Agosto

La Bìblia la dise che Geovà el ga un “libro de ricordassion”. In questo libro, ghen’è el nome dele persone che, par meso de quel che le parla, le mostra che le rispeta e le pensa sora el so nome. Parché che Geovà el ga el nome de queste persone nel so libro? Parché quel che le parla el mostra cossa le ga rento el so cuor. Gesù el ga dito che la boca la parla quel che ghen’è nel cuor. (Mat. 12:34) Geovà el vol tanto che quei che i lo ama i possa viver felice par sempre qua nela Tera. Geovà sol ghe piaserà dela nostra adorassion se parlemo quel che l’è bon e con bontà. (Tia. 1:26) Arquanti che no i ama a Geovà i parla de una maniera cativa, sensa bontà e con orgòlio. (2 Tim. 3:1-5) Noantri no volemo far come queste persone. Pitosto, volemo sforsarse par far e parlar quel che ghe piase a Geovà. Ma Geovà no’l resta mia contento se doperemo bele parole quando semo nela predicassion o coi fradei, ma no femo cossita casa. — 1 Pie. 3:7. w22.04 p. 5 §§ 4, 5

Dio el ndarà meter nel cuor dela bèstia cativa e dela bèstia de diese corni la voia de finir fora con Babilònia, la Granda. Alora, Geovà el ndarà far che le nassion le dopere la bèstia de color scarlate, o sia, le Nassion Unide, par finir fora cole religion false. (Apo. 18:21-24) Cossa che ghemo de far? Ghemo de adorar a Dio dela maniera giusta e pura. (Tia. 1:27) Alora no volemo mai ndarghe drio a quel che le religion false le insegna, le so selebrassion, quel che le fà che vien dei demoni o qualche altre robe sbaliade. Ghemo anca de dir che le persone le vegna fora de Babilònia, la Granda, par no esser finide fora insieme con ela. — Apo. 18:4. w22.05 p. 14 §§ 17, 18

Se te sì pare o mare, proa sempre parlar ai to fioi sora Geovà e sora tute le robe bone che el ga belche fato par ti. (Deu. 6:6, 7) L’è ancora pi importante farlo se to omo o to dona no’l serve mia a Geovà e no te pol mia sempre studiar la Bìblia coi to fioi. L’era questo che sucedea con una sorela de nome Christine. Ela la ga dito: “L’era poche volte che mi podea parlar sora Geovà ai me fioi.” Le mare le ga anca de parlar robe bone sora la organisassion de Geovà e sora i fradei. Alora, no stà mia parlar mal dei ansiani. Ricòrdate che quel che te parli ai to fioi ndarà giutarli a domandar el aiuto dei ansiani quando ghe ocore, o nò. Proa anca giutar la to fameia a viver in pace. Sfòrsate par mostrar al to omo e ai to fioi che te li ami. Mostra rispeto e bontà al to omo e insegna i to fioi a far compagno. Cossita, ghen sarà pace nela vostra fameia e sarà pi fàcile insegnar sora Geovà ai vostri fioi. — Tia. 3:18. w22.04 p. 18 §§ 10, 11

Quel che Gesù el ga parlà ala congregassion de Èfeso mostra che lori i seitea a servir a Geovà con perseveransa anca se i gavesse tante dificoltà. Ma no i gavea pi el amor par Geovà che i gavea nel scomìnsio. Alora, lori i gavea de tornar a gaverlo. Sol cossita Geovà el restaria contento cola adorassion che i dea a lu. Cossa che imparemo? Ghemo de perseverar parché amemo tanto a Geovà. Geovà el varda nò sol quel che femo, ma anca parché che lo femo. Geovà el vol che lo adoremo parché lo amemo tanto e parché demo valor a tuto quel che lu el fà par noantri. Se lo servimo cossita, lo femo contento. (Pro. 16:2; Mar. 12:29, 30) Ghemo de seitar a far el nostro meio a Geovà. I fradei dela congregassion in Sardes i gavea belche fato tanto nel laoro a Geovà, ma no i era pi drio farlo. Par quela che Gesù el ga dito che lori i gavea de desmissiarse. (Apo. 3:1-3) Anca che Geovà no’l ndarà mai desmentegarse de quel che ghemo belche fato a lu, no ghemo de assar de far el nostro meio anca adesso. — Ebr. 6:10. w22.05 p. 3 §§ 6, 7

