Maio

Dopo che Geovà el ga liberà i israeliti del Egito, lu el ga scoliesto sasserdoti par servir nel tabernàcolo, e i leviti par far altri laori del tabernàcolo. Ma sarà che Geovà el tratea queste persone o i israeliti che i stea darente del tabernàcolo meio che i altri? Nò, parché lu el trata a tuti dela medèsima maniera. In quela època, Geovà el ga volesto che tuta la nassion la fusse bona de veder la colona de nùvola e la colona de fogo che ghen’era sora el tabernàcolo. (Éso. 40:38) Cossita, quando la nùvola la scominsiea a moverse, tuti i era boni de vederla, de scominsiar a rangiar le so robe, de meter via le so tende e de ndar via tuti insieme. (Nùm. 9:15-23) Tuti i israeliti podea gaver una forte amicìssia con Geovà. La medèsima roba la sucede ancoi parché, no importa ndove vivemo, Geovà el ama, el tende e el protege a tuti noantri. w24.06 p. 4 §§ 10-12

Varda come che Zadoche el ga mostrà lealtà a Davi e el ga protegesto altri israeliti. Absalon, fiol de Davi, el volea copar so pare par esser rè. (2 Sam. 15:12, 13) Alora, Davi el gavea de suito scampar via de Gerusalen. Ma intanto che i so servi i era drio ndar via, Davi el se ga nicorto che qualchedun gavea de restar in Gerusalen par dir cossa che Absalon el ndaria far. Alora Davi el ga domandà a Zadoche e altri sasserdoti che i tornesse a Gerusalen par contarghe cossa che l’era drio suceder. (2 Sam. 15:27-29) Par far quel che Davi ghe gavea domandà, quei sasserdoti i gavea de esser pròpio atenti. Par salvar la so vita, Davi el ga domandà aiuto a Zadoche e a Usai, so amighi leai. (2 Sam. 15:32-37) Alora, Usai el ga fato finta che l’era dela banda de Absalon e el ghe ga dito come che el podaria copar Davi. Ma quel che Usai el gavea dito a Absalon daria tempo par Davi pareciarse. Dopo, Usai el ga dito a Zadoche e a Abiatar quel che Absalon el ndaria far, e lori i ga parlà a Davi. (2 Sam. 17:8-16) Cossita, lori i ze stati boni de proteger la vita de Davi. — 2 Sam. 17:21, 22. w24.07 p. 4, 5 §§ 9, 10

Tanti servi de Geovà ancoi i resta desanimadi par causa dei sbali che i ga fato. Arquanti i se sente in colpa par causa dei sbali che i ga fato ancora vanti de batesarse. Ma ghemo de ricordarse che Geovà el ga mandà Gesù par dar la so vita par noantri parché el ne ama tanto. Geovà el vol che acetemo questo bel presente. Podemo esser sicuri che dopo che ‘ghemo metesto a posto le robe’ intrà noantri e Geovà, lu el ne perdona del tuto. L’è tanto bel saver che lu no’l se ricorda dei nostri sbali del passà, ma che ghe piase tanto ricordarse dele bele robe che ghemo fato. (Sal. 103:9, 12; Ebr. 6:10) Se te sì desanimà par causa dei sbali che te ghè fato nel passà, sfòrsate de pensar in quel che te pol far de adesso avanti. No podemo cambiar quel che ghemo belche fato, ma podemo far el nostro meio a Geovà ancoi e esser premosi de veder le bele promesse che lu el ga fato realisarse. w24.10 p. 8 §§ 8, 9

Quando te ledi la Bìblia, pol esser che te resti desanimà parché te te nicordi che te ghè una mùcia de robe de cambiar. Metemo dir che te sì drio leder el libro de Tiago e te impari che te ghè de tratar tute le persone dela medèsima maniera. (Tia. 2:1-8) Alora, te vedi che te ghè de cambiar la maniera che te trati le persone. Nel giorno dopo, quando te sì drio leder la Bìblia, te impari che te ghè de star atento a quel che te parli. (Tia. 3:1-12) Dopo de pensarghe sora, te te nicordi che no te ghè sempre parlà con bontà e te dessidi parlar de una maniera che ndarà incoraiar i altri. Nel pròssimo giorno, te impari che no ghemo mia de far le robe compagno le persone del mondo le fà. (Tia. 4:4-12) E te te nicordi che te toca scòlier meio quel che te fè par divertirte. Se te sucede una roba cossita, l’è sicuro che nel pròssimo giorno te restarè desanimà parché te ghè catà fora una mùcia de robe che te toca cambiar. Ma no stà restar desanimà. Ricòrdate che ‘meter su la nova personalità’ la ze una roba che ghemo de seitar a far. w24.09 p. 5, 6 §§ 11, 12

