Otobre

Quel che imparemo l’è tuto de acordo cola Bìblia. Anca cossita, le persone no le vol scoltarne parché le pensa che la nostra maniera de adorar a Dio la ze massa sémplisse e parché quel che insegnemo no l’è quel che le vol scoltar. Cossa che pol giutarne a no gaver mai dubi? Le selebrassion che no le ze de acordo cola Bìblia le pol esser bele, ma no le fà deventar pi forte la nostra fede. El apòstolo Paolo el ga dito ai cristiani de Roma che la fede la va drio a quel che se scolta, e quel che se scolta vien del Cristo. (Rom. 10:17) Cossa ghemo de far par gaver una fede forte? Ghemo de studiar la Parola de Dio e cognosser la verità sora lu, parché sensa fede no podemo far quel che ghe piase a Dio. Alora, no ne ocore veder un grando miràcolo par esser sicuri che quel che imparemo l’è la verità. Invesse, ghemo de studiar ben la Bìblia. Cossita, gavaremo una fede pi forte e no gavaremo pi dubi. — Ebr. 11:1, 6. w21.05 p. 4, 5 §§ 11, 12

El apòstolo Paolo el ga infrontà tante brute dificoltà. Par esémpio, lu el ga bio bisogno de forsa quando le persone le ghe ga dato bote, le ghe ga dato sassade e lo ga metesto in preson. (2 Cor. 11:23-25) Paolo el gavea de far tanto sforso par no restar desanimà. (Rom. 7:18, 19, 24) Paolo anca el gavea de soportar “un spin nela carne” e el ga domandà a Geovà che lo cavesse via. (2 Cor. 12:7, 8) Paolo el ga infrontà tante dificoltà, ma Geovà ghe ga dato forsa par seitar a predicar le bone notìssie. Par esémpio, Paolo l’è stà metesto in preson nte una casa in Roma. Alora, lu no’l podea ndar via de casa, ma el ga predicà a tanti lìderi giudei e fursi anca ale autorità del governo. (Ati 28:17; Fil. 4:21, 22) Paolo el ga anca predicà a tanti soldadi romani che i protegea le autorità e a quei che i ndea visitarlo. (Ati 28:30, 31; Fil. 1:13) In quel tempo, Paolo el ga scrito arquante carte che le ne giuta fin ancoi. w21.05 p. 20, 21 §§ 4, 5

El rè de Giudà, Uzia, el gavea tante abilità, el ga vinsesto arquante guere, ga fato su tante cità e el gavea tante colònie. El vero Dio el fea che lu el ndesse ben. (2 Cró. 26:3-7, 10) Ma la Bìblia anca la dise che, dopo che l’è deventà forte, el so cuor l’è deventà orgolioso par la so pròpia rovina. Alora, lu no’l ga acetà consili e el ga fato una roba che no’l gavea el dirito de far. Geovà el gavea dito che sol i sasserdoti i podea brusar insenso nel témpio. Ma Uzia el ga pensà che el gavea questo dirito, e l’è ndato rento el témpio e el ga brusà insenso. Geovà no ghe ga piasesto de questo e el ga fato Uzia gaver lepra fin morir. (2 Cró. 26:16-21) Sarà che anca noantri podemo cascar nela tràpola del orgòlio come Uzia? Si, se noantri pensemo massa de noantri stessi. Ghemo de ricordarse che le nostre abilità o el laoro che femo nela organisassion l’è stà Geovà che el ne ga dato. (1 Cor. 4:7) Se semo orgoliosi, Geovà mai el ndarà doperarne. w21.06 p. 16 §§ 7, 8

Gesù el savea che gnanca sempre ndaria suceder bele robe ai so dissìpoli nela predicassion. La Bìblia gnanca no la parla se quei che li gavea scoltà i ze deventadi dissìpoli de Gesù. I dissìpoli i gavea de restar contenti de saver che Geovà l’era contento col laoro che i era drio far. Se seitemo a predicar, ndaremo viver par sempre. Quei che i predica e i insegna le bone notìssie de tuto el cuor i ze drio ‘semenar de acordo col spìrito’. Cossa che questo vol dir? Vol dir che assemo Geovà doperar el so spìrito santo par far quel che lu el vol nela nostra vita. Se no se fermemo de predicar e gnanca desanimemo, Geovà el promete darne vita eterna, anca se no ghemo giutà nissuni a batesarse. — Gàl. 6:7-9. w21.10 p. 26 §§ 8, 9

