Lùlio

Noantri parlemo parché el nostro Pare, Geovà, el ne ga dato questo bel presente. Ma tanti no i ga doperà ben el presente che Geovà el ne ga dato. Par esémpio, Sàtana el ga contà una busia a Eva, e par quela, no semo perfeti e sbaliemo. (Gén. 3:1-4) Adon el ga sbalià e el ga parlà che la colpa la era de Eva e de Geovà. (Gén. 3:12) Cain el ga contà una busia a Geovà dopo de copar el so fradel, Abel. (Gén. 4:9) Ancoi l’è anca fadiga catar un filme che no’l gàpie parole brute. I gióveni i parla robe sporche e brute nela scola e quei pi veci nel so laoro. Se no stemo mia atenti, podemo seitar a scoltar parole sporche e dopo scominsiar a doperarle anca noantri. Ma mai ghemo de doperar queste parole, parché volemo contentar e lodar a Geovà. w22.04 p. 4 §§ 1-3

Anca Gesù el vedea i soldi dela maniera giusta. Par esémpio, lu no’l pensea che l’era sbalià magnar e bever robe bone. (Luc. 19:2, 6, 7) Savemo che lu el pensea cossita parché el so primo miràcolo l’è stà far àqua deventar un bon vin. (Gio. 2:10, 11) E nel giorno che l’è morto, Gesù el gavea su una roba tanto bona. (Gio. 19:23, 24) Ancora cossita, lu no’l pensea che i soldi e le robe i era le robe pi importante dela vita. Gesù anca el ga dito che se metemo el Regno in primo posto nela vita, Geovà el ndarà darne tuto quel che ghemo de bisogno. (Mat. 6:31-33) I consili de Geovà sora i soldi i ze drio giutar a tante persone. Varda el esémpio del fradel Daniel. Lu el ga dito: “Quando mi ero gióveno, go dessidio che el laoro a Geovà el saria la roba pi importante dela me vita.” Come Daniel l’è drio sforsarse par viver con manco soldi e manco robe, lu l’è bon de far de pi par Geovà. Par esémpio, lu el ga belche giutà fradei quando i ga infrontà desgràssie e el ga servio in Betel. Lu anca el ga dito: “Mi no saria mai bon de pagar tuto quel che Geovà el me ga dato.” w22.05 p. 21, 22 §§ 6, 7

Come ghemo visto, ghemo de studiar sempre la Bìblia e le publicassion dela organisassion. Cossita, mostremo che amemo le verità dela Bìblia. Alora, anca se servimo a Geovà fà tanti ani, ancora podemo imparar tanto dela Bìblia. L’è vera che ghe vol sforso, ma queste verità le ga tanto valor par noantri. Arquante persone no ghe piase leder e studiar. Ma Geovà el vol che seitemo a ndar in serca dele verità che ghen’è nela so Parola. (Pro. 2:4-6) E noantri imparemo tante bele robe se seitemo a farlo. Varda el esémpio del fradel Corey. Quando el lede la Bìblia, lu el stùdia un versìcolo ala volta. Corey el ga dito: “Se el versìcolo el ga una nota, mi la ledo. Proo sempre leder i testi che i ze rifarensa e cossa le publicassion le dise sora quel versìcolo. Cossita, mi sempre imparo tanto quando ledo la Bìblia.” Quando se sforsemo de studiar la Bìblia, mostremo che ghe demo tanto valor ale so verità. — Sal. 1:1-3. w22.08 p. 17 § 13; p. 18 §§ 15, 16

Quando Gesù l’era nela Tera, lu el ga parlà de arquante robe dela creassion par insegnarghe so dissìpoli sora el so Pare. Adesso, ndaremo imparar arquante de queste robe. Geovà el mostra so amor a tuti. In Mateo capìtolo 5, vedemo parte de un discorso che Gesù el ga fato. Quela volta, lu el ga parlà ai so dissìpoli sora el Sol e la piova. Cossita, Gesù li ga giutadi a capir che Geovà el ama a tute le persone parché ghe dà a tuti queste robe importante. Geovà el podaria dar el Sol e la piova sol a quei che i lo serve. Ma lu no’l fà mia cossita. (Mat. 5:43-45) Cossa che imparemo? Restemo maraveiadi de veder el Sol ndar do o una bela spiovada, e imparemo che Geovà el mostra so amor a tute le persone. Alora, anca noantri volemo mostrar amor e predicar a tuti. w23.03 p. 17 §§ 9, 10

