Lùlio

Se una persona la fà un pecato, fursi no la podarà pi esser Testimònia de Geovà par un tempo. Questa la ze una dissiplina de Geovà e una prova che el ama a tuti, anca la persona che la ga sbalià. Fursi qualchedun el ga parlà mal parché una persona no la ze pi Testimònia de Geovà. Ma pol esser che lu no’l parle dei sbali che questa persona la ga fato. E ghemo de ricordarse che nissun el sa pròpio de quel che ga sucedesto. Alora mostra che te sì de acordo con quel che i ansiani i ga dessidio. Sìpia anca sicuro che lori i ga dessidio far questo de acordo coi prinsipi dela Bìblia e che l’è stà Geovà che el ghe ga dato questo laoro. (2 Cró. 19:6) Se semo de acordo con quel che i ansiani i ga dessidio, podemo giutar la persona che la ga abandonà a Geovà a tornar a servirlo. Varda el esémpio de Elizabeth, che el so fiol el ga abandonà a Geovà dopo grando. Ela ga dito: “L’è stà tanto fadiga no parlar pi col nostro fiol. Ma quando lu l’è tornà a Geovà, el ga dito che el gavea pròpio de esser dissiplinà. El ga anca dito che el ga imparà tante robe.” w21.09 p. 28, 29 §§ 11, 12

Proa pensarghe sora la védova. L’è sicuro che la volea dar de pi par Geovà, ma la ga dato el meio che la podea. E Gesù el savea che Geovà l’è restà tanto contento con quel che la ga dato. Alora, imparemo che Geovà el resta tanto contento quando ghe demo el nostro meio, o sia, quando servimo a lu de tuta la nostra forsa e cuor. (Mat. 22:37; Col. 3:23) Geovà el resta contento quando el vede che femo tuto quel che podemo! Par esémpio, quando doperemo la nostra forsa e el nostro tempo par predicar, ndar ale riunion e far altre robe par lu. Come che te pol meter in pràtica quel che te ghè imparà dela védova? Te pol pensar nei fradei che te cognossi. Fursi arquanti i ze desanimadi parché i pensa che i ze drio far poco par Geovà. Par esémpio, una sorela pi vècia che no la ga mia una bona salute. Pol esser che la reste disgustada e la pense che quel che la fà no’l ga valor par Geovà parché no la ze pi bona de predicar tanto. w21.04 p. 6 §§ 17, 19, 20

Geovà el sa el tempo giusto par finir cole robe rugne de questo mondo. Ma lu l’è passiente e cossita, tante persone le ze drio imparar sora Geovà e le ze drio servirlo. Questi milioni de persone i ze parte dela granda moltitùdine e i ze tanto grati par la perseveransa de Dio. E nel futuro, milioni che i ga perseverà fin el fin i ndarà viver qua nela Tera. Quando questo sucederà, tuti i ndarà esser sicuri che Geovà el ga fato la meio dessision. Anca che ghen sìpia tanto dolor e sofrimento, Geovà l’è un Dio contento. (1 Tim. 1:11) Alora, el esémpio de Geovà el ne insegna a perseverar contenti. Noantri semo drio spetar la ora che lu santificarà el so nome, provar che l’è el meio governante e finir fora con tute le robe rugne che ghen’è ancoi. Intanto che spetemo, ghemo de perseverar contenti e ricordarse sempre che anca Geovà l’è drio far questo. w21.07 p. 13 §§ 18, 19

Tante persone no le ga credesto in Gesù parché l’era vegnesto de Nasarè, che no la era una cità importante. Anca Natanael, che dopo l’è deventà un dissìpolo de Gesù, el ga dito: “Pol vegner qualcossa bona de Nasarè?” Fursi el se ricordesse dela professia de Michea 5:2 che dise che el Messia el ndaria nasser in Belen, e nò in Nasarè. El profeta Isaia el ga dito che i nemighi de Gesù no i volaria cognosser la stòria del Messia. (Isa. 53:8) Par esémpio, la Bìblia la disea che el Messia el saria dissendente de Davi e el ndaria nasser in Belen. (Luc. 2:4-7) Come savemo, Gesù l’è pròpio nassesto in Belen de acordo con Michea 5:2. Alora, se le persone le fusse in serca de cognosser ben la vita de Gesù e la so stòria, lore le saria bone de capir che lu l’era el Messia. Ma lore no le ga fato questo, par quela, no le ga credesto in lu. w21.05 p. 3 §§ 4-6

