April

Domàdate: ‘Cossa che mi fao quando qualchedun el me dà un consìlio? Son de acordo che go sbalià? Dao la colpa ai altri o proo spiegar parché che go fato quel lì? Intanto che te sì drio studiar sora servi de Dio del passà, pensa cossa lori i ga fato quando sucedea una roba cossita. Alora, te pol domandarte: ‘Come posso far compagno a lori?’ Noantri anca podemo imparar tanto del esémpio de tuti i fradei dela congregassion. Fursi, un fradel l’è drio tribolar nela scola parché i so coleghi i vol che el fae qualcossa de sbalià, la so fameia la proa intrigarlo de servir a Geovà o l’è drio infrontar un problema de salute. Che qualità lu l’è drio mostrar che te volarissi far compagno? Sicuro che el esémpio dei nostri fradei ndarà giutarne a saver cossa far par infrontar i problemi. Restemo tanto contenti de gaver bei esempi cossita. — Ebr. 13:7. w22.04 p. 13 §§ 13, 14

Noantri restemo tanto contenti quando i ansiani i vien farne una vìsita par incoraiarne e scoltarne quando semo drio infrontar una dificoltà. Ne piase tanto quando i pionieri i vien insieme far un stùdio e dopo i ne dà consili par farlo ancora meio. Questi fradei i resta tanto contenti de giutarne, e anca noantri podemo sentirse cossita quando giutemo i altri. Cossa pol giutarte se te vol far questi o altri laori nela organisassion? Te ghè de scòlier pròpio quel che te vol far par servir de pi a Geovà. Fursi te pensi: ‘Mi vui laorar de pi nela congregassion.’ Ma saria meio che te pensessi che laori te pol far nela congregassion. Alora te pol scriver che laori te vol far e come farli. w22.04 p. 25 §§ 12, 13

Ancoi, Geovà l’è in serca de persone che le vol imparar sora lu e l’è drio insegnarghe come viver soto el so Regno. (Apo. 7:9, 10) Tanti ancoi no i vive in union par causa del òdio e dele guere. Ma, i servi de Dio i se sforsa par mostrar amor a tuti e viver in pace, come se i fusse drio ‘far dele so spade làmine de arado’. (Mic. 4:3) Invesse de ndar ala guera, lori i giuta altri a cognosser a Geovà e la so volontà. Cossita, lori i giuta queste persone a gaver “la vera vita”. (1 Tim. 6:19) Come i servi de Dio i difende el so Regno, pol esser che ghe manche soldi o che le so fameie ghe vae contra. Ma Geovà sempre el ghe dà quel che i ga de bisogno. (Mat. 6:25, 30-33; Luc. 18:29, 30) Alora, semo sicuri che el Regno de Dio l’è belche drio governar e el seitarà a far la volontà de Geovà. w22.12 p. 5 § 13

Nel fin dei Mila Ani, tute le persone nela Tera le sarà perfete. (Apo. 20:5) Alora no ghen sarà pi el pecato che l’è vegnesto de Adon, e nissun pi ndarà sofrir par via de questo. (Rom. 5:12) Sàtana el ga proà intrigar Gesù de adorar a Geovà tante volte, ma anca cossita, Gesù el ga seità a esser leal. Ma sarà che tute le persone perfete le ndarà far compagno a lu? Tuti noantri podaremo mostrar che semo leai a Geovà quando Sàtana el sarà molà del abismo dopo dei mila ani. (Apo. 20:7) Quei che i seitarà leai a Geovà i viverà par sempre e i deventarà pròpio lìberi. (Rom. 8:21) Ma quei che no i volerà pi obedir a Geovà i sarà finidi fora. — Apo. 20:8-10. w22.05 p. 19 §§ 18-20

