April

Quel che Gesù el ga dito mostra che ne ocore gaver fede nel so sacrifìssio par gaver la vita eterna. (Efe. 1:7) L’è vera che quei che Gesù el ga ciamà de “altre piégore” no i ga de magnar el pan e bever el vin nela Sena del Signor. (Gio. 10:16) Ma, ancora cossita, lori i pol gaver le benedission del sacrifìssio de Gesù. Lori i ga de dimostrar fede in questo sacrifìssio. (Gio. 6:53) Invesse, i untadi i mostra che i fà parte del novo acordo e i podarà governar con Gesù nel cielo. Alora, no importa se semo untadi o dele altre piégore, ne ocore gaver una forte fede nel sacrifìssio de Gesù par gaver la vita eterna. w24.12 p. 13 §§ 14, 16

Nela Sena del Signor, Gesù el ga passà el pan ai apòstoli e el ghe ga dito che quel pan el rapresentea el so corpo. Dopo, lu el ga passà el càlisse de vin e el ga dito che el rapresentea el “sangue del acordo”. (Mar. 14:22-25; Luc. 22:20; 1 Cor. 11:24) Questo novo acordo l’è stà fato intrà quei che i ga la speransa de governar con Gesù nel cielo. (Ebr. 8:6, 10; 9:15) Nela Sena del Signor, Gesù el ga parlà a un pìcolo grupo de persone. Quei fedeli apòstoli che i era con lu quela sera i ze stati i primi che i ga podesto far parte de questo grupo. Par quela Gesù el ghe ga domandà de magnar del pan e bever del vin. Tuti lori i era quei che i riceveria un posto nel cielo con Gesù. w24.12 p. 11 §§ 9, 10

Cossa che Gesù el ga bio de patir par morir? So amighi i lo ga tradio, i so nemighi i lo ga ciapà, ghe ga dito su e i lo ga acusà de robe che no’l gavea fato. I soldadi i lo ga picà su nte un pal de tortura par coparlo. Anca se Gesù el ga sofrio tanto, Geovà el ga patio ancora de pi de veder so Fiol sofrir cossita. Geovà el gavea el poder e la capacità de finir fora col sofrimento del so Fiol che el amea tanto, ma no’l ga fato gnente. Parché? Par causa del so amor. El sacrifìssio de Gesù l’è la prova pi granda che el ama pròpio tanto anca a ti. Lu el ga dato la vita del so caro Fiol e el ga passà par tanto sofrimento par salvar la umanità del pecato e dela morte. (1 Gio. 4:9, 10) Lu el vol giutarne a servirlo, anca se semo pecadori, e el vol cavar via del tuto el pecato. w24.08 p. 6 §§ 13, 14

Sàtana el ga dito che gnanca un servo de Geovà el seitaria leal se fusse fadiga obedirghe. Ma par mostrar che lu l’è un busier, Geovà el ga assà che so Fiol el sofrisse tanto vanti dela so morte. (Giò 2:1-5) Geovà el ga visto quando le persone lo ga tolto in giro, i soldadi ghe ga dato bote e lo ga picà su nte un pal de tortura. Lu el ga visto come Gesù el ga sofrio fin la so morte. (Mat. 27:28-31, 39) Geovà el gavea el poder par salvar so Fiol. (Mat. 27:42, 43) E Ma se lu el gavesse fato qualcossa, Gesù no’l gavaria dato la so vita come sacrifìssio par salvarne e no ghen saria speransa par noantri. Par quela che Geovà el ga assà che el so caro Fiol el sofrisse tanto fin la so morte. Pensarghe in come l’è stà fadiga par Geovà veder el sacrifìssio de Gesù ne assa pròpio sicuri che lu el ne ama tanto. w25.01 p. 22 § 7

