Maio

Geovà el ne giuta a cognosser el so Fiol par meso dei Vangeli, o sia, i libri de Mateo, Marco, Luca e Gioani. In questi quatro libri dela Bìblia ghen’è la stòria dela vita e del laoro che Gesù el ga fato. I Vangeli i parla de quel che Gesù el ga parlà, quel che el ga fato e come el se ga sentio. Se studiemo questi libri, semo boni de capir quel che Gesù el ga fato. Alora, se volemo cognosser ancora de pi a Gesù, ghemo de studiar i Vangeli. Cossita, saremo boni de far compagno a lu. Se noantri volemo imparar tanto dei Vangeli, ghemo de léderli, ma anca torse tempo par studiarli ben e pensar sora quel che ledemo. (Varda anca Giosuè 1:8 nota.) Proa veder, scoltar e sentir quel che te sì drio leder. Te pol anca far peschise in tante robe che la organisassion la ne dà. w21.04 p. 4, 5 §§ 11-13

Sentene de ani prima de Gesù vegner ala Tera, Geovà el gavea belche dito nela Bìblia che un dei amighi del Messia el ndaria tradirlo par 30 monede de argento. (Sal. 41:9; Zac. 11:12, 13) El profeta Zacaria el ga dito che le persone le ndaria farghe mal al pastor e le piégore le saria spaliade. (Zac. 13:7) Ma quei che i amea a Geovà no i ndaria assar de creder in Gesù. Invesse, la so fede la restaria ancora pi forte quando i vedesse che queste professie le era drio realisarse in Gesù. Sarà che la medèsima roba la sucede ancoi? Si. Arquante Testimònie de Geovà le ga abandonà la verità e le ga scominsià a dir busie sora el pòpolo de Dio. Queste persone le dopera le notìssie, i giornai, el ràdio e la internet par contar notìssie false, robe che no le ze vere del tuto e busie pròpio brute sora le Testimònie de Geovà. Queste persone le vol che i servi de Geovà i abandone la verità. Ma quei che i ama a Dio no i assa che questo li ferme de adorar a lu. Invesse, lori belche i sa che questo ndaria suceder. — Mat. 24:24; 2 Pie. 2:18-22. w21.05 p. 11 § 12; p. 12 §§ 18, 19

Noantri belche saveino che questo ndaria suceder. La Bìblia la dise che ndariano capir la verità cada volta meio. (Col. 1:9, 10) Geovà el ne giuta a capir la verità sora lu pian pianeto. Alora, ghemo de portar passiensa e spetar che lu el ne giute a far questo nela so ora giusta. Quando i fradei che i tende dela organisassion de Dio i vede che i ga de cambiar la maniera de capir o de far qualcossa, lori presto i lo fà. Parché? Parché questo ndarà giutarne a gaver una amicìssia pi forte con Dio e a adorarlo compagno a Gesù. (Tia. 4:4) Quando cambiemo qualcossa, no lo femo parché le persone le vol, ma parché ghemo capio qualcossa meio. (1 Tes. 2:3, 4) Questo l’è pròpio difarente de quel che le religion ancoi le fà, parché lore le càmbia arquante robe sol par contentar le persone. w21.10 p. 22 § 12

Cossa che te pol far quando te te senti ti sol? Proa pensar in quel che Geovà l’è drio far par ti. (Sal. 55:22) Pensar sora questo ndarà giutarte a veder che mai te sì sol. Proa anca pensar in come che Geovà l’è drio giutar anca altri fradei che i infronta dificoltà. (1 Piero 5:9, 10) Hiroshi, un fradel che fà ani che serve a Geovà lu sol, el ga dito: “Tuti nela congregassion i infronta le so dificoltà. Veder che i fradei nela congregassion i ze drio far el meio che i pol par a Geovà incoraia a quei che no i ga la fameia nela verità, come mi.” Seita anca a pregar a Dio, leder la Bìblia e ndar ale riunion. Ghemo de parlar a Geovà pròpio quel che semo drio sentir. L’è importante leder la Bìblia tuti giorni e pensar sora versìcoli che i mostra che Geovà el te ama, pol giutarte quando te te senti sol. Arquanti fradei anca i proa sempre ricordarse de versìcoli come Salmo 27:10 e Isaia 41:10 parché i ghe dà consolo. Altri fradei che, dele volte, i se sente soli i ga dito che scoltar el àudio dela Bìblia e dele publicassion che se stùdia nele riunion li giuta tanto. w21.06 p. 9, 10 §§ 5-8