Salomon el ga dito che el laoro pol assarne contenti e che el laoro l’è un ‘presente de Dio’. (Ecl. 5:18, 19) E lu el savea de questo parché lu l’era un bravo laorador. Par esémpio, lu el ga fato su case, cità, el ga piantà vignai, giardini e el ga fato tante altre robe. (1 Rè 9:19; Ecl. 2:4-6) L’è vera che Salomon l’è restà contento con quel che lu l’è stà bon de far, ma lu el savea che el laoro no l’era la roba pi importante dela vita. Par quela che lu el ga laorà tanto a Geovà. Par esémpio, lu el ga laorà sete ani par far su el témpio par Geovà. (1 Rè 6:38; 9:1) Dopo de tuto quel che el ga fato, lu el ga capio che la roba pi importante la era servir a Geovà. Salomon el ga dito: “Dopo de scoltar tuto, questa la ze la conclusion: temi el vero Dio e obedissi ai so comandamenti, parché questa la ze tuta la obrigassion del omo.” — Ecl. 12:13. w22.05 p. 22 § 8

La Bìblia la parla de arquante persone che Geovà el ga perdonà. Fursi la prima persona che te te ricordi la ze el rè Manassè. Lu l’è stà un rè tanto rugno e el ga fato bruti pecati. Par esémpio, lu el ga adorà dèi falsi e el ga incoraià anca el pòpolo a farlo. Lu anca el ga dato i so fioi come sacrifìssio a dèi falsi e el ga metesto una imàgine rento el témpio de Geovà. La Bìblia la dise che Manassè el ga ofendesto a Geovà parché el ga fato tante robe sbaliade. (2 Cró. 33:2-7) Ma come Manassè el se ga ciamà gramo, Geovà lo ga perdonà. (2 Cró. 33:12, 13) Fursi nantra persona che te te ricordi la ze el rè Davi. Lu el ga fato bruti pecati contra Geovà. Par esémpio, lu el ga fato imoralità sessual cola dona de nantro omo e dopo el ga mandà coparlo. Ma quando Davi el ga capio che el gavea sbalià e el se ga ciamà gramo, Geovà lo ga perdonà. (2 Sam. 12:9, 10, 13, 14) I esempi de Manassè e Davi i mostra che Geovà el vol tanto perdonarne. w22.06 p. 3 § 7

Pol esser fadiga seitar a gaver una forte speransa parché fursi restemo stufi de spetar che Geovà el fae quel che el ga prometesto. Ma ghemo de ricordarse che tanto tempo par noantri l’è poco par Geovà, parché lu el ga sempre vivesto e sempre el ndarà viver. (2 Pie. 3:8, 9) E ghemo anca de ricordarse che lu el farà quel che el ga prometesto dela meio maniera, ma che fursi no sarà come noantri volemo. Alora, cossa pol giutarne a seitar a gaver una speransa forte par el futuro? (Tia. 5:7) Ne ocore gaver una forte fede che Geovà “el ricompensa quei che i fà sforso par ndar in serca de lu”. (Ebr. 11:1, 6) Alora, se ghemo una forte fede in Geovà, saremo sicuri che lu el ndarà far quel che el ga prometesto. Se seitemo a far cada volta pi forte la nostra amicìssia con lu, anca la nostra speransa la sarà cada volta pi forte. Par gaver una forte speransa ghemo de pregar a Geovà e leder la Bìblia. Anca che no podemo veder a Geovà, podemo esser so amighi. Noantri parlemo con Dio quando preghemo a lu, e lu el ne scolta. — Ger. 29:11, 12. w22.10 p. 26, 27 §§ 11-13

