma sarà che Saul el pensea che el podaria intrigar Geovà e no assar che Davi el fusse el pròssimo rè? (Isa. 55:11) La Bìblia no la risponde mia a questa domanda. Ma podemo esser sicuri che gnanca un rè e gnanca qualche altra persona la saria bona de vinser a Geovà. w22.01 p. 2 §§ 1, 2

Gesù el fea el meio che el podea nela predicassion. Gesù el amea le persone e lore le ghe fea pecà. Par quela che lu el predichea a tute lore. (Luc. 19:47, 48) Par esémpio, dele volte Gesù e i so dissìpoli no i gavea gnanca tempo par magnar parché le persone le volea scoltar le parole de Gesù. (Mar. 3:20) E quando un omo el ga domandà che Gesù ghe insegnesse de note, Gesù lo ga fato. L’è vera che quasi tute le persone no le ze ndate drio a Gesù, ma tute lore le ga podesto scoltar le bone notìssie. Anca noantri ghemo caro che tute le persone le scolte le bone notìssie. (Ati 10:42) E par esser boni de farlo, fursi ghemo de cambiar la maneira che predichemo ale persone. Alora invesse de predicar sempre nela medèsima o nela meio ora par noantri, ghemo de farlo quando saremo boni de catar de pi persone. Se femo questo, sarà pi fàcile catar quei che i vol imparar sora la Bìblia. Cossita, assaremo Geovà tanto contento. w22.01 p. 17 §§ 13, 14

Ancoi, tante persone no le se fida in quei che i ga autorità. Par esémpio, lore le vede che quei che i ga autorità i giuta i siori e i poderosi, ma no i fà gnente a quei che i ze poareti. Le persone anca le vede che arquanti lìderi religiosi i fà tante robe brute. Par quela, lore no le se fida gnanca pi in Dio. Alora, quando studiemo la Bìblia con una persona, ghemo de sforsarse par giutarla a fidarse in Geovà e in quei che lu el scòlie par tender dela so organisassion. L’è tanto importante che i nostri studianti i se fide in Geovà e nela so organisassion. Ma anca se noantri semo batesadi fà tanto tempo, ghemo de fidarse cada volta de pi che Geovà el fà le robe dela maniera giusta. w22.02 p. 2 §§ 1, 2