11-17 DE MAIO DE 2026
CÀNTICO 7 Geovà, nostra forsa e poder
Fìdate in Geovà, el Dio Tuto Poderoso
“Geovà, sol ti te sì el Altìssimo sora tuta la tera.” — SAL. 83:18.
COSSA CHE NDAREMO IMPARAR?
In questo stùdio, ndaremo veder come che podemo fidarse ancora de pi che Geovà l’è el Tuto Poderoso e che el ndarà giutarne a infrontar tute le dificoltà.
1. Cossa che ghe ga sucedesto a Giò?
GIÒ EL ga infrontà brute dificoltà nte un colpo sol. Par esémpio, tuti i so fioi i ze morti, arquante dele so bèstie le ze state ciavade e altre le ze morte. Dopo, arquanti dei so servi i ze morti e lu el ga bio una bruta malatia. Lu anca el ga perso el rispeto dei altri e tre òmini che i disea che i era so amighi i ga parlà robe pròpio brute che lo ga assà tanto desanimà. Fin so dona la ghe ga dito che l’era meio par lu ‘maledir a Dio e morir’. (Giò 2:9; 15:4, 5; 19:1-3) Par causa de tuto quel che ghe ga sucedesto, Giò el podaria gaver perso la so fede in Dio e scominsiar a gaver dubi se Geovà el tende pròpio de quei che i lo ama.
2-3. (a) Cossa che fursi scominsiemo a pensar quando infrontemo dificoltà? (b) Cossa che ndaremo imparar in questo stùdio?
2 Noantri semo drio viver nei “ùltimi giorni”, che i ze “difìcili de soportar”. (2 Tim. 3:1) Compagno a Giò, pol esser che anca noantri infrontemo tante dificoltà nte un colpo sol. Par quela, restemo tanto preocupadi e pensemo che no semo pi boni de ndar avanti. Podemo fin scominsiar a domandarse se Geovà el tende pròpio de noantri.
3 Se anca ti te te senti cossita, no stà restar desanimà. Dopo de un tempo, Giò el ga capio che Geovà sempre el tende dei so servi. Anca noantri podemo esser sicuri che el nostro Pare el ndarà sempre giutarne. Ndemo veder come due lession che imparemo del libro de Giò le ne giuta a esser sicuri de questo. Prima, Geovà l’è la persona con de pi autorità che ghen’è. Seconda, Geovà el pol far tuto quel che el vol, el ne protege e el ne dà quel che ne ocore par seitar a esser so amighi.
SÀTANA L’È NDATO DAVANTI A GEOVÀ
4. Come mostra el libro de Giò, chi che l’è ndato davanti a Geovà?
4 Una volta, “i fioi del vero Dio” i ze ndati davanti a Geovà nel cielo. La Bìblia la dise che anca Sàtana l’era in meso ai àngeli. (Giò 1:6) Questa ze la prima volta che la Bìblia la parla el nome “Sàtana”. Lu l’è ciamà cossita parché l’è ndato contra Dio. Geovà el ga assà che Sàtana el fusse in meso ai àngeli anca se lu no l’era pi leal. Sàtana l’è deventà un nemigo de Dio, dei àngeli e de tute le persone nela Tera che le serve a Geovà. Dio el ga mostrà che Sàtana no’l fea pi parte dela So fameia quando el ga dito quel che dise Génesi 3:15. Alora, Sàtana no’l fà parte dela “dona”, o sia, dela fameia de Geovà in cielo de ndove vegnaria el “dissendente”.
5. Cossa che imparemo dela riunion che ga sucedesto in cielo?
5 Geovà el ga assà scrito nela Bìblia quel che ga sucedesto in cielo parché el volea che savessino de questo. Quel che Sàtana el ga dito in quela riunion mostra che lu l’è pròpio rugno e un busier. (Giò 1:9; varda anca Apocalisse 12:10.) Quel che ga sucedesto in cielo anca ne insegna che Geovà el dopera el so poder e autorità de maniera perfeta e giusta, e che lu el pol dessider quel che i altri i pol far o nò.
GEOVÀ EL GA EL PODER DE DESSIDER QUEL CHE I ALTRI I POL FAR
6. De acordo con Giò 1:7, 8, come che Geovà el ga mostrà che l’era lu che el comandea?
6 Ledi Giò 1:7, 8.a Geovà el ga mostrà che l’era lu che el comandea quel che ndaria suceder in quela riunion in cielo. L’è stà lu che el ga domandà a Sàtana: “Gheto visto el me servo Giò?” Geovà el savea che Sàtana el volea ndarghe contra Giò. Ma ndemo veder come che Geovà el ga doperà el so poder par giutar Giò.
