Marso

Nela prima carta che el apòstolo Piero el ga scrito, lu el ga incoraià i fradei a doperar le so abilità par incoraiar un al altro. Piero el ga dito: “Cada un el ga de doperar la abilità che Dio el ghe ga dato par servir ai altri. Cossita, valtri ndaré doperar ben la bontà imèrita che Dio el mostra.” (1 Pie. 4:10) No ghemo de assar de doperar le nostre abilità parché pensemo che i altri i va restar desanimadi o con invìdia. Ma no ghemo mia de doperarle par farse veder. (1 Cor. 4:6) Invesse, ghemo de ricordarse che le nostre abilità le ze un presente de Geovà. Par quela, ghemo de doperarle par incoraiar i fradei e nò par farse veder. (Fil. 2:3) Cossita, ndaremo restar contenti parché saremo drio doperar la nostra forsa e abilità par lodar a Geovà e nò par proar mostrar che semo meio che i altri. w22.04 p. 11, 12 §§ 7-9

Gesù el restea tanto contento de servir a Geovà, parché el amea la so Parola. Lu el se sentia compagno al salmista, che el ga dito: “Far la to volontà, ò Dio mio, l’è un piaser par mi, e la to lege la ze de star rento de mi.” Anca noantri podemo sentirse cossita. Ma ne ocore, leder la Parola de Dio e amarla. (Sal. 1:1-3) Se volemo far quel che Gesù el ga dito e ndar drio al so esémpio, ne ocore leder la Bìblia dela maniera giusta. Alora, saremo boni de capirla meio se preghemo, ledemo pin pian, se femo domande e scrivemo do quel che volemo tegnerse in mente. Ma sol saremo boni de assar che la Bìblia la ne giute a cambiar se semo ùmili e ghemo voia de imparar. Se femo cossita, saremo boni de imparar ancora de pi sora la Bìblia e deventar cada volta pi amighi de Geovà. — Sal. 119:17; Tia. 4:8. w23.02 p. 13 §§ 15, 16

Scoli una abilità che te vol gaver e dopo, sfòrsate par far quel che te ocore par gavar questa abilità. Come? Metemo dir che te vol imparar a insegnar meio. Te podarissi studiar la revista Sfòrsate par Leder e Insegnar Meio e dopo proar meter in pràtica quel che te ghè imparà. Quando te vè far una parte nela riunion in meso la stimana, te pol anca mostrar come che te vè farla a un fradel e domandarghe consili de come farla meio. E anca che te gàpia belche la abilità de insegnar, sfòrsate de sempre pareciarte ben par tute le parte. (2 Cor. 8:22) E se te fè fadiga gaver la abilità che te ghè scoliesto? No stà mia desister! Par esémpio, la Bìblia no la dise se Timòteo l’è deventà tanto bravo de insegnar. Ma podemo esser sicuri che lu el ga fato quel che Paolo el ghe ga dito e l’è stà bon de far ben i so laori. — 2 Tim. 3:10. w22.04 p. 24, 25 §§ 8-11

Chi che la ze la bèstia cativa de sete teste? Questa bèstia la ze come un leopardo, ma la ga pié come che de un orso, boca de leon e diese corni. Nel capìtolo 7 del libro de Daniel, ghen’è quatro bèstie cative e cada bèstia la ga una de queste robe. Ma nel libro de Apocalisse, queste quatro robe le ze nte una bèstia sol. El libro de Apocalisse anca el dise che questa bèstia cativa la ga la autorità sora ‘tute le tribo, pòpoli, léngue e nassion’. (Apo. 13:7) Par quela che la ga de pi poder che un governo sol. Alora, la bèstia che la ga sete teste la rapresenta tuti governi fin ancoi. (Ecl. 8:9) Podemo anca capir che la bèstia che la ga sete teste le rapresenta tuti i governi parché la ga diese corni. La Bìblia la dopera el nùmero diese par mostrar che la roba la ze completa. w22.05 p. 9 § 6

