Agosto

Fursi Gesù l’era drio parlar dei soldadi romani che i lo gavea picà su. Anca che Gesù el gàpia sofrio tante robe, lu no l’è mia deventà una persona disgustada o trista. (1 Pie. 2:23) Cossita come Gesù, ghemo de perdonar ai altri. (Col. 3:13) Arquante persone, fursi anca i nostri parenti, no i ze de acordo con quel che credemo e cole scólie che ghemo fato nela nostra vita. Par esémpio, fursi lori i conte busie sora noantri, i ne dise su davanti dei altri, i finisse fora cole nostre publicassion o i gàpia voia de darne bote. Invesse de restar disgustadi, podemo domandar a Geovà che el giute queste persone a gaver voia de imparar sora lu. (Mat. 5:44, 45) Dele volte, no l’è mia fàcile perdonar, pedo ancora quando qualchedun el fà qualcossa pròpia bruta contra noantri. Ma se noantri seitemo disgustadi par causa de queste robe, ndaremo sofrir tanto. (Sal. 37:8) Alora, quando te perdoni, te ghè dessidio no assar che le robe rugne che le ga sucedesto le te fae deventar una persona trista e disgustada. — Efe. 4:31, 32. w21.04 p. 8, 9 §§ 3, 4

Sicuro che restemo tanto disgustadi se un amigo o qualchedun dela nostra fameia el se ferma de servir a Geovà. Proa imaginar come Geovà l’è restà disgustà quando arquanti àngeli i lo ga abandonà. (Giuda 6) Proa anca imaginar come el restea disgustà quando i israeliti, che lu el amea tanto, i lo abandonea una volta drio man. (Sal. 78: 41) Alora, te pol esser sicuro che Geovà el resta disgustà quando un amigo o qualchedun dela to fameia lo abandona. Geovà el capisse quel che te senti e el ndarà darte el coraio e el aiuto che te ghè de bisogno. Quando un fiol el abandona a Geovà, pol esser che el pare o la mare i se domande se i podaria gaver fato altre robe par giutarlo a seitar servir a Geovà. Un fradel el ga dito: “Mi pensea che gavea la colpa. Gavea anca bruti insogni sora questo.” Una sorela anca la ga infrontà una roba cossita. Tante volte la gavea bruti pensieri e la pensea: “Cossa che go fato de sbalià? Penso che no go fato el meio che podea par insegnar el me fiol sora Geovà.” w21.09 p. 26 §§ 1, 2, 4

Tanti i pensa che i servi de Geovà no i pol insegnar sora la Bìblia parché no i ga fato una università sora le religion. Ma queste persone le gavaria de ndar in serca par capir se qualcossa la ze giusta o nò. Quel che ga scrito el Vangelo de Luca l’è un bel esémpio, parché l’è ndato in serca par saver come che le robe le gavea pròpio sucedesto del scomìnsio. Lu el volea che le persone le fusse sicure de quel che le imparea sora Gesù. (Luc. 1:1-4) Anca i giudei dela cità de Berea i fea come Luca. Quando lori i ga scoltà le bone notìssie sora Gesù, lori i ze ndati studiar le Scriture Ebraiche par veder se quel che i gavea scoltà l’era pròpio la verità. (Ati 17:11) Anca ancoi le persone le ga de far questo. Lore le ga de capir se quel che ghe insegnemo l’è de acordo cola Bìblia o nò. Le persone le ga anca de studiar sora la stòria del pòpolo de Geovà dei nostri giorni. Cossita, gnanca una roba che le persone le parle contra el pòpolo de Dio, la ndarà farle gaver dubi. w21.05 p. 3 §§ 7, 8

