Giugno

Belche adesso ghemo tante bele robe par causa de quel che Geovà e Gesù i ga fato par noantri. Par esémpio, par causa del sacrifìssio de Gesù, Geovà el perdona i nostri pecati. E lu no’l ne perdona parché ghe toca, ma parché el vol. (Sal. 103:3, 10-13) Pol esser che arquanti de noantri i pensa che no meritemo el perdon de Geovà. E l’è vero che no lo meritemo mia. Anca Paolo el se sentia cossita. Lu el ga dito che no’l meritea mia esser ciamà apòstolo, e che ‘l’era quel che lu l’era par via dela maraveiosa bontà de Dio’. (1 Cor. 15:9, 10) Alora, se noantri no meritemo el perdon de Geovà, parché che lu el ne perdona? Parché lu el ne ama tanto. Alora, se te scominsi a restar desanimà parché te pensi che no te mèriti el perdon de Geovà, ricòrdate che lu el ga mandà so fiol nò par persone perfete, ma par pecadori che se ciama grami. — Luc. 5:32; 1 Tim. 1:15. w25.01 p. 26, 27 §§ 3, 4

Anca se no semo boni de controlar quel che i altri i fà o i dise, semo boni de controlar quel che noantri femo e sentimo. E la meio roba che podemo far la ze perdonar. Parché? Parché noantri amemo a Geovà, e lu el vol che perdonemo i altri. E se seitemo cativi e no perdonemo, l’è tanto fàcile far brute dessision e fin rovinar la nostra salute. (Pro. 14:17, 29, 30) Alora, quando dessidimo assar de restar disgustadi o cativi, no deventaremo tristi gnanca ndaremo tratar mal quei che i ze intorno a noantri. E anca femo una roba tanto bona par noantri stessi parché se fermemo de pensar nel problema e tornemo a goder la vita. Cossa pol giutarte a assar de restar inrabià o disgustà? Te ocore ricordarte che dele volte ghe vol tempo. Una persona che la se ga fato mal la ga bisogno de aiuto e de tempo fin che la reste meio. Dela medèsima maniera, dele volte, ne ocore tempo fin esser boni de perdonar qualchedun che ne ga ofendesto. (Ecl. 3:3; 1 Pie. 1:22) Alora, prega e domanda che Geovà el te giute a perdonar. w25.02 p. 15, 16 §§ 8-11

Le prime robe che ghemo imparà sora Gesù le ze la speransa dela ressuression, che ghemo de ciamarse grami dei nostri pecati, gaver fede e batesarse. (Ebr. 6:1, 2) Tuti quei che i vol esser dissìpoli de Gesù i ga de imparar sora queste robe. Par quela, che nel Pentecoste, el apòstolo Piero el ga spiegà queste verità ale persone. (Ati 2:32-35, 38) Alora, no podemo mia esser dissìpoli de Gesù se no credemo in queste verità. Par esémpio, Paolo el ga parlà che quei che no i crede nela ressuression no i pol ndar drio a Gesù. (1 Cor. 15:12-14) Ma queste robe no ghe basta par deventar bravi servi de Geovà. Invesse, ghemo de imparar altre robe, ancora che no le sìpia mia fàcile de capir. Dopo dele prime verità che ghemo imparà dela Bìblia, ne ocore far de pi che sol saver sora le lege de Geovà. Invesse, ghemo de studiar sora i prinsipi dela Bìblia e capirli ben. Alora, saremo boni de imparar come che Geovà el pensa. Ma come che podemo imparar sora prinsipi? Ne ocore studiar la Bìblia, pensarghe sora e sforsarse de meter in pràtica quel che ghemo imparà. Cossita, ndaremo imparar a far bone dessision che ghe piase a Geovà. w24.04 p. 5 §§ 12, 13

