Marso

La Bìblia la parla de persone che obedia a Geovà e che dopo le ga scominsià a far robe sbaliade. Un de questi l’è Salomon. Lu el ga imparà a far quel che l’è giusto e Geovà lo ga benedio tanto. Ma dopo, lu el ga scominsià a adorar falsi dèi. Questo ga assà Geovà tanto inrabià, e par via dei sbali de Salomon, tuti i israeliti i ga sofrio par tanti ani. La Bìblia la dise che Salomon “l’è stà sepoltà coi so antenati”, persone che le era fedele, come el rè Davi. (1 Rè 11:5-9, 43; 2 Rè 23:13) Ma la Bìblia no la dise che podemo saver se una persona la sarà ressussitada par la maniera che la ze stata sepoltada. Invesse, la ressuression la ze un presente de Geovà, e lu el dà questo presente a quei che lu el vol che lo sirva par sempre. (Giò 14:13, 14; Gio. 6:44) Alora, sarà che Salomon el sarà ressussità? Noantri no savemo, ma Geovà el sa. Podemo esser sicuri che lu sempre el fà quel che l’è giusto. w24.05 p. 4 § 9

Podemo dir che Geovà el ga una tenda, e noantri ndemo rento questa tenda quando se dedichemo a lu. E parché che l’è tanto bel star rento dela tenda de Geovà? Parché ghemo tuto quel che ne ocore par far pi forte la nostra amicìssia con lu. E rento questa tenda noantri anca ghemo una bela amicìssia con tuti i altri servi de Dio. Alora, podemo dir che la tenda de Geovà la ze in tuti i posti ndove ghen’è servi soi. (Apo. 21:3) Ma fursi se domandemo: ‘Sarà che anca quei che i ze belche morti i pol restar rento la tenda de Geovà?’ Si. Parché che podemo dirlo? Parché Geovà el se ricorda tanto ben dei so servi che i ze morti come se i fussi ancora vivi. Gesù el ga dito: ‘Quando Moisè el ga ciamà Geovà de “Dio de Abraon, el Dio de Isache e el Dio de Giacò”, nela stòria del spiner, lu el ga parlà che i morti i sarà ressussitadi. Lu l’è Dio dei vivi, nò dei morti, parché par lu tuti i vive.’ — Luc. 20:37, 38. w24.06 p. 3, 4 §§ 6, 7

Quando Davi l’è deventà rè, Zadoche l’è ndato a Ebron e lu l’era pronto par la guera. (1 Cró. 12:38) Lu el volea difender Davi e anca la nassion de Israel dei so nemighi. Pol esser che Zadoche no’l gavea tanta speriensa come un soldà, ma lu l’era pròpio coraioso. Ma cossa ga giutà Zadoche a gaver tanto coraio? Lu l’era sempre insieme de persone brave e coraiose e el ga imparà de quel che lore le fea. Una de queste persone l’è stà Davi. Davi sempre el se fidea in Geovà quando el ndea lotar contra i so nemighi, e el ga mostrà tanto coraio quando el ga comandà el esèrsito de Israel. (Sal. 138:3) Par quela che tuti i israeliti i volea che lu el fusse el so rè. (1 Cró. 11:1, 2) Ma ghen’era ancora altre persone intorno a Zadoche, come Geoiada, Benaia, che l’era fiol de Geoiada, e altri 22 paroni de tribo che i ze restadi dela banda de Davi. — 1 Cró. 11:22-25; 12:26-28. w24.07 p. 3 §§ 5, 6

Saolo de Tarso el ga perseghio tanto i dissìpoli de Cristo. Par quela, tanti i pensea che lu mai el saria bon de cambiar. Ma, Gesù el se fidea che Paolo el podaria ciamarse gramo e cambiar la so vita. Geovà e Gesù i vedea tante bele qualità in Paolo. Par quela che Gesù el ga dito: “Par mi, questo omo l’è un vaso che go scoliesto.” (Ati 9:15) Gesù el ga fin fato un miràcolo par giutar Paolo a cambiar la so vita. (Ati 7:58–8:3; 9:1-9, 17-20) Alora, dopo che l’è deventà un dissìpolo de Gesù, Paolo el ga mostrà diverse volte che el ghe dea tanto valor ala misericòrdia e ala bontà de Geovà e de Gesù. (1 Tim. 1:12-15) Una volta, Paolo el ga savesto che un omo l’era drio far imoralità sessual e el fea ancora parte dela congregassion in Corinto. Alora, cossa che Paolo el ga fato? Quel che lu el ga scrito par la congregassion in Corinto ne insegna come che Geovà el mostra amor quando el dissiplina i so servi, e anca come lu el mostra misericòrdia a quei che i se ciama grami. w24.08 p. 13 §§ 15, 16

