Giugno

L’è sicuro che la vita dela védova la ze tanto difìcile e fursi l’è fadiga gaver quel che ghe ocore par viver. Ancora cossita, la va darente dela cassa e la mete rento due pìcole monede. Le monede le ze tanto pìcole e no se scolta quando le casca rento la cassa. Gesù el sa che la védova la ga metesto rento la cassa due monede de lèpton, la moneda che gavea manco valor in quela època. Con quele pìcole monede no se podea gnanca comprar un pìcolo oseleto, che el valea pròpio poco. Gesù l’è restà pròpio maraveià de veder quel che la védova la ga fato. Lu el ga ciamà i so dissìpoli e el ghe ga dito: “L’è sicuro che questa védova poareta la ga metesto nele casse del tesoro de pi che tuti i altri. Parché tuti i altri [i siori] i ga dato quel che ghe vansea, ma ela, ancora che la fusse poareta, la ga dato tuto quel che la gavea par viver.” (Mar. 12:43, 44) Quando quela védova fedele la ga metesto due pìcole monede rento la cassa del témpio, la ga assà anca la so vita nele man de Geovà. — Sal. 26:3. w21.04 p. 6 §§ 17, 18

Gesù l’era tanto contento de predicar e lu el volea che anca i so dissìpoli i fusse contenti de far questo laoro. (Gioani 4:35, 36) Intanto che Gesù l’era qua nela Tera, i so dissìpoli i ga fato un bel laoro nela predicassion. (Luc. 10:1, 5-11, 17) L’è vera che i dissìpoli i ze restadi desanimadi dopo che i nemighi i ga ciapà Gesù e i lo ga copà. (Gioani 16:32) Ma quando Gesù l’è stà ressussità, lu el ga incoraià i so dissìpoli a predicar. Alora, quando Gesù l’è ndato al cielo, lori i ze tornadi a far un bel laoro nela predicassion. I so nemighi fin i ga dito quel che dise el testo de ancoi.  Gesù el ga giutà i so dissìpoli del primo sècolo a far un bel laoro nela predicassion, e Geovà li ga benedio tanto. Alora, tante persone le ga volesto imparar sora quel che lori i era drio insegnar. Par esémpio, intorno de 3 mila persone le se ga batesà nel Pentecoste del ano 33, e cada volta pi persone le era drio deventar dissìpoli. (Ati 2:41; 6:7) Ma Gesù el ga dito che nei ùltimi giorni ancora de pi persone le ndaria scoltar le bone notìssie. — Gioani 14:12; Ati 1:8. w21.05 p. 14 §§ 1, 2

Proa ricordarte de quando te ghè scominsià a studiar la Bìblia e te ghè capio che l’era la verità. Alora, te ghè pensà che tuti i volaria imparar sora queste robe. Te eri sicuro che quel te eri drio imparar el giutaria tuti a esser pi felici e a gaver una bela speransa. (Sal. 119:105) Alora, te ghè scominsià a parlar tanto contento sora la Bìblia ai to amighi e ala to fameia. Ma fursi no te spetei mia che tanti no i te badaria. Noantri belche saveino che tante persone no le volaria scoltarne. Questo ga sucedesto anca con Gesù. Anca che el fesse tanti miràcoli che i mostrea che el gavea el aiuto de Dio, tante persone no le ga volesto scoltarlo. Par esémpio, Gesù el ga ressussità Làsaro. Gnanca i nemighi de Gesù i podea dir che quel miràcolo no’l gavea sucedesto. Anca cossita, i lìderi giudei de quel tempo no i ga credesto che lu l’era el Messia. Lori i ga anca volesto copar Làsaro e Gesù. — Gioani 11:47, 48, 53; 12:9-11. w21.05 p. 2 §§ 1, 2