Chi che ndarà ricever queste benedission? Tuti quei che i sarà vivi dopo del Armagedon, i fioi che fursi lori i gavarà e quei che i sarà ressussitadi. (Apo. 20:11-13) Chi che sarà ressussità? I giusti, o sia, i servi de Geovà, e i ingiusti, che i ze quei che no i ga podesto imparar sora Geovà. (Ati 24:15; Gio. 5:28, 29) Ma sarà che tute le persone che le ze morte le ndarà ressussitar? Nò. Le persone che le ga bio la oportunità de servir a Geovà, ma no le ga mia volesto farlo, no le ndarà esser ressussitade. Parché? Parché lore le ga belche mostrà che no le vol servir a Geovà e che no le mèrita viver nel Paradiso nela Tera. — Mat. 25:46; 2 Tes. 1:9; Apo. 17:8; 20:15. w22.05 p. 18 §§ 16, 17

Gesù l’è drio doperar el schiavo fedele e prudente par gaver una organisassion qua nela Tera che la adore a Geovà dela maniera giusta. (Mat. 24:45) Come che te te senti de far parte de questa organisassion? Fursi te pensi nele parole de Piero, che le ze nel testo de ancoi. Sito bon de imaginar come che saria la to vita se no te fessi parte dela organisassion de Geovà? Gesù el dopera la organisassion par giutarne a capir cada volta de pi la Bìblia e a far el laoro de predicassion. Ela anca la ne giuta a far quel che l’è giusto e assar Geovà contento. (Efe. 4:24) Gesù anca el ne dise quel che ghemo de far quando infrontemo dificoltà. Par esémpio, quando la pandemia del COVID-19 la ga scominsià, le persone del mondo no le savea cossa far. Ma par meso dela organisassion, Gesù el ne ga dito quel che gaveino de far par tender dela nostra salute. w22.07 p. 12 §§ 13, 14

Geovà el ga dito che i israeliti i parlesse sempre coi so fioi sora lu. (Deu. 6:6, 7) In quela època, i israeliti i gavea tanto tempo par discorer coi so fioi e par giutarli a amar a Geovà. Par esémpio, un toseto el ndea insieme col so pare laorar in colònia e una toseta la restea tanto tempo insieme cola so mare par far i mistieri casa. I genitori i podea doperar el tempo che i stea insieme coi so fioi par insegnarghe robe tanto importante. Lori i podea insegnarghe sora le bele qualità de Geovà e come che lu l’era sempre drio giutarghe. Ancoi, pochi genitori i pol restar tanto tempo coi so fioi come i israeliti. Tanti genitori i va laorar e so fioi i va ala scola. Par quela, i genitori i ga de torse tempo par discorer coi so fioi. — Efe. 5:15, 16. w22.05 p. 28, 29 §§ 10, 11

Una persona che la ga fato un bruto pecato la ga fato una roba che la lege de Dio la dise che la ze tanto sbaliada. Se un servo de Dio l’è drio far un pecato cossita, lu el ga de domandar el perdon a Geovà in orassion e ndar in serca del aiuto dei ansiani nela congregassion. (Sal. 32:5; Tia. 5:14) L’è vera che sol Geovà el pol perdonar del tuto i pecati par meso del sacrifìssio de Gesù. Alora cossa i ansiani i ndarà far? Lori i ndarà dessider de acordo cola Bìblia se la persona che la ga fato el pecato la pol seitar a esser Testimònia de Geovà, o nò. (1 Cor. 5:12) Par giutar i ansiani a farlo, lori i ga de farse arquante domande. Par esémpio: ‘La persona la ga pensà tanto come che la ndaria far el pecato? La ga proà sconder dei altri quel che la ga fato? Sarà che la ga fato el medèsimo pecato par tanto tempo? Sarà che la ga mostrà che la se ga pròpio ciamà grama? Ghen’è prove che Geovà la ga belche perdonada?’ — Ati 3:19. w22.06 p. 9 § 8