Par sècoli, Geovà el ga giutà so servi a capir cada volta meio come che persone imperfete le pol gaver una amicìssia con lu. Abel, el secondo fiol de Adon e Eva, l’è stà el primo omo a gaver fede in Geovà dopo che i so genitori i ga pecà nel giardin del Èden. Abel el amea Geovà e el volea contentarlo e deventar so amigo. Par quela, lu el ga fato un sacrifìssio. Come lu l’era un pastor, Abel el ga scoliesto arquante dele so bèstie par far un sacrifìssio par Geovà. Cossa che Geovà el ga pensà del so sacrifìssio? La Bìblia la dise che “Geovà el ga aprovà Abel e la so oferta”. (Gén. 4:4) Geovà el ga mostrà che ghe piasea dei sacrifissi de altre persone che lo amea e che le se fidea in lu, come Noè. (Gén. 8:20, 21) Quando Geovà el ga acetà questi sacrifissi, lu el ga mostrà che persone imperfete le pol gaver una amicìssia con lu e contentarlo. w24.08 p. 3 §§ 5, 6

Pol esser che sofrimo tanto quando qualchedun ne trata mal. (Ecl. 7:7) Anca Giò, Abacuche e altri servi fedeli del passà i se ga sentio cossita. (Giò 6:2, 3; Aba. 1:1-3) Tuti noantri sofrimo quando qualchedun ne trata mal, ma ghemo de star atenti de mai far gnente de sbalià intanto che semo drio sofrir, parché le robe le pol deventar ancora pedo. Dele volte, ne par che arquante persone che le fà robe sbaliade no le sofre mia par causa de quel che le fà. Par quela, pol esser che anca noantri pensemo che el sforso che femo par servir a Geovà l’è par gnente. Un servo de Geovà del passà el ga visto arquante persone rugne tratar mal i altri. Lu el ga dito che i rugni no i gavea mia problemi parché ghe parea che la vita de quele persone rugne la era tanto fàcile. (Sal. 73:12) Lu l’è restà tanto disgustà par causa dele brute robe che el ga visto e el ga fin pensà che l’era par gnente che el se sforsea de servir a Geovà. Alora, lu el ga dito: “Quando go proà capir tuto questo, l’è stato tanto fadiga par mi.” — Sal. 73:14, 16. w24.11 p. 3 §§ 5-7

Volemo darghe glòria a Geovà parché ghemo tanto rispeto par lu. E ghen’è tante robe che ne fà rispetarlo. Par esémpio, Geovà l’è el Tuto Poderoso e el so poder no’l se finisse mai. (Sal. 96:4-7) Lu l’è leal e vedemo la so granda sabedoria par meso de quel che el ga creà. (Apo. 15:4) Anca, l’è stà Geovà che el ne ga dato la vita e tuto quel che ne ocore par seitar vivi. (Apo. 4:11) E lu sempre l’è bon de far tuto quel che el vol e sempre el fà quel che el ga prometesto. (Gios. 23:14) L’è stà par quela che el profeta Geremia el ga dito: ‘Nissun l’è come ti, ò Geovà. Intrà quei che i ga sabedoria nele nassion e in tuti i regni, no ghen’è nissuni come ti.’ (Ger. 10:6, 7) Ghemo tanti boni motivi par rispetar el nostro caro Pare. Ma noantri no ghemo mia sol rispeto par Geovà, anca ghemo tanto amor. Noantri volemo darghe glòria a Geovà parché lo amemo tanto. w25.01 p. 3 §§ 5, 6

