Lùlio

Arquanti servi de Geovà i ga dificoltà parché i ze vegnesti veci, no i ga mia una bona salute o i ze desgrassiadi. Fursi questi cari fradei e sorele no i ze mia sicuri se i ze importanti par Geovà. Par quela, pol esser che lori i se domanda: ‘Sarà che ancora posso far qualcossa par Geovà?’ El scritor del Salmo 71 el ga bio bruti pensieri come questi. Lu el ga dito a Geovà: ‘No stà abandonarme quando la me forsa la se finisse.’ (Sal. 71:9, 18) El salmista l’era sicuro che se el seitesse leal, Geovà el ndaria giutarlo. Lu el ga capio che Geovà el resta pròpio contento con quei che i seita a far el so meio par adorarlo anca cole so dificoltà. (Sal. 37:23-25) Se te sì belche vècio, sfòrsate par capir cossa che Geovà el pensa sora ti. Lu el pol giutarte a seitar leal anca se te ghè qualche dificoltà. (Sal. 92:12-15) Alora, invesse de pensar in quel che no te sì mia bon de far, proa pensar in quel che ti te pol far. w24.10 p. 28 §§ 14-16

Par quei che no i ze mia bravi servi de Geovà, l’è fadiga pensar sora prinsipi e meterli in pràtica quando i ga de far una dessision. Ghen’è de quei che i pensa che, se no ghen’è mia una lege nela Bìblia, lori i pol far quel che i vol. Invesse, altri i seita a ndar in serca de una règola, anca se no ghe ocore mia. Par esémpio, nel passà, i fradei de Corinto i gavea domandà al apòstolo Paolo se i podaria magnar quel che l’era stà sacrificà a ìdoli. Alora, invesse de dir cossa che lori i gavaria de far, Paolo el ga parlà sora prinsipi dela Bìblia e el ga spiegà che ghe toca a cada un doperar la so cossiensa par dessider cossa che far. Cossita, quei fradei no i ndaria intrigar i altri e i podaria restar tranquili cola so dessision. (1 Cor. 8:7-9) Paolo el ga giutà i corinti a esser bravi servi de Dio. Cossita, lori i podaria pensarghe sora quel che i ndaria far, invesse de ndar drio a nantra persona o ndar in serca de una règola. w24.04 p. 5 § 14

Nela època de Giona, i niniviti i ga bio la oportunità de ciamarse grami. Ghemo de ricordarse che Gesù el ga parlà che, nela “ressuression de giulgamento”, quei che i ga “praticà robe rugne” i sarà ressussitadi. (Gio. 5:29) Cossita, capimo che fursi anca arquante persone de Sodoma e Gomora le sarà ressussitade. Alora, noantri ndaremo insegnarghe sora Geovà e Gesù. Cossita capimo che ‘Geovà el varda el cuor e i pensamenti’. Alora, nela ressuression che ghen sarà nel futuro, lu el ndarà ‘pagar a cada un de acordo con quel che el ga fato’. Ma Geovà el ndarà mostrar misericòrdia sempre che el pol. Alora, no podemo dir che una persona la sarà destruta par sempre se la Bìblia no lo dise. w24.05 p. 5, 6 §§ 15, 16

Geovà sempre el ga doperà la so Parola par giutar e darghe forsa ai so servi. Varda par esémpio el profeta Geremia. Quando Geovà ghe ga dito de ndar predicar, Geremia el ga bio paura. Lu el ga dito: “No sò gnanca parlar, son sol un tosato.” (Ger. 1:6) Alora, cossa che lo ga giutà a gaver coraio? Lu el ga bio forsa par meso de quel che Geovà el ghe ga dito. Dopo, Geremia el ga dito: “La so parola la ze deventada come un fogo che brusea rento el me cuor e sarà nei me ossi. Son restà tanto canso de tégnerla.” (Ger. 20:8, 9) Cossita, ancora che Geremia el gavesse dificoltà, quel che el predichea ghe ga dato la forsa par seitar a far el so laoro. Anca ancoi noantri podemo gaver forsa par meso dela Bìblia. Quando el apòstolo Paolo el ga scrito ai colossensi, lu el ga dito che se lori i imparesse de pi dela Bìblia, i saria boni de ‘viver come Geovà el vol e de seitar a dar fruto con tuti i boni laori’. — Col. 1:9, 10. w24.04 p. 14, 15 §§ 2-4