Geovà el ga giutà Gioana a ricordarse che le persone de Nìnive no le savea mia quel che l’era giusto o sbalià. (Giona 1:1, 2; 3:10; 4:9-11) Tanto tempo dopo, Gesù el ga parlà dei niniviti quando el ga insegnà sora la misericòrdia e la giustìssia de Geovà. Ma in che “giulgamento” i niniviti i sarà “ressussitadi”? Gesù el ga parlà che nel futuro ghen sarà una “ressuression de giulgamento”. (Gio. 5:29) Questa ressuression la ndarà suceder nei Mila Ani, quando ‘i giusti e i ingiusti’ i sarà ressussitadi. (Ati 24:15) I ingiusti i gavarà una “ressuression de giulgamento”. Cossa che questo vol dir? Geovà e Gesù i ndarà veder cossa che lori i farà e se i ndarà acetar adorar a Dio. Alora, se i niniviti no i aceta far quel che l’è giusto, lori i sarà finidi fora. (Isa. 65:20) Ma tuti quei che i ndarà adorar a Geovà dela maniera giusta i gavarà benedission e i podarà viver par sempre! — Dan. 12:2. w24.05 p. 5 §§ 13, 14

Par meso de quel che Gesù el fea e el parlea, podemo capir la misericòrdia de so Pare. (Gio. 14:9) Lu el ghe vol ben ai pecadori e el vol giutarne. Gesù el ga giutà i pecadori a cambiar la so maniera de viver e a deventar so dissìpoli. (Luc. 5:27, 28) Gesù el savea che lu el ndaria dar la so vita come sacrifìssio, parché tante volte lu el ga parlà ai so dissìpoli che el ndaria esser tradio e morir nte un pal. (Mat. 17:22; 20:18, 19) Lu el savea che, col so sacrifìssio, lu el cavaria via i pecati del mondo. Gesù el ga anca insegnà che, dopo de dar la so vita, tanti i ndaria deventar so dissìpoli. (Gio. 12:32) Quei che i gavea fede in Gesù e i obedia a quel che lu el disea i podaria contentar a Geovà e esser liberadi del pecato. (Rom. 6:14, 18, 22; Gio. 8:32) Alora, Gesù el ga infrontà con coraio e de volentiera una bruta morte par liberarne del pecato. — Gio. 10:17, 18. w24.08 p. 5 §§ 11, 12

Proa ricordarte quel che te ghè sentio quando te ghè imparà la verità dela Bìblia. Par esémpio, quando te ghè capio che Dio el te ama e che el vol che te sìpia parte dela so fameia. Te ghè capio che Geovà anca el ga prometesto che el ndarà finir fora col sofrimento, col dolor, che el ndarà ressussitar quei che i ze morti e che el ne darà tante altre benedission. (Mar. 10:29, 30; Gio. 5:28, 29; Rom. 8:38, 39; Apo. 21:3, 4) Te sì restà pròpio contento de imparar queste verità. (Luc. 24:32) Sicuro che te ghè scominsià a amar tanto le bone notìssie e te ghè volesto parlar ai altri quel che te eri drio imparar. (Varda anca Geremia 20:9.) Quando amemo le verità dela Bìblia, no semo boni de tegner sol par noantri le bele robe che ghemo imparà. (Luc. 6:45) Se sentimo compagno ai primi dissìpoli de Gesù, che i ga dito: “Noantri no podemo mia fermarse de parlar dele cose che ghemo visto e che ghemo scoltà.” (Ati 4:20) Amemo tanto queste verità e volemo insegnarghele a altre persone. w24.05 p.15 § 5; p. 16 § 7

Noantri predichemo parché amemo tanto el nostro caro Dio, Geovà, e volemo giutar tute le persone a cognosserlo. Ma a arquanti fradei ghe fà fadiga ndar ala predicassion. Parché? Pol esser che i pensa che no i ze mia boni de insegnar ale persone o no ghe piase ndar ale case dei altri sensa esser convidadi. Arquanti fursi i ga paura che i altri i reste cativi o disgustadi. Par questi fradei, no l’è mia fàcile ndar predicar. E ti, rèstito contento de ndar predicar? Se dele volte te fà fadiga, no stà restar desanimà. Pol esser che te sì ùmile e che te ghè paura de farte veder o de esser in meso a barufe. E nissuni ghe piase disgustar qualchedun, ancora de pi quando i proa far una roba bona. Ma sìpia sicuro che Geovà el sa che ndar predicar no l’è mia fàcile par ti e lu el vol giutarte. — Isa. 41:13. w24.04 p. 14 §§ 1, 2