Parché che el apòstolo Gioani l’è restà tanto spaurà? Lu el ga visto una dona sentada nela bèstia scarlate. Questa dona la ze la granda prostituta, che la ga nome “Babilònia, la Granda”. Ela la fà imoralità sessual coi “rè dela tera”. (Apo. 17:15) Chi che la ze “Babilònia, la Granda”? Ela no la pol esser un governo parché Apocalisse dise che la fà imoralità coi governanti de questo mondo. (Apo. 18:9) Noantri anca capimo che no la ze un governo parché la ze sentada nela bèstia, o sia, la proa comandar questi governanti. No podemo gnanca dir che la ze el comèrsio del mondo de Sàtana parché el libro de Apocalisse el parla che lu l’è i “comersianti dela tera”. (Apo. 18:11, 15, 16) Babilònia la era la cità che le persone le adorea a tanti dèi falsi. Alora, Babilònia, la Granda, la rapresenta tute le religion false. — Apo. 17:5, 18. w22.05 p. 11 §§ 14-16

Sicuro che una mare la seita a preocuparse se i so fioi i ndarà servir a Geovà. I genitori i sa che ghe fà fadiga ai gióveni infrontar el mondo de Sàtana. E pol esser che una mare la ga de slevar su i so fioi ela sola o col so sposo che no’l serve mia a Geovà. Pol esser fadiga insegnar i fioi a servir e a amar a Geovà quando una mare la serve a Geovà ela sola. Ma anca i genitori che i serve a Geovà insieme i infronta dificoltà par farlo. Alora, no stà restar massa ansioso parché Geovà el ndarà giutarte. Te pol anca domandar a bravi genitori come che lori i ze drio doperarle nela adorassion in fameia. (Pro. 11:14) Prega a Geovà e domanda che el te giute a cognosser el cuor dei to fioi e a capir quel che lori i sente e i pensa. — Pro. 20:5. w22.04 p. 17 §§ 4, 7; p. 18 § 9

Gesù sempre el fà tuto compagno al so Pare. Alora, quando cognossemo a Gesù, ndaremo cognosser e amar ancora de pi a Geovà. (Ebr. 1:3) E podemo cognosser a Gesù quando ledemo la Bìblia. Alora, sfòrsate de leder la Bìblia tuti i giorni. Se te studi i quatro Vangeli, te ndarè cognosser meio a Gesù. Intanto che te sì drio lederli, impara sora le bele qualità che lu el ga mostrà. Tute le persone, anca i picinini, i ghe piasea star darente de Gesù e i so dissìpoli no i gavea paura de parlarghe quel che i pensea. (Mar. 10:13-16; Mat. 16:22) Gesù anca el mostrea bontà e amor ale persone. Come Gesù el fà compagno al so Pare, podemo esser sicuri che anca Geovà el mostra queste qualità. Alora, podemo pregar a Geovà e parlarghe tuto quel che semo drio sentir. Lu el ne ama, el ne tende e mai el ndarà giulgarne. — 1 Pie. 5:7. w22.08 p. 3 §§ 4, 5

Come Geovà el ne ga creà, lu el cognosse tanto ben a tuti noantri. (Sal. 139:15-17) Par esémpio, lu el sa de tuto quel che ghemo eredità dei nostri genitori, tuto quel che ga sucedesto nela nostra vita e come questo ga fato la nostra personalità. Sicuro che Geovà el ne cognosse tanto ben. Par quela, lu el vol mostrar misericòrdia a tuti noantri. (Sal. 78:39; Sal. 103:13, 14) Geovà el sa che tuti noantri semo pecadori e che ndaremo morir par via del pecato de Adon. (Rom. 5:12) E noantri no podemo far gnente che salve a noantri o a nantra persona del pecato e dela morte. (Sal. 49:7-9) Ma Geovà el ga mostrà compassion, parché el ga fato quel che dise in Gioani 3:16. Lu el ga mandà el so Fiol come sacrifìssio par tuti noantri. — Mat. 20:28; Rom. 5:19. w22.06 p. 3 §§ 5, 6

