Agosto

Noantri preghemo che Geovà el giute che ancora tanti i scolte le bone notìssie e le vegna servirlo. Ma cossa pol suceder cole persone che no le vol scoltarne adesso? Pol esser che Geovà el ndarà salvar arquante persone che le scominsiarà a gaver fede in lu dopo veder “Babilònia, la Granda” esser finida fora. Alora, l’è ancora pi importante parlar a tuti sora quel che ndarà suceder. Parché? Parché lori sol i ndarà ricordarse de questo nel futuro se ghe lo disemo adesso. (Varda anca Ezechiel 33:33.) Pol esser che queste persone le ndarà ricordarse de quel che semo drio parlar e che le volarà servir a Geovà insieme a noantri, vanti che sìpia massa tardi. Compagno a quel comandante dela preson de Filipo, che el ga bio fede dopo del teremoto, pol esser che arquante persone le volerà adorar a Geovà dopo che Babilònia la sarà destruta. — Ati 16:25-34. w24.05 p. 17 §§ 9, 10

Podemo imparar tanto sora quel che el apòstolo Paolo el ga scrito ai ebrei. Quei fradei no i ga seità a far pi forte la so amicìssia con Geovà. Invesse, lori i gavea bisogno che qualchedun ghe insegnesse verità sémplisse dela Bìblia. (Ebr. 5:12) Lori no i ga seità a imparar altre verità che Geovà l’era drio insegnar par meso dela congregassion. (Pro. 4:18) Par esémpio, dopo dela morte de Gesù, no ghe ocorea mia a nissuni obedir ala Lege de Moisè. Ma dopo 30 ani, ancora arquanti fradei giudei i seitea a dir che tuti i dissìpoli de Gesù ghe ocorea ndar drio ala Lege. (Tito 1:10) Alora, par meso dele so carte, Paolo l’era drio proar giutarli a capir e a acetar ancora altre verità. La so carta la ga insegnà che Gesù el gavea mostrà una maniera nova e ancora meio de adorar a Geovà. Quel che Paolo el ga scrito anca ga giutà quei fradei a seitar a predicar con coraio. — Ebr. 10:19-23. w24.04 p. 6 § 15

Adon e Eva i ze ndati drio a Sàtana e i ga desobedio a Geovà. Par via de quel che lori i ga fato, bilioni de persone le more. Cossa che sucederà con lore? Un pìcolo grupo con 144 mila dissìpoli fedeli che i sarà ressussitadi par viver in cielo no i ndarà pi morir. (Apo. 14:1) E tuti i òmini e done fedeli che i amea a Geovà i tornarà a viver nela “ressuression dei giusti”. Lori i podarà viver par sempre nela Tera se i seita a far quel che l’è giusto nei Mila Ani del Governo de Cristo e se i seita leai dopo che Sàtana el sarà molà par un tempo. (Dan. 12:13; Ebr. 12:1) E nei Mila Ani, anca “i ingiusti” i sarà ressussitadi. Questi ingiusti che no i obedia a Geovà e i ga fato robe brute i podarà cognosser la verità e deventar adoradori de Dio. (Gio. 5:29; Luc. 23:42, 43) Ma, Geovà no’l ndarà ressussitar quele persone che le ze pròpio rugne e che le ga dessidio seitar vegnerghe contra. — Luc. 12:4, 5. w24.05 p. 2 § 3; p. 5 § 15; p. 6 § 17

Quei che i vol esser amighi de Geovà i ga de ‘parlar la verità nel so cuor’. (Sal. 15:2) Sarà che parlar la verità nel cuor vol dir sol no contar busie? Nò. Invesse, Geovà el vol che se sforsemo de esser sempre sinsieri in quel che femo e parlemo. (Ebr. 13:18) Parché che ghemo de far cossita? ‘Parché Geovà el òdia quei che i ze falsi, ma el ga una forte amicìssia con quei che i ze giusti’. (Pro. 3:32) Quei che i “parla la verità nel so cuor” i obedisse a Geovà anca quando i ze lori soli. Quei che i obedisse a Geovà sol quando i altri i li vede le ze persone false. Una persona cossita la scomìnsia a pensar che obedir ale lege de Geovà no l’è mia la meio roba de far. (Tia. 1:5-8) Una persona falsa la desobedisse a Geovà in robe che no ghe par importante. Quando la vede che no ghe sucede gnente, ela la scomìnsia a far robe ancora pedo. Anca se ela la pensa che la ze drio servir a Dio, Geovà no’l aceta quel che la fà par lu. (Ecl. 8:11) Invesse, noantri volemo esser sinsieri in tuto quel che disemo e giusti in quel che femo. w24.06 p. 10 §§ 7, 8