Gesù el savea che Geovà no l’era de acordo cole robe sbaliade che i altri i era drio far, e el se fidea che nela ora giusta Geovà el faria quel che l’è giusto. Quando qualchedun ne trata mal, podemo far compagno el esémpio de Gesù e controlar quel che parlemo. Dele volte, sucede robete che l’è meio assar star, o fursi dessidimo che l’è meio no parlar gnente par no far vegner fora ancora de pi problemi. (Ecl. 3:7; Tia. 1:19, 20) Ma dele volte pol esser che gavaremo de parlar qualcossa par difender a qualchedun o par spiegar quel che credemo. (Ati 6:1, 2) In queste situassion, ghemo de sforsarse par parlar con calma e rispeto. Anca podemo far compagno a Gesù e fidarse in Geovà, “quel che giulga de maniera giusta”. — 1 Pie. 2:23. w24.11 p. 5, 6 §§ 10-12

Noantri restemo tanto contenti se un fradel che el ga fato un bruto pecato el se ciama gramo! (Luc. 15:7) L’è vera che i ansiani i se ga sforsà tanto par giutarlo. Ma ghemo de ricordarse de quel che el apòstolo Paolo el ga dito par saver chi che lo ga pròpio giutà. Lu el ga dito: ‘Fursi Dio el pol assar che el càmbie’. (2 Tim. 2:25) Alora, l’è stà Geovà, e nò una persona, che ga giutà questo fradel a cambiar la so maniera de pensar e quel che el fea. Paolo anca el ga parlà dele robe bone che sucede dopo che el se ciama gramo. Lu el scomìnsia a capir meio la verità, a pensar dela maniera giusta e a esser bon de scampar via dele tràpole de Sàtana. (2 Tim. 2:26) Quando una persona la se ciama grama, i ansiani i seitarà a farghe vìsite par giutarla a far pi forte la so fede, a gaver forsa de dàrghene fora cole tràpole de Sàtana e par seitar far quel che l’è giusto. — Ebr. 12:12, 13. w24.08 p. 23 §§ 14, 15

Una mùcia de persone le ze ndate nantra volta fin el posto ndove Gesù el gavea fato el miràcolo dei pan. Ma Gesù e i apòstoli no i era pi là. Alora, tute quele persone le ze ndate de barco de Tiberiadi fin Cafarnaun par proar catar Gesù. (Gio. 6:22-24) Sarà che lore le volea imparar de pi sora el Regno de Dio? Nò. Lore le era drio ndar in serca de Gesù parché le volea pan. Come che lo savemo? Varda quel che Gesù el ga dito sora quel che ga sucedesto dopo che quele persone lo ga catà darente de Cafarnaun. Lu el ga dito che lori i gavea ‘magnà dei pan fin che bastea’ e che i gavea magnà el “magnar che el se smarsisse”. Par quela, Gesù li ga incoraiadi a sforsarse de gaver el magnar che li ‘faria viver par sempre’. (Gio. 6:26, 27) Gesù el ga dito che so Pare el ghe gavaria dato questo magnar. w24.12 p. 5 §§ 8, 9

Fradel, par insegnar meio, te ghè de sempre doperar la Bìblia par insegnar e dar consili. Par quela, te ghè de studiar tanto la Bìblia e le nostre publicassion. (Pro. 15:28) Intanto che te studi, stà atento a cossa che te pol imparar de cada versìcolo dela Bìblia. E quando te vè insegnar a qualchedun, sfòrsate de motivarlo a meter in pràtica quel che el ga imparà. Una roba che pol giutarte l’è domandar aiuto e consili a un bravo ansiano. (1 Tim. 5:17) I ansiani i ga de incoraiar i so fradei e sorele e, dele volte, i gavarà de darghe consili par indrissarli. Ma sempre i ga de farlo con tanta bontà. Alora, se te parli ai altri con bontà e amor, e te doperi la Bìblia par insegnarghe e darghe consili, te sarè drio far compagno a Gesù. — Mat. 11:28-30; 2 Tim. 2:24. w24.11 p. 24 § 16