Geovà el perdona a quei che i perdona. Noantri imparemo che l’è importante mostrar misericòrdia par meso de quel che Geovà el ga dito a Giò. Anca che Giò el gavesse sofrio tanto par via de quel che Elifas, Bildade e Zofar i ghe ga dito, Geovà el ga dito che Giò el preghesse par quei òmini. E quando Giò lo ga fato, Dio lo ga benedio tanto. (Giò 42:8-10) Noantri sofrimo quando seitemo disgustadi con qualchedun. Seitar disgustadi con qualchedun no l’è bon par la nostra salute e pol farne restar desanimadi. (Pro. 14:30; Efe. 4:31, 32) Ghemo de ricordarse che quando seitemo disgustadi con qualchedun, semo sol noantri che ndaremo sofrir. Saria come bever velen e spetar che quel’altra persona la sofra. Par quela che Geovà el vol che mostremo sabedoria e no seitemo disgustadi coi altri. (Sal. 37:8) Alora, quando perdonemo i altri, se sentimo in pace, pi tranquili e semo boni de servir a Geovà contenti. w22.06 p. 10 §§ 9, 10

La nostra speransa la ze come un capassete che protege i nostri pensamenti e ne giuta a no pensar sol in noantri. Cossita, semo boni de gaver una bela amicìssia con Geovà. (1 Cor. 15:33, 34) La nostra speransa anca la protege i nostri pensamenti parché, se ghemo una forte speransa, no ndaremo pensar che no saremo mai boni de contentar a Geovà. Ricòrdate che l’è stà Elifaz, el falso amigo de Giò, che el ga parlà robe cossita. Lu el ga dito: ‘Come che un poro omo el pol esser puro? Varda, Dio no’l se fida nei so santi e gnanca el cielo l’è puro par lu.’ (Giò 15:14, 15) Questa la ze pròpio una bruta de una busia! Sàtana el vol che pensemo cossita parché lu el sa che la nostra speransa la restarà pi fiaca. Alora, no stà mai pensar in queste busie e ricòrdate sempre dele bele promesse de Geovà. Te pol esser sicuro che Geovà el vol che te viva par sempre e che el ndarà giutarte a far questo. — 1 Tim. 2:3, 4. w22.10 pp. 25, 26 §§ 8-10

El Diaol el volea che Giò el pensesse che Geovà l’era drio farlo sofrir. Alora, lu el ga fato un forte vento trar do la casa ndove i diese fioi de Giò i era drio magnar insieme. (Giò 1:18, 19) Lu anca el ga fato vegner do fogo del cielo par copar le bèstie de Giò e i òmini che i era drio tenderle. (Giò 1:16) Come el vento e el fogo i ze vegnesti del cielo, Giò el ga pensà che l’è stà Geovà che el gavea fato quele robe. Fursi Giò el ga pensà che Geovà l’era disgustà con lu. Anca cossita, lu el ga seità leal a Dio e no l’è restà inrabià con lu. Giò el ga pensà che se lu l’era restà contento de ricever le robe bone de Dio, el gavea de acetar anca le robe rugne. Par quela el ga dito che el ‘nome de Geovà el seitesse a esser lodà’. — Giò 1:20, 21. w22.06 p. 21 § 7

Come mostra Gioani 17:14, Gesù el ga parlà ai so dissìpoli che questo sucederia. Noantri semo drio veder che questo l’è drio suceder ancora de pi nei ùltimi 100 ani. Come cossita? Poco tempo dopo che Gesù l’è deventà Rè del Regno de Dio, nel ano 1914, Sàtana l’è stà parà do ala Tera. Adesso, lu l’è qua nela Tera e el sa che ghe manca poco par esser finio fora. (Apo. 12:9, 12) Par quela, lu l’è tanto cativo e inrabià e l’è drio far tuto quel che el pol contra i servi de Dio. (Apo. 12:13, 17) Alora capimo parché che ghen’è cada volta pi òdio nel mondo contra el pòpolo de Dio. Ma no ghemo paura de Sàtana e de quei che i ghe va drio. Paolo el ga dito: ‘Se Dio l’è con noantri, chi che vegnarà contra noantri?’ (Rom. 8:31) Noantri se fidemo del tuto in Geovà. w22.07 p. 18 §§ 14, 15

