Otobre

Tuti noantri podemo cantar e dar boni comentari nele riunion. Ma par arquanti ghe fà fadiga far queste robe. Anca ti te te senti cossita? Alora varda cossa che ga giutà altri fradei a dàrghene fora con queste dificoltà. Tanti i ga visto che cantar nele riunion li giuta tanto. Noantri cantemo nele riunion par lodar a Geovà. Alora, paréciate compagno te fè cole altre parte dela riunion. Proa cantar i càntichi e veder come che lori i ze de acordo con quel che te ndarè imparar nela riunion. Cossita te ndarè pensar de pi nele parole e nò tanto in come che te sì drio cantar. Far comentari nele riunion pol esser fadiga par arquanti. Cossa che pol giutarte? Sfòrsate de comentar in tute le riunion. Anca ricòrdate che te pol parlar poco e sol quel che l’è pi importante nel paràgrafo. Te pol esser sicuro che Geovà el resta contento con quel che te sì bon de far. w22.04 p. 7, 8 §§ 12-15

La parola “giutar” la ze doperada par parlar de una persona che la va suito salvar a qualchedun. Questo testo el ne giuta a capir che Geovà l’è premoso e che el fà presto par giutar quei che i ze drio sofrir. Alora, se Geovà l’è dela nostra banda, semo boni de seitar contenti anca cole dificoltà. Nel libro de Isaia, ndaremo imparar de che maniere Geovà el ne giuta. Isaia el ga parlà sora Geovà de una maniera pròpio fàcile de capir, e arquante dele so professie le ze drio suceder ancoi. Par esémpio, nel capìtolo 30, Isaia el dopera bele ilustrassion par mostrar come che Geovà el giuta el so pòpolo. Lu el ga scrito che Geovà el ne giuta (1) quando el scolta e el risponde ale nostre orassion, (2) quando el ne insegna cossa ghemo de far, e (3) cole so benedission che ricevemo adesso e che riceveremo nel futuro. w22.11 p. 8 §§ 2, 3

Varda quel che Gesù el ga dito ale congregassion de Smirna e Filadèlfia. Lu el ga dito che i fradei no i gavea de spaurarse quando i nemighi i ghe vegnesse contra, parché Geovà el ndaria benedirli se i seitesse fedeli. (Apo. 3:10) Cossa che imparemo? Che i nemighi i ne vegnerà contra e che ghemo de esser pareciadi. (Mat. 24:9, 13; 2 Cor. 12:10) Apocalisse dise che i nemighi de Dio i vegnaria contra i so servi nel “giorno del Signor”, o sia, nei nostri giorni. (Apo. 1:10) Apocalisse capìtolo 12 dise che dopo che Gesù l’è deventà Rè, lu el ga fato guera contra Sàtana e i so demoni. (Apo. 12:7, 8) E Mighel, o sia, Gesù Cristo, el ga vinsesto la guera e el ga parà via Sàtana e i demoni qua ala Tera. Par quela che vedemo tanto sofrimento e robe brute ancoi. — Apo. 12:9, 12. w22.05 p. 5 §§ 12, 13

Geovà sempre el giulga de maniera giusta. Alora, quando el perdona una persona, lu no’l vede se la ze bela, se la ga soldi, le so abilità o se la ze una persona importante. (1 Sam. 16:7; Tia. 2:1-4) Noantri no podemo dar qualcossa a Geovà par farlo giulgar dela maniera che volemo. E lu no’l fà mai un giulgamento sol de acordo con quel che el sente. (Éso. 34:7) Alora Geovà l’è el meio Giuis che ghen’è parché el sa tuto sora noantri e el capisse quel che semo drio infrontar. (Deu. 32:4) Le Scriture Ebraiche le mostra che la maniera de Geovà perdonar la ze la meio. Parché? Parché sol lu el ga la autorità de perdonar del tuto una persona che la se ga ciamà grama. Un dissionàrio el ga dito che nele Scriture Ebraiche ‘se dopera una parola sol par parlar del perdon che Dio el dà a quei che i se ciama grami’. El dissionàrio anca el ga dito che ‘questa parola mai la ze doperada par parlar del perdon che una persona la dà a nantra, e che le persone no le ze bone de perdonar del tuto come Dio el fà’. w22.06 p. 4 §§ 10, 11

