Setembre

Dopo de deventar bravi servi de Geovà, ghemo de seitar a sforsarse par esser cossita. Alora, no podemo mia pensar che semo belche bravi che basta e che no ne ocore pi sforsarse par far pi forte la nostra fede. (1 Cor. 10:12) Invesse, ghemo de seitar atenti a quel che semo drio far e sforsarse de gaver una amicìssia cada volta pi forte con Geovà. Nela carta ai colossensi, Paolo el ga parlà che ghemo de seitar a esser bravi servi de Dio. Ancora che quei fradei belche i fusse bravi, Paolo el ga dito che lori i gavea de star atenti de no ndarghe drio a quei che no i serve mia a Geovà. (Col. 2:6-10) Epafra l’era nantro fradel che el cognossea ben i colossensi, e lu el seitea a pregar che Geovà li giutesse a esser sempre ‘completi’, o sia, bravi servi de Dio. (Col. 4:12) Paolo e Epafra i volea che i colossensi i seitesse fedeli, anca se ghen fusse qualche dificoltà. Cossa che imparemo? Par seitar a esser bravi servi de Geovà, ghemo de sforsarse e domandar el so aiuto. w24.04 p. 6, 7 §§ 16, 17

Quando ghemo un grando rispeto par Geovà, lo amemo tanto e no volemo far gnente che lo disguste. Noantri anca semo premosi de capir la difarensa del giusto e del sbalià e intrà quel che l’è vero e quel che l’è falso. Se femo cossita, contentemo a Geovà. (Pro. 2:3-6; Ebr. 5:14) Se la nostra paura dei òmini la ze pi granda del nostro amor par Dio, podarìssino scominsiar a creder in qualcossa che la va contra la verità de Geovà. Vedemo el esémpio dei 12 spioni che i ze ndati vardar la tera che Geovà el gavea prometesto ai israeliti. Par 10 de questi spioni, la paura dei cananei la era pi granda che el so amor par Geovà. Lori i ghe ga dito ai altri israeliti: “No podemo mia ndar contra questo pòpolo, parché lori i ze pi forti de noantri.” (Nùm. 13:27-31) L’è vera che i cananei i era forti. Ma i israeliti i se gavea desmentegà che Geovà l’era pi forte che i cananei. w24.07 p. 9 §§ 5, 6

Podemo esser sicuri che tuti i giulgamenti de Geovà i ze giusti. Abraon el ga capio che Geovà, el “Giuis de tuta la tera”, l’è perfeto, misericordioso e l’è la persona che ga pi sabedoria. Geovà el ga insegnà a Gesù come giulgar le persone e el ghe ga dato questa responsabilità. (Gio. 5:22) Tuti due i ze boni de saver quel che le persone le pensa e le sente. (Mat. 9:4) Alora, podemo esser sicuri che Geovà e Gesù sempre i ndarà “far quel che l’è giusto”. Podemo fidarse del tuto nele dessision de Geovà. Lu l’è bon de far giulgamenti de maniera perfeta, noantri nò. (Isa. 55:8, 9) E Gesù sempre el mostra giustìssia e misericòrdia compagno a so Pare. — Isa. 11:3, 4. w24.05 p. 7 §§ 18, 19

L’è tanto importante parlar la verità nel nostro cuor. Quel che ga sucedesto quando Filipe el ga convidà el so amigo Natanael par catar Gesù ne insegna pròpio questo. Gesù el ga dito: ‘Eco, questo l’è un vero israelita che no l’è falso.’ (Gio. 1:47) Gesù el savea che Natanael l’era sinsiero. Anca se el fusse imperfeto, lu l’era sempre sinsiero e sempre el parlea pròpio quel che el pensea. Gesù ghe ga piasesto tanto la sinsierità de Natanael e lo ga lodà. Nel Salmo 15, catemo come che Geovà el speta che noantri tratemo i altri par assarlo contento. El Salmo 15:3 dise che el amigo de Geovà “no’l dise busie sora altre persone, no’l fà gnente de mal al so pròssimo e no’l parla mal dei so amighi”. Se noantri contemo busie sora i altri, podarìssino assarli tanto disgustadi. — Tia. 1:26. w24.06 p. 10 §§ 7; p. 11 § 9, 10