Questa professia la se ga realisà quando Sàtana el ga fato che i giudei e i romani i copesse el Fiol de Dio. (Luc. 23:13, 20-24) Quando una persona la se fà mal al calcagno, no la ze bona de far arquante robe. Dela medèsima maniera, Gesù l’è stà morto par tre giorni e no l’è stà bon de far gnente in quel tempo. (Mat. 16:21) La professia de Génesi 3:15 la ga dito che el dissendente el ndaria restar meio del mal che la serpente la ghe gavea fato nel calcagno. E ga sucedesto pròpio cossita parché, dopo de tre giorni, Gesù l’è stà ressussità par viver nel cielo par mai morir. E nela ora che Geovà el vol, Gesù el ndarà schissar la testa dela serpente, o sia, finir fora con Sàtana. (Ebr. 2:14) Cossita, Gesù Cristo e i 144 mila i ndarà finir fora col dissendente dela serpente, o sia, con tuti i nemighi de Dio. — Apo. 17:14; 20:4, 10. w22.07 p. 16, 17 §§ 11, 12

Se te sì pare o mare, giuta i to fioi a gaver boni amighi. La Bìblia la dise che le amicìssie le pol giutar una persona a far quel che l’è giusto, ma anca quel che l’è sbalià. Alora, te cognossi i amighi dei to fioi? Come che te podarissi giutarli a gaver amighi che i ama a Geovà? (1 Cor. 15:33) Fursi te podarissi convidar bravi fradei par far qualcossa insieme cola to fameia. (Sal. 119:63) Un pare de nome Tony el ga dito: “Noantri sempre convideino fradei e sorele de difarente età par vegner nela nostra casa. Dele volte, magneino qualcossa e dopo feino el stùdio in fameia insieme. Cossita, ghemo cognossesto fradei che i ama a Geovà e che i lo serve contenti. I nostri fioi i ga imparà tanto col esémpio de lori e i ze deventadi pi amighi de Geovà.” w22.05 pp. 29, 30 §§ 14, 15

Quando i ansiani i se riune con un fradel che el ga fato un bruto pecato, lori i vol far la medèsima dessision che Geovà el ga belche fato nel cielo. Quando lori i lo fà, pol esser che questo fradel no’l possa seitar a esser una Testimònia de Geovà. Questa dessision la ndarà proteger a tuti nela congregassion. (1 Cor. 5:6, 7, 11-13; Tito 3:10, 11) Quando i ansiani i se riune con questo fradel, lori i vol giutarlo a ciamarse gramo e a gaver el perdon de Geovà. (Luc. 5:32) E quando el se ciama gramo, i ansiani i pol domandar che Geovà el ghe giute a esser so amigo nantra volta. (Tia. 5:15) Cossa che i ansiani i fà quando una persona la ga fato un bruto pecato e no la se ga ciamà grama? Lori i ga de dessider che no la podarà seitar a esser una Testimònia de Geovà. Se la persona la ga fato el pecato, la se ga ciamà grama e la ga cambià quel che la ga de bisogno, Geovà el podarà perdonarla. (Luc. 15:17-24) Questo pol suceder anca se la persona la ga fato arquanti bruti pecati. — 2 Cró. 33:9, 12, 13; 1 Tim. 1:15. w22.06 p. 9 §§ 5, 6

Col aiuto de Geovà, tuti noantri semo drio infrontar le dificoltà e ndar contra el Diaol. (1 Pie. 5:9) Suito Geovà el ndarà dir che Gesù e i untadi i finissa fora con tuti i problemi che ghen’è par via del Diaol. (1 Gio. 3:8) Alora, no ghen sarà pi gnente che ndarà far i servi de Dio gaver paura. (Isa. 54:14; Mic. 4:4) Ma fin che questo no sucede mia, ghemo de dàrghene fora cole nostre paure. Ghemo de seitar a esser cada volta pi sicuri che Geovà el ne ama e el ne protege. Podemo farlo quando parlemo ai altri sora come Geovà el ga protegesto i so servi nel passà e come el ne ga belche giutà a infrontar le nostre dificoltà. Cossita, col aiuto de Geovà, podaremo dàrghene fora cole nostre paure! — Sal. 34:4. w22.06 p. 19 §§ 19, 20