Quando te ledi la Bìblia, invesse de proar cambiar tuto nte un colpo sol, proa cambiar una o due robe ala volta. Te pol scriver do tuto quel che te vol cambiar. Dopo, sfòrsate de cambiar una o due robe ala volta e assa quele altre robe par cambiar pi avanti. Ma come che te pol scòlier quel che te ndarè cambiar par prima? Te pol scòlier cambiar par prima quel che sarà pi fàcile, o una roba importante e che te ocore tanto cambiar. Dopo che te scoli cossa che te ndarè cambiar e che qualità te vol mostrar, te pol sforsarte de imparar de pi nele nostre publicassion. Prega e domanda che Geovà el te giute par ‘gaver la voia e anca el poder’ de cambiar. (Fil. 2:13) Dopo, sfòrsate de meter in pràtica tuto quel che te ghè imparà. Se te sì bon de cambiar o de mostrar la qualità che te volei, te gavarè voia de far ancora altri cambiamenti che te ocore. w24.09 p. 6 §§ 13, 14

Pol esser che te sì disgustà parché te ghè fato qualchedun sofrir. Alora cossa che te pol far? Proa domandar scusa e ‘meter a posto le robe intrà de valtri’. Domanda che Geovà el giute la persona che la ga sofrio par causa de ti. Lu el pol giutarve a gaver pace nantra volta. Varda quel che ga sucedesto col profeta Giona. Quando Geovà ghe ga dito de ndar a Nìnive, Giona el ga scampà par nantra banda. Geovà lo ga dissiplinà, e lu el ga imparà del so sbàlio. (Giona 1:1-4, 15-17; 2:7-10) Geovà el ga seità a doperar Giona come el so profeta. E nela seconda volta che Geovà el ga domandà che Giona el fusse par Nìnive, lu el ghe ga obedio. Giona no’l ga mia assà che el so sbàlio lo intrighesse de seitar a servir a Geovà. (Giona 3:1-3) Cossa che imparemo? Ghemo de imparar coi nostri sbali e assar che Geovà el seite a doperarne come lu el vol. w24.10 p. 8, 9 §§ 10, 11

Geovà el elimina i nostri pecati. Cossa che questo vol dir? Proa pensar che te ghè un dèbito nte un mercà. Dopo che te ghè pagà questo dèbito, el paron del mercà el ciapa una pena e el scrive “pagà” sora i nùmeri del to dèbito. Anca se el dèbito l’è belche pagà, ancora se pol veder quei nùmeri. Ma se te vivessi nel passà, saria tanto difarente. La tinta che le persone le doperea par scriver la era fata de una maniera che l’era tanto fàcile cavarla via o eliminarla con sponga e àqua. Alora, lori i podea cavar via del tuto quel che l’era scrito. Saria come se quel dèbito no’l fusse mai stà fato. Pi nissun saria bon de veder quei nùmeri. Cossa che questo ne insegna? Quando Geovà el ne perdona, l’è come se el ‘eliminesse’ i nostri pecati con questa sponga moia, o sia, lu l’è bon de eliminarli del tuto, come se no i fusse mai sucedesti. Sicuro che restemo tanto contenti de saver che, quando Geovà el perdona, lu el cava via del bon tuti i nostri pecati. — Sal. 51:9. w25.02 p. 10 § 11

Quando i altri i dise busie sora noantri o i ne trata mal, se fidemo che lu el sa quel che l’è vero. Fidarse in Geovà ne giuta a seitar leai anca quando i altri ne trata mal, parché savemo che nela ora giusta lu el ndarà far quel che l’è giusto. Se restemo ansiosi o cativi, podemo far una dessision sbaliada, perder la nostra alegria o rovinar la nostra amicìssia con Geovà. Ma se se fidemo in Geovà, ndaremo spetar che lu el finissa fora coi nostri problemi. Cossita, no gavaremo bruti sentimenti. Sicuro che mai saremo boni de ndarghe drio el esémpio de Gesù de maniera perfeta. Dele volte, ndaremo dir o far qualcossa che ndaremo ciamarse grami. (Tia. 3:2) E par causa de quel che i altri i fà, pol esser che ndaremo sofrir fin el novo mondo. Se questo l’è drio suceder con ti, cossa che pol giutarte? Sìpia sicuro che Geovà el sa quel che te sì drio sentir. Ricòrdate che anca Gesù el capisse pròpio ben i to problemi, parché anca lu el ga sofrio. (Ebr. 4:15, 16) Che contenti che semo che Geovà el ne giuta a saver cossa far quando semo maltratadi par meso dei boni consili che catemo nela Bìblia. w24.11 p. 6 §§ 12, 13