Noantri amemo la verità dela Bìblia. L’è stà questa verità che ne ga giutà a gaver fede in Geovà. (Rom. 10:17) Semo sicuri che Geovà el ga fato la congregassion e la ga fata deventar una ‘colona che tien su la verità’. (1 Tim. 3:15) Sàtana el vol tanto che noantri se fermemo de fidarse nela Bìblia e nela organisassion de Dio. (Efe. 4:14) Suito el Diaol el contarà tante busie par imbroiar tute le nassion e farle ndar contra Geovà. (Apo. 16:13, 14) Noantri anca savemo che Sàtana ghe la meterà tuta par ndar contra de noantri. (Apo. 12:9) Alora, l’è tanto importante capir quel che l’è vero e quel che l’è falso, e obedir ala verità. (Rom. 6:17; 1 Pie. 1:22) Sol cossita saremo boni de esser salvi nela granda tribolassion. w24.07 p. 8 §§ 1-3

Quando Geovà el ga dato lege ai israeliti, lori i ga prometesto che i ndaria obedirghe. Alora, se i israeliti i fusse obedienti a Geovà, lori i saria benedidi e i gavaria protession. Ma se lori no i fusse mia obedienti e i fesse un sbàlio, come adorar falsi dèi, Geovà no’l ndaria pi benedirli, e lori i ndaria sofrir tanto. Ma questo no volea mia dir che Geovà el ndaria abandonarli. Invesse, lori i podaria ‘tornar a Geovà, so Dio, e scoltar la so voce’, o sia, ciamarse grami. (Deu. 30:1-3, 17-20) Cossa che Geovà ghe ga insegnà sora cossa vol dir ciamarse grami? Lori i ga imparà che anca dopo de far un sbàlio, lori i podea far quel che Geovà el vol e, cossita, ricever la so benedission nantra volta. Anca se i israeliti i era el pòpolo che Geovà el gavea scoliesto, lori i ghe ga desobedio tante volte. Par quela, lori i ga sofrio tanto. Ma Geovà no’l ga desistio de lori. Par esémpio, lu el ga mandà tanti profeti una volta drio man l’altra par giutar i israeliti a ciamarse grami e tornar a adorar a Geovà. — 2 Rè 17:13, 14. w24.08 p. 9 §§ 4, 5

I fradei ebrei che i vivea in Gerusalen e nela Giudea i ga infrontà tante dificoltà dopo dela morte de Gesù. Poco tempo dopo che ga scominsià la prima congregassion, lori i ga infrontà una bruta perseghission. Intorno de 20 ani dopo, l’era drio mancarghe soldi e i era fin drio patir la fame. (Ati 11:27-30) Ma, intorno del ano 61, lori i ga bio un poco de pace. In quela època, el apòstolo Paolo el ghe ga scrito una carta. Quel che Paolo el ga scrito l’era pròpio quel che i gavea de bisogno par dàrghene fora cole dificoltà che i infrontaria pi avanti. I fradei ebrei i ga ricevesto la carta del apòstolo Paolo nela ora giusta parché suito lori no i gavaria pi pace. Alora, i consili de Paolo li giutaria a dàrghene fora con tuto quel che i ndaria infrontar. w24.09 p. 8 §§ 1, 2