Pensa sora quel che i dissìpoli de Gesù i era drio sentir in 16 de nisan del ano 33. Sicuro che, par causa dela morte de Gesù, quei dissìpoli i era drio sofrir e i gavea tanta paura. Alora, in quel giorno, due de quei dissìpoli i ze ndati de Gerusalen fin Emaùs. In quel viaio, un omo che i dissìpoli no i cognossea mia el ga scominsià a far el viaio insieme de lori. I dissìpoli ghe ga contà quel che i era drio sentir e le brute robe che gavea sucedesto a Gesù. Alora, quel omo el ga doperà le Scriture de “Moisè fin tuti i Profeti” par spiegarghe parché che Gesù gavea de sofrir e morir. Quando lori tre i ze rivadi a Emaùs, quel omo el ga contà che lu l’era Gesù. Dopo che Gesù l’è stà ressussità, lu l’è restà ancora 40 giorni qua nela Tera. In questi 40 giorni, lu el se ga fato veder arquante volte ai so dissìpoli che i era tanto desanimadi e spauradi. Ma par causa de quel che Gesù el ga fato par incoraiarli, quei dissìpoli i ga bio el coraio, la alegria e la forsa che ghe ocorea par seitar a predicar e insegnarghe le bone notìssie del Regno. w24.10 p. 12 §§ 1-3

Par vegner grando, un toseto no’l ga de far gnente. Ma par deventar bravi servi de Dio, ghe vol far qualcossa. Par esémpio, i fradei e le sorele in Corinto i ga acetà le bone notìssie, i se ga batesà, i ga ricevesto spìrito santo e i ga imparà tanto del apòstolo Paolo. (Ati 18:8-11) Ma ancora cossita, arquanti ani dopo el so batésimo, tanti no i era gnancora bravi servi de Dio. (1 Cor. 3:2) Par deventar bravi servi de Geovà, ne ocore gaver voia. Quei che ‘i ze contenti de no saver gnente’ mai i sarà boni de esser bravi servi de Geovà. (Pro. 1:22) Noantri no volemo esser compagno a quei che i vien grandi ma che no i vol gaver la responsabilità e i ga sempre bisogno che so pare e so mare i ghe diga cossa far. Invesse, noantri volemo sforsarse par far la nostra amicìssia con Geovà cada volta pi forte. Se semo drio sforsarse par deventar bravi servi de Geovà, ghemo de pregar che lu el ne dae ‘la voia e anca la forsa de farlo’. — Fil. 2:13. w24.04 p. 4 §§ 9, 10

Noantri savemo cossa che Geovà el sente quando el giulga le persone. (Eze. 33:11) Geovà el va finir fora con una persona par sempre sol se no la mèrita pi viver. Lu el ga tanta misericòrdia e la mostra sempre che el pol. Cossa che noantri savemo sora le persone che no le sarà ressussitade? La Bìblia la parla sol de arquanti esempi. Gesù el ga dito che Giuda Iscariote no’l sarà ressussità. (Mar. 14:21; varda anca Gioani 17:12 e la nota de stùdio.) Giuda el savea quel che l’era giusto, ma el ga volesto ndar contra Geovà e el so Fiol. (Varda anca Marco 3:29 e la nota de stùdio.) Nantro esémpio l’è de arquanti lìderi religiosi de quela època. Gesù el ga dito che quei che i era contra lu no i saria mia ressussitadi. (Mat. 23:33; varda anca Gioani 19:11 e la nota de stùdio “o homem”.) E el apòstolo Paolo el ga parlà che i apòstati che i ga seità a ndar contra Geovà no i sarà ressussitadi. — Ebr. 6:4-8; 10:29. w24.05 p. 4 §§ 10, 11

Se restemo amighi de Geovà, Sàtana no’l ne farà gnanca un mal che sìpia par sempre. (1 Gio. 3:8) E in Paradiso, Geovà el ndarà protegerne anca de nantra maniera: lu no’l assarà che morimo. (Apo. 21:4) L’è tanto bel star rento la tenda de Geovà, o sia, poder esser so amighi par sempre. (Eze. 37:27) Ma cossa che ghemo de far par seitar rento la so tenda? Proa pensar sora questo: Se te sì stà convidà par ndar ala casa de un amigo tuo, sicuro che te volarè saver quel che ghe piase a lu. Dela stessa maniera, noantri volemo saver cossa che Geovà el vol che femo par seitar nela so tenda. E come lo amemo tanto, ndaremo “far tuto quel che ghe piase a lu”. (Col. 1:10) Cossita, volemo gaver tanto rispeto par Geovà e mai desmentegarse che lu l’è una persona tanto importante. Se pensemo cossita, ndaremo obedirghe con umiltà e mai faremo qualcossa che ndarà ofenderlo. — Mic. 6:8. w24.06 p. 4 §§ 8, 9