Ghe ocore mostrar fede in Gesù ‘par gaver la vita eterna’. (Gio. 3:16-18, 36; 17:3) Tanti giudei no i credea mia che i gavea de mostrar fede in Gesù par gaver la vita eterna. Lori i ga dito a Gesù: ‘Che miràcolo veto far par provarne che te sì Fiol de Dio?’ (Gio. 6:30) Dopo, lori i ga dito che nei giorni de Moisè i israeliti i gavea ricevesto el manà, o sia, el magnar che ghe ocorea. (Nee. 9:15; Sal. 78:24, 25) Cossita capimo che quei giudei sol i pensea in gaver quel che ghe ocorea par magnar. Alora, Gesù el ghe ga dito che el vero ‘pan del cielo’ l’era difarente del manà, parché el podaria darghe vita eterna. (Gio. 6:32) Ma lori gnanca no ghe ga mia badà quel che Gesù l’era drio dirghe. Come lori i era massa preocupadi col magnar, no i era mia drio scoltar a Gesù gnanca no i era drio capir quel che i gavea de far par gaver vita eterna. w24.12 p. 5 §§ 8, 9

Pol esser che nela scola, el to fiol el ndarà imparar anca altre forme che ghen’è nela naturesa. Par esémpio, quasi tute le piante le ga la medèsima forma. Le ga un tronco che el se spartisse in rami pi grossi e dopo in rami pi fini. Questa forma la ga nome “fractal”. To fiol el pol domandarse: ‘Chi che ga creà queste bele robe?’ Domande come questa podarà giutarlo a gaver una forte fede in Geovà, che l’è el Creador de tute le robe.Te pol anca domandarghe: ‘Se Dio el ga creà tute le robe, sarà che no’l sa mia dirne come che podemo esser felici?’ Dopo te pol mostrarghe che i bei consili che Dio el ne dà par esser felici i ze nela Bìblia. w24.12 p. 16 § 8

Geovà el ga doperà el apòstolo Paolo par scriver una carta par dirghe ai fradei in Corinto che quel fradel el gavaria de esser ‘cavà via’ dela congregassion. (1 Cor. 5:13) Come che i fradei e le sorele i gavaria de tratarlo? Paolo el ga dito che lori i gavea de “assar de star insieme” a lu. Ma cossa che questo vol dir? Che lori no i gavea gnanca de “magnar con una persona cossita”. (1 Cor. 5:11) Quando magnemo insieme a una persona, passemo tempo insieme e l’è fàcile scominsiar a ciacolar. Alora, Paolo l’era drio dir che nissun dela congregassion podaria esser amigo de quel omo. Cossita, questo ndaria proteger i fradei de no ndarghe drio el so bruto esémpio. (1 Cor. 5:5-7) E se tuti dela congregassion i assesse de star insieme a quel omo, questo ndaria giutarlo. Come cossita? Lu el podaria nicorderse che el gavea assà Geovà tanto disgustà, gaver vergogna del so pecato e ciamarse gramo. w24.08 p. 15 §§ 4, 5

Geovà el ga catà fora una maniera de perdonar i pecati dei israeliti e giutarli a gaver una amicìssia con lu. Alora, una volta al ano, i israeliti i gavea de far la festività de nome Giorno de Domandar Perdon dei Pecati. In quel giorno, el prinsipal sasserdote el fea sacrifissi de bèstie par domandar el perdon dei pecati dei israeliti. Sicuro che quei sacrifissi de bèstie no i era boni de perdonar i pecati dele persone, parché la vita de una persona la ga de pi valor che quela de una bèstia. Ma intanto che i israeliti i seitesse a far quei sacrifissi, Geovà li perdonea. (Ebr. 10:1-4) Questo Giorno ga giutà i israeliti a gaver ben in mente che lori i era pecadori e che i gavea bisogno de nantro aiuto par esser perdonadi del bon dei so pecati. Ma noantri podemo esser perdonadi del bon parché Geovà el ne ga dato el so caro Fiol par el perdon dei nostri pecati ‘una volta par sempre’. (Ebr. 9:28) Gesù el ga dato “la so vita par salvar tante persone”. — Mat. 20:28. w25.02 p. 4 §§ 9, 10