I pié de fero e de baro i rapresenta la ùltima potensa mondial e la ze drio governar ancoi. Nela Prima Guera Mondial, la Gran-Bretagna e i Stati Unidi i se ga metesti insieme par deventar la Potensa Mondial Anglo-Americana. La stàtua la ga anca mostrà due robe che faria questa potensa esser difarente de quele che le ga governà vanti. Prima, la Potensa Mondial Anglo-Americana no la ze come le altre potense che le ze fate de una roba sol come el oro o el argento. Ela la ze fata de due robe, o sia, el fero e el baro. El baro el rapresenta le persone. (Dan. 2:43) Ancoi, vedemo che le persone le proa comandar i governanti. Par esémpio, quando le ga de scòlier i governanti, quando le fà protesti e par meso dele organisassion che lota par i governi far quel che le vol. Par quela che i governanti no i ze boni de far tuto quel che i vol. w22.07 p. 4, 5 §§ 9, 10

Se no te sì gnancora batesà, domàndate: ‘Ghen’è qualcossa che te intriga?’ (Ati 8:36) Pensar sora quel che Gesù el ga dito podarà giutarte a dessidir cossa far. Lu el ga dito che obedir a Geovà l’era compagno el magnar. Parché? Parché Gesù el savea che el magnar ne fà ben, cossita come obedir a Dio. Alora, ti te pol fidarte che obedirlo sempre sarà el meio, e che lu mai el ndaria domandarte de far qualcossa che te fesse mal. Geovà el ga dito che ghemo de esser batesadi. (Ati 2:38) Alora, compagno no te ghè paura de mandar do un bon magnar, no te ocore gaver paura de batesarte. Fursi arquanti i dise che no i ze gnancora stati batesadi parché no i ze mia pronti. E questa la ze la dessision pi importante che podemo far nela nostra vita. Par quela, te ghè de pensarghe sora questa dessision e far arquante robe vanti de esser batesà. w23.03 p. 7 §§ 18-20

Gesù l’è stà untà con spìrito santo e l’è deventà la parte pi importante del dissendente dela dona. E dopo che lu l’è morto e l’è tornà al cielo, Geovà el ghe ga dato una “corona de glòria e onor”. Geovà el ghe ‘ga dato autorità nel cielo e nela Tera’ anca par finir cole robe rugne che el Diaol el ga fato. (Ebr. 2:7; Mat. 28:18; 1 Gio. 3:8) Ma chi che ancora fà parte del dissendente dela dona? El apòstolo Paolo el ga dito che tuti i fradei untadi anca i fà parte del dissendente dela dona. Lu el ga dito: ‘E valtri sì de Cristo e dela dissendensa de Abraon, e ndaré veder la promessa realisarse.’ (Gàl. 3:28, 29) Quando che un fradel el deventa parte del dissendente dela dona? Quando lu l’è untà col spìrito santo. Alora, Gesù Cristo e i 144 mila che i ndarà governar con lu i ze el dissendente dela dona. (Apo. 14:1) Tuti lori i fà el meio che i pol par pensar e far tute le robe come Geovà. w22.07 p. 16 §§ 8, 9

Come semo drio viver nei ùltimi giorni, savemo che ndaremo infrontar tante dificoltà. (2 Tim. 3:1) E quando infrontemo una dificoltà, fursi restemo tanto desanimadi. Pol esser pedo ancora se infrontemo tante al medèsimo tempo. Alora, cossa che pol giutarne? Ricordarse che Geovà el sa dele dificoltà che infrontemo e che el pol darne el aiuto e el coraio che ghemo de bisogno par ndar avanti. Varda come che Geovà el ga giutà Giò, un servo fedele che el ga infrontà tante brute dificoltà al medèsimo tempo. Prima, lu el ga perso tute le so bèstie. Dopo, i so schiavi e i so cari fioi i ze morti. (Giò 1:13-19) Poco tempo dopo, Giò el ga bio una bruta malatia. (Giò 2:7) Geovà el savea quel che Giò l’era drio infrontar. Lu el amea Giò e el ghe ga dato forsa par infrontar le dificoltà. w22.08 p. 11 §§ 8-10

