Otobre

Noantri sempre ricevemo orientassion de come servir a Geovà. Queste orientassion le pol vegner par meso dei ansiani, del superintendente, de Betel o del Corpo Governante. Ma cossa pol suceder quando no capimo mia tanto ben le orientassion? Podemo scominsiar a pensar sol nele dificoltà che le pol vegner fora se ghe ndemo drio. E fursi anca scominsiemo a pensar sol nei difeti de quei che i ne ga dato la orientassion. Semo sicuri che Geovà l’è drio orientar la so organisassion e che el sa tuto quel che sucede con noantri. Par quela, suito obedimo ale orientassion de volentiera. (Ebr. 13:17) Savemo che, quando semo obedienti, giutemo che ghen sìpia union nela congregassion. (Efe. 4:2, 3) Noantri se fidemo che, anca se quei che i ne dà orientassion i ze imperfeti, Geovà el ndarà benedirne se semo obedienti. (1 Sam. 15:22) E se ghe vol cambiar la orientassion, savemo che Geovà lo farà nel tempo giusto. w25.03 p. 23, 24 §§ 13, 14

Ancoi, l’è drio suceder tante bele robe. Noantri vedemo che tante professie dela Bìblia le ze drio suceder. Par esémpio, “el rè del nort” e “el rè del sud” i ze drio vegner un contra quelaltro par veder chi che ga de pi poder. (Dan. 11:40) Noantri anca vedemo che le bone notìssie del Regno de Dio le ze drio esser predicade in tuta la Tera e che milioni de persone le ga belche dessidio servir a Geovà. (Isa. 60:22; Mat. 24:14) E semo drio ricever tante publicassion e aiuto par capir la Bìblia “nel tempo giusto”. (Mat. 24:45-47) Geovà l’è drio giutarne a capir le robe che sucederà nel futuro. (Pro. 4:18) Alora, podemo esser sicuri che quando scominsiarà la granda tribolassion, noantri ndaremo saver tuto quel che ne ocore par seitar leai e unidi. Ma ghemo de ricordarse che, par intanto, ghen’è un per de robe che no savemo mia. w24.05 p. 8 §§ 1, 2

Nel Salmo 15, Davi el parla de quei che i dise busie sora altre persone. Quei che i fà questo i pol rovinar la reputassion dei altri. El Salmo 15:3 anca el ne ricorda che i amighi de Geovà no i conta busie e no i rovina la reputassion dei so amighi. (Sal. 15:1) Come cossita? Se noantri parlemo in volta informassion sora altre persone, podemo rovinar la so reputassion sensa nicorderse. Metemo dir che (1) una sorela la se ga fermà de esser pioniera, (2) un casal no’l serve pi in Betel e (3) un fradel no l’è pi ansiano o servo ministerial. Saria tanto bruto proar indovinar parché questi fradei e sorele i ga bio de far questi cambiamenti e dir ai altri che pensemo che lori i ga fato qualcossa de sbalià. Ghemo de ricordarse che ghen’è robe che noantri no savemo. Alora, un amigo de Geovà ‘no’l ga de dir busie sora le altre persone gnanca parlar mal dei so amighi’. w24.06 p. 11, 12 §§ 11-13

Par gaver un grando amor e rispeto par Geovà, ghemo de pensarghe sora quel che ghe piase tute le volte che femo una dessision. Alora, quando te ledi la Bìblia, proa domandarte: ‘Se mi fusse stà in quela situassion, che dessision gavaria fato?’ Par esémpio, proa pensar che te eri un israelita e te gavessi scoltà quei diese spioni che i ga dito che no i saria mia boni de ndar rento la tera de Canaan, la tera che Geovà gavea prometesto darve. Cossa che te farissi? Sarà che el to amor par Geovà e la voia de contentarlo saria pi grandi che la to paura dei òmini? Tuti quei israeliti no i ga mia credesto in Giosuè e Calebe. Par quela, Geovà no li ga assadi ndar rento la Tera Prometesta. — Nùm. 14:10, 22, 23. w24.07 p. 10 § 7