Te sì drio sofrir parché qualchedun che te ami l’è morto? Alora, torte el tempo par studiar i esempi dela Bìblia de persone che le ze tornade a viver. Questo farà pi forte la to fede nela ressuression. Sito drio sofrir parché qualchedun dela to fameia el ga abandonà a Geovà? Alora, stùdia par esser ancora pi sicuro che la dissiplina de Geovà la ze la meio. Ma, cossa te pol far se te sì drio infrontar altre dificoltà? Sfòrsate de doperarle par far pi forte la to fede. Parla sora tuto quel che te sì drio sentir a Geovà e sìpia insieme dei to fradei. (Pro. 18:1) Sfòrsate de far robe che le ndarà giutarte, anca che le te fae ricordar de quel che l’è drio suceder con ti. (Sal. 126:5, 6) Seita a ndar ale riunion, ala predicassion, a leder la Bìblia e a pensar in quel che Geovà el promete par el futuro. Cossita, te ndarè veder che Geovà l’è drio giutarte, e la to fede la restarà pi forte. w21.11 p. 22 § 11; p. 25 § 17

Le persone del mondo le pensa che i servi de Dio i ze pìcoli anca par causa de nantra roba. Quei siori, poderosi e con fama i ze importante par lore. Ma i servi de Geovà quasi sempre no i ze cossita, par quela che no i ze importanti par queste persone. (1 Cor. 1:26-29) Ma, Geovà no’l pensa cossita. Parché che Gesù el ga parlà de ‘questi pìcoli’? L’è stà parché i dissìpoli i ghe gavea domandà: “Chi che l’è el pi importante nel Regno dei cieli?” (Mat. 18:1) I giudei de quela època i volea che i altri li vedesse come persone importante. Un omo che el stùdia tanto el ga dito: “Quele persone le seitea a voler el rispeto, el onor, la aprovassion dei altri e de esser cognosseste par tuti. Se le gavesse de bisogno, lore le moreria par queste robe.” I giudei in quel tempo i seitea a voler esser un meio che quelaltro. Alora Gesù el savea che i so dissìpoli i gavaria de sforsarse tanto par no pensar come lori. w21.06 p. 20 § 2; p. 21 §§ 6, 8, 9

El apòstolo Paolo l’è un bel esémpio par i ansiani. Par esémpio, vedemo nele carte che el ga scrito ai fradei de Tessalònica che el ghe dea consili quando i gavea de bisogno. Ma vanti de dar i consili, Paolo el lodea i fradei. Par esémpio, lu el ga dito che lori i gavea una forte fede, i laorea con amor, i era leai e i seitea a far quel che l’era giusto anca che fusse fadiga. (1 Tes. 1:3; 2 Tes. 1:4) Paolo el ga anca dito che lori i era esempi par i altri fradei. (1 Tes. 1:8, 9) Sicuro che quei fradei i ze restadi tanto contenti de scoltar quel che Paolo el ghe ga dito e i ga visto che lu li amea. Par quela che i consili de Paolo i era tanto boni. — 1 Tes. 4:1, 3-5, 11; 2 Tes. 3:11, 12. w22.02 p. 15 § 6

Sàtana anca el dopera la religion falsa par dir che Geovà l’è rugno e che el fà le persone patir. Par esémpio, quando un tosatel el more, arquanti i dise che lu l’è morto parché Dio el gavea bisogno de nantro angeleto nel cielo. Che bruta busia! Noantri cognossemo tanto ben a Geovà e semo sicuri che mai el ndaria far una roba cossita. Alora, cossa che podemo far par giutar a darghe una risposta a quel che lo sfida? (Pro. 27:11) Par esémpio, quando more qualchedun che amemo o se ghemo qualche malatia, no ghe demo la colpa a Dio. Pitosto, ghemo fede che lu el ndarà finir fora cole malatie e cola morte e parlemo ai altri che Geovà l’è un Dio tanto amoroso. Geovà el sofre quando el ne vede patir. Par esémpio, lu el òdia vederne sofrir par causa de perseghission, malatie o dela nostra imperfession. (Sal. 22:23, 24) Par quela che Geovà el vol finir fora con tuto el sofrimento, e el ndarà farlo. (Vedi anca Ésodo 3:7, 8; Isaia 63:9.) Presto, “lu el sugarà tute le làgrime dei so oci, e no ghen sarà pi la morte, gnanca pi tristessa, gnanca piander, gnanca dolor”. — Vedi anca Ésodo 3:7, 8; Isaia 63:9. w21.07 p. 9, 10 §§ 9, 10