Fà sforso par ndar a tute le riunion. Le riunion le ne incoraia e ne giuta a cognosser ai fradei. Ghemo de sforsarse de esser amighi de bravi fradei, anca che i sìpia de altre culture, pi gióveni o pi veci che noantri. La Bìblia la dise che i pi veci i ga tanta sabedoria. (Giò 12:12) Ma anca i pi veci i pol imparar coi pi gióveni. Davi l’era tanto pi gióveno che Gionatan e lori i era veri amighi. (1 Sam. 18:1) Lori due i ga infrontà brute dificoltà e i ga giutà un al altro a servir a Geovà. (1 Sam. 23:16-18) Irina, che sol ela la ze Testimònia de Geovà nela so fameia, la ga dito: “Nostri fradei e sorele i pol deventar come pare e fradei par noantri. Geovà el pol farli deventar la fameia che ghemo de bisogno!” Quando parlemo quel che sentimo, i nostri amighi i sarà boni de incoraiarne e giutarne. w21.06 p. 10, 11 §§ 9-11

Dopo che Gesù el ga dito che i so dissìpoli no i gavea de far gnente che intrighesse i altri de servir a Geovà, lu el ga parlà dela ilustrassion de un rè e de un schiavo. Questo schiavo el gavea de pagar un grando dèbito al rè, ma el rè el ga dito che lu no’l gavea pi bisogno de pagar questo dèbito. Ma pi tardi, questo schiavo no’l ga perdonà un dèbito tanto pi pìcolo de nantro schiavo. Quando el rè el ga savesto de questo, el ga mandà questo schiavo rugno in preson. Par causa de quel che el schiavo rugno el ga fato, lu el ga sofrio ma anca el ga fato altri sofrir. Prima, lu no’l ga mostrà amor a quel schiavo parché lo ga metesto in preson fin che el ghe paghesse el dèbito. El schiavo rugno el ga fato anca i altri sofrir parché, quando i ga visto quel che gavea sucedesto, i ze restadi disgustadi. (Mat. 18:30, 31) La medèsima roba la pol suceder con noantri. Fursi altri i sofre par causa de quel che femo. Par esémpio, se un fradel el ga fato qualcossa che ne ga assà disgustà e noantri no lo perdonemo, cossa che pol suceder? Prima, noantri assaremo la persona disgustada parché fursi no la trataremo con amor e no voleremo parlar con ela. Anca i fradei dela congregassion i ndarà sofrir quando i vede che una roba de questa la ze drio suceder. w21.06 p. 22 §§ 11, 12

I umani i ze stati creadi par far compagno a Dio, ma Sàtana el resta contento quando l’è bon de farli desobedir a Dio. Nei giorni de Noè, Geovà l’è restà tanto disgustà quando el ga visto che le persone le fea tante robe rugne. (Gén. 6:5, 6, nota, 11) E ancoi, la medèsima roba la sucede. Sàtana el resta tanto contento de veder che le persone le fà robe tanto imorai. Ghen’è tanta imoralità sessual intrà òmini e done e le persone del medèsimo sesso. (Efe. 4:18, 19) Sàtana el resta ancora pi contento quando un servo de Geovà el fà un bruto pecato. Dio el volea che le persone le tendesse dele robe che el ga creà. (Gén. 1:28) Ma, in questo mondo de Sàtana, le persone le ze drio governar a lore stesse e le ze drio rovinar quel che Dio el ga creà. (Ecl. 8:9) Arquanti studiosi i dise che de qua un per de ani, no ghen sarà pi 1 milion de tipi de bèstie e de piante par causa dele persone. w21.07 p. 12 §§ 13, 14

Arquanti servi de Geovà i sente tanta colpa par causa de qualcossa de sbalià che i ga fato e i pensa che Geovà mai el ndarà perdonarli. Se te te senti cossita, ricòrdate che Geovà sempre el vol mostrar el so amor leal par ti. Par causa del sacrifìssio de Gesù, podemo servir a Geovà sensa sentirse in colpa, anca se sbaliemo. (1 Gio. 1:7) Alora, se semo desanimadi parché ghemo fato qualche sbàlio, ghemo de ricordarse che Geovà el vol tanto perdonarne. Varda cossa che el salmista Davi el ga dito che sucede par causa del amor leal de Geovà. Lu el ga dito: ‘I cieli i ze tanto pi alti che la tera. L’è grando cossita el amor leal de Geovà par quei che i lo rispeta. L’è tanto distante el posto ndove el sol el va su del posto che el va do, e l’è distante cossita che Geovà el mete i nostri sbali.’ — Sal. 103:11, 12. w21.11 p. 5 §§ 12, 13