Se te ghè de slevar ti sola i to fioi o se el to omo no’l serve mia a Geovà, ricòrdate che el to bel esémpio pol incoraiar tanto i altri. Fursi te te ghè sforsà tanto par insegnar i to fioi sora Geovà, ma te par che lori no i vol mia imparar sora lu. Alora cossa pol giutarte? Te ghè de ricordarte che ghe mete tempo par insegnar un fiol. La medèsima roba la sucede quando te pianti una semensa. Anca che no te sàpia se la ndarà butar e dar fruti, te seiti a darghe àqua. (Mar. 4:26-29) Fursi te te domandi se quel che te sì drio far par el to fiol l’è pròpio drio giutarlo a amar e a servir a Geovà. L’è vera che no te pol far le scólie nel posto del to fiol, ma se te seiti a farlo te podarè giutarlo a esser un amigo de Geovà. w22.04 p. 20 §§ 16, 17

Quando Salomon el servia a Geovà de tuto el cuor, lu el vedea a lu stesso dela maniera giusta. Par esémpio, quando l’era gióveno, lu el savea che no l’era bon de far arquante robe e el ga domandà el aiuto de Geovà. (1 Rè 3:7-9) Ma dopo de un tempo, Salomon l’è deventà orgolioso e no’l ga pi obedio ai comandamenti de Dio. Par esémpio, una dele lege la disea che i rè de Israel no i gavea de maridarse con tante done. (Deu. 17:17) Salomon no’l ga obedio a questa lege. Lu el ga bio 700 done e 300 concubine! (1 Rè 11:1-3) Fursi Salomon el pensea che no’l gavaria problema. Ma dopo de un tempo, lu el ga sofrio tanto par causa dela scólia che el ga fato. — 1 Rè 11:9-13. w22.05 p. 23 § 12

Tute le persone le ga una scólia tanto importante de far. Lore le ga de dessider se le sarà leai a Geovà, che l’è el Sovrano del Universo, o esser leai a Sàtana, el Diaol. Se le scòlie esser leai a Geovà, lore le ndarà viver par sempre. Ma se le scòlie esser leai a Sàtana, le ndarà morir. (Mat. 25:31-33, 46) Nela granda tribolassion, le persone le sarà giulgade se le podarà seitar a viver o se le sarà finide fora. (Apo. 7:14; 14:9-11; Eze. 9:4, 6.) Se noantri scoliemo esser leai al governo de Geovà, ghemo fato la meio roba. E sicuro che volemo giutar anca i altri a scòlier esser leai a Geovà. Ma ghemo de seitar a far pi forte la nostra voia de esser leai a Geovà. Par quela, ghemo de studiar sora le benedission che i servi de Dio i riceverà. Cossita, saremo boni de giutar i altri a far la meio dessision anca lori. w22.05 p. 15 §§ 1, 2

Una roba che imparemo de quel che ga sucedesto con Giò l’è che ghemo de scoltar a Geovà e nò ai nostri nemighi. Giò el ga scoltà con atension quando Geovà el ga parlà con lu. Geovà el ghe ga dito che el gavea doperà tanto poder par far tuto quel che ghen’è. Geovà anca lo ga assà sicuro che el savea de quel che l’era drio suceder con lu e che l’era bon de tenderlo. Giò el ga rispondesto a Geovà: “Go scoltà parlar de ti, ma adesso te vedo coi me oci.” (Giò 42:5) Con queste parole, Giò el ga mostrà che l’era ùmile e che el ghe dea tanto valor ala bontà de Geovà. Quando el ga dato questa risposta a Geovà, fursi lu l’era sentà do nele sendre, col corpo pien de bruschi e drio sofrir tanto cola morte dei so fioi. Anca cossita, Geovà el ga parlà che lo amea e che l’era tanto contento con lu. (Giò 42:7, 8) Ancoi, tante persone le ne dise su e le ne trata tanto mal. Arquante le dise anca busie sora noantri e sora la organisassion de Geovà. Quel che ga sucedesto con Giò ne insegna che Geovà el se fida che ndaremo seitar leai a lu anca quando infrontemo dificoltà. w22.06 p. 23, 24 §§ 15, 16