7. De acordo con Giò 1:10, 11, cossa che Sàtana el ga dito sora quei che i serve a Geovà?
7 Ledi Giò 1:10, 11.b Geovà l’è la persona con de pi autorità che ghen’è. Lu el ga el poder par far tuto quel che el vol e sempre el sa la meio maniera de far le robe. (Ger. 32:17; Dan. 4:35) Anca cossita, Sàtana el ga dito che Geovà el dopera mal el so poder. El Diaol el volea dir che Dio el compra la adorassion dele persone con tante robe bone. E lu anca el ga dito che le persone sol le serve a Dio parché le vol qualcossa indrio. Alora, cossa che Geovà el ga fato?
8-9. De acordo con Giò 1:12, cossa che Geovà el ga dito che Sàtana no’l podea far, e parché? (Varda anca la stampa.)
8 Ledi Giò 1:12.c Geovà el ga assà che el Diaol el proesse mostrar che Giò no l’era leal. Ma Dio el ghe ga dato un comandamento. Lu el ga dito: “No stà mia tocarlo.” Alora, davanti a tuti i àngeli, Geovà el ga dito fin ndove Sàtana el podea ndar. E Sàtana el gavea de obedirghe, parché no’l gavea el poder de far de pi de quel che Geovà lo assesse far. Anca ancoi, Sàtana el pol far sol quel che Geovà el assa. Cossita, vedemo che Geovà el ga doperà el so poder e la so autorità par proteger Giò e par mostrar el so amor e giustìssia.
9 Quel che Sàtana el ga fato no l’è ndato ben, parché Giò el ga seità leal a Dio. (Giò 1:22) Ma Sàtana el proaria intrigar Giò de servir a Geovà de ancora nantra maniera.
Geovà el ga assà che Sàtana lo sfidesse davanti de tuti i àngeli (Varda i paràgrafi 8 e 9.)
10. Parché che Geovà el ga assà che Sàtana ancora el proesse intrigar Giò de servirlo? (Giò 2:2-6)
10 Ledi Giò 2:2-6.d Ma questa volta, Sàtana el volea far ancora pedo par proar intrigar Giò de adorar a Geovà. Lu el ga dito che Giò el ndaria maledir a Dio se el pensesse che el ndaria morir. Alora, par mostrar che questo l’era una busia, Geovà el ga assà che Sàtana el fesse Giò gaver una bruta malatia. Ma lu el ga dito a Sàtana: “No stà mia coparlo!” E Sàtana el gavea de obedir a quel comandamento de Dio. Cossita, vedemo nantra volta che Geovà l’è la persona che la ga de pi autorità e poder, parché el Diaol no’l podaria far de pi de quel che lu el assesse.
GEOVÀ EL GA FINIO COL SOFRIMENTO DE GIÒ
11. De acordo con Giò 42:10-13, come che Geovà el ga benedio Giò?
11 Ledi Giò 42:10-13.e Tuti i ga capio che Giò el seitaria leal. Par quela, Geovà no’l ga pi assà che Sàtana el ndesse contra Giò e el ga finio col sofrimento del so servo. Nantra volta, Sàtana no’l ga podesto far gnente contra la dessision de Geovà, gnanca intrigarlo de proteger e benedir Giò.
12. Parla de un esémpio che mostra quel che sucede con quei che i se fida nel poder de Geovà.
12 In questi ùltimi giorni, Geovà l’è drio doperar el so poder par giutar tanti dei so servi. Par esémpio, in 1945, soldadi nasisti i ga obrigà 230 Testimònie de Geovà a far un viaio tanto grando a pié dela preson fin el mar par coparle. Ma gnanca una de lore le ze morte. I fradei i ga scrito sora la so dessision dopo che i ga infrontà quel bruto colpo. Lori i ga dito: “Geovà el ne ga salvà compagno el ga salvà i tre ebrei del fogo. Noantri ghemo passà par una longa tribolassion, ma la nostra fede la ze restada ancora pi forte. Geovà el ne ga dato el so poder. Noantri ghemo visto che lu el ne ga salvà come el ga salvà Daniel dei leoni. Dopo de tuto questo, ghemo dessidio servir a Geovà par sempre. Questo saria el meio presente che podarìssino ricever!” — Varda anca Daniel 3:27; 6:22.