Quando Geovà el ne dissiplina, fursi restemo tanto desanimadi. Fursi pensemo che la dissiplina no la ze stata giusta, o che no la va mia ben par noantri. Ma, ghemo de ricordarse che Geovà el ne dissiplina parché el ne ama. (Ebr. 12:5, 11) Alora, aceta la dissiplina e càmbia quel che te ocore. Gesù el ga dissiplinà Piero davanti i altri apòstoli de pi de una volta. (Mar. 8:33; Luc. 22:31-34) Anca se Piero el se gàpia sentio in vergogna, lu el ga seità a esser leal a Gesù. Lu el ga acetà la dissiplina e el ga imparà coi so sbali. L’è par quela che Geovà el ga dato a Piero tanti laori importanti nela congregassion. (Gio. 21:15-17; Ati 10:24-33; 1 Pie. 1:1) Invesse de seitar a pensar nela vergogna che ghemo sentio, l’è meio acetar la dissiplina e cambiar quel che ne ocore. Quando femo cossita, Geovà el ne doperarà ancora de pi, e saremo boni de giutar i nostri fradei. w22.11 p. 21, 22 §§ 6, 7

Abraon el savea che Dio mai el ndaria far una roba rugna. La Bìblia la dise che Abraon anca el savea che Geovà el podaria ressussitar so fiol, Isache. (Ebr. 11:17-19) Abraon el cognossea la promessa de Geovà che Isache el saria pare de una granda nassion, ma Isache gnancora no’l gavea fioi. Abraon el amea tanto a Geovà. Par quela, lu el se fidea che Dio sempre el ndaria far quel che l’è giusto. Alora, anca quando no l’era fàcile, lu el obedia a Geovà. (Gén. 22:1-12) Come che podemo far compagno a Abraon? Ghemo de seitar a imparar sora Geovà. Cossita, gavaremo una amicìssia pi forte con lu e ndaremo amarlo de pi. (Sal. 73:28) Noantri anca saremo boni de pensar dela medèsima maniera che Geovà. (Ebr. 5:14) Cossita, quando qualchedun el vol che femo qualcossa de sbalià, saremo boni de seitar a far quel che l’è giusto. Noantri sentiremo òdio par tuto quel che pol rovinar la nostra amicìssia con Geovà, o che lo asse disgustà. w22.08 p. 28, 29 §§ 11, 12

Quando Paolo e Barnabè i ze tornadi ale congregassion de Listra, Iconio e Antiochia, lori i ga dato a arquanti fradei el privilègio de esser ansiani nele congregassion. (Ati 14:21-23) Sicuro che quei ansiani i ga giutà tanto le congregassion. La medèsima roba la sucede ancoi. Paolo el ga giutà i so fradei anca de nantra maniera. Lu el ghe ga parlà sora come Geovà el ga giutà tanti dei so servi a dàrghene fora cole so dificoltà. (Ebr. 12:1) Paolo el savea che questi esempi i ndaria giutar i fradei e sorele a gaver de pi coraio e a ricordarse dela bela speransa che i gavea par el futuro. (Ebr. 12:22) Ancoi, anca noantri semo incoraiadi quando imparemo come Geovà el ga giutà Gideon, Barache, Davi, Samuel e altri servi fedeli. — Ebr. 11:32-35. w22.08 p. 21 §§ 5, 6