I nemighi de Dio i vol che le persone le pense che le robe bone che femo le ze rugne. Par esémpio, noantri ghemo imparà nela Bìblia che Geovà el vol che i so servi no i fae mia robe sbaliade, che i sìpie persone nete e che i lo adore dela maniera giusta. Lu anca el dise che una persona che la seita far un bruto pecato e che no la se ciama grama no la pol pi esser una Testimònia de Geovà. (1 Cor. 5:11, 12; 6:9, 10) Sicuro che noantri femo quel che Geovà el vol. Ma, i nemighi i dise che noantri no amemo mia le persone, che le tratemo mal e che no acetemo quei che i ze difarenti de noantri. Ghemo de ricordarse che l’è Sàtana che l’è drio vegner contra la organisassion. Sàtana el dopera persone par contar busie sora la organisassion. La Bìblia la dise che lu l’è “el pare dela busia”. (Gio. 8:44; Gén. 3:1-5) Alora, noantri belche speteino che Sàtana el doperaria i nostri nemighi par contar busie sora i servi de Geovà. w24.04 p. 10, 11 §§ 13, 14

Cossa che fursi ndarà suceder quando scomìnsia la granda tribolassion? Dopo la destrussion de “Babilònia, la Granda”, pol esser che arquante persone le ndarà ricordarse che le Testimònie de Geovà le gavea sempre parlà che questo ndaria suceder. Alora, fursi arquante de lore le scominsiarà a gaver fede in Geovà. (Apo. 17:5) Quando i israeliti i ze ndati via del Egito, ga sucedesto una roba cossita. La Bìblia la dise che una mùcia de persone che no le era mia israeliti le ze ndate via insieme. Fursi le ga scominsià a gaver fede in Geovà dopo de veder che gavea pròpio sucedesto quel che Moisè el gavea dito sora le diese piaghe. (Éso. 12:38) Alora, pol esser che arquante persone le scomìnsie a gaver fede in Geovà dopo che “Babilònia, la Granda” la sarà finida fora e poco prima del Armagedon. Ma no ghemo mia de restar disgustadi gnanca pensar che no l’è mia giusto che ancora le possa adorar a Geovà. Pitosto, volemo esser compagno al nostro Pare “che el ga misericòrdia e compassion, che l’è passiente e pien de amor leal e che el parla sempre la verità”. — Éso. 34:6. w24.05 p. 11 §§ 12, 13

Cossa che podaria suceder se noantri abandonessino el “esémpio de parole bone e vere”? Vedemo quel che ga sucedesto nel primo sècolo. Arquanti dissìpoli de Gesù i parlea in volta che el giorno de Geovà l’era rivà. Lori i gavea ricevesto una carta che disea questa informassion e i pensea che el apòstolo Paolo la gavea scrita. E invesse de torse el tempo par veder se quela carta la era pròpio vera, lori i ga credesto in quel che la disea e i ga fin parlà in volta sora questo. Se lori i se gavesse ricordà dele robe che Paolo ghe gavea insegnà quando l’era intrà de lori, no i saria imbroiadi. (2 Tes. 2:1-5) Par quela, Paolo el ga dato el consìlio a quei fradei de no creder in tuto quel che i scoltea. E par giutarli nel futuro, Paolo el ga finio la seconda carta ai tessalonissensi con queste parole: ‘Mi, Paolo, ve saludo. Son drio scriver cola me man, come sempre fao nele me carte. Mi scrivo pròpio cossita.’ — 2 Tes. 3:17. w24.07 p. 11, 12 §§ 13, 14

I fradei ebrei i gavaria bisogno de perseveransa par dàrghene fora cole dificoltà che vegnaria pi avanti. L’è vera che arquanti de quei fradei i gavea belche infrontà perseghission nel passà, ma altri nò. Par quela, el apòstolo Paolo el ghe ga dito che i gavea de esser pareciadi par infrontar tanta perseghission e che i gavaria de esser fedeli fin la morte, cossita come Gesù. (Ebr. 12:4) Le persone de quela època le era drio restar tanto cative parché ghen’era cada volta de pi dissìpoli de Gesù. Par esémpio, pochi ani prima, de pi de 40 giudei ‘i era fin disposti a sofrir una maledission, e dir che no i magnaria gnanca i beveria gnente fin che no i gavesse copà Paolo’. (Ati 22:22; 23:12-14) Anca se quei fradei ebrei i era drio infrontar tanta perseghission e òdio dele persone, lori i gavea de seitar a riunirse par adorar a Geovà, a predicar le bone notìssie e a gaver una forte fede. w24.09 p. 12 § 15