El omo el ga de dar onor ala so dona. (1 Pie. 3:7) Questo vol dir che lu el ga de rispetarla tanto. Par esémpio, el omo che el dà onor ala so dona la trata come una persona importante, no’l va mia domandar che la fae una roba che no la ze bona e mai el farà comparassion intrà ela e altre done. Come la dona la ndaria sentirse se el so omo el seitesse a far comparassion? Varda el esémpio de Rosa. El so omo, che no l’è Testimònia de Geovà, el fà sempre comparassion intrà ela e altre done. Par causa de questo, la pensa che no la ga mia valor. Ela la ga dito: “I altri sempre i ga de giutarme a ricordar che Geovà el me ama.” El omo el ga de ricordarse che la maniera come el trata la so dona mostra che el dà valor al so matrimònio, ma anca ala so amicìssia con Geovà. El omo che el dà onor ala so dona sempre el parla robe bele sora ela ai altri e sempre el dise che la ama e che la ga tanto valor. w21.07 p. 22 §§ 7, 8

Proa imaginar che te sì drio spetar che qualchedun el te porte una roba che te vol tanto, ma questa roba no la riva quando te vol. Pol esser che te resti disgustà. Ma, se te capissi parché che questa roba no la ze ancora rivada, fursi te sarè bon spetar con passiensa. Proverbi 13:11 dise che quando presto imuciemo su soldi, anca presto li perdemo. Ma, quando li imuciemo pin pian, restemo cada volta con de pi. Questo testo el mostra che el sàbio el porta passiensa parché el sa che, quando el fà le robe un pochetin ala volta, le robe le va ben. Proverbi 4:18 dise: ‘Ma la strada del giusto la ze come la luce che la slusa ala matina, che la sciara cada volta de pi fin che pròpio sciara el di.’ Questo testo el mostra che Geovà ne giuta a capir pin pian quel che lu el ndarà far. El testo anca ne giuta a capir che ghe vol tempo par un fradel cognosser cada volta meio a Dio, gaver le medèsime qualità de Cristo e deventar pi amigo de Geovà. w21.08 p. 8 §§ 1, 3, 4

Noantri ghemo tanto laoro de far in questi ùltimi giorni. (Mat. 24:14; Luc. 10:2; 1 Pie. 5:2) Tuti noantri volemo far el nostro meio nel laoro a Geovà. Par esémpio, tanti i ze drio sforsarse par far de pi nela predicassion, par servir come pionieri, servir in Betel o nele costrussion. Tanti fradei anca i ze drio sforsarse par deventar servi ministeriai o ansiani. (1 Tim. 3:1, 8) Sicuro che Geovà l’è contento de vederli far de pi in quel che ghe ocore! (Sal. 110:3) Ma sito disgustà parché no te pol ancora far qualche roba che te volarissi nela organisassion? Se questo l’è drio suceder con ti, parla a Geovà come che te te senti. (Sal. 37:5-7) Te pol anca domandar a bravi fradei che lori i te giute a far ancora de pi, e sfòrsate par far quel che i dise. Se te fè questo, fursi te ndarè ricever o far i laori che te vol tanto nela organisassion. w21.08 p. 20 § 1; p. 21 § 4

La profetisa Ana sempre la ndea al témpio anca che la gavesse 84 ani. Par causa de questo, la ga bio la benedission de veder el bambin Gesù. (Luc. 2:36-38) Anca ancoi ghen’è tanti fradei pi veci che i ze un bel esémpio par i gióveni. Alora podemo farghe domande e scoltarli con atension. Saremo tanto incoraiadi de scoltar le bele speriense che lori i ga nela organisassion de Geovà. I fradei pi veci i ga tanto valor nela organisassion de Geovà. Lori i ga sentio le benedission de Geovà nela so vita e i ga anca visto come lu el ga benedio la so organisassion. Lori i ga anca imparà robe importante coi so sbali. Noantri ghemo de sempre ricordarse che questi fradei i ga tanta sabedoria e ghemo de proar imparar tuto quel che semo boni con lori. (Pro. 18:4) Alora, se te fè sforso par cognosserli meio, te gavarè la fede pi forte. w21.09 p. 3 § 4; p. 4 §§ 7, 8; p. 5 §§ 11, 13