Sito bon de ricordarte de qualche fradel che te podarissi far quel che dise questo testo? Arquanti dei nostri fradei i ga bisogno de aiuto par causa dele dificoltà che i infronta. Par esémpio, pol esser difìcile restar insieme cola so fameia nei giorni che la fà le selebrassion. Arquanti anca i se sente tanto triste nela època del ano che l’è morto qualchedun dela so fameia. Alora, podarìssino doperar el nostro tempo par restar insieme con lori. Cossita, ndaremo mostrar che lori i ze importanti par noantri. (Fil. 2:20) Alora, ghemo visto in questo stùdio che ghen’è arquante robe che le pol farne sentirse soli. Ma, mai ghemo de desmentegarse che Geovà el capisse quel che sentimo e el ne giuta. Tante volte, lu el dopera i nostri fradei par giutarne. (Mat. 12:48-50) Noantri mostremo a Geovà che semo grati che lu el ne ga dato una fameia de fradei quando restemo insieme con lori. Ghemo de ricordarse che anca se, dele volte, se sentimo soli, Geovà l’è sempre dela nostra banda! w21.06 p. 12, 13 §§ 18-20

Gesù el ga seità a predicar contento anca quando le persone no le volea scoltarlo. Parché? Parché lu el savea che lore le gavea bisogno de imparar sora Geovà e el volea giutar tante de lore a cognosser la verità sora el Regno. Lu anca el savea che dopo de un tempo fursi le volaria scoltarlo. Un esémpio de questo l’è stà la fameia de Gesù. Gesù el ga predicà tre ani e meso, ma gnanca un dei so fradei l’è deventà so dissìpolo. (Gioani 7:5) Ma dopo che lu l’è stà ressussità, lori i ze deventadi so dissìpoli. (Ati 1:14) Noantri ghemo de seitar a predicar parché no savemo chi che ndarà deventar un servo de Geovà. Ghemo anca de ricordarse che arquanti ghe mete pi tempo che altri par imparar la verità. E anca savemo che quei che no i vol mia scoltar i pol cambiar dopo che i vede che vivemo de acordo cola Bìblia e semo contenti. w21.05 p. 18 §§ 17, 18

Quando Gesù l’era qua nela Tera, el ga dito che i so dissìpoli i gavaria de far due robe. Lu el ga dito che lori i gavaria de predicar le bone notìssie del Regno e el ghe ga insegnà come farlo. (Luc. 8:1) Par esémpio, Gesù el ga dito cossa che lori i gavaria de far quando le persone le scoltesse le bone notìssie, ma anca quando no le scoltesse. (Luc. 9:2-5) Lu anca el ga dito che questo laoro el saria fato in tute le nassion. (Mat. 24:14; Ati 1:8) Gesù anca el ga dito che i so dissìpoli i gavaria de insegnar le persone che le podaria deventar so dissìpoli a obedir tute le robe che lu el gavea domandà. Gesù el ga dito che questo laoro el saria fato fin ala fin. (Mat. 28:18-20) Anca par meso de una vision, Gesù el ga dito al apòstolo Gioani che tuti so dissìpoli i gavaria de giutar le persone a imparar sora Geovà. — Apo. 22:17. w21.07 p. 2, 3 §§ 3, 4

Le persone che le vol esser meio che i altri sol le pensa in lore stesse. Par esémpio, un paron el pol far robe sbaliade par guadagnar de pi che i altri. O una persona che la fà sport la pol farghe mal a qualchedun sol par vinser el giugo. O fursi una persona la pol imbroiar nte una prova par ndar studiar nela università che la vol. Noantri semo sicuri che queste robe le ze tanto sbaliade. (Gàl. 5:19-21) Ma ghemo de star atenti parché, sensa nicorderse, podemo voler esser meio che i altri nela congregassion. Se femo questo, podemo intrigar la union intrà i fradei. Par quela, l’è importante studiar sora esempi de òmini e done del passà che no i ga volesto esser meio che i altri. w21.07 p. 14 §§ 1, 2

Par causa del amor leal, giutemo a quei che i ze desanimadi. Ancoi, fradei e sorele anca i mostra amor quando i se sforsa par giutar a quei che i ze desanimadi. Lori i ama i so fradei e i vol tanto far qualcossa par giutarli. (Pro. 12:25; 24:10) Lori i ze drio far quel che el apòstolo Paolo el ga dito: ‘Gavé de consolar quei che i ze desanimadi, de giutar i fiachi e de gaver passiensa con tuti.’ (1 Tes. 5:14) Podemo giutar una persona che la ze desanimada quando la scoltemo e la assemo sicura che la amemo. Geovà el resta tanto contento quando mostremo amor e ghe demo atension ai so cari servi. L’è tanto bel quel che dise Proverbi 19:17: ‘Quei che i giuta i poareti i ghe dà in prèstio a Geovà, e lu el ndarà ricompensarli par quel che i ga fato.’ w21.11 p. 10 §§ 11, 12