Se te te pareci vanti de ndar predicar, sarà pi fàcile parlar cole persone. Gesù el ga parecià i so dissìpoli vanti de mandarli predicar. (Luc. 10:1-11) Alora, quei dissìpoli i ga fato pròpio compagno Gesù ghe gavea insegnà. Cossita, lori i ze restadi tanto contenti con tuto quel che i ze stati boni de far. Come che te pol pareciarte par la predicassion? Te pol pensar in quel che te vol parlar e proar spiegar cole to parole. Te pol anca ricordarte de due o tre robe che le persone sempre le parla e pensar come che ti te podarissi risponderghe. Cossita, quando te parli con qualchedun, te sarè bon de restar calmo e discorer contento. w24.04 p. 15, 16 §§ 6, 7

Noantri predichemo parché amemo le bone notìssie e le persone. Ma el pi importante l’è el nostro amor par Geovà. Savemo che podemo lodar a Geovà e el so nome par meso dela predicassion. Noantri semo sicuri che Geovà el mèrita ricever la glòria, el onor e el poder. Noantri demo onor e glòria a Geovà quando mostremo ai altri che lori i pol esser sicuri che lu el ga ‘creà tute le robe’ e che lu el ne ga dato la vita. E podemo darghe el nostro poder quando doperemo la nostra forsa, el nostro tempo e quel che ghemo par far el nostro meio nela predicassion. (Mat. 6:33; Luc. 13:24; Col. 3:23) Semo sempre premosi de parlar sora Geovà, parché lo amemo tanto e volemo insegnar ai altri sora el so nome e le so bele qualità. w24.05 p. 17 § 11

Geovà sempre el benedisse quei che i ze leai a lu. Par esémpio, lu el ne dà pace e felicità ancoi e el ne darà la vita eterna nel futuro. Noantri se fidemo del tuto in Geovà parché savemo che lu el vol e el pol giutarne. Par quela, volemo seitar a far el nostro meio a lu, compagno a arquanti dei so servi del passà. Vedemo adesso el bel esémpio che Timòteo el ga dato. (Ebr. 6:10-12) Timòteo el ga fato el so meio nel laoro a Geovà e el ga giutà tanto i so fradei parché l’era sicuro che Geovà el ndaria benedirlo. (1 Tim. 4:10) Che bele robe el ga fato? Lu el se ga sforsà par insegnar ben nela congregassion e nela predicassion, cossita come Paolo el ghe gavea dito. Timòteo anca el ga fato el so meio par esser un esémpio par i fradei pi gióveni e anca pi veci. E lu el ga bio de far tanti laori difìcili, come darghe forti consili con amor a quei che ghe ocorea. (1 Tim. 4:11-16; 2 Tim. 4:1-5) Timòteo l’era sicuro che Geovà l’era drio veder el so laoro e che el ndaria benedirlo. — Rom. 2:6, 7. w24.06 p. 22, 23 §§ 10, 11

Geovà el ga doperà tanti dei so profeti par dir ai israeliti cossa che ndaria suceder se i seitesse a far quel che l’è sbalià e anca par giutarli a far quel che l’è giusto. Par esémpio, par meso de Geremia, Geovà el ga dito: ‘Torna a mi, Israel rebelde. No te vardarò con ràbia, parché mi son leal. No restarò inrabià par sempre. Te ghè sol de nicorderte dei to sbali, parché te ghè desobedio a Geovà.’ (Ger. 3:12, 13) Par meso de Gioel, Geovà el ga dito: ‘Torné a mi de tuto el vostro cuor.’ (Gioel 2:12, 13) Geovà anca el ga dito par meso de Isaia: ‘Neteve, cavé via de davanti de mi le robe brute che valtri fé. Fermeve de far quel che l’è rugno.’ (Isa. 1:16-19) E, par meso de Ezechiel, Geovà el ga domandà: ‘Sarà che me piase veder la morte de quel che l’è rugno? No me piase de pi vederlo cambiar la so vita e seitar vivo? No go caro che nissuni i mora. Alora, cambié quel che si drio far e seité a viver.’ (Eze. 18:23, 32) Geovà el resta contento quando una persona la se ciama grama, parché lu el vol che tuti i viva par sempre. w24.08 p. 9 §§ 5, 6

