Giugno

Giò l’era amigo de Geovà, l’era tanto sior e el gavea una fameia granda e felice. (Giò 1:1-5) Ma el ga perso quasi tuto quel che el gavea nte un sol giorno. Prima, le ze morte tute le so bèstie. (Giò 1:13-17) Dopo, anca i so diese cari fioi i ze morti. Imagina come Giò e la so dona i se ga sentio de perder tuti i so fioi. Alora, semo boni de capir parché che Giò el ga sbregà le so robe e el se ga trato in tera quando el ga savesto che i so diese fioi i era morti! (Giò 1:18-20) Dopo, el Diaol el ga fato che Giò el gavesse una bruta malatia che ghe fea schifo ale persone. (Giò 2:6-8) Vanti che Giò el restesse malà, le persone le ghe domandea consili e lo rispetea tanto. (Giò 31:18) Ma dopo che lu l’è restà malà, i so fradei, i so amighi e i so servi gnanca no i rivea pi darente de lu. — Giò 19:13, 14, 16. w22.06 p. 21 §§ 5, 6

Paolo el ga dito ai fradei de Èfeso che lori i gavaria de deventar cada volta pi bravi servi de Geovà. (Efe. 4:13) Una dele robe che ghemo de far la ze amar cada volta de pi a Geovà. Anca che te ami tanto a Geovà, te pol amarlo ancora de pi. Paolo el seitea a pregar che i fradei filipensi i amesse cada volta de pi a Geovà. (Fil. 1:9) Ma come che te pol amar cada volta de pi a Geovà? Te ghè de cognosserlo cada volta de pi e gaver la capacità de capir le robe. E quando lo cognossemo meio, ndaremo amarlo de pi, pensar sora le so bele qualità e nela so maniera de far le robe. Alora, ndaremo far tuto quel che podemo par assarlo contento e mai disgustarlo. Sicuro che volemo sforsarse tanto par capir quel che Geovà el vol che femo e far el meio che podemo par obedirlo. w22.08 p. 2, 3 §§ 3, 4

El libro de Apocalisse l’è stà scrito par i servi de Geovà. Par quela che belche saveino che ndarìssino veder le professie de Apocalisse realisarse e che ndarìssino far anca parte de questo. Quel che el apòstolo Gioani el ga scrito mostra che semo drio viver nel tempo che le professie le ze drio realisarse. Lu el ga dito: “Par ispirassion mi son stà nel giorno del Signor.” (Apo. 1:10) Gioani el ga scrito queste parole intorno del ano 96 dopo de Cristo. Alora, ancora ndaria méterghe tanto tempo fin el ‘giorno del Signor’. (Mat. 25:14, 19; Luc. 19:12) Le professie dela Bìblia le mostra che el giorno del Signor el ga scominsià in 1914 quando Gesù l’è deventà Rè nel cielo. Dopo de quel ano, le professie de Apocalisse sora el pòpolo de Dio le ga scominsià a realisarse. Adesso, semo belche drio viver nel “giorno del Signor”! — Apo. 1:3. w22.05 p. 2 §§ 2, 3

El falso profeta e la bèstia cativa i ze stati butadi ancora vivi nel lago de fogo ndove che el sùlfaro el brusa. Alora, questi governi i sarà finidi fora par sempre intanto che i sarà ancora drio governar. Cossa che ghemo de far? Come servi de Geovà, ghemo de seitar a esser leai a lu e al so Regno. (Gio. 18:36) Par quela, ghemo de seitar neutri e no far gnente che sìpia dela polìtica de questo mondo. Ma dele volte, l’è tanto fadiga farlo. Parché? Parché i governi de questo mondo i vol che mostremo par meso de quel che femo e parlemo che semo leai a lori del tuto. Ma quei che i ze leai a questi governi i riceve la marca dela bèstia cativa. (Apo. 13:16, 17) Cossa sucede con quei che i riceve questa marca? Lori no i ga pi la aprovassion de Geovà e no i ga pi la speransa de viver par sempre. (Apo. 14:9, 10; 20:4) Alora, volemo sempre mostrar che semo leai del tuto a Dio e al so Regno. w22.05 p. 11 §§ 12, 13