Proa imaginar Giò sentà do nele sendre con tanto dolor in tuto el corpo. (Giò 2:8) Quei òmini che i fea finta de esser so amighi i seitea a dirghe che lu no l’era una bona persona e che quel che lu el gavea fato l’era sensa valor. Sicuro che quel che Giò l’era drio infrontar l’era tanto fadiga de portar avanti. E lu el gavea ancora de dàrghene fora col sofrimento par via dela morte dei so cari fioi. Nel scomìnsio, Giò el ga sol scoltà quei tre òmini. (Giò 2:13) Pol esser che quei òmini i gàpia pensà che Giò el gavea tasesto parché l’era drio abandonar el so Creador. Ma lori i era sbaliadi parché Giò el ghe ga dito che el ‘seitaria leal fin morir!’ (Giò 27:5) Cossa che lo ga giutà a gaver forsa e coraio anca se l’era drio sofrir tanto? Seitar a fidarse che Geovà el ndaria finir fora col so sofrimento. Lu el savea che anca se el morisse, Geovà el ndaria ressussitarlo. — Giò 14:13-15. w22.06 p. 22 § 9

La orassion la ze un grando presente che el Creador del cielo e dela Tera el ne ga dato. L’è un bel presente parché podemo parlar a Geovà quel che pensemo e sentimo, in qualche léngua e in qualche ora. Noantri podemo esser sicuri che Geovà el ndarà scoltarne anca se semo nel leto de un ospedal o in preson. Sicuro che ghe demo tanto valor a questo presente. El Rè Davi el ghe piasea tanto de pregar a Geovà. Lu el ga cantà che el volea che le so ‘orassion le fusse come un insenso parecià a Geovà’. (Sal. 141:1, 2) Nei giorni de Davi, i sasserdoti i pareciea tanto ben el insenso sacro che l’era doperà nel témpio. (Éso. 30:34, 35) Par via de questo, Davi el ga capio che el gavaria de scòlier ben quel che el ndaria parlar a Geovà nele so orassion. E anca noantri volemo far orassion che assa Geovà contento. w22.07 p. 20 §§ 1, 2; p. 21 § 4

La vingansa la ze de Geovà. Geovà no’l assa che se vinghemo de una persona che la ga fato qualcossa contra noantri. (Rom. 12:20, 21) Noantri no semo boni de giulgar con giustìssia, parché no savemo de tuto compagno Geovà. (Ebr. 4:13) E quel che sentimo pol anca intrigarne de giulgar dela maniera giusta. Par quela che Tiago el ga dito che, quando una persona la resta inrabiada, no la ze bona de far giustìssia come Dio. (Tia. 1:20) Invesse, Geovà l’è sempre bon de giulgar con giustìssia. Quando perdonemo mostremo che se fidemo che Geovà el ndarà far giustìssia. Se assemo che Geovà el giulghe, mostremo che se fidemo che lu el pol finir fora coi problemi che ghemo par via dei nostri sbali e dei altri. In Paradiso, i bruti sentimenti no i sarà pi ricordadi e gnanca i tornarà al cuor. — Isa. 65:17. w22.06 p. 10, 11 §§ 11, 12

La perseghission e le dificoltà le mostra che semo drio servir a Geovà dela maniera giusta. (Mat. 5:11, 12) Ghemo de ricordarse che el Diaol el dopera persone par vegnerne contra. Ma no ne ocore gaver paura del Diaol parché Gesù l’è tanto pi poderoso che lu e l’è drio tenderne. Cossita, semo sicuri che le bone notìssie le sarà predicade in tute le nassion. Podaria anca esser fadiga predicar le bone notìssie parché ghen’è tante léngue nel mondo. Anca cossita, Gesù el ga dito che le bone notìssie le saria predicade a tute le nassion. (Apo. 14:6, 7) Vedemo che el laoro de predicassion l’è fato in tanti paesi e léngue difarente. Par esémpio, persone in tuto el mondo le pol ndar rento el nostro site e catar publicassion in de pi de mila léngue. El libro Te pol viver felice par sempre!, che doperemo par insegnar la Bìblia ale persone, l’è drio esser fato in de pi de 700 léngue! w22.07 p. 9 §§ 6, 7