Noantri anca predichemo e femo dissìpoli parché amemo ale persone. Varda el bel esémpio de Gesù. Gesù e i so dissìpoli i era pròpio strachi parché i gavea predicà tuto el giorno. Alora, lori i ze ndati nte un posto par riposar, ma le persone li ga catà. Gesù l’era pròpio straco, ma anca cossita, el ghe ga insegnà “tante robe”. Lu el se metea nel posto de lore, alora ghe fea pecà vederle sofrir e sensa una speransa. La medèsima roba la sucede anca ancoi. Anca se ne par che le persone le ze felice e contente, lore le ze come piégore perse sensa un pastor par tenderle. El apòstolo Paolo el ga dito che queste persone no le cognosse a Dio e no le ga una speransa. (Efe. 2:12) Queste persone le ga bisogno de cognosser a Geovà. Quando pensemo sora questo, sentimo amor e compassion par lore e volemo giutarle. E la meio maniera de far questo l’è insegnarghe la Bìblia. w21.07 p. 5 § 8

La persona che la pensa sol nela stessa la ze orgoliosa. La persona che la ze invidiosa la vol gaver quel che i altri i ga, ma anca la vol che i perda quel che i ga. La persona che la ga invìdia de qualchedun la ga anca òdio par lu. Metemo dir che rento el òio de un avion ghen’è sporchìssie. Alora, fursi el sarà bon de zolar, ma se queste sporchìssie le stropa le manghere, el avion el va cascar. Noantri podemo dir che queste sporchìssie rento el òio le ze come la invìdia e pensar sol in noantri stessi. Parché? Parché fursi una persona la serve a Geovà a tanto tempo, ma se la pensa e la fà cossita, la va cascar. (Pro. 16:18) Come cossita? Questa persona la ndarà fermarse de servir a Geovà, la ndarà sofrir e la farà i altri sofrir. El consìlio che Paolo el ga dato ne mostra cossa far par no pensar sol in noantri stessi. Paolo el ga dito: “No sté far gnente con competission e gnanca pensando sol in quel che l’è meio par valtri. Ma gavé de esser ùmili e pensar che i altri i ze pi importanti che valtri.” — Fil. 2:3. w21.07 p. 15, 16 §§ 6-8

Arquanti i pensa che la vera religion la ga le risposte a tute le domande, anca che la Bìblia no la gàpie queste risposte. Ma, sarà che l’è giusto pensar cossita? Varda el esémpio del apòstolo Paolo. L’è vera che lu el ga dito che ghemo de esser sicuri de tute le robe. (1 Tes. 5:21) Ma lu el ga anca dito che no l’era bon de cognosser e de capir tute le robe. (1 Cor. 13:9, 12) Paolo no’l capia tute le robe e anca noantri no semo boni de capir. Ma anca che Paolo no’l fusse bon de capir tute le robe, lu el capia quele che le ze pi importante. Queste robe lo assea sicuro che quel che el imparea l’era la verità! Noantri ghemo de esser cada volta pi sicuri che quel che imparemo l’è la verità. Come podemo far questo? Ghemo de studiar sora come Gesù el ga adorà a Dio, e veder se le Testimònie de Geovà le ze drio far questo ancoi. w21.10 p. 18, 19 §§ 2-4

Tuti i fradei pi veci i pol giutar tanto ai altri. Come? Resté contenti col laoro che gavé adesso, proé far robe difarente e no seité a pensar in quel che no podé far. El rè Davi el volea tanto far su el témpio, ma Geovà el ghe ga dito che Salomon, el so fiol, el ndaria farlo. Davi el ga acetà quel che Geovà el ga dito e el ga fato tuto quel che el podea par giutar nela costrussion. (1 Cró. 17:4; 22:5) Davi no’l ga mia pensà che sol lu el saria bon de far el laoro parché l’era pi vècio e gavea de pi speriensa che el so fiol. (1 Cró. 29:1) Lu el savea che la costrussion la saria ben fata par causa dela benedission de Geovà, e nò par causa dela età o dela speriensa dei laoradori. Come Davi, i fradei de età i seita a far el so meio par Geovà anca che i so laori nela organisassion i gàpia cambià. E lori i sa che Geovà el ndarà benedir i gióveni che i ze drio tender de quel che i fea vanti. w21.09 p. 9 § 4; p. 10 §§ 5, 8