Geovà el ghe ga domandà a Abraon de sacrificar so fiol, Isache. Anca se l’era una roba tanto fadiga de far par Abraon, lu el ga obedio. Quando Abraon l’era quasi drio copar so fiol, Dio lo ga fermà. Quel che Abraon el ga fato ne insegna quel che Geovà el ndaria far pi avanti, o sia, lu el ndaria dar de volentiera el so Fiol come sacrifìssio. Geovà el ama pròpio tanto le persone. (Gén. 22:1-18) Quando Geovà el ga dato la Lege ai israeliti, lu el ghe ga dito che i gavea de far sacrifissi par gaver el perdon dei pecati. (Lev. 4:27-29; 17:11) Questi sacrifissi i mostrea che Geovà el faria un sacrifìssio ancora meio che el ndaria salvar le persone del pecato. Par meso dei profeti, Geovà el ga dito che ghen saria un dissendente, o sia, el Fiol de Dio, che el ndaria sofrir e morir par noantri. — Isa. 53:1-12. w24.08 p. 4 §§ 7, 8

Quando te ledi la Bìblia, te ghè de pensar in come meter in pràtica quel che te ghè ledesto. Alora, intanto che te ledi un versìcolo dela Bìblia, domandate: ‘Come che mi posso meter in pràtica quel che go imparà de questo testo ancoi e pi avanti?’ Par giutarte a capir, proa pensar che te sì drio leder 1 Tessalonissensi 5:17, 18. Dopo de leder questi due versìcoli, te pol pensar quante volte te preghi a Dio e come che te pol far meio le to orassion. Dopo, te pol anca pensar in bele robe che Geovà el te ga dato. E fursi, te dessidi ringrassiar a Geovà par tre robe che te ghè pensà. Cossita, ghemo visto che anca se te pensi sora in quel che te ghè ledesto nela Bìblia sol pochi minuti, te sarè bon de capir meio la Parola de Dio e de meter in pràtica quel che la dise. Sicuro che se te fè cossita tuti i giorni, la Bìblia la ndarà giutarte tanto e te sarè bon de meter in pràtica quel che la dise. w24.09 p. 4, 5 §§ 9, 10

Geovà el ne ga creà de una maniera che semo felici quando giutemo i altri. Sicuro che restemo contenti quando i fradei i mostra che i dà valor a quel che ghemo fato par lori. Ma, anca se lori no i ne ringràssia, restemo contenti de saver che ghemo fato la roba giusta. No ghemo mai de desmentegarse che ‘Geovà el pol darne tanto de pi de questo’. (2 Cró. 25:9) Alora, Geovà el ndarà sempre ricompensarne con tanto de pi de quel che ghemo fato. E la roba che ne dà de pi alegria l’è esser ricompensadi par Geovà. Alora, volemo sforsarse par seitar a far robe bone ai altri compagno a Geovà. w24.09 p. 31 §§ 20, 21

Geovà el ga misericòrdia e compassion. (Sal. 103:13; Isa. 49:15) Lu anca el capisse i nostri sentimenti. Alora, quando sofrimo, anca lu el sofre. (Zac. 2:8) Geovà el ne giuta a rivarse darente a lu e deventar so amighi. (Sal. 25:14; Ati 17:27) Lu anca el ga tanta umiltà. La Bìblia fin la dise che lu ‘el se sbassa par vardar el cielo e la Tera e el leva su el ùmile dela polver’. (Sal. 113:6, 7) Par causa de queste bele qualità, noantri volemo darghe glòria al nostro caro Dio. Noantri demo glòria a Geovà parché volemo che i altri lo cognossa. Tante persone no le sa la verità sora Geovà parché le crede in tante busie de Sàtana. (2 Cor. 4:4) Lu el ga dito che Geovà l’è un Dio cativo, che no ghe bada quel che sucede con noantri, e che l’è lu che ne fà sofrir. Invesse, noantri savemo la verità sora Dio. Par quela, podemo contarghe ale persone come Geovà l’è bon, e lore le podarà lodarlo insieme a noantri. — Isa. 43:10. w25.01 p. 3 §§ 6, 7