Isaia el ga parlà che el ‘late dele nassion’, o sia, le abilità che le persone le ga le saria doperade par Geovà. (Isa. 60:5, 16) Col aiuto e cole le abilità de bravi fradei, el laoro de predicassion l’è drio esser fato in 240 paesi e se fà publicassion in de pi de 1.000 léngue. In questi ùltimi giorni, Geovà l’è drio sgorlar le nassion. Par quela, tuti i ga de scòlier se i va restar dela banda del governo de Dio o dei governi dei òmini. Sicuro che noantri obedimo ale lege dei governi, ma no femo parte dela polìtica. (Rom. 13:1-7) Femo questo parché savemo che el Regno de Dio no’l fà parte de questo mondo e che sol questo Regno el ndarà finir con tuti i problemi. — Gioani 18:36, 37. w21.09 p. 17, 18 §§ 13, 14

Quando qualchedun che te ami el assa de servir a Geovà,Fà tuto quel che te pol par far cada volta pi forte la forte fede. Te ghè anca de giutar la to fameia a seitar a gaver una forte fede. Come che te pol far questo? Ledi sempre la Bìblia, pensa sora quel che te ledi, e va sempre ale riunion. Varda cossa che Joanna, che so pare e so sorela i ga assà de servir a Geovà, la ga dito: “Dopo che mi ledo nela Bìblia sora Abigail, Ester, Giò, Giusepe e Gesù, me sento pi tranquila. I so esempi i me giuta a gaver bele robe in mente e a dàrghene fora col sofrimento.” Quando te sì disgustà, no stà mai assar de pregar a Geovà. Domàndaghe el aiuto par veder le robe dela maniera giusta, che el te dae sabedoria e che el te insegne cossa te ghè de far. (Sal. 32:6-8) Pol esser che sìpia tanto difìcile parlar a Geovà pròpio quel che te senti. Ma te pol esser sicuro che el te capisse. Lu el te ama tanto e el vol che te parli a lu sora tuto quel che te senti. — Éso. 34:6; Sal. 62:7. w21.09 p. 27, 28 §§ 9, 10

Pena dopo dela Pàscoa del ano 32 dopo de Cristo, i apòstoli Piero, Tiago e Gioani i ga visto una roba de maraveiarse. Quando i era nte un monte, fursi nte un posto del Monte Ermon, lori i ga visto a Gesù e la so fàcia la slusea come el sol e le so robe le slusea come la luce. (Mat. 17:1-4) Quei apòstoli i ga scoltà le parole de Dio: “Questo l’è el me Fiol, el amà. Lu el ga la me aprovassion. Scóltelo.” Lori i ga obedio a Geovà. Lori i ga sempre scoltà la voce de Gesù nela so vita, e volemo far compagno a lori. Restemo tanto contenti che Geovà el dopera Gesù, che el ga la autorità nela congregassion, par insegnarne. (Efe. 5:23) Alora, volemo far come Piero, Tiago e Gioani, e scoltar a Gesù. Se se sforsemo par far questo, saremo felici ancoi e par sempre. w21.12 p. 22 § 1; p. 27 § 19

Un fradel de Corinto l’era drio far imoralità sessual cola sposa de so pare. Paolo el ga dito ai fradei de Corinto che quel omo no’l podea pi far parte dela congregassion parché tanti fradei i ga scominsià a dir che quel che el omo l’era drio far no l’era una roba tanto sbaliada cossita. (1 Cor. 5:1, 2, 13) Dopo de un tempo, Paolo el ga savesto che quel omo el se gavea ciamà gramo e che el gavea cambià. Paolo el ga dito ai ansiani : “Gavé de perdonarlo con bontà e consolarlo, parché lu no’l sìpia vinsesto par la so tristesa.” Paolo el ghe ga fato pecà de quel omo. Paolo no’l volea che lu el restesse massa triste, e par causa de questo, el se fermesse de sforsarse par gaver el perdon de Dio. (2 Cor. 2:5-8, 11) Come Geovà, i ansiani i ama esser misericordiosi. Lori i dà la dissiplina quando ghe ocore, ma i ze misericordiosi sempre che i pol. Lori i sa che i ze drio mostrar misericòrdia se i dissiplina a qualchedun che el ga de bisogno. Se no i fesse questo, lori saria drio mostrar che la persona che la ga fato el sbàlio la podaria seitar a farlo. w21.10 p. 11-13 §§ 12-15