Noantri podemo deventar pi bravi servi de Geovà quando proemo imparar e far una roba nova. Se noantri se sforsemo de gaver altre abilità, ndaremo servir a Geovà cada volta meio. Par esémpio, podemo imparar a far i laori che ghe vol par giutar a far su e a tender Saloni del Regno, de Assemblee e costrussion in Betel. Sicuro che par far tute queste robe ghe vol el aiuto de tanti fradei. Tanti de quei che i ze drio giutar ancoi i ga imparà con fradei che belche i savea far questi laori. Fradei e sorele i pol imparar a gaver le abilità che ghe ocore par tender dei Saloni del Regno e de Assemblee. Cossita, Geovà, che l’è el “Rè dela eternità”, e Gesù, che l’è el “Rè de quei che i governa”, i ze drio doperar bravi òmini e done par far robe maraveiose. (1 Tim. 1:17; 6:15) Ma ghemo sempre de ricordarse che ne ocore doperar quel che savemo par dar glòria a Geovà e nò par farse veder. — Gio. 8:54. w22.04 p. 24 § 7; p. 25 § 11

Salomon l’era tanto sior e el podea gaver tuto quel che el volesse. (1 Rè 10:7, 14, 15) Invesse, Gesù el vivea con poche robe e no’l gavea gnanca una casa. (Mat. 8:20) Ma tuti due i vedea i soldi e le robe che i gavea dela maniera giusta, parché i gavea la sabedoria de Geovà. Salomon el savea che coi soldi podemo gaver quel che ghemo de bisogno e quel che volemo. Ma Salomon anca el savea che i soldi no i ze la roba pi importante. Par esémpio, lu el ga dito che ‘un bon nome el ga de pi valor de che tante richesse’. (Pro. 22:1) Salomon anca el ga dito che quei che i ama i soldi no i ze mai contenti con quel che i ga. (Ecl. 5:10, 12) Lu anca el ga dito che no ghemo de fidarse massa nei soldi parché podemo perderli de colpo. — Pro. 23:4, 5. w22.05 p. 21 §§ 4, 5

Quando ghe pensemo nele benedission che ghemo belche adesso, ndaremo far pi forte la nostra amicìssia con Geovà. E quando ghe pensemo sora le benedission che Geovà el ne darà nel futuro, femo pi forte la nostra speransa. Cossita, saremo boni de servir a Geovà contenti. Suito, Geovà el finirà fora con questo mondo rugno. Semo sicuri che Geovà, el ‘Dio de giustìssia’, no’l assarà che el mondo de Sàtana el dure gnanca un giorno de pi de quel che ghe ocore. (Isa. 25:9) Intanto che spetemo con passiensa, ghemo de darghe valor al presente dela orassion, studiar la Bìblia, meter in pràtica quel che imparemo e pensarghe sora le benedission che ghemo. Se femo cossita, Geovà el ne giutarà a dàrghene fora cole dificoltà e a seitar contenti intanto che lo adoremo. w22.11 p. 13 §§ 18, 19

La Bìblia no la parla come l’è stà el batésimo de Timòteo, ma semo boni de imaginar come Eunisse, la so mare, la se ga sentio in quela ora. (Pro. 23:25) Ela la ga infrontà tante dificoltà nela vita, ma la ze stata bona de insegnar el so fiol a amar a Geovà e a Gesù. Eunisse e Loide le era giudee e fursi le ze deventade dissìpole de Gesù quando Timòteo l’era un toso. Ma so pare de Timòteo l’era greco e no’l servia a Geovà. (Ati 16:1) Alora, cossa che Timòteo el ndaria far? La mare che la serve a Geovà la ama tanto la so fameia e la vol che anca i so fioi i sìpia amighi de Geovà. Sicuro che Geovà ghe dà tanto valor al sforso che queste sorele le fà par insegnar i so fioi sora lu. (Pro. 1:8, 9) E Geovà anca ghe giuta a farlo. w22.04 p. 16 §§ 1-3