El apòstolo Gioani l’era un caro amigo de Gesù. (Mat. 10:2) Gioani el ga predicà insieme a Gesù par tanto tempo. Quando Gesù el ga fato bei miràcoli e quando el ga infrontà brute dificoltà, Gioani l’era insieme a lu. Gioani l’era insieme quando Gesù l’è stà copà e lo ga visto dopo che l’è stà ressussità. Lu anca el ga visto le bone notìssie scominsiar a ‘esser predicade a tante nassion’, tante persone deventar dissìpoli de Gesù e che ghen’era cada volta de pi congregassion. (Col. 1:23) Quando Gioani l’era belche vècio, Geovà lo ga doperà par scriver el libro de Apocalisse. (Apo. 1:1) Gioani anca el ga scrito el libro col so nome e le tre carte che anca le ga el so nome. Lu el ga scrito la so tersa carta a un fradel de nome Gaio, che el ghe volea tanto ben come se fusse so fiol. (3 Gio. 1) Sicuro che quel che Gioani el ga scrito giuta tanto i servi de Geovà fin ancoi. w24.11 p. 12 §§ 15, 16

Un omo che el ama la so dona el ndarà darghe valor e vederla come un presente tanto bel che Geovà el ghe ga dato. (Pro. 18:22; 31:10) Par quela, lu el ndarà sempre tratarla con bontà e rispeto. Alora, quando lori i ze drio far sesso, lu no’l ndarà mai obrigarla a far robe che la pensa che le ze sbaliade o che no la vol mia far. E anca el omo no’l ga mia de far robe che lu el pensa che le ze sbaliade. (Ati 24:16) Se te sì drio sforsarte par darghe onor ala to dona, ricòrdate che Geovà l’è drio veder tuto quel che te sì drio far. Alora, seita a sforsarte par tratarla con amor, rispeto, e no stà far gnente che ndarà farla sofrir. Cossita, te ndarè mostrar ala to dona che te ghe vol ben e che la ze tanto importante par ti. Se te la trati sempre con amor e rispeto, te pol esser sicuro che te gavarè un bel matrimònio e una bela amicìssia con Geovà. — Sal. 25:14. w25.01 p.13 §§ 17, 18

I servi de Geovà i ga tanta voia de predicar le bone notìssie e i se sforsa tanto par farlo. Alora, lori i ze tanto difarenti de quei che i dise ndar drio a Cristo. Ma cossa che pol giutarne a seitar gaver voia de predicar? Noantri podemo imparar tanto sora gaver pi voia de predicar col esémpio de Gesù. Lu no’l ga mai perso la voia de predicar. In verità, col tempo, lu el se ga sforsà ancora de pi. Nte una ilustrassion, Gesù el ga comparà el so laoro col laoro de un omo che tendea de un vignal. Questo omo el ga laorà tre ani par proar far che el figher desse fruti, ma no’l ga mia dato. Dela medèsima maniera, Gesù el ga proà predicar ai giudei par tre ani, ma pochi i lo ga scoltà. Ma compagno a quel omo che no’l ga mia desistio del figher, Gesù no’l ga mia desistio dele persone. Imparar sora el so esémpio e far compagno a lu giutarà anca a noantri a meterghela tuta nela predicassion. w25.03 p. 14, 15 §§ 1-4

Cossa gheto de far se te pensi che una persona la te ndaria ben? Sarà che suito te toca corerghe drio? La Bìblia la dise che la persona che la ga sabedoria la pensa ben vanti de far qualcossa. Alora, vanti de dir ala persona che te vol smorosarla, proa vardar quel che la fà, come la trata i altri e come la ze. Ma come che te pol capir se una persona la te va ben? Proa vardar quel che la fà, come la trata i altri, come che la ze nele riunion o quando ndé a spasso e come la ze la so amicìssia con Geovà. Te pol anca domandarte: ‘De cossa ghe piase ciacolar e chi zeli i so amighi?’ (Luc. 6:45) ‘Sarà che la vol far le medèsime robe nela vita che mi?’ Te pol anca parlar coi ansiani dela so congregassion o con bravi fradei che i la cognosse ben. (Pro. 20:18) Domandaghe cossa che i altri i pensa sora quela persona e che qualità la ga. (Rut. 2:11) Ma, intanto che te sì drio proar cognosserla meio, móstraghe rispeto e no stà proar saver tuto quel che la fà nela so vita. w24.05 p. 22 §§ 7, 8