Geovà el dà a tuti noantri aiuto, protession e quel che ne ocore par seitar a esser so amighi. Savemo che Geovà el trata tuti compagno anca parché la Bìblia la ze tradusida par persone de tuta la Tera. Le Scriture le ze state scrite in ebraico, aramaico e greco. Alora, sarà che quei che i sa parlar queste léngue i ga una amicìssia pi forte con Geovà che quei che no i le sa mia? Sicuro che nò! (Mat. 11:25) Par esser amighi de Geovà, no ne ocore mia esser persone studiade o che le capisse le léngue che la Bìblia la ze stata scrita. Geovà el giuta persone de tuto el mondo a capir la so Parola, e nò sol quei che i ze studiadi. La Parola de Dio la ze tradusida in miliari de léngue parché Geovà el vol che persone de tuto el mondo le sìpia bone de obedirghe e de deventar so amighi. — 2 Tim. 3:16, 17. w24.06 p. 6, 7 §§ 13-15

Gesù el gavea dito che Gerusalen la saria finida fora e quel tempo l’era drio rivar. I fradei i gavea de doperar el tempo che i gavea par far pi forte la so fede e la so perseveransa. (Ebr. 10:25; 12:1, 2) Noantri ndaremo infrontar dificoltà tanto pi brute de quele che i fradei ebrei i ga infrontà. (Mat. 24:21; Apo. 16:14, 16) Par quela, i consili che Geovà el ga dato a quei fradei pol giutarne tanto. Nela carta che el apòstolo Paolo el ga scrito ai ebrei, lu li ga incoraiadi a studiar la Parola de Dio e a pensarghe sora. (Ebr. 5:14–6:1) Paolo el ga doperà le Scriture Ebraiche par spiegarghe che la maniera che i dissìpoli de Gesù i adorea a Geovà l’era tanto meio dela maniera che i giudei i lo adorea. Paolo el savea che se i fradei i fusse boni capir la verità dela Parola de Dio, lori i saria boni capir quel che l’è vero e mai i crederia nte una busia. w24.09 p. 8, 9 §§ 2, 3; p. 10 § 6

I dissìpoli de Gesù i era tanto desanimadi e i gavea bisogno de aiuto. Parché? Parché tanti de lori i gavea assà indrio la so casa, la so fameia e el so laoro par ndar drio a Gesù. (Mat. 19:27) Altri i era drio sofrir tanto dopo che i ze deventadi dissìpoli de Gesù parché le persone li tratea mal par causa dela so dessision. (Gio. 9:22) Lori i gavea fato tuti questi cambiamenti nela so vita parché i credea che Gesù l’era el Messia. (Mat. 16:16) Ma, quando Gesù l’è morto, lori i ga perso la so speransa e i ze restadi tanto desanimadi. Gesù el capia che i so dissìpoli i era drio sofrir par causa dela so morte e che no i era disgustadi parché ghe manchea fede. Alora, nel medèsimo giorno che l’è stà ressussità, lu el ga scominsià a incoraiar i so cari amighi. Par esémpio, lu el se ga fato veder a Maria Madalena intanto che la piandea nela so tomba. (Gio. 20:11, 16) Lu anca el se ga fato veder a due dissìpoli che i era drio ndar a Emaùs e dopo al apòstolo Piero. w24.10 p. 13 §§ 5, 6

Se te sì pare o mare, insegna el to fiol a spiegar ai altri che lu el crede in Dio. Te pol doperar i artìcoli che ghen’è nel jw.org che i parla sora la evolussion e la creassion. Dopo, giuta el to fiol a scòlier quel che lu el ndarà doperar par spiegar ai altri che una persona la ga creà tute le robe. Invesse, giuta el to fiol a ricordarse che el pol doperar domande e robe sémplisse de capir par spiegar ai altri quel che el crede. Par esémpio, metemo dir che un colega dela scola el ghe dise: “Mi sol credo in quel che mi vedo, e mi no go mai visto a Dio.” Alora, lu el pol risponderghe: “Proa imaginar che te cati una bela casa intanto che te sì drio caminar in meso el mato nte un posto pròpio distante de tute le cità. Sarà che te ndarissi pensar che questa casa la se ga fato su ela sola, o che qualchedun la ga fato su? Noantri podemo dir che questa casa la ze come la tera, le bèstie e tute le robe che ghen’è. Alora, podemo esser sicuri che qualchedun el ga creà tute queste robe.” w24.12 p. 18 § 16