Quando semo drio infrontar un bruto colpo, i fradei i pol esser una “fonte de grando consolo”. (Col. 4:11) Par meso de quel che lori i fà, te podarè sentir pròpio el amor de Geovà par ti. Cossa che i fradei i pol far? Lori i pol scoltarte con atension e seitar dela to banda. Lori anca i pol lederte un testo dela Bìblia o pregar insieme a ti. (Rom. 15:4) Dele volte, un fradel o una sorela i pol ricordarte de come Geovà el pensa e giutarte a restar pi calmo. Cossita, te sarè bon de ndar avanti. Lori anca i pol far dele robe par ti, come par esémpio, pareciarte un magnar par mostrar che i te vol ben. Ma par ricever aiuto dei altri, pol esser che te gavarè de domandarghelo. (Pro. 17:17) Lori no i sa mia quel che te senti o quel che te ghè de bisogno. (Pro. 14:10) Alora, proa dir a un caro amigo quel che te sì drio sentir e dighe come che el pol giutarte. Te pol anca dir a un o due ansiani che i ze boni amighi par ti. Arquante sorele fursi le volerà discorer con una brava sorela. w24.10 p. 10 §§ 15, 16

Tante persone le se sforsa de far esersissi e magnar robe bone par gaver salute e viver de pi tempo. Ancora cossita, lore no le pensa che se pol viver par sempre parché tuti vegnemo veci. Ma, in Gioani 3:16 e 5:24, Gesù el ga dito che se pol viver par sempre. Una volta, Gesù el ga dato pan e pessi a miliari de persone in Cafarnaun. Ma quel che lu el ga dito dopo l’è ancora pi bel. Gesù el ga dito ale persone che el ndaria ressussitar quei che i ze morti e che le podaria viver par sempre. (Gio. 6:39, 40) Quel che Gesù ga dito ne assa sicuri che el ndarà ressussitar i nostri amighi e quei dela nostra fameia e che podaremo viver par sempre. w24.12 p. 8 §§ 1, 2

Studiosi i ga dito che tanti òmini i ghe dà bote ala so dona, ghe parla robe pròpio brute e la fà sofrir anca de altre maniere. Ghen’è de quei che i fà finta esser un bon omo davanti dei altri, ma i trata mal la so dona casa. Parché che fursi un omo el trata mal la so dona? Arquanti no i pensa che l’è sbalià tratar mal la so dona parché i ga sempre visto le done esser tratade cossita. Pol esser che so pare el ga sempre tratà mal la so mare o che i òmini ndove i ze de star i trata le so done cossita. Arquanti fursi i pense che i ga de mostrar a forsa chi che comanda casa, e altri òmini no i ga mia imparà a controlar i so sentimenti e i resta sempre suito cativi. E ghen’è òmini che no i ze boni de tratar la so dona dela maniera giusta parché i seita a vardar pornografia. Studiosi i ga dito che nela pandemia dela COVID-19 ancora de pi òmini i ga scominsià a tratar mal le so done. Ma no importa mia quel che ga belche sucedesto nela vita de questi òmini, lori no i pol mia tratar mal la so dona. w25.01 p. 8 §§ 2, 3

Quando l’era qua nela Tera, Gesù el ga mostrà qual che l’era el comandamento pi importante dela Lege. Lu el ga dito: “Ama a Geovà, el to Dio, con tuto el to cuor, con tuta la to ànima, con tuta la to forsa e con tuta la to mente.” (Luc. 10:27) Alora, questo testo el ne insegna che ghemo de mostrar el nostro amor a Geovà par meso dela nostra forsa e par meso de quel che ghemo nel cuor, o sia, dele nostre voie e sentimenti. Anca ghemo de mostrar a Geovà el nostro amor par meso dela nostra mente, o sia, dela maniera che pensemo. Ma cossa che ndarà giutarne a far questo? Imparar sora la maniera de pensar de Gesù. Anca se no saremo mai boni de capir del tuto come Geovà el pensa, podemo imparar col esémpio de Gesù, parché lu el ga fato pròpio compagno al so Pare. — 1 Cor. 2:16. w25.03 p. 8 § 1

Gesù l’era perfeto, compagno a Adon vanti che el pechesse. (1 Cor. 15:45) Alora, quando Gesù l’è morto, lu l’è stà bon de pagar pròpio quel che Adon el gavea perso. (Rom. 5:19) Par quela la Bìblia la dise che Gesù l’è stà “el ùltimo Adon”. Cossita, no ghemo bisogno che nantra persona perfeta la paghe quel che Adon el ga perso, parché Gesù el ga belche dato la so vita “una volta e par sempre”. (Ebr. 7:27; 10:12) Parché che podemo esser amighi de Geovà? Geovà el ga catà fora una maniera de giutarne a esser perdonadi del bon. Gesù el ga dato la so vita perfeta come sacrifìssio par pagar el prèssio par i nostri pecati. — Ebr. 9:14. w25.02 p. 4, 5 §§ 12, 13