I pecati dei ressussitadi i ze stati perdonadi quando i ze morti. Alora, lori no i pol esser giulgadi de acordo con quel che i gavea fato vanti de morir. Come che Gesù el ndarà giulgar i ressussitadi? Gesù el ndarà giulgarli de acordo con quel che i farà dopo de imparar sora Geovà. Anca i servi de Geovà del passà come Noè, Samuel, Davi e Daniel i gavarà de imparar sora Gesù e mostrar che i ga fede nel so sacrifìssio. Sicuro che ghen sarà tanto laoro par insegnar questi servi fedeli de Geovà del passà e tuti i ingiusti che i sarà ressussitadi! Cossa che ndarà suceder con quei che no i volarà servir a Geovà? Lori i sarà finidi fora par sempre. Apocalisse 20:15 dise: ‘Quel che no’l ga el so nome scrito nel libro dela vita, l’è stà trato do nel lago de fogo.’ Alora, volemo sforsarse tanto par seitar a gaver el nostro nome scrito nel libro dela vita. w22.09 p. 19 §§ 17-19

Quel che imparemo dela Bìblia ne giuta a far arquante dessision sora come tender dela nostra salute o sora qualche tratamento che ndaremo far. (1 Tim. 3:9) Ma ghemo de star atenti quando parlemo coi altri sora quel che ghemo dessidio far. (Fil. 4:5) Come cossita? Noantri mai restaremo massa preocupadi cola nostra salute. E come amemo tanto i nostri fradei e sorele sempre li rispetemo, anca se quel che lori i desside far l’è difarente de noantri. (Rom. 14:10-12) Semo tanto contenti che Geovà el ne ga dato la vita. E mostremo che ghe demo valor a questo presente, quando tendemo ben dela nostra vita e femo el nostro meio par Dio. (Apo. 4:11) Ancoi, no semo boni de viver come Geovà el volea parché ne toca dàrghene fora cole malatie e desgràssie che sucede. Ma suito, el nostro Creador el ne darà la vita eterna “sensa dolor e gnanca la morte”. (Apo. 21:4) Par intanto, semo pròpio contenti de esser vivi e de servir al nostro caro Pare, Geovà! w23.02 p. 25 §§ 17, 18

Geovà el ga belche mostrà che el ga de pi autorità che i governi del mondo. (Rom. 13:1) Varda tre esempi. El primo esémpio l’è stà de quel che ga sucedesto col Faraò. Quando i israeliti i era schiavi nel Egito e Faraò no’l volea assarli ndar via, Geovà li ga liberadi e lo ga copà nel Mar Rosso. (Éso. 14:26-28; Sal. 136:15) El secondo esémpio l’è quel che ga sucedesto col rè Belsazar de Babilònia. Lu el ga fato una festa par farse pi grando che el Signor del cielo e lu el ga ‘dato onor ai so dèi de argento e oro’, invesse de a Geovà. (Dan. 5:22, 23) Alora, in quela note, Geovà el ga fato che quel omo orgolioso el fusse copà e el ga dato el so governo a quei dela Mèdia e dela Pèrsia. (Dan. 5:30, 31) El terso esémpio l’è de Erode, che l’era el rè dela Palestina. Lu el gavea copà el apòstolo Tiago e el ga metesto el apòstolo Piero in preson parché el volea coparlo anca lu. Ma Geovà el ga mandà che so àngelo el copesse Erode. — Ati 12:1-5, 21-23. w22.10 p. 15 § 12

Geovà el parla con noantri quando ledemo la Bìblia. Se ledemo sora come lu el ga tendesto dei so servi del passà e ghe pensemo sora, la nostra speransa la resta pi forte. Semo sicuri che tuto quel che ghen’è nela Bìblia “l’è stà scrito par insegnarne, cossita par meso dela perseveransa e del consolo dele Scriture noantri ghemo speransa”. (Rom. 15:4) Pensaghe sora quel che Geovà el ga dito che ndaria far e el ga belche fato. Varda quel che ga sucedesto con Abraon e Sara. Dio el ga prometesto che lori i gavaria un fiol ancora che i fusse massa veci. (Gén. 18:10) Abraon l’era sicuro che Dio el ndaria far quel che el gavea prometesto. Abraon el ga bio ‘fede che el deventaria pare de tante nassion’. (Rom. 4:18) Fursi ghe parea che quela roba mai la ndaria suceder, ma la so fede no la ze stata par gnente. (Rom. 4:19-21) Pensarghe sora esempi come questi mostra che Geovà sempre el fà quel che el promete. w22.10 p. 27 §§ 13, 14