Gesù el ga dito ai so dissìpoli: “El spìrito el vol far quel che l’è giusto, ma la carne la ze fiaca.” (Mat. 26:41b) Quel che Gesù el ga dito mostra che el capia che semo imperfeti e che podemo far sbali. Ma le so parole anca ne insegna che no ghemo mai de pensar che mai ndaremo sbaliar e che saremo sempre boni de far quel che l’è giusto. Anca parché Gesù el gavea dito queste parole un poco prima che i so dissìpoli i gavea dito che mai i ndaria abandonarlo. (Mat. 26:35) L’è vera che i dissìpoli i volea far una roba bona, ma no i se ga mia nicorti che, par causa de una dificoltà, lori i podaria suito perder la voia de far quel che l’è giusto. Par quela che Gesù el ga anca dito quel che l’è stà scrito nel testo de ancoi.Ancora cossita, i dissìpoli de Gesù no i ga seità atenti e i ga abandonà a Gesù. Lori i ga fato pròpio quel che i gavea prometesto che mai i ndaria far. — Mat. 26:56. w24.07 p. 14 §§ 1, 2

Adon e Eva i ga perso la vita eterna e anca la bela amicìssia che i gavea col so Pare, Geovà. Prima, lori i era parte dela fameia de Dio. (Luc. 3:38) Ma dopo che i ga desobedio a Geovà, Adon e Eva i ze stati mandadi via dela so fameia. (Gén. 3:23, 24) Come l’è stà sol dopo che i ga bio fioi, gnanca una persona la fà parte dela fameia de Geovà. (Gén. 4:1) Par quela, l’è come se gavessino de fermarse de esser nemighi de Dio e deventar so amighi. (Rom. 5:10, 11.) Ma l’è tanto bel saver che Geovà el ga fato tuto quel che ocorea par giutarne. Come cossita? Par meso del sacrifìssio de Gesù, Geovà el ga catà fora una maniera de far che tute le persone le podesse esser so amighe. Lu el ga doperà una roba che gavea el medèsimo valor che la vita perfeta de Adon. Cossita, lu el ne ga dato indrio quel che Adon el gavea perso. Le Scriture Greche le parla de tuto quel che Geovà el ga fato par giutarne a esser so amighi nantra volta. w25.02 p. 3, 4 §§ 7, 8

El apòstolo Paolo el ga dito che la maniera che i fradei i gavea tratà quel omo bastea par lu. (2 Cor. 2:5-8) Come cossita? Dopo che el omo che el gavea fato imoralità cola dona de so pare l’è stà cavà via dela congregassion, lu el se ga ciamà gramo. (1 Cor. 5:1) Alora, lu no’l gavea bisogno de seitar a esser dissiplinà. (Ebr. 12:11) Dopo, Paolo el ga dito che tuti nela congregassion ‘i gavea de perdonarlo con bontà, consolarlo e mostrar el so amor par lu’. Paolo el ga dito che quei fradei i gavea de far de pi che sol acetarlo nantra volta nela congregassion. Lori i gavea de assar ciaro che lo gavea perdonà e che lo amea tanto. Come? Par meso de quel che i parlea, i fea e dela maniera che i lo tratea. Cossita, lu el saria sicuro che tuti nela congregassion i era contenti de gaverlo insieme nantra volta. w24.08 p. 15 § 4; p. 16, 17 §§ 6-8

El apòstolo Paolo el savea pròpio ben quel che ghe ocore par perseverar. Lu el ga dito ai fradei che lori i gavaria de fidarse in Geovà e nò in lori stessi. E anca ghe ga ricordà: “Geovà l’è quel che me giuta, no gavarò mia paura.” (Ebr. 13:6) Tanti dei nostri cari fradei i infronta bruta perseghission ancoi. Come che podemo giutarli? Podemo pregar a Geovà e domandarghe che el ghe dae forsa e che li giute in quel che i ga de bisogno. (Ebr. 10:33) Ma ghemo de ricordarse che la Bìblia la dise che “tuti quei che i vol viver una vita de devossion a Dio come dissìpoli de Cristo Gesù anca i sarà perseghidi”. (2 Tim. 3:12) Alora, tuti noantri ghemo de esser pareciadi par infrontar la perseghission. Ghemo de fidarse in Geovà, esser sicuri che lu el ndarà giutarne e ricordarse che nela ora giusta lu el ndarà finir fora con tuti i problemi de quei che i ze leai a lu. — 2 Tes. 1:7, 8. w24.09 p. 13 §§ 17, 18