Noantri podemo dar glòria a Geovà par meso de quel che parlemo sora lu. Ghe demo glòria al nostro caro Pare quando ‘cantemo a lu’, ‘benedimo el so nome’, ‘proclamemo le bone notìssie de salvassion’ e ‘parlemo dela so glòria a tute le nassion’. (Sal. 96:1-3; Ati 4:29) Noantri podemo anca dar glòria a Geovà par meso de quel che ghemo. I servi de Geovà sempre ghe ga dato glòria cossita. (Pro. 3:9) Par esémpio, i israeliti i ga dato soldi e altre robe par far su e par rangiar el témpio. (2 Rè 12:4, 5; 1 Cró. 29:3-9) Quando Gesù l’era qua nela Tera, arquanti dissìpoli i ga doperà quel che i gavea par giutar a lu e ai so apòstoli. (Luc. 8:1-3) E nel primo sècolo, altri dissìpoli de Gesù i ga doperà i so soldi par giutar fradei e sorele che i era drio patir la fame. (Ati 11:27-29) Ancoi, tuti noantri podemo dar glòria a Geovà par meso dei nostri donativi. w25.01 p. 4 § 8; p. 5 § 11

Cossa che ga giutà Cornèlio a esser batesà? La Bìblia la dise che ‘lu e tuti dela so casa i gavea tanto rispeto par Geovà’, e che el gavea el costume de pregar tanto a Dio. (Ati 10:2) Alora, quando Piero ghe ga parlà sora le bone notìssie, Cornèlio e la so fameia i ga bio fede e suito i se ga batesà. (Ati 10:47, 48) Cossita, vedemo che Cornèlio l’è stà batesà parché l’era pronto par cambiar quel che ghe ocoresse par adorar a Geovà insieme la so fameia. (Gios. 24:15; Ati 10:24, 33) Cornèlio l’era tanto importante intrà le persone. Ma lu no’l ga bio paura de quel che lore le ndaria pensar se lu el deventesse un dissìpolo de Gesù. Dela medèsima maniera, pol esser che te toca far arquanti cambiamenti nela to vita par esser una Testimònia de Geovà. Ma ricòrdate che l’è Geovà che te giutarà. Se te vol meter in pràtica quel che te sì drio imparar e far quel che lu el vol, Geovà el sarà contento de darte el aiuto che te ghè de bisogno. w25.03 p. 5 §§ 12, 13

Cossa gheto de far se te scolti busie sora la organisassion e sora quei che Geovà el ga scoliesto par tender de noantri? Ricòrdate de quel che i nemighi de Dio i ga fato contra Gesù e contra i primi dissìpoli. Anca ricòrdate che Gesù el ga dito che le persone le ne vegnaria contra e le contaria busie sora noantri. (Mat. 5:11, 12) Vedemo che queste robe le ze drio suceder ancoi. Se noantri se ricordemo de ndove vien queste busie e se femo suito qualcossa par protegerse, saremo boni de no ndarghe drio. Ma come che podemo protegerse de queste busie? No stà ndarghe drio ale stòrie false. El apòstolo Paolo el ga dito quel che ghemo de far quando scoltemo stòrie cossita. Lu el ga dito: ‘Te ghè de ricusar e no darghe atension a stòrie false.’ (1 Tim. 1:3, 4) Alora, noantri mai ndarìssino creder in stòrie false parché savemo che le ze sporche, o sia, che le vien de Sàtana. Pitosto, volemo scoltar sol quel che l’è vero. — 2 Tim. 1:13. w24.04 p. 11 § 16; p. 13 § 17