Sicuro che tuti i servi de Geovà qua nela Tera e anca i àngeli nel cielo i restarà tanto contenti quando Babilònia e tuti i nemighi de Dio i sarà finidi fora. (Apo. 19:1-3) Ma el libro de Apocalisse el parla de nantra roba tanto importante che ndarà suceder. Cossa zela questa roba? El matrimònio del Piegoreto. L’è vera che tuti i 144 mila i sarà belche nel cielo par far la guera del Armagedon, ma no sarà ancora la ora del matrimònio del Piegoreto. (Apo. 21:1, 2) Alora quando che sarà questo matrimònio? El sarà dopo del Armagedon, quando no ghen sarà pi i nemighi de Dio. (Sal. 45:3, 4, 13-17) Cossa che ndarà suceder nel matrimònio del Piegoreto? El matrimònio del Piegoreto el sarà la union intrà el rè Gesù Cristo e i 144 mila, come che sucede nel matrimònio intrà un omo e una dona. Dopo de questo, Gesù e i 144 mila i governarà la Tera par mila ani. — Apo. 20:6. w22.05 p. 17 §§ 11-13

Gesù el ga dito che, nel tempo del fin, lu el ndaria scòlier un schiavo fedele e prudente par giutar el pòpolo de Dio a capir la Bìblia. (Mat. 24:45) Questo l’è drio suceder ancoi, parché un pìcolo grupo de untadi el dà al pòpolo de Dio e ale altre persone pròpio quel che i ga de bisogno par esser amighi de Dio. Questi òmini no i pensa che i pol comandar i altri. (2 Cor. 1:24) Invesse, lori i sa che l’è Gesù che el ga la autorità sora noantri e che lu l’è el nostro governante. (Isa. 55:4) Del ano 1919, el schiavo fedele e prudente l’è drio far tante publicassion par giutar le persone a capir la Bìblia. Par esémpio, nel ano 1921, lori i ga fato el libro A Harpa de Deus che el ga giutà tanti a imparar le verità pi importante dela Bìblia. Col tempo, anca altre publicassion le ze vegneste fora. Che libro te ga giutà a cognosser e a amar a Geovà? w22.07 p. 10 §§ 9, 10

Geovà l’è la persona pi generosa che ghen’è. Alora, no importa quel che te ghe dè, lu sempre el te darà tanto de pi. (Mar. 10:29, 30) Geovà el te dà la meio vita che te podarissi gaver in questo bruto mondo, e nel futuro, el te darà la vita eterna. Alora, to amor par to caro Pare el deventarà cada volta pi grando e te podarè seitar a servirlo par sempre! L’è stà Geovà che el te ga dato tute le bele robe che te ghè bio fin ancoi. E lu l’è el paron dela tera e del cielo. Ancora cossita, ti te pol dar a Geovà una roba che lu gnancora no’l ga. Cossa? La to lealtà. (Giò 1:8; 41:11; Pro. 27:11) Quando te dedichi la to vita e te te batesi, te sì drio dar a Geovà una roba che lo assa tanto contento. w23.03 p. 6 §§ 16, 17

La voia de far sesso pol esser tanto forte par arquanti gióveni. E fursi le persone le seite a dirghe che i ga de far imoralità sessual. Ma i gióveni i ga de ricordarse che l’è pròpio questo che Sàtana el vol che lori i fae. Se te sì drio infrontar una roba cossita, cossa che pol giutarte a no cascar in questa tràpola? (1 Tes. 4:3, 4) Quando te preghi a Geovà, pàrlaghe tuto quel che te sì drio sentir e domandaghe forsa par seitar leal. (Mat. 6:13) No stà desmentegarte che Geovà el vol giutarte, e nò giulgarte. (Sal. 103:13, 14) No stà proar dàrghene fora coi to problemi ti sol. Pitosto, parla ai to genitori quel che te sì drio infrontar. L’è vera che no l’è mia fàcile parlar con lori sora queste robe, ma l’è pròpio importante farlo. Se te ledi la Bìblia e te ghe pensi sora i so prinsipi, sarà pi fàcile far scólie che le ndarà assar Geovà contento. Cossita, te vederè che no te ocore una règola par tute le robe nela vita, parché te ndarè saver quel che Geovà el pensa. w22.08 p. 5 §§ 10-12