Quando volemo far de pi par Geovà, semo pi contenti e sicuri de quel che volemo far. Ma noantri ghemo de dessider cossa far de acordo cole nostre abilità e la nostra vita, e nò de acordo coi altri. Parché, se noantri volemo far una roba che no saremo boni de farla, restaremo desanimadi. (Luc. 14:28) Come servo de Geovà, te sì tanto valioso par la So fameia e no ghen’è nantra persona compagna a ti. Geovà el ga volesto che te lo cognossessi, nò parché te sì meio che i altri, ma parché lu el te ga vardà e el ga visto che te eri una persona ùmile e che te volei imparar. Alora sìpia sicuro che Geovà el dà tanto valor a quel che te fè par lu. La to perseveransa e lealtà le ze una prova che te ghè un cuor sinsiero e bon. (Luc. 8:15) Alora, seita a far el to meio a Geovà. Cossita, te restarè contento con quel che te pol far. — Gàl. 6:4. w21.07 p. 24 § 15; p. 25 § 20

Fursi ghemo de spetar con passiensa che la giustìssia la sìpia fata. Par esémpio, quando una persona la fà un bruto pecato, i ansiani i domanda a Geovà la sabedoria par veder le robe dela so maniera. (Tia. 3:17) I ansiani i vol tanto giutar questa persona, proteger la congregassion e giutar a quei che i ga sofrio qualche ingiustìssia par causa del bruto pecato. (Tia. 5:19, 20; 2 Cor. 1:3, 4) Cossa che i ansiani i ga de far quando qualchedun el ga fato un bruto pecato? Lori i ga de proar capir ben quel che ga sucedesto, pregar a Geovà, darghe consili dela Bìblia e anca la dissiplina che ghe vol. (Ger. 30:11) Ma ghe vol tempo par far tute queste robe. Se i ansiani i fà cossita, sarà meio par tuta la congregassion. w21.08 p. 11 §§ 12, 13

El libro de Rute el conta la stòria de Noemi, dela so nora Rute e de Boaz. Boaz l’era dela fameia del omo de Noemi e el amea tanto a Geovà. El libro el conta che le persone de Israel le era drio patir de fame e che, par causa de questo, Noemi, so omo e i so due fioi i ze ndati de star a Moabe. In Moabe, el so omo l’è morto e i so due fioi i se ga maridà. Ma dopo de un tempo, anca lori i ze morti. (Rut. 1:3-5) Noemi la ze restada tanto desanimada par causa de tute queste robe brute che ghe ga sucedesto. La era tanto desanimada che la ga dito che l’era Geovà che l’era drio farla sofrir. La ga anca dito che el Tuto Poderoso el gavea fato la so vita deventar tanto amara, che lu l’era contra ela e che l’era drio farla tribolar tanto. (Rut. 1:13, 20, 21) Geovà el sa che una persona che la ga sabedoria la pol deventar mata quando la sofre. (Ecl. 7:7) Cossa che Geovà el ga fato? Geovà el ga doperà Rute par mostrar amor leal a Noemi. Con amor, Rute la ga giutà Noemi a dàrghene fora col desànimo e la ga assà sicura che Geovà la amea. w21.11 p. 9 § 9; p. 10 §§ 10, 13