Suito le persone che le obedisse a Dio le gavarà le benedission de amar e adorar a Geovà par sempre. Gesù el ndarà finir fora con tuti i problemi che i ze vegnesti fora par causa de Adon e Eva. Geovà el ndarà ressussitar milioni de persone e lori i podarà viver con salute perfeta. (Luc. 23:42, 43) Gavaremo anca la benedission de deventar perfeti e de gaver la glòria e el onor cossita come Davi el ga scrito. Se te ghè la speransa de viver nela Tera, te sì drio spetar una roba maraveiosa. (Apo. 7:9) Geovà el te ama tanto e el vol che te fae parte dela so fameia. Alora, sfòrsate par assar Geovà contento e gàpia sempre in mente le bele promesse che el te ga fato. Sìpia grato par el privilègio de adorar el to Pare Geovà e daghe valor ala speransa che te ghè de lodarlo par sempre! w21.08 p. 7 §§ 18, 19

El profeta Geremia el ga predicà de pi de 40 ani e le persone no le ga volesto scoltarlo. Lore le ghe disea su e ghe ridea drio. Par causa de questo, lu l’è restà tanto desanimà e el ga fin pensà de fermarse de predicar. (Ger. 20:8, 9) Ma lu no’l ga fato questo. Cossa che lo ga giutà a dàrghene fora col desànimo e a restar contento nel so laoro? Prima, lu el savea che quel che el parlea dea ale persone un “futuro e una speransa”. (Ger. 29:11) Seconda, lu el savea che Dio lo gavea scoliesto par parlar ale persone quel che Geovà el volea. (Ger. 15:16) Anca noantri femo queste due robe. Noantri parlemo sora una speransa e sora el nome de Dio ale persone. Quando seitemo ricordarse de queste robe, restemo contenti anca che le persone no le ne scolte. Se l’è drio méterghe massa tempo par un studiante gaver fede e far i cambiamenti che ghe ocore, no stà mia restar desanimà, gnanca desister. — Tia. 5:7, 8. w21.10 p. 27 §§ 12, 13

Ghemo de ricordarse che la fede la vol dir creder in robe che no le vedemo. L’è tanto fàcile desmentegarse de quel che no vedemo. Par quela che Paolo el ga dito che l’è fàcile cascar nela tràpola de no gaver una forte fede. (Ebr. 12:1) Alora, anca se servimo a Geovà fà tanti ani, ghemo de seitar a far pi forte la nostra fede. Come podemo farlo? (2 Tes. 1:3) Prima, te ghè de domandar sempre a Geovà el so spìrito santo. Parché? Parché el spìrito santo ne giuta a gaver la fede. (Gàl. 5:22, 23) Alora, se no ghemo el spìrito santo de Geovà, no gavaremo gnanca fede che el ga creà tute le robe. Se seitemo a domandar che Geovà el ne dae spìrito santo, lu el ndarà risponderne. (Luc. 11:13) Podemo anca domandar che Dio el ne dae pi fede. (Luc. 17:5) Secondo, fà sempre el to stùdio dela Parola de Dio. — Sal. 1:2, 3. w21.08 p. 18, 19 §§ 16-18