Ga sucedesto pròpio questo quando i giudei i ze stati liberadi de Babilònia. Noantri ancoi restemo tanto contenti de saver che Geovà l’è el nostro Grandioso Istrutor! Dopo, Isaia el ga parlà che Geovà el ne insegna de due maniere. Quala che la ze la prima? Isaia el ga dito: “Ti te ndarè veder el to Grandioso Istrutor coi to oci.” Alora, l’è come se Geovà el fusse un istrutor o un maestro davanti a noantri, e noantri fùssino i so aluni. Come che Geovà el ne insegna? Par meso dela so organisassion. Par esémpio, lu el ne insegna nele riunion, nele publicassion e nel JW Broadcasting^®. Sicuro che ghe demo tanto valor a queste robe parché le ne giuta a seitar a servir a Geovà contenti anca se ghemo dificoltà. w22.11 p. 10 §§ 8, 9

Gesù el ghe ga parlà sora el fin de Gerusalen, del témpio e anca de questo mondo de Sàtana. Lu el ga dito: “Nissuni i sa, gnanca i àngeli nel cielo, gnanca el Fiol, ma sol el Pare el sa.” Par quela, lu el ga dito che i dissìpoli i gavea de star atenti e seitar desmissiadi. (Mar. 13:32-37) I dissìpoli de Gesù del primo sècolo i gavaria de seitar atenti, parché sol cossita, lori i seitaria vivi. Gesù el ga dito: “Quando valtri vederé i esèrsiti acampadi intorno de Gerusalen, savaré che suito la sarà destruta.” Alora, quando questo sucedesse, lori i gavaria de “scampar via par i monti”. (Luc. 21:20, 21) Lu el ga dito ai so dissìpoli cossa che ndaria suceder vanti che Gerusalen la fusse finida fora. Alora, quando i romani i ga fato fora Gerusalen, quei che i ga obedio a Gesù e i ze restadi atenti no i ze mia stati copadi. Ancoi, semo drio viver nei ùltimi giorni del mondo de Sàtana. Par quela, ghemo de star atenti e seitar desmissiadi. w23.02 p. 14 §§ 1, 2; p. 16 § 3

Geovà el ghe insegna la verità e quel che l’è giusto ale persone che lo ama. Par quela, lore le ga pace e le sente che le ga valor. (Pro. 13:5, 6) Fursi te ghè imparà questo nel to stùdio dela Bìblia e te ghè visto che Geovà sempre el fà el meio par tute le persone, anca par ti. (Sal. 77:13) Par quela, te vol far quel che Dio el dise che l’è giusto. (Mat. 6:33) Ti te vol che tute le persone le sàpia che l’è una busia quel che Sàtana el dise sora Geovà. Ma come che ti te pol mostrar che Sàtana l’è un busier? La to maniera de viver la pol mostrar che te vol che Geovà el sìpia el to governante e che no te credi nele busie de Sàtana. Te pol mostrar che te vol far quel che Geovà el dise che l’è giusto. Come? Prega a Geovà e dighe che te vol servirlo par sempre. Dopo, sìpia batesà. Se te ami quel che l’è vera e giusto, l’è sicuro che te gavarè voia de esser batesà. w23.03 p. 3 §§ 4, 5