Veder Geovà come el Dio che el vive ndarà giutarne a pensar dela maniera giusta sora le nostre dificoltà. Come cossita? Quando infrontemo una dificoltà, ghemo de pensar in quel che l’è pi importante. Sàtana el ga dito che quando infrontessino qualche dificoltà no seitarìssino a adorar a Geovà. (Giò 1:10, 11; Pro. 27:11) Se seitemo leai nele dificoltà, assemo ciaro che amemo a Geovà e mostremo che Sàtana l’è un busier. Fursi te sì drio infrontar un bruto problema, perseghission del governo, dificoltà coi soldi, o pol esser che le persone ndove te predichi no le vol scoltarte. Alora, ricòrdate che quel che te fè pol contentar tanto a Geovà. Nantra roba che ne ocore gaver in mente la ze che Geovà mai el ndarà assar che te infronti una dificoltà che no te sì bon de soportar. Sicuro che Geovà sempre el ndarà darte la forsa che te ocore par dàrghene fora. w24.06 p. 22 § 9

Seto dir che voia sbaliada la ze fadiga par ti? No ghemo mai de pensar che no ghemo mia voie sbaliade e che saremo sempre boni de far le robe giuste. (1 Gio. 1:8) Paolo el ga dito che fin quei che i ga “le qualità de acordo col spìrito de Dio” i pol gaver voie sbaliade se no i stà mia atenti. (Gàl. 6:1) Par quela, ghemo de sforsarse par veder pròpio quel che ghemo rento el nostro cuor par capir le voie sbaliade che fursi ghemo. (2 Cor. 13:5) Cossa ghemo de far dopo de capir le voie sbaliade che podarìssino gaver? Gaver ancora pi forsa de dàrghene fora cole voie sbaliade. Par giutarne a capir meio, pensa nele cità là del passà. La parte pi fiaca dele muràlie dele cità la era i portoni. Par quela, par proteger la cità, sempre ghen’era tanti guardi nei portoni. Questo ne insegna che ghemo de capir ndove saria i nostri portoni, o sia, ndove podaria scominsiar qualche voia sbaliada, e esser boni de protegerse. — 1 Cor. 9:27. w24.07 p. 15 §§ 5-7

La predicassion la ze un de questi boni laori, come parla el testo del giorno de ancoi. Alora, quando ledemo la Bìblia e pensemo sora quel che ledemo, la nostra fede in Geovà la resta ancora pi forte e semo boni de capir parché l’è pròpio importante parlar sora el Regno ai altri. Par esser bon de capir tuto quel che te pol dela Bìblia, te ghè de torte el tempo par leder, studiar e pensarghe sora. Alora, no stà mai studiar svelto. E se te cati un versìcolo che no l’è mia fàcile de capir, proa ndar in serca de capirlo, invesse de ndar avanti. Te pol doperar el Índice das Publicações da Torre de Vigia o el Guia de Pesquisa para Testemunhas de Jeová par studiar de pi sora quel versìcolo. Se te te sforsi de torte el tempo par studiar, la to fede la restarà pi forte. (1 Tes. 5:21) E quanto de pi fede te ghè nela Bìblia, pi contento te sarè de parlar ai altri quel che te sè. w24.04 p. 15 §§ 4, 5

Davi el ga dito che ‘Geovà l’è bon, e l’è sempre pronto par perdonar’. (Sal. 86:5) Michea el ga dito che ‘no ghen’è un Dio come lu, che el perdona el sbàlio e la desobediensa’. (Mic. 7:18) E Isaia 55:7 dise: “La persona rugna la ga de assar la so strada, e quel che el fà robe rugne, i so pensamenti. Lori i ga de tornar a Geovà e el gavarà misericòrdia. I ga de tornar al nostro Dio, parché li perdonarà del tuto.” Tuti nela congregassion in Corinto i ndaria drio al esémpio de Geovà se i acetesse quel omo e i mostresse so amor par lu. Cossita, lori i saria ‘obedienti in tute le robe’. Anca se quel omo el fusse stà cavà via dela congregassion sol pochi mesi prima, lu el se gavea belche ciamà gramo. Alora, i ansiani no i gavaria de spetar de pi tempo par acetarlo nela congregassion nantra volta. w24.08 p. 17, 18 §§ 12, 13