Gesù el savea che, nel tempo del fin, ghen saria persone par far la predicassion. Lu l’era sicuro che la professia del Salmo 110:3 la ndaria realisarse. Questo testo el dise: “El to pòpolo el va meterse a disposission de volentiera nel di che el to esèrsito el ndarà par la guera.” Alora, se te predichi le bone notìssie, te sì drio giutar a Gesù, al schiavo fedele e prudente e a realisar questa professia. Ma pol esser fadiga far el laoro de predicassion parché le persone le ne vien contra. Arquanti che i ze contra Geovà e la so organisassion, polìtichi e autorità dele ciese i conta busie sora el nostro laoro. Pol esser che persone dela nostra fameia e del laoro le crede in queste busie e le proa intrigarne de predicar e de servir a Geovà. In tanti paesi, arquante persone le va contra i nostri fradei e anca li mete in preson. w22.07 p. 8 § 1; p. 9 §§ 5, 6

Geovà el vol che noantri ledemo e studiemo la Bìblia tuti i giorni e che pensemo sora quel che ledemo. Quando metemo in pràtica quel che imparemo nela Bìblia, la nostra fede e la nostra amicìssia con Geovà le resta pi forte. Cossita, ghemo pi forsa par infrontar le dificoltà. Geovà anca el dà el so spìrito santo a quei che i mostra che i se fida nela Bìblia. E, el spìrito santo el pol darne el poder che ghemo de bisogno par infrontar tute le dificoltà. (2 Cor. 4:7-10) Geovà el dopera el schiavo fedele e prudente par darne vìdei e mùsiche che i ne giuta a gaver una fede pi forte e seitar atenti. (Mat. 24:45) Geovà anca el dopera i nostri fradei e sorele par giutarne quando infrontemo dificoltà. (2 Cor. 1:3, 4; 1 Tes. 4:9) I nostri cari fradei i vol tanto giutarne a dàrghene fora coi nostri problemi. w22.08 p. 12 §§ 12-14

Noantri podemo parlar sora le bone qualità dei nostri fradei e sorele. Se femo cossita, la union e el amor nela congregassion i restarà pi forti. Pol esser che no ghen sìpia pi pace intrà due bravi fradei parché no i ze mia de acordo. L’è stà pròpio questo che ga sucedesto col apòstolo Paolo e so amigo, Barnabè. Lori due no i era mia de acordo se i gavaria de portar Marco insieme nel so viaio par predicar e incoraiar le congregassion. Paolo e Barnabè i ga barufà, e cada un l’è ndato par un posto difarente. (Ati 15:37-39) Dopo de un tempo, Paolo, Barnabè e Marco i ga fato la pace. Paolo anca el ga lodà Barnabè e Marco nele so carte. (1 Cor. 9:6; Col. 4:10) Alora, se ghemo qualche problema con un fradel, ne ocore suito ndar parlar con lu e sforsarse par veder le so bele qualità. Cossita, ghen sarà pace e union nela congregassion. w22.08 p. 23 §§ 10, 11

Tuti noantri femo sforso par far quel che Geovà el dise che l’è giusto. Ma, invesse de giulgar quel che i altri i fà de acordo con quel che pensemo che l’è giusto, ghemo de ricordarse che l’è Geovà “el Giuis de tuta la tera”. (Gén. 18:25) Geovà no’l ne ga dato la libertà de giulgar i altri, e no’l vol che lo femo. Varda el esémpio de Giusepe. Lu no’l ga giulgà i altri, gnanca quei che i lo ga tratà mal. Par esémpio, i so fradei i lo ga vendesto come schiavo e i ga dito al so pare, Giacò, che Giusepe l’era morto. Dopo de arquanti ani, lu e so fradei i se ga catà nantra volta. Adesso, Giusepe el gavea autorità e el podaria vingarse de lori e castigarli. Anca se i so fradei i se gavesse ciamà grami, lori i gavea paura de quel che Giusepe el podaria farghe. Ma lu el ga dito a lori che no i gavesse paura parché sol Dio el podaria giulgarli. (Gén. 37:18-20, 27, 28, 31-35; 50:15-21) Alora, Giusepe el capia che sol Dio el pol giulgar i altri. w22.08 p. 30 §§ 18, 19