13. De cossa che te pol esser sicuro intanto che te infronti dificoltà? (Varda anca la stampa.)
13 Dele volte, anca noantri infrontemo brute dificoltà. (1 Pie. 5:8-10) Fursi restemo desanimadi e pensemo che no saremo mai boni de darghene fora. Se te te senti cossita, ricordate del esémpio de Giò. Sìpia sicuro che Geovà el ga el poder de finir col nostro sofrimento, sìpia adesso o in Paradiso. Geovà el ga belche dessidio quando el finirà con questo bruto mondo e no’l assarà passar gnanca un giorno de pi.
Geovà el ndarà finir col sofrimento dei so servi leai (Varda el paràgrafo 13.)
GEOVÀ EL AMA I SO SERVI LEAI
14-15. Cossa che Geovà el vol far par i so servi fedeli, e parché? (Giò 14:15) (Varda anca la stampa.)
14 Ledi Giò 14:15.f Geovà l’è leal a quei che i ze leai a lu. Lu l’è premoso de ressussitar tuti i so servi che i ze morti. Cossita, lu el finirà fora con tuto el dolor e tuti i gavarà la vera alegria. — Isa. 65:17.
15 Anca se Giò el ga seità a viver nte un mondo che Sàtana el governa, la Bìblia la mostra che Geovà el ga finio col so sofrimento, lo ga curà e el ghe ga dato tante benedission. Semo sicuri che Geovà el ghe darà ancora de pi robe bone in Paradiso. Dio el ga mostrà che el vol che i so servi i sìpia felici e i gàpia una bela vita. Lu el darà a tuti quei che i seita leai la vita eterna in Paradiso nel futuro. (Apo. 21:3, 4) Pensar sora questo ne dà tanto consolo, mia vera?
Dopo che Giò e la so dona i ga infrontà brute dificoltà, Geovà li ga benedidi tanto (Varda i paràgrafi 14 e 15.)
16. Parché che podemo fidarse in Geovà?
16 Dopo de viver tanti ani, Giò l’è morto. Ma Geovà l’è el Tuto Poderoso, e el pol finir fin cola morte. (Deu. 32:39) Cossita, nissun pol intrigarlo de ressussitar quei che lu el ama nela ora che lu el vol. — Rom. 8:38, 39.
FÌDATE DEL TUTO IN GEOVÀ
17. Cossa che mostra che Sàtana no l’è mia bon de finir coi servi de Geovà?
17 El libro de Giò el mostra che podemo fidarse del tuto in Geovà. Restemo tanto contenti de veder che Dio no’l assa che Sàtana el finissa cola vita dei so servi leai. Savemo che Geovà el ga tuto questo poder parché ancoi ghen’è intorno de 9 milioni de persone che lo serve. Tante volte, governi e lìderi religiosi poderosi i ga proà intrigar i servi de Geovà de adorarlo, ma no i ze stati boni, parché lu el ne ga giutà. (Isa. 54:17) Gnente pol intrigarne de parlar la verità sora Geovà e de mostrar che Sàtana l’è pròpio rugno e un busier. Gnanca la morte la pol fermarne, parché se morimo, Geovà el ga el poder de ressussitar tuti quei che i ze leai. — Ose. 13:14.
18. Parché che no ne ocore gaver paura de quel che sucederà nel futuro?
18 Quando pensemo sora la vita de Giò, restemo ancora pi sicuri che Geovà l’è dela nostra banda e che el ndarà sempre giutarne. Nela granda tribolassion, Sàtana e quei che i ghe va drio i pensarà che i servi de Geovà i ze fiachi e che sarà fàcile finirli fora. Ma Geovà el doperarà el so poder compagno el ga doperà nei giorni de Giò. Lu no’l assarà che Sàtana el finissa fora coi so servi. Suito, Geovà el ndarà finir con tuto el sofrimento che Sàtana el ga fato vegner fora. Gesù el ndarà butar Sàtana e i so demoni nel abismo e lori i restarà là par mila ani. (Luc. 8:31; Apo. 20:1-3) Dopo dei mila ani, Sàtana e tuti quei che i va contra Geovà i sarà finidi fora par sempre, cossita come che Geovà el gavea dito. — Gén. 3:15; Rom. 16:20; Apo. 20:10.