La Bìblia la ne dà bei esempi de persone che le ga scoltà consili e le ze state benedide. Par esémpio, Giò l’era fedele a Dio, ma l’era imperfeto. Quando lu el ga infrontà un bruto colpo nela vita, lu el ga parlà arquante robe sensa pensar. Par quela, Eliù e Geovà i ghe ga dato consili. Cossa Giò el ga fato? Lu l’è stà ùmile e el ga scoltà i consili. Giò el ga dito: ‘Mi go parlà, sensa capir ben, . . . Par quela, mi domando scusa e me ciamo gramo de quel che go dito.’ (Giò 42:3-6, 12-17) Anca se Eliù el fusse tanto pi gióveno de lu, Giò l’è stà ùmile e el ga acetà el so consìlio. (Giò 32:6, 7) Podemo dir che tuti ghemo de imparar qualcossa de pi. Par esémpio, podemo sforsarse par gaver le qualità del fruto del spìrito e par esser meio predicadori. w22.02 p. 11 § 8; p. 12 § 12

Tuti i ga de sforsarse par la congregassion esser un posto che ghen sìpia pace e amor e che nissun se sinta sol. Quel che femo e parlemo pol giutar i fradei! Tanti che i scomìnsia a ndar ale riunion no i ga el aiuto dela fameia. Alora, cossa che te pol far par giutar questi fradei a sentirse ben nela congregassion? Sfòrsate par cognosser a quei che i va nela to congregassion. Ghemo de ricever tanto ben quei che i va nela nostra riunion. (Rom. 15:7) Ghemo de saludarli, ma volemo anca deventar so amighi. Alora, ghemo de mostrar bontà e che ghe volemo ben. Podemo proar capir quel che i ze drio infrontar. Podemo far domande con bontà e scoltar quel che lori i parla. Ma ghemo de ricordarse che arquanti no i ghe piase parlar quel che i sente. Alora, ghemo de star atenti par farli sentirse ben. Par esémpio, podemo domandarghe come che el ga imparà sora Geovà. w21.06 p. 11 §§ 13, 14

Noantri restemo tanto contenti de servir a Geovà coi nostri fradei nte “un sol grupo e con un sol pastor”! Nela pàgina 165 del libro Organizados para Fazer a Vontade de Jeová, dise: “Te piase viver in union, alora anca ti te ghè de giutar a mantegnerla.” Ghemo de imparar a veder i nostri fradei dela medèsima maniera che Geovà. Par Geovà, tuti i so servi i ze pressiosi. Sarà che anca noantri pensemo cossita? Geovà el vede e el dà tanto valor a quel che femo par giutar e par tender dei nostri fradei. (Mat. 10:42) Noantri amemo i nostri fradei, par quela, no volemo far gnente che li asse disgustadi. (Rom. 14:13) Noantri volemo sempre pensar che lori i ze pi importanti che noantri e volemo perdonarli. No stà assar che gnente te intrighe de far el to meio a Geovà. Pitosto, sìpia dessidio a far tuto quel che te pol par giutar e par viver in pace coi fradei. — Rom. 14:19. w21.06 p. 24 §§ 16, 17

Noantri saremo boni de cognosser meio a Geovà e de gaver le medèsime qualità de Cristo sol se seitemo a studiar la Bìblia, se metemo in pràtica quel che imparemo e se obedimo ala organisassion de Geovà. Varda una ilustrassion de Gesù che mostra cossa che sucede quando una persona scomìnsia a imparar sora el Regno de Dio. Gesù el ga dito che le semense le buta e le vien grande anca se quel che el semena no’l capisse come questo sucede. Quel che se pianta vien su pin pian. Prima el cresse, dopo vien su la spiga e par fin el grano mauro nela spiga. (Mar. 4:27, 28) Gesù l’era drio dir che, cossita come una pianta la vien su pin pian, una persona la va far i cambiamenti e deventar amiga de Geovà pin pian. Par esémpio, quando un studiante el scomìnsia a esser amigo de Geovà, pin pian vedemo i cambiamenti che el fà nela so vita. (Efe. 4:22-24) Ma, mai ghemo de desmentegarse che l’è Geovà che el fà la pianta vegner su. w21.08 p. 8, 9 §§ 4, 5