Quando un servo de Geovà el ghe domanda aiuto, Dio el pol doperar i ansiani e altri servi fedeli come “una fonte de grando consolo”. (Col. 4:11) Alora, no vol mia dir se te sì ansiano, servo ministerial, pioniero o predicador, Geovà el pol doperarte par giutar i fradei. Cossita, tuti fradei, sorele, gióveni e veci i pol giutar i altri quando vien fora una bruta malatia, una desgràssia o perseghission. Restemo pròpio contenti de saver che Geovà el ne dopera par giutar i nostri fradei! Pol esser che no semo mia boni de giutar i altri parché qualchedun dela nostra fameia l’è malà o parché ghemo pochi soldi. Anca cossita, Geovà el resta contento quando femo quel che podemo par giutar i nostri fradei. — Pro. 19:17. w22.12 p. 22 §§ 1, 2

Se amemo a Geovà e ai fradei saremo persone de fidarse. Gesù el ga dito che noantri ghemo de amar a Geovà e ale persone. (Mat. 22:37-39) Alora, se amemo a Geovà, volaremo far compagno a lu e esser persone de fidarse. E se amemo i nostri fradei e sorele, no ndaremo parlar in volta robe soe parché podarìssino disgustarli o farli sentirse in vergogna. Noantri ghemo de esser ùmili par esser persone de fidarse. Un servo de Geovà che l’è ùmile no’l ndarà sprosiarse de esser el primo a contar qualcossa ai altri. (Fil. 2:3) Lu no’l va far i altri capir che el sa de robe tanto importante, ma che no’l pol contarle a nissuni. El servo de Geovà che l’è ùmile gnanca no’l ndarà parlar in volta quel che el pensa sora qualcossa che no la ze de acordo cola Bìblia o cole publicassion. w22.09 p. 12 §§ 12, 13

Un àngelo el ga dito a Daniel che ‘nel tempo del fin ghen saria tanto saver dela verità’. (Dan. 12:9; 2 Tim. 3:1-5) Questo volea dir che i servi de Dio i ndaria capir meio le professie del libro de Daniel. Ma, el àngelo anca el ga dito che ‘i rugni i faria brute robe e no i saria boni de capir gnente’. (Dan. 12:10) Adesso l’è la ora de mostrar che no semo come i rugni. (Mal. 3:16-18) Geovà l’è drio scòlier quei che i ga tanto valor par lu. E noantri volemo esser intrà de questi. Semo drio veder tante bele robe suceder. Ma suito vedaremo robe de maraveiarse. Par esémpio, Geovà el ndarà finir fora con tute le robe rugne che ghen’è e el farà quel che el ga prometesto a Daniel: ‘Nel fin dei giorni te ndarè levar su par ricever la to parte.’ (Dan. 12:13) Sicuro che semo tanto premosi de veder la ressuression de quei dela nostra fameia, amighi e fin de Daniel. Alora, sfòrsate par gaver el to nome scrito nel libro dela vita par sempre! w22.09 p. 24 § 17; p. 25 §§ 19, 20

Ezechiel el ga bio tanto coraio dopo che Geovà el ga dito: “Mi son drio mandarte.” (Eze. 2:3, 4) Sicuro che lu el se ga ricordà che Dio el gavea dito queste parole anca a Isaia e a Moisè quando li ga scoliesti par esser profeti. (Éso. 3:10; Isa. 6:8) Come so pare de Ezechiel l’era un sasserdote, fursi lu el ghe ga insegnà che Geovà el ga sempre giutà questi profeti a dàrghene fora cole so dificoltà. Lu el savea che Dio el gavea dito a Isache, Giacò e Geremia: ‘Mi son con ti.’ (Gén. 26:24; 28:15; Ger. 1:8) Geovà anca lo ga assà sicuro che el ndaria giutarlo e che lo gavea mandà parché el ghe ga dito due volte: “Mi son drio mandarte.” Nel so libro, Ezechiel el ga scrito tante volte: ‘Geovà el ga parlà con mi’ e ‘Geovà el ga parlà con mi nantra volta.’ (Eze. 3:16; 6:1) Par quela, lu el savea che Dio el ndaria giutarlo. w22.11 p. 2 § 3