I ansiani no i ga mia de pensar suito che la persona no la ndarà ciamarse grama. Arquante persone le se ciama grame ancora nela prima riunion, ma altre fursi ghe ocore de pi tempo. Par quela, i ansiani i pol parlar con questa persona de pi de una volta. Pol esser che dopo dela prima volta, questa persona la ndarà pensar sora quel che la ga fato e la ndarà pregar a Geovà par domandarghe perdon. (Sal. 38:18) Cossita, nela pròssima volta che i ansiani i parla con questa persona, pol esser che sìpia pi fàcile che la acete el aiuto e la se ciame grama. Par giutar la persona che la ga fato un bruto pecato, i ansiani i ga de sempre mostrarghe bontà e proar capir quel che la ze drio sentir. Lori anca i prega a Geovà par domandarghe che li giute. I ansiani i vol tanto che questa persona la càmbie e la se ciame grama. — 2 Tim. 2:25, 26 w24.08 p. 23 §§ 12, 13

Geovà no’l vol che gnanca una persona la sìpia destruta. Invesse, lu el vol che tuti quei che i ga fato bruti pecati i se ciame grami e i sìpie so amighi nantra volta. (2 Cor. 5:20) Par quela che Geovà tante volte el ga proà giutar el so pòpolo e tanti dei so servi del passà a ciamarse grami e a tornar adorarlo. Ancoi nela congregassion, i ansiani i laora insieme a Geovà par giutar quei che i ga fato bruti pecati a ciamarse grami. (Rom. 2:4; 1 Cor. 3:9) Proa pensar come Geovà, Gesù e i àngeli i resta contenti quando una persona la càmbia la so vita e la se ciama grama. Nostro Pare, Geovà, el resta tanto contento quando una persona che la gavea assà de adorarlo la torna ala congregassion. E el nostro amor par Geovà el resta cada volta pi grando quando pensemo nela so misericòrdia e nela so granda bontà. — Luc. 1:78. w24.08 p. 31 §§ 16, 17

Se Gesù el gavesse acetà deventar un rè, come quele persone le volea, lu el ndaria meterse nela polìtica dei giudei che i era soto el governo romano. Ma, come Gesù no’l volea mia una roba cossita, lu el ga scampà via su nel monte lu lu sol. Cossita, anca se tanti i volesse che lu el se metesse nela polìtica, lu no lo ga fato. Sicuro che el esémpio de Gesù pol insegnarne tanto. L’è vera che ancoi nissuni spetarà che femo miràcoli, che curemo maladi o volerà che deventemo rè. Ma, pol esser che le persone le spetarà che scoliemo un governante o che disemo che semo de acordo con quel che ghe par bon. Ma el esémpio de Gesù ne insegna che no ghemo mai de meterse nela polìtica. Lu el ga dito: “El me Regno no’l fà parte de questo mondo.” (Gio. 17:14; 18:36) Alora, noantri se sforsemo de pensar compagno a Gesù e ndarghe drio el so esémpio. Tuti ghemo scoliesto esser leai al Regno de Dio, predicar sora questo Regno e pregar par domandar che el vegne. w24.12 p. 3, 4 §§ 5, 6

Intanto che te studi, pensa come che te pol meter in pràtica quel che te sì drio imparar. Par esémpio, se te sì drio studiar sora la giustìssia de Geovà, pensa come che te pol tratar i altri compagno a lu. Se te sì drio studiar sora el amor de Gesù par Geovà e par tute le persone, te pol far compagno a lu. Come? Te ghè de obedir del tuto a Geovà e giutar i altri quando i ga de bisogno. Anca te pol far compagno a Gesù quando te predichi ale persone. Cossita, lore le podarà imparar sora le bele robe che Geovà l’è drio far par giutarne e gaver fede nel sacrifìssio de Gesù.Se seitemo a imparar sora el sacrifìssio de Gesù e ghe demo valor a questo bel presente, el nostro amor par Geovà e par Gesù restarà cada volta pi grando. Cossita, anca Geovà e Gesù i ndarà amarne ancora de pi. (Tia. 4:8) Par quela, volemo doperar tuto quel che Geovà el ne ga dato par seitar a imparar de pi sora el sacrifìssio del so Fiol. w25.01 p. 25 §§ 16, 17