Anca se semo drio far el nostro meio a Geovà adesso, questo no vol dir che no ne ocore pi sforsarse. Noantri podemo e ghemo de voler far de pi laori nela organisassion de Geovà. Cossita ndaremo predicar e insegnar meio e giutaremo de pi i nostri fradei. Ma sol saremo boni de far questo se ghemo sabedoria e umiltà. Invesse de pensar in quel che l’è meio par noantri, ghemo de pensar in quel che l’è meio par i altri. (Pro. 11:2; Ati 20:35) Se te vol far ancora de pi a Geovà, domandaghe che el te giute a capir quel e te sì bon de far. (Pro. 16:3) Par esémpio, fursi te podarissi esser pioniero aussiliar, regolar, laorar in Betel o nela costrussion. Fursi te podarissi anca far de pi nela predicassion, come par esémpio, imparar una nova léngua o ndar predicar in nantro posto. w21.08 p. 23 §§ 14, 15

El amor leal l’è tanto importante par Geovà. (Ose. 6:6) Par quela che, par meso del profeta Michea, el ne ga dito par ‘amar el amor leal’. (Mic. 6:8) Ma sol saremo boni de farlo se savemo cossa l’è el amor leal. Nela Tradução do Novo Mundo da Bíblia Sagrada, ghen’è de pi de 230 volte le parole ‘amor leal’. Ma cossa che l’è el amor leal? Una persona che la ga amor leal la va sempre amar e esser leal a nantra persona. La Bìblia la parla che Dio el mostra amor leal ale persone e che le persone le mostra amor leal intrà de lore. Geovà el mostra questa qualità de maniera perfeta. Par quela che el rè Davi el ga scrito: ‘Ò Geovà, el to amor leal el riva ai cieli . . . El to amor leal el ga tanto valor.’ (Sal. 36:5, 7) Davi l’era tanto grato par causa del amor leal che Dio el mostra. Sarà che noantri sentimo la medèsima roba? w21.11 p. 2 §§ 1, 2; p. 3 § 4

Gesù, che l’è stà la prima creassion de Geovà, e tanti àngeli i fà parte dela fameia de Geovà. (Col. 1:15; Sal. 103:20) Quando Gesù l’era nela Tera, el ga insegnà ale persone che Geovà el podea esser come un Pare par lore se le fusse fedele a lu. Par esémpio, quando el ga parlà coi so dissìpoli, lu el ga dito che Geovà l’era el ‘so Pare e el Pare de lori’. (Gioani 20:17) Quando dedichemo la nostra vita a Geovà e se batesemo, scominsiemo a far parte dela fameia de servi de Geovà che i ama tanto un al altro. (Mar. 10:29, 30) Quando Gesù l’era qua nela Tera, lu el podea insegnar le persone a ciamar Geovà de Tuto Poderoso, Creador e Quel che l’è Dio par sempre. E saria giusto far questo parché questi tìtoli i ze nela Bìblia. (Gén. 49:25; Isa. 40:28; 1 Tim. 1:17) Ma Gesù el ne ga insegnà a ciamar a Geovà de Pare. Gesù el ga insegnà ai so dissìpoli a pregar: “Pare nostro.” Lu el vol che vedemo a Geovà come lu el vede, o sia, come un Pare che el ne ama e come nostro amigo. Lu no’l vol mia che pensemo che Geovà no’l ga sentimenti o che l’è rugno. Alora, la parola Pare la ne giuta a sentirse pròpio darente de Geovà. w21.09 p. 20 §§ 1, 3

Geovà el ga mandà che profeti i ndesse dir al rè Manassè che el gavea de cambiar, ma lu no’l ga scoltà. Alora, Geovà el ga fato che el esèrsito dela Assìria ndesse contra Giudà. Lori i ga ciapà Manassè, i lo ga ligà e portà a Babilònia. In preson, fursi el ga pensà in tuto quel che el gavea fato. Lu el se ga umilià davanti de Dio e el ga suplicà che lo perdonesse. La Bìblia la dise che Manassè el preghea a Geovà. (2 Cró. 33:10-12) Geovà el ga scominsià a risponder ale orassion de Manassè. Geovà el ga visto che Manassè el gavea pròpio cambià par causa de quel che el parlea nele so orassion. Par esémpio, Geovà el ga assà che Manassè el tornesse a esser el rè de Giudà parché lu el ga seità a domandarghe questo. w21.10 p. 4 §§ 10, 11