Tuti noantri ghemo bisogno de boni consili par far le meio dessision nela vita. Podemo domandar boni consili ai ansiani e a bravi fradei dela nostra congregassion. Anca se lori i ze belche veci, no ghemo mai de pensar che so consili i ze de sti ani. Questi cari fradei i ga imparà tanto con quel che ga sucedesto nela so vita e i ga tanta sabedoria. Par quela, Geovà el vol che noantri imparemo tanto con questi cari fradei. Nel passà, Geovà el ga doperà arquanti dei so servi pi veci par incoraiar e insegnar so pòpolo, come Moisè, Davi e el apòstolo Gioani. Lori no i ga mia vivesto nela medèsima època e ga sucedesto robe tanto difarente nela so vita. Ma, prima de morir, tuti lori i ga dato bei consili ai pi gióveni. Un dei bei consili che lori i ga dato l’è stà de obedir a Geovà. Alora, tuti noantri podemo imparar dei consili de questi servi fedeli. — Rom. 15:4; 2 Tim. 3:16. w24.11 p. 8 §§ 1, 2

Parché che podemo esser sicuri che Gesù no’l volea mia dir che le persone le gavaria de bever el so sangue? Parché Dio el gavea dito nei giorni de Noè che le persone no le podea magnar sangue e el gavea dito ai israeliti che se lori i magnesse sangue i saria copadi. (Gén. 9:3, 4; Lev. 7:27) E Gesù el ga insegnà ai giudei che lori i gavea de obedir a tuta la Lege. (Mat. 5:17-19) Alora, Gesù no’l volea mia dir che i giudei i gavea de magnar la so carne e bever el so sangue. Podemo capir quel che lu el volea dir, se se ricordemo de quel che el ga dito a una dona samaritana: ‘La àqua che mi ghe darò la dà la vita eterna.’ (Gio. 4:7, 14) Gesù no l’era mia drio dir che se la samaritana la bevesse àqua la gavaria vita eterna. Dela medèsima maniera, lu no l’era drio dir che i giudei i gavaria de magnar la so carne e bever el so sangue par gaver vita eterna. w24.12 p. 9 §§ 4-6

El apòstolo Paolo el ga dito ai fradei in Roma che lori i gavea de ‘fermarse de esser moldadi de acordo con questo mondo’. (Rom. 12:1, 2) Anca se quei fradei i era drio servir a Geovà fea tanti ani, le parole de Paolo le mostra che arquanti de lori ancora i era drio pensar e far robe compagno le persone del mondo. Par quela che Paolo el ga dito che i gavea de cambiar. El so consìlio l’è importante anca par noantri ancoi. Alora, i fradei i ga de star atenti a quel che i pensa sora le done par mai ndarghe drio la maniera che el mondo le trata. Parché? Parché quel che una persona la pensa, la fà. E ghen’è tanti ancoi che i ze ndati drio la maniera de pensar del mondo e i ze drio tratar la so dona dela maniera sbaliada. w25.01 p. 9 § 4

Ancoi, i ansiani i ga tanti laori de far. El laoro pi importante par lori l’è de esser pastori. (1 Pie. 5:1-3) Lori i parecia ben i discorsi, i se sforsa de cognosser a tuti nela congregassion e i fà vìsite par incoraiar i fradei. Lori anca i ga el laoro de predicar. (2 Tim. 4:5) I ansiani i dà un bon esémpio quando i predica con zelo, i organisa el laoro de predicassion e i ne giuta a predicar e a insegnar meio. Lori anca i ga el laoro de esser giuisi. Lori i fà questo laoro con giustìssia e bontà. Quando un fradel el fà un pecato, i ansiani i se sforsa de giutarlo a gaver nantra volta una forte amicìssia con Geovà e i resta atenti par mantegner la congregassion neta. (1 Cor. 5:12, 13; Gàl. 6:1) Arquanti ansiani anca i giuta a far su e a rangiar Saloni del Regno e a organisar congressi e assemblee. Arquanti i fà parte dela Comission de Contato coi Ospedai e altri i fà vìsite ai fradei maladi. I ansiani anca i fà tanti altri laori. Sicuro che questi bravi fradei i laora tanto par giutarne! w24.10 p. 20 § 9