Ghen’è una pace che le persone del mondo no le cognosse, che la ze “la pace de Dio”. Ma cossa zela questa pace? La ze la calma che sentimo quando ghemo una forte amicìssia con Geovà, el “Dio de pace”. (1 Tes. 5:23) Quando ghemo la pace de Dio, se sentimo tranquili parché ghemo la so protession. (Fil. 4:6, 7) Alora se cognossemo a Geovà, lo obedimo e se fidemo in lu, noantri se sentimo tranquili anca con brute dificoltà. Questa pace la ne giuta a seitar a esser amighi de Geovà e de quei che i lo ama. Ma sarà che podemo pròpio gaver la pace de Dio quando infrontemo brute malatie, desgràssie, una guera rento el nostro paese o perseghission? Queste dificoltà le pol farne gaver paura. Tanti fradei e sorele i ga fato quel che Gesù el ga dito, che l’è scrito nel testo de ancoi, e i ze stati boni de sentir pace intanto che i era drio tribolar. Alora, anca noantri podemo gaver la pace de Dio. w22.12 p. 16 §§ 1, 2

Noantri no podemo controlar tuto quel che sucede nela nostra vita. Par quela no ghemo mia de pensar che ghemo valor par Geovà sol par via dei laori che femo nela organisassion. Noantri anca no ghemo de comparar i laori che femo con quel dei altri. (Gàl. 6:4) Alora, l’è tanto importante sforsarse par far quel che podemo par Geovà e par i altri. Cossa pol giutarte a laorar de pi par Geovà? Viver con manco robe e manco soldi e no seitar a comprar robe che no te ocore mia. Te pol anca pensar che laori te pol far adesso che i ndarà giutarte a far laori pi grandi nel futuro. Par esémpio, se te vol esser pioniero regolar, te pol scominsiar a laorar de pioniero aussiliar. Se te vol esser un servo ministerial, sarà che te podarissi predicar de pi? Sicuro che queste robe le ndarà giutarte a far altri laori nela organisassion nel futuro. Alora, seita a far el to meio in tuti i laori che te ghè nela organisassion. — Rom. 12:11. w22.04 p. 26 §§ 16, 17

Geovà el pol giutarne a dàrghene fora cole nostre dificoltà e a adorarlo con alegria. Par quela, quando semo drio infrontar un problema e ghe domandemo aiuto a Geovà, pol esser che suito lu el ne dae forsa. E cossa che ghemo de far se el problema no’l se finisse mia? Ghemo de far quel che dise Isaia 62:7 e ‘no assar che lu el ripose’. Come cossita? Ghemo de pregar tante volte, come se no asséssino Geovà riposar. Anca Gesù el ga dito che ghemo de seitar a domandar spìrito santo. (Luc. 11:8-10, 13) Ne ocore anca domandar che Geovà el ne dae la sabedoria par far bone scólie nela vita. w22.11 p. 8 § 1; p. 9 §§ 6, 7

Ti e la to fameia gavé de pareciarve adesso par infrontar la perseghission. Come? Invesse de pensar nele brute robe che le pol suceder, fé pi forte la vostra amicìssia con Geovà. E se te sì ansioso, conta a Geovà tuto quel che te sì drio sentir. (Sal. 62:7, 8) Discoré sempre in fameia parché che podé fidarve in Geovà. Cossita come l’è importante pareciarse par una desgràssia, l’è anca tanto importante pareciarse par la perseghission. Se ve parecié vanti e ve fidé in Geovà, anca i vostri fioi i gavarà coraio e pace. Quando Geovà el ne dà la so pace, noantri sentimo che ghemo protession. (Fil. 4:6, 7) Cossita, se sentimo tranquili anca se infrontemo brute malatie, desgràssie o perseghission. Geovà anca el dopera i ansiani par tender de tuti noantri, e el vol che se giutemo intrà de noantri. La pace che sentimo adesso la ze drio pareciarne par le dificoltà ancora pi brute che gavaremo nel futuro e nela “granda tribolassion”. — Mat. 24:21. w22.12 p. 27 §§ 17, 18