Gomer, la so dona de Oseia, lo gavea abandonà par ndar drio a nantro omo. Sarà che ela la meritea aiuto, o nò? Geovà el sa cossa che tuti i ga rento el cuor, e lu el ga dito a Oseia: ‘Va nantra volta e ama la dona che la ze amada par nantro e che la tradisse so omo. Fà compagno a Geovà, che el ama la nassion de Israel, intanto che lori i adora altri dèi.’ (Ose. 3:1; Pro. 16:2) Gomer la era drio far bruti pecati. Ancora cossita, Geovà el ga dito che Oseia el gavea de ndar drio a ela e perdonarla. Cossita, ela la tornaria a esser so dona. Dela stessa maniera, Geovà no’l gavea mia abandonà i israeliti, anca se lori i era desobedienti e testardi. Lori i era drio far robe pròpio brute, ma Geovà el seitea a amar el so pòpolo e el volea giutarli a ciamarse grami e a cambiar quel che ghe ocorea. Cossita, imparemo che Geovà “el sa quel che ghen’è rento el cuor” de tuti e el vol giutarli a ciamarse grami ancora quando i ze drio far bruti pecati. w24.08 p. 10 § 7

Nel passà, i giudei i era el pòpolo che Geovà el gavea scoliesto par adorarlo. Par tanti ani, Gerusalen la era un posto pròpio importante parché i rè che Geovà el scoliea i governea de questa cità, e i giudei i gavea de ndar al témpio in Gerusalen par adorar a Dio. In quela època, tuti i giudei i gavea de obedir ala Lege de Moisè e ai lìderi religiosi. Le lege che lori i gavea le disea come i gavea de tratar quei che no i era mia giudei, che i gavea de esser sircunsidadi e fin cossa che i podea magnar. Ma dopo che Gesù l’è morto, Geovà no’l ga pi acetà i sacrifissi che i fea, e lori no i gavea pi de obedir ala Lege de Moisè. (Ebr. 10:1, 4, 10) Sicuro che no l’è stà mia fàcile par quei giudei che i era deventadi dissìpoli de Gesù cambiar tute queste robe. Anca bravi fradei, come el apòstolo Piero, i ga fato fadiga cambiar quel che ghe ocorea. (Ati 10:9-14; Gàl. 2:11-14) E par causa de questi cambiamenti, i lìderi religiosi giudei i ga scominsià a perseghir quei fradei. w24.09 p. 9 § 4

Quando Geovà dà un laoro ai so servi, lu el vol che lori i lo fae de maniera organisada. (1 Cor. 14:33) Par esémpio, Geovà el vol che le bone notìssie del Regno le sìpia “predicade in tuta la tera”. (Mat. 24:14) Geovà el ga domandà che Gesù el organisesse questo laoro, e lu l’è drio farlo tanto ben. Come che Gesù el ga organisà i servi de Dio nel primo sècolo? In quela època, apòstoli e i ansiani in Gerusalen i fea dessision che tute le congregassion le gavaria de obedir. (Ati 15:2; 16:4) E nele congregassion, ansiani i ze stati scoliesti par dir ai fradei e ale sorele cossa che i gavaria de far. (Ati 14:23) Cossita, “le congregassion le restea cada volta pi forte nela fede e ghen’era de pi persone che credea a cada giorno”. — Ati 16:5. w24.04 p. 8 § 1

Nela matina del giorno 16 de nisan, arquante done fedele le ze ndate fin la tomba de Gesù. (Luc. 24:1, 10) Ndemo veder quel che ga sucedesto con una de queste done de nome Maria Madalena. Quando la ga visto che la tomba la era voda, ela la ze ndata svelta contarghelo a Piero e Gioani. Alora, tuti lori i ze ndati de carera fin la tomba de Gesù. Ma quando i ga visto che la era voda, Piero e Gioani i ze ndati via. Invesse, Maria la ze restada lì e la ga tacà piander. Ela no la savea mia, ma Gesù l’era drio vardarla e el ga volesto consolarla. Par quela, lu el se ga fato veder a Maria par incoraiarla e el ghe ga domandà de contarghe ai altri che lu l’era stà ressussità. — Gio. 20:17, 18. w24.10 p. 13 § 7