Suito Geovà el ndarà far che i governanti i gàpia “la voia de realisar el so pensamento”. Cossa che ndarà suceder par via de questo? Questi governi, o sia, i “diese rè” i ndarà atacar e finir fora tute le religion false. (Apo. 17:1, 2, 12, 16) Come che savemo che Babilònia, la Granda, suito la sarà finida fora? Par giutarne a capir, podemo ricordarse che la cità de Babilònia la gavea la àqua del rio Eufrate intorno par darghe protession. El libro de Apocalisse el mostra che i milioni de persone che le va nele religion false le ze come questo rio de protession. (Apo. 17:15) Apocalisse anca el dise che questa àqua la se sugaria, o sia, che le persone no le ndaria pi nele religion false. (Apo. 16:12) Questa professia la ze pròpio drio realisarse ancoi parché tante persone le ga assà le so religion e le va in serca de aiuto in altri posti. w22.07 p. 5, 6 §§ 14, 15

Quando perdonemo, mostremo che demo valor ala misericòrdia che Geovà el mostra a noantri. Nte una ilustrassion, Gesù el ga dito che Geovà l’è come un rè che el ga perdonà un grando dèbito che un schiavo el gavea e che mai el saria bon de pagar. Ma Gesù el ga dito che questo schiavo no’l ga perdonà un dèbito tanto pi pìcolo che nantro schiavo el gavea con lu. (Mat. 18:23-35) Cossa che imparemo? Se demo tanto valor ala misericòrdia che Geovà el mostra a noantri, ndaremo perdonar i altri. (Sal. 103:9) Una Sentinela la ga dito: “Pol esser che ghemo belche perdonà arquante volte i nostri fradei. Ma mai saremo boni de perdonar e mostrar misericòrdia compagno Geovà el ne mostra par meso del sacrifìssio de Gesù.” Quei che i perdona i sarà perdonadi. Geovà el mostra misericòrdia a quei che i mostra misericòrdia. (Mat. 5:7) Gesù el ga parlà sora questo quando el ga insegnà i so dissìpoli a pregar. — Mat. 6:14, 15. w22.06 p. 10 §§ 8, 9

Gesù el ga bio de vegner ala Tera e intanto che l’era qua, el ga fato tuto compagno a so Pare. (Gio. 14:9) Cossita, par meso de lu, podemo cognosser e amar a Geovà. Gesù anca el ne giuta par meso de quel che el ne insegna e dela maniera che el tende dele congregassion. Lu anca el ne insegna a viver de una maniera che asse Geovà contento. Quando Gesù l’è morto, lu el ga dato la so vita come sacrifìssio par el perdon dei nostri pecati. (1 Gio. 1:7) Adesso, Gesù l’è un Rè poderoso nel cielo che mai pi el morirà e che suito el schissarà la testa dela serpente. (Gén. 3:15) Sicuro che sarà tanto bel quando Sàtana el sarà finio fora. Alora, no stà mia desister e seita a fidarte in Geovà. Lu el darà tante ‘benedission a tute le nassion dela tera’. w22.07 p. 18 § 13; p. 19 § 19

Ghemo anca de ricordarse che pol cambiar arquante robe nela nostra vita, e magari, no saremo boni de finir el laoro che ghemo dessidio far nela organisassion. Varda el esémpio del apòstolo Paolo. Lu el ga giutà a verder una congregassion nela cità de Tessalònica. Ma lu el ga bio de ndar via dela cità parché i nemighi i ze vegnesti contra lu. (Ati 17:1-5, 10) Se lu el restesse lì, lori i podaria copar i fradei de Tessalònica. Anca cossita, Paolo ancora el volea giutarli. Alora, el ga mandà Timòteo. (1 Tes. 3:1, 2) Sicuro che lori i ze restadi tanto contenti. Cossa podemo imparar de quel che ga sucedesto con Paolo in Tessalònica? Fursi semo drio sforsarse tanto par far un laoro nela organisassion, ma sucede qualcossa nela nostra vita che ne intriga de farlo. (Ecl. 9:11) Se questo ga sucedesto con noantri, podemo scòlier un laoro che semo boni de far adesso. w22.04 p. 25, 26 §§ 14, 15