Quel che Zadoche el ga fato l’è stà pròpio difarente de quel che el prinsipal sasserdote Abiatar el ga fato. Abiatar l’è restà dela banda de Adonia e volea farlo rè. Invesse Zadoche el ga seità leal a Geovà e a Davi. Cossa che fursi ga giutà Zadoche a seitar leal? Saver che Davi el se fidea pròpio in lu. Alora, quando Davi el ga savesto quel che Adonia l’era drio far, lu el ga domandà che Zadoche, Natan e Benaia i fesse con che Salomon el deventesse rè. (1 Rè 1:32-34) Nantra roba che fursi ga giutà Zadoche la ze stata veder che Natan e altri servi de Geovà i era leai a Davi. Dopo, quando Salomon l’è deventà rè, lu el ga scoliesto Zadoche come prinsipal sasserdote invesse de Abiatar. (1 Rè 2:35) Come che ti te pol far compagno a Zadoche? Se una persona che te ami la abandona la verità, assa ciaro par Geovà che te vol seitar leal a lu. (Gios. 24:15) Prega par domandar el so aiuto e resta insieme a altri servi leai de Geovà. Lu el ndarà darte la forsa e el coraio che te ocore. E ricòrdate che Geovà el ghe dà tanto valor ala to lealtà e che el ndarà benedirte. — 2 Sam. 22:26. w24.07 p. 6, 7 §§ 16, 17

El Salmo 15:2 dise che un amigo de Dio ‘el vive sensa colpa e el fà quel che l’è giusto’. Questo vol dir che ghemo de seitar a viver “sensa colpa” e seitar a ‘far quel che l’è giusto’. Ma sarà che noantri podemo pròpio ‘viver sensa colpa’? Si. Tuti noantri semo imperfeti, ma se femo el nostro meio par obedir a Geovà, lu el ne vede come persone “sensa colpa”. Cossita capimo che, par esser amighi de Dio, ghemo de far de pi che sol dedicarse e batesarse. Par esémpio, nel tempo dela Bìblia, le persone no le era amighe de Geovà sol parché le nassea nela nassion de Israel. Arquanti i disea che i era drio servir a Dio ma ‘sensa esser sinsieri e giusti’. (Isa. 48:1) E in quel tempo, i israeliti che i volea esser amighi de Geovà i gavea de imparar de Dio. Dela medèsima maniera, ancoi no basta batesarse e dir che semo Testimònie de Geovà par deventar so amighi. Invesse, ghemo de seitar ‘far quel che l’è giusto’. w24.06 p. 9 § 4; p. 10 § 6

Che bele robe Geovà el ne dà? Lu el ne dà tuto quel che ne ocore par viver. Par esémpio, Geovà el ne giuta a gaver de magnar, robe de meter su e una casa de star. (Sal. 4:8; Mat. 6:31-33; 1 Tim. 6:6-8) L’è vera che dele volte ghemo poco, ma Geovà sempre el ne dà quel che ne ocore par viver. Sicuro che Geovà no’l ne dà mia tute queste robe parché ghe toca. Vedemo quel che podemo imparar dele parole de Gesù in Mateo 6:25, 26. Gesù el ga dito che i osei ‘no i semena gnanca i tol su, e gnanca no i mete via nel paiol parché el nostro Pare che l’è nel cielo el ghe dà de magnar’. Dopo lu el ga dito: “Sarà che valtri no valé de pi che lori?” Cossa che imparemo de quel che Gesù el ga dito? Se Geovà el dà tuto quel che ghe ocore ale bèstie, podemo esser sicuri che el ne darà tuto quel che ne ocore anca a noantri. Compagno a un bon pare, Geovà el ne dà tuto quel che ghemo de bisogno par causa del so grando amor. — Sal. 145:16; Mat. 6:32. w24.09 p. 26, 27 §§ 4-6

Un servo ministerial l’è un fradel batesà scoliesto col aiuto del spìrito santo, par giutar i ansiani a tender dela congregassion. El pi importante l’è che i servi ministeriai i ama tanto a Geovà e i mete in pràtica le so orientassion. Lori anca i ama tanto so fradei. (Mat. 22:37-39) Alora, cossa che un fradel el ga de far par deventar un servo ministerial? La Bìblia la dise cossa che te ghè de far par esser un servo ministerial. (1 Tim. 3:8-10, 12) Alora, se te vol giutar de pi i altri, te pol studiar la Bìblia par capir cossa che te ghè de far e sforsarte de meter in pràtica quel che te ghè imparà. Ma, prima de tuto, te ghè de domandarte: ‘Parché che mi vui esser un servo ministerial?’ w24.11 p. 14, 15 §§ 4, 5