La Bìblia la dise che noantri semo stati liberadi par causa de un risgate o sacrifìssio. El apòstolo Piero el ga dito: ‘Valtri savé che sì stati liberadi, o risgatadi, nò par meso de robe che le se smarsisse, come el argento e el oro. Ma l’è stà par meso del sangue de Cristo, che el ga tanto valor, compagno a un piegoreto perfeto e puro.’ (1 Pie. 1:18, 19) El pecato e la morte ne fà sofrir tanto. (Rom. 5:21) Ma noantri sol podemo viver sensa pi sofrir con queste robe par causa del sangue pressioso de Gesù. (1 Cor. 15:22) Sicuro che ghe demo tanto valor a quel che Geovà e Gesù i ga fato, e volemo ringrassiarghe tanto. w25.02 p. 5 §§ 15-16

Come che podemo protegerse par mai far un bruto pecato? Quel che ga sucedesto col gióveno de Proverbi 7 ne insegna una roba tanto importante. El versìcolo 22 el dise che el gióveno l’è ndato drio la dona “de colpo”. Ma sarà che l’è stà pròpio cossita? Nò, parché i versìcoli vanti i mostra che lu el ga fato un per de robe prima de far la imoralità. Cossa che el gióveno el ga fato prima de far la imoralità? Quando l’era drio vegner note, el gióveno ‘el ga passà par una strada che ndea ndove la era la dona e l’è ndato par la banda dela so casa’. (Pro. 7:8, 9) Dopo, quando lu el ga visto la dona, no l’è ndato via. Invesse, lu el ga assà che ela lo basesse e el ga scoltà quel che ela la ghe parlea. Ela la ghe ga contà che la gavea fato sacrifissi de pace fursi par farlo creder che la era una persona bona. (Pro. 7:13, 14, 21) Se el gióveno no’l gavesse fato tute queste robe, lu no’l gavaria bio la voia sbaliada gnanca no’l gavaria fato quel pecato. w24.07 p. 16 §§ 8, 9; p. 19 § 19

Geovà no’l aceta mia che i so servi i fae bruti pecati. Arquanti i pensa che Geovà el mostra misericòrdia se el assa che una persona che no la se ga ciamà grama del so pecato la seite nela congregassion. Ma Geovà no’l mostra la so misericòrdia cossita. Anca se Geovà el ga misericòrdia, lu no’l aceta che so servi fae robe sbaliade e no’l càmbia quel che l’è giusto e sbalià. (Giuda 4) Se Geovà el assesse che una persona che la ga fato un bruto pecato e no la se ga ciamà grama la restesse rento la congregassion, questo podaria intrigar la amicìssia che tuti i ga con lu. (Pro. 13:20; 1 Cor. 15:33) Noantri anca podemo imparar che Geovà no’l vol che nissuni sìpia destruti. Invesse, lu el volaria che tute le persone le vivesse par sempre. Par quela, Geovà el mostra misericòrdia a quei che i se ciama grami e i vol tornar a esser so amighi. (Eze. 33:11; 2 Pie. 3:9) Alora, quando quel omo in Corinto el se ga ciamà gramo e el ga cambià quel che l’era drio far, Geovà el ga doperà el apòstolo Paolo par spiegar ala congregassion che lori i gavaria de perdonarlo e acetarlo nantra volta. w24.08 p. 17 § 7; p. 18, 19 §§ 14, 15