Cossa che ghemo de far par pareciarse par quel che ndaremo infrontar? Ghemo de ricordarse sempre che la roba pi importante nela nostra vita la ze la nostra amicìssia con Geovà. Cossita, saremo ancora de pi sicuri che Geovà el ndarà protegerne quando Goghe de Magoghe la volerà finir fora col pòpolo de Dio. Le parole del testo de ancoi le mostra che Davi l’era sicuro che el podea fidarse in Geovà. Lu el ga fato questo e Geovà mai lo ga abandonà. Par esémpio, quando Davi el ndaria lotar contra Golia, lu el ga dito che Geovà el ndaria giutarlo a copar quel nemigo. (1 Sam. 17:46) Dopo, Davi el ga dito che Geovà l’era con lu quando Saul el volea coparlo. (1 Sam. 18:12) Davi el savea che Geovà sempre el ndaria giutarlo a infrontar le dificoltà, e anca noantri podemo esser sicuri de questo. w22.01 p. 6 §§ 14, 15

Quando Geovà el vol far una roba, el vol dar onor al so nome e giutar ai altri. Par quela che el fà tuto con passiensa e el dopera el tempo che ghe vol par farlo. Varda come che el ga fato questo quando el ga creà la Tera par i umani. La Bìblia la dise che Dio el ga scoliesto le so misure, i so fondamenti e che el ga metesto el so prinsipal sasso. (Giò 38:5, 6) Dopo, Geovà el se ga fermà par veder quel che lu el gavea creà e el ga visto che l’era tanto bel. (Gén. 1:10, 12, 31) Cossa che imparemo de questo? Imparemo che a Geovà ghe ga metesto miliari de ani par crear tuto. Lu el ga fato tute le robe pin pian, ma l’è restà tuto pròpio bel! Sicuro che i àngeli i restea tanto contenti cole robe che Geovà l’era drio crear, parché la Bìblia la dise che lori i osea par lodar a Dio. w21.08 p. 9 §§ 6, 7

Nela ilustrassion dei talenti, Gesù el ga contà che un omo el ndaria far un viaio. Alora, lu el ga ciamà i so schiavi e el ghe ga dato talenti par far negossi. Lu el savea che cada schiavo el gavea le so abilità, par quela che el ga dato sinque talenti al primo schiavo, due al secondo e un al terso. I due primi schiavi i ze stati bravi de laorar coi soldi. Ma el terso no’l ga fato gnente coi soldi che el so paron el ghe ga dato. Par quela che el so paron lo ga mandà via. El primo e el secondo schiavo i se ga sforsà tanto par far el laoro che i gavea ricevesto del so paron. Par quela, lori i ga dopià i talenti che i gavea. Come lori i ze stati pròpio bravi, el so paron l’è restà contento e el se ga fidà de darghe altri laori. w21.08 p. 21 § 7; p. 22 §§ 9, 10

In questi ùltimi giorni, Geovà l’è drio mostrar passiensa parché no’l vol che nissun sìpia destruto. (2 Pie. 3:9) Lu l’è drio dar la oportunità a tuti de ciamarse grami. Ma lu no’l va spetar par sempre. A quei che no i se ciama grami ndarà suceder la medèsima roba che ga sucedesto con Faraò, nei giorni de Moisè. Geovà el ga dito a Faraò: ‘Parché mi podaria belche gaver doperà la me man par atacar ti e el to pòpolo con una bruta piaga e te sarissi stà belche finio fora dela tera. Ma l’è par quela che mi te go assà vivo: par farte veder el me poder e cossita tuti i va parlar del me nome in tuta la tera.’ (Éso. 9:15, 16) Tute le persone dela Tera le gavarà de capir che Geovà l’è el ùnico vero Dio. (Eze. 38:23) El sgorlon che el testo de ancoi el parla el ndarà destruser tuti quei che, come Faraò, no i acetarà Geovà come so governante. w21.09 p. 18 §§ 17, 18