Moisè l’è stà un profeta, l’è stà un giuis, el ga tendesto del pòpolo de Dio par tanto tempo e el ga scrito arquanti libri dela Bìblia. Lu el ga libertà i israeliti del Egito e el ga visto tanti miràcoli de Geovà. Lu anca el ga scrito i primi sinque libri dela Bìblia e pol esser che el gàpia scrito anca el Salmo 90, 91 e el libro de Giò. Quando Moisè el gavea 120 ani, un tempo prima de morir, lu el ga dato bei consili ai israeliti. Parché? Parché lori suito i ndaria rento la Tera Prometesta. Par quela, Moisè el ga volesto che lori i se ricordesse de arquante bele robe che i gavea visto. Tanti de quei israeliti i gavea visto bei miràcoli che Geovà el gavea fato e come lu el gavea castigà i egìpsi. (Éso. 7:4) I israeliti anca i gavea visto come Geovà el gavea spartio le àque del Mar Rosso par farli ndar de quel’altra banda del mar. Alora, Moisè anca li ga giutadi a ricordarse come Geovà el ga finio fora con Faraò e tuto el so esèrsito. (Éso. 14:29-31) Lu anca el ga parlà che Geovà el ghe ga dato tuto quel che ghe ocorea e li ga protegesti tanto ben quando i era nel deserto. — Deu. 8:3, 4. w24.11 p. 8, 9 §§ 3, 4

Quel che Gesù el ga dito nela Sena del Signor ai so apòstoli l’era tanto difarente de quel che el ga dito nela Galilea. Nela Sena del Signor, l’era drio parlar con un pìcolo grupo de persone, e nela Galilea l’era drio parlar con tante persone. Quando Gesù l’era nela Galilea nel ano 32, lu l’era drio parlar ai giudei che i era interessadi sol col magnar. Ma lu el ga proà giutarli a capir che ghen’era qualcossa tanto pi importante che el magnar. Lori i podea gaver la vita eterna. Dopo, Gesù el ga dito che quei che i more i pol esser ressussitadi nel ùltimo giorno e gaver la vita eterna. Nela Sena del Signor, lu l’era drio parlar a un pìcolo grupo de persone, invesse qua l’era drio parlar una roba tanto bela che tute persone le podea gaver. w24.12 p. 11 §§ 10, 11

Geovà el òdia una persona che la ze violenta, e el resta pròpio disgustà quando el vede che un omo l’è violento cola so dona. (Sal. 11:5; Mal. 2:16) El testo de 1 Piero 3:7 el mostra che un omo che no’l trata ben la so dona no’l pol esser amigo de Dio. Geovà no’l ndarà gnanca scoltar le so orassion. Arquanti òmini i parla cativi cola so dona e ghe dise robe pròpio brute. Ma Geovà el òdia una persona che la parla con ‘ràbia’, che la ‘osa’ coi altri e che la ‘parla robe che ofende’. (Efe. 4:31, 32) Un omo che el parla cativo cola so dona el rovina el so matrimònio e anca la so amicìssia con Geovà. (Tia. 1:26) La stessa roba a sucede con un omo che el varda robe imorai parché el rovina la so amicìssia con Geovà e no’l mostra rispeto ala so dona. Geovà el vol che el omo el sìpia leal ala so dona par meso de quel che el fà e de quel che el pensa. E Gesù el ga dito che un omo che el varda una dona e el pensa robe sbaliade el ga belche fato adultèrio nel so cuor. — Mat. 5:28, 29. w25.01 p. 9 §§ 6-8

La Bìblia la dise che i servi de Geovà i ze giusti. Questo vol dir che Geovà no’l speta che i so servi i paghe par i pecati che i fà. Ma no vol dir che meritemo el perdon de Geovà gnanca che lu l’è de acordo cole robe sbaliade che ghemo fato. Invesse, lu el vol perdonar i nostri pecati parché ghemo fede in quel che lu el ga fato e nel sacrifìssio de Gesù. Cossita, lu no’l va mia contra la so giustìssia. (Rom. 3:24) Parché che l’è tanto bon che Geovà el ne veda come persone giuste? Quei che i ze stati scoliesti par governar con Gesù nel cielo i ga belche el perdon dei so pecati e i ze deventadi ‘fioi de Dio’. (Tito 3:7; 1 Gio. 3:1) I so pecati i ze stati perdonadi e l’è stà come se mai i gavesse fato un sbàlio. Cossita, lori i pol far parte del Regno de Dio. (Rom. 8:1, 2, 30) Quei che i ga la speransa de viver par sempre nela Tera anca i ze giusti. Geovà li ga perdonadi e lori i ze deventadi so amighi. — Tia. 2:21-23. w25.02 p. 5 §§ 17-18