Quando Gesù el vedea le persone sofrir, lore le ghe fea tanto pecà. El apòstolo Mateo el ga dito: “Quando el vedea tuta quela gente, ghe fea pecà, parché i era maltratadi e butadi de una banda al’altra come piégore sensa pastor.” (Mat. 9:36) E Geovà el sente la medèsima roba. Varda quel che Gesù el ga dito: “La voia del me Pare, che l’è nel cielo, la ze che gnanca un de questi pìcoli i se perde.” (Mat. 18:14) Sicuro che restemo tanto contenti de saver che Geovà el se preocupa con noantri. Cossita, quando cognossemo de pi a Gesù, semo boni de amar cada volta de pi a Geovà. Ghen’è nantra roba che pol giutar un gióveno a deventar un servo de Geovà ancora pi bravo. Cossa? Star insieme con bravi fradei dela congregassion. Se te sì un gióveno, stà atento come che questi fradei i ze contenti e che no i se ga mai ciamà grami de servir a Geovà. Te pol anca domandarghe cossa che ga belche sucedesto nela so vita. Se te ghè de dessider una roba importante nela to vita, te pol domandarghe consili. La Bìblia la dise che, quando una persona la domanda consili ai altri, le robe le va ben nela so vita. w22.08 p. 3 §§ 6, 7

Tuti noantri ndaremo infrontar dificoltà. Ma, no ne ocore sentirse noantri soli. Geovà l’è come un Pare che el ga tanto amor, parché el vede tuto quel che semo drio infrontar, l’è dela nostra banda, el scolta le nostre orassion e el vol tanto giutarne. (Isa. 43:2) Podemo esser sicuri che saremo boni de infrontar tute le dificoltà parché Geovà el ne giuta par meso dela Bìblia, dele orassion, dele publicassion, dei vìdei e dei nostri cari fradei. Sicuro che restemo tanto contenti de saver che Geovà el se preocupa con tuti noantri. Come dise el Salmo 33:21: ‘Geovà el fà el nostro cuor contento.’ Come che podemo mostrar che demo tanto valor a tuto quel che lu el ne dà? Ghemo de sforsarse par obedirlo e far tuto quel che el dise che l’è giusto. Cossita, podemo esser sicuri che lu el ndarà tender de tuti noantri par sempre! w22.08 p. 13 §§ 15, 16

Tanti ancoi no i ze boni de fidarse in nissuni. Pol esser che lori i gàpia rispeto par polìtichi, sientisti e altre persone importante. Ancora cossita, lori no i sa se queste persone le ze pròpio de fidarse. E tanti lìderi religiosi i dise che i ghe va drio a Cristo e ala Bìblia, ma i fà tante robe sbaliade. Par quela che ancoi tanti no i se fida nela Bìblia. Noantri savemo che Geovà l’è el ‘Dio dela verità’ e che sempre el vol quel che l’è meio par noantri. (Sal. 31:5; Isa. 48:17) Alora, semo sicuri che podemo fidarse nela Bìblia. E semo de acordo con quel che un studioso el ga spiegà. Lu el ga dito: “Tuto quel che Dio el ga dito ndarà pròpio suceder. Lu mai el ga dito una busia. El pòpolo de Dio el se fida in lu parché tuto quel che lu el dise l’è vera.” w23.01 p. 2 §§ 1, 2

Noantri anca incoraiemo i nostri fradei quando li giutemo a gaver una fede pi forte in Geovà. Savemo che ghen’è tante robe che pol far la nostra fede restar pi fiaca. Par esémpio, pol esser che i altri i ghe dise su a arquanti dei nostri fradei. Pol esser che altri fradei i ze drio infrontar arquanti problemi de salute o i fà fadiga perdonar qualchedun che li ga disgustà. E altri i ze drio spetar el fin rivar fà tanto tempo. Arquanti fradei del passà anca i ga infrontà queste dificoltà. El apòstolo Paolo el ga doperà le Scriture par far pi forte la fede dei fradei. Par esémpio, arquante fameie dei fradei che i era giudei le disea che l’era giusto ndar drio al giudaismo invesse de a Cristo. Questi fradei fursi no i savea cossa far, ma la carta de Paolo ai ebrei li ga incoraià tanto. (Ebr. 1:5, 6; 2:2, 3; 9:24, 25) Lori i podea doperar quel che Paolo el gavea scrito par darghe una risposta a quei che ghe vegnea contra. w22.08 p. 23, 24 §§ 12-14