La persona che la resta contenta con quel che la vede la dà valor a quel che la ga. Intanto che quel che el va drio sol ale so voie mai l’è contento. Alora, cossa che pol assarne pròpio contenti? L’è dar valor a quel che ghemo adesso, e se volemo far de pi, dessider far quel che saremo boni. Sarà che podemo pròpio esser contenti con quel che semo drio far adesso? Tanti i pensa che sol i pol restar contenti quando i seita a far robe nove. Ma, podemo pròpio restar contenti con quel che femo adesso. La ilustrassion che Gesù el ga fato sora i talenti in Mateo 25:14-30 la ne giuta a saver come far questo e a come restar ancora pi contenti. w21.08 p. 21 §§ 5, 6

Geovà el se preocupa tanto con quei che i ze drio sofrir. I ansiani e tuti noantri podemo incoraiar i nostri fradei e sorele. Podemo far questo quando mostremo che ghe volemo tanto ben. Geovà el vol che giutemo i nostri fradei a sentir el amor che el ga par cada un de lori. (Pro. 19:17) Noantri anca giutemo i nostri fradei quando semo ùmili. Par esémpio, no volemo mia farse veder parché questo podaria far altri restar con invìdia. Pitosto, ghemo de doperar le nostre abilità e quel che savemo par incoraiar ai altri. (1 Pie. 4:10, 11) Noantri podemo imparar tanto dela maniera che Gesù el tratea i so dissìpoli. Gesù l’è stà el omo pi importante che el ga belche vivesto qua nela Tera, e anca cossita, lu l’era “manso e ùmile de cuor”. (Mat. 11:28-30) Invesse, lu el parlea e el doperea ilustrassion che tute le persone le capia e le tratea con rispeto. — Luc. 10:21. w21.07 p. 23 §§ 11-12

Proa parlar coi fradei pi veci. Fursi lori no i ghe vede pi tanto e no i ga tanta forsa par parlar e caminar. Ma i vol ancora laorar par Geovà e i ze tanto bravi de far questo. (Ecl. 7:1) Ricòrdate sempre parché che lori i ze tanto pressiosi par Geovà, e seita a mostrarghe rispeto. Fà come Eliseo el ga fato con Elia. Lu el ga volesto restar dela banda de Elia fin el ùltimo giorno dela so vita. Lu el ga dito tre volte par Elia: ‘No vao mia assarte.’ (2 Rè 2:2, 4, 6) Noantri mostremo che ghe volemo ben ai nostri fradei pi veci quando ghe femo domande con bontà. (Pro. 1:5; 20:5; 1 Tim. 5:1, 2) Te pol far queste domande: ‘Cossa te ga assà sicuro che le Testimònie de Geovà le parlea la verità? Come quel che te ghè infrontà te ga fato gaver una amicìssia pi forte con Geovà? Cossa che te ga giutà a seitar a servirlo contento? (1 Tim. 6:6-8) Quando lori i ze drio parlar, ghemo de scoltar le so stòrie con tanta atension. w21.09 p. 5 § 14; p. 7 § 15

Quando te te sforsi par obedir al comandamento de Gesù, te mostri che te ami a Dio. (1 Gio. 5:3) Te te ricordi de quando te ghè scominsià a predicar? Fursi no l’è stà mia fàcile parché te sì restà con paura de parlar cola prima persona. Ma par causa del to amor a Geovà e parché te volei obedir al comandamento de Gesù, te ghè scominsià a far questo laoro. Dopo de un tempo, l’è restà pi fàcile predicar. Ma fursi te ghè paura de far studi dela Bìblia. Se questo l’è drio suceder, prega a Geovà e domàndaghe che el te giute a gaver de pi coraio. L’è sicuro che el ndarà giutarte. w21.07 p. 3 § 7