Podemo capir el testo de ancoi come se fussino drio dir a Geovà: ‘Ti te ghè butà i me pecati nte un posto ndove no te pol pi veder.’ Alora, Geovà el buta via i nostri pecati e mai pi li varda. L’è come se el rè Ezechia el gavesse dito: ‘Ti te ghè fato come se i me sbali no i fusse mai sucedesti.’ La Bìblia anca la parla una roba cossita in Michea 7:18, 19. In questo testo, Geovà el dise che el buta i nostri sbali nel fondo del mar. Nel passà, se qualchedun el butesse una roba nel fondo del mar, pi nissuni podaria catarla. Ghemo capio che, quando Geovà el perdona, lu el porta via i nostri pecati. Alora, no ne ocore mia seitar a sentirse in colpa. Davi el ga dito: ‘Felici i ze quei che i ze stati perdonadi dele so òpere rugne e che i ghe ga perdonà i so pecati. Felice l’è el omo che Geovà no’l ghe bada i so pecati.’ (Rom. 4:7, 8) L’è questo che vol dir perdonar del bon! w25.02 p. 9 §§ 7, 8

Ancoi, noantri vivemo insieme a milioni de persone nte un paradiso spiritual! Come cossita? Noantri vivemo in pace e union. Volemo viver cossita par sempre e se sforsemo de giutar anca altre persone a viver in questo paradiso. Nel mondo ancoi, sucede tante brute robe e le persone le ze violente e le se òdia. (1 Gio. 5:19; Apo. 12:12) Ancora cossita, Geovà el ne giuta a viver in pace e union. Ma lu el sa che no l’è mia fàcile viver in questo mondo. Par quela, Geovà el ne giuta a servirlo con alegria e a far pi forte la nostra amicìssia con lu. La Bìblia la dise che podemo gaver protession e pace, come se fùssino nte un bel giardin. (Isa. 4:6; 58:11) Alora, col aiuto de Geovà, podemo esser felici e viver sensa paura, anca se vivemo nei ùltimi giorni. — Isa. 54:14; 2 Tim. 3:1. w24.04 p. 20 §§ 1, 2

Se te vol maridarte, l’è sicuro che te ghè belche pregà a Geovà par dighe quel che te vol. L’è vera che Geovà no’l promete catarte fora una persona par maridarte, ma lu el pol darte quel che te ocore e giutarte a far una bona dessision. Alora, seita a parlarghe sora quel che te senti, quel che te pensi e a domandarghe passiensa e sabedoria. (Sal. 62:8; Tia. 1:5) Pol esser che te toca spetar de pi tempo de quel che te volarissi par maridarte. Ma Geovà el promete tenderte e darte el amor che te ocore. (Sal. 55:22) Ma volemo dirte una roba: Se te sì drio ndar in serca de una persona par maridarte, no stà assar che questa roba la sìpia la pi importante dela to vita. (Fil. 1:10) Ricòrdate che no te ocore esser maridà par esser felice. Pitosto, par esser felice, te ocore gaver una forte amicìssia con Geovà. (Mat. 5:3) Intanto che no te sì maridà, te ghè de pi tempo par laorar par Geovà. (1 Cor. 7:32, 33) Alora, dopera ben questo tempo. w24.05 p. 21 § 4; p. 22 § 6

Quanto tempo gavé de smorosar? Se no ghe pensemo ben vanti de far una dessision, pol esser che femo robe sbaliade. (Pro. 21:5) Alora, gavé de smorosar el tempo che ve ocore par cognosserve un al altro. Ma no sté tirarla massa longa. La Bìblia la dise: “Quando no sucede quel che se speta, el cuor el sofre.” (Pro. 13:12) Se cognossemo un fradel o una sorela che i ze drio smorosar, come che podemo giutarli? Podemo convidarli par magnar con noantri, par vegner ala nostra adorassion in fameia o par ndar a spasso insieme. (Rom. 12:13) E se lori i ghe ocore de qualchedun par ndar insieme nel auto o de un posto par parlarse intrà de lori, sarà che podemo giutarli? (Gàl. 6:10) Se un fradel e una sorela che i ze drio smorosar i ne domanda de passar tempo con lori, ghemo de ricordarse che questa la ze una bela maniera de giutarli. Ghemo de star atenti de no assarli massa distante dei altri, ma anca ghemo de capir quando lori i ga de bisogno de un tempo sol lori due. w24.05 p. 30 §§ 13, 14