Nela stòria dele piégore e dele cavre, Gesù el ga parlà sora el giulgamento dele persone che le ga podesto dessider giutar i so fradei untadi. (Mat. 25:31-46) Alora, Gesù el ndarà giulgar queste persone nela “granda tribolassion” e vanti del Armagedon. (Mat. 24:21) Compagno a un pastor che el spartisse le piégore dele cavre, Gesù el ndarà spartir quei che i ga giutà i so fradei untadi e quei che no li ga giutadi. La Bìblia la mostra che Gesù l’è el giuis che Geovà el ga scoliesto e che lu sempre el ndarà far quel che l’è giusto. (Isa. 11:3, 4) Gesù sempre el sarà atento a quel che cada persona la fà, la dise e la pensa e come la ga tratà i so fradei untadi. (Mat. 12:36, 37) Par quela, lu el saverà pròpio ben quei che i ga giutà i so fradei untadi nel grando laoro che Geovà el ghe ga dato. Una roba tanto importante che le persone le pol far par giutar i untadi l’è el laoro de predicassion. w24.09 p. 20, 21 §§ 3, 4

Ghemo de proar capir se quel che pensemo l’è compagno a quel che la Bìblia la dise. Par esémpio, quel gióveno che ghemo parlà prima no l’era mia sicuro se lu l’era importante par Geovà. Alora, sarà che saria bon se lu sol seitesse a viver sensa catar le risposte a questo dùbio? Nò! Pitosto, saria tanto meio se lu el capisse cossa che la Bìblia la dise. Alora, lu el ga de studiar la Bìblia par imparar come che Geovà el pensa. Intanto che te ledi la Bìblia, te pol “scoltar” quel che Geovà el te dise. Ma te ghè de far de pi che sol léderla se te vol capir cossa che Geovà el pensa. Alora, sfòrsate de catar fora testi che ndarà giutarte a capir le risposte ale to domande. Una roba che pol giutarte la ze doperar le publicassion che ghemo. (Pro. 2:3-6) Nantra roba che te pol far l’è pregar e domandar che Geovà el te giute a catar fora quel che te ocore. Dopo, te pol ndar in serca de prinsipi dela Bìblia che pol giutarte nele robe che te sì drio infrontar. w24.10 p. 25 §§ 4, 5

Sicuro che Geovà mai el ndarà benedir una persona che la laora sol par esser pi importante che i altri. (1 Cor. 10:24, 33; 13:4) Fin arquanti amighi de Gesù i ga volesto laorar par farse veder ai altri. Par esémpio, Tiago e Gioani, che i era apòstoli de Gesù, i ghe ga domandà un posto importante rento el so Regno. Ma Gesù no li ga lodadi par quel che i gavea domandà, e dopo el ga dito ai so 12 apòstoli: “Quel che vol esser el pi importante intrà de valtri, ga de esser so servo. E quel che el vol esser el primo intrà de valtri, ga de esser el so schiavo.” (Mar. 10:35-37, 43, 44) Sicuro che se un fradel el vol esser un servo ministerial par giutar i altri, el ndarà far pi forte la congregassion. — 1 Tes. 2:8. w24.11 p. 15, 16 §§ 7, 8

Quando te ghè de far una dessision, el amor el te giutarà a esser ùmile e a pensar in quel che l’è bon par i altri. (1 Cor. 10:23, 24, 32; 1 Tim. 2:9, 10) Cossita, le to dessision ndarà mostrar el to amor e el to rispeto par i altri. Se te ocore far una dessision tanto importante, quel che Gesù el ga dito pol giutarte. Lu el ga dito che ne ocore ‘sentarse e pensar quanto che ndaremo guastar’. (Luc. 14:28) Cossa che le so parole ne insegna? Te ghè de pensar nel tempo, nei soldi e nel sforso che te ocorerà doperar par far quel che te ghè dessidio. Pol esser che te gavarè anca de parlar cola to fameia e spiegar come cada un el podarà giutar. Parché che l’è importante far questo? Parché pol esser che te gavarè de cambiar un per de robe che te gavei pensà, o che qualchedun el pense nte una roba meio. Se te ghe domandi quel che la to fameia la pensa e te la scolti con atension, sarà pi fàcile che tuti i gàpia caro de giutar. w25.01 p. 18, 19 §§ 14, 15