Nel passà, i schiavi i ricevea una marca par mostrar chi che l’era so paron. Dela medèsima maniera, le persone ndove semo de star le volerà che tuti i riceva una marca. Lore le volerà che tuti i mostre par meso de quel che i pensa e i fà che i ze dela banda dei governi. E noantri? Ndaremo ricever questa marca? Ndaremo restar dela banda dei governi umani? Quei che no i farà questo i ndarà infrontar dificoltà e perseghission. El libro de Apocalisse el parla che sol quei che i gavarà la marca i podarà comprar e vender. (Apo. 13:17) Ma i servi de Dio anca i sa cossa che Geovà el ndarà far con quei che i ga la marca de Apocalisse 14:9, 10. Par quela che lori i volerà scriver nele so man: “Mi son de Geovà.” (Isa. 44:5) Alora, volemo esser sicuri che semo pròpio leai a Geovà, e lu el restarà tanto contento de dir che l’è nostro Dio. w21.09 p. 18 §§ 15, 16

Noantri ghemo bisogno del aiuto dei nostri fradei par seitar a predicar. El apòstolo Paolo el ga insegnà a Timòteo come el gavea de predicar e insegnar. Lu anca el ga dito che Timòteo el gavea de giutar i altri a far compagno. (1 Cor. 4:17) Alora, quando predichemo, podemo imparar tanto coi fradei che i ga de pi speriensa. Noantri ghemo anca de pregar a Geovà e domandarghe el so aiuto. Quando ndemo predicar, ghemo de domandar el aiuto de Geovà parché no semo boni de far gnente sensa el so spìrito santo. (Sal. 127:1; Luc. 11:13) Quando te preghi, parla pròpio quel che te ghè de bisogno. Par esémpio, te pol domandar che Geovà el te giute a catar qualchedun che el vol imparar sora lu. Ghemo anca de far sempre el nostro stùdio dela Bìblia. La Parola de Dio la dise che ghemo de esser pròpio sicuri de quala che la ze la volontà de Geovà. (Rom. 12:2) Ma come questo pol giutarne a esser bravi predicadori? Quando studiemo la Bìblia, cognossemo ancora meio a Geovà. Cossita, quando ndemo predicar, le persone le vederà che semo sicuri de quel che insegnemo. w21.05 p. 17, 18 §§ 14-16

Fursi te sì drio pregar e te sì drio sforsarte tanto parché te vol che un studiante el fae quel che l’è drio imparar dela Bìblia. Ma come lu no l’è drio cambiar, fursi te tocarà fermarte de far el so stùdio. O fursi no te ghè mai giutà una persona a batesarse. Sarà che questo vol dir che no te sì drio far un bon laoro o che Geovà no l’è drio benedirte? Varda come Geovà el vede el nostro sforso. Come mostra el testo de ancoi, Geovà el vede el sforso che femo par predicar e par seitar a farlo. El apòstolo Paolo el ga dito: “Dio no l’è mia ingiusto par desmentegarse del vostro laoro e del amor che gavé dimostrà par el so nome, par servir i santi e par continuar a servirli.” (Ebr. 6:10) Alora femo un bel laoro quando se sforsemo par predicar e quando lo femo con amor, anca quando le persone no le vol scoltarne. E Geovà el vede el nostro sforso anca quando un studiante dela Bìblia no’l se batesa. w21.10 p. 25 §§ 4-6

Gesù el tratea i so dissìpoli con tanta bontà e amor. Gesù el savea che le abilità e la vita de lori le era difarente una del’altra. Alora, Gesù no’l spetea che tuti i fesse le medèsime robe nela predicassion. Invesse, lu el restea contento con quel che cada un el fea. Noantri semo anca sicuri de questo par meso dela ilustrassion che el ga fato sora i talenti. In questa ilustrassion, el paron el ga dato laoro de acordo cola capacità de cada schiavo. Due schiavi i ga laorà tanto ben, ma un de lori el ga guadagnà de pi che quelaltro. Anca cossita, el paron el ga lodà tuti i due cole medèsime parole: “Brao, schiavo bon e fedele!” (Mat. 25:14-23) Gesù el mostra tanto amor e bontà a noantri. Gesù el cognosse le nostre abilità e la nostra vita, e el resta tanto contento quando femo el nostro meio. Noantri podemo tratar i nostri fradei dela medèsima maniera che Gesù. w21.07 p. 23 §§ 12-14