Resta insieme con quei che i ze leai a Geovà. Dio el vol che lo servimo in union coi nostri fradei e sorele. Noantri ndaremo restar unidi se obedimo ala verità. Quei che i parla in volta robe che va contra la verità i rovina la nostra union. Par quela che Dio el ne dise de ‘star distanti de lori’. Se restemo insieme a queste persone, podemo scominsiar a creder in robe che no le ze vere e abandonar a Geovà. (Rom. 16:17) Quando capimo quala che la ze verità e metemo in pràtica quel che imparemo, noantri restemo pi darente de Geovà e ghemo una fede forte. (Efe. 4:15, 16) Anca no saremo imbroiadi par i insegnamenti falsi de Sàtana e saremo sicuri che Geovà el ne tenderà nela granda tribolassion. Alora, se semo sempre sicuri de quala che la ze la verità, el ‘Dio dela pace el sarà con noantri’. — Fil. 4:8, 9. w24.07 p. 13 §§ 16, 17

Gesù l’è vegnesto par giutar le persone che le era desanimade par causa dei so pecati. Lu el savea che l’era par causa del pecato che le persone le era drio sofrir. Alora, lu el ga giutà òmini e done che altri li vedea come pecadori. Lu el ga spiegà una verità importante: “Quei che i ga salute no ghe ocore de dotor, ma quei maladi, si . . . No son vegnesto par ciamar i giusti, ma par ciamar i pecadori.” (Mat. 9:12, 13) Gesù el ga fato pròpio cossita. Quando una dona la ga piandesto tanto davanti de lu, lu el ghe ga dito con tanto amor che el perdonea i so pecati. (Luc. 7:37-50) Gesù el ga insegnà a una dona samaritana verità importante, anca se el savea che la era drio viver con un omo che no l’era so sposo. (Gio. 4:7, 17-19, 25, 26) E Dio el ga dato poder a Gesù de finir fora cola morte. Come? Gesù el ga ressussità òmini, done, toseti e anca gente pi granda. — Mat. 11:5. w24.08 p. 4 §§ 9, 10

Geovà el darà glòria al so nome quando el ndarà giulgar a tuti. Presto lu el ndarà finir fora con Babilònia, la Granda, che la ze drio far tante robe brute e insegnar tante busie sora Dio. (Apo. 17:5, 16; 19:1, 2) Arquanti i volarà adorar a Geovà insieme dei so servi dopo che Babilònia, la Granda, la sarà finida fora. Nel Armagedon, Geovà el ndarà finir fora col mondo de Sàtana e con tuti quei che i lo òdia e che i conta busie sora lu. Ma Geovà el ndarà salvar tuti quei che ghe obedisse e che i vol darghe glòria. (Mar. 8:38; 2 Tes. 1:6-10) Alora, nel fin del Governo de Mila Ani de Cristo, Geovà el ndarà santificar el so nome davanti a tuti. (Apo. 20:7-10) Nel futuro, ‘cossita come ghen’è àqua in tuto el mar, in tuta la Tera, ghen sarà persone che le saverà la verità sora Geovà’. (Aba. 2:14) Sarà tanto bel quando tute le persone le ndarà viver par dar a Geovà la glòria che lu el mèrita. w25.01 p. 7 §§ 15, 16

Cossa che giutaria i fradei giudei a perseverar? Veder le robe bone che vegnea fora quando infrontea perseghission. Par quela, el apòstolo Paolo el ghe ga spiegà che Geovà el podea doperar le dificoltà par insegnarghe tante robe e par giutarli a gaver qualità che no i gavea mia. Se lori i vedesse le robe bone che le vien fora quando infrontesse dificoltà, saria pi fàcile par lori perseverar. (Ebr. 12:11) Paolo el ga incoraià i fradei ebrei a gaver coraio e a no desister, anca se i infrontesse perseghission. Sicuro che Paolo el savea quel che i era drio infrontar e el saria bon de darghe boni consili. Parché? Parché nel passà, lu el gavea belche perseghio arquanti fradei e parché, dopo che l’è deventà dissìpolo de Gesù, lu el ga infrontà tanta perseghission. — 2 Cor. 11:23-25. w24.09 p. 12, 13 §§ 16, 17