Noantri semo tanto contenti parché Geovà el ne giuta a adorarlo in pace e union insieme ai nostri fradei e sorele. (Isa. 65:18, 19) E l’è par quela che Geovà el ne domanda de insegnar la verità sora lu ai altri e de giutarli a adorarlo insieme a noantri. Par causa dele bele verità che ghemo imparà sora Geovà, semo tanto contenti e volemo giutar anca i altri a cognosserle. (Ger. 31:12) Semo contenti de adorar a Geovà anca parché ghemo speransa. La Bìblia la promete che noantri ‘ndaremo far su case par ndar de star’ e ndaremo ‘piantar vignai e magnar i so fruti’. No ndaremo ‘laorar tanto par gnente parché Geovà el ndarà bendirne’. La Bìblia anca dise che ancora vanti domandarghe qualcossa, Geovà el ‘savarà quel che ghemo de bisogno’ e el ne darà ‘tuto quel che volemo de pi’. (Isa. 65:20-24; Sal. 145:16) Geovà el ne promete un futuro tanto bel! w24.04 p. 22, 23 §§ 11, 12

Geovà el deventarà la nostra Ròcia se se fidemo del tuto in lu. Se seitemo obedirghe anca quando l’è fadiga, questo sarà bon par noantri. (Isa. 48:17, 18) E quando vedemo che lu sempre el ne giuta, la nostra confiansa la deventa ancora pi granda. Compagno a una granda ròcia, Geovà l’è firme e no’l càmbia quel che lu l’è, la so personalità e quel che lu el vol far. (Mal. 3:6) Par esémpio, quando Adon e Eva i ze ndati contra Geovà nel giardin del Èden, lu no’l ga cambià quel che el volea par le persone. E quel che el apòstolo Paolo el ga scrito in 2 Timòteo 2:13 ne giuta a capir che no importa quel che suceda o quel che i altri i fà, Geovà mai el ndarà cambiar le so qualità, la so volontà e quel che lu l’è. Par quela, podemo fidarse che quando ghen’è dele dificoltà, Geovà el ndarà giutarne parché lu no’l càmbia mia. — Sal. 62:6, 7. w24.06 p. 27, 28 §§ 7, 8

Se valtri sì drio smorosar, cossa che ve giutarà a dessider se gavé de maridarve o nò? Cognosser tanto ben un al altro. Vanti de smorosar, fursi gavé visto arquante robe un del altro. Ma adesso che sì drio smorosar, gavé anca de cognosser quel che ghen’è “par rento nel cuor”. Cossa che questo vol dir? Intanto che sì drio smorosar, podé cognosser come la ze la personalità de quel’altra persona, la so maniera de pensar e la so amicìssia con Geovà. Dopo, proa farte queste domande: ‘Questa persona la sarà un bon sposo o una bona sposa par mi?’ (Pro. 31:26, 27, 30; Efe. 5:33; 1 Tim. 5:8) ‘Ela la sarà bona de darme la atension e el amor che go de bisogno? E mi, sarò bon de far la stessa roba? Saremo boni de dàrghene fora coi difeti un del altro?’ (Rom. 3:23) Intanto che ve cognossé, ricordeve che la roba pi importante no la ze mia quanto valtri sì compagni, ma come sì boni dàrghene fora cole difarense un del altro. w24.05 p. 27 § 5

Come ghemo visto prima, el rè Davi el ga fato bruti sbali. Ma quando el profeta Natan el ghe ga dito come Geovà el se sentia, Davi l’è stà ùmile e el se ga ciamà gramo. (Sal. 51:3, 4, 17, informassion nel scomìnsio del salmo.) Anca el rè Ezechia el ga fato pecati contra Geovà. (2 Cró. 32:25) Ma, lu l’è stà ùmile e el se ga ciamà gramo, compagno Davi el gavea fato. (2 Cró. 32:26) Par quela, Geovà lo vedea come un rè che ‘sempre el fea quel che l’era giusto’. (2 Rè 18:3) Cossa che imparemo? Ghemo de ciamarse grami dei nostri pecati e sforsarse de mai farli nantra volta. Ma cossa che ghemo de far se un ansiano dela congregassion el ne dà un consìlio sora una roba che no la ze mia tanto importante? No stà mia pensar che Geovà no l’è contento con ti gnanca che i ansiani i ga qualcossa contra ti. Fin i boni rè de Israel i gavea bisogno de consili. (Ebr. 12:6) Alora, se un ansiano el te dà un consìlio, te toca (1) esser ùmile, (2) cambiar quel che ghe ocore, e (3) seitar a adorar a Geovà de tuto el to cuor. Se te te ciami gramo dei to pecati, Geovà sempre el ndarà perdonarte. — 2 Cor. 7:9, 11. w24.07 p. 21 § 8; p. 22 §§ 9, 11