Ancoi le persone le ghe fà fadiga fidarse una nel’altra. Tanti no i ze boni de fidarse nei so amighi, visigni e gnanca nela so fameia. Dele volte, lori no i se fida nei altri parché i vede che polìtichi, lìderi religiosi e altre persone le fà tante robe sbaliade. Ma noantri belche saveino che saria cossita. La Bìblia la dise che nei ùltimi giorni tanti ‘no i saria leai, i contaria busie sora i altri e i saria traditori’. Alora, le persone le ze drio far compagno el dio de questo mondo, che no l’è mia de fidarse. (2 Tim. 3:1-4; 2 Cor. 4:4) Noantri semo servi de Geovà, e par quela, savemo che podemo fidarse del tuto in lu. Semo sicuri che lu el ne ama e che no’l ndarà mai abandonarne. (Sal. 9:10) Noantri se fidemo anca in Gesù Cristo, parché lu el ga dato la so vita par noantri. (1 Pie. 3:18) E anca savemo che quel che la Bìblia la dise l’è de fidarse. — 2 Tim. 3:16, 17. w22.09 p. 2 §§ 1, 2

Esser felici no vol dir restar contenti sol quando sucede robe bone. Nte un bel discorso che el ga fato, Gesù el ga dito cossa che vol dir esser felici. Lu el savea che semo stati creadi cola voia de cognosser e adorar a Geovà. Par quela che el ga dito che, quando cognossemo e adoremo a Geovà, semo felici. (Mat. 5:3) Come Geovà l’è el Dio felice, quei che lo adora anca i ze felici. (1 Tim. 1:11) Ma sarà che podemo esser felici anca quando semo drio tribolar? Si! Par esémpio, Gesù el ga dito che quei che i piande par causa dei so problemi o de quel che i ga fato nel passà i pol esser felici e che quando femo quel che l’è giusto, podemo esser felici anca se le persone le ne vien contra o le ne dise su. (Mat. 5:4, 10, 11) Alora, Gesù l’era drio insegnar che saremo felici sol se cognossemo a Geovà e se semo so amighi. — Tia. 4:8. w22.10 p. 6 §§ 1-3

La persona che la ze de fidarse anca la capisse quando la ga de parlar e quando la ga de taser. (Ecl. 3:7) In arquanti paesi, le persone le dise che “parlar l’è come el argento, ma taser l’è come el oro”. Alora, dele volte, l’è meio taser che parlar. Varda el esémpio de un bravo ansiano. Dele volte, lu el ga de giutar i ansiani de altre congregassion a dàrghene fora con bruti problemi. Un ansiano che lo cognosse ben el ga dito: “Lu el se sforsa tanto par mai parlar gnente sora i problemi dele altre congregassion.” Par quela, tuti i rispeta questo ansiano e i se fida de lu, parché lu el sa quando el ga de taser. Ghemo de parlar sempre la verità par esser persone de fidarse. Noantri se fidemo nte una persona che sempre la dise la verità. — Efe. 4:25; Ebr. 13:18. w22.09 p. 12 §§ 14, 15

Arquanti no i vol gaver la vera sabedoria. (Pro. 1:20) Par esémpio, la Bìblia la dise che ghen’è tre grupi de persone cossita: quele che ‘no le sa de gnente’, quele che le ‘tol in giro i altri’ e le ‘stùpide’. (Pro. 1:22-25) El primo grupo l’è de ‘quei che no i sa gnente’, o sia, quei che i crede in tuto che i scolta e l’è ben fàcile imbroiarli. (Pro. 14:15, nota.) Noantri catemo tante persone cossita nela predicassion. Par esémpio, milioni i ze imbroiadi par lìderi religiosi e polìtichi. Arquanti i resta spaventadi de veder che i ze stati imbroiadi. Magari, quei che no i sa gnente, come dise Proverbi 1:22, no i vol cognosser la verità parché no i ga mia voia de imparar quel che la Bìblia la dise o obedirla. (Ger. 5:31) Sicuro che no volemo esser come lori che i pensa che l’è meio no saverghene de gnente! — Pro. 1:32; 27:12. w22.10 p. 19 §§ 5-7