Cossa che ga giutà i corinti a batesarse? (2 Cor. 10:4, 5) El spìrito santo e la Parola de Dio li ga giutadi a far i cambiamenti che ghe ocorea. (Ebr. 4:12) I corinti che i ze deventadi dissìpoli de Gesù i ze stati boni de cambiar la so vita. Lori i se ga fermà de far robe come ciavar i altri, far la ciuca, e altre robe sporche come el omosessualismo. (1 Cor. 6:9-11) Arquanti corinti i ga bio de sforsarse tanto par cambiar la so vita e fermarse de far robe sbaliade. Lori no i ga mia desistio de far quel che l’è giusto par ricever la vita eterna. (Mat. 7:13, 14) Dela medèsima maniera, pol esser che ti te ghè de far arquanti cambiamenti nela to vita par esser bon de batesarte. Ma no stà mia desister. Invesse, seita a domandar el aiuto de Geovà. Cossita, te sarè bon de cambiar e far quel che l’è giusto. w25.03 p. 6 §§ 15-17

Geovà el ga prometesto darne sabedoria par giutarne a capir quel che ghe piase a lu vanti che femo una dessision. Geovà el dà sabedoria a tuti de maniera “generosa e con bontà”. Dopo che te preghi par domanda el aiuto de Geovà, te ghè de star atento ala so risposta. Come cossita? Dopo de domandar el aiuto de Geovà, proa studiar le lege e i prinsipi dela Bìblia par capir la risposta de Geovà. Par giutarte a capir meio, pensa in questa ilustrassion. Metemo dir che te sì drio far un viaio e te sì perso nte un posto che no te cognossi mia. Alora, te vedi una persona che la ze de star lì e te ghe domandi aiuto. Sicuro che no te ndarissi via sensa scoltar la so risposta. Dela stessa maniera, dopo che domandemo aiuto a Geovà, ghemo de star atenti par capir la so risposta. Par esémpio, metemo dir che qualchedun te ga convidà par ndar nte una festa. Vanti de dessider acetar el convite, saria bon che prima te pensessi cossa che la Bìblia la dise sora far feste, sora gaver brute compagnie e sora meter el Regno in primo posto nela nostra vita. — Mat. 6:33; Rom. 13:13; 1 Cor. 15:33. w25.01 p. 16 §§ 6, 7

La professia de Isaia la parla dela difarensa intrà quei che i serve a Geovà e quei che no i lo serve mia. Geovà el dà ai so servi tuto quel che lori i ga de bisogno par esser so amighi. Par esémpio, noantri ghemo el so spìrito santo, la so Parola e tante robe che Geovà el dopera par insegnarne. Par quela, podemo dir che ghemo de ‘magnar, de bever e che semo contenti’. (Varda anca Apocalisse 22:17.) Invesse, quei che no i adora a Geovà e no i ze so amighi ‘i ga fame, sen e i ze invergognadi’. (Amòs 8:11) Geovà el ne dà tante robe par far pi forte la nostra fede. (Gioel 2:21-24) Par esémpio, Geovà el ne dà la Bìblia, le publicassion, el nostro site, le riunion, le assemblee e i congressi. Se doperemo ben tuto quel che el ne dà, saremo ben tendesti e gavaremo salute. w24.04 p. 21 §§ 5, 6

Se te vol scominsiar smorosar una persona, te pol dirghe che te vol parlar con ela par telèfono o nte un posto ndove ghen’è altre persone. Quando ve parlé, assa ciaro che te ghe vol ben e che te vol cognosserla meio. (1 Cor. 14:9) Se la persona la ga bisogno de tempo par pensar, daghe el tempo che ghe ocore. (Pro. 15:28) E, se la te dise che no la vol mia smorosarte, mostra rispeto par la so dessision e i so sentimenti. Cossa che te pol far se una persona la te dise che la vol smorosarte? Ricòrdate che par dirte una roba cossita la ga bio bisogno de coraio. Alora, mostra bontà e rispeto. Faghe saver se te ghè bisogno de tempo par dessider, ma no stà meterghe tanto par darghe la risposta. (Pro. 13:12) Se ti no te vol mia smorosarla, assalo ciaro. Ma, se ti te vol smorosar una persona, dighe i to sentimenti, e dessidé insieme come sarà quando scominsiaré a smorosar. L’è una roba importante de far parché pol esser che no speté la medèsima roba. w24.05 p. 23, 24 §§ 12, 13