Àchila e Prissila i ga bio de assar indrio el posto che i era de star, ndar in serca de nantra casa e scominsiar nantra volta el so laoro de far tende. Lori i ze ndati de star in Corinto e lì, i ga laorà insieme con Paolo par giutar i fradei. Dopo, i ze ndati de star in altre cità che le gavea bisogno de aiuto nela predicassion. (Ati 18:18-21; Rom. 16:3-5) Sicuro che la so vita la ga cambià tante volte, ma i gavea una vita tanto bela e felice. Parché che Àchila e Prissila i ze stati boni de far tute queste robe? Parché anca se la so vita la cambiesse tanto, lori i seitea a meter el Regno in primo posto. Quei che i ze pena maridadi o che i vol maridarse i pol far come Prissila e Àchila quando i mete el Regno in primo posto nela so vita. Lori i pol dessider insieme cossa i vol far a Geovà e scominsiar a cambiar quel che ghe ocore par farlo. Cossita, sarà pi fàcile che i sinta el aiuto de Geovà nela so vita. — Ecl. 4:12. w21.11 p. 16, 17 §§ 11, 12

Ricòrdate nantra volta che el comandamento de rispetar el pare e la mare vien dopo dele parole: “Valtri gavé de esser santi, parché mi, Geovà, el vostro Dio, son santo.” (Lev. 19:2) Alora, l’è tanto importante obedir a questo comandamento. Adesso, domàndate: ‘Son drio mostrar che rispeto el me pare e la me mare?’ Fursi te te nicorde che fin adesso no te ghè fato quel che te volei. L’è vera che no te pol mia cambiar quel che ga belche sucedesto, ma te pol far de pi par to pare e to mare de qua avanti. Par esémpio, fursi te pol tor del to tempo par star insieme con lori. Te pol anca comprarghe qualcossa che ghe manca, giutarli a far pi forte la so amicìssia con Geovà o incoraiarli. Cossita, te sarè drio meter in pràtica el comandamento de Levìtico 19:3. w21.12 p. 4, 5 §§ 10-12

El rè Davi el ga fato bruti sbali. Par esémpio, lu el ga bio relassion sessual con Bate-Seba e el ga mandà copar el so omo. (2 Sam. 11:2-4, 14, 15, 24) Par causa de quel che Davi el ga fato, lu, le so altre done e tuta la so fameia i ga sofrio. (2 Sam. 12:10, 11) In nantro colpo, Davi anca el ga desobedio a Geovà quando el ga contà quanti òmini ghen’era nel so esèrsito. Lu el ga mostrà che no’l se fidea tanto in Geovà. Par causa de questo, Geovà el ga fato che 70.000 israeliti i fusse morti! (2 Sam. 24:1-4, 10-15) Te gavarissi pensà che Geovà no’l gavaria de perdonarlo? Ma lu el ga volesto perdonar a Davi, anca che el gavesse fato bruti sbali. Parché? Parché Geovà el ga visto che Davi el gavea belche fato tante robe giuste, che lo amea, che el se gavea ciamà gramo e che el volea far quel che l’è giusto. Restemo tanto contenti de saver che Geovà el varda quel che femo de bon. — 1 Rè 9:4; 1 Cró. 29:10, 17. w21.12 p. 19 §§ 11-13

Gesù l’era tanto bondoso con quei che i gavea problemi fìsichi. Lu el ga mandà dir a Gioani Batista: ‘I orbi i ze drio veder, i sòti i ze drio caminar, i leprosi i ze drio esser guaridi, quei che no i scolta i ze drio scoltar e i morti i ze drio tornar a viver.’ Par causa dei miràcoli de Gesù, ‘tute le persone che li ga visto le ga lodà a Dio’. (Luc. 7:20-22) Anca se Geovà no’l ne dà poder par far miràcoli ancoi, podemo far compagno a Gesù. Come? Noantri ghemo de mostrar bontà e passiensa a quei che i ga problemi fìsichi. Par esémpio, podemo parlarghe sora la speransa che ghemo de viver nte un paradiso, de esser perfeti e de adorar a Dio de maniera perfeta. (Luc. 4:18) Sicuro che queste bone notìssie le ze belche drio giutar tante persone a esser amighe de Geovà. w21.12 p. 9 § 5