El nostro laoro de predicassion l’è cada volta pi importante. Parché? Parché el tempo l’è drio finirse. Proa ricordarte de quel che Gesù el ga dito sora i ùltimi giorni in Marco 13:10. E nel Vangelo de Mateo, ledemo che Gesù el ga dito che le bone notìssie le saria predicade in tuta la Tera vanti del fin de questo bruto mondo de Sàtana. (Mat. 24:14) Geovà el ga belche dessidio ‘el giorno e la ora’ par finirlo fora. (Mat. 24:36; Ati 1:7) Alora, semo cada volta pi darente de questo fin. (Rom. 13:11) Par quela, ghemo de sforsarse de ndar predicar intanto che ancora ghemo tempo. Quando ghe pensemo sora el nostro laoro de predicassion, ghemo de domandarse: ‘Parché che semo drio predicar le bone notìssie?’ Par causa del amor che ghemo par le bone notìssie, par le persone, par el nostro caro Dio, Geovà, e par el so nome. w24.05 p. 14, 15 §§ 2, 3

Se te sì pare o mare, incoraia el to fiol a pensarghe sora quel che ghen’è nela naturesa. Quando sì drio caminar nte un bel posto o nte un giardin, giuta el to fiol a star atento ale robe nela naturesa che le ga la medèsima forma. Parché? Lu el ndarà capir che ghe ocorea qualchedun pròpio bravo e con tanta sabedoria par crear tute le robe che ghen’è. Par esémpio, arquante robe nela naturesa le ga la forma de un spiral, e tanti sientisti i ga belche studià questi spirai. El sientista de nome Nicola Fameli el ga spiegà che nela naturesa ghen’è tante de queste spirai pròpio compagne. Par esémpio, in portoghese questa forma de spiral la ga nome sequência de Fibonacci, e podemo catarla in tante robe nela creassion, come in arquante galàssie, nei scios, nele foie dele piante e fiori. w24.12 p. 16 § 7

Moisè, Davi e Gioani i ga vivesto tanto tempo indrio e so vita la era pròpio difarente dela nostra. Ma cossita come lori, anca noantri adoremo a Geovà, preghemo, se fidemo in lu e ghe domandemo el so aiuto. Compagno questi tre servi fedeli, noantri semo sicuri che Geovà el benedisse e el giuta quei che i lo obedisse. Alora, ghemo de sforsarse par meter in pràtica i consili de Moisè, Davi e Gioani e seitar obedir a Geovà. Cossita, faremo bone dessision, podaremo viver par sempre e gavaremo alegria de saver che semo drio contentar a Geovà. Se seitemo a obedirlo, podemo esser sicuri che lu el ndarà benedirne de tante bele maniere. — Efe. 3:20. w24.11 p. 13 §§ 20, 21

Nel primo sècolo, arquanti fradei i era scoliesti par esser servi ministeriai. (1 Tim. 3:8) Pol esser che lori i era i fradei che el apòstolo Paolo el ga dito che i giutea i altri. I servi ministeriai i fea tanti laori importanti par giutar i ansiani a doperar el so tempo par insegnar e incoraiar i fradei. Par esémpio, i servi ministeriai i giutea a far le còpie dele Scriture o i comprea le robe che ghen’era bisogno par far queste còpie. Ndemo veder arquante robe che i servi ministeriai i fà nele congregassion ancoi. (1 Pie. 4:10) Lori i tende dele conte e dei teritori dela congregassion. Lori i domanda le publicassion par i predicadori, i tende del àudio e vìdeo nele riunion, i ze indicadori e i giuta a rangiar Saloni del Regno. Tuto quel che lori i fà giuta i fradei a gaver bele riunion e a gaver tuto quel che ghe ocore par la predicassion. — 1 Cor. 14:40. w24.10 p. 19 §§ 4, 5