Par causa del pecato de Adon e Eva, tute le persone le more. Ma, Geovà no’l ga mia cambià quel che el gavea in mente par noantri. (Isa. 55:11) Lu ancora el vol che vivemo par sempre. Varda quel che Geovà el ga dito e el ga fato par darne questa bela speransa. Geovà el ga prometesto che i morti i sarà ressussitadi e i podarà viver par sempre. (Ati 24:15; Tito 1:1, 2) Giò, che l’era un servo fedele de Dio, l’era sicuro che Geovà l’è premoso de ressussitar quei che i ze morti. (Giò 14:14, 15) Anca el profeta Daniel el savea che le persone le podaria esser ressussitade par viver par sempre. (Sal. 37:29; Dan. 12:2, 13.) I giudei dei giorni de Gesù i savea che Geovà el pol dar la vita eterna ai so servi fedeli. (Luc. 10:25; 18:18) Anca Gesù el ga parlà diverse volte sora questa promessa, e lu l’è stà ressussità par so Pare. — Mat. 19:29; 22:31, 32; Luc. 18:30; Gio. 11:25. w22.12 p. 4, 5 §§ 8, 9

Geovà el ne convida a rivarse darente de lu. (Tia. 4:8) Lu el vol esser nostro Dio, nostro Pare e nostro Amigo. Geovà anca el risponde ale nostre orassion e el ne giuta quando tribolemo. Lu el dopera la so organisassion par insegnarne e par protegerne. Noantri podemo rivarse darente de Geovà quando preghemo e quando ledemo la Bìblia e ghe pensemo sora. Se femo questo, gavaremo cada volta de pi amor par Geovà e saremo grati a lu. Cossita, gavaremo ancora pi voia de dar a Geovà quel che lu el mèrita, che l’è la nostra obediensa e la nostra adorassion. (Apo. 4:11) De pi che cognossemo a Geovà, pi confiansa gavaremo in lu e nela organisassion che lu el dopera par giutarne. El Diaol el proa pin pianeto far pi fiaca la nostra fede in Geovà e nela so organisassion. Ma podemo esser boni de scampar dele so tràpole. Se la nostra fede e la nostra confiansa in Geovà le ze forte, no ndaremo mai abandonar a Geovà e ala so organisassion. — Sal. 31:13, 14. w22.11 p. 14 §§ 1-3

Tanti dissìpoli de Gesù i ga riscià la so libertà o fin la so vita par causa del so amor a Geovà, la Pi Granda Autorità. Questi servi de Dio i ga seità leai compagno ai tre ebrei. Quando lori tre i ze stati metesti nte un forno che brusea, Geovà li ga salvadi parché i ga seità leai a lu. Quel che Davi el ga scrito ne fà ricordar che l’è importante esser fedeli a Geovà. Lu el ga dito che ‘Geovà el ndarà giulgar tute le persone’ e el ga domandà che ‘Geovà lo giulghesse de acordo con quel che l’è giusto e cola so lealtà’. Lu anca el ga scrito che, se ‘el fesse quel che l’è giusto e el fusse leal, el gavaria protession’. (Sal. 25:21) Alora, la meio roba che podemo far nela nostra vita l’è seitar fedeli a Geovà. Se femo cossita, podemo dir compagno el salmista che el ga scrito: “Felici i ze quei che i seita leai e che i obedisse ale lege de Geovà.” — Sal. 119:1. w22.10 p. 17 §§ 18, 19

De tute le robe che ga sucedesto nela so vita, sicuro che Giò no’l se ga mai desmentegà de quando Geovà el ga parlà con lu. Dio el ghe ga dito de vardar le bele robe che el gavea creà. Cossita, Giò l’è stà ancora pi sicuro che Geovà el ga tanta sabedoria e che l’è bon de tender dei so servi. Par esémpio, lu el ga capio che, cossita come Geovà el tende dele bèstie, el ndaria tender anca de lu. (Giò 38:39-41; 39:1, 5, 13-16) Alora, Giò l’è stà bon de imparar sora le qualità de Geovà quando el ga vardà la creassion. Anca noantri podemo imparar de pi sora Geovà quando vardemo quel che lu el ga creà. Ma pol esser che no sìpia tanto fàcile farlo. Parché? Parché se te sì de star nte una cità, fursi no ghen’è tante robe dela naturesa intorno a ti. E anca se te sì de star in colònia, pol esser che te par che no te ghè mia tempo de studiar la creassion. Ma l’è importante sforsarse par vardar le robe che Geovà el ga creà. w23.03 p. 15 §§ 1, 2