I fradei pi veci no i ga pi la forsa che i gavea quando i era gióveni. Ma lori i ga tanta sabedoria parché i ga infrontà tante robe nela vita. E lori ancora i ze boni de far tanti laori nela organisassion de Geovà. Par esémpio, la Bìblia la parla de arquanti servi fedeli de Geovà che i ga seità a laorar par lu anca quando i era pi veci. Par esémpio, Moisè el gavea intorno de 80 ani quando el ga scominsià a laorar come profeta de Geovà e come lìder dela nassion de Israel. Geovà el ga seità a doperar Daniel come profeta anca che el gavesse intorno de 90 ani. E pol esser che el apòstolo Gioani el gavea de pi de 90 ani quando Geovà lo ga doperà par scriver el libro de Apocalisse. La Bìblia la parla poco de un omo che el gavea nome Simeon. Ma lu l’era giusto e el rispetea a Dio, e Geovà lo cognossea tanto ben. Alora, Geovà el ghe ga dato la benedission de veder el bambin Gesù e de far arquante professie sora Gesù e la so mare. — Luc. 2:22, 25-35. w21.09 p. 3, 4 §§ 5-7

I genitori i ga de star atenti par no far comparassion intrà un fiol e nantro, o voler che un fiol el fae de pi de quel che l’è bon. Questo pol farlo restar desanimà. (Efe. 6:4) Varda cossa che la sorela Sachiko la ga dito: “La me mare la volea che mi rispondesse tuto giusto nele prove, ma no ero mai bona de far questo. Fà belche tanti ani che mi go finio de studiar nela scola, ma seito ancora a domandarme se son drio far che basta a Geovà.” Davi el ga dito che no’l ndea in serca de robe che le era massa grande o dele robe che no’l saria bon de rivarghe. Davi l’è stà ùmile e el savea quel che l’era bon e quel che no l’era bon de far. Cossita, lu l’era contento e el gavea pace. (Sal. 131:2) Cossa che i genitori i pol imparar? Lori i ga de esser ùmili con quel che i speta de lori stessi, ma i ga de far questo anca coi fioi. I genitori i ga de capir quel che i fioi i ze boni e quel che no i ze boni de far, e giutarghe a dessider far a Geovà quel che i sarà boni de rivarghe. Cossita, i fioi i ndarà sentir che i ga valor. w21.07 p. 21, 22 §§ 5, 6

Geovà el ga dato a tute le persone la libertà de scòlier. Questo vol dir che tute le pol scòlier se le va obedir a Geovà o nò. Par esémpio, arquanti gióveni no i ga bio bravi genitori, e anca cossita, i ga scoliesto servir e esser fedeli a Geovà. Tanti gióveni i ga bio bravi genitori, che i ga fato el meio che i podea par insegnarghe i prinsipi dela Bìblia. Ma dopo grandi, questi gióveni ga dessidio abandonar a Geovà. Alora, se te sì disgustà parché el to fiol el ga abandonà a Geovà, ricòrdate che lu el ga fato la so scólia. (Gio. 24:15) No stà pensar che questo ga sucedesto par colpa toa. Pol esser che una mare o un pare el se ferme de servir a Geovà e anca abandone la fameia. (Sal. 27:10) Sicuro che questo l’è tanto bruto par i fioi parché lori i rispeta i so genitori e li vede come un esémpio. Se te sì gióveno e to pare o to mare el se ga fermà de servir a Geovà, te pol esser sicuro che tuti noantri restemo disgustadi e che Geovà el capisse ben quel che te sì drio sentir. Geovà el te ama tanto e el resta tanto contento de veder che te sì leal. Ricòrdate che no te ghè la colpa se lori i fà una bruta dessision. w21.09 p. 27 §§ 5-7

Quando i ansiani i desside che una persona no la pol pi esser una Testimònia de Geovà, ghemo de vederla come una piegoreta malada. Parché? Parché no la ga pi una forte amicìssia con Geovà. (Tia. 5:14) Tante persone le ga una malatia che le pol passarla ai altri. La medèsima roba la sucede con una persona che no la ga pi una forte amicìssia con Geovà. Se la resta insieme coi altri, pol esser che i altri i ghe vae drio. Par quela che questa persona no la pol pi star insieme dei altri fradei. Cossita, Geovà el mostra amor a quei che i ze fedeli e el giuta la persona che la ga fato el sbàlio a ciamarse grama e a cambiar. Ma questa persona ancora la pol far tante robe. Par esémpio, la pol ndar ale riunion e far pi forte la so fede. La pol anca ciapar le publicassion, studiarle e vardar JW Broadcasting^®. Quando i ansiani i vede che la ze drio cambiar quel che ghe ocore, lori i pol darghe consili par giutarla. Cossita, la podarà tornar a gaver una amicìssia con Dio e a esser una Testimònia de Geovà. w21.10 p. 10 §§ 9, 11