Se se ricordemo che Geovà l’è el Dio che el vive e che sempre el ndarà giutarne, saremo boni de dàrghene fora con qualche dificoltà, no vol dir se la ze pìcola o granda. Geovà l’è el Dio Tuto Poderoso, e el ndarà darne la forsa che ne ocore. Alora, podaremo infrontar le nostre dificoltà con coraio. E quando vedemo che Geovà el ne giuta a dàrghene fora coi problemi pi pìcoli, saremo sicuri che lu el ndarà giutarne anca coi pi bruti. Vedemo due robe che ga sucedesto col rè Davi che lo assea sicuro che Geovà sempre el ndaria giutarlo. Quando lu l’era un gióveno pastor, lu l’è stà bon de copar un orso che el gavea ciapà una dele piégore de so pare. Dopo, lu l’è stà bon de copar anca un leon par salvar una piégora. Davi el ga mostrà tanto coraio. Ma invesse de pensar che lu l’è stà bon de salvar le piégore lu lu sol, Davi el savea che Geovà lo gavea giutà. (1 Sam. 17:34-37) Davi sempre el se ricordea de quel che gavea sucedesto. Pensarghe sora queste robe lo ga fato esser sicuro che el Dio che el vive el ndaria sempre giutarlo. w24.06 p. 21 §§ 5, 6

Proa pensar che te sì stà convidà par ndar nte una festa. Come che te pol dessider se te ndarè o nò? Se no te cognossi tanto ben la persona che la te ga convidà e quel che sarà fato, te pol farghe domande cossita: “Ndove e quando la sarà la festa? Quanta gente ndarà? Chi che ndarà tender? Chi che ndarà ala festa? Cossa che sarà fato? Ghen sarà bebide de alcol?” Se te sè tute queste robe, te podarè far una bona dessision. Dopo che te ghè savesto tuto quel te ocore, te ghè de pensarghe sora ben. Par esémpio, metemo dir che ghè savesto che persone che no obedisse a prinsipi dela Bìblia le ndarà ala festa, che ghen sarà bebide de alcol o che no ghen sarà nissuni par tender dela festa. Sarà che questa festa la ndarà ben? (1 Pie. 4:3) Quando te ghe pensi sora tute queste robe, te sarè bon de far una bona dessision. w25.01 p. 15 §§ 4, 5

Geovà el dopera un esémpio par giutarne a capir come che el ne perdona par meso del sacrifìssio del so Fiol. L’è tanto fadiga cavar via una màcia rossa de una roba bianca, mia vera? Ma, par meso de questa ilustrassion, Geovà el ne mostra che el pol finir fora coi nostri pecati come se no i fusse mai sucedesti. Anca, i nostri pecati i ze compagni a “dèbiti”. (Mat. 6:12; Luc. 11:4) Come seitemo a sbaliar, ghemo cada volta pi dèbiti. Sicuro che gavarìssino un bel poco de pagar a Geovà. Ma quando lu el ne perdona, lu el finisse fora con questi dèbiti. Par quela, lu no’l speta che ghe paghemo qualcossa. Cossita come una persona che la ga tanti dèbiti la resta contenta de saver che qualchedun ga pagà, noantri restemo tanto contenti de saver che Geovà el perdona i nostri pecati del bon. w25.02 p. 10 §§ 9, 10

I genitori, fursi i gavarà bisogno de aiuto quando i vien veci e i fioi i restarà contenti de giutarli. (1 Tim. 5:4) Ma i servi de Geovà no i pensa che ghe toca i so fioi gaver soldi par tenderli. Lori i sa che la alegria la vien de slevar i so fioi par deventar bravi servi de Geovà. (3 Gio. 4) Quando te sì drio insegnar el to fiol a laorar par gaver quel che ghe ocore, mostra che te te fidi in Geovà. Intanto che lu l’è ancora gióveno giùtalo a far el so meio nela scola e insegnaghe che l’è importante esser un bravo laorador. (Pro. 29:21; Efe. 4:28) Sfòrsate de catar bei prinsipi dela Bìblia che giutarà el to fiol a dessider se el ndarà far una università o nò. E ricòrdarte che la roba pi importante la ze giutarlo a laorar par gaver quel che ghe ocore. Cossita, el podarà far de pi par Geovà. w25.03 p. 30, 31 §§ 15, 16