Sicuro che te ami quel che l’è vera e giusto. Par quela, te ghè òdio dele busie e de quel che l’è sbalià. (Sal. 119:128, 163) Quei che i conta busie i fà compagno a Sàtana, che l’è el governante de questo mondo. (Gio. 8:44; 12:31) Sàtana el ga scominsià a contar busie sora Geovà ancora nel giardin del Èden parché el volea che le persone le pensesse robe sbaliade sora Geovà Dio. Lu el vol che le persone le pense che Geovà el tien le robe bone sol par lu e che no’l ghe conta mia la verità. (Gén. 3:1, 4, 5) E tanti ancoi i crede in queste busie de Sàtana. Lu el dopera persone cossita, che no le ama mia la verità, par far tante robe brute ancoi. (Rom. 1:25-31) Magari, i servi de Geovà i ama quel che l’è vera e i se sforsa de far quel che l’è giusto. Parché? Parché Geovà e Gesù i ghe ga domandà de farlo. (Zac. 8:19; Mat. 5:6) Alora, noantri volemo sempre far quel che Geovà el dise che l’è giusto e bon. w23.03 p. 2 § 3

Fursi te sì drio sforsarte par fermarte de far una roba sbaliada, e ancora cossita, dele volte, te torni a farla. O te resti desanimà parché gnancora te sì stà bon de far tuto quel che te piaseria. Ma el to amor par Geovà el te giutarà a seitar sforsarte par esser batesà. El to amor par Geovà l’è la roba pi bela che te ghè. (Pro. 3:3-6) Questo amor ndarà giutarte a dàrghene fora con qualche dificoltà e seitar a servirlo. La Bìblia la mostra che anca Geovà el ama tanto so servi. Par quela, podemo esser sicuri che lu no’l va mai abandonarne o fermarse de amarne. E come semo stati fati cole medèsime qualità che lu, anca noantri podemo mostrarghe questo amor. (Gén. 1:26) Ma come? Daghe valor a quel che Geovà el fà par ti. (1 Tes. 5:18) Cossa che pol giutarte? Tuti giorni, pensa in come che Geovà l’è drio mostrar che el te ama. Dopo, quando te preghi, ringràssia tuto quel che lu el ga fato par ti. Cossita, te sarè bon de veder che Geovà el te ama. w23.03 p. 12 §§ 17-19

Gesù sempre el ga giutà i so apòstoli con bontà e amor. Cossa che questo ne insegna? Noantri ghemo de star atenti a quel che femo e parlemo quando un fradel el fà qualcossa contra noantri. Alora, se un fradel el te ga assà disgustà, proa domandarte: ‘Parché che quel che lu el me ga fato me ga assà disgustà cossita? Sarà che questo mostra che me toca cambiar qualcossa? Sarà che lu l’è drio infrontar qualche dificoltà? Anca se lu el ga pròpio fato sbalià, posso mostrarghe amor e perdonarlo?’ Quando mostremo amor ai fradei, anca mostremo che semo veri dissìpoli de Gesù. L’è vera che Gesù l’era bon de saver quel che le persone le gavea rento el cuor, ma noantri no semo mia boni. Ancora cossita, podemo imparar del esémpio de Gesù. Quando i fradei i fà qualcossa che ne assa inrabiadi, ghemo de proar capirli e portar passiensa con lori. (Pro. 20:5; Efe. 4:1, 2; 1 Pie. 3:8) Sarà pi fàcile far cossita se proemo cognosser meio i nostri fradei e sorele. w23.03 p. 30 §§ 14-16

Pol esser che Sàtana el proe farne desobedir a Dio quando semo maladi. Fursi i dotori o quei dela nostra fameia i dise che ghemo de acetar sangue o nantro tratamento che no l’è mia de acordo con quel che la Bìblia la dise. Nissun vol morir. Ma se questo sucede, semo sicuri che Geovà el ndarà ricordarse de noantri e el seitarà a amarne. (Rom. 8:37-39) Quando more un amigo de Geovà, lu el se ricorda de questa persona come se la fusse viva. (Luc. 20:37) Lu l’è premoso de ressussitarla. (Giò 14:15) Savemo che Geovà el ga dato la vita del so Fiol par noantri poder viver par sempre. (Gio. 3:16) Alora, savemo che lu el ne ama e el ne tenderà. Par quela, quando semo drio infrontar una bruta malatia o qualche roba che pol coparne, podemo domandar che Geovà el ne dae consolo, sabedoria e la so forsa. — Sal. 41:3. w22.06 p. 18 §§ 16, 17