Geovà el ne consola par meso dela speransa che el ne ga dato. Varda arquanti testi dela Bìblia che i pol consolarne quando infrontemo dificoltà. Par esémpio, Geovà el ne assa sicuri che gnente sarà bon de spartirne del so amor. (Rom. 8:38, 39) Lu el promete che l’è darente de quei che i lo ciama. (Sal. 145:18) Lu anca el ne dise che, se se fidemo in lu, saremo boni de infrontar con alegria tute le dificoltà. (1 Cor. 10:13; Tia. 1:2) Geovà anca el ne promete che suito el ndarà finir fora con Sàtana e con quei che i ghe va drio, che no ndaremo pi infrontar queste brute dificoltà e che viveremo par sempre. (2 Cor. 4:16-18; Sal. 37:10) Sicuro che quel che la Bìblia la dise pol consolarne tanto. Alora, proa sempre pensar nei testi che i podarà giutarte a infrontar le dificoltà nel futuro. w22.08 p. 11 § 11

Gheto belche pensà che no te sarè bon de sempre far quel che l’è giusto? Geovà el dise che la nostra giustìssia la pol esser “come le onde del mar”. (Isa. 48:18) Come cossita? Proa imaginar che te sì davanti el mar e te sì drio vardar le onde che le seita a ndar vanti e indrio. Sarà che qualche giorno le onde le ndarà finirse? Nò, parché sempre ghen’è stà e sempre ghen sarà onde nel mar. Come che la to giustìssia la pol esser come le onde del mar? Quando te ghè de dessider qualcossa, proa pensar quel che Geovà el volaria che te fessi, e dopo sfòrsate de farlo. Anca quando no l’è fàcile, te pol esser sicuro che el to caro Pare, Geovà, el sarà dela to banda par giutarte. Lu el ndarà darte la forsa e el aiuto che te ghè de bisogno par far quel che l’è giusto par sempre. — Isa. 40:29-31. w22.08 p. 30 §§ 15-17

Dopo i mila ani, Sàtana el sarà molà e el proarà imbroiar le persone par farle desobedir a Geovà. Cossita, tuti i podarà mostrar che i rispeta el nome de Geovà e che i vol esser governadi par lu. (Apo. 20:8-10) Sol quei che i seitarà leai dopo che Sàtana el sarà molà i gavarà el so nome scrito nel libro dela vita par sempre. La Bìblia la dise che arquanti i sarà desobedienti, e compagno a Adon e Eva, no i volarà esser governadi par Geovà. Cossa che ndarà suceder con queste persone? Apocalisse 20:15 dise che ‘quei che no i ga el so nome scrito nel libro dela vita i sarà trati do nel lago de fogo’. Alora, quei che no i volarà obedir a Geovà i sarà finidi fora, ma tanti i sarà obedienti. w22.09 p. 23 §§ 15, 16

Nela època dei apòstoli, arquanti i volea che quei che i no i era giudei i fusse sircunsidadi. Fursi lori i pensea che se i fesse cossita, i giudei no i ghe ndaria pi contra. (Gàl. 6:12) El apòstolo Paolo no l’era mia de acordo con quel che lori i pensea. Ma lu no’l ga volesto che le robe le fusse fate dela so maniera. Invesse, lu l’è stà ùmile e el ga domandà aiuto dei apòstoli e dei ansiani de Gerusalen par far una dessision. (Ati 15:2) Cossita, lu el ga giutà i fradei a seitar contenti e a viver in pace nela congregassion. (Ati 15:30, 31) Come che podemo far compagno a Paolo? Se ghen’è qualcossa che la ze drio intrigar la pace dela congregassion, ghemo de ndar drio ale orientassion che Geovà el ne dà par meso dela so organisassion. Noantri podemo ndar in serca de orientassion nele nostre publicassion. Se noantri ndemo drio a quel che la organisassion la ne dise invesse de voler che le robe le sìpia fate dela nostra maniera, giutaremo la congregassion a viver in pace. w22.08 p. 22 §§ 8, 9