Restar disgustà con qualchedun l’è come farse un taio. Pol esser che se femo un pìcolo taio nel deo e el ne fà tanto mal. Ma questo taio el guarisse tanto svelto che dopo de due o tre giorni gnanca no lo vedemo pi. La medèsima roba la pol suceder quando un amigo el ne disgusta, parché suito semo boni de perdonarlo. Ma se se ghemo fato un taio pi fondo, ghemo de ndar al dotor par far su punti e meter su fasse. Ghemo anca de assar star e no sfrugnar, senò mai el ndarà guarirse e el pol restar pedo ancora. La medèsima roba la sucede quando restemo tanto disgustadi con qualchedun. Ghemo de star atenti par no seitar a pensar in quel che ga sucedesto, parché se femo questo, ndaremo sofrir de pi. Alora, l’è tanto bon far quel che dise el testo de ancoi! w21.12 p. 12 § 15

Metemo dir che un ansiano el pensa che le robe che un fradel l’è drio meter su e la so maniera de rangiarse no le ze de acordo cola Bìblia. Alora, lu el podaria domandarse: ‘Questo fradel l’è drio far qualcossa che la Bìblia la dise che l’è sbalià?’ Se el ansiano no l’è sicuro, el pol domandar a nantro ansiano, o a una brava sorela cossa che i pensa. Lori i pol anca pensar in quel che Paolo el ga dito sora questo. (1 Tim. 2:9, 10) Paolo no’l ga mia parlà tute le robe che podemo o no podemo far. Invesse, lu el ga parlà sora arquanti prinsipi che i giuta i servi de Dio a far la scólia giusta. Lu el ga dito che lori i ga de esser sicuri che le robe che i mete su e la maniera che i se rangia le ghe dae onor a Geovà. Alora, se qualchedun el vol meter su una roba che no la ze contra quel che la Bìblia la dise, lu el pol farlo. Cossita, i ansiani sol i darà un consìlio a una persona che no la ze drio far quel che Paolo el ga dito.Ghemo anca de ricordarse che due fradei i pol scòlier far le robe de maniere difarente, e tute due le pol esser giuste. No podemo voler che i fradei i ghe piase dele medèsime robe che noantri o che le fae come noantri. w22.02 p. 16 §§ 9, 10

Noantri volemo mostrar amor leal par causa de arquante robe. Par esémpio, el libro de Proverbi el dise che quel che el seita a mostrar amor leal l’è pressioso par Dio e par le persone. Questo libro anca el dise che quel che l’è leal l’è drio far el ben a lu stesso e che el pol viver par sempre. (Pro. 3:3, 4; 11:17; 21:21) Questi proverbi i ne giuta a capir parché che l’è tanto importante mostrar amor leal. Primo, parché deventemo pressiosi par Dio. Secondo, parché l’è el meio par noantri stessi. Par esémpio, se semo leai, ghemo veri amighi. Terso, podemo ricever tante benedission, come la vita eterna. Par quela che volemo obedir a Geovà e ‘tratar i altri con amor leal e misericòrdia’. w21.11 p. 8 §§ 1, 2

Se te vedi che te ocore de pi fede, no stà desanimarte. Pitosto, fàghela pi forte. Come che te pol farlo? Prega ancora de pi quando te sì drio infrontar brute dificoltà. Aceta el aiuto che Geovà el te dà par meso dela to fameia e dei to amighi. Se te assi che Geovà el te giute a infrontar le dificoltà adesso, te sarè ancora pi sicuro che el ndarà sempre giutarte. Come ghemo visto, Gesù el ga mostrà ai so dissìpoli che lori i gavea bisogno de pi fede. Ma, lu l’era sicuro che, col aiuto de Geovà, lori i saria boni de dàrghene fora con tute le dificoltà avanti. (Gioani 14:1; 16:33) Lu l’era anca sicuro che una mùcia de servi de Geovà i saria boni de infrontar la granda tribolassion par causa dela so fede. (Apo. 7:9, 14) Anca ti te pol esser intrà de lori se te fè cada volta pi forte la to fede ancoi. — Ebr. 10:39. w21.11 p. 25 §§ 18, 19