I paroni de fameia i sa che Geovà el speta che lori ghe dae ala so fameia quel che la ga de bisogno par viver. Se te sì un paron de fameia, pol esser che te pensi che no te sì pi bon de dar de magnar ala to fameia, de pagar el afito dela casa e altri dèbiti. E se te ghè perso el to laoro, fursi te ghè paura de no catar nantro. O pol esser che te ghè paura de viver con manco robe e manco soldi. Sàtana el ga belche doperà queste paure par fermar arquanti de servir a Geovà. Sàtana el vol che credemo che Geovà no’l ne ama e che no’l ndarà giutarne a dar quel che la nostra fameia la ga de bisogno par viver. Se credessino in questo, podarìssino fin far qualcossa sbaliada sol par no perder el laoro. w22.06 p. 15 §§ 5, 6

Ghemo imparà che Dio el ga tanta misericòrdia, compassion, passiensa, amor leal e che el ama la giustìssia. (Éso. 34:6; Isa. 61:8) Noantri anca imparemo che Geovà el sofre quando el ne vede tribolar e che l’è premoso de finir fora con tuto el sofrimento. (Ger. 29:11) Sicuro che le verità dela Bìblia le ne fà amar ancora de pi a Geovà. Noantri anca amemo le verità dela Bìblia parché le ne dà speransa par el futuro. E questa speransa la ze tanto importante par noantri. Compagno una àncora la ze bona de tegner una barca nel posto giusto in meso una tempesta, la nostra speransa la ne giuta a restar tranquili e firmi in meso i problemi. Nel testo de ancoi, el apòstolo Paolo l’era drio parlar dela speransa che i untadi i ga de viver nel cielo. Ma la speransa de viver par sempre la ze una àncora anca par quei che i ndarà viver nela Tera. (Gio. 3:16) Sicuro che questa speransa la ne giuta a viver meio belche adesso. w22.08 p. 14, 15 §§ 3-5

Ghemo confiansa nei nostri fradei parché li amemo. In 1 Corinti 13, el apòstolo Paolo el spiega parché el amor el ne giuta a fidarse in tuti i fradei, anca in quei che i ne ga belche disgustà. (1 Cor. 13:4-8) Par esémpio, lu el ga dito che “el amor l’è passiente e bon”. Alora, ghemo de mostrar passiensa coi nostri fradei e tratarli ben, anca quando i fà qualcossa che ne disgusta. Volemo far compagno a Geovà che el porta passiensa con noantri, anca se femo un bruto pecato. Paolo anca el ga dito che ‘el amor no’l resta suito cativo e no’l ghe bada el dano’. (1 Cor. 13:4, 5) Questo vol dir che no ghemo de ‘ofenderse suito’. (Ecl. 7:9) Alora, “no volemo badarghe el dano”, o sia, no volemo seitar a ricordarse dei sbali che i fradei i fà contra noantri. Se proemo veder i nostri fradei compagno Geovà li vede, sarà pi fàcile fidarse in lori. Geovà el ama tuti i nostri fradei e lu no’l seita a pensar nei sbali che i fà, come se li metesse par scrito. Alora, noantri ghemo de far compagno a Geovà. (Sal. 130:3) Pitosto de vardar i difeti dei altri, ghemo de vardar le so qualità. — Mat. 7:1-5. w22.09 p. 3, 4 §§ 6, 7

El libro de Daniel el mostra quando che cada roba la ndarà suceder nel tempo del fin. Par esémpio, Daniel 12:1 dise che Mighel, che l’è Gesù Cristo, l’è drio laorar ‘in favor del pòpolo de Dio’. Questa professia la se ga realisà in 1914 quando Gesù l’è deventà Rè del Regno de Dio. Ma Daniel anca el ga dito che Gesù “el se meteria in pié” nte un tempo de aflission. Questo tempo de aflission l’è la “granda tribolassion”. Gesù el se meterà in pié parché el ndarà proteger i servi de Dio nel fin de questo tempo de aflission, o sia, nel Armagedon. (Mat. 24:21) Questi servi de Dio i ze la “mùcia de gente” che la vien fora dela granda tribolassion. — Apo. 7:9, 14. w22.09 p. 21 §§ 4, 5