In Isaia 65, Geovà el ne mostra come saria la vita nel paradiso spiritual. Questa professia la ga scominsià a realisarse nel ano 537 vanti de Cristo. In quel tempo, i giudei i ze stati moladi de Babilònia e i ze tornadi ala so cità. Geovà el ga benedio tanto queste persone e le ga giutade a far su nantra volta la cità de Gerusalen. Quei giudei anca i ga podesto rangiar su el témpio ndove i ndaria adorar a Geovà nantra volta. (Isa. 51:11; Zac. 8:3) Quel che Isaia el ga dito nela so professia ga sucedesto anca nel scomìnsio del ano 1919. Nei nostri giorni, i servi de Geovà i ze stati lìberi de Babilònia, la Granda, e i ga scominsià a adorar a Geovà in pace e union. I servi de Dio i ga scominsià tante congregassion e i ga cambià tanto la so vita. Par esémpio, tanti òmini e done che una volta i era violenti e i fea brute robe i ga ‘metesto su la nova personalità, che la ze stata creada de acordo cola volontà de Dio’. w24.04 p. 20, 21 §§ 3, 4

In arquanti posti, i ze i genitori o altri che i scòlie con chi una persona la ndarà maridarse. In altri posti, l’è la fameia o i amighi che i proa catar una persona par quei che no i ze mia maridadi, e dopo, li giuta a cognosserse meio. Cossa che te ghè de far se un amigo o qualchedun dela to fameia el te domanda de giutarlo a catar una persona par maridarse? Prima, te toca pensar in quel che ghe piase e in quel che ghe ocore. Dopo che te cati una persona che te par che va ben par lu, proa cognosserla meio, saver quel che ghe ocore, quel che ghe piase e le so qualità. Proa anca capir come ze la so amicìssia con Geovà. Questo l’è pi importante che i soldi, stùdio, o quel che la ga nela vita. Ma ricòrdate che no te sarè mia ti a dessider se lori i ndarà maridarse o nò. w24.05 p. 23 § 11

Podemo giutar quei che i ze drio smorosar se stemo atenti a quel che disemo. Par quela, ghemo de controlarse. (Pro. 12:18) Par esémpio, pol esser che semo premosi de dir in volta che due amighi i ga scominsià a smorosar. Ma, fursi lori due i vol dar questa notìssia ai altri. No ghemo de parlar de quel che i fà gnanca parlar mal de lori ai altri. (Pro. 20:19; Rom. 14:10; 1 Tes. 4:11) Gnanca no ghemo de seitar a domandar quando che i ndarà maridarse. E cossa che ghemo de far se un fradel e una sorela i desside de fermarse de smorosar? Noantri no ghemo mia de scuriosar, farghe domande o proar capir se qualchedun ga colpa de quel che ga sucedesto. (1 Pie. 4:15) Quando due persone le se ferma de smorosar, no vol dir che le ga fato qualcossa de sbalià. Invesse, fursi lore le ga capio che saria meio no maridarse. Ancora cossita, quando due persone le desside fermarse de smorosar, pol esser che le ndarà sentirse sole e disgustade. Alora, ghemo de star atenti de catar fora maniere de giutarle. w24.05 p. 31 §§ 15, 16

Sicuro che se sentimo pròpio desanimadi e disgustadi quando qualchedun dela nostra fameia o un caro amigo el abandona a Geovà. (Sal. 78:40) De pi che amemo questa persona, pi fadiga l’è dàrghene fora con questa situassion. Se te sì drio infrontar una roba cossita, el esémpio de Zadoche pol darte la forsa che te ocore. Parché? Lu el ga seità leal a Geovà anca quando el so caro amigo, Abiatar, no l’è stà pi leal. Cossa che ga sucedesto? Davi l’era belche vècio e darente dela so morte quando so fiol, Adonia, el ga volesto esser rè. Ma, Geovà el gavea belche prometesto che l’era Salomon che el saria rè. (1 Cró. 22:9, 10) Alora, invesse de esser leal a Davi e a Geovà, Abiatar l’è restà dela banda de Adonia. (1 Rè 1:5-8) Abiatar el ga tradio el rè Davi e Zadoche, e el se ga fermà de far quel che Geovà el volea. Abiatar e Zadoche i gavea laorà insieme come sasserdoti par de pi de 40 ani. — 2 Sam. 8:17; 15:29; 19:11-14. w24.07 p. 6 §§ 14, 15