Varda una volta che el apòstolo Piero no’l ga pensà compagno a Geovà. Gesù el ga contà ai so apòstoli che lu el ndaria a Gerusalen, el saria preso par i lìderi religiosi, el ciaparia bote e el saria copà. (Mat. 16:21) Piero el savea che Gesù l’era el Messia che el ndaria salvar el pòpolo de Dio. Par quela, pol esser che ghe ga fato fadiga creder che Geovà el assaria che Gesù el fusse copà. (Mat. 16:16) Piero el ga dito: “Gàpia pecà de ti stesso, Signor! Questo no te ndarà mai suceder.” (Mat. 16:22) Alora, Piero e Gesù no i era intesi parché Piero no l’era drio pensar come Geovà. Anca se Piero el volesse giutarlo, Gesù no’l ga scoltà el so consìlio. Gesù el savea che, par far la volontà de Geovà, lu el gavaria de sofrir e morir. Cossita, Piero el ga capio che el gavea de imparar a pensar compagno a Geovà. Sicuro che imparemo tanto de quel che ga sucedesto con Piero e Gesù. w25.03 p. 9 §§ 5, 6

Sito drio sofrir parché una persona che te te fidei la te ga disgustà o la te ga tradio? Alora, ricòrdate sempre che el to caro Pare el te ama tanto, no importa quel che i altri i fà contra ti. Se te sì disgustà o se qualchedun te ga tradio, quel che Davi el ga scrito nel testo de ancoi pol consolarte tanto. Un libro ga spiegà che quei che i ga “el cuor pien de tristessa” i ze ‘persone che no le speta che suceda gnente de bon’. Alora, se te sì drio sentirte cossita, come che Geovà el pol giutarte? Lu l’è come un caro pare che tien in brasso e consola so caro fiol che piande. Geovà l’è darente de noantri, el mostra so amor e el proa giutarne se qualchedun ne ga tradio o ne ga abandonà. Lu el vol tanto giutar quei che i ga el cuor spacà o i ze desanimadi, e le so bele promesse le ne giuta a dàrghene fora cole nostre dificoltà. — Isa. 65:17. w24.12 p. 23 §§ 13, 14

Ancoi, i ansiani i pol esser sicuri che Geovà li vede e che lu el resta tanto contento con tuto el laoro che i fà. I ansiani i incoraia i fradei dela congregassion, i ghe insegna e i fà el so meio nela predicassion. Arquanti de lori anca i giuta a far su Saloni del Regno e i giuta i fradei quando sucede desgràssie. Altri i fà vìsite ai fradei maladi in ospedal o i fà parte dela Comission de Contato coi Ospedai. Questi bravi ansiani i sa che la congregassion la ze de Geovà e che la organisassion no la ze mia de òmini. Par quela, lori i fà el so laoro con tuto el cuor e i ze sicuri che Geovà el ndarà benedirli. (Col. 3:23, 24) L’è vera che gnanca tuti i pol esser ansiani. Ma tuti noantri podemo dar el nostro meio a Geovà. El nostro caro Dio el resta tanto contento quando se sforsemo de servirlo del tuto. Par esémpio, lu el vede quando ghe demo dei nostri soldi par giutar nel laoro de predicassion, anca se l’è poco. E lu el resta contento quando el vede che semo stati boni de perdonar un fradel che ne ga ofendesto. Alora, sìpia sicuro che lu el dà tanto valor a tuto quel che te fè. Lu el te vol tanto ben e el ndarà benedirte. — Luc. 21:1-4. w24.06 p. 23 §§ 12, 13