La Bìblia la mostra che ne ocore ‘gaver tanto rispeto par Geovà’ e ‘cognosserlo’ par gaver la vera sabedoria. (Pro. 9:10) Par esémpio, vanti de far una dessision, ne ocore proar pensar come Geovà el pensa. Podemo capir la maniera che lu el pensa quando ledemo la Bìblia e le nostre publicassion. Cossita, mostremo che ghemo la vera sabedoria. (Pro. 2:5-7) La vera sabedoria la vien sol de Geovà. (Rom. 16:27) Come che lo savemo? Primo, parché lu el ga creà tute le robe e el cognosse ben tuto quel che el ga creà. (Sal. 104:24) Secondo, Geovà el fà tuto con sabedoria. (Rom. 11:33) Terso, le persone che le mete in pràtica quel che lu el dise le vive meio. (Pro. 2:10-12) Noantri podemo gaver la vera sabedoria se credemo in queste tre robe e se se ricordemo de questo quando ndemo far le nostre dessision. w22.10 p. 19 §§ 3, 4

Sàtana e i so demoni i ga perso la guera che parla nel capìtolo 12 de Apocalisse, e i ze stati paradi via qua, ala Tera. Alora, Sàtana l’è tanto inrabià e l’è drio far le persone sofrir tanto. (Apo. 12:9-12) Come queste professie le ne giuta? Le brute robe che le ze drio suceder e quel che le persone le ze drio far le prova che Gesù l’è belche drio governar. Par quela, no ghemo de restar tanto disgustadi con quel che le persone le fà, parché le professie le ze drio realisarse. (Sal. 37:1) E savemo che, fin el Armagedon, le robe le restarà cada volta pedo. (Mar. 13:8; 2 Tim. 3:13) Sicuro che restemo tanto contenti de servir a un Dio che el ne ama tanto e che el ne spiega parché che queste robe le ze drio suceder. w22.07 p. 3, 4 §§ 7, 8

I nostri fradei i infronta tante dificoltà. Par quela, lori i ga de bisogno che domandemo a Geovà che li giute. Par esémpio, podemo domandar che Geovà li giute a infrontar le desgràssie dela naturesa, guere, nemighi che ghe vien contra e tante altre dificoltà. Podemo anca domandar che Geovà el dae la so benedission ai fradei che i se sforsa par giutar quei che i ga de bisogno. Te cognossi qualchedun che l’è drio infrontar una dificoltà? Alora te pol parlar el so nome nele to orassion. Quando domandemo a Geovà che el giute i nostri fradei, mostremo che li amemo. Ghemo anca de parlar dei ansiani e dei servi ministeriai nele nostre orassion. Parché? Parché lori i resta tanto contenti e parché le nostre orassion li giuta tanto. El apòstolo Paolo el ga domandà ai fradei che i fesse questo par lu. Lu el ga dito: ‘Preghé par mi e domandé che mi sìpia bon de parlar quel che ghe vol. Cossita sarò bon de parlar con coraio sora le bone notìssie.’ (Efe. 6:19) Ancoi, ghen’è fradei che i laora tanto par tender dele congregassion. Alora, quando preghemo par questi fradei, mostremo che li amemo. w22.07 p. 23, 24 §§ 14-16

Un capassete el protege la testa de un soldà nte una guera. La nostra speransa la ze come un capassete parché la protege i nostri pensamenti, o sia, la ne giuta a pensar in quel che l’è giusto e nò in quel che l’è sbalià. Ghemo pròpio bisogno de proteger la nostra mente contra Sàtana parché lu el seita proar farne pensar in robe sbaliade. Se la nostra speransa la resta pi fiaca, scominsiaremo a pensar e a far le robe compagno ale persone del mondo. Alora, ndaremo desmentegarse dela nostra speransa de vita eterna. L’è stà questo che ga sucedesto con arquanti fradei de Corinto. Lori no i credea pi nela speransa dela ressuression, e Paolo el ga dito che persone cossita sol le vive par far quel che lore le vol. (1 Cor. 15:12, 32) Ancoi, ghen’è tante persone che no le crede nele promesse de Dio e le vive sol par ndar drio ale so voie sensa pensar nel futuro. Ma noantri semo difarenti de lore. Semo sicuri che Geovà el farà quel che el ga prometesto e questa speransa la ne giuta a far bone dessision nela vita ancoi. w22.10 p. 25, 26 §§ 8, 9