Pi avanti, ndaremo veder tante bele robe suceder. Gesù el ga dito che nei nostri giorni sarìssino boni de capir che lu l’è drio governar e che el fin de questo bruto mondo l’è darente. (Mat. 24:3) Presto, Gesù el ndarà giulgar tute le persone. Noantri podemo leder questa professia in Mateo capìtolo 24 e 25, Marco capìtolo 13 e Luca capìtolo 21. Gesù el ga contà tre stòrie che le ne giuta a esser pareciadi par quel che ndarà suceder pi avanti. La prima stòria la ze dele piégore e dele cavre, la seconda dele vèrgine stùpide e de quele che le gavea sabedoria e la tersa la ze la stòria dei talenti. Cada una de queste stòrie le ne giuta a capir come che le persone le sarà giulgade. w24.09 p. 20 §§ 1, 2

Noantri podemo imparar tanto col esémpio de Gesù. Lu el gavea un grando amor par Geovà e par tute le persone. L’è par quela che lu el se sforsea tanto de giutar i altri e fin el fea laori che no i era mia importanti. (Mat. 20:28; Gio. 13:5, 14, 15) Se anca ti te ghè un grando amor compagno a Gesù, Geovà el ndarà benedirte e giutarte a deventar un servo ministerial. (1 Pie. 5:5) Tante persone ancoi le ghe dà valor a quei che i vol esser pi importante dei altri. Ma noantri no semo mia cossita. Invesse, volemo sforsarse par giutar nostri fradei parché li amemo, compagno a Gesù. No ghemo mia de far qualcossa parché volemo farse veder o parché volemo comandar nostri fradei. Se un fradel che el ga responsabilità rento la congregassion el pensa che l’è pi importante dei altri, lu no’l volarà mia far arquanti laori pi sémplisse che ghe vol par tender dei servi de Geovà. — Gio. 10:12. w24.11 p. 15 §§ 6, 7

In tuto el mondo, ghemo bisogno de fradei che i laore come ‘presenti de Geovà’. (Efe. 4:8) Alora, se te sì un fradel belche batesà, sito bon de giutar anca ti? (Pro. 3:27) Sarà che te podarissi sforsarte par esser un servo ministerial? Se te sì belche un servo ministerial, sarà che te podarissi esser un ansiano e giutar ancora de pi i fradei? O sarà che te podarissi cambiar qualcossa nela to vita par esser bon de far la Scola par Vangelisadori? Sicuro che, dopo questa scola, Geovà el ndarà doperarte ancora de pi par giutar i fradei. Ma, se te pensi che no te sì gnancora bon de farla, prega a Geovà. Col so aiuto, te sarè bon de far qualche laoro par lu. (Luc. 11:13) I bravi fradei che Gesù el ga scoliesto “come presenti” par le congregassion i mostra che lu l’è drio tenderne in questi ùltimi giorni. (Mat. 28:20) Restemo tanto contenti de gaver un Rè che el ne ama tanto, che ne giuta con quel che ne ocore e che el dopera bravi fradei par giutarne. w24.10 p. 23 §§ 16, 17

L’è vera che i servi de Geovà i sofre in questo mondo. Ma la Bìblia la dise che ‘no se ricordaremo dele robe che ghen’era vanti gnanca le tornarà al cuor’. (Isa. 65:16) Geovà el ndarà cavar via i nostri problemi e gnanca no’l assarà che se ricordemo de tute le dificoltà che ghemo passà. Noantri restemo calmi quando ndemo ale nostre riunion parché assemo de banda tuto quel che ne fà restar preocupadi in questo bruto mondo. Podemo anca giutar i nostri fradei e sorele a restar calmi quando mostremo le qualità che fà parte del fruto del spìrito santo de Dio, come amor, alegria, pace, bontà e brandura. (Gàl. 5:22, 23) Sicuro che restemo tanto contenti de restar insieme ai nostri fradei e sorele. Tuti quei che i seita a servir a Geovà i vederà el giorno che ghen sarà “un novo cielo e una nova tera”. w24.04 p. 22 §§ 9, 10