Quel che ga sucedesto col gióveno de Proverbi 7 pol suceder anca con noantri. Pol esser che dopo che una persona la ga fato un bruto pecato, ela la pense che ga sucedesto tuto de colpo. Fursi anca la dise: “Quando go visto l’era tuto belche fato.” Ma se la pensa in tuto quel che ga sucedesto, la va veder che la ga fato arquante brute dessision prima. Par esémpio, pol esser che questa persona la era drio ndar in volta con bruti amighi, la era drio divertirse con robe sbaliade, o la era drio vardar site o ndar rento posti che no i ze boni par servi de Geovà. O pol esser che la se ga fermà de pregar a Geovà, studiar la Bìblia, ndar ale riunion e ala predicassion. Cossita, compagno quel gióveno de Proverbi, no ga sucedesto tuto de colpo cossita. Invesse, questa persona la ga fato un per de dessision brute che la ga portada a far el pecato. Cossa che imparemo de quel gióveno e quela dona imoral de Proverbi 7? Invesse de sforsarse sol par no gaver voie sbaliade, ghemo anca de star distanti dele robe che pol portarne a far un pecato. — Mat. 5:29, 30. w24.07 p. 16 §§ 10, 11

Questo tesoro l’è el laoro de predicassion sora el Regno de Dio che pol salvar la vita dele persone. (2 Cor. 4:1) E i vasi de baro i ze i servi de Geovà che i porta le bone notìssie ai altri. Nela època de Paolo, tante persone le doperea vasi de baro par portar magnar, vin e soldi. Dela stessa maniera, Geovà el ne dopera par portar le bone notìssie ai altri. Sicuro che, col aiuto de Geovà, gavaremo la forsa che ne ocore par seitar a predicar. Pol esser che dele volte ghemo paura che le persone le ne vegna contra o che no le acete scoltarne. Alora, cossa che te pol far? Ricòrdate dela orassion che i apòstoli i ga fato quando i ghe ga dito che i se fermesse de predicar. Geovà ghe ga rispondesto suito! Cossita, invesse de fermarse de predicar par causa dela paura, lori i ze ‘stati boni de seitar a parlar dela Parola de Geovà con tanto coraio’. (Ati 4:18, 29, 31) Alora, se te vien paura de ndar predicar, prega a Geovà e domanda che lu el te giute a gaver un amor tanto grando par le persone. Cossita, el to amor el sarà pi grando che la to paura. w24.04 p. 16 §§ 8, 9

Par causa del nostro amor par Geovà, volemo santificar el so nome. (Mat. 6:9) Questo vol dir che volemo parlar ai altri che le brute robe che Sàtana el ga dito sora Geovà le ze busie. (Gén. 3:1-5; Giò 2:4; Gio. 8:44) Alora, quando semo nela predicassion, volemo tanto parlar la verità sora Geovà a tuti quei che i vol scoltarne. Volemo che tuti i sàpia che lu l’è perfeto e giusto e che la so pi granda qualità la ze el amor. Anca volemo insegnarghe che tuti i gavarà pace e felicità par meso del Regno de Dio. (Sal. 37:10, 11, 29; 1 Gio. 4:8) Quando parlemo ai altri de queste robe sora Geovà, semo boni de santificar el so nome e restemo pròpio contenti de saver che semo drio viver come Testimònie de Geovà. w24.05 p. 18 § 12

I ansiani i ga de “ricever ben i altri”, o sia, far robe bone a tuti, anca a quei che no i ze so amighi. (1 Pie. 4:9) Un libro che parla dela Bìblia el spiega che un omo cossita sempre el mostra bontà ale persone, anca a quei che no’l cognosse, e l’è contento de convidarli par vegner nela so casa. (Ebr. 13:2, 16) Alora, sfòrsate de mostrar bontà e ricever ben a tuti, anca quei che i ze poareti e no i pol darte gnente indrio. Ricòrdate anca de mostrar bontà ai fradei che i vien far discorsi nela to congregassion e ai to superintendenti de sircuito. (Gén. 18:2-8; Pro. 3:27; Ati 16:15; Rom. 12:13) Alora, domàndate: ‘Sarà che i altri i me vede come una persona che la riceve ben i altri e che la mostra bontà a tuti?’ w24.11 p. 21 § 6