Sito drio sofrir parché qualchedun che te ami el ga abandonà a Geovà? Cossa te ghè de far se qualchedun nela congregassion el te dise una roba che te fà restar ancora pi disgustà? Fursi i fradei i ndarà parlar qualcossa che no te piase mia o gnanca i saverà cossa parlarte. (Tia. 3:2) Alora, gàpia passiensa con lori parché tuti noantri sbaliemo. Ricòrdate de quel che el apòstolo Paolo el ga dito: “Seité a soportarve un al altro e a perdonarve del tuto un al altro, anca se qualchedun el ga rason par brontolar.” (Col. 3:13) Seita a giutar la fameia dela persona che la se ga fermà de servir a Geovà. Adesso, lori i ga ancora de pi bisogno che te li ami e che te li incoraie. (Ebr. 10:24, 25) Dele volte, arquanti fradei i se ferma de parlar cola fameia de quel che el ga abandonà a Geovà. Par causa de questo, la fameia la pol sentirse come se anca ela la gavesse abandonà a Geovà. Ma no podemo assar che questo suceda. I gióveni, che i so genitori i se ga fermà de servir a Geovà, i ga ancora de pi bisogno che i fradei i ghe lode e i ghe dae coraio. w21.09 p. 29 §§ 13, 14; p. 30 § 16

Sicuro che i nostri fradei pi veci i resta tanto contenti de parlar dele benedission che i ga bio de laorar par Geovà. Quando i fradei pi veci e i pi gióveni i discore, tuti i due i ze incoraiadi. (Rom. 1:12) I pi gióveni i resta pi sicuri che Geovà el tende de quei che i ze fedeli, e quei pi veci i se sente amadi par i altri. Quando ghemo una bela età, fursi pensemo che no semo pi bei come una volta. Ma par Geovà, quei che i ze leai i resta cada volta pi bei. (1 Tes. 1:2, 3) Parché? Parché lori i ga assà che Geovà li giutesse a gaver bele qualità. Alora, se se sforsemo par cognosser e imparar coi fradei pi veci, ndaremo veder cada volta de pi che i ze tanto pressiosi! Nela congregassion, ghen’è pi union quando i fradei pi gióveni i dà valor ai pi veci, ma anca quando i pi veci i dà valor ai pi gióveni. w21.09 p. 7 §§ 15-18

Ghemo de sforsarse par no esser rugni, ma esser tanto misericordiosi come el nostro Dio. (Efe. 2:4) La persona che la ze misericordiosa la resta disgustada de veder che qualchedun l’è drio sofrir, ma anca la fà qualcossa par giutarlo. Alora, tuti ghemo de star atenti se qualchedun dela nostra fameia, nela congregassion o ndove semo de star el ga bisogno de aiuto. Cossita, saveremo come giutar. Podemo domandarse: ‘Sarà che qualchedun el ga bisogno de aiuto par far de magnar o nantra roba? Cognossemo qualchedun che el ga bisogno de consolo? Sarà che un fradel che l’è torna a esser Testimònia de Geovà el ga bisogno che lo consolemo e lo incoraiemo? Sarà che podarìssino consolar le persone ndove predichemo cole bone notìssie?’ (Giò 29:12, 13; Rom. 10:14, 15; Tia. 1:27) Se stemo atenti a quel che i altri i ga de bisogno, sarà pi fàcile saver come mostrarghe misericòrdia. Quando mostremo questa qualità, assemo contento el nostro Pare Geovà, che l’è tanto misericordioso! w21.10 p. 13 §§ 20-22