Quando un fradel el fà un bruto pecato e no’l se ciama gramo, podemo dir che l’è stà lu che el ga scoliesto esser cavà via dela congregassion. Parché? Lu el savea quel che ndaria suceder se lu el seitesse a far questo pecato, e l’è stà lu che no’l ga volesto cambiar e gnanca el se ga ciamà gramo. Lu gnanca no’l ga acetà el aiuto che i ansiani i ga proà darghe tante volte. (2 Rè 17:12-15) Alora, par meso de quel che el ga fato, lu el ga mostrà che no’l vol obedir a Geovà. (Deu. 30:19, 20) Alora, i ansiani i ga de far un anùnsio e dir ala congregassion che lu no l’è pi una Testimònia de Geovà. Lori no i fà questo anùnsio par invergognar quel fradel. Invesse, i ansiani i vol avisar a tuti dela congregassion che lori i ga de “assar de star insieme” a quel fradel e che no i ga “gnanca de magnar” con lu. (1 Cor. 5:9-11) Questo l’è tanto importante, parché Paolo el ga dito che “un poco de levà el fà cresser tuta la massa”. (1 Cor. 5:6) Alora, se un fradel che el ga fato un bruto pecato e no’l se ga ciamà gramo no’l fusse cavà via dela congregassion, i fradei i podaria pensar che no ghe ocore obedir ale lege de Geovà. — Pro. 13:20; 1 Cor. 15:33. w24.08 p. 26, 27 §§ 3, 4

Podemo doperar la forsa che ghemo par giutar i altri. Par esémpio, podemo giutar quei che i ze pi veci o maladi nela congregassion a far i so laoreti casa o a ndar al mercà comprar un per de robe che ghe ocore. Podemo anca giutar a netar o a rangiar su el Salon del Regno. Te pol anca giutar i to fradei par meso dele robe che te parli. Par esémpio, te pol lodarli par quel che i fà de bon o consolar quei che i ga de bisogno. Se te ndarè parlarghe qualcossa par incoraiar a qualchedun, mostra che te ghe vol ben. Te pol ndar visitarlo, ciamarlo par telèfono o scriverghe qualcossa. E no stà preocuparte con quel che te ndarè dir. Pol esser che sol un per de parole le ze pròpio quel che el fradel o la sorela ga de bisogno par seitar fedele o par gaver forsa de ndar avanti. — Pro. 12:25; Efe. 4:29. w24.09 p. 28 §§ 8-10

Se te sì un servo ministerial, fursi te sì drio sforsarte de gaver le qualità par deventar un ansiano. Ma sarà che ti te vol far el laoro de un ansiano? Cossa che i ansiani i fà? Lori i dà un bel esémpio nela predicassion, i insegna e i incoraia i fradei e le sorele. Par quela che la Bìblia la dise che bravi ansiani i ze ‘come un presente’ che Geovà el ne ga dato. (Efe. 4:8) Cossa che un fradel el ga de far par deventar un ansiano? Scominsiar a laorar come ansiano l’è difarente de scominsiar a laorar nte una empresa. Par laorar nte una empresa, una persona ghe toca sol saver far quel che el paron el vol. E i ansiani? Savemo che lori i ga de predicar e insegnar, ma i ga de far ancora altre robe. Par deventar un ansiano, un fradel el ga de far quel che ghen’è scrito in 1 Timòteo 3:1-7 e Tito 1:5-9. w24.11 p. 20 §§ 1-3