El tempo che due persone le smorosa pol esser tanto bel. Ma tuti i due ghe ocore gaver ben in mente qual che l’è el ogetivo de smorosar, o sia, lori i ga de cognosserse ben e far una bona dessision. Dele volte, la dessision la ze de maridarse. Altre volte la dessision la ze finir de smorosar. Se lori due i desside de finir de smorosar, no vol dir che i ga fato qualcossa de sbalià. Lori i era drio smorosar pròpio par capir se saria bon maridarse o nò. Sicuro che la ze una dessision tanto importante. Parché? Parché vanti de prometer qualcossa ghe pensemo tanto ben. E nel giorno del matrimònio, el fradel e la sorela i promete davanti de Geovà de amarse e rispetarse intanto che i ze vivi. Alora, sicuro che ghemo de pensarghe ben vanti de maridarse. L’è tanto importante che quei che no i ze maridadi i gàpie in mente che due persone le smorosa par cognosserse e capir se le volarà maridarse o nò. Cossita, lori no i ndarà scominsiar a smorosar se belche i sa che no i ndarà maridarse. w24.05 p. 26, 27 §§ 3, 4

Dele volte, i gióveni i ga paura de spiegar ai altri quel che i crede. Fursi lori i ga paura de dir ai altri che no i crede mia nela teoria dela evolussion, parché tanti maestri i insegna che questo ga pròpio sucedesto. Alora, se te sì pare o mare, come che te pol giutar el to fiol a esser sicuro che quel che lu el crede l’è la verità? Ricorda el to fiol che no ghe ocore mia gaver vergogna de creder che Dio el ga creà tute le robe. Parché che nò? Fin tanti studiosi i crede che qualchedun con tanta sabedoria ga creà tute le robe bele che ghen’è e che no le ze mia vegneste fora del gnente. Par quela che lori no i crede mia nela teoria dela evolussion che la ze insegnada in tante scole. Nantra roba che pol giutar el to fiol la ze saver quel che ga giutà altri fradei e sorele a creder in questa verità. w24.12 p. 17 §§ 14, 15

Gesù l’era sicuro che ghen saria persone che le ndaria scoltar le bone notìssie. Par quela, lu el restea contento de predicar e el ga fato el so meio in questo laoro. Par esémpio, intorno de un ano dopo che el ga scominsià a predicar, el ga visto che tanti i volea scoltarlo. Lu el ga dito che queste persone le era come un campo pronto par la racolta. (Gio. 4:35) Intorno de un ano dopo, lu el ga dito ai so dissìpoli: “La racolta la ze pròpio granda.” (Mat. 9:37, 38) E dopo un tempo, el ga dito: ‘La racolta la ze granda. Domandé al Signor dela racolta che el mande de pi laoradori par la So racolta.’ (Luc. 10:2) Gesù el se fidea che qualchedun scoltaria le bone notìssie e el restea tanto contento quando i fea cossita. (Luc. 10:21) Par giutar i so dissìpoli a seitar meterghela tuta nela predicassion, Gesù el ghe ga dito che ghen saria boni resultadi in questo laoro. w25.03 p. 18, 19 §§ 15, 16

Geovà l’è un refùgio. Compagno una granda ròcia la pol proteger una persona in meso una tempesta, Geovà el pol protegerne quando ghemo dele dificoltà. Lu el ne giuta e el ga prometesto che nel futuro el ndarà finir fora con tuto quel che pol farne mal. (Eze. 34:25, 26) Alora, Geovà no’l assarà che gnanca una roba la ne fae mal par sempre. Par far de Geovà el nostro Refùgio ghemo de pregar. Quando preghemo a Geovà, lu el ne dà ‘la so pace che protege el nostro cuor e la nostra mente’. (Fil. 4:6, 7) Geovà sempre el sarà lì par giutarne. Podemo fidarse in lu parché l’è “la Ròcia eterna”. (Isa. 26:3, 4) Come lu l’è eterno e l’è sempre vivo, el ndarà far quel che el ga prometesto, scoltar quel che ghe domandemo e giutarne con quel che ne ocore. Anca podemo fidarse in Geovà parché lu l’è leal ai so servi. (2 Sam. 22:26) Lu mai el ndarà desmentegarse de quel che ghemo fato par lu e sempre el ndarà benedirne. — Ebr. 6:10; 11:6. w24.06 p. 27 §§ 4-6