Geovà l’è drio scriver nel so libro el nome de quei che i ze leai. Ma, l’è come se lu el gavesse scrito el nome de queste persone col làpis. Questo vol dir che lu el pol tirar via questi nomi del so libro. (Apo. 3:5) Alora, ghemo de far el nostro meio se volemo che el nostro nome el sìpia scrito nel libro dela vita come che con tinta. Cossita, el restarà là par sempre. Par esémpio, quei che i ze stati scoliesti par governar con Gesù nel cielo i ga so nome belche scrito nel libro dela vita. Paolo el ga parlà par quei che i ga ‘laorà insieme a lu’ in Filipo che el nome dei untadi l’era belche scrito nel libro dela vita. (Fil. 4:3) I untadi i ga el so nome scrito in questo libro par sempre quando i riceve el selo, o una aprovassion, sìpia vanti de morir o vanti che scomìnsie la granda tribolassion. — Apo. 7:3. w22.09 p. 14 § 3; p. 15 §§ 5, 6

Noantri ghemo de torse el tempo par leder la Bìblia e pensarghe sora quel che ledemo. Par capir meio, metemo dir che qualchedun el ga fato un magnar che te piase tanto. Ma come no te ghè tanto tempo e te ghè pensieri, te fè presto mandarlo do sensa gòdertelo. Dopo, magari, te te ciami gramo. Se no restemo atenti, la medèsima roba la pol suceder quando ledemo la Bìblia. Alora, dopera ben el to tempo intanto che te la ledi. Par esémpio, imagina le robe che le ga sucedesto, proa sentir la voce dele persone e pensa sora quel che te sì drio leder. Studiar la Bìblia cossita ndarà giutarte a esser pi felice. Gesù el ga scoliesto “el schiavo fedele e prudente” par darne nel tempo giusto quel che ne ocore par esser amighi de Geovà. (Mat. 24:45) Tuto quel che el schiavo fedele e prudente el ne dà vien dela Bìblia e ne giuta a capir la maniera che Geovà el pensa. — 1 Tes. 2:13. w22.10 p. 7, 8 §§ 6-8

La Bìblia la gavea belche dito che nei ùltimi giorni ghen saria tante persone cossita. (2 Pie. 3:3, 4) Lori i tol in giro i altri parché i fà sol quel che i vol lori, invesse de ndarghe drio ala sabedoria de Dio. (Giuda 7, 17, 18) Alora, ghemo de star distante dele persone che le ze sempre drio sbrontolar e parlar mal dei altri. (Sal. 1:1) Parché? Parché se restemo insieme a lore, anca noantri ndaremo scominsiar a sbrontolar sora tuto, compagno a quei che i tol in giro i altri. Cossita, ghemo de star atenti par no sbrontolar e gnanca gaver dubi de quel che Geovà el fà e dele orientassion che ricevemo par meso dela so organisassion. Par quela, no ndaremo mai scoltar gnanca leder gnente che vien dei apòstati. Alora, podemo domandarse: ‘Gonti sempre qualcossa bruta de dir quando vien fora qualche nova orientassion o se una publicassion spiega meio qualcossa? Sonti sempre drio catar fora i sbali de quei che i tende dela congregassion?’ Se femo cossita, ne toca far presto cambiar quel che ne ocore par contentar a Geovà. — Pro. 3:34, 35. w22.10 p. 20 §§ 9, 10

El spìrito de Dio el ga fato che Ezechiel restesse pi forte. Cossita, el podaria predicar ai testardi e ai desobedienti. (Eze. 3:7) Geovà el ghe ga dito: ‘Go fato che la to fàcia la fusse tanto dura come quela de lori, e la to fronte, tanto dura come quela de lori. Go fato la to fronte compagna a un diamante, pi dura de che un sasso. No stà gaver paura de quel che i te dise, gnanca dela fàcia che i te fà.’ (Eze. 3:8, 9) L’era come se Geovà el fusse drio dir a Ezechiel: “No stà assar che queste persone testarde le te desanime. Mi vao farte forte.” Dopo de quel che ga sucedesto, el spìrito santo el ga mostrà a Ezechiel ndove el gavea de predicar. Lu el ga scrito: ‘La man de Geovà la era forte sora mi.’ Dopo de una stimana, Ezechiel el ga capio ben cossa che el gavea de parlar a quele persone. (Eze. 3:14, 15) Alora, Geovà el ghe ga dito de ndar nte un vale, ndove ‘el spìrito el ndaria rento de lu’. (Eze. 3:23, 24) Cossita, Ezechiel l’era pronto par scominsiar a predicar. w22.11 p. 4, 5 §§ 8, 9