Noantri no spetemo che Geovà el fae miràcoli par protegerne. Anca cossita, se fidemo del tuto in Geovà e semo sicuri che, anca se morimo, lu el pol farne tornar a viver e darne la vita eterna. Noantri gavaremo de fidarse del tuto in Geovà quando Goghe de Magoghe, che sarà un grupo de nassion, volerà finir col pòpolo de Dio. Pol esser che lore le ndarà pensar che semo come le piégore sensa protession. (Eze. 38:10-12) Lore le ndarà pensar questo parché no savemo lotar, gnanca doperemo arme. Fursi anca noantri ndaremo pensar che no ghemo protession. Ma ghemo de esser sicuri che Geovà el pol e el ndarà protegerne. Sol noantri saremo boni de veder che ghen’è miliari de àngeli intorno de noantri par protegerne. Proa imaginar quel che le nassion le ndarà pensar quando i àngeli i ndarà protegerne! — Apo. 19:11, 14, 15. w22.01 p. 6 §§ 12-13

Tuti i nostri fradei i ze importanti par Geovà e i ga de esser importanti anca par noantri. Ghemo de far quel che ne ocore par proteger e tender dei nostri fradei. Par esémpio, quando assemo qualchedun disgustà, no ghemo de far finta che no ga sucedesto gnente. Gnanca no ghemo de pensar che la persona la ze parmolosa e che la ghe toca desmentegarse de quel che ga sucedesto. Ghemo de ricordarse che arquanti i resta disgustadi par causa de come i ze stati slevadi su e parché i pensa che no i ga valor. Altri, parché fà poco tempo che i ze deventadi servi de Geovà, alora, ghe fà fadiga perdonar a qualchedun. Ma cossa che ghemo de far se un dei nostri fradei l’è restà disgustà con noantri? Ghemo de ndar parlar con lu. Ma, anca la persona che sempre la resta disgustada coi altri la ga de cambiar. Cossita, ghen sarà pace e union nela congregassion. w21.06 p. 21 § 7

Gesù el ne capisse tanto ben. Quando semo drio infrontar una dificoltà, l’è tanto bon parlar con un amigo che el ne capisse o che el ga belche infrontà la medèsima roba. Gesù l’è come questo amigo parché el sa come l’è sentirse sensa forsa e gaver bisogno del aiuto dei altri. Alora, lu el capisse quel che infrontemo e el ndarà far tuto quel che el pol par giutarne nela ora giusta. (Ebr. 4:15, 16) Quando Gesù l’era nel giardin de Getsémani, Geovà el ga mandà un àngelo par giutarlo e Gesù l’è restà contento col so aiuto. Cossa che imparemo? Ghemo de acetar el aiuto che Geovà el ne dà. Par esémpio, lu el pol giutarne par meso de una publicassion, de un vìdeo, de un discorso, de un ansiano o de un amigo. (Luc. 22:39-44) Geovà el te darà forsa e pace. Quando preghemo, ricevemo “la pace de Dio, che la ze pi granda de quel che podemo capir”. — Fil. 4:6, 7. w22.01 p. 18, 19 §§ 17-19

Semo sicuri che Geovà sempre el fà quel che l’è giusto e che podemo fidarse in lu. Ma pol esser che ne fae fadiga fidarse in quei che el ga scoliesto par tender dela organisassion. Pol esser che se domandemo se le dessision che lori i fà le ze de acordo cola orientassion de Geovà. Ghemo de ricordarse che Geovà el se fida in quei che el ga scoliesto par tender dela so organisassion. Se noantri no se fidemo in lori, no podemo dir che se fidemo in Geovà. Ancoi, Geovà el dopera el schiavo fedele e prudente par tender dela so organisassion qua nela Tera. (Mat. 24:45) Questo schiavo el fà pròpio compagno al Corpo Governante del primo sècolo. Lu el tende de quei che i serve a Dio e el dise ai ansiani cossa che lori i ga de far. I ansiani i mete in pràtica nele congregassion quel che el Corpo Governante el ghe ga dito. Quando femo el nostro meio par esser obedienti, mostremo che se fidemo nela maniera de Geovà far le robe. w22.02 p. 4 §§ 7, 8