Anca se Gesù el fusse perfeto e el gavesse fato tanti bei miràcoli, Sàtana el ga doperà arquante persone par contar busie sora lu. Par esémpio, i lìderi religiosi i parlea che Gesù ‘el parea via i demoni par meso del governante dei demoni’. (Mar. 3:22) E quando Gesù l’era drio esser giulgà, questi lìderi religiosi i ga dito che lu el bestemea contra Dio e i ga incoraià le persone a domandar che i governanti i mandesse coparlo. (Mat. 27:20) E quando i dissìpoli i era drio predicar, i so nemighi i ga incoraià le persone a vegnerghe contra e a perseghirli. (Ati 14:2, 19) Varda quel che La Sentinela de 1 de disembre de 1998 la ga spiegà sora Ati 14:2: “Quei che i vegnea contra Gesù e i so dissìpoli no i volea mia acetar quel che lori i predichea. Par quela, questi nemighi i seitea a parlar robe tanto brute sora i dissìpoli e i volea che le persone no li scoltesse mia e che li odiesse.” Ancoi, Sàtana “l’è drio imbroiar tute le persone dela tera”. w24.04 p. 11 §§ 15, 16

No ne ocore mia preocuparse con quando una persona la more, parché Geovà l’è el Giuis perfeto e lu sempre el fà dessision con giustìssia. (Sal. 33:4, 5) Alora, podemo esser sicuri che el “Giuis de tuta la tera” el farà sempre quel che l’è giusto. Milioni de persone ancoi le vive in posti ndove mai le sarà bone de scoltar le bone notìssie del Regno. (Mat. 25:46) Ma questo no vol mia dir che Geovà el ndarà giulgarle come cavre. Cossita capimo che tute le persone le pol gaver la speransa de viver par sempre, no importa ndove le ze de star. Ghemo de ricordarse che Geovà el ghe vol ben a tute le persone. L’è vera che no savemo mia quel che el farà nela granda tribolassion con queste persone. Ma pol esser che dopo che la scomìnsia, arquante persone le scominsiarà a gaver fede in Geovà quando el santificarà el so nome davanti de tuti. — Eze. 38:16. w24.05 p. 12 §§ 14, 15

Ne piase tanto giutarse un al altro. (2 Cor. 8:4) Ma, dele volte, ne ocore de coraio par giutar i nostri fradei. Par esémpio, i ansiani i mostra tanto coraio par giutar i so fradei quando ghen’è una guera. Lori ghe ocore de coraio par incoraiar i so fradei, portarghe Bìblie, publicassion, robe de vestir, robe de magnar e catarghe un posto de star. Come i ansiani i ama tanto i so fradei, lori i ze pronti par giutarli con quel che ghe ocore, anca se i mete in rìscio la so vita. Quando sucede una desgràssia l’è importante esser obediente. Alora, sfòrsate de obedir ale orientassion de Betel. (Ebr. 13:17) La organisassion la ne dise come pareciarse par una desgràssia. Alora, i ansiani sempre i ga de leder queste orientassion par saver come giutar i fradei. (1 Cor. 14:33, 40) Gàpia coraio, ma stà atento. (Pro. 22:3) Pensa ben vanti de far qualcossa e no stà risciar la to vita se no ghe ocore pròpio. Fìdate in Geovà. Col so aiuto, te sarè bon de giutar i to fradei e to sorele dela meio maniera. w24.07 p. 4 § 8; p. 5 § 11