El profeta Abacuche el ga tribolà tanto. Par quela, lu el ga scominsià a pensar che Geovà no’l se preocupea con lu. Alora, el ga pregà e el ghe ga contà a Geovà quel che l’era drio sentir. Geovà el ga rispondesto la orassion del so servo fedele. (Aba. 2:2, 3) Dopo, Abacuche el ga pensà sora tuto quel che Geovà el gavea fato par giutar so pòpolo. Cossita, lu l’è restà contento e pi sicuro che Geovà el ndaria tenderlo e giutarlo. (Aba. 3:17-19) Cossa che imparemo? Quando te sì drio tribolar, prega a Geovà, conteghe tuto quel che te sì drio sentir e domandeghe so aiuto. Cossita, te sarè sicuro che Geovà el va darte la forsa che te ocore. E quando te vedi che lu el te ga giutà, la to fede la restarà ancora pi forte. Se te seiti a leder la Bìblia, le publicassion, a ndar predicar e ale riunion, no te assarè che gnente rovine la to amicìssia con Geovà. — 1 Tim. 6:6-8. w22.11 p. 15 §§ 6, 7

Gesù l’era picà su nte un pal e due bandidi i era picadi su dela so banda. Lori i ga sofrio tanto vanti de morir. (Luc. 23:32, 33) Savemo che quei bandidi i ghe gavea ridesto drio a Gesù. (Mat. 27:44; Mar. 15:32) Ma dopo, un de lori el ga dito: “Gesù, ricòrdate de mi quando te vè rento el to Regno.” Gesù el ghe ga rispondesto con quel che l’è scrito nel testo de ancoi. (Luc. 23:39-42) Quel che Gesù el ga dito al bandido ne incoraia a pensar come sarà viver in Paradiso. E podemo saver come la vita la sarà bela quando studiemo sora el regno de Salomon. In quela època, le persone le gavea tuto quel ghe ocorea e le vivea in pace. Ma, la Bìblia la dise che Gesù el sarà un Rè ancora meio che Salomon. Gesù e i 144 mila i farà che la Tera la devente un paradiso. (Mat. 12:42) E sicuro che le “altre piégore” le vol saver cossa le ga de far par viver par sempre in Paradiso. — Gio. 10:16. w22.12 p. 8 § 1; p. 9 § 4

Quel che Isaia el ga dito ne assa sicuri che Geovà el scolta le nostre orassion e che presto el ne giuta quando ghemo de bisogno. Isaia anca el ga dito: “Lu el ndarà scoltarte e el te risponderà suito.” Questo testo el ne giuta a ricordarse che Geovà el vol tanto giutar quei che i ghe domanda aiuto. Cossita, semo boni de perseverar contenti. Questo testo anca ne assa sicuri che Geovà el scolta la orassion de cada un de noantri. Come che lo savemo? Nel capìtolo 30 de Isaia, Geovà l’è drio parlar con tuto el pòpolo parché el dopera la parola “valtri”. Ma, nel versìcolo 19, Geovà l’è drio parlar con cada un de lori. Isaia el ga scrito: “No te ndarè mai pi piander. Quando te ndarè domandar aiuto, sicuro che el ndarà giutarte.” Geovà l’è compagno a un pare che ghe vol tanto ben i so fioi. Lu el se preocupa con cada un de noantri e el scolta quando preghemo a lu. — Sal. 116:1; Isa. 57:15. w22.11 p. 9 §§ 5, 6