Nela stòria dele vèrgine, Gesù el ga parlà de diese vèrgine che le ndaria catarse con un noivo. (Mat. 25:1-4) Tute lore le volea ndar insieme a lu nela so festa de matrimònio. Ma Gesù el ga dito che sinque vèrgine le gavea sabedoria e sinque le era stùpide. Quele che le gavea sabedoria le era pareciade par spetar el noivo, anca se lu ghe metesse tanto tempo par rivar. Lore le era pareciade con ciareti e le ga portà de pi òio se ghe ocoresse. Par quela, i so ciareti no i se ga smorsà. (Mat. 25:6-10) Alora, quando el noivo l’è rivà, le vèrgine che le gavea sabedoria le ze ndate insieme a lu nela festa de matrimònio. Dela stessa maniera, anca i nostri fradei untadi i ga de esser pareciadi e seitar fedeli. Cossita, quando riva el noivo, Gesù, lori i ndarà insieme a lu nel Regno del cielo. — Apo. 7:1-3. w24.09 p. 21 § 6

Quando pensemo in come la predicassion la ze drio giutar tante persone in tuto el mondo, ghemo voia de seitar a predicar. Tuti i ani, milioni de persone le va ala Selebrassion e le scomìnsia a studiar la Bìblia. E miliari de persone le se batesa e scomìnsia a predicar insieme a noantri. No savemo quanti ancora i va imparar la verità, ma savemo che Geovà l’è drio giutar una mùcia de gente che seitarà viva dopo la granda tribolassion. (Apo. 7:9, 14) Geovà, el Paron dela racolta, l’è sicuro che ancora tanti i volarà cognosserlo. Par quela ghemo de seitar a predicar! (Luc. 10:2) I dissìpoli de Gesù sempre i la ga metesta tuta nela predicassion. Lori i predichea con tanta voia che le persone ‘le ga capio che lori i era stati con Gesù’. (Ati 4:13) Anca noantri volemo meterghela tuta nela predicassion. Cossita, i altri i podarà dir che predichemo come Gesù. w25.03 p. 18 § 15; p. 19 §§ 17, 18

Varda quel che ga sucedesto quando Geovà el ga mandà el profeta Samuel ndar ala casa de Gessè par scòlier quel che el saria el futuro rè de Israel. Gessè el ga ciamà sete dei so fioi, ma no’l ga mia ciamà Davi che l’era el pi gióveno. Ma l’era stà pròpio Davi che Geovà el gavea scoliesto. (1 Sam. 16:6, 7, 10-12.) Parché? Parché Geovà el cognossea a Davi e el savea che quel gióveno lo amea tanto. Cossita, capimo che Geovà el vede le robe che par i altri fursi no le ze mia importante. Come che savemo che semo pròpio importanti par Geovà? Geovà el mostra che el te cognosse tanto ben parché el te dà i meio consili pròpio quando te ocore. (Sal. 32:8; 139:1) E quando ti te li meti in pràtica, te vedi che i ze pròpio boni e che Geovà el te vol tanto ben. (1 Cró. 28:9; Ati 17:26, 27) Lu anca l’è atento a tuto quel che te fè par obedirghe, ale to bele qualità e el vol esser to amigo. — Ger. 17:10. w24.10 p. 25, 26 §§ 7-9

Sicuro che te ami tanto a Geovà e te vol giutar i altri. Ma, cossa che pol giutarte a voler far ancora de pi? Te pol pensar sora la alegria che te gavarè de giutar i to fradei e sorele. Gesù el ga dito: “Ghen’è de pi felicità in dar, che in ricever.” (Ati 20:35) Gesù sempre el ga giutà i altri e el ga bio tanta alegria. Varda quel che l’è scrito in Marco 6:31-34, quando lu e so apòstoli i era strachi. Lori i era ndati nte un posto tranquilo par fermarse un pochetin. Ma una mùcia de gente volea imparar de Gesù, e la ze rivada là prima de lu. Gesù el podaria dir che no ndaria insegnarghe gnente parché lu e so apòstoli no i gavea tempo gnanca par magnar qualcossa. O lu el podaria insegnarghe un per de robe e mandarli via. Ma Gesù el amea tanto le persone, cossita, ‘el ga scominsià insegnarghe fin che ‘l’era tardi’. — Mar. 6:35. w24.11 p. 16 §§ 9, 10