Davi el ga dito che no ghe mancarà gnente de bon a quei che i serve a Geovà. Lu el ga dito la medèsima roba nel Salmo 23. Alora, pensarghe sora questo Salmo ndarà giutarne a capir el Salmo 34. (Sal. 23:1-6) Nel Salmo 23, Davi el ga dito: “Geovà l’è el me Pastor. No me mancarà gnente.” Dopo, Davi el ga parlà de arquante bele robe che ghe sucedea parché Geovà l’era el so Pastor. Par esémpio, anca che dele volte, Davi el restesse desanimà, lu el savea che Geovà l’era sempre con lu e che sempre lo giutea a far quel che l’è giusto. Davi el pensea che servir a Geovà l’era come butarse do nte un bel prà. Anca se Davi el savesse che el ndaria infrontar problemi e che el gavaria nemighi, lu el savea che Geovà l’era el so Pastor e che no ghe tochea gaver paura. Alora, parché che podemo dir che ‘no ghe ga mancà gnente? Parché Davi el gavea tuto quel che ghe ocorea par esser amigo de Geovà. Lu no’l gavea bisogno de tante robe par esser contento. Le benedission e la protession de Geovà le era le robe pi importante par Davi e quel che lo assea contento. Cossita, imparemo che l’è tanto importante veder i soldi e le robe che ghemo dela maniera giusta. w22.01 p. 3, 4 §§ 5-7

Tanti servi de Geovà del passà i ga predicà a persone che no le ga volesto scoltarli. Par esémpio, Noè l’è stà “un predicador dela giustìssia” par 40 o 50 ani. (2 Pie. 2:5) Sicuro che el volea che le persone lo scoltesse, ma Geovà no’l gavea parlà che questo ndaria suceder. Invesse, Geovà el ga dito che Noè el fesse su la arca e che el ndesse rento ‘coi so fioi, la so dona e le done dei so fioi’. (Gén. 6:18) Quando Geovà el ga dito a Noè le mesure dela arca, fursi Noè el ga capio che le persone no le ndaria scoltarlo parché no ghe staria tanta gente rento la arca. (Gén. 6:15) E come belche savemo, gnanca una persona la ga scoltà a Noè. (Gén. 7:7) Ma anca cossita, Geovà l’è restà contento col laoro de Noè. Parché? Parché Noè el gavea fato tuto quel che Geovà el ghe gavea domandà. (Gén. 6:22) Sicuro che Geovà el vedea a Noè come un bravo predicador. w21.10 p. 26 §§ 10, 11

Proa imaginar come Rute la se ga sentio de scoltar quel che Noemi la ga dito. Ela la gavea fato tuto quel che la podea par giutar a Noemi. Par esémpio, la ga piandesto insieme, la ghe ga dato consolo e la ga viaià arquanti giorni. Quando Noemi la ga dito che Geovà el ghe gavea fato tornar casa sensa gnente, parea che no la ghe dea valor a quel che Rute la gavea fato. Fursi, Rute la ze restada tanto disgustada, ma la ga seità a giutar Noemi. (Rut. 1:3-18) Imaginemo che semo drio far tanto sforso par giutar una sorela che la ze desanimada, e la parla qualcossa che ne assa disgustadi. Se questo sucede, no ghemo de pensar che la ga fato a posta. Ghemo de seitar a giutarla e ghemo de domandar che Geovà el ne giute a saver come consolarla. (Pro. 17:17) E anca che no la vol el nostro aiuto, el amor leal el ne giutarà a no desister. — Gàl. 6:2. w21.11 p. 11 §§ 17-19

La Bìblia la dise che una persona santa la obedisse ai comandamenti de Dio, lo adora dela maniera giusta e la dopera la so vita par servir a lu. La persona che la ze santa anca la se sforsa par gaver una bona amicìssia con Geovà. Noantri restemo maraveiadi de saver che podemo esser amighi de Geovà, un Dio che l’è santo. Quando studiemo nela Bìblia che Geovà l’è santo, restemo cada volta pi maraveiadi. Geovà el mostra che l’è santo in tuto quel che el fà. Arquanti serafin i ga dito: ‘Santo, santo, santo l’è Geovà dei esèrsiti.’ (Isa. 6:3) I serafin i ze àngeli che i resta dela banda de Dio, e lori sol i pol far questo parché i ze santi. w21.12 p. 3 §§ 4, 5