Se te seiti a predicar e a insegnar, te ndarè gaver pace e alegria. Varda quel che te pol imparar coi apòstoli. Lori i ga seità a predicar e a obedir a Dio, anca se i giudei i ghe gavesse dito de fermarse de farlo. Par quela, i apòstoli i ze restadi contenti. (Ati 5:27-29, 41, 42) L’è vera che, se el governo el ne ga proibio de predicar, no ndaremo farghe veder a tuti che semo drio farlo. Ma se seitemo a predicar, gavaremo la pace de saver che semo drio assar Geovà contento e giutar a salvar la vita dele persone. Ghemo de esser sicuri che anca quando infrontemo dificoltà podemo gaver pace. Quando semo drio tribolar, ghemo de ricordarse che la pace che ghemo de bisogno la ze quela che sol Geovà el pol darne. Alora, ghemo de fidarse in lu quando ghen’è una bruta malatia, una desgràssia, o la perseghission. Ne ocore anca restar insieme dei fradei, sempre obedir ale orientassion dela organisassion e seitar a pensar in tuto quel che Geovà el ne promete par el futuro. Se femo cossita, ‘el Dio de pace el sarà con noantri’. — Fil. 4:9. w22.12 p. 21 §§ 17, 18

Sicuro che ghemo de sforsarse tanto par farlo. Par esémpio, fursi ne toca fermarse de restar cativi o inrabiadi. Pol esser che sìpia fadiga farlo parché l’è belche tanto tempo che semo cossita. E come la Bìblia la dise, ghen’è de quei che i resta ‘suito cativi’. (Pro. 29:22) Una persona cossita fursi la gavarà de seitar a sforsarse par cambiar anca dopo de esser batesada. (Rom. 7:21-23) Alora, prega a Geovà e domanda che el te giute a cambiar quel che te ocore, e sìpia sicuro che el ndarà giutarte. (1 Gio. 5:14, 15) Geovà no’l ndarà finir fora de colpo col to problema, ma el ndarà darte la forsa che te ocore par cambiar. (1 Pie. 5:10) Ma anca ti te ghè de sforsarte par cambiar. Alora, sfòrsate par mai pensar in quel che l’è sbalià. — Fil. 4:8; Col. 3:2. w23.01 p. 10 §§ 7, 9, 10

Podemo mostrarghe el nostro amor quando predichemo. Par quela, se sforsemo de parlar con tuti e li tratemo dela stessa maniera, no importa la so rassa o el so paese. E mai femo difarensa se lori i ze siori e studiadi o poareti e sensa stùdio. Femo compagno a Geovà “che el vol che tuti i tipi de persone i sìpie salvi e i gàpie la cognossensa giusta dela verità”. (1 Tim. 2:4) Se amemo a Geovà e a Gesù, mostraremo amor anca ai nostri fradei. Come che podemo farlo? Quando lori i ze drio infrontar una dificoltà, femo quel che podemo par giutarli. Par esémpio, quando i perde qualchedun che i ama, ghe demo consolo, quando lori i ze maladi, li visitemo, e quando i ze desanimadi, li incoraiemo. (2 Cor. 1:3-7; 1 Tes. 5:11, 14) Anca mostremo che amemo i nostri fradei quando preghemo par lori, sicuri che la nostra orassion la pol giutarli. — Tia. 5:16. w23.01 p. 28, 29 §§ 7, 8

Qualchedun che el laora con costrussion el deventa cada volta pi bravo in quel che el fà. Dela medèsima maniera, se noantri sempre proemo giutar i nostri fradei, ndaremo incoraiarli cada volta meio. Noantri podemo incoraiarli col esémpio de altri servi de Geovà che i ze stati boni de dàrghene fora cole so dificoltà. (Ebr. 11:32-35; 12:1) Noantri anca podemo incoraiar i nostri fradei quando ghe parlemo bele robe che ghen’è nela Bìblia, quando giutemo in quel che lori i ga de bisogno e quando seitemo a giutar quei che no i ga pi una forte fede. Podemo anca giutar la congregassion a viver in pace se parlemo ben dei altri e se femo la pace con qualche fradel che semo disgustadi. (Efe. 4:3) Podemo sentirse tanto contenti quando giutemo e incoraiemo i nostri fradei. Pol esser che le costrussion che femo no le reste par sempre. Ma i nostri fradei i podarà ricever benedission par sempre se li incoraiemo adesso. w22.08 p. 22 § 6; p. 25 §§ 17, 18