Davi el cognossea ben a Geovà e el se fidea del tuto in lu. Par esémpio, quando el rè Saul e altri nemighi i era drio proar coparlo, Davi el ga pregà par domandar aiuto a Geovà. Dopo che Geovà lo ga salvà, Davi el ga dito: “Geovà el vive.” (Sal. 18:46) Cossa che Davi el volea dir? Un libro che el spiega tante robe sora la Bìblia el ga dito che Davi el volea mostrar che el se fidea che Geovà l’è el ‘Dio che el vive e che l’è sempre pronto par giutar i so servi’. Davi el cognossea a Geovà e el savea che el ndaria sempre giutarlo. Par quela, lu el ga seità a servir e a lodar a Geovà. (Sal. 18:28, 29, 49) Se noantri semo sicuri che Geovà l’è el Dio che el vive, saremo boni de meterghela tuta nela nostra adorassion a lu e sempre volaremo esser so amighi. Anca gavaremo forsa par dàrghene fora con qualche dificoltà e faremo el nostro meio a lu. w24.06 p. 20, 21 §§ 3, 4

Cossa che podemo imparar dele parole del apòstolo Paolo ai tessalonissensi? Quando scoltemo qualcossa che no la ze de acordo con quel che ghemo imparà dela Bìblia o quando scoltemo una stòria che la ze tanto difarente de quel che ghemo scoltà fin adesso, ghemo de mostrar sabedoria. Nela època che ghen’era la Union Soviètica, i nostri nemighi i ga fato una carta che parea che la vegnesse dela Sede Mondial. La carta la disea che i fradei i gavaria de far nantra organisassion. Ma i fradei fedeli no i ze mia stati imbroiadi. Lori i ga capio che quel che la carta la disea no l’era de acordo con quel che i gavea imparà. Ancoi, quei che i ze contra la organisassion i dopera la internet e le rede sossiai par proar finir fora cola nostra union. Invesse de creder suito in queste stòrie, noantri ghemo de star atenti e veder se quel che scoltemo e ledemo l’è de acordo cole verità che ghemo imparà. — 2 Tes. 2:2; 1 Gio. 4:1. w24.07 p. 12 §§ 14, 15

La dessision pi importante dela nostra vita la ze stata de dedicar la nostra vita a Geovà e adorarlo insieme ai nostri cari fradei e sorele. Geovà el vol che tute le persone le fae questa dessision parché el vol che le gàpia una bela amicìssia con lu, le sìpia felice e le viva par sempre. (Deu. 30:19, 20; Gàl. 6:7, 8) Ma Geovà no’l obriga nissun a obedirghe. Invesse, lu el vol che cada un el fae la so dessision de volentiera. Ma, se una persona belche dedicada la fà un bruto pecato e no la se ciama grama, ela la ga de esser cavada via dela congregassion. (1 Cor. 5:13) Ancora cossita, Geovà el vol tanto che questa persona la se ciame grama e la sìpia nantra volta so amiga. Podemo esser sicuri de questo, parché Geovà el ga dato la vita de Gesù par perdonar i nostri pecati. Lu el ne ama tanto e el vol che tuti i pecadori i se ciame grami. — Zac. 1:3; Rom. 2:4; Tia 4:8. w24.08 p. 14 §§ 1, 2

Nela so tersa carta, el apòstolo Gioani el ga dito che l’era pròpio contento de veder che so cari fradei e sorele i era leai a Geovà. In quela època, arquanti i era drio insegnar busie e intrigar la union dela congregassion. Ma ghen’era de quei che i seitea a obedir la verità e i comandamenti de Dio. (2 Gio. 4, 6) Sicuro che questi bravi fradei e sorele i ga assà Gioani e Geovà tanto contenti. (Pro. 27:11) Cossa che imparemo? Quando obedimo a Geovà semo pi felici e anca assemo altri contenti. (1 Gio. 5:3) Par esémpio, quando femo quel che l’è giusto e semo boni de dàrghene fora cole voie sbaliade, noantri restemo tanto contenti. Anca Geovà e i àngeli i resta contenti de veder che seitemo leai. (Luc. 15:10) L’è una alegria veder che nostri fradei e sorele i seita leai a Geovà. (2 Tes. 1:4) Sicuro che dopo che Geovà el finisse fora col mondo de Sàtana, restaremo tanto contenti de saver che ghemo seità leai a Geovà. w24.11 p. 12 §§ 17, 18