La organisassion de Geovà la ne giuta a saver cossa far par protegerse. Par esémpio, ghemo de mandar el nostro nùmero de telèfono e el nostro indirisso ai ansiani. Se sucede una desgràssia, la organisassion anca la ndarà giutarne a saver come gaver de magnar, ndove ndar de star, come scampar via e come giutar i altri. Se no obedimo mia, podemo risciar la nostra vita e la vita dei ansiani che i ga el laoro de tender de noantri. (Ebr. 13:17) Tanti fradei e sorele ghe ga tocà assar indrio la so casa par causa de una desgràssia o de una guera. Ma lori i proa restar contenti cola so vita adesso e i seita a far el so meio a Geovà. Lori i fà compagno i primi dissìpoli de Gesù, che i ga seità a predicar le bone notìssie anca cola perseghission. (Ati 8:4) Cossita, lori i seita a pensar in quel che el Regno de Geovà el farà invesse de pensar nele dificoltà che i ze drio infrontar. Par quela, lori i ze contenti e i ga pace. w22.12 p. 19 §§ 12, 13

Geovà el dà valor a cada un de noantri. Vanti de mandar i so apòstoli predicar, Gesù li ga giutadi a dàrghene fora cola paura dela perseghission. (Mat. 10:29-31) Lu el ga parlà de pìcoli oseleti che i valea poco gnente e che ghen’era da par tuto in Israel. Lu el ga dito: ‘Gnanca un de questi el va cascar par tera sensa che el vostro Pare el sàpia. Valtri valé de pi che tanti pardai.’ Cossita, Gesù el ga insegnà i so dissìpoli che no ghe ocorea gaver paura dela perseghission parché Geovà el ghe dà valor a cada un dei so servi. Sicuro che i dissìpoli de Gesù i ga bio ancora pi coraio par predicar in tuti posti. Cossa che imparemo? Quando vedemo un pìcolo oseleto, ghemo de ricordarse che Geovà el ghe dà valor a cada un de noantri. Alora, semo boni de infrontar la perseghission con coraio. w23.03 p. 18 §§ 12

Dele volte, infrontemo bruti problemi. Par esémpio, pol esser che la nostra fameia la ne vien contra o restemo sensa laoro. E quando seitemo a tribolar par tanto tempo, podemo sentirse desanimadi e abandonadi. Alora, Sàtana el proa farne pensar che Geovà no’l ne ama e che lu e la so organisassion i ga la colpa de quel che semo drio infrontar. L’è stà una roba come questa che ga sucedesto con arquanti israeliti intanto che i era nel Egito. Nel scomìnsio, lori i credea che Geovà el gavea scoliesto Moisè e Aron par liberarli. (Éso. 4:29-31) Ma quando Faraò li ga fato tribolar de pi, lori i ga dato la colpa a Moisè e a Aron. (Éso. 5:19, 20) Varda che bruta roba! I israeliti i ghe ga dato la colpa ai servi leai de Geovà. Alora, se te sì drio infrontar un problema fa tanto tempo, fìdate in Geovà e domanda el so aiuto. w22.11 p. 15 §§ 5, 6

La vita la vien de Geovà e lu el pol far le persone viver nantra volta. Le ressuression che le ga sucedesto nel passà le prova questo. Par esémpio, lu el ga dato poder al profeta Elia par ressussitar el fiol dela védova de Sarefà. (1 Rè 17:21-23) Un tempo dopo, Geovà el ga dato poder a Eliseo par ressussitar el fiol de una dona de Sunèn. (2 Rè 4:18-20, 34-37) Quando l’era qua nela Tera, anca Gesù el ga ressussità i morti col poder che Dio el ghe gavea dato. (Gio. 11:23-25, 43, 44) Ancoi, Gesù l’è nel cielo, e Dio el ghe ga dato “autorità sora tute le robe, nel cielo e nela tera”. (Mat. 28:18) Par quela, lu el sarà bon de ressussitar tuti quei che i ze morti e darghe la speransa de viver par sempre. — Gio. 5:26-29. w22.12 p. 5 § 10