Se te sì pare o mare, incoraia el to fiol a parlar sora la Bìblia sempre che el pol. (Rom. 10:10) Noantri podemo dir che parlar sora la Bìblia ai altri l’è compagno imparar a sonar una mùsica. Pol esser che de scomìnsio, la persona sol la ze bona de sonar una mùsica pi fàcile. Ma col tempo, se la seita a sonar, ela la sarà bona de sonar anca altre mùsiche. La medèsima roba la sucede quando el to fiol el scomìnsia a parlar dela Bìblia ai altri. Par esémpio, par scominsiar a far questo, lu el pol domandar a un colega dela scola: “Seto che dele volte i studiosi fà màchine o altre robe che le ze compagne a qualcossa che ghen’è nela naturesa? Speta che te fao veder un vìdeo.” Dopo, el to fiol el pol mostrarghe un dei vìdei dela session Qualchedun lo ga fato? e dirghe: “Se le persone le loda un studioso che el ga fato una roba compagna a nantra che el ga visto nela naturesa, no gavarìssino anca de lodar quel che el ga creà la naturesa?” Cossita, pol esser che questo colega dela scola el volarà imparar de pi sora Geovà. w24.12 p. 18, 19 §§ 17, 18

Geovà el ga dato la vita del so fiol par salvarne. Ma come che la morte de un omo perfeto podaria giutar tute le persone? El apòstolo Paolo el ga dito: ‘Par meso dela desobediensa de un sol omo, Adon, tanti i ze deventadi pecadori, dela medèsima maniera, par la obediensa de un sol, Gesù, tanti i deventarà giusti.’ (Rom. 5:19; 1 Tim. 2:6) Paolo l’era drio dir che par meso del pecato de un omo, noantri semo deventadi pecadori e morimo. Ma, par meso dela obediensa de un omo, noantri saremo perfeti e riceveremo la vita eterna. Pol esser che pensemo che saria meio se Geovà sol el assasse che i fioi obedienti de Adon i vivesse par sempre. Ma la giustìssia de Geovà la ze perfeta e lu no’l podaria mia far finta che Adon no’l gavea fato un bruto pecato e che i so fioi i era perfeti. Questo no saria mia giusto! w25.01 p. 20, 21 §§ 3, 4

El apòstolo Paolo el savea che suito el ndaria morir. Ma, quando el pensea nela so vita e in quel che el gavea fato par Geovà, lu l’era tanto contento. Paolo el ga dito: “Go finio la carera, go vivesto de acordo cola fede.” (2 Tim. 4:6-8) Paolo el ga fato bone dessision nela so vita e el savea che el gavea assà Geovà contento. Anca noantri volemo far bone dessision e contentar a Geovà. Alora, cossa che ne toca far? Paolo el ga dito sora lu e altri servi de Geovà: “Vivemo de acordo cola fede e nò de acordo con quel che vedemo.” La persona che la vive de acordo cola fede la se preocupa con quel che Geovà el pensa par far le dessision. Ela anca la ze sicura che, se la fà quel che lu el dise, la gavarà una vita felice adesso e anca nel futuro. — Sal. 119:66; Ebr. 11:6. w25.03 p. 20 §§ 1, 2

Col aiuto del spìrito de Dio, arquanti che una volta i era violenti e i fea brute robe, i ga fato tanti cambiamenti nela so vita. (Isa. 65:25) Lori i se ga sforsà tanto par cavar via le so brute qualità. (Efe. 4:22-24) L’è vera che i servi de Geovà no i ze gnancora perfeti, i seita a far sbali e i ze tanto difarenti un delaltro. (Tito 2:11) Ma come lori i ama tanto a Geovà e un al altro, lori i ga pace e union. Questo l’è un miràcolo che sol el nostro poderoso Dio el pol far! Questo vol dir che le promesse de Geovà sempre le se realisa. (Isa. 55:10, 11) Noantri adoraremo a Geovà in pace e union belche adesso parché l’è stà lu che el ne ga giutà a deventar una fameia. Intrà i nostri fradei, noantri podemo gaver pace e viver sensa paura in questo bruto mondo. (Sal. 72:7) L’è par quela che volemo giutar tute le persone a adorar a Geovà insieme a noantri. Cossita, ghemo de sforsarse par insegnarghe la verità ale persone sempre che podemo. — Mat. 28:19, 20. w24.04 p. 23 §§ 13, 15