El rè Davi no’l ga mostrà misericòrdia. Par esémpio, Nabal, che l’era un omo rugno, el ghe ga dito su a Davi e no’l ghe ga dato de magnar a lu e ai so òmini. Alora, Davi l’è restà tanto cativo e el ga volesto copar a Nabal e a tuti i òmini dela so casa. Ma, Abigail, che la era la sposa de Nabal, la era bondosa e la ga mostrà tanta passiensa parché suito la ga fato qualcossa de magnar par lori. Alora, Davi no’l ga copà Nabal e i so òmini. (1 Sam. 25:9-22, 32-35) Come ghemo visto, Davi l’è restà inrabià e el ga volesto copar Nabal e i so òmini. Dopo, quando Natan el ghe ga contà la ilustrassion sora el omo che el ga ciavà una piégora del so visin, Davi el ga dito che questo omo el meritea morir. Quando scoltemo quel che Davi el volea far col omo, fursi pensemo: ‘Parché che Davi, che l’era bondoso, lo ga giulgà de questa maniera?’ Proa ricordarte de quel che gavea pena sucedesto con Davi. In quela època, lu l’era drio sentir colpa parché el gavea fato una roba sbaliada. Cossa che imparemo de questo? Se qualchedun el giulga i altri de maniera rugna, questo mostra che la so amicìssia con Geovà no la ze mia forte. w21.10 p. 12 §§ 17, 18; p. 13 § 20

Le parole del testo de ancoi le mostra che ghemo de esser santi come Geovà, che l’è la persona pi santa che ghen’è. Ma fursi pensemo che no semo boni de farlo parché semo imperfeti. Alora, ghemo de ricordarse del esémpio del apòstolo Piero. Anca se lu el ga fato tanti sbali, lu el ga mostrà che le persone imperfete le pol esser sante. Tanti i pensa che una persona che la ze santa la dopera robe difarente dei altri e mai la ride. Ma la Bìblia la mostra che una persona santa no la ze cossita. La Bìblia la dise come che una persona santa la ze. Par esémpio, la dise che Geovà l’è santo e che l’è un “Dio felice”. (1 Tim. 1:11) La Bìblia la dise che anca quei che i adora a Dio i ze felice. (Sal. 144:15) Gesù el ga dito che l’era bruto che una persona la metesse su robe e la fesse qualcossa par farse veder. (Mat. 6:1; Mar. 12:38) Savemo che podemo esser santi parché Geovà mai el ndaria domandarne de far una roba che no sarìssino boni de farla. w21.12 p. 2 §§ 1, 3

Dio el ne ama tanto e el ne ga dato tanti presenti, come la capassità de amarlo. Noantri mostremo che lo amemo, quando ‘obedimo ai so comandamenti’. (1 Gio. 5:3) Par esémpio, par meso de Gesù, Geovà el ne ga dato el comandamento de far dissìpoli e batesarli. (Mat. 28:19) Lu el ne ga anca dato el comandamento de amar un al altro. (Gioani 13:35) Quei che i obedisse a Geovà i podarà far parte dela so fameia. (Sal. 15:1, 2) Mostra amor ai altri. El amor l’è la pi bela qualità de Geovà e lu el ne ga amà vanti de noantri cognosserlo. (1 Gio. 4:8-10) Noantri femo come Geovà quando amemo ai altri. (Efe. 5:1) Noantri mostremo amor come Geovà quando giutemo ai altri a imparar sora lu intanto che no riva el fin. (Mat. 9:36-38) Cossita, anca lori i pol far parte dela fameia de Geovà. w21.08 p. 5, 6 §§ 13, 14