Geovà el sa de tuto quel che te sì drio infrontar e el promete che el ndarà scoltarte quando che te preghi a lu. Geovà el resta pròpio contento de scoltar le orassion dei so servi. (Pro. 15:8) Ma cossa che te podarissi parlar a Geovà quando te sì drio sentirte ti sol? Fà compagno a Elia e parla a Geovà tuto quel che te sì drio sentir. (Sal. 62:8) Domanda el aiuto de Geovà par saver cossa pol giutarte a dàrghene fora con quel che te sì drio sentir e domanda che el te dae coraio. Te pol anca domandarghe sabedoria par esser bon de parlar a lori quel che te credi. (Luc. 21:14, 15) E se te te senti desanimà, domanda che Geovà el te giute a parlar con un fradel. Te pol anca domandar a Geovà che el giute questo fradel a capir quel che te sì drio sentir. E no stà desmentegarte de proar veder come che Geovà el te ga rispondesto e de acetar el aiuto dei altri. Cossita, te ndarè veder che Geovà l’è dela to banda. w22.08 p. 10 § 6

Fea poco tempo che ghen’era una congregassion in Tessalònica quando tante persone le ga scominsià a ndarghe contra. Una volta una mùcia de gente cativa la ga portà arquanti fradei fin le autorità dela cità. (Ati 17:6) Alora, proa imaginar come che quei che i era pena deventadi dissìpoli de Gesù i era drio sentirse. Fursi lori i podaria scominsiar a far manco par Geovà. Par quela, el apòstolo Paolo el ga mandà Timòteo par incoraiarli, consolarli e giutarli a no desanimar par via dele tribolassion. (1 Tes. 3:2, 3) E podemo creder che Timòteo el ga visto come Paolo el ga incoraià i fradei in Listra e come Geovà li ga giutadi. Cossita, lu l’è stà bon de giutar i fradei de Tessalònica a esser sicuri che i saria boni de dàrghene fora con quele dificoltà. — Ati 14:8, 19-22; Ebr. 12:2. w22.08 p. 21 § 4

Nel ano 1870, Charles Russel e un grupo de studianti dela Bìblia i ga scomìnsia a studiarla tanto. Lori i volea capir la verità sora el sacrifìssio de Gesù e come i gavaria de ricordarse dela so morte. Geovà li ga giutadi a capir robe tanto importante che le ne giuta fin ancoi. Cossita, semo boni de capir la verità sora el sacrifìssio de Gesù e sora quel che el pol far par noantri. (1 Gio. 2:1, 2) Noantri anca imparemo che quei che i assa Geovà contento i pol gaver la speransa de viver nel cielo o nela Tera. Quando pensemo sora come Geovà el ga mostrà che el ne ama e come el sacrifìssio de Gesù el pol giutarne, restemo ancora pi amighi de Geovà. (1 Pie. 3:18) Par quela, ghemo de far compagno a quei fradei del passà, e convidar a tuti par far la Selebrassion come Gesù el ne ga insegnà. w23.01 p. 21 §§ 6, 7

Quando l’era qua nela Tera, Gesù el ga insegnà ale persone sora le benedission che gavaremo par meso del Regno de Dio. E sicuro che ghe demo tanto valor al so sacrifìssio. Par causa del sacrifìssio de Gesù, podemo esser amighi de lu e del so Pare, Geovà. E quei che i ga fede in Gesù anca i ga la speransa de viver par sempre e de veder nantra volta quei che i ze morti. (Gio. 5:28, 29; Rom. 6:23) Noantri no meritemo gnanca una de queste benedission e mai saremo boni de pagar tuto quel che Dio e Gesù i ga fato par noantri. (Rom. 5:8, 20, 21) Quando ghe pensemo sora tuto quel che Gesù el ga fato, sicuro che volemo mostrar che ghe demo tanto valor. Ma come che podemo farlo? Podemo giutar a far su e rangiar i posti ndove adoremo a Dio. w23.01 p. 26 § 3; p. 28 § 5