Tiago el ga doperà la Parola de Dio par giutar le persone a capir che Geovà sempre el benedisse quei che ze leai compagno a Giò. Alora, Tiago sempre el insegnea de una maniera che tuti i era boni de capirlo e sempre el doperea la Parola de Dio. Par causa de questo, lu el dea onor a Geovà e nò a lu stesso. Cossa che podemo imparar? Ghemo de doperar sempre la Bìblia e insegnar de una maniera che tuti i ndarà capir. Quando insegnemo ai altri, volemo mostrar che l’è Geovà che el sa de tute le robe e che el ne ama tanto. (Rom. 11:33) Alora, ghemo de doperar sempre la Bìblia quando ndemo insegnar ai altri. Par esémpio, quando un studiante el ga de far una dessision, l’è meio doperar un esémpio dela Bìblia invesse de parlar quel che noantri farìssino. Alora, lu el ndarà capir quel che Geovà el sente e el pensa sora la dessision che lu el ndarà far. Cossita, i nostri studianti i ndarà capir che el pi importante l’è contentar a Geovà e nò a noantri. w22.01 p. 10 §§ 9-10

Alora, se volemo assar Geovà contento, ghemo de mostrar questo amor ale persone. L’è vera che no tratemo mal le persone, ma Geovà el vol che femo ancora de pi. Gesù el ga mostrà che el comandamento de Levìtico 19:18 l’è tanto importante quando el ga parlà con un fariseo. El fariseo el ghe ga domandà qual che l’era el comandamento pi importante dela Lege. Alora, Gesù el ghe ga dito che el primo e el pi importante comandamento l’era amar a Geovà de tuto el cuor, ànima e mente. Dopo, lu el ga doperà le parole de Levìtico 19:18 par dir che el secondo comandamento l’era amar i altri come a si stesso. (Mat. 22:35-40) Ghen’è tante maniere de mostrar amor par i altri. Par esémpio, Levìtico 19:18 dise: “No stà vingarte e gnanca seita disgustà con qualchedun.” w21.12 p. 10, 11 §§ 11-13

Gesù el ga ciapà la man del apòstolo Piero e no’l ga assà che el sfondesse. Piero l’è stà bon de caminar sora la àqua intanto che el vardea a Gesù. Ma quando el ga vardà la tempesta, l’è restà spaurà e ga scominsià sfondarse. (Mat. 14:24-31) Come ghemo visto, Piero l’è ndato fora del barco parché el volea caminar sora la àqua par rivar fin Gesù. Sicuro che Piero no’l ga pensà che el podaria sfondarse, ma quando el ga vardà la tempesta, el ga scominsià sfondarse. Cossa che imparemo de questo? Imparemo che ghemo bisogno de fede par infrontar i problemi, come Piero el ga bio bisogno de fede par caminar sora la àqua. Imparemo anca che ghemo de seitar a fidarse in Geovà e nele so promesse. Cossita, no ndaremo sfondarse come Piero, o sia, no ndaremo perder la amicìssia con Geovà. Alora, ghemo de seitar a fidarse che Geovà ndarà giutarne a infrontar i nostri problemi. w21.12 p. 17 §§ 6, 7

Par adorar a Geovà te ghè anca de pregar, studiar e pensarghe sora. Quando preghemo, parlemo col nostro Pare, che el ne ama tanto. Quando studiemo la Bìblia, imparemo de pi sora Dio, che l’è la persona che la ga de pi sabedoria. (Pro. 2:1-5) Quando pensemo sora, imparemo ancora de pi sora le bele qualità de Geovà e sora le so promesse par el futuro. L’è tanto bon che doperemo del nostro tempo par far queste robe. Ma fursi l’è fadiga farle ben parché ghemo tanti laori de far. Alora, come che podemo doperar ben el tempo che ghemo par pregar, studiar e pensarghe sora? Proa catar un posto tranquilo. L’è stà questo che Gesù el ga fato vanti de scominsiar a predicar. Lu l’è ndato al deserto e l’è restà là 40 giorni. (Luc. 4:1, 2) In quel posto tranquilo, lu l’è stà bon de pregar e pensar in quel che Geovà el volea che el fesse. Sicuro che questo ga dato forsa a Gesù par infrontar quel che ndaria suito suceder. w22.01 p. 27, 28 §§ 7, 8