Gesù el amea tanto a Geovà. Par quela, el fea quel che l’era meio par Geovà e par i altri, e nò par lu. (Gioani 14:31) Quel che Gesù el ga fato quando l’era qua nela Tera ga mostrà che el amea tanto le persone. Par esémpio, Gesù sempre el mostrea amor e misericòrdia a tuti, anca a quei che i ghe disea su. Lu el ga anca insegnà ale persone sora el Regno de Dio. (Luc. 4:43, 44) Lu el amea tanto a Geovà e ale persone che el ga dato la so vita come sacrifìssio. Par quela, tuti noantri ghemo la speransa de viver par sempre.Come Gesù, noantri amemo tanto a Geovà e ghemo prometesto doperar la nostra vita par servirlo. Par mostrar che amemo a Geovà, ghemo de far compagno a Gesù e tratar ben le persone. El apòstolo Gioani el ga scrito: ‘Quel che no ama el so fradel, che el ga visto, no’l pol mia amar a Dio, che no lo ga visto.’ — 1 Gio. 4:20. w22.03 p. 10 §§ 8, 9

Noantri restemo contenti de doperar el nostro tempo par star insieme con Geovà, o sia, pregar, studiar e pensarghe sora. Ma dele volte, no l’è fàcile far questo parché ghemo tanti laori de far. Par esémpio, ghemo de laorar, tender dela nostra fameia e far tanti altri mestieri. Ghemo anca de star atenti col tempo che doperemo par far altre robe. Pol esser che queste robe no le sìpia sbaliade. Ma se doperemo massa del nostro tempo par farle, no saremo boni de far pi forte la nostra amicìssia con Geovà. Par esémpio, l’è bon riposar o far robe che ne piase. Ma se doperemo massa del nostro tempo par farle, restaremo sensa tempo par adorar a Geovà. Alora, ghemo de ricordarse che la nostra amicìssia con Geovà la ze la roba pi importante. — Pro. 25:27; 1 Tim. 4:8. w22.01 p. 26 §§ 2, 3

Quando Geovà el ga dito ai israeliti che i gavaria de amar el pròssimo, lu l’era anca drio parlar de amar a quei che no i era israeliti. Par esémpio, come dise Levìtico 19:33, 34, lori i gavea de mostrar amor ai stranieri che i era de star in meso de lori. Geovà el volea che i tratesse i stranieri come se i fussi israeliti e con tanto amor. Par quela che anca i stranieri e i poareti i podea tor su quel che vansea dei campi. (Lev. 19:9, 10) Cossa che imparemo de questo? Milioni de persone le vien de star nel nostro paese e fursi una de lore la ze de star darente dela nostra casa. Noantri ghemo de mostrar amor e rispeto par tuti lori. — Luc. 10:30-37. w21.12 p. 12 § 16

Se imparemo a fidarse in Geovà del tuto adesso, saremo sicuri che el ndarà tender de noantri anca nel futuro. Podemo mostrar che se fidemo in Geovà ancoi de arquante maniere. Par esémpio, quando domandemo al nostro paron un giorno par ndar a una assemblea o a un congresso. Podemo anca mostrar che se fidemo in Geovà quando ghe domandemo par cambiar la ora del nostro laoro par ndar ale riunion e ala predicassion. Ma metemo dir che el paron no l’è de acordo con quel che ghemo domandà a lu e el ne mande via del laoro. Sarà che gavaremo fede in Geovà e ndaremo fidarse che lu ndarà tender de tuto quel che ghemo de bisogno? (Ebr. 13:5) Tanti de quei che i dopera la so vita par far de pi nel laoro a Geovà i parla che Geovà el ga sempre tendesto de lori. Se la nostra amicìssia con Geovà la ze la roba pi importante nela vita, lu no’l ndarà mai abandonarne. Alora, no ne ocore gaver paura de quel che ndarà suceder nel futuro. w22.01 p. 7 §§ 16-17