Gesù e i 144 mila i ndarà de tender de bilioni de persone che le viverà in tuta la Tera. Geovà el ghe ga dato ai 144 mila un laoro pròpio bel! I 144 mila i sarà rè e sasserdoti compagno a Gesù. (Apo. 5:10) La Lege de Moisè la disea che i sasserdoti i gavea de giutar le persone a gaver una bona salute e una bela amicìssia con Geovà. Ma, la Lege la era sol un esémpio de quel che ndaria suceder pi avanti. (Ebr. 10:1) Alora, podemo creder che anca i 144 mila i giutarà le persone a gaver una bona salute e una forte amicìssia con Geovà. No savemo ancora come che i 144 mila i ndarà parlar con noantri in Paradiso, ma podemo esser sicuri che savaremo cossa gavaremo de far. — Apo. 21:3, 4. w22.12 p. 11 §§ 11-13

Noantri convidemo le persone par la Selebrassion parché volemo che lore le impare sora tuto quel che Geovà e Gesù i ze drio far par noantri. (Gio. 3:16) Pol esser che quei che i vien ala Selebrassion dopo i gàpia voia de imparar de pi, e noantri volemo pròpio questo. Ma convidemo par la Selebrassion anca quei che i se ga fermà de ndar ale riunion e ala predicassion. Noantri li convidemo par giutarli a ricordarse che Geovà li ama. Restemo tanto contenti parché arquanti de lori i vien ala Selebrassion. Cossita, lori anca i se ricorda de come i era contenti quando i adorea a Geovà. (Sal. 103:1-4) Noantri seitemo a convidar a tute le persone anca se tante de lore no le vien ala Selebrassion. Parché? Parché savemo che Geovà l’è atento al sforso che cada una la ga fato par esser là. (Luc. 15:7; 1 Tim. 2:3, 4) Semo sicuri che, quando convidemo i altri, Geovà l’è drio giutarne a catar quei che i vol pròpio cognosserlo. — Ageo 2:7. w23.01 p. 20 § 1; p. 22, 23 §§ 9-11

Nela note vanti de morir, Gesù el ga domandà che Geovà el tendesse dei so dissìpoli. (Gio. 17:15, 20) Ma parché che Gesù el ghe ga domandà una roba cossita se el savea che Geovà el gavea sempre tendesto del so pòpolo? Parché el savea che Sàtana el ndaria far tuto quel che el podea contra i so dissìpoli, e che lori sol i saria boni de dàrghene fora con queste dificoltà se i gavesse el aiuto de Geovà. I dissìpoli de Gesù ancoi i infronta tanti problemi in questo mondo de Sàtana. Par quela, pol esser che restemo desanimadi e ghemo de sforsarse tanto par seitar leai a Geovà. Ma questo stùdio el ndarà mostrarne che no ne ocore gaver paura. Geovà el sa quel che semo drio infrontar e el ne giuta sempre che ghemo de bisogno. Geovà l’è sempre drio tender de “quei che i lo teme, quei che i speta el so amor leal”. — Sal. 33:18-20. w22.08 p. 8 §§ 1, 2

Gesù el ga domandà che i so dissìpoli i se ricordesse dela so morte, e noantri lo obedimo parché lo amemo tanto. (Gio. 14:15) Par quela, nele stimane vanti e dopo dela Selebrassion, se tolemo el tempo par pregar a Geovà e pensarghe sora come la morte de Gesù la pol giutarne. Noantri anca restemo contenti de predicar ancora de pi par convidar le persone par questa riunion tanto importante. Sicuro che volemo far tuto quel che podemo no perder la Selebrassion. Nela Selebrassion, noantri scoltemo un discorso che el spiega nela Bìblia arquante robe sora la morte de Gesù. Par esémpio, imparemo parché che gaveino bisogno del so sacrifìssio e come che la so morte la pol salvar a tuti. Noantri anca imparemo cossa vol dir el pan e el vin e chi che pol magnarlo e beverlo. (Luc. 22:19, 20) E anca imparemo sora le benedission che ghen sarà par quei che i ndarà viver nela Tera par sempre. (Isa. 35: 5, 6; 65:17, 21-23) Sicuro che semo contenti de saver queste verità e volemo darghe tanto valor. w23.01 p. 20 § 2; p. 21 § 4