Ghemo de star distanti de tuto quel che podaria far pi fiaco el nostro amor par Geovà. Par esémpio, ghemo de star atenti a quel che femo par divertirse, quei che scoliemo par esser nostri amighi e mai pensar che i soldi i ze la roba pi importante dela nostra vita. Alora, se se nicordemo che qualcossa l’è drio far el nostro amor deventar pi fiaco, ghemo de far suito qualcossa par cambiar quel che pensemo e che femo. Cossita, saremo boni de seitar a amar a Geovà. (Mat. 5:29, 30) Ghemo de sforsarse de seitar a adorar a Geovà con tuto el cuor. Tuti noantri podemo pensar che, se femo tanto nela nostra adorassion a Geovà, no importa quel che pensemo o femo. Par giutarne a capir, pensemo sora questo. Metemo dir che l’è un giorno tanto bruto e fredo. Quando te torni casa, te impissi el fogo par scaldarla. Ma, se te assessi la finestra o la porta verta, presto la casa la deventaria freda nantra volta, anca se el fogo el fusse impissà. La medèsima roba la pol suceder cola nostra amicìssia con Geovà. No basta sol far robe che “scalda” la nostra amicìssia con lu. Ghemo anca de “serar la porta”, o sia, restar distanti de robe che pol “sfredar” la nostra amicìssia con Geovà. Cossita, gnente che podaria far pi fiaco el nostro amor par Geovà vegnarà rento el nostro cuor. — Efe. 2:2. w24.07 p. 21 §§ 6, 7

Gesù el ga sofrio tanto quando soldadi romani i ghe ga fato tanto mal, i lo ga fato sofrir e i lo ga picà su nte un pal de tortura. Ma, ancora che fusse in quela bruta situassion, Gesù l’è stà bon de vinser el mal col ben. Invesse de voler castigar quei soldadi, lu el ga domandà che ‘Geovà li perdonesse, parché lori no i savea quel che i era drio far’. (Luc. 23:34) Anca noantri podemo far compagno a Gesù e pregar par quei che i ne trata mal. Se femo cossita, seitaremo pi calmi e pol esser che fin ndaremo cambiar quel che sentimo sora quei che i ga fato qualcossa contra noantri. Fin che rive el novo mondo, pol esser che ancora ndaremo sofrir parché i altri i ne trata mal. Ma, se semo maltratadi, ghemo de seitar a far compagno a Gesù, seitar a meter in pràtica i boni consili che Geovà el ne dà e mai fermarse de pregar e domandar el so aiuto. Cossita, saremo sicuri che Geovà sempre el ndarà giutarne. — 1 Pie. 3:8, 9. w24.11 p. 6 § 16; p. 7 §§ 17, 19

Geovà no’l aceta che i so servi i fae robe sbaliade e el ga òdio par el pecato. (Sal. 5:4-6) Lu el sa che nissuni i ze perfeti, ma el vol che i so servi i obedisse ai so comandamenti. (Sal. 130:3, 4) Ancora cossita, lu no’l aceta mia ‘òmini che no i rispeta a Dio e che i dopera la maraveiosa bontà de Dio come una scusa par far robe sbaliade’. (Giuda 4) Par quela che la Bìblia la dise che nel Armagedon, ‘i òmini rugni i sarà destruti’. (2 Pie. 3:7; Apo. 16:16) Geovà no’l vol che gnanca una persona la sìpia destruta. Come dise la Bìblia, lu “el vol che tuti i se ciame grami”. (2 Pie. 3:9) I ansiani i pensa compagno a Geovà e i porta passiensa quando i proa giutar un fradel che el ga fato un bruto pecato. Lori i se sforsa de giutarlo a fermarse de far quel che l’è sbalia e de gaver una forte amicìssia con Geovà nantra volta. w24.08 p. 26 §§ 1, 2