Arquante persone le dise che le ga belche ledesto la Bìblia tante volte. Ma sarà che queste persone le crede pròpio nela Bìblia? Sarà che lore le ga metesto in pràtica quel che le ga imparà? Nò! Quasi tute le persone no le aceta quel che la Bìblia la dise. Questo l’è pròpio difarente del pòpolo de Geovà. Noantri se sforsemo de meter in pràtica tuti i so consili. L’è vera che no l’è mia fàcile leder la Bìblia e meter in pràtica quel che semo drio imparar. Prima, te ghè de torte el tempo par lederla. Fursi te sì drio leder la Bìblia massa svelto e no te sì mia bon de capir tuto quel che te sì drio leder. Pol esser che te sì desanimà parché te ghè capio che te toca far arquanti cambiamenti. Ma ancora che no sìpia mia fàcile, te sarè bon de leder la Bìblia e de meter in pràtica quel che te sì drio imparar col aiuto de Geovà. Col so aiuto, te sarè bon de meter in pràtica tuto quel che te impari. Sicuro che quanto pi te ledi e te meti in pràtica nela vita, pi alegria te gavarè. — Tia. 1:25. w24.09 p. 7 §§ 15, 16

Par meso del so spìrito santo, Geovà el ne consola quando semo drio infrontar bruti colpi. Se anca ti te sì drio infrontar bruti colpi e te ghè el to cuor spacà, contaghe a Geovà quel che te sì drio sentir. Parla con lu sempre che te ocore e par el tempo che te vol. (Sal. 86:3; 88:1) Seita a domandar spìrito santo a Geovà, e sìpia sicuro che el ndarà sempre giutarte. Sito drio infrontar un bruto colpo e te par che no te ghè forsa de ndar avanti? Alora, el spìrito santo el pol darte la forsa che te ocore par seitar leal a Geovà. (Efe. 3:16) Cossa che te pol far dopo de domandar spìrito santo a Geovà? Sfòrsate de far robe che ndarà giutarte a ricever de pi spìrito santo. Par esémpio, ndar ale riunion e ala predicassion coi fradei e sorele. Te pol anca sforsarte de leder la Bìblia tuti i giorni par esser bon de capir come che Geovà el pensa. (Fil. 4:8, 9) Intanto che te ledi la Bìblia, stà atento a servi fedeli del passà che i ga infrontà dificoltà e come che Geovà li ga giutadi. w24.10 p. 9 §§ 12, 14

Compagno a Geovà e a Gesù, noantri amemo tanto le persone. (Pro. 8:31) Par quela, ne fà pecà veder quei che no i cognosse a Dio e che no i ga speransa. (Efe. 2:12) Lori i ga tanti problemi ancoi, ma noantri podemo giutarli par meso dele bone notìssie del Regno de Dio. Volemo sforsarse del tuto par insegnar queste bone notìssie a tute le persone par causa del amor e dela compassion che sentimo. Queste verità ndarà darghe speransa e ndarà giutarli a viver felici adesso. E nel futuro, lori i podarà viver par sempre nel novo mondo de Dio. (1 Tim. 6:19) Par causa del nostro amor par i altri, volemo parlar a tuti che presto questo bruto mondo el sarà finio fora. (Eze. 33:7, 8) Volemo dirghe cossa che ndarà suceder nela granda tribolassion. Prima, le religion false le sarà finide fora. E dopo el Armagedon, el bruto mondo de Sàtana no’l ghen sarà pi. — Apo. 16:14, 16; 17:16, 17; 19:11, 19, 20. w24.05 p. 16, 17 §§ 8, 9

El apòstolo Paolo el ga dito che noantri ‘no ghemo mia de vingarse, ma ghemo de assar che Dio lo fae’. Alora, cossa ghemo de far? Ghemo de assar che Geovà el dessida la ora e anca come che el ndarà far giustìssia. Un fradel de nome John el ga sofrio tanto par causa dei sbali dei altri. Lu el ga dito: “No l’è stà mia fàcile parché son restà pròpio cativo e me ga tocà sforsarme tanto par no far gnente de sbalià. Ma Romani 12:19 me ga giutà a portar passiensa e fidarme in Geovà.” Parché che l’è bon par noantri portar passiensa e fidarse in Geovà? Parché no restaremo disgustadi intanto che proemo finir fora col problema. Invesse, noantri restaremo tranquili parché savemo che Geovà el ndarà finir con tuti i nostri problemi nela ora giusta. Geovà el ga prometesto che el ndarà giutarne, e el vol che se fidemo in lu. Se femo cossita, mai seitaremo disgustadi parché saremo sicuri che lu el ndarà far quel che l’è giusto. w24.11 p. 6 §§ 14, 15