Tante altre robe le prova che semo drio adorar a Dio compagno ai primi dissìpoli de Gesù. Par esémpio, la nostra organisassion la ga superintendenti, ansiani e servi ministeriai. (Fil. 1:1; Tito 1:5) Cossita come i primi dissìpoli de Gesù, noantri anca obedimo ai comandamenti de Dio sora el sesso, el matrimònio, el sangue e sora cossa far coi pecadori che no i se ciama grami nela congregassion. (Ati 15:28, 29; 1 Cor. 5:11-13; 6:9, 10; Ebr. 13:4) La Bìblia anca la dise che ghen’è sol una maniera giusta de adorar a Dio. (Efe. 4:4-6) Sicuro che restemo tanto contenti de far parte del pòpolo de Geovà qua nela Tera e de cognosser la verità sora lu e sora quel che lu el ndarà far. Alora, volemo esser cada volta pi sicuri che quel che credemo l’è la verità. w21.10 p. 23 §§ 15-17

Un grando esèrsito de amoniti, moabiti e òmini de Seir el ga volesto far guera contra Geosafà. Par causa de questo, Geosafà, la so fameia e el pòpolo i podaria morir. (2 Cró. 20:1, 2) Cossa che Geosafà el ga fato? Lu el ga domandà el aiuto e la forsa de Geovà. La so orassion, che la ze in 2 Cróniche 20:5-12, la mostra che el se fidea tanto in Geovà. Par meso del levita Giaziel, Geovà el ga dito a Geosafà le parole del testo de ancoi. Geosafà el ga obedio parché l’è stà Geovà dirghelo. Quando i ze ndati davanti dei nemighi, Geosafà no’l ga metesto i meio soldadi davanti el esèrsito, ma i cantori. E Geovà el ga fato pròpio quel che el gavea prometesto, parché el esèrsito de Geosafà el ga vinsesto la guera. — 2 Cró. 20:18-23. w21.11 p. 15, 16 §§ 6, 7

Podemo esser sicuri che Geovà el ndarà sempre giutarne e darne la forsa par seitar leai a lu. (2 Cor. 4:7-9) Podemo esser sicuri che Geovà el gavarà sempre el amor leal par noantri, parché el salmista el ga dito: “I oci de Geovà i varda sora quei che i lo teme, quei che speta el so amor leal.” (Sal. 33:18-22) Vanti de cognosser a Geovà, lu belche el ne amea. Ma adesso, lu el mostra amor leal par noantri. Par quela che Geovà el vol protegerne, el vol che semo i so amighi e el va far tuto quel che el ne ga prometesto. Lu el vol che semo i so amighi par sempre! (Sal. 46:1, 2, 7) Alora, Geovà sempre el ne darà la forsa che ghemo de bisogno par seitar leai. w21.11 p. 6, 7 §§ 17, 18

Fursi cognossemo una persona che la ze restada disgustada par tanti ani con qualchedun dela scola, del laoro o dela fameia. Ma ghemo de ricordarse che i fradei de Giusepe i ga seità disgustadi con lu e par causa de questo i ga fato una roba tanto bruta. (Gén. 37:2-8, 25-28) Ma Giusepe no’l ga seità disgustà con lori e gnanca no’l se ga vingà. Invesse, lu li ga perdonà. Lu el ga fato quel che dise in Levìtico 19:18. (Gén. 50:19-21) Invesse de seitar disgustà coi so fradei, Giusepe li ga perdonà. Noantri ghemo de far compagno a lu. Gesù el ga mostrà che l’è tanto importante perdonar a quei che i ne ga disgustà (Mateo 6:9, 12) Anca el apòstolo Paolo el ga parlà sora questo. Lu el ga dito “Me cari, no sté mia vingarve.” — Rom. 12:19. w21.12 p. 11 §§ 13, 14