Pol esser che ne fae fadiga parlar ai altri quel che sentimo, pensemo o qualche dificoltà che semo drio infrontar. Ma una ora o l’altra gavaremo bisogno de parlar con un amigo. Saria pròpio bruto e restarìssino tanto disgustadi se questo amigo el parlesse ai altri quel che ghemo contà a lu. Magari restemo tanto contenti de gaver amighi che podemo fidarse. La Bìblia la dise che un amigo che podemo fidarse l’è pròpio “un vero amigo”. Ansiani che i ze de fidarse i ze come “una protession contra el vento e come un posto par protegerse dela tempesta”. (Isa. 32:2) Noantri semo sicuri che podemo fidarse in questi òmini e che no i ndarà parlar ai altri quel che ghe contemo. E noantri no ghe domandemo qualcossa che no ghemo el dirito de saver. Par esémpio, le done dei ansiani no le proa farli contar robe che no le ga de saver, e questo l’è una protession par lore. w22.09 p. 11 §§ 10, 11

Podemo esser sicuri che, nela granda tribolassion, Geovà el ndarà salvar i so servi leai. (Mat. 24:21; Dan. 12:1) La Bìblia la dise che un grupo de nassion, che el ga nome Goghe de Magoghe, el ndarà contra el pòpolo de Dio in tuto el mondo. Anca se tuti i 193 paesi che i fà parte dele Nassion Unide i ne vegna contra, Geovà e el so esèrsito del cielo i ga tanto de pi poder che lori. E Geovà el ga prometesto: “Mi mostrarò la me glòria tanto granda, mostrarò che son un Dio santo e farò con che tante nassion le me cognossa. E le saverà che mi son Geovà.” (Eze. 38:14-16, 23) Quando Goghe, o sia, questo grupo de nassion el ndarà contra i servi de Dio, Geovà el finirà fora coi “rè de tuta la Tera”. (Apo. 16:14, 16; 19:19-21) Ma ‘quei che i ze giusti i viverà nela Tera, e quei che i ze fedeli i seitarà viver nela’. — Pro. 2:21. w22.10 pp. 16, 17 §§ 16, 17

Sol Geovà l’è bon de veder quel che le persone le pensa e le sente. (Pro. 16:2) Par quela, no ghemo de proar dir parché che una persona la ga fato qualcossa. Geovà el ama le persone de tuto el mondo e el vol che se sforsemo de amar i altri cada volta de pi. (2 Cor. 6:13) Alora, ghemo de sforsarse par amar i nostri fradei e mai giulgarli. Noantri no ghemo de giulgar gnanca quei che no i ze nostri fradei. Par esémpio, no ghemo de assar de parlar sora Geovà a qualchedun dela nostra fameia parché pensemo che mai el deventarà una Testimònia de Geovà. Se féssino cossita, sarìssino drio giulgarlo, e come ghemo belche visto, no podemo mia farlo. Noantri savemo che Geovà l’è ancora drio dar a tute le persone la oportunità de ciamarse grame. (Ati 17:30) Alora, ricòrdate che se pensemo che femo pi polito che i altri o li giulghemo, no saremo drio mostrar giustìssia. El nostro amor par quel che Geovà el dise che l’è giusto ne farà esser pi felici e un bel esémpio par i altri. Cossita, saremo pi amighi de lori e li giutaremo a gaver una amicìssia pi forte con Geovà. w22.08 p. 31 §§ 20-22