Quanto tempo te toca spetar fin parlar cola persona che te vol smorosarla? Se te vè parlar con ela massa presto, pol esser che ela la pense che te sì una persona che no pensa ben vanti de far dessision. (Pro. 29:20) Ma se te la tiri massa longa, fursi ela la pol pensar che ti no te sè mia quel che te vol. (Ecl. 11:4) L’è vera che quando te dessidi cognosser un poco meio una persona, questo no vol dir che te toca esser sicuro che te vol maridarte con ela. Invesse, te toca esser sicuro che te sì pronto par maridarte e che te ghè capio che ela la ze una brava persona par maridarte. Ma cossa far se una persona la vol smorosarte? Se no te ghè mia la medèsima voia, mostra par meso de come te la trati che no te vol smorosarla. Saria tanto bruto far finta de voler smorosar qualchedun se no te vol mia. — Efe. 4:25. w24.05 p. 22, 23 §§ 9, 10

Sol quei untadi che i seita fedeli i ndarà governar insieme a Gesù nel Regno de Dio. Par quela, tuti i untadi che i vol esser ‘intrà i scoliesti’ i ga de seitar atenti, o sia, sforsarse par gaver una forte amicìssia con Geovà e una forte fede. (Mat. 24:31) Ma no l’è mia sol i untadi che i ga de seitar atenti. Invesse, tuti quei che i serve a Geovà i ga de far el so meio par seitar atenti e leai. Noantri se fidemo che Geovà sempre fà quel che l’è giusto parché lo cognossemo tanto ben. Alora, par noantri, no importa se lu el ga dessidio scòlier arquanti dei so servi par ndar al cielo nei nostri giorni. Podemo ricordarse dela ilustrassion che Gesù el ga contà sora i òmini che i era drio laorar nte un vignal nela dèssima prima ora. (Mat. 20:1-16) Quei che i ga scominsià a laorar bonora nel giorno i ga ricevesto el stesso salàrio che quei che i ga scominsià a laorar pi tardi. Dela stessa maniera, no importa se Geovà el ga scoliesto un dei nostri fradei par esser untà tanti ani indrio o fà poco tempo, lu el podarà viver par sempre nel cielo se el seita fedele. w24.09 p. 24 §§ 15-17

Gesù el ga sofrio tanto quando arquanti dela so fameia e anca altre persone lo ga tratà mal. Par esémpio, arquanti dela so fameia i ga dito che lu l’era mato, lìderi religiosi i disea che lu el laorea insieme i demoni e soldadi romani i ghe ga ridesto drio, i ghe ga fato mal e i lo ga copà. (Mar. 3:21, 22; 14:55; 15:16-20, 35-37) Ancora cossita, Gesù mai el ga fato qualcossa contra quele persone. Ma cossa ancora podemo imparar? (1 Pie. 2:21-23) Gesù l’è stà un bel esémpio de cossa ghemo de far quando i altri i ne trata mal o quando semo drio sofrir. Lu el savea quando el gavea de parlar e quando el gavea de taser. (Mat. 26:62-64) E dele volte, quando i altri i disea busie sora lu, Gesù el dessidia no parlarghe gnente. (Mat. 11:19) Ma lu mai el ghe ga dito su a nissuni quando el parlea qualcossa. w24.11 p. 4, 5 §§ 9, 10