Nela note del 14 de nisan del ano 33, Gesù l’è ndato fin el giardin de Getsémani e el ga parlà tuto quel che l’era drio sentir a Geovà. (Luc. 22:39-44) Intanto che el preghea, el suplichea a Geovà e el piandea. (Ebr. 5:7) Cossa Gesù el ga domandà a Geovà nela note vanti de morir? Lu el ga domandà che Geovà lo giutesse a gaver la forsa par esser obediente e par seitar leal. Geovà el ga scoltà a Gesù e el ga mandà un àngelo par darghe forsa. Gesù el savea che el gavea de seitar leal e giutar a provar che Geovà l’è el meio governante. Parché che Geovà el ga scoltà quando Gesù el ga pregà a lu? Parché la roba pi importante par Gesù la era seitar leal a Geovà e mostrar che le robe rugne che le persone le parlea sora so Pare no le era vere. Se questa la ze la roba pi importante anca par noantri, Geovà el ndarà scoltarne quando ghe domandemo aiuto. — Sal. 145:18. w22.01 p. 17, 18 §§ 15-17

Tanti no i vol imparar sora Geovà parché noantri no se metemo nela polìtica. Lori i dise che gavarìssino de scòlier una persona par governar. Ma savemo che, se scoliemo una persona come governante, saremo drio abandonar a Geovà. (1 Sam. 8:4-7) Le persone fursi le pensa che gavarìssino de far su scole, ospedai e altre robe par giutar le persone. Quando lore le vede che, invesse de risolver suito i problemi dele persone, noantri predichemo, lore no le vol imparar sora Geovà. Cossa che pol giutarne a no gaver mai dubi? La roba pi importante che ghen’è la ze far el laoro che Gesù el ne ga comandà. No ghemo de proar finir fora coi problemi che ghen’è nel mondo. Noantri amemo le persone e ne despiase vederle patir. Ma savemo che giutemo pròpio le persone quando ghe parlemo sora el Regno e ghe giutemo a esser amighe de Geovà. — Mat. 7:21-23. w21.05 p. 7 §§ 19, 20

Tanti governanti i dise che i serve a Dio, ma par lori, la roba pi importante la ze la autorità e el poder che i ga. Lori i fà come i governanti dela època de Gesù, parché i lota contra el Untà de Geovà e i va contra i dissìpoli fedeli de Gesù. (Ati 4:25-28) Cossa che Geovà el dise par queste persone? El Salmo 2:10-12 dise: ‘Adesso, valtri rè, mostré sabedoria e aceté la dissiplina, valtri giuisi dela Tera. Servì a Geovà con tanto rispeto e resté contenti. Deghe onor al fiol, cossita, la ràbia de Dio no la vegnarà sora valtri e no ndaré morir par la strada, parché de colpo el pol restar inrabià. Felici i ze tuti quei che i va in serca de lu par gaver protession.’ Geovà el ga tanto amor. Par quela, lu l’è drio darghe tempo par tuti i nemighi cambiar e acetar el so Regno. El tempo che queste persone le ga l’è drio finirse. (Isa. 61:2) Alora, ghemo de far tuto quel che podemo par giutar le persone a cognosser a Geovà e scòlier servirlo. w21.09 p. 15, 16 §§ 8, 9

Paolo el volea dir che sol saremo felici se semo contenti con quel che ghemo, sìpia tanto o poco. (Fil. 4:12) Ghemo sempre de ricordarse che la roba pi importante la ze la nostra amicìssia con Geovà e nò le robe che ghemo. (Aba. 3:17, 18) Noantri podemo imparar tanto con quel che Moisè el ga dito ai israeliti dopo de 40 ani nel deserto. Lu el ga dito: “Geovà, el to Dio, el te ga benedio in tuto quel che te ghè fato. Geovà, el to Dio, l’è sempre stà con ti in tuti questi 40 ani, e no te ga mancà gnente.” (Deu. 2:7) Geovà el ga tendesto dei israeliti in tuto quel tempo. Par esémpio, lu el ghe ga dato de magnar e le so robe no le ze restade vècie. (Deu. 8:3, 4) Alora, cossa che imparemo? Ghemo de restar contenti cole robe che ghemo. Ghemo anca de dar valor ale robe pi pìcole e ricordarse sempre che l’è stà Geovà darne tuto quel che ghemo. Cossita, assaremo el nostro Dio contento. w22.01 p. 5 §§ 10, 11