Noantri restemo tanto contenti e orgoliosi de esser Testimònie de Geovà. Restemo tanto contenti de giutar una persona che la vol servir a Dio a deventar una Testimònia de Geovà. (Ati 13:48) Noantri restemo contenti compagno a Gesù. Quando i dissìpoli i ga contà el bel laoro de predicassion che i gavea fato, Gesù l’è restà tanto contento. (Luc. 10:1, 17, 21) El apòstolo Paolo el ga dito a Timòteo: ‘Seita a far el to meio par esser un bon esémpio e par insegnar ben ai altri. Seita a far tute queste robe, cossita te salvarè a ti e a quei che i te scolta.’ (1 Tim. 4:16) Noantri semo governadi par el Regno de Dio, alora se sforsemo par esser un bon esémpio. Come podemo far questo? Ghemo de sempre far quel che dà onor a Geovà e mostrar che credemo pròpio in quel che predichemo. (Fil. 1:27) E come mostremo che volemo insegnar ben ai altri? Ghemo de pareciarse ben par predicar e domandar el aiuto de Geovà par far un bel laoro. w21.10 p. 24 §§ 1, 2

“La nova personalità” la vol dir pensar e far le robe come Geovà. Ma come che la persona la pol gaver questa nova personalità? La ga de far sforso par gaver le qualità del fruto del spìrito de Dio, o sia, assar che el spìrito santo ghe giute a pensar, sentir e far quel che ghe piase a Dio. Par esémpio, la persona che la ga la nova personalità la ama a Geovà e i so fradei. (Mat. 22:36-39) Ela ze contenta anca che la infronte dificoltà e la se sforsa de viver in pace con tuti. (Tia. 1:2-4; Mat. 5:9) Ela sempre la mostra passiensa e bontà ai altri e la vol tanto far quel che l’è giusto. (Col. 3:12, 13; Luc. 6:35) Questa persona anca la mostra che la ga una forte fede in Geovà in tuto quel che la fà e che la ga autocontrolo anca quando no l’è fàcile gaverlo. (Tia. 2:18; 1 Cor. 9:25, 27; Tito 3:2) Par gaver la nova personalità, ne ocore mostrar le qualità de Gàlati 5:22, 23 e le altre qualità che catemo nela Bìblia. w22.03 p. 8, 9 §§ 3, 4

I ansiani i ga de sforsarse par far compagno el esémpio de Paolo. Lori i ga de predicar de casa in casa e anca in tuti i altri posti. (Efe. 6:14, 15) Lori anca i pol doperar el tempo nela predicassion par insegnar ai servi ministeriai e ai altri fradei. (1 Pie. 5:1, 2) I ansiani i sa che far el laoro de predicassion l’è tanto importante. (Mat. 28:19, 20) Ma cossa un ansiano el ga de far se qualchedun ghe domanda de far anca nantro laoro nela organisassion? Lu el ga de pensar e pregar tanto a Geovà parché ghe ocore gaver tempo par far anca altre robe tanto importante. Par esémpio, far la adorassion in fameia, predicar e insegnar i fioi a predicar. Alora, se el vede che no’l sarà bon de far tuto quel che el ga de bisogno, el ga de dir che no’l podarà far questo laoro. Lu el pol esser sicuro che Geovà el capisse che lu el ga belche tanti laori de far. w22.03 p. 26 § 4; p. 27, 28 §§ 7, 8