Metemo dir che te ghè fato un bruto sbàlio nel passà. Alora, no stà seitar a sentirte in colpa. Se te te ghè ciamà gramo, te ghè domandà aiuto a Geovà e ai ansiani e te ghè cambià, Geovà el te ga perdonà del tuto. (Isa. 55:7; Ati 3:19) L’è vera che el sacrifìssio de Gesù no’l ga mai de esser una scusa par noantri seitar a far quel che l’è sbalià. (Ebr. 10:26-31) Ma, par causa de questo sacrifìssio, podemo esser perdonadi de tuti i nostri pecati. Noantri no restaremo mai sgionfi de viver in Paradiso. Ndaremo laorar tanto, cognosser tante persone e goderse con quel che Geovà el ga creà. Tuti giorni, ndaremo cognosser meio el nostro Pare e tuto quel che lu el ga fato. w22.12 p. 13 §§ 17, 19

Questa “dona” no la ze Eva parché la professia la dise che el dissendente dela dona el ndaria schissar la testa dela serpente. La serpente la ze Sàtana e noantri no podemo vederlo, manco ancora schissar la so testa. Alora, chi che ndaria finir fora col Diaol? El libro de Apocalisse el dise chi che la ze la dona dela professia de Génesi 3:15. (Apo. 12:1, 2, 5, 10) Questa dona no la ze una persona qua nela Tera parché Apocalisse dise che la ga una luna soto i so pié e una corona de dódese stele sora la so testa. Ela anca la ga bio un fiol, che l’è el Regno de Dio. Come el Regno de Dio l’è nel cielo, alora anca questa dona la ze nel cielo. Cossita,questa dona la ze la parte dela organisassion de Geovà nel cielo, o sia, i àngeli fedeli. (Gàl. 4:26) La Bìblia anca la ne giuta a saver chi che l’è la parte pi importante del dissendente dela dona. Questo dissendente el saria dela fameia de Abraon. — Gén. 22:15-18. w22.07 p. 15, 16 §§ 6-8

Geovà el ga metesto tanti bei consili nela so Parola. Questi consili i pol cambiar la vita dele persone e giutarle tanto. Quando Moisè el ga scrito i primi libri dela Bìblia, lu el ga dito ai israeliti che la Parola de Dio la podea giutarli a viver ben. (Deu. 32:47) Alora, se i metesse in pràtica quei consili, lori i gavaria una vita tanto pi felice. (Sal. 1:2, 3) Anca se la Bìblia la ze stata scrita tanto tempo indrio, ancora la ga el poder de cambiar la vita dele persone. I consili che ghen’è nela Bìblia i ze boni de giutar le persone fin ancoi. Alora, quando ledemo la Bìblia e ghe pensemo sora quel che imparemo, Geovà el dopera el so spìrito santo par giutarne a far quel che lu el vol. (Sal. 119:27; Mal. 3:16; Ebr. 4:12) Sicuro che, saver che Geovà el vol giutarne, ne fà voia de leder sempre la Bìblia! w23.02 p. 3 §§ 5, 6

El capìtolo 13 de Apocalisse el mostra che la sètima testa, o sia, la Potensa Mondial Anglo-Americana la ze rapresentada anca par una bèstia con due corni de piegoreto. Questa bèstia la ‘parla come un dragon, la fà grandi segnai e la fà vegner do fogo del cielo’. (Apo. 13:11-15) I capìtoli 16 e 19 de Apocalisse i dise che questa bèstia la ze anca el ‘falso profeta’. (Apo. 16:13; 19:20) Daniel anca el dise che la Potensa Mondial Anglo-Americana la ndaria far una bruta destrussion. (Dan. 8:19, 23, 24) E questo ga pròpio sucedesto nela Seconda Guera Mondial. Sientisti dei Stati Unidi e Regno Unido i ga laorà insieme e i ga molà due bombe nel Giapon. Cossita, la Potensa Mondial Anglo-Americana la ga fato ‘vegner do fogo del cielo’. w22.05 p. 10 § 9