Quasi tuti i gióveni i resta preocupadi sora cossa i ndarà far nela so vita. Pol esser che i so maestri e persone dela so fameia che no i serve a Geovà i ghe dise che i ga de far una università par gaver un bel laoro. Sicuro che ghe vol tanto tempo par far una università. Ma pol esser che i so genitori e i amighi nela congregassion li incoraie a doperar la so vita par far de pi par Geovà. Cossa pol giutar un gióveno che el ama a Geovà a far la meio scólia? Lu el pol leder Efesi 5:15-17. Dopo, el pol domandarse: ‘Cossa che Geovà el pensa che l’è meio par mi? Cossa ndarà assar Geovà contento? Che scólia ndarà giutarme a doperar ben el me tempo?’ I gióveni i ga de ricordarse che, come el testo de Efesi el dise, i giorni i ze rugni e che el governo de Sàtana suito el ndarà finirse. w22.01 p. 27 § 5

Come ghemo visto, Tiago l’è deventà dissìpolo de Gesù. Quando che questo ga sucedesto? Dopo che Gesù l’è stà ressussità e el se ga fato veder a Tiago e a tuti i altri apòstoli. (1 Cor. 15:7) Alora, lu l’era anca insieme dei altri apòstoli in Gerusalen quando i ga ricevesto spìrito santo. (Ati 1:13, 14) Dopo, lu l’è anca deventà parte del Corpo Governante de quela època. (Ati 15:6, 13-22; Gàl. 2:9) E vanti del ano 62, Geovà el ghe ga dato spìrito santo par scriver ai untadi la carta che la ga el so nome. Fin ancoi, tuti quei che i ga la speransa de viver nel cielo o nela Tera i impara tanto de questa carta. (Tia. 1:1) De acordo col studioso de nome Giosefo, el somo sasserdote Anania, fiol de Anà, el ga mandà copar Tiago. Tiago l’è stà fedele a Geovà fin la so morte. w22.01 p. 8 § 3; p. 9 § 5

Una dele robe che podemo imparar del testo de ancoi l’è che Geovà no’l ndarà protegerne de tute le dificoltà. Cossita come Gesù, ghemo de esser pareciadi par seitar fedeli a Geovà, anca se ne toca morir. (Mat. 16:24, 25) Ma Geovà el ne ga dito che no’l ndarà suceder con noantri quel che no saremo boni de soportar. (1 Cor. 10:13) Nantra roba che imparemo de quel che Gesù el ga dito l’è che le persone le ndarà far robe sbaliade contra noantri. (1 Pie. 2:19, 20) Questo sucede nò parché ghemo fato qualcossa sbaliada, ma parché femo le robe difarente del mondo e parché parlemo sora la verità. (Gioani 17:14; 1 Pie. 4:15, 16) Gesù el ga capio parché che Geovà lo ga assà sofrir. Ma pol esser che arquanti fradei i se domanda parché che Geovà el assa robe brute suceder a lori. (Aba. 1:3) Geovà el mostra misericòrdia e el ga passiensa con questi fradei. Lu no’l pensa che lori no i ga pi fede, ma che i ga bisogno del so consolo. — 2 Cor. 1:3, 4. w21.04 p. 11 §§ 9, 10

Geovà el ndarà acetar la nostra adorassion a lu se lo obedimo e ghe mostremo amor e rispeto. Tuti noantri amemo tanto a Geovà e volemo adorarlo dela meio maniera che podemo parché savemo che lu lo mèrita. E una maniera de adorar a Geovà l’è pregar a lu. La Bìblia la dise che le nostre orassion le ze come insenso. Nel passà, el insenso l’era ben parecià, e l’era doperà nel tabernàcolo e dopo, anca nel témpio. Geovà el ghe piasea del profumo che vegnea fora quando i brusea insenso. Ancoi, Geovà anca el resta tanto contento quando preghemo a lu de cuor, anca che no semo boni de doperar tante bele parole. (Pro. 15:8; Deu. 33:10) Quando parlemo a Geovà che lo amemo e lo ringrassiemo, lu el resta tanto contento. Lu el vol che ghe parlemo dei nostri pensieri, quel che pensemo e de quel che volemo far. Alora come che te pol pregar ancora meio? Vanti de farlo te pol pensar in quel che te vol parlar a Geovà. Cossita te vè dar a lu el meio “insenso” che te pol. w22.03 p. 20 § 2; p. 21 § 7