Un tempo dopo, quando Davi fursi l’era ancora un gióveno, lu l’è ndato visitar el acampamento del esèrsito de Israel. Lu el ga visto che tuti i era pròpio spauradi par causa de Golia, un filisteo pròpio grando che l’era drio ‘sfidar i soldadi de Israel’. (1 Sam. 17:10, 11) I soldadi i gavea tanta paura parché i vedea sol quel che Golia l’era drio parlar e quanto grando l’era. (1 Sam. 17:24, 25) Invesse de vardar queste robe, Davi el savea che Golia l’era drio sfidar el esèrsito de Israel e anca el ‘esèrsito del Dio che el vive’. (1 Sam. 17:26) Davi el ghe pensea in Geovà e el savea che lu el ndaria giutarlo compagno el gavea fato quando l’era un pastor. Par quela Davi l’è stà bon de ndar contra Golia e de coparlo. — 1 Sam. 17:45-51. w24.06 p. 21 § 7

Noantri ghemo de pensarghe sora come saria la nostra vita se no servìssino a Geovà. Cossita, saremo boni de seitar leai a lu e ancora pi sicuri che ‘rivar pi darente de Dio l’è bon par noantri’. (Sal. 73:28) Noantri semo sicuri che saremo boni de infrontar tute le dificoltà avanti parché semo “schiavi par el vero Dio che el vive”. (1 Tes. 1:9) Geovà el ne vol tanto ben e el ndarà sempre giutarne. Cossita come el ga tendesto dei so servi nel passà, lu el ndarà far la medèsima roba par noantri ancoi. Suito ndaremo infrontar la pi granda tribolassion che ghen sarà in tuta la Tera. Ma no saremo noantri soli, parché Geovà el sarà dela nostra banda. Par quela, tuti noantri podemo parlar con tuto el coraio: “Geovà l’è quel che el me giuta, no gavarò mia paura.” — Ebr. 13:5, 6. w24.06 p. 25 §§ 17, 18

La Bìblia la parla sora de pi de 40 rè de Israel. E la spiega pròpio quel che arquanti de questi rè i ga fato. Par esémpio, la parla che ghen’è stà boni rè che i ga fato sbali. Un de questi rè l’è stà Davi. Geovà el ga dito che ‘lu l’era el so servo, che lo ga adorà con tuto el so cuor e che sempre el ga fato quel che l’è giusto’. (1 Rè 14:8) Ma Davi el ga fato imoralità sessual con una dona che la era maridada e el ga fato che el so omo de ela el fusse copà nte una batàlia. (2 Sam. 11:4, 14, 15) Ma la Bìblia anca la parla de rè che ze stati rugni e che i ga fato robe bone. Par esémpio, Roboan ‘el fea quel che l’è rugno’. (2 Cró. 12:14) Ancora cossita, Roboan el ga obedio a Geovà quando no’l ga fato guera contra le diese tribo de Israel e el ga assà che el pòpolo el scoliesse nantro rè. Roboan anca el ga fato arquante cità deventar pi forte par proteger el pòpolo de Dio. (1 Rè 12:21-24; 2 Cró. 11:5-12) Come che Geovà el dessidia se lori i era fedeli o nò? Saver la risposta a questa domanda ndarà giutarne a capir cossa che Geovà el vol che noantri femo. Lu el vardea cossa che ghen’era nel so cuor, se el se gavea ciamà gramo e se l’era drio adorarlo de maniera giusta. w24.07 p. 20 §§ 1-3