I ansiani i proa capir che dessision la persona la ga fato prima del pecato. Lori i pol domandarse: ‘Sarà che la so amicìssia con Geovà pin pianeto la era restada pi fiaca? Sarà che la se gavea fermà de studiar la Bìblia, ndar ala predicassion e de pregar sempre a Geovà? O sarà che fursi no la ga bio pi forsa de dàrghene fora cole voie sbaliade? Chi che i era i so amighi? Cossa che ghe piasea far par divertirse? Come che queste robe le ga cambià la so maniera de pensar e far le robe? Sarà che la ze bona de capir come che Geovà el se sente dopo che la ga fato quel pecato?’ I ansiani i pol far domande ala persona par giutarla a capir parché che la so amicìssia con Geovà la era restada pi fiaca e parché che fursi la ga fato quel pecato. Sicuro che i ansiani i ndarà sempre parlar con bontà e i ndarà domandarghe sol quel che ghe ocore pròpio. (Pro. 20:5) Lori anca i pol doperar ilustrassion par giutar la persona a capir quel che la ga fato de sbalià. Alora, pol esser che ancora nela prima volta che i ansiani i parle con questa persona, ela la sìpia bona de capir quel che la ga fato de sbalià, la reste disgustada con quel che la ga fato e fin la se ciame grama. w24.08 p. 22 §§ 9-11

Gesù la ga metesta tuta nela predicassion dele “bone notìssie del Regno” parché el savea che Geovà el volea che el fesse cossita. El laoro de predicassion l’era la roba pi importante dela so vita. Anca nei ùltimi mesi che l’era qua nela Tera, lu ‘el ga seità a viaiar de un posto a nantro par predicar’ ale persone. (Luc. 13:22) Gesù el ga anca insegnà altri a predicar le bone notìssie compagno a lu. (Luc. 10:1) El laoro de predicassion ancora l’è la roba pi importante che Geovà e Gesù i vol che femo. Ricordarse de questo, ndarà giutarne a meter la predicassion nel primo posto nela nostra vita. (Mat. 24:14; 28:19, 20) Geovà el vol che tute le persone le scolte le bone notìssie e le sìpia salve. Par quela, lu el ne giuta a predicar meio. (1 Tim. 2:3, 4) Anca che tanti no i vol servir a Geovà adesso, fursi i volarà farlo vanti che finissa la granda tribolassion. w25.03 p. 15, 16 §§ 5-7

Cada un el pol doperar i prinsipi dela Bìblia par dessider se el ndarà saludar una persona che la ze stata cavada via dela congregassion. Ma se dessidimo saludarla, sicuro che no ndaremo mia ciacolar tanto gnanca passar tempo insieme. Pol esser che arquanti fursi i se domande: ‘Ma la Bìblia no la dise che se saludemo una persona che la ze stata cavada via semo drio partissipar dei so sbali?’ El testo de 2 Gioani 9 a 11 parla de persone che le ze apòstate o che le proa far che i altri i desobedisse a quel che la Bìblia la dise. (Apo. 2:20) Alora, se una persona la ze apòstata o se la insegna robe sbaliade ai altri, gnanca i ansiani i ndarà visitarla. Sicuro che volemo tanto che questa persona la càmbie quel che la ze drio far. Ma intanto che la seita a far queste robe sbaliade, no ndaremo mia convidarla par ndar nte una riunion gnanca ndaremo saludarla. w24.08 p. 30, 31 §§ 14, 15

Dopo che Gesù el ga dato el pan e i pessi a tuti, lu el ga mandà che i so apòstoli i tornesse a Cafarnaun de barco intanto che lu el ndesse lu lu sol ale montagne. Cossita, lu l’è stà bon de scampar via dele persone che le volea farlo rè. (Gio. 6:16-20) Ma intanto che i apòstoli i era rento el barco, ga scominsià una bruta tempesta nel mar. Alora, Gesù el ga scominsià a caminar fin lori sora le àque e el ga convidà che Piero el caminesse fin lu. (Mat. 14:22-31) Quando Gesù l’è ndato rento el barco, la tempesta la se ga fermà. I dissìpoli i ze restadi tanto maraveiadi che i ga dito a Gesù: ‘Ti te sì pròpio el Fiol de Dio.’ (Mat. 14:33) Ma parché che i apòstoli i ga dito che Gesù l’era el Fiol de Dio sol dopo de questo miràcolo nel mar, e nò dopo el miràcolo del pan e dei pessi? Marco el ga dito che i apòstoli ‘i ze restadi tanto maraveiadi parché no i gavea gnancora capio quel che el miràcolo dei pan el volea dir’. (Mar. 6:50-52) Cossita, imparemo che i dissìpoli no i gavea gnancora capio tuto el poder che Geovà el gavea dato a Gesù. w24.12 p. 5 § 7