Le parole del testo de ancoi le ga giutà Ezechiel a capir che le persone no le acetea a Geovà. Cossita, lu el ga capio che, anca se le persone no le volesse scoltar a Geovà, questo no l’era colpa soa. Nantra roba che ga dato forsa a Ezechiel, l’è stà saver che, quel che Geovà el gavea dito ndaria suceder, e le persone le ‘savaria che ghen’era stà un profeta intrà de lore’. (Eze. 2:5; 33:33) Sicuro che, quando Ezechiel el ga savesto de queste robe, lu el ga bio forsa par far el laoro che Geovà el ghe gavea dato. Geovà el ne ga scoliesto par esser so testimònie. (Isa. 43:10) Cossita come Ezechiel, anca noantri predichemo con coraio parché savemo che l’è stà Geovà mandarne e che el ndarà giutarne. Questo l’è un grando onor par noantri. Alora, parché che no ne ocore gaver paura dei nemighi? Parché compagno Geovà el ga dito a Ezechiel, el dise anca a noantri: “No sté mia restar spauradi.” — Isa. 44:8; Eze. 2:6. w22.11 p. 3, 4 §§ 4, 5

Semo contenti che i ansiani e i servi ministeriai i ze persone che podemo fidarse. Questi bravi fradei i ne giuta tanto a seitar a gaver una forte amicìssia con Geovà e ghe demo tanto valor a tuto quel che lori i fà par noantri. Ma cossa che ghemo de far par mostrar che semo persone de fidarse. Nela època del apòstolo Paolo, arquante persone dela congregassion le seitea a petegolar e a parlar dela vita dei altri. (1 Tim. 5:13) L’è vera che amemo i nostri fradei e se preocupemo con lori, ma no ghemo de far come quele persone dela època del apòstolo Paolo. Metemo dir che qualchedun el ne conte una roba che no’l vol che la contemo ai altri. Par esémpio, fursi una sorela la ne parle de una malatia che la ga o de una dificoltà che la ze drio infrontar, e la ne domanda de no contarlo a nissuni. Alora cossa che ghemo de far? Ghemo de mostrarghe rispeto e far quel che la ne ga domandà. w22.09 p. 10 §§ 7, 8

Ghemo de far de pi che sol arquante robe bone. Ne ocore vardar quel che semo par rento e cambiar quel che ne ocore par assar Geovà contento, e ghemo de seitar a farlo. Dopo che deventemo perfeti, saremo boni de contentar a Geovà in tuto quel che femo. Ma par intanto, ghemo de sforsarse par assarlo contento. Nel testo de Romani 12:2, Paolo el ga dito che, par esser boni de far nova la nostra maniera de pensar, ghemo de capir quel che Geovà el vol. Alora, invesse de pensar come le persone del mondo, ghemo de pensar compagno a Geovà e far le nostre dessision de acordo con quel che l’è giusto par lu. w23.01 p. 8, 9 §§ 3, 4

Sarà che Geovà el controla tuto quel che sucede nela nostra vita? Sarà che lu el fà suceder robe brute par dopo farle deventar una roba bona? Nò, no l’è quel che la Bìblia la mostra. (Ecl. 8:9; 9:11) Magari, semo sicuri che quando tribolemo, Geovà l’è atento e el scolta quando ghe domandemo aiuto. (Sal. 34:15; Isa. 59:1) E lu el fà ancora de pi. Geovà el ne giuta a dàrghene fora con tute le dificoltà. Ndemo veder come. Geovà el pol giutarne a infrontar le nostre dificoltà quando el ne dà consolo e coraio pròpio nela ora giusta. (2 Cor. 1:3, 4) Alora, proa sempre ricordarte dele volte che Geovà el te ga dato consolo e coraio, pròpio quando te gavei de bisogno. Dele volte, sol semo boni de veder come Geovà el ne ga giutà dopo che una dificoltà la se finisse. w23.01 p. 17, 18 §§ 13-15