Gesù el ga dito che sucederia grandi teremoti e altre desgràssie vanti del fin. (Luc. 21:11) Lu anca el ga dito che le persone le ndaria far robe cada volta pi brute. (Mat. 24:12) E Gesù no’l ga mai dito che le desgràssie sol le ndaria suceder a quei che Dio el ga abandonà. Tanti servi de Geovà ancoi i sofre par causa dele desgràssie. (Isa. 57:1; 2 Cor. 11:25) Anca cossita, Geovà li giuta a restar tranquili e a gaver pace. Sarà pi fàcile restar calmi quando sucede una desgràssia se se pareciemo prima. Ma sarà che far questo mostra che no ghemo fede in Geovà? Sicuro che nò! Se se pareciemo par una desgràssia, mostremo che se fidemo pròpio che Dio el pol tender de noantri. Parché? Parché la Bìblia la dise che ghemo de pareciarse. w22.12 p. 18 §§ 9, 10

Intanto che Giusepe l’era in preson, Geovà lo ga giutà a spiegar quel che le persone le se insognea. Geovà el ga fato che Faraò el se insognesse due volte. Alora, Faraò el ga mandà ciamar Giusepe e l’è restà maraveià coi consili che lu el ghe ga dato. Lu el ga visto che Giusepe el gavea el aiuto de Geovà. Par quela, Faraò lo ga scoliesto par tender de tuto el magnar che ghen’era nel Egito. (Gén. 41:38, 41-44) Un tempo dopo, ga mancà magnar nela tera del Egito e in Canaan, che l’era la tera ndove stea la fameia de Giusepe. Cossita, Giusepe l’è stà bon de giutar a tuti dela so fameia, de ndove vegnaria el Messia. Sicuro che l’è stà Geovà che el ga fato tute queste robe suceder parché la era la so volontà. I fradei de Giusepe i ga proà farghe mal, ma ancora cossita, Geovà lo ga giutà e el ga fato che tuti i laori de Giusepe i ndesse ben. w23.01 p. 17 §§ 11, 12

Ghemo de star atenti a tuto quel che pol rovinar la nostra amicìssia con Geovà e sforsarse par no assar che questo suceda. Se femo cossita, seitaremo nel amor de Dio. (Pro. 22:3; Giuda 20, 21) El apòstolo Paolo el ga dito ai fradei de Èfeso che lori i gavea de star atenti a cossa che i era drio far. Lu el ga dito: “Sté ben atenti par no far come i stùpidi, ma come quei che i ga sabedoria.” (Efe. 5:15, 16) Noantri podemo meter in pràtica questo consìlio se proemo “capir quala che la ze la volontà de Geovà”. (Efe. 5:17) Cossita, anca se Sàtana el proa rovinar la nostra amicìssia con Geovà, noantri saremo boni protegerla. Par quela, sempre che ndemo far una dessision ghemo de proar capir quala che la ze “la volontà de Geovà”. Se noantri se sforsemo par capir e ‘pensar compagno a Cristo’, saremo boni de far la meio dessision anca se no ghen’è una lege che ne dise cossa far. Ma come che podemo capir cossa che Geovà el vol? Studiar la Bìblia e pensarghe sora. — 1 Cor. 2:14-16. w23.02 p. 16, 17 §§ 7-9

Metemo dir che te toca ndar de star in nantra casa. Sicuro che prima de ndar de star lì, te ndarè netarla tanto ben. Ma cossa che ndaria suceder se no te la netessi mai pi? In poco tempo, la casa la restaria sporca. Alora, te toca seitar a netarla se te vol che la sìpia sempre bela. Anca noantri ghemo de seitar sforsarse se volemo che quel che pensemo e quel che femo asse Geovà contento. Vanti de esser batesadi, ne ga tocà cambiar tanto par fermarse de pensar e far quel che l’è sbalià. (2 Cor. 7:1) Ma anca dopo del batésimo, ghemo de far quel che Paolo el ga dito e ‘seitar a far nova la nostra maniera de pensar’. (Efe. 4:23) Le robe sbaliade del mondo le pol suito influensar el nostro cuor e la nostra mente. Par quela, ghemo de sempre veder se quel che pensemo, volemo e femo l’è drio assar Geovà contento. w23.01 p. 8 §§ 1, 2