Se te sì un paron de fameia, te ghè de laorar tanto par giutar, proteger e tender dela to fameia. Quando te sì drio infrontar dificoltà, fìdate in Geovà e nò stà pensar che te pol dàrghene fora ti sol. Ricòrdate che Geosafà el se ga fidà in Geovà. Geovà no lo ga abandonà, e no’l ndarà abandonar gnanca a ti. (Sal. 37:28; Ebr. 13:5) Alora, prega a Geovà e prega anca cola to dona, stùdia la Bìblia e le publicassion e meti in pràtica quel che te impari. Pol esser che dopo che te fè una dessision, i altri i parle che la to fameia la ga bisogno de soldi e de tante robe. Ma ricòrdate del rè Geosafà e fìdate in Geovà. — 2 Cró. 20:1-30. w21.11 p. 15 § 6; p. 16 § 8

Come semo imperfeti, no semo boni de giulgar dela maniera giusta. L’è vera che semo stati fati cole medèsime qualità de Geovà e che volemo che tute le persone le sìpia tratade con giustìssia. (Gén. 1:26) Ma noantri semo imperfeti, alora, anca se pensemo che savemo tute le robe, no saremo boni de giulgar dela maniera giusta. L’è stà pròpio questo che ga sucedesto con Giona. Lu l’è restà tanto disgustà quando Geovà el ga mostrà misericòrdia ale persone de Nìnive. (Giona 3:10–4:1) E cossa ga sucedesto cole persone de Nìnive? De pi de 120 mila le ze state salve. Alora, chi che ga giulgà quele persone dela maniera giusta? Sarà che l’è stà Giona, o Geovà? Geovà no’l ga mia de spiegarne parché el ga dessidio far una roba. L’è vera che Geovà el ga belche scoltà quel che i so servi i gavea de dir sora le so dessision. (Gén. 18:25; Giona 4:2, 3) E arquante volte el ga spiegà parché che el ga fato quela dessision. (Giona 4:10, 11) Ma Geovà no’l ghe ocore saver quel che pensemo dele so dessision. — Isa. 40:13, 14; 55:9. w22.02 p. 3, 4 §§ 5, 6

Quando pensemo che i altri i ze pi importanti che noantri, semo drio far come el pi gióveno. (Fil. 2:3) Se sempre pensemo che i altri i ze pi importanti che noantri, sarà pi fadiga far qualcossa che li disguste. Quando vardemo le bele qualità dei nostri fradei, l’è fàcile veder che lori i ze meio che noantri in tante robe. Volemo gaver sempre in mente le parole de Paolo ai corinti: “Cossa che te ghè de difarente dei altri? Cossa che te ghè che no te gàpia ricevesto? Se te ghè ricevesto, parché te te comporti come se no te gavessi ricevesto?” (1 Cor. 4:7) Ghemo de star atenti se pensemo che semo pi importanti che i altri o se ne piase farse veder ai altri. Se un fradel el fà bei discorsi o una sorela la ze brava par scominsiar studi bìblichi, lori i ga de darghe el onor a Geovà. w21.06 p. 21, 22 §§ 9, 10

Dele volte, no l’è mia fàcile catar le persone casa o esser boni de rivar fin lore. Par esémpio, tanti i ga de predicar in posti che no i ze boni de rivar fin le case dele persone, che ghen’è sempre qualchedun par protegerle e che sol i pol ndar rento se i ze convidadi. Altri predicadori no i cata mai le persone casa. Altri predicadori i predica in posti che ghen’è pròpio poche persone. Proa parlar cole persone in tante ore difarente. Una ora o l’altra, le persone le ga de tornar casa. Alora, noantri saremo boni de parlar con lore se ndemo predicar nele ore che le ze casa. Par esémpio, tanti predicadori i ze boni de catar de pi persone dopo mesdì o ala sera. In queste ore, le persone le ze pi tranquile e le ga tempo par ciacolar. w21.05 p. 15 §§ 5, 7