Questa bèstia la ze come quela bèstia de sete teste, ma la ze de color scarlate, o sia, un rosso forte. El libro de Apocalisse el dise che la ze ‘la imàgine dela bèstia cativa’ e el ‘otavo rè’. (Apo. 13:14, 15; 17:3, 8) Gioani el ga dito che questo rè el ndaria vegner, che el saria finio fora, ma che el tornaria. Ma chi l’è questo rè o questa bèstia? La Organisassion dele Nassion Unide che la laora par giutar i governi del mondo. Nel scomìnsio, ela la gavea nome de Liga dele Nassion. Alora, nela Seconda Guera Mondial, la ze stata finida fora. E dopo, la ze vegnesta nantra volta col nome de Nassion Unide. Queste bèstie cative, o governi, le ndaria far che le persone le fusse contra Geovà e contra i so servi. Gioani el ga dito che queste bèstie le ndaria meter insieme i rè de tuta la Tera par la guera del Armagedon, che l’è el grando giorno de Dio. — Apo. 16:13, 14, 16. w22.05 p. 10 §§ 10, 11

Intanto che vegnea grando, Gesù el ga tacà a leder la Parola de Dio lu sol. Podemo ricordarse de quel che ga sucedesto nel témpio, quando lu el gavea sol 12 ani. Tuti quei che i era lì ‘i ze restadi maraveiadi con quel che lu el savea e cole so risposte’. (Luc. 2:46, 47, 52) Quando Gesù l’era qua nela Tera, ghen’era persone come i scribi, farisei e sadussei che i ledea tanto le Scriture, ma no imparea gnente de quel che i ledea. Par quela, Gesù el ga dito cossa che lori i gavaria de far se i volesse imparar tuto quel che i podea dele Scriture. Quel che Gesù el ga dito ne giuta a (1) capir quel che semo drio leder, (2) catar lession pressiose e (3) meter in pràtica quel che imparemo dela Parola de Dio. Cossita, ndaremo cognosser meio la Parola de Dio e amarla cada volta de pi. w23.02 p. 8, 9 §§ 2, 3

El Diaol l’è el nostro nemigo e lu el seita a doperar arquante robe par rovinar la nostra amicìssia con Geovà. (1 Pie. 5:8) Par esémpio, Sàtana el vol che restemo disgustadi coi altri, che volemo sempre de pi e che deventemo invidiosi, disonesti, orgoliosi e rabiosi. (Gàl. 5:19-21) Altri perìcoli che anca ne ocore star atenti i ze robe come far la ciuca, magnar massa, dirghe su ai altri, vardar violensa o pornografia o far finta de voler smorosar qualchedun anca se no ndaremo mia farlo. (Sal. 101:3) Ne ocore far qualcossa presto par cavar via questi pensamenti o sentimenti, parché i ze come una peste che copa tuto quel che ghen’è de bon intorno. (Tia. 1:14, 15) Nantro perìcolo che ghen’è l’è star massa tempo insieme de persone che no le serve mia a Geovà. (Luc. 21:34; 2 Cor. 6:15) Parché? Parché noantri ndaremo pensar e far le robe compagno ale persone che stemo insieme. (1 Cor. 15:33) Cossa che imparemo? Compagno Gesù el ga dito, ghemo de star atenti a quel che semo drio far. Alora, se vedemo che qualcossa pol rovinar la nostra amicìssia con Geovà, ne toca suito scampar via. w23.02 p. 16 § 7; p. 17 §§ 10, 11

To amor par Geovà l’è deventà ancora pi grando intanto che te ghè imparà sora lu. Par quela, ti te vol gaver una amicìssia cada volta pi forte con Dio. E Geovà el vol che te fè contento so cuor e te sìpie so amigo par sempre. (Pro. 23:15, 16) Ti te pol contentarlo par meso de quel che te parli e anca de quel che te fè. Cossita, la to maniera de viver la mostrarà che te ami pròpio a Geovà. Sicuro che viver par contentar a Geovà l’è la meio dessision che te pol far nela vita. Come che ti te pol mostrar che te ami a Geovà? Prima, par meso de una orassion spessial, te fè la to dedicassion, o sia, te prometi a Geovà che te vè viver par far quel che lu el vol. (Sal. 40:8) Dopo, te mostri a tuti la to dessision par meso del batésimo. El batésimo l’è una dessision tanto importante e felice. De lì avanti, no te ndarè pi viver par ti, ma par Geovà. (Rom. 14:8; 1 Pie. 4:1, 2) Questa la ze pròpio una dessision tanto importante. Ma la to vita la deventa ancora meio. w23.03 p. 5, 6 §§ 14, 15