Noantri savemo che le persone le pol vegnerne contra par causa del laoro de predicassion, e fursi sarà ancora pedo nel futuro. (Dan. 11:44; 2 Tim. 3:12; Apo. 16:21) Ma, podemo esser sicuri che Geovà el ndarà giutarne quando ghemo de bisogno. Parché? Parché Geovà sempre el ga giutà i so servi a far i so laori, anca se quel che lu el ghe gavea domandà l’era tanto fadiga. Pensa in quel che ga sucedesto nela vita del profeta Ezechiel intanto che lu el predichea ai giudei che i era de star in Babilònia. Lu el gavaria de predicar a persone che le era pròpio triste. Geovà el ga dito che lore le era “desobediente”, “testarde” e “sensa gnanca un rispeto”. Lore le era rugne come “spini” e le era pericolose come “scorpioni”. Par quela, Geovà el ga dito a Ezechiel arquante volte: “No stà gaver paura”! (Eze. 2:3-6) Magari, Ezechiel l’è stà bon de far el laoro che Geovà el ghe gavea domandà parché (1) Geovà lo gavea mandà, (2) el spìrito santo el ghe ga dato forsa, e (3) le parole de Dio le ga fato pi forte la so fede. w22.11 p. 2 §§ 1, 2

Geovà el ne ga creà par viver par sempre, difarente dele bèstie e dele piante. La Bìblia la dise che, quando Geovà el ne ga fato, lu el ne ga dato la “voia de viver par sempre”. (Ecl. 3:11) L’è par quela che vedemo la morte come un nemigo. (1 Cor. 15:26) Metemo dir che te ghè una malatia che la pol coparte. Rèstito casa e no te fè pi gnente invesse de ndar al dotor? Sicuro che te vè in serca de aiuto, parché nissuni de noantri vol morir. E quando more qualchedun che l’è caro par noantri, sìpia gióveno o vècio, restemo tanto disgustadi. (Gio. 11:32, 33) El nostro Creador el ne ama tanto. Alora, lu no’l ndaria farne cola voia de viver par sempre se el volesse che vivessino par poco tempo, mia vera? w22.12 p. 3 § 5; p. 4 § 7

In questi bruti giorni che semo drio viver, ghen’è tanti fradei e sorele che i ze maladi, i se sente soli o i ga paura. Par quela, sfòrsate par seitar a discorer con lori. Fursi femo fadiga catarse coi nostri fradei quando ghen’è una bruta malatia. Alora, varda quel che podemo imparar col apòstolo Gioani. Lu el volea tanto catarse col so caro amigo Gaio. (3 Gio. 13, 14) Come in quela ora no i podea mia catarse, Gioani ghe ga scrito una carta. Cossa che imparemo col so esémpio? Se no semo boni de ndar catar i nostri fradei e sorele, ghemo de proar parlar con lori de altre maniere. Quando discoremo coi nostri fradei, ghemo pace e no se sentimo pi noantri soli. E se noantri se sentimo ansiosi, ne ocore domandar el aiuto dei ansiani e assar che lori i ne giute. — Isa. 32:1, 2. w22.12 p. 17, 18 §§ 6, 7

La Bìblia anca la mostra che Giusepe l’è restà preso con un fero nel col e cadene nei pié par un tempo. (Sal. 105:17, 18) Alora, nantra volta, la vita de Giusepe la ze restada ancora pedo. Lu l’era un schiavo che el so paron el se fidea tanto, ma l’è deventà un presonero. Dele volte, semo drio tribolar e el problema el resta ancora pedo, anca se domandemo el aiuto de Geovà. Te ga belche sucedesto una roba cossita? Anca se te obedissi a Geovà, te ndarè tribolar parché l’è Sàtana el paron de questo mondo. (1 Gio. 5:19) Ma ricòrdate che Geovà el sa quel che te sì drio infrontar e el se preocupa tanto con ti. (Mat. 10:29-31; 1 Pie. 5:6, 7) Varda quel che Geovà el ga prometesto nela Bìblia: “Mi mai vao assarte e mai vao abandonarte.” (Ebr. 13:5) Alora, te pol esser sicuro che Geovà el ndarà giutarte a ndar avanti, anca se te ghè un problema che l’è tanto fadiga. w23.01 p. 16 §§ 7, 8