Ghemo de star atenti de mai assar che i soldi e le robe che ghemo devente la roba pi importante nela nostra vita. Quel che el apòstolo Paolo el ga dito ai fradei in Corinto el ne insegna pròpio quel lì. Lu el ga parlà del bruto esémpio dei israeliti quando i era nel deserto e anca de quel che i ga fato quando i era darente el Monte Sinai. Geovà el gavea fato un miràcolo par darghe de magnar ai israeliti. Ma come lori sol i se preocupea col magnar, quel lì l’è deventà come una roba rugna par lori. (Nùm. 11:4-6, 31-34) Par quela che Paolo el ga dito che “no volemo mia le robe rugne che lori i volea”. (1 Cor. 10:6, 7, 11) E quando i israeliti i ga adorà el vedel de oro, lori i ga mostrà che i se preocupea de pi con magnar, bever e divertirse, che con obedir a Geovà. (Éso. 32:4-6) Par quela, Paolo el ga parlà del bruto esémpio dei israeliti par quei fradei che suito i vederia Gerusalen e el témpio esser finidi fora. Anca noantri semo drio viver darente del fin de questo mondo bruto. Cossita, l’è tanto importante star atenti de mai far compagno ai israeliti. w24.12 p. 6 § 13

Geovà l’è el “Dio felice”. (1 Tim. 1:11) Lu el ne ga dato tante bele robe par goder la vita parché el vol che anca noantri semo felici. (Tia. 1:17) Una dele bele robe che Geovà el ne ga dato la ze el matrimònio. Quando un omo e una dona i se marida, lori i promete amarse e rispetarse un al altro. Se el omo e la dona i se sforsa de gaver un grando amor nel matrimònio, lori i ze felici. Tanti ancoi no i ze mia felici nel so matrimònio parché no i bada mia la promessa che i ga fato de amarse e rispetarse. Come che Geovà el speta che el omo el trate la so dona? Lu el dise che el omo el ga de dar onor ala so dona. Questo vol dir che el ga de mostrarghe tanto rispeto e tratarla con amor e bontà. — 1 Pie. 3:7. w25.01 p. 8 §§ 1, 2; p. 9 §§ 4, 5

Sicuro che la carta che el apòstolo Paolo el ga scrito ai ebrei li ga giutadi tanto a dàrghene fora cole dificoltà che le vegnaria pi avanti. In quela carta, Paolo li ga incoraiadi a studiar la Parola de Dio e a pensarghe sora. Cossita, lori i saria boni de capir quel che no l’era mia vero e mai creder in busie. Paolo anca el ghe ga dito che i gavea de far pi forte la so fede par esser boni de far presto in obedir ale orientassion de Gesù e de quei che lu el gavea scoliesto par tender dele congregassion. Paolo anca el ga giutà i fradei ebrei a far pi forte la so perseveransa e a capir che Geovà el podaria doperar le dificoltà che i infrontesse par insegnarghe tante robe. Sicuro che anca noantri ghemo de meter in pràtica tuti questi consili dela Parola de Dio. Se femo cossita, saremo boni de seitar fedeli fin el fin. — Ebr. 3:14. w24.09 p. 13 §§ 17, 19

Quando Adon e Eva i ga pecà, lori i ga perso la so vita perfeta e eterna. Alora, de acordo cola Bìblia, Geovà el ga dessidio che qualchedun el gavaria de pagar el stesso valor che quel che Adon el gavea perso. (1 Tim. 2:6) Chi che podaria pagarlo? Gavaria de esser una persona (1) che la fusse perfeta, (2) che la podesse viver nela Tera par sempre, e (3) che la volesse dar la so vita come sacrifìssio par noantri de volentiera. Parché che Gesù l’è stà bon de pagar quel che l’era stà perso? Parché (1) lu l’era perfeto e “no’l ga mia fato pecato”, (2) lu el podaria viver nela Tera par sempre e (3) lu el ga dato la so vita de volentiera par giutarne. — Ebr. 10:9, 10; 1 Pie. 2:22. w25.02 p. 4 §§ 11, 12