Sarà che la medèsima roba la sucede ancoi? Si. Tanti i resta disgustadi cole Testimònie de Geovà parché no le fà feste e selebrassion che no le ze de acordo cola Bìblia. Par esémpio, lore no le fà feste nei giorni che se fà i ani e gnanca de Nadal. Lore anca no le va ale selebrassion che le dà onor al paese e no le stà drio ale tradission nei velori che no le ze de acordo cola Bìblia. Par quela che tante persone le resta inrabiade cole Testimònie de Geovà. Queste persone le pensa che le ze drio piaserghe a Dio. Ma le ze sbaliade, parché le va drio a quel che i altri i dise invesse de far quel che Dio el dise. (Mar. 7:8, 9) Cossa che pol giutarne a no gaver mai dubi? Ghemo de amar a Geovà, le so lege e i so prinsipi. (Sal. 119:97, 113, 163-165) Se femo questo, mai ndaremo far qualcossa che no ghe piase a Dio e gnente ndarà esser pi importante che el nostro amor par Geovà. w21.05 p. 6 §§ 15, 16

Cossa che podemo far par meter in pràtica el consìlio del apòstolo Paolo? Ghemo sempre de studiar la Bìblia, pregar tuti i giorni e doperar tanto del nostro tempo par predicar. Cossita, gavaremo una fede pròpio forte. (2 Tim. 4:4) Se ghemo una fede pròpio forte, noantri no ndaremo restar spauradi quando vedemo notìssie false sora le Testimònie de Geovà. (Isa. 28:16) Se amemo a Geovà, la so Parola e i nostri fradei, no ndaremo abandonar a Geovà par causa dei altri. Nel primo sècolo, tanti no i ga mia credesto in Gesù, ma tanti i ze ndati drio a lu. Par esémpio, un giudeo del Sinèdrio e tanti sasserdoti. (Ati 6:7; Mat. 27:57-60; Mar. 15:43) La medèsima roba la ze drio suceder ancoi. Milioni de persone le serve a Geovà e gnente pol fermarle parché le cognosse e le ama le verità dela Bìblia. Come dise la Bìblia: “Quei che i ama la to lege i ga tanta pace e gnanca una roba pol farli strabucarse.” — Sal. 119:165. w21.05 p. 13 §§ 20, 21

El apòstolo Paolo el savea che lu l’è stà bon de far tuto quel che el ga fato parché Geovà el ghe ga dato forsa e spìrito santo Cossita, Paolo l’è stà bon de predicar e servir a Geovà del tuto, anca che l’era drio infrontar perseghission, preson e altre robe. Timòteo el ga bio de fidarse che Geovà el ndaria giutarghe a far el so laoro. Par esémpio, Timòteo l’è ndato insieme con Paolo par predicar in posti distanti. Paolo anca el ghe ga domandà che el viaiesse par incoraiar le congregassion. (1 Cor. 4:17) Fursi Timòteo el pensea che no’l saria mia bon de far quele robe. Par quela che Paolo el ghe ga dito: “No stà assar che nissuni el te manche de rispeto parché te sì gióveno.” (1 Tim. 4:12) In quela època, Timòteo anca el ga bio de infrontar un spin nela carne, parché el ‘restea tante volte malà’. (1 Tim. 5:23) Ma, Timòteo el savea che Geovà el ndaria giutarghe col so spìrito santo. Cossita, lu el gavaria la forsa par far la predicassion e giutar i fradei. — 2 Tim. 1:7. w21.05 p. 21 §§ 6, 7

Ghemo de far quel che dise Tiago 1:19 quando ndemo dar un consìlio a qualchedun. Questo testo el dise: ‘Tuti i ga de esser pronti par scoltar, ma i ga de spetar par parlar.’ Alora, l’è meio che prima el ansiano lo scolte. Proverbi 18:13 dise che parlar qualcossa sensa prima saver de tuto, l’è una roba stùpida e una vergogna par lu. L’è meio che el ansiano prima el fae queste domande: ‘Come steto?’ ‘Cossa mi posso far par giutarte?’ Se i ansiani i se sforsa de saver quel che l’è drio suceder cola persona, lori i sarà boni de giutarla e incoraiarla. Par dar boni consili a qualchedun, ne ocore far de pi che sol leder arquanti testi dela Bìblia o dirghe quel che lu el ga de far. Noantri ghemo anca de mostrar che se preocupemo con lu, che lo capimo e che volemo giutarlo. w22.02 p. 17 §§ 14, 15