Alora, Geovà el pol perdonar i nostri pecati e darne la vita eterna par causa del sacrifìssio de Gesù. (Mat. 20:28) El apòstolo Paolo el ga spiegà parché che el sacrifìssio de Gesù l’è stà tanto importante. Lu el ga scrito: “Cossita come la morte la ze vegnesta par meso de un omo, anca la ressuression dei morti la vien par meso de un omo. Cossita, par causa de Adon tuti i more ma par causa de Cristo tuti i riceverà la vita.” (1 Cor. 15:21, 22) Gesù el ga insegnà i so dissìpoli a pregar che vegna el Regno de Dio e che la volontà de Dio la sìpia fata nela Tera. (Mat. 6:9, 10) Una dele robe che Geovà el vol far la ze dar ale persone la vita eterna. Par quela, lu el ga scoliesto Gesù par esser rè del Regno de Dio. Geovà anca l’è drio scòlier 144 mila persone che le ndarà laorar insieme de Gesù. — Apo. 5:9, 10. w22.12 p. 5 §§ 11, 12

Noantri sofrimo tanto quando more qualchedun che amemo. De scomìnsio, pol esser che se sentimo tanto disgustadi quando pensemo in quel che ga sucedesto, ancora de pi se la persona la ga sofrio vanti de morir. Magari, col tempo, pol esser che restemo contenti nantra volta quando se ricordemo de qualcossa che ela la ga fato, de quel che la ne ga insegnà o de una roba che la ga dito par incoraiarne. Fursi se sentimo pròpio cossita nela època dela Selebrassion, parché pensemo ancora de pi nela morte de Gesù. Pol esser che se sentimo disgustadi quando pensemo come Gesù el ga sofrio vanti dela so morte. (1 Cor. 11:24, 25) Ma restemo contenti quando se ricordemo de tuto quel che Gesù el ga insegnà e el ga fato quando l’era qua nela Tera. E quando pensemo sora quel che lu l’è drio far adesso e quel che el ndarà far nel futuro, restemo tanto incoraiadi. w23.01 p. 26 §§ 1, 2

Quando Gesù l’è morto, i so dissìpoli i ze restadi tanto disgustadi e desanimadi. Lori no i gavea sol perso un caro amigo, ma l’era come se i gavesse perso anca la speransa. (Luc. 24:17-21) Magari, quando Gesù el se ga fato veder a lori, lu li ga giutadi a capir come ga sucedesto tute le professie sora lu e el ghe ga dato un importante laoro de far. (Luc. 24:26, 27, 45-48) Gesù l’è tornà al cielo 40 giorni dopo, ma i so dissìpoli no i era pi desanimadi o disgustadi. Invesse, lori i era pròpio contenti de saver che Gesù l’era vivo e pronto par giutarli a far el laoro che el ghe gavea mandà. Par quela, lori i ga seità a adorar a Geovà tanto contenti. (Luc. 24:52, 53; Ati 5:42) Compagno i dissìpoli de Gesù, ghemo de meter el Regno de Dio in primo posto nela nostra vita. L’è vera che ghemo de sforsarse par seitar a servir a Geovà, ma podemo esser sicuri che lu el ndarà benedirne tanto. — Pro. 10:22. w23.01 30, 31 §§ 15, 16