Geovà el te ama tanto e el vol che te fae parte dela so fameia. Alora, no importa cossa che te toca far par esser bon de batesarte, lu sempre el ndarà giutarte. Nel passà, Gesù el ga dito a arquanti dei so dissìpoli: “Se valtri gavé la fede granda come una semensa de mostarda, valtri ndaré dir a questa montagna: ‘Móvete de qua par de là’, e ela la ndarà moverse. Alora, valtri saré boni de far tuto quel che volé.” (Mat. 17:20) Gesù el ga parlà queste parole a persone che ghe ndea drio fea poco tempo. Lore le gavea bisogno de far cada volta pi forte la so fede. Ma, con un poco de fede lore belche le gavaria el aiuto de Geovà e le saria bone de dàrghene fora cole dificoltà. Dela stessa maniera, te pol esser sicuro che Geovà sempre el ndarà giutarte. Se te te nicordi che te toca cambiar qualcossa par batesarte, no stà tirarla massa longa par farlo. Batesarte la ze la meio dessision dela to vita! w25.03 p. 7 §§ 18-20

Se semo sicuri che el Dio che el vive l’è sempre pronto par giutarne, anca noantri saremo boni de dàrghene fora con qualche dificoltà. Come? Podemo pensar sora quel che Geovà el ga fato nel passà. (Isa. 37:17, 33-37) Te pol anca leder nel jw.org sora quel che Geovà l’è drio far ancoi par giutar i fradei e sorele. Anca proa pensar sora quel che lu el ga belche fato par giutarte. Pol esser che lu no’l gàpia fato una roba de maraveiarse. Ma te pol esser sicuro che Geovà el ga belche fato tante robe par ti. Par esémpio, l’è stà lu che el ga volesto esser to amigo. (Gio. 6:44) Alora proa domandarghe che el te giute a ricordar le volte che el ga rispondesto ale to orassion, el te ga giutà nela ora giusta e el te ga tendesto nei to bruti colpi. Se te pensi sora queste robe, te sarè ancora pi sicuro che Geovà sempre el ndarà giutarte. w24.06 p. 21 § 8

Ghemo de sempre far quel che l’è giusto. Anca se no volemo assar Geovà disgustà, ne ocore capir che semo imperfeti e che l’è tanto fàcile ndar drio una voia che la ze sbaliada. (Rom. 7:21-23) Pol esser che ne vien fora qualcossa de colpo che ne fà gaver voia de far quel che l’è sbalià. Alora, cossa pol giutarne a seitar leai a Geovà e a Gesù? Ne ocore far quel che Gesù el ga dito e star sempre atenti. Tuti noantri podemo gaver voia de far una roba che la ze sbaliada una volta o l’altra. Ma, pol esser che cada un de noantri ga de sforsarse tanto par dàrghene fora con una voia che la ze sbaliada o par no ndarghe drio a una maniera de pensar del mondo. Par esémpio, pol esser che qualchedun el ga de sforsarse tanto par no far imoralità sessual, no vardar pornografia o no far masturbassion. Arquanti i ga paura dele persone, altri i vol far tuto quel che i vol lori e altri i resta suito cativi par gnente. Par quela, i ga de sforsarse tanto par seitar a far quel che l’è giusto. w24.07 p. 14 § 3; p. 15 § 5

Cossa che podaria suceder se i ansiani no i acetesse nela congregassion quel omo che se gavea ciamà gramo o se i fradei e sorele no i mostresse che lo amea? Pol esser che lu el restaria massa triste e tanto desanimà. Fursi, lu el ndaria pensar che no’l podaria pi tornar a servir a Geovà, che Geovà mai lo perdonaria e che no ghen’era pi gnente de far. Ma ancora nantra roba podaria suceder se tuti nela congregassion no i perdonesse quel omo. Cossa? Quei fradei e sorele i ndaria rovinar la so amicìssia con Geovà. Parché? Parché lori no i saria drio far compagno a Geovà, che sempre el mostra misericòrdia e el perdona i so servi. Invesse, lori i faria compagno a Sàtana, che l’è pròpio rugno. Se no i acetesse quel omo, lori i assaria che Sàtana li doperesse par desanimarlo de servir a Geovà. — 2 Cor. 2:10, 11; Efe. 4:27. w24.08 p. 17 §§ 7, 10, 11