Ricòrdito de quando te sì deventà Testimònia de Geovà? Te gavei qualche paura? Par esémpio, te pensei che mai te sarissi bon de ndar predicar? O te gavei paura che la to fameia o i to amighi i restesse disgustadi con ti? Se te ghè sentio questo, alora te capissi el to studiante se el infronta un roba cossita. Gesù el ga dito che arquanti i gavaria paura de queste robe. E lu anca el ga dito ai so dissìpoli par no assar de servir a Geovà par causa dela paura. (Mat. 10:16, 17, 27)  Giuta el to studiante dela Bìblia a parlar sora quel che lu l’è drio imparar. Quando Gesù el ga mandà i dissìpoli predicar, pol esser che i ze restadi con paura. Ma Gesù li ga giutà. Come? Lu el ghe ga dito a chi parlar e cossa parlar. (Mat. 10:5-7) Come che podemo far come Gesù? Ghemo de giutar el nostro studiante a pensar a chi lu el podaria predicar. Podemo domandarghe: “Te cognossi a qualchedun che ghe piaseria saver de questa verità dela Bìblia?” Dopo, giùtalo a pensar in cossa el podaria parlar a questa persona. w21.06 p. 6 §§ 15, 16

Nel ano de 2015, ga sucedesto un teremoto nel Nepal. Una persona la ga dito: “Ghe ga volesto pochi minuti par vegner do tante costrussion.” Nantra persona la ga dito: “Tuti i ze restadi tanto spaventadi . . . Tanti i ga dito che tuto ga tremà par due minuti. Ma par mi, me parea che no’l se fermea pi.” Fà ani che tute le cità e paesi i ze drio sgorlar de una maniera difarente. El profeta Ageo el gavea dito che questo el ndaria suceder. Lu el ga dito: “Parché cossita el dise Geovà dei esèrsiti: ‘Nantra volta, in poco tempo, vao sgorlar i cieli, la tera.’” (Ageo 2:6) Quel che Ageo el ga dito no l’è come un teremoto che sol fà suceder robe brute, parché anca el fà suceder bele robe. Geovà el ga dito: “Vao sgorlar tute le nassion e le cose pressiose de tute le nassion le va ndar rento dela me casa. Vao impienir questa casa de glòria.” w21.09 p. 14 §§ 1-3

Se volemo esser amighi de qualchedun, ghemo de parlarse sempre de quel che sentimo. L’è cossita anca con Geovà. Quando preghemo a lu e parlemo de quel che pensemo, sentimo e i nostri pensieri, mostremo che se fidemo in lu e nel so amor. (Sal. 94:17-19; 1 Gio. 5:14, 15) Aceta el aiuto dei fradei. I fradei i ze un presente de Geovà. (Tia. 1:17) Nostro Pare el mostra che el se preocupa con noantri parché el ne ga dato fradei e sorele che i ne ama. Questi fradei i ne “ama tuto el tempo”. (Pro. 17:17) Quando el apòstolo Paolo el ga scrito la so carta ai colossensi, lu el ga parlà de arquanti fradei che i lo gavea giutà e consolà tanto. (Col. 4:10, 11) Anca Gesù el ga bio de bisogno del aiuto de àngeli e de persone. L’è sicuro che lu l’è restà tanto contento col aiuto dei so amighi. (Luc. 22: 43) No stà mai pensar che te ghè una fede fiaca se te parli sora le to preocupassion ai fradei. Far questo sarà una protession par ti. w21.04 p. 24, 25 §§ 14-16

Cossa che ghemo de far se semo disgustadi par causa de qualcossa che un fradel el ga fato contra noantri? Ghemo de far tuto quel che podemo par mantegner la pace nela congregassion. Ghemo de parlar dei nostri sentimenti a Geovà. Ghemo anca de domandar a Geovà che el benedissa la persona che la ne ga disgustà e che el ne giute a veder le so bele qualità. (Luc. 6:28) Se ghemo bisogno de parlar cola persona, ghemo de pensar nela meio maniera de far questo. No ghemo de pensar che el fradel el ne ga disgustà aposta. (Mat. 5:23, 24; 1 Cor. 13:7) Quando ndemo parlar con questo fradel, ghemo de ricordarse de questo. Se lu no’l vol risolver el problema, ghemo de seitar soportarlo. No ghemo de desister dei nostri fradei. (Col. 3:13) L’è tanto importante no seitar disgustà cola persona. Questo podaria intrigar la nostra amicìssia con Geovà. No ghemo de assar che gnente ne intrighe de far el nostro meio a lu. Cossita, mostraremo che el nostro amor a Geovà l’è la roba pi importante par noantri. — Sal. 119:165. w21.06 p. 23 § 15