Compagno a Geovà, anca noantri podemo mostrar amor ai altri quando doperemo quel che ghemo par giutarli. Par esémpio, podemo doperar quel che ghemo par giutar un fradel che el ga bisogno de magnar o de robe de meter su. Pol esser che Geovà l’è drio doperarne par giutar questo fradel. E quando sucede una desgràssia, i servi de Geovà sempre i se move fora par giutarse. Par esémpio, nela pandemia del COVID-19, i fradei i ga giutà un al altro in quel che i gavea de bisogno, come con robe de vestir e de magnar. Arquanti fin i ga dato soldi ala organisassion par giutar i fradei in quel che ghe ocorea. Cossita, i servi de Geovà de tuto el mondo i ga ricevesto quel che i gavea de bisogno. Questi cari fradei i ga metesto in pràtica quel che dise Ebrei 13:16: “No sté desmentegarve de far el ben e de spartir coi altri quel che gavé, parché questi sacrifissi ghe piase a Dio.” w24.09 p. 27 §§ 6, 7

Proa pensar che te sì in serca de un laoro par dar ala to fameia quel che ghe ocore. Te ghè catà due laori difarenti e tuti i due i ze de acordo con quel che la Bìblia la dise. Alora, te pensi cossa che te ndarè far in questo laoro, quanto tempo te tocarà doperar e quanto distante cada laoro l’è dela to casa. Pol esser che te pensi in scòlier quel che te piase e che te ndarè guadagnar de pi. Ma ghen’è ancora altre robe che te toca pensar vanti dessider che laoro scòlier. Par esémpio, sarà che questo laoro ndarà intrigarte de ndar ale riunion? Sarà che questo laoro ndarà tor el tempo che te ocore de star insieme dela to fameia, giutarla a gaver una forte amicìssia con Geovà e a esser felice? Queste domande le ndarà giutarte a esser sicuro dele robe che le ze pi importante. Alora, te sarè bon de pensar prima nela to adorassion a Geovà e nela to fameia invesse de pensar sol in guadagnar de pi. Cossita, te farè la meio dessision, e Geovà el ndarà benedirte. w25.01 p. 17 §§ 11-13

Anca se qualchedun te ga fato sofrir, te pol esser sicuro che Geovà el te ama e che te sì tanto pressioso par lu. E se te sì ‘desanimà’, ricòrdate che Geovà el ga visto bone qualità in ti e che l’è stà lu che el ga volesto esser to amigo. (Gio. 6:44) Geovà l’è sempre pronto par giutarte parché el te vol tanto ben. La personalità de Gesù la ze pròpio compagna a de so Pare. (Gio. 14:9) Par quela, quando pensemo nel esémpio de Gesù, podemo imparar tanto sora quel che Geovà el sente. Intanto che l’era qua nela Tera, Gesù l’era atento e el tratea con tanta bontà a quei che i era drio sofrir. (Mat. 9:9-12) Par esémpio, quando una dona la ga tocà la so roba par esser curada de una bruta malatia, Gesù la ga consolada e la ga lodada par la so fede. (Mar. 5:25-34) Cossita, te pol esser sicuro che te sì pressioso par Geovà e che lu l’è atento ale to bone qualità, come la to fede e amor par lu. w24.10 p. 7 §§ 4, 5

Davi el ga bio tanti problemi che lo ga fato piander. Tanti i lo odiea e fin amighi e persone dela so fameia no i ze stati leai a lu e i ga proà farghe mal. (1 Sam. 19:10, 11; 2 Sam. 15:10-14, 30) Par quela, lu el ga scrito: ‘Son straco e el me leto l’è moio parché go piandesto tuta la note. L’è come se mi fusse in meso un rio de làgrime.’ (Sal. 6:6) Anca se el gavesse tante dificoltà, Davi l’era sicuro che Geovà lo amea. Lu el ga dito che Geovà el scoltea quando lu el piandea. (Sal. 6:8) E el testo de ancoi ne giuta capir come che Geovà el ne ama e el se preocupa con cada un de noantri. Davi el sentia come se Geovà el metesse via nel so odre tute le so làgrime e le scrivesse do nte un libro. Davi l’era sicuro che Geovà el vedea el so sofrimento e che el ndaria ricordarse de quel che l’era drio infrontar. Lu el savea che el so caro Pare l’era atento a quel che l’era drio suceder e anca ai so sentimenti. w24.12 p. 22 §§ 11, 12