Gesù anca el gavea scoliesto arquanti òmini par giutar la congregassion de nantra maniera. Lu el ga mandà Paolo, Barnabè e altri come superintendenti par visitar le congregassion. (Ati 11:22) Compagno i servi ministeriai e i ansiani, questi superintendenti i fea pi forte le congregassion. (Ati 15:40, 41) Ancoi, i superintendenti de sircuito i ga de viaiar tanto. Dele volte, i va tanto distante par catar le congregassion. Tute le stimane, i superintendentI i fà arquanti discorsi, vìsite par incoraiar i fradei, la riunion par i pionieri, la riunion par i ansiani e le riunion par la predicassion. Lori anca i parecia discorsi e i organisa le assemblee de sircuito e i congressi. Altre robe che i fà le ze insegnar i fradei nele scole de pionieri e organisar le riunion spessiai coi pionieri del sircuito. Dele volte, Betel ghe domanda de far anca altri laori importanti ben svelto. w24.10 p. 21 §§ 12, 13

Geovà el ga dito al profeta Geremia quel che ledemo nel testo de ancoi. Geovà el ga parlà una roba cossita anca nela carta che el apòstolo Paolo el ga scrito ai fradei ebrei. Lu el ga dito: ‘Mi no vao pi ricordarme dei so pecati.’ (Ebr. 8:12) Ma cossa che vol dir ‘no ricordarse pi’? Quando la Bìblia la dopera la parola “ricordarse” gnanca sempre la ze drio parlar de pensar nte una roba che ga sucedesto nel passà. Questa parola “ricordarse” anca la ze doperada par parlar sora quel che una persona la fà. Par esémpio, quel che el criminoso che l’era picà su dela banda de Gesù el ga parlà ne giuta a capir questo. Lu el ga dito: “Gesù, ricòrdate de mi quando te ndarè rento el to Regno!” (Luc. 23:42, 43) Sarà che quel criminoso l’era sol drio domandar che Gesù el pensesse in lu quando el fusse in cielo? Sicuro che nò! Invesse, lu l’era drio domandarghe che lo ressussitesse. Alora, quando Geovà el dise che no’l ndarà pi ricordarse dei nostri sbali, vol dir che no’l ndarà far gnente par castigarne. Sicuro che Geovà no’l ndarà mai castigarne par un pecato che el ga belche perdonà. w25.02 p. 11 §§ 14, 15

Par gaver sabedoria, ne ocore saver quel che ghe piase a Geovà, quel che lo disgusta, le so qualità e quel che lu el vol far. Te pol domandarte: ‘Con tuto quel che mi cognosso sora Geovà, sarà che questa dessision ndarà contentarlo?’ (Efe. 5:17) Ma pol esser che le dessision che femo par contentar a Geovà no ndarà piaserghe a quei dela nostra fameia o ai amighi. Par esémpio, pensa nte un pare e una mare che i vol che la so fiola la se maride con un fradel che l’è sior, ma che no l’è mia un bravo servo de Geovà. Sicuro che lori i vol che la so fiola la gàpia una bona vita. Ma sarà che quel fradel el sarà bon de giutarla a gaver una forte amicìssia con Geovà? Cossa che Geovà el pensa sora questo? Podemo catar la risposta in Mateo 6:33. Lì dise che noantri ghemo de ‘meter el Regno nel primo posto’. Alora, anca se rispetemo el nostro pare, mare e quei che ne vol ben, ghemo de ricordarse che la roba pi importante la ze far quel che contenta a Geovà. w25.01 p. 17 §§ 9, 10

Ancoi tanti i ne vien contra par causa dela predicassion. Par quela, ghemo de bisogno del aiuto de Geovà par seitar a far el nostro meio in questo laoro. (Apo. 12:17) Parché che te pol esser sicuro che Geovà el te giutarà? La risposta la ze nela orassion de Gesù in Gioani, capìtolo 17. In questa orassion, Gesù el ga domandà che Geovà el tendesse dei apòstoli. E el libro de Ati mostra come che Geovà li ga giutadi a infrontar la perseghission e a seitar a meterghela tuta nela predicassion. Ma in quela orassion, Gesù el ga anca domandà che Geovà el tendesse de quei che i imparesse la verità dopo. Ti te sì un de questi! Par quela, te pol esser sicuro che Geovà el te giutarà, come el ga giutà i primi dissìpoli de Gesù. (Gio. 17:11, 15, 20) Savemo che in questi ùltimi di pol esser cada volta pi fadiga predicar. Ma Gesù el ne assa sicuri che gavaremo el aiuto che ne ocore par seitar a far questo laoro. — Luc. 21:12-15. w25.03 p. 17, 18 §§ 13, 14