La Bìblia la ne mostra el amor de Geovà anca de nantra maniera. Varda come lu el tratea i so servi del passà quando lori i fea sbali. I israeliti i ga pecà diverse volte, ma quando i se ga ciamà grami, Geovà li ga perdonadi. Nela època dei primi dissìpoli de Cristo, un omo el se gavea ciamà gramo dei so bruti pecati. Par quela, el apòstolo Paolo el ga dito che i fradei i gavea de perdonarlo e consolarlo. (2 Cor. 2:6, 7; 1 Cor. 5:1-5) Alora, quando ledemo nela Bìblia sora i servi de Dio che i ga pecà, imparemo che Geovà li ga perdonadi, li ga giutadi a cambiar e li ga acetadi come so amighi nantra volta. Cossita, podemo esser sicuri che, se noantri se ciamemo grami, Geovà el ndarà giutarne come el ga fato con quei servi del passà. (Tia. 4:8-10) La Bìblia la ne insegna sora le bele qualità de Geovà, come la sabedoria, la giustìssia e el amor. E anca la mostra che Geovà el vol che deventemo so amighi. w23.02 p. 7 §§ 16, 17

Noantri stemo atenti a quel che l’è drio suceder nel mondo parché arquante professie dela Bìblia le ze drio realisarse ancoi. L’è tanto importante star atenti cossita! Parché? Gesù el ne ga dito le robe che le ga de suceder vanti che el mondo de Sàtana el sìpia finio fora. (Mat. 24:3-14) El apòstolo Piero el ga dito che ghemo de veder le professie dela Bìblia realisarse parché cossita, la nostra fede la resta pi forte. (2 Pie. 1:20-21) L’è importante star atenti ale professie dela Bìblia che le ze drio realisarse ancoi. Ma quel che el apòstolo Piero el ga scrito ne giuta a farlo dela maniera giusta. (2 Pie. 3:11-13) Lu el ga dito che ne ocore gaver ben in mente “la presensa del giorno de Geovà”. Questo no vol mia dir che sol pensemo ‘nel giorno e nela ora’ che vegnarà el Armagedon. Invesse, vol dir che volemo viver de ‘una maniera santa e far robe che mostra che semo fedeli a Dio’. (Mat. 24:36; Luc. 12:40) Alora, volemo viver de una maniera giusta e far tuto quel che podemo par mostrar el nostro grando amor a Geovà. Par quela, ghemo de star atenti a quel che semo drio far. w23.02 p. 16 §§ 4, 6

Noantri podemo mostrar che ghe demo valor a quel che Gesù el ga fato par noantri. Par esémpio, ghemo de tratar i fradei untadi de Cristo dela maniera giusta. E ghemo de ricordarse che Gesù el ndarà giulgarne de acordo cola maniera che tratemo i so fradei. (Mat. 25:31-40) Mostremo che volemo giutar ai fradei de Cristo quando predichemo e insegnemo. (Mat. 28:18-20) Ancora adesso podemo deventar le persone che Geovà el vol che viva in Paradiso. Par esémpio, ghemo de sforsarse par far le robe polito, parlar sol quel che l’è bon e viver de una maniera che ghe piase a Geovà. Anca ghemo de esser leai a Geovà, ai fradei e al nostro omo o la nostra dona. Se se sforsemo de contentar a Dio in questo mondo rugno, sarà pi fàcile obedirlo in Paradiso. Noantri podemo anca sforsarse par gaver le abilità e le qualità che ne giutarà nel futuro. w22.12 p. 11, 12 §§ 14-16