Ghemo sempre de ricordarse che sforsarse par star sempre atenti l’è la meio roba che podemo far. Pol esser che un pecato el ne fà ‘goder i piaseri par un tempo’, ma ne ocore ricordarse che quando femo quel che Geovà el dise semo pi felici. (Ebr. 11:25; Sal. 19:8) Questo sucede parché Geovà el ne ga creà par obedirghe. (Gén. 1:27) Cossita, quando obedimo a Geovà, ghemo una cossiensa tranquila e la speransa de viver par sempre. (1 Tim. 6:12; 2 Tim. 1:3; Giuda 20, 21) L’è vera che la nostra “carne la ze fiaca”. (Mat. 26:41) Ma questo no vol mia dir che no saremo boni de dàrghene fora cole voie sbaliade. Parché? Parché Geovà el ga caro de darne tuta la forsa che ghemo de bisogno. (2 Cor. 4:7) Geovà el dà el poder pi grando del normal. Ma prima, noantri ghemo de doperar el nostro poder par dàrghene fora cole voie sbaliade. Geovà el ndarà risponder ale nostre orassion e el ndarà darne la forsa che ne ocore. (1 Cor. 10:13) Alora, ricòrdate sempre che, col aiuto de Geovà, te sarè bon de seitar atento e de dàrghene fora cole voie sbaliade. w24.07 p. 19 §§ 19-21

El apòstolo Paolo el ga scrito le parole del testo de ancoi a Timòteo par spiegarghe quel che i gavaria de far con una persona che la gavea fato un bruto pecato. Sarà che Paolo el volea dir che questa persona la gavea de esser dissiplinada “davanti de tuti” nela congregassion? Nò. Invesse, lu l’era drio parlar de quei che i savea del pecato. Pol esser che lori i gavea visto el fradel far quel pecato o i era intrà quei che lu el ghe ga contà quel che gavea fato. I ansiani sol i parlarà che i ga dissiplinà e che i ze belche drio giutar la persona che la ga fato quel bruto pecato a quei che i lo ga savesto. Ma pol esser che tuti nela congregassion i ga savesto o fursi i saverà del pecato che la persona la ga fato. Alora, se sucede una roba cossita, un ansiano el ndarà far un anùnsio nte una riunion e el dirà che i ansiani i ghe ga dato consili e dissiplina a questo fradel. Parché? Paolo el ga dito: ‘Cossita, quei che lo vede gavarà paura de far quel che l’è sbalià.’ w24.08 p. 24 §§ 16, 17

Noantri ghemo de seitar a sforsarse e far el nostro meio nel laoro a Geovà fin el fin. Anca i untadi i ga de seitar atenti par ndar al cielo insieme de Gesù. (Mat. 24:40) Sicuro che tuti i untadi i ze premosi de esser in cielo insieme de Gesù. Alora, dopo dela guera del Armagedon, tuti i untadi i farà parte dela noiva de Gesù nel matrimònio del Piegoreto. (2 Tes. 2:1) Presto, Gesù el ndarà giulgar tute le persone, ma noantri no ghemo mia paura. Se seitemo fedeli, el nostro caro Pare el ndarà darne el “poder pi grando del normal” e ‘saremo boni star in pié davanti del Fiol del omo’. (2 Cor. 4:7; Luc. 21:36) Alora, no importa se la nostra speransa la ze viver nel cielo o nela Tera, saremo boni de contentar a Geovà se metemo in pràtica quel che ghemo imparà nele stòrie che Gesù el ga contà. Cossita, Geovà el ndarà mostrarne la so granda bontà e scriver el nostro nome nel libro dela vita. — Dan. 12:1; Apo. 3:5. w24.09 p. 25 §§ 19, 20

Cossa che pol giutarte a dàrghene fora con bruti sentimenti? La Parola de Dio. Come? Pensa nele bele robe che te ghè e in quel che le persone no le ga. Par esémpio, pol esser che le persone che no le serve mia a Geovà le gàpia una bela vita ancoi. Ma le robe che lore le ga no ndarà giutarle nel futuro. Invesse, ti te ghè una bela amicìssia con Geovà e te ghè el so aiuto ancoi. E nel futuro, lu el ndarà benedirte tanto de pi de quel che te sì bon de pensar. (Sal. 145:16) Ricòrdate che no ghen’è come saver come saria la to vita se no te gavessi fato tanto par Geovà. Ma te pol esser sicuro che quei che i fà una dessision par amor a Geovà e ai altri sempre i gavarà tanta alegria. w24.10 p. 27 §§ 12, 13