Sicuro che no volemo far el medèsimo sbàlio che Adon e Eva. Par quela, ghemo de seitar a far pi forte el nostro amor par Geovà. Come? Ghemo de seitar a imparar sora Geovà e sora le so qualità, e sforsarse par capir la so maniera de pensar. Varda el esémpio de Abraon. Lu el amea tanto a Geovà. Anca quando lu no’l gavea capio le dessision de Dio, lu no lo ga desobedio. Invesse, lu el se ga sforsà par cognosserlo meio. Par esémpio, quando Geovà el ga dessidio finir fora con Sodoma e Gomora, Abraon el ga bio paura che anca i boni i saria finidi fora. Lu no l’era bon de capir quel che Geovà el pensea. Alora, Abraon el ghe ga fato tante domande, e Geovà le ga rispondeste. Cossita, Abraon l’è stà bon de capir che Geovà el cognosse el cuor de tute le persone e che mai el ndarà finir fora coi boni insieme coi rugni. — Gén. 18:20-32. w22.08 p. 28 §§ 9, 10

Nel ano 455 vanti de Cristo, dopo de far su nantra volta le muràlie de Gerusalen, Neemia l’è ndato in serca de òmini de fidarse par tender dela cità. Un de questi l’è stà Anania. La Bìblia la dise che le persone le se fidea in Anania, e che lu el rispetea tanto a Dio. (Nee. 7:2) Lu el ga fato polito tuti i so laori parché el amea a Geovà e no’l volea disgustarlo. Se femo compagno a Anania, anca noantri saremo persone de fidarse. Varda anca el bel esémpio de Tìchico. Quando Paolo l’era preso casa, Tìchico lo ga giutà tanto. Par quela, Paolo el se fidea tanto in Tìchico e el ga dito che lu l’era una persona fedele. (Efe. 6:21, 22) Paolo el ga domandà che Tìchico el ndesse fin Èfeso e Colosso par incoraiar e darghe consolo ai fradei e portarghe le so carte. Paolo l’era sicuro che Tìchico el ndaria far pròpio ben quel che el ghe gavea domandà. El esémpio de Tìchico ne fà ricordar dei bravi fradei dele nostre congregassion che i ne giuta a seitar a servir a Geovà ancoi. — Col. 4:7-9. w22.09 p. 9, 10 §§ 5, 6

Giusepe el ga infrontà tante dificoltà par 13 ani. Lu el podaria gaver pensà: ‘Sarà che Geovà el me ga abandonà pròpio adesso che gavea bisogno de aiuto?’ Invesse, lu l’è restà calmo, el ga seità a pensar dela maniera giusta e no l’è deventà una persona trista. Quando Giusepe el ga bio la oportunità de vingarse dei so fradei, lu el ga mostrà amor e li ga perdonadi. (Gén. 45:4, 5) Lu no’l ga pensà sol nei so problemi, ma el ga sempre pensà in quel che Geovà el volea. (Gén. 50:19-21) Cossa che noantri imparemo? Se un fradel el ne ga tratà mal, no ghemo de darghe la colpa a Geovà e gnanca pensar che lu el ne ga abandonà. Invesse, ghemo de pensar sora come che Geovà l’è drio giutarne a infrontar questa dificoltà. E quando i altri i ne trata mal, ghemo de perdonarli con amor. w22.11 p. 21 § 4

Le vision de Daniel le ga mostrà che Geovà el ga de pi autorità che qualche altra persona. Prima, lu el ga visto quatro grande bèstie che le ze i governi pi poderosi del passà e de ancoi: Babilònia, Medo-Persa, Grècia, Roma e la Potensa Anglo-Americana. (Dan. 7:1-3, 17) Daniel anca el ga visto Geovà sentà do nel so trono nel tribunal del cielo. (Dan. 7:9, 10) Dopo, Daniel el ga visto che Geovà el ga dato a Gesù e ai 144 mila la autorità par governar la Tera. Geovà el ghe ga dato questa autorità parché lori i mèrita e parché i ga de pi poder che i governi dei òmini. Lori i ndarà governar par sempre. (Dan. 7:18) Quel che Daniel el ga scrito anca mostra che Geovà l’è el Supremo. Lu el ga dito che Geovà l’è ‘el Dio del cielo’ e che ‘el cava via rè e scòlie altri’. Daniel anca el ga dito che ‘Geovà el governa sora tuta la Tera e che el ghe dà autorità a chi che lu el vol’. — Dan. 2:19-21. w22.10 p. 14, 15 §§ 9-11