19. Che benedission quei che i se fida in Geovà i gavarà? (Varda anca la stampa.)
19 Noantri semo premosi de gaver la vita perfeta e felice che Geovà el ne promete in Paradiso. La nostra vita la sarà tanto meio de quel che podemo imaginar. Geovà el promete: “Varda! Son drio far nove tute le robe.” (Apo. 21:5) Cossa che questo vol dir? Par la prima volta dopo del giardin del Èden, Sàtana e i so demoni no i podarà far pi gnente de bruto. Alora, podaremo viver felici e tranquili! No ndaremo mai pi restar ansiosi coi problemi che ghemo in questo bruto mondo. Noantri vederemo tante bele robe suceder in Paradiso. Par esémpio, quei che i ze maladi i gavarà salute e quei che i ze morti i ndarà ressussitar. Noantri podaremo viver dela maniera che Geovà el ga sempre volesto.
Geovà el ndarà benedir i so servi leai del passà che i ga infrontà dificoltà (Varda el paràgrafo 19.)
20. Cossa che volemo seitar a far?
20 Pol esser che ancora infrontaremo brute dificoltà, ma ne ocore gaver coraio par seitar leai a Dio. Par quela, volemo seitar a fidarse del tuto in Geovà e a obedirghe. Volemo anca seitar a mostrar el nostro amor par lu e provar che quel che Sàtana el ga dito sora noantri l’è una busia. Podemo esser sicuri che se seitemo leai a Geovà, lu el ndarà darne tante benedission e un futuro maraveioso!
CÀNTICO 153 Geovà, dame coraio
a (Giò 1:7, 8 ) Alora Geovà el ga domandà a Sàtana: “De ndove sito vegnesto?” Sàtana el ga rispondesto a Geovà: “Mi ero drio caminar in volta par la tera.” 8 E Geovà el ga dito a Sàtana: “Gheto visto el me servo Giò? No ghen’è nissuni compagno de lu nela tera. Lu l’è un omo sensa colpa e giusto, che teme a Dio e che el stà distante dele robe rugne.”
b (Giò 1:10, 11) No te ghè metesto un muro de protession intorno de lu, intorno dela so casa e intorno de tute le robe che lu el ga? Te ghè benedio el laoro dele so man e le so bèstie le se ga spaià nela tera. 11 Ma adesso, mete la to man sora tuto quel che el ga, e sicuro che el te maledirà nela to fàcia.”
c (Giò 1:12) Alora Geovà el ga dito a Sàtana: “Eco! Te pol far quel che te vol con tuto quel che el ga. Ma no stà mia tocarlo. Alora Sàtana l’è ndato via de davanti de Geovà.
d (Giò 2:2-6) Alora Geovà el ga domandà a Sàtana: “De ndove sito vegnesto?” Sàtana el ga dito a Geovà: “Mi ero drio caminar in volta par la tera.” 3 E Geovà el ga dito a Sàtana: “Gheto visto el me servo Giò? No ghen’è nissun compagno a lu nela tera. Lu l’è un omo sensa colpa e giusto. Lu el teme a Dio e el stà distante dele robe rugne. Anca se te proi farme ndar contra de lu par finirlo fora sensa che el mèrite, lu el seita a esser sensa colpa.” 4 Ma Sàtana el ga dito a Geovà: “Pele par pele. El omo el darà tuto quel che el ga par salvar la so vita. 5 Ma adesso leva su la man e ataca el so osso e la so carne, e sicuro che el te maledirà nela to fàcia.” 6 Alora, Geovà el ga dito a Sàtana: “Te pol far quel che te vol con lu, sol no stà mia coparlo!”
e (Giò 42:10-13) Dopo che Giò el ga pregà par i so amighi, Geovà el ga finio cola tribolassion de Giò e lo ga fato esser sior nantra volta. Geovà el ghe ga dato el dópio de quel che el gavea vanti. 11 Tuti i so fradei e sorele e tuti i so veci amighi i ze ndati catarlo e i ga magnà insieme a lu nela so casa. Lu el ghe ga fato pecà, e lori i lo ga consolà par tuto quel che Geovà ghe gavea assà suceder. Cada un de lori ghe ga dato un poco de soldi e un anel de oro. 12 Geovà el ga benedio a Giò de pi che prima: lu el ga bio 14.000 piégore, 6.000 cameli, 1.000 per de boi e 1.000 mui. 13 El ga bio anca altri sete fioi òmini e tre tose.