I servi de Geovà i pol “osar de alegria” parché i dà tanto valor a tuto quel che Geovà el ghe dà. Noantri ghemo le verità che fà pi forte la nostra fede, le promesse dela Bìblia che ne consola tanto e una bela speransa par el futuro par via del sacrifìssio de Gesù. Par quela, noantri se ‘sentimo ben nel cuor’ e restemo tanto contenti quando parlemo de queste bele. (Sal. 34:8; 133:1-3) Intrà quei che i serve a Geovà, ghen’è due robe importante: amor e union. Queste due bele robe ne giuta a capir come sarà la vita in Paradiso, quando ghen sarà ancora de pi amor e union intrà de noantri. (Col. 3:14) Alora, se una persona la vol gaver la vera alegria, la ga de servir a Geovà. Semo sicuri che Geovà e tuti i fradei e sorele i ne dà tanto valor, anca se i altri i pensa mal de noantri. — Isa. 65:15. w24.04 p. 21 §§ 7, 8

Come che tuti noantri podemo incoraiar e giutar quei che i vol maridarse? Una roba importante l’è star atenti a quel che disemo. (Efe. 4:29) Podemo domandarse: ‘Seito dir a quei che no i ze maridadi robe che pol farli sentirse mal? Quando vedo che un fradel e una sorela che no i ze mia maridadi i ze drio ciacolar, penso suito che i vol smorosar?’ (1 Tim. 5:13) Noantri no ghemo mai de dir robe ai nò maridadi che li fae sentir che ghe manca qualcossa o che i ze manco importanti de quei che i ze maridadi. Invesse, volemo lodarli e incoraiarli. E se pensemo che un fradel e una sorela i podaria ndar ben insieme? La Bìblia la ne dise che ghemo de rispetar i sentimenti dei altri. (Rom. 15:2) Arquante persone che no le ze maridade no le vol che altri i le giute par catar un moroso o una morosa, e noantri ghemo de rispetar quel che le vol. (2 Tes. 3:11) Altri i volaria aiuto, ma l’è meio spetar che lori i ne domande. — Pro. 3:27. w24.05 p. 24, 25 §§ 14, 15

Ancoi, pol suceder una roba de colpo che la ne fà tribolar tanto o fin una roba che la càmbia tanto la nostra vita. Ancora cossita, semo tanto contenti parché savemo che el nostro Dio el ndarà giutarne. E quando lu el ne giuta, vedemo che lu l’è pròpio el ‘Dio che el vive’. (Sal. 18:46) Ma, Davi el ga dito che Geovà l’era la ‘so Ròcia’, una roba sensa vita. Parché? La Bìblia la ciama Geovà de “Ròcia” par giutarne a cognosser arquante dele so bele qualità. Arquanti servi de Dio del passà i disea che Geovà l’è compagno a una ròcia quando i lo lodea. La prima volta che vedemo questo l’è in Deuteronómio 32:4, ndove dise che ‘Geovà l’è la Ròcia’. Nela orassion che Ana la ga fato, ela la ga dito che ‘no ghen’è ròcia compagno al nostro Dio’. (1 Sam. 2:2) Abacuche el ga dito che ‘Geovà l’era la so Ròcia’. (Aba. 1:12) El scritor del Salmo 73 el ga dito che ‘Geovà l’era la ròcia del so cuor’. (Sal. 73:26) E fin Geovà el ga dito che lu l’è compagno a una ‘ròcia’. — Isa. 44:8. w24.06 p. 26 §§ 1, 3