Gesù el ga insegnà che, intanto che ledemo la Bìblia, ghemo de pensarghe sora quel che la dise. (Mat. 24:15) Alora, come che podemo farlo? Ghemo de proar veder come el testo che semo drio leder ne giuta a capir nantro e a capir la difarensa intrà quel che l’è giusto e sbalià. Noantri ghemo anca de proar imparar de pi de quel che l’è scrito. Gesù el ga dito che ghemo de pensarghe sora ben quel che ledemo par capir come le professie dela Bìblia le ze drio suceder ancoi. Cossita, saremo boni de imparar tuto quel che podemo dela Parola de Dio. Geovà el giuta i so servi a capir la Bìblia. Alora, quando te vè lederla, prega a lu e domandaghe aiuto. Dopo, proa veder come che quel che te ghè imparà te ga fato capir meio quel che belche te savei. Proa capir meio cossa vol dir la stòria dela Bìblia che te ghè ledesto e te saverè come meter in pràtica quel che te ghè imparà. (Ebr. 5:14) Se te fè cossita, te vè imparar cada volta de pi dele Scriture. w23.02 p. 10 §§ 7, 8

Metemo dir che un amigo el te dà de presente un quadro vècio, ma che l’è tanto valioso. Se pol veder che la pintura la ga màcie e i colori i ze restadi sbiavi. Ancora cossita, questo quadro el ga tanto valor. Alora, sicuro che ti te piaseria questo presente e che te ndarissi tenderlo tanto ben. Dela medèsima maniera, Geovà el ne ga dato un presente tanto valioso, che l’è la nostra vita. Par Geovà, la nostra vita la ze tanto importante che lu el ga dato la vita de Gesù par salvarne. (Gio. 3:16) La vita la vien de Geovà. (Sal. 36:9) Par quela, podemo dir che la ze un presente de Dio par noantri. Anca el apòstolo Paolo lo savea e el ga scrito: ‘Par meso de Dio gavemo vita, semo boni de moverse e esistimo.’ (Ati 17:25, 28) Ancora che ancoi Geovà no’l fae miràcoli par farne restar vivi, lu el ne dà tuto quel che ne ocore par viver. (Ati 14:15-17) Alora, lu el vol che noantri femo el nostro meio par esser sani e seitar a servirlo. — 2 Cor. 7:1. w23.02 p. 20 §§ 1, 2

Noantri ghe demo tanto valor ala Parola de Dio, la Bìblia! Geovà la dopera par darne consili che i ne giuta a dàrghene fora coi problemi ancoi e par darne una bela speransa par el futuro. Ma el pi importante l’è che, par meso dela Bìblia, podemo imparar sora le bele qualità de Geovà. Se ghe pensemo sora queste bele qualità, gavaremo ancora pi voia de esser so amighi. (Sal. 25:14) Geovà el vol che tute le persone lo cognossa. Nel passà, lu el ga parlà con lore par meso de àngeli, de vision e de quel che arquanti i se ga insognà. (Nùm. 12:6; Ati 10:3, 4) Ma, Geovà el ga scoliesto arquanti òmini par scriver do quel che ga sucedesto. Cossita, tuti i pol cognosserlo anca ancoi. Semo sicuri che la maniera che Dio el ga scoliesto par parlar con noantri la ze la meio che ghen’è parché tuto quel che lu el fà l’è perfeto. — Sal. 18:30. w23.02 p. 2 §§ 1, 2

Scoli quel che te vol far de pi par Geovà. Te pol scòlier far quel che ndarà giutarte a gaver una fede ancora pi forte e a esser un servo de Geovà ancora meio. (Efe. 3:16) Par esémpio, fursi te vedi che te ghè de leder de pi la Bìblia e studiarla meio. (Sal. 1:2, 3) O fursi te vedi che te ghè de pregar de pi e pensar meio in quel che te ndarè parlar a Geovà. O pol esser che te te nicordi che te ghè de scòlier meio le to diversion o come che te doperi el to tempo. (Efe. 5:15, 16) Te pol deventar un servo de Geovà ancora pi bravo se te giuti i altri. Par esémpio, te pol sforsarte de giutar i fradei pi veci e quei che i ze maladi nela congregassion. Fursi te pol comprar qualcossa che i ga de bisogno, o giutarli a doperar el telèfono o altre robe eletròniche. Te pol anca mostrar che te ami le persone che no le serve a Geovà quando te predichi a lore. (Mat. 9:36, 37) E fà anca el meio che te pol par esser un pioniero, laorar in Betel o nele costrussion. w22.08 p. 6, 7 §§ 16, 17