Noantri semo sicuri che Gesù el ghe dea tanto valor ala Parola de Dio. Parché che podemo dirlo? Parché lu l’era sempre drio parlar dele Scriture. Par esémpio, lu el ga fato cossita pena dopo de esser batesà e un poco vanti de morir. (Deu. 8:3; Sal. 31:5; Luc. 4:4; 23:46) E quando Gesù l’è stà batesà e untà con spìrito santo, lu el se ga ricordà de tuto quel che ga sucedesto quando l’era nel cielo. Alora, nei tre ani e meso che el ga predicà, Gesù el ga ledesto e el ga spiegà le Scriture tante volte. Sicuro che le persone le restea maraveiade de scoltar quel che Gesù ghe insegnea. (Mat. 5:17, 18, 21, 22, 27, 28; Luc. 4:16-20) Vanti de scominsiar a predicar, Gesù el ga ledesto e el ga scoltà la Parola de Dio tante volte. Sicuro che lu el scoltea Giusepe e Maria parlar dele Scriture casa. (Deu. 6:6, 7) Gesù anca el ndea tuti i sabi nele sinagoghe cola so fameia par scoltar le Scriture. (Luc. 4:16) Gesù el amea le robe che el imparea dele Scriture e le metea in pràtica. w23.02 p. 8 §§ 1, 2

Ghemo tante rason par amar a Geovà. Par esémpio, la vita e “tuti i presenti boni e perfeti” i vien de Geovà. (Sal. 36:9; Tia. 1:17) Geovà l’è generoso e el ne ama tanto. Alora, tuto quel che te ghè de bon l’è stà lu che el te ga dato. El sacrifìssio de Gesù l’è un bel presente de Geovà e l’è la rason pi importante che ghemo par amarlo. Come cossita? Pensa come l’è granda la amicìssia intrà Geovà e Gesù. Lori i ze restadi bilioni de ani insieme. (Pro. 8:22, 23, 30) E Gesù el ga dito che ‘el ama el Pare’ e che ‘el Pare lo ama’. (Gio. 10:17; 14:31) Alora, imagina come che l’è stà fadiga par Geovà veder el sofrimento e la morte de so caro Fiol. Seto parché che Geovà el ga assà questo suceder? Parché lu el ama tanto a tute le persone e anca a ti. Par quela, lu el volea che tuti i gavesse la speransa de viver par sempre. — Gio. 3:16; Gàl. 2:20. w23.03 p. 4, 5 §§ 11-13

No ghemo mai de ndarghe drio a quel che i apòstati i dise. Gesù el ga lodà arquanti fradei de Tiatira parché lori no i ze ndati drio a quel che Sàtana el insegna e lu li ga incoraià a seitar a creder in quel che l’è vero. (Apo. 2:24-26) Ma Gesù el ga dito che arquanti fradei de Pèrgamo i era drio far un bruto sbàlio parché i era drio insegnar robe che podaria finir cola union dela congregassion. (Apo. 2:14-16) Par quela che Gesù el ga dito che i fradei che i ndea drio a questi apòstati i gavea de ciamarse grami. Cossa che imparemo? No ghemo mai de ndar drio a quel che i apòstati i dise. Ghemo de star pròpio atenti parché lori i fà finta de creder nela Bìblia, ma no i fà quel che la dise. (2 Tim. 3:5) Alora, ghemo de studiar tanto la Bìblia par esser boni de mai ndar drio a quel che i apòstati i dise. (2 Tim. 3:14-17; Giuda 3, 4) L’è tanto importante adorar a Geovà dela maniera giusta. Se semo drio far qualcossa sbaliada, ne ocore suito fermarse de farla par assar Geovà contento. — Apo. 2:5, 16; 3:3, 16. w22.05 p. 4 § 9; p. 5 § 11