Pol esser che ricevemo un consìlio par meso de un ansiano o de nantro fradel. Se qualche fradel el ne dà un consìlio de acordo con quel che la Bìblia la dise, l’è sicuro che el ne ama tanto. Alora, ghemo de meter in pràtica quel che el ga dito. Savemo che l’è pi fadiga scoltar e meter in pràtica un consìlio quando qualchedun el ne vien dirlo che quando lo ledemo nela Bìblia o nele publicassion. Anca che savemo che semo imperfeti, no l’è fàcile scoltar quando un fradel el ne dise pròpio quel che ghemo de cambiar. (Ecl. 7:9) Pol esser che proemo spiegarghe parché che ghemo fato el sbàlio, che no ne piase la maniera che lu el ga parlà, o che pensemo che el ne ga dato el consìlio parché no’l ne vol mia ben. Fursi anca pensemo: ‘Lu pensa che l’è perfeto par vegner dirme quele robe lì?’ Se pensemo cossita, no ndaremo scoltar el consìlio o ndaremo domandarlo a qualchedun che el ne dirà quel che volemo scoltar. w22.02 p. 8, 9 §§ 2-4

Ghemo de ricordarse che dopo del Armagedon ancora ndaremo infrontar dificoltà, e gavaremo de seitar a fidarse in Geovà. Par esémpio, no savaremo quanto laoro gavaremo e quanto tempo ghe meterà par far dela Tera un paradiso. No sarà tuto perfeto nel scomìnsio e pol esser che gavaremo de laorar tanto. Sarà che ndaremo sbrontolar anca dopo de veder tuto quel che Geovà el ga fato par noantri? No volemo mai far quel che i israeliti i ga fato. Lori i era schiavi nel Egito, e Geovà li ga liberà. Ma lori i ga scominsià a sbrontolar del manà che Geovà el ghe dea e a dir che ghe manchea el magnar che ghen’era nel Egito. (Nùm. 11:4-6; 21:5) Cossa pol giutarne a mai far quel che i israeliti i ga fato? Ghemo de dar tanto valor adesso a quel che Geovà el fà par noantri. Cossita, sarà pi fàcile farlo anca nel futuro. w22.02 p. 7 §§ 18, 19

Ntela professia che ghen’è in Zacaria 8:23 le parole “un giudeo” e “valtri” le ze drio parlar dei untadi qua nela Tera. (Rom. 2:28, 29) I ‘diese òmini de tute le léngue dele nassion’ i ze le altre piégore. La professia la mostra che le altre piégore le ‘tien con forsa’, o sia, le ze leai ai untadi e le adora a Geovà insieme con lori. Ntela professia de Ezechiel 37:15-19, 24, 25 mostra la union che ghen’è intrà i untadi e le altre piégore. Questa professia la parla de due bastoni. El baston “de Giudà” (che l’era la tribo che Geovà el scoliea i rè de Israel) el vol dir quei che i ga la speransa de viver nel cielo. El baston “de Efrain” el vol dir quei che i ga la speransa de viver nela Tera. Geovà el ndaria far i due bastoni deventar sol un, o sia, quei che i ndaria viver nela Tera e quei che i ndaria viver nel cielo i deventaria sol un grupo. E questo l’è pròpio drio suceder ancoi, parché questi due grupi i ze drio obedir e servir insieme al so Rè, Gesù Cristo. — Gioani 10:16. w22.01 p. 22 §§ 9, 10

Gesù el ga parlà de persone che le era drio giutar i poareti parché le volea farse veder. Ma Geovà no’l ga mia dato valor a quel che le ga fato. (Mat. 6:1-4) Una persona la mostra che la fà pròpio quel che l’è bon par i altri quando lo fà sensa spetar qualcossa indrio. Podemo domandarse: ‘Sarà che mi sò come giutar i altri, ma no lo fao? E se mi li giuto, parché che lo fao?’ Ghemo de ricordarse che el spìrito santo de Geovà l’è una forsa che la fà agir. (Gén. 1:2) Alora, se ghemo el spìrito santo, gavaremo anca le qualità del fruto e ndaremo mostrarle. Tiago el ga dito che la fede de una persona sol la ga valor se la mostra. (Tia. 2:26) La medèsima roba la sucede cole altre qualità del fruto del spìrito santo de Dio. Quando mostremo le qualità del fruto del spìrito, anca mostremo che el spìrito santo de Geovà l’è drio giutarne. w22.03 p. 11, 12 §§ 14-16