Metemo dir che i ansiani i ga dessidio che un fradel no’l pol pi esser una Testimònia de Geovà. Imaginemo che lu l’è dela nostra fameia o un dei nostri amighi. Par esémpio, pol esser che scominsiemo a domandarse se i ansiani i savea tuto quel che gavea sucedesto e se i ga giulgà dela maniera che Geovà el vol. Se questo l’è drio suceder con noantri, cossa pol giutarne a acetar la dessision dei ansiani? Ghemo de ricordarse che quando i ansiani desside che una persona no la pol pi esser una Testimònia de Geovà, lori i ze drio mantegner la congregassion pura. Questo giuta anca la persona che la fato el pecato e i fradei. Se la persona che la ga fato el pecato e no la se ga ciamà grama la seitesse a esser una Testimònia de Geovà, la saria un bruto esémpio par i fradei. (Gàl. 5:9) Ela podaria anca pensar che el so pecato no l’è stà tanto bruto cossita e che no la gavaria de cambiar la so maniera de pensar e de far le robe. Alora, saria pi fadiga che la tornesse a esser amiga de Geovà. (Ecl. 8:11) Semo sicuri che i ansiani i sa che dessider se una persona la pol seitar a esser Testimònia de Geovà la ze una dessision tanto importante. w22.02 p. 5 §§ 13, 14

I ansiani i ga de far compagno a Gesù e mostrar passiensa e bontà anca quando un fradel no’l vol scoltar un consìlio dela Bìblia. Come lori i pol mostrar passiensa e bontà? Lori no i ga de restar disgustadi o inrabiadi col fradel che no ghe ga piasesto el consìlio. Lori i pol domandar che Geovà el giute questo fradel a capir el consìlio e meterlo in pràtica. I ansiani i ga de seitar a mostrar bontà e passiensa, parché fursi el ghe meterà tempo par pensar nel consìlio. Se lori i fà cossita, sarà pi fàcile che el fradel scolte el consìlio dela Bìblia. Ghemo anca de ricordarse de darghe consili che li asse contenti. — Pro. 27:9. w22.02 p. 18 § 17, 19

Pol esser che preghemo a Geovà par domandar che el ne dae forsa par infrontar le dificoltà. Ma fursi pensemo che Geovà l’è drio meterghe tanto par risponderne. Parché che Geovà no’l risponde presto a tute le nostre orassion? Quando preghemo a Geovà de cuor, mostremo che ghemo fede in lu. (Ebr. 11:6) Geovà el vol esser sicuro che volemo quel che domandemo e se ndaremo pròpio sforsarse par far quel che semo drio domandarghe. (1 Gio. 3:22) Par quela che ghemo bisogno de passiensa quando domandemo che Geovà el ne giute a fermarse de far qualcossa sbaliada. Gesù el ga dito che Geovà no’l ndaria suito risponder ale nostre orassion. Lu el ga dito: ‘Seité a domandar e riceveré, seité a ndar in serca e cataré, seité a bater nela porta e i ve la verderà. Parché quel che el domanda el riceve, quel che el va in serca, el cata, e quel che el bate, i ghe verderà la porta.’ — Mat. 7:7, 8. w21.08 p. 8 § 1; p. 10 §§ 9, 10

Te toca seitar a studiar la Bìblia par far pi forte la to fede che Geovà el ga creà tute le robe. (Giosuè 1:8) Quando te sì drio studiar, proa capir ben la stòria che te sì drio leder. Daghe atension ale professie, e come che una parte dela Bìblia la ze de acordo cole altre. Cossita, te sarè ancora pi sicuro che la Bìblia la ze la Parola de Dio e che Geovà el ga creà tute le robe con tanto amor e sabedoria. (2 Tim. 3:14; 2 Pie. 1:21) Quando te sì drio studiar la Bìblia, proa capir come che i so consili i pol giutarte. Par esémpio, fà tanti ani che l’è stà scrito nela Bìblia che quei che i va drio ai soldi no i ze felici e i sofre. (1 Tim. 6:9, 10; Pro. 28:20; Mat. 6:24) L’è sicuro che quel che la Bìblia la dise pol giutarne ancoi. Proa anca pensar in altri consili dela Bìblia che i te ga belche giutà. Cossita, semo boni de capir che quel che Geovà el dise l’è el meio par noantri. Se semo boni de capir questo, volaremo sempre domandarghe aiuto vanti de far qualcossa. (Tia. 1:5) Cossita, noantri saremo pi felici. — Isa. 48:17, 18. w21.08 p. 17, 18 §§ 12, 13