Metemo dir che te dè un presente a una persona che te ghe vol tanto ben. Questo presente l’è pròpio bel e ndarà giutarla tanto. Sicuro che te restarissi tanto disgustà se ela lo tresse nte un canton e no la se ricordesse pi de quel bel presente. Ma, te restarissi contento se la persona lo doperesse ben e la te ringrassiesse. Cossa che questo ne insegna? Geovà el ne ama tanto e el ne ga dato un presente tanto bel che l’è stà la vita del so fiol. Alora, l’è sicuro che lu el resta tanto contento quando mostremo che ghe demo valor a questo presente. (Gio. 3:16; Rom. 5:7, 8) Pol esser che pin pian se desmenteghemo come el sacrifìssio de Gesù l’è importante par noantri. Se questo sucede, saria come trar el bel presente che Geovà el ne ga dato nte un canton. Pol esser che fin restemo contenti de gaverlo, ma no pensemo mai in questo presente. Sicuro che no volemo mia che una roba cossita suceda. Invesse, volemo seitar a pensarghe sora quel che Geovà e Gesù i ga fato par noantri. w25.01 p. 26 §§ 1, 2

Un fradel che vol esser un ansiano no’l ga de esser un che l’è pena deventà dissìpolo de Cristo. Questo no vol mia dir che lu el ga de esser batesà fà tanti ani. Invesse, vol dir che ghe ocore tempo fin che lu el devente un bravo servo de Geovà. Alora, vanti de deventar un ansiano, un fradel el ga de mostrar che l’è ùmile e che el se fida in Geovà in tuto quel che el fà, compagno a Gesù. (Mat. 20:23; Fil. 2:5-8) Lu anca el ga de mostrar che l’è leal in obedir a tute le lege, prinsipi e orientassion de Geovà e dela so organisassion. La Bìblia la dise che un ansiano el ga de esser bravo de insegnar. Sarà che questo vol dir che a tuti i ansiani ghe toca far bei discorsi? Nò. Arquanti ansiani no i fà discorsi tanto bei cossita. Ma, lori i ze bravi predicadori e i dopera tanto ben la Bìblia par insegnar e incoraiar i so fradei e sorele. w24.11 p. 23, 24 §§ 14, 15

Se te ledi qualcossa nela Bìblia e no te capissi ben, stùdia de pi. Dopo, in quel giorno, seita a pensarghe sora quel che te ghè studià e quel che te ghè capio sora Geovà, Gesù e el grando amor che i ga par ti. (Sal. 119:97) Ma no stà restar desanimà se no te sì bon de capir robe nove tute le volte che te ledi o che te studi la Bìblia. Studiar la Bìblia l’è compagno a ndar in serca de oro. La persona la ga de laorar arquante ore o fin giorni par catar fora un pìcolo tocheto de oro. Ancora cossita, ela la seita a sforsarse parché la sa che quel tocheto de oro el ga tanto valor. Dela medèsima maniera, noantri seitemo a studiar parché savemo che tute le robe nove che capimo val tanto de pi che el oro! (Pro. 8:10) Par quela, gàpia passiensa e seita a sforsarte par catar bele robe nela Bìblia. — Sal. 1:2. w25.01 p. 24, 25 §§ 14, 15

Geovà el vol che semo sempre pronti a perdonar quei che i ne disgusta. (Sal. 86:5; Luc. 17:4; Efe. 4:32) Pol esser che restemo tanto disgustadi par causa de quel che una persona la ga fato o la ga dito. E restemo ancora pi disgustadi se l’è stà un amigo o qualchedun dela fameia. (Sal. 55:12-14) Dele volte, sofrimo tanto che l’è come se gavessino ciapà un ‘colpo de una spada’. (Pro. 12:18) E fursi proemo far finta che no semo disgustadi. Ma far cossita saria come ciapar un colpo de una spada e assarla lì rento. Alora, anca se femo finta che no semo disgustadi, questo no vol dir che restaremo meio. Quando qualchedun ne ofende, pol esser che ne vien su la ràbia. La Bìblia la dise che dele volte fursi restemo cativi. Ma anca la dise che no podemo seitar a restar inrabiadi. (Sal. 4:4; Efe. 4:26) Parché? Parché se semo inrabiadi, ndaremo far brute dessision. (Tia. 1:20) Alora, ghemo de ricordarse che, anca se ne vien su la ràbia, semo noantri che dessidimo se seitaremo inrabiadi o nò. w25.02 p. 15 §§ 4-6