Ma cossa i ansiani i ga de far se un fradel con manco de 18 ani el fà un bruto pecato? I ansiani i ndarà scòlier due ansiani par parlar con questo gióveno e coi so genitori che i ze Testimònie de Geovà. Alora i ansiani i ndarà domandar ai so genitori se lori i ga belche fato quel che ghe ocorea par giutar so fiol a ciamarse gramo e a cambiar quel che el ga de bisogno. Se el fiol el scolta i consili dei so genitori e el càmbia quel che ghe ocore nela so maniera de pensar e de far le robe, quei due ansiani fursi i desside che no ghe ocore che tre ansiani i parle con quel gióveno e i so genitori. Ghemo de ricordarse che Geovà el ga dato ai genitori el laoro de insegnarghe ai fioi. (Deu. 6:6, 7; Pro. 6:20; 22:6; Efe. 6:2-4) E, dele volte, i ansiani i ndarà veder se i genitori i seita a giutar so fiol in quel che ghe ocore. Ma, se el gióveno no’l aceta el aiuto dei so genitori e el seita a far quel che l’è sbalià, tre ansiani i ndarà parlar con lu e i so genitori. w24.08 p. 24 § 18

Sicuro che restemo contenti quando qualchedun ne fà una roba bona o ne dà qualcossa. Ma ghemo ancora de pi alegria quando semo noantri che ghe femo qualcossa. Noantri podemo gaver tanta alegria quando femo robe bone par i altri parché Geovà el ne ga creà cossita. Alora, quanto pi robe bone femo par i altri, pi contenti restemo. L’è tanto bel saver che Geovà el ne ga creà cossita, mia vera? (Sal. 139:14) Anca el esémpio de Geovà el mostra che quando una persona la fà robe bone par i altri ela la ze pi felice. Parché? La Bìblia la dise che Geovà l’è el “Dio felice” e la mostra che lu l’è la persona che fà de pi robe bone par i altri che ghen’è. (1 Tim. 1:11) Par esémpio, par meso de Geovà, ‘ghemo vita, semo boni de moverse e esistimo’. (Ati 17:28) La Bìblia anca la dise che “tuti i presenti boni e perfeti” i vien de lu. (Tia. 1:17) Sicuro che tuti noantri volemo far ancora de pi robe bone par i altri e esser cada volta pi contenti. Cossa pol giutarne? Far compagno el bel esémpio de Geovà. — Efe. 5:1. w24.09 p. 26 §§ 1-4

Pol esser che dopo de veder tuto quel che un ansiano el ga de far, te pensi che mai te sarè bon de esser un ansiano. Ma ricòrdate che Geovà e la so organisassion i sa che nissun sarà bon de mostrar queste qualità de maniera perfeta. (1 Pie. 2:21) L’è el spìrito santo de Geovà che te giutarà a esser ancora pi bravo. (Fil. 2:13) Alora, se te sè che te manca qualcossa, prega a Geovà e domanda el so aiuto. Dopo, proa studiar sora quel che te ocore e domanda che un ansiano el te giute a saver cossa che te ghè de far. Seita a sforsarte! Domanda che Geovà el te giute a esser ancora pi bravo de adorarlo e giutar la congregassion. (Isa. 64:8) Sicuro che lu el ndarà benedirte tanto e el ndarà giutarte a deventar un bravo ansiano. w24.11 p. 25 §§ 17, 18

Anca se ghemo belche servio a Geovà tanti ani, no ghemo mai de pensar che lu el ga obrigassion de perdonarne o che meritemo el so perdon. L’è vera che Geovà el dà valor a tuto quel che femo par lu nel so laoro. Ma lu el ga mandà el so Fiol come un presente, e nò par pagarne par el nostro laoro. Alora, saria tanto bruto pensar che meritemo el perdon de Geovà parché ghemo fato qualcossa par lu. Se pensemo cossita, saria come dir che no ghe ocorea che Gesù el morisse par noantri. (Varda anca Gàlati 2:21.) El apòstolo Paolo el savea che mai el meritaria el perdon de Geovà, ma lu el ga seità sforsarse de far el so meio. Parché? Parché lu el volea mostrar che el ghe dea valor ala misericòrdia e ala bontà de Geovà, e no lo fea par proar meritar el so perdon. (Efe. 3:7) Cossa che imparemo? Compagno a Paolo, ghemo de seitar a far el nostro meio a Geovà parché volemo mostrarghe che ghe demo valor a tuto quel che el ga fato, e nò par proar meritar el so perdon. w25.01 p. 27 §§ 5, 6