Gesù el amea a Geovà con tuta la so mente. Lu el savea quel che Geovà el volea che el fesse e l’era dessidio a sempre obedirghe, anca se ghe tochesse sofrir. La roba pi importante nela vita de Gesù la era contentar so Pare. Par quela, lu no’l ga mai assà che qualcossa lo intrighesse de far quel che Geovà el volea. Piero e i altri apòstoli i ga podesto restar tanto tempo insieme de Gesù e imparar a pensar compagno a lu. Alora, quando Piero el ga scrito la so prima carta, lu el ga incoraià i fradei a pensar come Gesù. (1 Pie. 4:1) Le parole che Piero el ga dito in questo testo le era doperade in quela època par dir a un soldà che el gavea de pareciarse par una guera. Cossita, capimo che pensar compagno a Gesù l’è come una arma che ne giuta a lotar cole voie sbaliade e a no cascar nele tràpole del mondo de Sàtana. — 2 Cor. 10:3-5; Efe. 6:12. w25.03 p. 8, 9 §§ 1-3

Che robe gavaré de capir sora quel’altra persona intanto che sì drio smorosar? Vanti de esser passionà, gavé de parlar sora robe importante, come par esémpio, quel che volé far nel futuro. Come che te pol cognosser pròpio la persona che te sì drio smorosar? Te pol farghe domande e scoltar le risposte. Valtri gavé de parlar pròpio quel che valtri senti e risponder quel che pensé. (Tia. 1:19) Anca podaré discorer intanto che prediché, magné insieme o caminé ndove che ghen’è gente. Podé cognosserve meio anca quando resté insieme coi amighi e cola fameia. Te pol anca pensar de far robe insieme che ndarà giutarte a veder come che la persona che te sì drio smorosar la se comporta in posti difarente e con persone difarente. w24.05 p. 27, 28 §§ 6, 7

Presto ndaremo infrontar tante dificoltà e ne tocarà fidarse in Geovà come mai prima. la Bìblia la mostra come che Geovà el ga giutà i so servi nel passà. Anca, ledi come che Geovà l’è drio giutar to fradei e sorele ancoi. Alora, te ndarè capir le bele qualità che Geovà sempre el mostra quando el giuta i so servi. Dopo, sfòrsate de torte el tempo par pensarghe sora. Cossita, te sarè bon de far de Geovà la to Ròcia. Quando se sforsemo de far compagno a Geovà, saremo boni de incoraiar i nostri fradei e sorele. Par esémpio, Gesù el ga dato a Simon el nome de Cefa (che l’è tradusio come “Piero”). Questo nome vol dir un “toco de ròcia”. (Gio. 1:42) Cossita, Gesù el ga mostrà che Piero el ndaria far pi forte la fede dei so fradei e sorele e che el ndaria consolarli. La Bìblia la dise che i ansiani i ze “come la ombria de un grando sasso”, o sia, lori i protege i so fradei e sorele. (Isa. 32:2) Ma no l’è mia sol i ansiani che ghe toca gaver queste qualità. Pitosto, tuti noantri ghemo de sforsarse de gaver le medèsime qualità che Geovà e incoraiar i nostri cari fradei e sorele. w24.06 p. 28 §§ 10, 11

I rè de Israel che i ze stati leai a Geovà i lo ga adorà dela maniera giusta e i ga incoraià el pòpolo a far compagno. Ma tanti rè no i ze stati leai, i ga assà de banda la lege de Geovà e i ga scominsià a adorar falsi dei. (1 Rè 21:25, 26; 2 Cró. 12:1) Parché che, par Geovà, l’era tanto importante adorarlo dela maniera giusta? Ghemo de ricordarse che i rè de Israel i gavea la responsabilità de giutar i israeliti a adorar a Geovà dela maniera giusta. Quando el pòpolo el adorea falsi dèi, lori i tachea far altri pecati e a tratar i altri de maniera sbaliada. (Ose. 4:1, 2) Ghemo anca de ricordarse che i rè de Israel e i israeliti i era dedicadi a Geovà. E la Bìblia la dise che quando una persona dedicada a Geovà la adora falsi dèi l’è compagno al adultèrio. (Ger. 3:8, 9) Come cossita? Quando qualchedun el fà adultèrio, el fà un bruto pecato contra la persona che l’è maridà e anca la fà sofrir tanto. Dela stessa maniera, i servi de Geovà che no lo serve pi dela maniera giusta i fà un bruto pecato contra lu e i lo assa tanto disgustà. — Deu. 4:23. w24.07 p. 22, 23 §§ 12-15