Tuti i rè de Israel che i ga contentà a Geovà i lo ga adorà con tuto el so cuor. E la Bìblia la dise che ‘no ghen’è stà un rè compagno a Giosia, che l’è tornà a Geovà con tuto el so cuor’. (2 Rè 23:25) Invesse, el rè Salomon el ga fato brute robe dopo de vècio e ‘no’l ga servio a Geovà de tuto el cuor’. (1 Rè 11:4) La Bìblia anca la dise che el rè Abion no l’è stà un rè fedele parché no’l ga adorà a Geovà ‘con tuto el cuor’. (1 Rè 15:3) Quando la Bìblia la parla sora “cuor”, la ze drio parlar de quel che semo par rento, o sia, dei nostri pensamenti, dele voie che ghemo, dele nostre motivassion, dele robe che volemo far e de quel che savemo far. Ma cossa che vol dir adorar a Geovà con tuto el cuor? Vol dir adorarlo nò sol parché savemo che ne toca farlo, ma parché lo amemo e lo rispetemo tanto e volemo adorarlo par tuta la nostra vita. w24.07 p. 21 §§ 4, 5

Geovà anca el dopera nantra ilustrassion par giutarne a capir come che el perdona i nostri pecati. Lu el ga dito: ‘Mi vao eliminar i vostri sbali con una nùvola e i vostri pecati con una granda nùvola.’ (Isa. 44:22) Alora, quando Geovà el ne perdona l’è come se el fusse drio doperar una nùvola ben granda par querder tuti i nostri pecati. Cossita, gnanca lu gnanca noantri no li vedemo pi. Cossa che questa ilustrassion la ne insegna? Quando Geovà el ne perdona, no ne ocore seitar a sentirse in colpa par tuta la vita. Ghemo de ricordarse che, par meso del sacrifìssio de Gesù, el nostro dèbito l’è stà finio fora del bon. Alora, quando Geovà el ne perdona l’è come se no gavessino mai fato quel pecato. No l’è mia bel de saver che, quando se ciamemo grami, Geovà el ne perdona cossita? Par quela, podemo esser sicuri che lu el ne aceta come so amighi nantra volta e no ne ocore mia sentirse in colpa gnanca gaver paura che Geovà el seitarà disgustà con noantri. w25.02 p. 10, 11 §§ 11-14

Geovà el ga dato un laoro tanto importante ai ansiani. Lori i ga de proteger la congregassion de tuti quei che no i vol obedir a Geovà. (1 Cor. 5:7) Lori i se sforsa par far sempre compagno a Geovà, che “el ga tanto amor e misericòrdia”. (Tia. 5:11) Par quela, quando qualchedun fà un bruto pecato, i ansiani i ga speransa che questa persona la càmbie quel che ghe ocore e i fà tuto quel che i pol par giutarla. El apòstolo Gioani el ga mostrà tanto amor par i so fradei. Lu el ga scrito: “Me cari fioi, mi son drio scriverve queste robe e cossita valtri no ndaré far pecato. Ma, se qualchedun el fà un pecato, noantri ghemo un che el ne giuta, che l’è insieme al Pare: Gesù Cristo, un giusto.” (1 Gio. 2:1) Ma, dele volte, una persona che la ga fato un bruto pecato no la se ciama grama. Se una roba cossita sucede, questa persona la ga de esser cavada via dela congregassion. w24.08 p. 25 §§ 19, 20

Se te resti disgustà parché no te sì mia drio far tuto quel che te volei par Geovà, te pol esser sicuro che lu el dà tanto valor a quel che ti te fè. Alora, sfòrsate de mai far comparassion intrà quel che ti te fè e quel che i altri i fà. Parché? Parché Geovà no’l fà mia comparassion. (Gàl. 6:4) Varda due esempi: Maria la ga dato a Gesù un òio profumà tanto caro, e una védova la ga dato sol due pìcole monede nel témpio. (Gio. 12:3-5; Luc. 21:1-4) Cossa che Gesù el ga pensà sora quel che lore le ga fato? Lu no’l ga mia fato comparassion intrà Maria e la védova. Invesse, el ga dito che quele due done le gavea mostrà la so fede. Quel che Gesù el pensa l’è compagno a quel che Geovà el pensa. Par quela, te pol esser sicuro che Geovà el resta tanto contento con tuto quel che te fè par causa del to amor e dela to fede. Lu el resta contento anca quando quel che ti te fè l’è poco. Dele volte tuti noantri se domandemo se semo pròpio importanti par Geovà, se ghemo fato le meio dessision o se podemo ancora far qualcossa par lu. Ma la Bìblia la pol giutarte a dàrghene fora con qualche bruto pensamento. Sìpia sicuro che Geovà el te cognosse tanto ben e el ghe dà valor a tuto quel che ti te fè. E ricòrdate sempre che Geovà el te ama tanto e che te sì pròpio importante par lu. w24.10 p. 25 § 3; p. 29 §§ 17, 18