Se te ghè belche una bela età, te pol esser sicuro che Geovà el se ricorda de quel che te ghè belche fato a lu. Par esémpio, te ghè sempre laorà nela predicassion. Lu anca el se ricorda che te ghè infrontà brute dificoltà, ma te ghè sempre obedio a quel che la Bìblia la dise. Lu anca el resta contento de saver che te ghè fato el to meio nela organisassion e che te ghè insegnà ai altri a far i so laori. Quando ga cambià qualche roba nela organisassion, te ghè fato el to meio par meterla in pràtica. Te ghè anca giutà e incoraià a quei che i laora de pi nela predicassion. El amor che Geovà el ga par ti el resta cada volta pi forte par causa de tuto quel che te fè. Lu el promete che no’l ndarà mai abandonar a quei che i ze leai. (Sal. 37:28) Te pol esser sicuro che lu el seitarà a tenderte. (Isa. 46:4) Alora, anca se te ghè una bela età, no stà pensar che no te ghè pi valor par la organisassion de Geovà. Te pol esser sicuro che te sì tanto pressioso! w21.09 p. 3 § 4

Geovà l’è misericordioso parché el ga tanta sabedoria. Lu el dopera la sabedoria par far le dessision che le sìpia el meio par tuti. La Bìblia la dise che la sabedoria de Geovà la ga tanta misericòrdia e la fà tante robe bone. (Tia. 3:17) Geovà l’è come un Pare amoroso. Alora lu el sa che quando el mostra misericòrdia ai so fioi, lu l’è drio far quel che l’è meio par lori. (Isa. 49:15) Par causa dela so misericòrdia, lu el ne dà una bela speransa par el futuro. Alora, par causa dela so sabedoria, Geovà l’è misericordioso sempre che el pol. Ma anca el sa quando no’l ga de mostrar misericòrdia. Par esémpio, lu no’l mostra misericòrdia quando una persona la mèrita ricever una dissiplina. Metemo dir che un fradel el desside seitar a far un bruto pecato. Cossa che ghemo de far? Par meso del spìrito santo, Paolo el ga scrito che gavarìssino de assar de star insieme con questa persona. (1 Cor. 5:11) Quei che i ga fato bruti pecati e no i se ga ciamà grami no i pol pi esser Testimònie de Geovà. Parché? Parché questo dà protession a quei che i ze fedeli, e parché volemo esser santi come Geovà. w21.10 p. 9, 10 §§ 7, 8

Noantri adoremo a Geovà quando demo dei nostri soldi par giutar el laoro dela organisassion in tuto el mondo. Quando i israeliti i ndea adorar a Geovà, lori i gavea de darghe qualcossa de acordo con quel che i podea. (Deu. 16:16) Cossita i mostrea che i dea valor a tuto quel che Geovà el fea par lori. Anca noantri mostremo che amemo a Geovà e che demo valor a tuto quel che el fà quando doperemo dei nostri soldi par giutar la nostra congregassion e i altri laori dela organisassion. Ma Geovà el speta che lo femo de acordo con quel che podemo. Varda quel che el apòstolo Paolo el ga dito: ‘Parché se la persona la vol, Dio el resta contento che la dae quel che la ga, e nò quel che no la ga.’ (2 Cor. 8:4, 12) Alora, Geovà el resta contento con quel che demo de cuor, anca che sìpia poco. — Mar. 12:42-44. w22.03 p. 24 § 13

Anca che i ansiani no i ze boni de finir fora coi problemi dei fradei, Geovà el vol che i seite a protegerli e a giutarli. Ma come che lori i pol gaver tempo par giutar tuti questi fradei? Lori i ga de far compagno el esémpio de Paolo. Lu el lodea tanto i fradei e el se sforsea de sempre incoraiarli. Lu anca el parlea ai fradei che Geovà li amea tanto. (Efe. 2:4, 5) Paolo anca el ghe volea ben ai fradei e ghe piasea de star insieme con lori. (2 Cor. 2:4) Lu el se fidea tanto nei so fradei parché el ghe ga parlà sora quel che el gavea paura e sora i so sbali. (2 Cor. 7:5; 1 Tim. 1:15) Quando Paolo el parlea dei so sbali no l’era mia par farse veder, ma par giutar i fradei. I ansiani i fà compagno a Paolo quando i ghe vol ben ai fradei e li trata con tanto amor. — 1 Tes. 2:7. w22.03 p. 28 §§ 9, 10