Savemo che no saremo noantri che ndaremo dessider chi che ndarà salvarse nel Armagedon. (Mat. 25:34, 41, 46) Par esémpio, volemo che tante persone, come arquante dela nostra fameia, le dessida servir a Geovà vanti del fin. Ma sarà che ndaremo fidarse nei giulgamenti de Geovà, o ndaremo fermarse de servirlo parché no saremo de acordo cole so dessision? Alora, ghemo de fidarse ancora de pi in lu adesso par esser boni de farlo anca nel futuro. Proa pensar in tuto quel che ndarà suceder dopo del Armagedon. Par esémpio, no ghen sarà pi le religion false, i governi e gnanca le persone che le vol sol guadagnar cada volta de pi soldi. Nissun pi ndarà restar malà, vècio o morir. Sàtana e i demoni anca i sarà metesti in preson par mila ani. Alora, no ghen sarà pi tute le robe rugne che sucede ancoi par causa de lori. (Apo. 20:2, 3) Sicuro che fidarse nela maniera de Geovà far le robe la ze la meio dessision! w22.02 p. 6, 7 §§ 16, 17

Gesù el volea viver in pace con tuti e el se sforsea par farlo. Quando le persone le ghe disea su, lu no’l ghe disea indrio. Lu anca el incoraiea quei che i era disgustadi un colaltro a far la pace. Lu el ga dito che una persona sol la podaria assar Geovà contento se la fusse drio viver in pace con tuti. (Mat. 5:23, 24) E quando i dissìpoli i barufea par saver chi che l’era el meio intrà de lori, Gesù li giutea a far la pace. (Luc. 9:46-48; 22:24-27) Ghemo de proar viver intesi con tuti. Ma se ga belche sucedesto qualcossa intrà noantri e nantro fradel, volemo far la pace con lu. E se savemo che due fradei i ze disgustadi un colaltro, ghemo de incoraiarli a far la medèsima roba. (Fil. 4:2, 3; Tia. 3:17, 18) Alora, podemo domandarse: ‘Mi vui pròpio sforsarme par far la pace coi altri? Se un fradel o una sorela el fesse qualcossa che no me piase, seitaria disgustà? Mi ndaria far la pace con lu o spetaria che lu lo fesse? Mi lo faria anca se penso che lu che el ga sbalià? w22.03 p. 10 §§ 10, 11

La Bìblia belche la disea che el pòpolo de Dio el volaria servirlo e che el ndaria farlo dela maniera che Gesù el ga insegnà. (Sal. 110:3) E ancoi, l’è pròpio questo che l’è drio suceder parché i servi de Dio i dopera milioni de ore par predicar le bone notìssie. Lori i fà questo parché i vol e i dopera i so soldi par farlo. Lori anca i incoraia i so fradei, li giuta in quel che i ga de bisogno e a far pi forte la so amicìssia con Geovà. Quei che i ze ansiani o servi ministeriai anca i dopera tanto del so tempo par pareciarse par far le parte nele riunion e par giutar i fradei. Ma parché che i servi de Geovà i fà tuto questo? Parché i ama a Geovà e ale persone. (Mat. 22:37-39) Gesù l’è un bel esémpio parché sempre el fea quel che l’era meio par i altri, e noantri se sforsemo par far compagno a lu. (Rom. 15:1-3) Se femo cossita, gavaremo tante benedission. w22.02 p. 20 §§ 1, 2

In Israel, tanti i laorea in colònia par i altri, e tuti i giorni i ciapea i soldi de quela giornada. Se el paron no’l ghe desse i soldi del so laoro, quela persona no la saria bona de dar de magnar ala so fameia in quel giorno. Par quela che Geovà el ga dito che una persona, che no la ga quel che ghe ocore par viver, la ga tanto de bisogno dei soldi del so laoro. (Deu. 24:14, 15; Mat. 20:8) Ancoi, quasi tuti i paroni i paga i so laoradori tuti i giorni, a cada due stimane o una volta al mese. Ma arquanti paroni i paga ben manco de quel che saria giusto. Questi paroni i ze drio tegner i soldi che saria giusto darghe a quei che i laora par lori. Ma un paron che el serve a Geovà el ga de ricordarse de Levìtico 19:13 e far tuto polito. w21.12 p. 10 §§ 9, 10