Gesù el ga contà una stòria par insegnar che una persona no la ga sabedoria se la sparagna soldi ma no la ga una forte amicìssia con Dio. (Luc. 12:16-21) Ghemo de ricordarse che nissun el sa quel che sucederà nel futuro. (Pro. 23:4, 5; Tia. 4:13-15) E Gesù el ga dito che tuti quei che i volesse esser so dissìpoli i gavaria de esser pareciadi par assar in drio tuto quel che i ga. (Luc. 14:33) Nel primo sècolo, questo ga sucedesto con arquanti dissìpoli dela Giudea. Lori i ga assà indrio de volentiera tuto quel che i gavea. (Ebr. 10:34) Ancoi, tanti fradei i ga perso el so laoro e le robe che i gavea parché no i ga volesto meterse nela polìtica. (Apo. 13:16, 17) Cossa che li ga giutadi a dàrghene fora? Lori i era pròpio sicuri dela promessa de Geovà: “Mi mai vao assarte, mai vao abandonarte”. (Ebr. 13:5) Alora, noantri femo el nostro meio par gaver quel che ne ocorerà nel futuro. Ma, semo sicuri che Geovà ne tenderà, anca se perdemo tuto. w25.03 p. 29 §§ 13, 14

Geovà no’l speta che deventemo bravi servi soi sensa gnanca un aiuto. Invesse, lu el ne dà tuto quel che ne ocore. Cossa che Geovà el ne dà? Lu el ne dà bravi ansiani che i ne tende e i ne insegna a come gaver una forte amicìssia con Dio e deventar “compagno a Cristo”. (Efe. 4:11-13) Geovà anca el ne dà so spìrito santo par giutarne a gaver “la mente de Cristo”. (1 Cor. 2:14-16) E Geovà anca el ne ga dato i Vangeli che i ne mostra come che Gesù el pensea, el parlea e el fea le robe quando l’era qua nela Tera. Se noantri pensemo e femo le robe compagno a Gesù, podemo deventar bravi servi de Geovà. w24.04 p. 4, 5 §§ 11, 12

Noantri ghemo de far dessision tuti i giorni. Arquante dessision le ze fàcile de far, come par esémpio, cossa magnar par colassion e a che ora ndar in leto. Invesse, altre dessision le ze difìcile de far. Se femo bone dessision, gavaremo pi salute, saremo pi felici, giutaremo la nostra fameia e serviremo meio a Geovà. L’è sicuro che volemo far dessision che le sìpia bone par noantri e par la nostra fameia e che ghe piase a Geovà. (Rom. 12:1, 2) Ma par far una bona dessision, prima ghemo de saver tuto quel ne ocore. Parché che l’è importante? Proa pensar nte una persona che la va al dotor parché la ga un bruto problema de salute. L’è sicuro che el dotor no’l va dirghe che tratamento che la ga de far sensa gnanca vardarla, o sensa gnanca farghe domande. Alora, compagno al dotor, anca noantri ghemo de saver tuto quel che ne ocore vanti de far una dessision. w25.01 p. 14 §§ 1-3

Cossa che savemo sora la misericòrdia de Geovà? Sarà che lu el ga belche mostrà che ‘no’l vol che gnanca una persona la sìpia destruta’? (2 Pie. 3:9) Vedemo come che Geovà el ga mostrà misericòrdia a due rè de Israel. El rè Davi el ga fato imoralità, el ga copà un omo e el ga fato altri bruti pecati. Ma lu el se ga ciamà gramo, e Geovà el ga mostrà misericòrdia quando lo ga perdonà. (2 Sam. 12:1-12) El rè Manassè el ga fato pecati pròpio bruti par tanti ani. Ancora cossita, quando lu el se ga ciamà gramo, Geovà lo ga perdonà. (2 Cró. 33:9-16) Questi esempi ne mostra che sempre che una persona la fà un sbàlio e la se ciama grama, Geovà el ndarà mostrar misericòrdia. Alora, semo sicuri che tuti quei che i se ga ciamà grami dei so pecati i sarà ressussitadi. w24.05 p. 4 § 12