Podemo doperar le stimane prima e dopo dela Selebrassion par mostrar che el sacrifìssio de Gesù l’è tanto importante par tuti noantri. Come? Volemo sforsarse par ndar nela Selebrassion e par convidar tute le persone che podemo. Intanto che semo drio convidar le persone par vegner ala Selebrassion, podemo spiegarghe come che la va esser e mostrarghe i vìdei Ricorda dela morte de Gesù e Parché che Gesù l’è morto?, nel site jw.org. I ansiani i pol sforsarse de convidar i fradei che no i ze pi vegnesti ale riunion e ala predicassion. Sicuro che tuti nel cielo e nela Tera i restarà tanto contenti de veder una persona tornar a servir a Geovà. (Luc. 15:4-7) Alora, quando semo nela Selebrassion, volemo saludar nò sol i nostri fradei, ma anca quei che i vien par la prima volta ala Selebrassion o che fea tempo che no i vegnea pi ale riunion. Volemo che lori i veda che semo contenti de gaverli insieme! — Rom. 12:13. w25.01 p. 30 § 15

El sacrifìssio de Gesù ne giuta a capir la giustìssia de Geovà, ma anca ne insegna che lu el ne ama tanto. (Gio. 3:16; 1 Gio. 4:9)Questo ne giuta a capir che Geovà el vol che vivemo par sempre e che femo parte dela so fameia. Quando Adon el ga pecà, lu el ga assà de far parte dela fameia de Geovà. Par quela, tuti noantri semo imperfeti e no femo pi parte dela so fameia. Ma, par causa del sacrifìssio de Gesù, tuti quei che i ga fede in Geovà e ghe obedisse i podarà far parte dela so fameia. E l’è par causa de questo sacrifìssio che belche adesso Geovà el perdona i nostri pecati e podemo gaver una bela amicìssia con lu e coi nostri cari fradei e sorele. Semo sicuri che Geovà el ne ama tanto! — Rom. 5:10, 11. w25.01 p. 21 § 6

Geovà el ne ga dato un grando presente quando el ga mandà Gesù par dar la so vita par noantri. (2 Cor. 9:15) Par meso de questo sacrifìssio, noantri podemo esser amighi de Geovà e podaremo viver par sempre nel futuro. Sicuro che ringrassiemo tanto a Geovà, che el ga mostrà el so grando amor par meso del sacrifìssio de Gesù. (Rom. 5:8) E par giutarne a seitar a darghe valor e a mai desmentegarse de quel che lu el ga fato, Gesù el ga domandà che ricordessino del so sacrifìssio tuti i ani. (Luc. 22:19, 20) In questo ano, la Selebrassion dela Morte de Gesù sarà fata dóbia, 2 de april de 2026. Sicuro che tuti noantri ndaremo sforsarse de esser in questa riunion tanto importante. Sarà tanto bon par tuti torse un tempo vanti e dopo dela Selebrassion par pensarghe sora tuto quel che Geovà e Gesù i ze drio far par noantri. w25.01 p. 20 §§ 1, 2

Se te pensi sora quel che Geovà e Gesù i ga fato par ti, te sarè bon de seitar a imparar sora el amor che i ga. Questo ano proa leder un o ancora de pi Vangeli vanti e anca dopo dela Selebrassion. Ma invesse de leder massa robe nte un colpo sol, proa leder con atension. Sfòrsate de capir e pensarghe sora quel che pol giutarte a amar ancora de pi a Geovà e a Gesù. Se fà belche ani che te sì un servo de Geovà, fursi te te domandi se ancora ghen’è robe nove par imparar sora la giustìssia de Geovà, el so amor e el sacrifìssio de Gesù. Ma ghemo de ricordarse che sempre podaremo imparar ancora de pi sora queste robe. Alora, dopera ben le nostre publicassion. w25.01 p. 24, 25 §§ 13-15