L’è sicuro che sofrir tanto ga assà Gesù con sen. Alora, lu el gavea bisogno che qualchedun ghe desse qualcossa da bever. Gesù no’l pensea che l’era fiaco parché el gavea domandà aiuto. Anca noantri ghemo de pensar come lu. L’è vera che no ne piase tanto de domandar sempre el aiuto dei altri. Ma, se vedemo che no semo boni de far una roba noantri soli, ghemo de domandar el aiuto dei altri. Par esémpio, se semo belche veci o semo maladi, podemo domandar che qualchedun el ne mene al dotor o al mercà. E se semo desanimadi, podemo domandar el aiuto de un fradel o un ansiano che i pol scoltarne o incoraiarne. (Pro. 12:25) Ghemo de ricordarse che i nostri fradei e sorele i ne ama e i ga caro de giutarne quando semo drio infrontar qualche dificoltà. (Pro. 17:17) Ma, lori no i pol mia saver quel che pensemo, par quela che ghemo de parlarghe. w21.04 p. 11, 12 §§ 11, 12

Tanti de noantri i sofre quando càmbia qualcossa nela vita. Par esémpio, arquanti i ga fato un laoro nela organisassion par tanti ani, ma de colpo, ghe ga tocà scominsiar a far nantro. Altri i ga bio de fermarse de far el laoro che i fea e che ghe piasea tanto parché i ze vegnesti pi veci. Se una roba cossita la sucede con noantri, sicuro che restemo desanimadi. Cossa che pol giutarne quando qualcossa nela nostra vita la càmbia? Ghemo de proar veder le robe come Geovà el vede. Ghemo de ricordarse che Geovà l’è drio far robe tanto bele e che noantri ancora semo drio giutarlo. (1 Cor. 3:9) Ghemo anca de ricordarse che Geovà el va ancora amarne. Alora se el laoro che feino nela organisassion de Geovà el ga cambià, no ghemo de seitar a pensar parché che questo ga sucedesto. Invesse de seitar vardar indrio, ghemo de pregar a Geovà e domandar che el ne giute a far el meio che podemo adesso. (Ecl. 7:10) Cossita, anca che le robe le càmbie nela nostra vita, saremo boni de seitar a esser contenti e fedeli a Geovà. w22.03 p. 17 §§ 11, 12

La Bìblia la dise che noantri podemo amar tante robe. Par esémpio, podemo amar piantar e tor su, el vin e el òio, la dissiplina, el saver, la sabedoria e tante altre robe. (2 Cró. 26:10; Pro. 12:1; 21:17; 29:3) Ma no podemo gaver amor leal par robe cossita. Sol podemo gaver amor leal par le persone. Sarà che Geovà el mostra amor leal a tute le persone? Nò! Geovà sol el mostra amor leal ai so amighi. Lu el ghe dà una bela speransa e mai el ndarà abandonarli. Geovà el ga mostrà amor a tute le persone. Gesù el ga dito a Nicodemo: “Parché Dio el ga amà tanto el mondo, che el ga dato el so ùnico fiol, cossita tuti quei che i dimostra fede in lu no i sìpia destruti, ma i possa viver par sempre.” — Gioani 3:1, 16; Mat. 5:44, 45. w21.11 p. 2 § 3; p. 3 §§ 6, 7

Noantri semo drio infrontar tanti problemi e ndaremo infrontar ancora de pi. (Mat. 24:21) Noantri semo tanto premosi de viver sensa questi problemi e de gnanca ricordarli! (Isa. 65:16, 17) Alora, ghemo de far pi forte la nostra perseveransa. Parché? Parché Gesù el ga dito: “Par causa dela vostra perseveransa, valtri gavaré la vita.” (Luc. 21:19) Veder che altri i ze boni de perseverar ne giuta a infrontar anca le nostre dificoltà. Geovà l’è el meio esémpio de perseveransa che ghen’è. Come cossita? Proemo pensar un pochetin. Sàtana l’è drio governar el mondo e ghen’è tanti problemi. Geovà el podaria finir fora con questi problemi adesso, ma lu l’è drio spetar la ora giusta. (Rom. 9:22) Intanto che el speta, lu l’è drio perseverar. w21.07 p. 8 §§ 2-4