Semo tanto contenti de gaver Gesù come el nostro Rè, parché lu l’è un governante tanto bon. L’è stà Geovà che ghe ga insegnà e lo ga scoliesto par esser Rè. (Isa. 50:4, 5) Gesù el ga mostrà che el ne ama tanto par meso del sacrifìssio che el ga fato par giutarne. (Gio. 13:1) Sicuro che Gesù el mèrita el nostro amor. E lu el ga spiegà che quei che lo ama, i lo obedisse e che quei che i lo obedisse i ze so amighi. (Gio. 14:15; 15:14, 15) Che bel che l’è esser amigo del Fiol de Geovà! De maniera perfeta e ùmile, Gesù el ga fato tuto compagno a so Pare. Te ghè imparà che Gesù el ga dato de magnar a quei che i gavea fame, el ga consolà quei che i era desanimadi e el ga fin curà persone che le era malade. (Mat. 14:14-21) Anca te vedi come lu el tende ben dele congregassion. (Mat. 23:10) Te sè che Gesù el farà robe ancora pi bele nel futuro come el Rè del Regno de Dio. Alora, come che ti te pol mostrar che te ami a Gesù? Te pol far compagno el so esémpio, dedicar la to vita a Geovà e esser batesà. w23.03 p. 4 §§ 8, 10

Savemo che l’è stà Geovà che el ga fato tuto quel che ghen’è nel cielo, nela Tera e nel mar, e imparemo tanto con queste robe. (Sal. 104:24, 25) E Dio el ne ga fato de una maniera che ne piase veder quel che l’è bel. Alora, podemo goderse con tuta la creassion parché semo boni de veder, scoltar, tocar, tastar e snasar. La Bìblia anca la mostra che ghemo de vardar la creassion par imparar sora le qualità de Geovà. (Rom. 1:20) Par esémpio, quando vedemo come la naturesa la ze bela, imparemo dela sabedoria de Dio. Quando pensemo sora tuti tipi de magnar che ghen’è, imparemo che lu el ne vol tanto ben. Alora, cognossemo meio a Geovà e volemo deventar ancora pi amighi soi quando vedemo le so qualità par via de quel che lu el ga creà. w23.03 p. 16 §§ 4, 5

Questo mondo l’è cada volta pedo. Par quela, sarà cada volta pi fadiga seitar a fidarse nela Parola de Dio. Par esémpio, arquante persone le vol che ghemo dubi sora quel che la Bìblia la dise o sora quei che Geovà el dopera par tender del so pòpolo ancoi. Ma, se noantri semo sicuri che la Parola de Dio la ze vera, saremo boni de seitar a gaver una forte fede e a obedir ale orientassion de Geovà fin el fin. (Sal. 119:112) Noantri no gavaremo vergogna de insegnarghe la Bìblia ale persone e gnanca de incoraiarle a meter in pràtica quel che le impara. (Sal. 119:46) Cossita, saremo boni de infrontar perseghission e altre dificoltà “con passiensa e alegria”. (Col. 1:11; Sal. 119:143, 157) La Parola de Dio la ne giuta a sentir pace e coraio, e la ne insegna come viver in questo bruto mondo de ancoi e anca la ne dise quel che el so Regno el farà. w23.01 p. 7 §§ 16, 17

Nela note vanti de morir, Gesù el ga pregà par tanto tempo par domandar che Geovà el tendesse dei so dissìpoli ‘par causa del Diaol’. (Gio. 17:15) Quando el ga fato questa orassion, el savea che poco tempo dopo el ndaria sofrir tanto. Anca cossita, el ga mostrà che el se preocupea tanto coi so apòstoli e che li amea tanto. Noantri femo come Gesù quando domandemo a Geovà no sol quel che ghemo de bisogno, ma quel che i nostri fradei e sorele i ga de bisogno. Quando seitemo a far cossita, semo drio obedir al comandamento che Gesù el ga dato de amar un al altro e mostremo a Geovà che amemo i nostri fradei. Sicuro che le nostre orassion le ndarà giutar tanto i nostri fradei e le sorele parché la Bìblia la dise che la orassion del giusto la ga tanto poder. (Tia. 5:16) I fradei i ga bisogno dele nostre orassion parché i tribola de tante maniere. w22.07 p. 23, 24 §§ 13-15