Vanti de parlar che l’è tanto importante esser santi, el apòstolo Piero el ga dito che ghemo de ‘pareciar la nostra mente par laorar’. (1 Pie. 1:13) De che laoro Piero l’era drio parlar? Lu l’era drio dir che i untadi ndaria ‘parlar sora le bele qualità de Dio ai altri’. (1 Pie. 2:9) Anca noantri restemo tanto contenti de giutar a predicar e a insegnar. Questo laoro l’è el pi importante che ghen’è e l’è drio giutar tante persone a cognosser a Geovà. Restemo anca tanto contenti de far parte del pòpolo de Dio, che l’è santo. (Mar. 13:10) Alora, come ghemo visto l’è tanto importante adorar a Dio e giutar i altri. Cossita, ndaremo mostrar che amemo a Geovà e ai altri e che volemo esser santi. w21.12 p. 13 § 18

Paolo el proea sempre veder le bele qualità dei fradei. Lu no’l pensea che la persona che la gavea fato un sbàlio la era rugna e gnanca no la giulghea. Invesse, lu l’era sicuro che i fradei sempre i volea far quel che l’è giusto, ma che i gavea bisogno de aiuto par farlo. Par esémpio, varda cossa che Paolo el ga fato quando due sorele le ga bio problemi intrà de lore, nela congregassion de Filipo. (Fil. 4:1-3) Queste due sorele, Evòdia e Sìntiche no le era pi intese e le ga assà de esser amighe. Paolo no l’è stà mia rugno con lore e anca no le ga giulgà. Invesse lu el ga pensà nele robe bone che le fea. Par esémpio, lore le servia a Geovà fea tanti ani e lu el savea che Geovà le ghe volea tanto ben. Cossita, lu l’è stà bon de incoraiar quele sorele a far la pace intrà de lore. Come Paolo sempre el vedea le robe bone che i altri i fea, lu l’era bon de seitar contento e de gaver boni amighi nela congregassion. w22.03 p. 30 §§ 16-18

La pace che Geovà el ne dà la ne giuta a restar pi tranquili e tornar a pensar dela maniera giusta. La sorela Luz la ga sentio pròpio questo. Ela la ga dito: “Mi sofro parché me sinto tanto sola. Dele volte, mi resto tanto desanimada che penso che Geovà gnanca el me ama. Quando questo sucede, suito mi prego a Geovà e ghe parlo quel che son drio sentir. Pregar a Geovà me giuta tanto a sentirme meio.” El esémpio dela sorela Luz el ne giuta a capir che, quando preghemo a Dio, sentimo la so pace. (Fil. 4:6, 7) Geovà e Gesù i ndarà giutarne se perdemo qualchedun nela morte. El esémpio de Geovà e de Gesù ne insegna a mostrar amor ale persone nela predicassion. Lori i capisse quel che sentimo e quel che infrontemo, e i vol giutarne. Semo premosi del giorno che Geovà el ndarà finir con tute le robe rugne che ne fà piander. — Apo. 21:4. w22.01 p. 15 § 7; p. 19 §§ 19, 20

Gesù el ga parlà che ghen’è la strada streta e la strada larga. (Mat. 7:14) Ghen’è sol queste due strade, e noantri ghemo de scòlier una de lore. Se volemo viver par sempre, ghemo de scòlier la strada streta. L’è tanto fàcile caminar nela strada larga, ma la ze de Sàtana e la mena ala morte. Ne despiase veder che quasi tute le persone le seita a ndar in questa strada. (1 Cor. 6:9, 10; 1 Gio. 5:19) Ma cossa podemo dir sora la strada streta? Gesù el ga dito che pochi i saria boni de catarla parché ghen saria falsi profeti, o sia, le religion false. — Mat. 7:15 w21.12 p. 22, 23 §§ 3-5